Tara, Puratena & Hupa Embo 8 Oviungura Vyombepo Ondjapuke

Omatjiukisiro

Metaha, panga randje. Me vanga okuserekarera ohunga nOmbepo Ondjapuke yaNdjambi Omunumuinyo. Tara koviperendero membo eperse ngunda amo pura tene kokasete nga. Tara kotjiperendero tji matji kongorere tji wa zuu ombosiro ndji.

Otjiperendero 1: Jesus Ma Rondo Keyuru

Oviungura 1:1-11

Tara kotjiperendero. Jesus ma rondo keyuru motjikamba. Ovahongewa (ovakongorere) ve mave tara ku mbi mavi tjitwa. Jesus Ondjambi kotjotjiri nEye we ere ozombura 2000 nda kapita kouye. Jesus wa kwatwa i yomusuko Maria, motjihuro Bethlehem. Jesus wa ri romundu okuturaisira kutja Ndjambi owani. Ovandu avehe va hihamisa Ndjambi omutima novitjitwa vyawo ovivi. Owo va tjita ourunde. Omberero yourunde ondiro nokuhumbururwa kokure na Ndjambi. Nungwari Ndjambi wa suvera ovandu avehe. Eye kena okuvanga kutja ve yende kotjomuriro, indwi oruveze Ndjambi ndwa tunina omberero. Jesus opa zokuya kombanda yehi okutjinda omberero yourunde wetu. Omberero ndji ondiro. Ovandu ovavi va tjita kutja Jesus ma te indu tji ve mu papera kotjikroise. Ovandu ovengi ve mu muna tja ta kotjikroise, nungwari ovakongorere ve ve mu muna tja za nokupenduka mondiro. Jesus we ve raera nai: "Ene mamu pewa omasa Ombepo Ondjapuke tji mai ya kombanda yenu, nu mamu kaserekarera ovandu ohunga na Ami." Mape hee kutja ovakongorere (ovahongewa) va Jesus va sokuserekarera ovandu ohunga na Jesus. Jesus tja za nokuyandja eraa ndi, wa ronda keyuru motjikamba, otja tji mamu mu nu motjiperendero. Eyuva rimwe Jesus ma kotoka momuano tjingewo kombanda yehi. Ovandu avehe mbe kambura mu Jesus nu mbe zuva ku Ye, ve notjiyandjewa tjomuinyo wuuruhe.

Otjiperendero 2: Ombepo Ondjapuke Mai Ya Nomuriro

Oviungura 1:1-12

Mo zemburuka kutja Jesus wa tja ma kahindira ovahongewa (ovakongorere) ve Ombepo Ondjapuke. Jesus tja za nokuronda keyuru, ovahongewa va tya okuworongana paamwe nokukumba. Imbo Ombepo Ondjapuke otji yeya kuwo. Pa kara nombosiro onene tjimanga, tjimuna otjivepo otjinamasa. Ovandu iyave munu otjina tjimuna omiriro. Vya hanika momaraka womuriro nga kahaama kombanda yomundu auhe omukambure. Owo ve urisiwa nOombepo Ondjapuke yaNdjambi nave utu okuhungira omaraka pekepeke ohunga noviungura ovi kumise. Jesus aruhe u yenenisa omarakiza we, orondu Eye wa hinda Ombepo ye Ondjapuke ku avehe mbe nonduviro ku Ye nu mbe kambura mu Ye.

Otjiperendero 3: Petrus Ma Zuvarisire Ovandu

Oviungura 2:14-41

Ombepo Ondjapuke ye ya kovahongewa mo Jerusalem meho rOvajuda. Moruveze ndwi mwa kara Ovajuda ovengi mo Jerusalem, otja tji matu munu motjiperendero. Owo iyave hungire omaraka omengi pekepeke Ombepo Ondjapuke iyai vatere ovahongewa vaJesus okuhungira omaraka omengi kokutja ovandu ve yenene okuzuva ombuze yaJesus. Nungwari ovandu tjiva iyave ripura kutja ovahongewa vaJesus va ndorongo. Mena ranao, omuhongewa umwe, Petrus, punovahongewa varwe omurongo na umwe, otji va sekama. Petrus wa hungira kuna wo na tja: "Ovarumendu mba kave purukisirwe i omavinu otja tji mamu hee." Ovandu ovengi va kambura mu Petrus. Owo va papitisiwa, tji tja ri otjisanekero tjokutja ourunde wawo wa kohwa. Owo wina va pewa Ombepo Ondjapuke nave utu okukongorera Jesus.

Otjiperendero 4: Okereka Youkriste Ondenga

Oviungura 2:42-47, 1 Ovakorinte 11

Ovandu ovengi mo Jerusalem va uta okukongorera Jesus. Ovandu mba mba pewa Ombepo Ondjapuke, va uta okuworongana pamwe otjomuhoko omunene. Oomuano okereka youkriste mbu ya uta. Ovandu mba kombunda va uta okuisanewa otjovakriste. Owo iyave hanasana owini wawo nave tumbasana. Eyuva arihe iyave i kondjuwo yaNdjambi, ondembeli onene moJerusalem. Imba opuyave tangere Ndjambi nokukumba. Ovaapostele wina mba isanewa kutja ovahongewa, iyave ve hongo okuza mEmbo raNdjambi. Ovakambure wina va worongana mozondjuwo nokurya pamwe. Povikando ovingi iyave teya omboroto, ave ri nave nu o orosa yomanyembere. Indwi rwa ri oruveze rwapeke nduyaru isanewa kutja otjiriro. Jesus ongwa raya kovahongewa kutja ngave tjite nao. Ongurova ndjo yokomurungu womapaperero waJesus, Eye wa kara nomariro tjingewo puna ovahongewa ve. Eye tja za nokukumba okutja okuhepa, wa kambura omboroto, e i teya ne i yandja kovahongewa ve. Omboroto ya ri otja otjisanekero tjorutu rwaJesus nduyaru sokuteyewa kotjikroise. Omuano mbwi Jesus wina otja toora omavinu na yandja kovahongewa ve kutja ve nwe. Ihi tja ri otjisanekero tjombindu ye ndji yai sokutirahiwa kotjikroise mena rawo. Jesus wa yandja eraa kovahongewa ve kutja ve tjite omariro nga okumuzemburukira ko. Mena ranao, auhe ngu kambura mu Jesus nokuzuva ku ye, opu mave zu okukara notjiriro hi, mena rokutja Embo raNdajmbi ma ri tja: "... aruhe tji mamu ri omboroto ndji namu nu motjinwino hi, ene mamu zuvarisa ondiro yaMuhona nga Eye tji mee ya."

Otjiperendero 5: Omuremane Omuningire Ma Verukisiwa

Oviungura 3:1 - 4:4

Eyuva rimwe Johanes na Petrus va ya kondjuwo yaMuhona, okutja okereka, okukakumba. Pomuvero mbo pa haamene omusyona. Eye wa kwatwa a remana nu kaa yenene okukawondja. Eye wa ningira ovimariva koo Petrus na Johanes. Nungwari Petrus wa hungira ku ye a tja: "Ovimariva ami hi na vyo nungwari ihi tji mbi na tjo me ku pe: Mena raJesus Kristus waNasaret, sekama u kawondje." Petrus wa kambura omurumendu ngwi ke ke re enene ne mu sekamisa. Tjimanga ozombaze novingombwe vye vya hara omasa. Eye wa hita mondjuwo yaMuhona puna Petrus na Johanes Eye wa kawondja na tuka peyuru na tanga Ndjambi. Ka ya ri Petrus ngwa verukisa omurumendu ngwi. Ongamburiro yaPetrus mu Jesus nomasa wOmbepo Ondjapuke yaNdjambi ondje mu verukisa. Eye wa pewa otjiyandjewa tjondengu onene okukapita ovimariva.

Otjiperendero 6: Omurumendu Nomukazendu Mba Kora Ovizeze

Oviungura 4:32-36, 5:1-11

Omurumendu wena Barnabas wa randisa ehi re ovimariva a yandja kokereka vi vatere ovasyona. Omurumendu warwe nomukazendu we, oo Ananias na Safira, va tya okutjita otjina tjingetjo. Nungwari Ananias wa isapo tjiva vyovimariva kuye nomukazendu we na yandja tjiva komuapostele Petrus. Eye wa korera Petrus ovizeze na tja imbyo imbi ri ovimariva mbya muna kovina mbi va randisa. Petrus we mu pura a tja: "Ananias okutjavi tji wa yandjere Satan kutja a rore omutima woye, u korere Ombepo Ondjapuke ovizeze mokuisako ovimarva tjiva mbi wa mumu tji wa zu nokurandisa ehi renu romakunino?... Ove ko wovisire ovandu nungwari wa wovisa Ndjambi." Ananias opa wira mbo na tu. Ovarumendu tjiva mba ri mbo ve mu toora nave ke mu paka. Kombunda yoruveze orusupi Safira wa hita mondjuwo. (Matu mu munu mbo motjiperendero). Eye kaa tji wa ohunga na mbya tjitwa ku Ananias. Safira eye wa kora ovizeze rukwao ohunga novimariva. Petrus otje mu raera a tja: "Ove nomurumendu woye mwa zuvasanene tjike okurora Ombepo yaMuhona? Tara, ovarumendu mba mba zu nokukapaka omurumendu woye, nambano va kurama pomuvero, nowo wina mave ku pitisa pandje!" Eye wa wa tjimanga pozombaze za Petrus na koka. Matu sokuvatera ovasyona, nungwari ka tu sokukorera omukwetu poo Ndjambi ovizeze. Nu zemburuka, Ndjambi u tjiwa omeripura omavi nomawa womundu auhe.

Otjiperendero 7: Stefanus Ma Zepewa

Oviungara 6:1 - 8:3

Tara! Ovandu ovavi mave zepa omurumendu wena Stefanus nomawe. Stefanus wa ri omurumendu omunane mokereka nu iya vatere ovasayona moJerusalem. Eye iya zuvarisa Embo raNdjambi nokuhinondira nu iya ungura ovihimise okuza momasa wOmbepo Ondjapuke. Ovajuda tjiva ve mu pirukira. Ve mu yeta komurungu watjombanguriro nave mu kuminine kutja ma yamburura Ndjambi nokupirura Embo raMuhona. Nungwari Stefanus kena patira mena rokutja Ndjambi we mu pa omasa okuza mOmbepo Ondjapuke. Stefanus wa raera Ovajuda kutja va zepa Jesus ngunda e ya kombanda yehi okuyandja Omuinyo waaruhe. Ovajuda va pindikira Stefanus ngaa tji ve mu twara pendje yotjihuro nave utu okumuveta nomawe. Ngunda owo amave mu zepa nomawe, eye wa kumba nai: "Muhona Jesus, yakura omuinyo wandje!" Ngunda ama tu wa kumba a tja: "Muhona arikana o ve verere ko ouvi mbwi!" Ovandu mba zepa Stefanus, va twire ozombanda zawo pozombaza zomutanda ngwa ri omunane wOvajuda. Ena re wa ri Saulus.

Otjiperendero 8: Omuyenda Waetiopie

Oviungura 8:4-8, 26-40

Saulus pamwe novanavita vokereka va uta okutatumisa ovakambure moJerusalem. Ovengi va taura okupita mo Jerusalem. Omurumendu wena Filipus wa ya koSamaria. Eye wa zuvarisa Ombuze ombwa yaJesus kovandu nowo ave kambura. Ndjambi wa hinda omuengeli okuraera Filipus kutja nga yende nondjira yokuti onguza ndji za mu Jerusalem okuyenda koGasa. Filipus wa zuva ku Ndjambi.

Motjiperendero hi matu munu omurumendu omunandengu okuza mehi raEtiopie. Eye wa ri mokatemba ke. Eye iya lese okuza mEmbo raMuhona ohunga nOmundu ngwa sere okutatumisiwa mouhasemba, nungwari omurumendu ngwi kaa zuu nawa ovina mbi. Ombepo yaMuhona ya raera Filipus kutja ma yende kokatemba ngo. Eye wa tupuka kokatemba na vaza omurumendu ama lese. Eye wa uta okusetururira omundu waEtiopie ohunga na Muhona Jesus ngwa hindwa i Ndjambi kouye. Omurumendu waEtiopie wina wa vanga okurira omukongorere waJesus. Ngunda amave kawondja mokatemba, wa pura ku Filipus a tja: "Tara omeva owonga, notjikena tji matji ndji tjaere okupapitisiwa." Filipus wa papitisa Omuetopi na yaruka nenyando kehi re. Filipus wa kawondja komurungu okuzavarisa Ombuze Ombwa movihuro ovingi. Otja Filipus, ete wina otji matu sokuserekarera ovandu varwe ohunga na Jesus nokukaranonduviro ku Ye, kokutja ovandu ve kambure mu Ye, nu wina ve kare nOmuinyo waaruhe.

Otjiperendero 9: Otjirimunikise Tjovipuka Ku Petrus

Oviungura 10:9-18

Eyuva rimwe Petrus wa ronda komututu wondjuwo okukakumba. (Imba ma mu munu Petrus ama kumbu) Eye wa tire ondjara nu iya vanga otjina okurya. Otja muna otjirimunikise okuza ku Ndjambi. Eye wa muna erapi enene nda za keyuru mu mwa ri ovipuka ovingi pekepeke. Eraka ra raera Petrus a ri tja: "Sekama Petrus, zepa u rye." Petrus wa ri Omujuda, nu otja koveta yOvajuda kaa sere okurya onyama yovipuka mbyo, mena rokutja vya ri ovihakohoke. Petrus opa zokutja: "Indee uri, Muhona!Ami hina indu mba rire otjina otjizerikwa poo otjihakohoke." Eraka nda hungirire kuna ye otji ra tja: "Imbi Muhona mbya vara otja ovikohoke o vi vara otja ovihakohoke." Imbi vya tjitwa ovikando vitatu nu erapi ndi otji ra yaruka keyuru. Petrus ngunda a kumwa nomaheero wotjirimunikise, ovarumendu vetatu ve ya kondjuwo ye okumupaha. Tara kotjiperendero tji matji kongorere nu mo munu kutja ve ya okupaha tjike.

Otjiperendero 10: Ombuze Ombwa Komihoko Avihe

Oviungura 10:1-48

Petrus tja mana okukumba, ovarumendu vetatu va hita na ve ya ku Petrus. Owo va zire kotjihuro tjarwe nu va ri ava hindwa: omurumendu wena Kornelius. Kornelius wa ri omurumendu omunane wotjirate tjaRoma. Eye wa ri nondero okuyozika Ndjambi. Omuengeli waMuhona we mu raera kutja nga kapahe Petrus. Ovajuda iyave vara Ovaroma otja ovahakohoke, nungwari Ndjambi wa raera Petrus motjirimunikise kutja kapena omuhoko mbu ri omuhakohoke poo omuhayapuke. Omurumendu (nomukazendu) auhe ngwa yozike Ndjambi na tjiti mbi ri ovisemba, Ndajmbi me mu yakura, kutja owo muhoko une ngamwa. Petrus wa ya pamwe novarumendu kondjuwo yomunane wovita wOvaroma. Kornelius wa wira pozombaza zaPetrus ne rikotamene ku ye. Nungwari Petrus wa tja nai ku ye: "Sekama, ami owami omundu otja ove... Nambano ami me pura kutja mwe ndji isanene tjike?" Kornelius wa raera Petrus ohunga no muengeli. Petrus otja raera Kornelius ohunga na Jesus ngwe ya okuraisira ovandu kutja Ndjambi owani. Kornelius nomuhoko we va kambura mu Jesus nave pewa Ombepo yaNdjambi nave rire ovakongorere vaJesus. Ndjambi wa suvera ovandu avehe, womaraka aehe nu womihoko novivara ngamwa. Jesus ke yerere okuyama Ovajuda aveerike. Eye U vanga okuyandja Omuinyo Waaruhe kovandu avehe. Eye u vanga kutja omihoko avihe vi kambure mu ye nu ve mu karere.

Otjiperendero 11: Petrus Motjovakamburwa

Oviungura 12:1-11

Ombara Herodus wa uta okutatumisa ovakongorere vaJesus, imba mbe ri okereka yovakriste. Eye wa tjita kutja omuapostele Jakobus ma te na hitisa Petrus novaapostele varwe motjovakamburwa. Eyuva rimwe utuku Petrus wa kutirwe na rara pokati kovatjevere vevari. Tjimanga pa kurama omuengeli waNdajmbi nu motjovakamburwa mwa yera ondjerera. Omuengeli wapendura Petrus na tja: "Hakahana!Penduka!" Tjimanga ouketanga wa wa okuza komake wa Petrus na kongorere omuengeli okupita motjovakamburwa. Omivero vyovitenda vyondorongo vye ripaturukira ovini nu ka pe na omundu ngwe mu tjaera. Petrus we ripura kutja ma roto nga tje ya momuvanda wotjihuro nomuengeli e he ri puna ye rukwao.

Otjiperendero 12: Petrus Nomapnga We Wongumbiro

Oviungura 12:12-19

Petrus tja pita mondorongo wa ya kondjuwo yaMaria. Eye ongwa ri ina yomuapostele umwe. Ovakambure ovengi va woronganene poya Maria okukumbira Petrus. Petrus wa kongora komuvero nomukazona omukarere wena Rode wa ya okuka paturura omuvero. Tja zuva eraka raPetrus ka patururire omuvero, nungwari wa yaruka okukaraera ovakwao kutja Petrus u ri pomuvero. Owo kave kamburire nave tja: "Ove wa puruka ozondunge. " Nungwari Petrus wa kongora rukwao nga tji va parurura omuvero. Tji ve mu munu va kumwa tjinene. Petrus we ve serekarera omuano Ndjambi mbwa zuvira ozongumbiro zawo ne mu pitisa mondorongo. Ovakambure mave sokuya pamwe aruhe okukumba. Ndjambi u zuvira ozongumbiro zovandu mbe kambura mu Jesus. Jesus omuini wa tja: "Me raere ene rukwao: aruhe vevari venu tji va zuvasana otjina ngamwa tji mave kumbire, indino Tate meyuru me ve tjitire, orondu vevari poo vetatu tji va worongana mena randje, Ami omunga mbi ri mokati kawo."

Omatjiukisiro

Moviperendero mbi mbi mavi kongorere me vanga okukemuraera ohunga nomurumendu wena Saulua. Eye wa ri pondiro yaStefanus. Saulus wa tya okuyenda kotjihuro tjena Damaskus. Eye iya vanga okukakambura ovakambure nokuvepatera mondorongo. Mouyenda we pa tjitwa otjihimise. (Tara kotjiperendero)

Otjiperendero 13: Ondjerera Neraka Okuza Meyuru

Oviungura 9:1-9

Ondjerera ondwe ya yera okuza meyuru nu Saulus wa wira pehi. Eraka ra tja nai ku ye: "Saul, Saul mo Ndji tjerere tjike okundjizepa? Saulus wa pura: "Oove ani, Muhona? Eraka ra tja: OwAmi Jesus ngu mo tjere okundjizepa." Ovarumendu mba ri puna Saulus, va zuvire eraka ndi, nungwari kave na mundu ngu va muna. Saulus wa sekama, aa potupara, Ovarumendu ve mu nana pokuwoko okumutwara koDamaskus. Saulus wa kara omupotu oure womayuva yetatu. Eye kena pa rya poo okunwa otjina. Saulus wa tatumisire ovakambure tjinene. Nungwari Ndjambi u yenena okutanaura omundu ngamwa. Puratena ku vyarwe mbya tjitwa komurungu.

Otjiperendero 14: Omupotu Saulus Puna Ananias

Oviungura 9:10-20

Imba matu munu omupotu Saulus mondjuwo moDamaskus. Ndjambi wa hinda omurumendu wena Ananias ku ye. Ananias wa ri omukambure nomukongorere waJesus Kristus. Eye iya tjiwa ovina avihe ovivi Saulus mbyaa tjiti kova kambure moJerusalem. Ananias wa kara nonduviro na i ku Saulus. Ananias wa tja nai ku Saulus: Mukwetu Saul, mba tumwa: Muhona Jesus omuini ngwe rimunikisire kove mondjira tjiyo ya ngunongwi, ongwe ndji hindi kokutja u yenene okumuna rukwao nu u urisiwe nOmbepo Ondjapuke." Ananias wa yambeka Saulus omake nu tjimanga Saulus wa uta okumuna. Eye wa pewa Ombepo Ondjapuke na papitisiwa kokutja ma raise kovandu kutja wa rire omukongorere waJesus. Saulus tja za mbo otja ya kOvajuda ne ke ve raera ohunga na Jesus. Ete matu sokukara otja Ananias natu ha tira ovandu. Ndjambi otji ma sora okukuungurisa okuraera ovandu varwe ve yamwe.

Otjiperendero 15: Okereka Ndji Kumba Mai Hindi Ovahindwa

Oviungura 11:25-26, 13:1-3

Motjihuro tjena Antiokie pa worongonene ovakambure mbuyave kumbu. Ovandu mba omba ri okereka ya Antiokie. Iyave isanewa kutja Ovakriste Saulus wa ya puna Barnabas okukahonga ovandu ngo. Eyuva rimwe ovanane vOkereka va worongana okukumba noku ri tja era kovikurya. Ombepo Ondjapuke ya hungira kuna wo a i tja: "Ndji toorore reye Barnabas na Saulus kutja ve ungure otjiungura Ami tji mbe ve isanena." Ndjambi iya vanga kutja Saulus na Barnabas ve yende kovandu mbe hiya zuva ohunga naMuhona Jesus. Potjiperendero hi mo yenene okumuna Barnabas na Saulus tji va woro ozongoro. Ovanane vOkereka ve ve yambeka omake nave ve kumbire. Otji va hinda Barnabas na Paulus okukahonga ovandu mbe ri kokure na Antiokie ohunga nOmbuze Ombwa yaJesus. Jesus wa tja: "Otji mwa sokuyenda koviwana avihe ngamwa akuhe mu kaise po ovandu ovahongewa vandje."

Otjiperendero 16: Paulus Ma Zuvarisa Ohunga Na Jesus Kristus

Oviungura 13:4-52

Saulus na Barnabas va ya kovihuro ovingi vyokokure. Okuza koruveze ndwi Saulus otja uta okuisanewa kena epe, Paulus. Owo iyave woronganene mozondjuwo zongumbiro zOvajuda, otja tji mamu munu motjiperendero Owo iyave hongo ovandu ave tja: "Ndjambi wOvajuda wa toororere ootate ne ve pe ovahonge nova nave novaprofete. Owo iyave serekarere ohunga na Umwe ngwaa sokuya okuveyama kourunde. Eye ongu ri Muhona Jesus Kristus. Jesus tje ya ovengi vOvajuda kave kamburire mu Ye. Kaave tjiwa nu wina kaave zuu nawa kutja Eye owani, nu kave vangere okurikotamena ku Ye, ngwa hindwa i Ndjambi." Paulus na Barnabas va honga ovandu kutja nandarire kutja Jesus kena tja zunda, ovandu ve mu zepa. Ndjambi we mu pendura mondiro. Eye kanaa tu rukwao. Nambano omundu auhe ngu ma kambura mu Jesus, ma yakurwa i Ndjambi nowo mave hangana na Ndjambi. Nu ku imba mbe keyakeya nave nenuna owatjiri waNdjambi, mave verwa i Ndjambi. Ovajuda tjiva novandu varwe ovengi woviwana vyarwe va kambura mombuze ndji nu ozokereka ozengi otji za zikama, nungwari ovengi varwe kave kamburire. Ovandu kamaave kambura, ete tji tu hina ku ve serekarera ohunga na Jesus. Nungwari Ndjambi u vanga kutja omunda auhe ma zuve nu ma kambure mOmbuze Ombwa nu ve yamwe.

Otjiperendero 17: Ndjambi Ma Hongorere Paulus Rukwao

Oviungura 16:6-10

Ozombura zokombunda yanao Paulus wa ryangera ozokereka nda rukwao. Eye wa twaerera ovarume ndu tjiva puna ye. Silas wina wa ya pamwe. Owo iyave vanga okuyenda koBetanie, nungwari Ombepo Ondjapuke kai ve yandjerere. Outuku mbo Paulus wa muna otjirimunikise. Motjirimunikise wa muna omurumendu wehi raMakedonie ngwe mu raera nai: "Konda nguno koMakedonie u yekutuvatera." Tjimanga Paulus wa tjiwa kutja Ndjambi me mu isana okuyenda koMakadonie. Ndjambi ma hongore re ovandu mbe kongorera Jesus. Ovikando tjiva U yandja omuhunga komundu okuza moturoto na movirimunikise, nungwari povikando ovingi u tu hongorera okuza mEmbo re, Ombeipela. Ovakambure mave sokupura Ndjambi okuvehongorera mu avihe mbi mave ungura. Owo mave sokukambura kutja Ndjambi ma yenene okuve urikira kutja mave sora vi okuzuva ku Ye otja Eye tji ma hongora mEmbo re nOmbepo Ondjapuke.

Otjiperendero 18: Paulus Na Silas Momanyinganyingiro Wehi

Oviungura 16:16-35

Paulus na Silas va kara nonduviro na ve i ku Filipi moMakedonie. Ingo owo va kahonga ovandu ohunga na Jesus. Owo va pitisa ombepo ohakohoke mena raJesus Kristus mokanatje okakazona. Ihi tja pindikisa ovandu tjiva. Owo va tona ooPaulus na Silas nave umbwa mondorongo. Mokati koutuku owo va uta okukumba nokuimbura omaimburiro wondangero ku Ndjambi. Tjimanga pa kara omanyinganyingiro wehi. Omivero vya paturuka nouketanga wovakamburwa wa kutuka. Omutjevere wondorongo we ripura kutja ovakamburwa avehe va hene. Eye wa tira tjinene nga tja vanga okurizepa. Paulus otje mu isana a tja: "O ritjiti omuini otjipo! Ete atuhe omu tu ri!" Omutjevere wondorongo otja isanena Paulus na Silas pendje neve pura kutja: "Vahona vandje, hi tjite vi kutja mbi hupisiwe?" Owo va zira: "Kambura mu Muhona Jesus, nu mo hupisiwa, ove nonaganda yoye." Omutjevere wondorongo nonganda ye va twa ongamburiro yawo mu Jesus nu va muna ondjoroka onene. Omutjevere wondorongo wa tuna ooPaulus na Silas nawa nomuhuka warwe we ve kutura momapando. Owo va pita nave ryanga otjovakuturwa. Ete tji tu ri motu ve ze otuzeu, tjingee matu sokutanga Ndjambi. Ete tji matu takama mu Ndjambi na tu zuu kEmbo re, matu yenene okumukarera ngamwa pu tu ri.

Otjiperendero 19: Paulus Notjipunguhiro Tjandjambi Ngu He I We

Oviungura 17:16-34

Otjihuro Atene tje urire noomukuru wovisenginina. (Ovandu tji va ungura otjina tji va zu mbo ave utu okukumba kutjo, okutja otjo otjisenginina.) Ovandu iyave kumbu koomukuru ovengi. Motjipendero hi Paulus ma tara kotjipunguhiro. Omambo nga tjangwa ko maye tja: "Ku Ndjambi ngu he iwe. " Ovarumendu va Atene iyave vanga okutjiwa Paulus mbye honga kovandu; opa zokuveraera nai: "Ene vaAtene, ami me munu kutja mu avihe ene owene ovanangamburiro tjinene. Ami tjinga amba ryanga motjihuro tjenu nokutara pona apehe pu mu rikotamenena, otjinga amba muna otjipunguhiro ku kwa tjangwa nai: "Ku Ndjambi ngu he iwe." Me vanga okumuserekarera ohunga na Ndjambi ngwi, ingwi ngu mu ha tjiwa." Paulus we ve serekarera ohunga na Ndjambi ngwi ngwa uta ovina avihe. Eye ongu ri ye ngwa uta eyuru nehi. Eye ka tura mozondembeli nda tungwa komake wovandu. Paulus we ve raera kutja moye yenene okutjiwa Ndjambi ngwi okuza mu Muhona Jesus Kristus ngwa pendurwa: Ndjambi mondiro. Ovarumendu tjiva ve mu yora, nungwari varwe iyave vanga okuzuva ovingi ohunga na Muhona Jesus Kristus. Tjiva ve ya kongamburiro yatjiri. Jesus me ya rukwao okuyekupangura omundu auhe. Eye ongu ri Omuyame erike. Kapena Ndjambi warwe poo ongamburiro ndji mai ku yama kourunde. Ngatu kare ovatakame otja Paulus nu tu kambure mu Jesus Kristus. Atu tira okuserekarera ovandu ohunga na Ye, kutja owo wina ve mu karere.

Otjiperendero 20: Paulus Komurungu Wotjombanguriro

Oviungura 18:1-17

Otja tji mo munu motjiperendero, Paulus u ri moumba rukwao. Eye u ri motjihuro oKorinte. Mwa ri novandu ovavi (ovarunde) motjihuro ho. Ovajuda vaKorinte va pirukirire Paulus tjinene, mena rokutja wa raerere Ovajuda kutja Jesus ongu ri Kristus (Mesia Outuku umwe Jesus Kristus wa hungira kuna Paulus e mu raere kutja: "O tira, nungwari hungira nu o rihahiza. Ami tjinga ambi ri puna ove. Kape nomundu ngu me ku tjitiotjipo, orondu ovature ovengi motjihuro hi owo ovandje."

Paulus opa za okukara moKorinte, maa hongo ovandu nu ovengi va kambura ombuze ndji. Nungwari Ovajuda va ri ne ruru na ye nave mu pirukire. Eyuva rimwe ve mu wira nave mu twara kotjombanguriro. Owo ve mu kuminina kutja u zuvarisa ovina vyoposyo kovandu. Nungwari omunane wotjihuro kaa vanga okupuratena kuwo ne ve ramba motjombanguriro. Pendje notjombanguriro Ovajuda va katona omunane wOvajuda ngwaa kambura mu Jesus. Nungwari Paulus kenaa wa tunwa. Atu zu ko okuserekarera ohunga na Kristus, nandarire ovandu ovavi mave tu pirukire. Ndjambi wa kwizika kutja ma kara puna avehe mbe mu kongorera (karera).

Otjiperendero 21: Ovarwe Wovita Mave Yama Paulus Kovanavita

Oviungura 21:1 - 22:24

Paulus wa yaruka okukaryangera ozokereka nda zikama oruveze oruveze orupe. Eye iya zeuparisa ovakambure okunkogorera Jesus. Ovakambure tjiva ve riheka ku Paulus okutja a ha i ko Jerusalem. Owo iyave tjiwa kutja ovanavita na ye ve ri ngo nu meve ke mu zepa. Nungwari Paulus wa tja: "Ami kakutja mbe rirongerere okukapandekerwa moJerusalem porwakwo, nungwari wina mbe rirongerere okukatira Muhona Jesus kona ngo." Paulus oruveze orusupi ndwa kotoka moJerusalem. Ovajuda otji va tjita kutja ovandu ve mu pirukire. Otjimbumba tjovandu tja vanga okumuzepera momivanda vyotjihuro. Ovarwe vovita vOvaroma otji ve mu isapo mokati kovandu mba ri ava pindike. Paulus otja ka kurama pozondondo pomurungu wondjuwo yo varwe wovita na hungire ku novandu. Owo va uta okuura omave tja: "Nga ze po! Nga te! Eye ka pwire okukara nomuinyo!" Ovarwe vovita va hitisa Paulus moukoto wondorongo kokutja ovandu ave he mu zepa. Paulus kaa tira okuta. Eye iya tjiwa kutja meyuru mu nondjambi ndji undja imba mbe hihamisirwa Jesus.

Otjiperendero 22: Paulus Ma Zuvarisire Ozombara

Oviungura 23:11, Oviungura 25

Ovajuda tjiva va kara nondando yokuzepa Paulus. Nungwari Muhona Jesus we rimunikisa ku Paulus a tja: "O tira! Ove we Ndji hongonona muno moJerusalem, nu wina katjite tjingetjo moRoma." Ovanane wOvajuda va kakuminina Paulus ondjo komurungu womupangure wOvaroma, neye eke mu hinda kombara Agripa. Owo mbo avehe mo ve munu motjiperendero hi. Paulus ke na mundu ngwaa tira. Eye wa serekarera ohunga naJesus kombara yopondomba, kozombara zarwe nga komukazendu wombara. Eye we ve serekarera omuano Jesus mbwe rimunikisa kuye mondjira okuyenda ko Damaskus na tje mu hinda okuzuvarisa Ombuze Ombwa kovandu ve. Obara Agripa wa har okukambura mu Jesus. Eye iya tjiwa kutja Paulus kena tja zunda. Paulus wa ningira okupangurwa i Omukesare moRoma. (Eye iya vanga okupangurwa mombanguriro yOvaroma.) Agripa wa yandjera Paulus ma yende Moruveze ndo oRoma otji tjari otjihuro otjinene mouye nomukesare ngwa ri omunane omunandengu wa turire mo. Ndjambi wa ri nondunge yapeke nomuinyo waPaulus. Eye wina u nondunge yapeke na auhe wetu. Ete ombango yaNdjambi nominyo vyetu matu i vaza mEmbo re. Matu sokuKara nonduviro ku Ndjambi.

Otjiperendero 23: Ndjambi Puna Paulus Moumba

Omiungura 23:13-44

Ovarwe wovita va twara Paulus novapandekwa varwe koRoma. Owo iya ve soku wonda moskepi okukonda munda mbwina. Oskepi ndji otji ya kondjisiwa i yotjivepo otjizeu oure womayuva omurongo na yane. Ovandu mbo ri moskepi ndji ve ripura kutja mave tu. Omuengeli wa Muhona wa hungira kuna Paulus a tja: "O tira Paulus! Ove mo sokukakurama komurungu wombara yopondomba. Nu Ndjambi mena rouwa we kove wa yama ominyo vyovarumendu avehe mbe ri puna ove mondjuwoyomeva." Karure oskepi ya vaza mene yo mukuro nozongazona za uta okuiteya. Ovandu va uta okururuma munda mbwina. Ovandu tjiva iyave tjiwa okutjaara (okuyova) nungwari imbo ovarwe ve ritiza movitekero vyoskepi. Owo avehe va vaza nawa kombanda yehi. Me hungi ndi matu yenene okurihonga mo kutja: Ndjambi tje notjiungura tji ma vanga kutja tu ungure, Eye wina u nomasa okutuyama komaumba ayehe.

Otjiperendero 24: Paulus Otjomupandekwa Moroma

Oviungura 28:16-31

Imba matu munu Paulus moRoma. Eye wa kara oure wozombura mbari otjomupandekwa. Eye wa yandjerwa okukara mondjuwo ye, eye ndjaa zema, ama tjeverwa i yomurwe wovita vOvaroma. Eye iya yakura ngamwa auhe ngwe ya kuye pondjuwo ndji. Eye iye ve hongo ohunga nouhona waNdjambi na Muhona Jesus Kristus. Eye wina iya tjanga ozombapira kozombongo nduya ryangere, ngunda e hi ya kamburwa, okuvehonga komurungu. Ozombapira nda ze ri mo Mbeipela kokutja ovandu avehe ve rihonge ozondjira ze. Paulus wa tatumisiwa tjinene mena raJesus (rOmbuze Ombwa). Eye aruhe iya tonwa nokuvetwa nomawe, iya kara nondjara nokuhina pu ma rara. Komaandero eye wa ka ta iyOvaroma. Nungwari Paulus mombapira ye kOvaroma ma tjanga kovakambure mouye auhe: "Ami mbi tjiwa, tjiri, kutja kape notjina tji matji sora okutupora korusuvero rwaNdjambi: nangarire ondiro, nangarire omuinyo, nangarire ovaengeli, nangarire ovinauvara vye yuru, nangarire ovinamasa, nangarire ovina vyanambano, nangarire vyokombunda, nangarire eyuru kombanda, nangarire otjovasengwa kehi - kamu notjina nangarire tjimwe moviutwa avihe tji matji yenene okutupora korusuvero rwaNdjambi, ndu ri orwetu mu Kristus Jesus oMuhone wetu." Ndjambi u yandja omasa ku avehe mbe kambura mu Muhona nOmukuture Jesus Kristus. Ngatu mu karere nokuhandjaura ombuze Ye, kokutja ouye auhe u tjiwe kutja Jesus we tu tunina Omuinyo Waaruhe ku Ndjambi.