Talenu, Ivwililenu Na Kuyoya 8 Mukanda Wamuchitanu Nayitatu Vilinga Vya Shipilitu Wajila

Talenu, Ivwililenu Na Kuyoya 8 Mukanda Wamuchitanu Nayitatu Vilinga Vya Shipilitu Wajila

เค้าโครง: The Young Church and Paul. 24 sections. It has a picture book to go along with the recording.

รหัสบทความ: 425

ภาษา: Luvale

หัวข้อ: Sin and Satan (Spiritual Warfare, Deliverance); Christ (Ascension); Eternal life (Salvation); Character of God (Holy Spirit, Word of God (the Bible), Power of God / Jesus); Living as a Christian (Worship, Church, Christianity, No other gods, idols, Repentance, Faith, trust, believe in Jesus, Children of God, Spiritual Life, Christian values); Bible timeline (Gospel, Good News); Problems (Problems, troubles, worries)

ผู้ฟัง: General

รูปแบบ: Monolog

ประเภท: Bible Stories & Teac

เป้าหมายของสื่อบันทึกเสียง: Teaching

ข้ออ้างอิงจากพระคัมภีร์: Extensive

สถานะ: Translation

เนื้อหาบทความ

Kulumbununa

Kulumbununa

Tunamimeneka mwane. Kuli nangula chetu ngunasake ngumilwezeko vya Shipilitu Wajila waKalunga ou wayoya. Tutalenu mumivwimbimbi yosena yili muno mukanda waulombo usweuluka. Oku tuli nakwivwilila kuli akakachisaji. Alumuna muvwimbimbi ukwavo omu nawivwa echi kwimba. (Kwimba)

Muvwimbimbi watete (1) Yesu mwahiluka mwilu

Muvwimbimbi watete (1) Yesu mwahiluka mwilu

Vilinga 1:1 - 11

Talenu ou muvwimbimbi. Yesu nasanguka kuvafu ali na kuya mwilu mumavwi. Tumbaji twenyi valinaku mushishika. Mwomwo ika alinakuya? Hakuputuka Yesu apwilenga naKalunga hamwe, munahichi lyehi makomba kaji avali amyaka naku hakilaho ejile kufuma mwilu kwiza hano hamavu. Ikiye asemukile, kuhichila muli Shipilitu Wajila, kuli mujike walijina lyaMaliya mulimbo lya Mbetelema. Yesu ejile muutu mangana alumbunune kufwana chaKalunga. Kalunga afwila etu tuvosena tupwenga tuvakulikata nenyi. Numba tuhu ngocho, etu tunapunga tuvaka kulikanga kuli Kalunga, nakujiha usoko wetu naikiye. Mukiko mujila yimwe tunasawishila Kalunga nakulinehela jisonyi hali etu vavene. Tuvosena tunatwame mujisonyi jetu nahashili. Kuzangamisa chashili chikiko kufwa. Oloze Kalunga azanga vatu vosena. Atulingila lyehi jila yakutuneha kuli ikiye. Amutumine Yesu hamavu afwenga hasonyi jetu naha jishili jetu muvihela vyetu. Vatu vavapi vamujihile Yesu hakumu papalila ha chitondo chaku sepasana, chipwe muli ikiye kamwapwile kumu saula Kalungako. Kufwa chenyi chikiko chakuneha chivwasano chakulikata na Kalunga na Yetu. Vatu vavavulu vamumwene omu afwile haze hakulusu, tumbaji twenyi nava kakumukavangiza vakiko nawa vamumwene omu asangukile kufuma kuvafu. Hakiko vene haze avalwezele ngwenyi, “Yenu namuka tambula ngolo hakwiza chaShipilitu Wajila hali enu; kaha enu namukapwa muvinjiho jami muYelusalema, na muYuleya mwosena, muSamaliya, nakusongosongo jamafuchi.” Kaha omu alingile navahane lushimbi elu, Yesu aliyilile kwenyi mwilu mumavwi, nganomu munamumono hano ha muvwumbimbi. Shikaho likumbi limwe mwakahiluka hano hamavu, muupahu akasopese vatu vosena hamavu. Vatu vosena navevwa mujimbu wamwaza wa Yesu, kumufwelela ikiye nakumuhana ulemu ikiye, uli nawana wakuyoya mu upahu wahaya myaka naKalunga nge mwa vana venyi. (Kwimba)

Muvwimbimbi wamuchivali (2) Shipilitu Wajila mweza nakakahya

Muvwimbimbi wamuchivali (2) Shipilitu Wajila mweza nakakahya

Vilinga 2:1 - 12

Omu alingile nayi lyehi mwilu tumbaji twenyi valikungulwile muzuvo valombelemo. Chapwile ngocho kaha mwapwile vyema vyafumine mwilu, nge peho yayinene yahuhwile. Kaha vatu vamwene tuvyuma twakulifwana nge tumalimi twakakahya. Tuze tumalimi twakakahya twalitengekele kupwa tumalimi twamilangi yakakahya twejile twatwamine hali vakakwitava vosena. Kaha vazalile na Shipilitu Wajila wa Kalunga, nganomu avashikile Yesu, vaputukile kuhanjika milimo ya upahu waKalunga mumalimi eka. Mwamuchano Yesu eji kulinga nga nganomu atushika; amutuma lyehi Shipilitu Wajila kuli vatu vosena ava veji kumuvumbi kanga nakulihana chosena nakufwelela muli ikiye. (Kwimba)

Muvwimbimbi wamuchitatu (3) Petulu mwambulula mazu kuli vatu

Muvwimbimbi wamuchitatu (3) Petulu mwambulula mazu kuli vatu

Vilinga 2:13 - 41

Omu Shipilitu Wajila waKalunga ejile hali tumbaji vapwile munganda yaYelusalema mulifuchi lya vaYuleya. Hamakumbi aze vaYuleya vapwile vavavulu muYelusalema, mwomwo vavavulu vejile kuze vafuminyine kumafuchi eka nakulinga chilika chavaYuleya. Vahanjikile malimi eka na eka amavulu. Shipilitu Wajila akafwile tumbaji twa Yesu kuhanjika malimi awa mangana vatu vevwenga nahakuva alumbunukila mujimbu wakumuvuluka Yesu mumalimi avo. Oloze vatu vavajinyine ngwavo ava vakakumukavangiza Yesu vanapende wala. Umwe wavo apwile ikiye Petulu, emanyine nakwamba ngwenyi, “Ava malunga kavapendeleko nganomu munavajinyina vakiko vanazale na Shipilitu Wajila.” Kaha vavavulu vetavilile mazu aPetulu, vavajimikile chikiko chinjikizo chakwalumuka kufuma kushili. Vatambwile na Shipilitu Wajila kaha vaputukile kukavangiza jino muze mu jindondelo ja Yesu. (Kwimba)

Muvwimbimbi wamuchiwana (4) Tembele yavaka-kulishitu vakulivanga

Muvwimbimbi wamuchiwana (4) Tembele yavaka-kulishitu vakulivanga

Vilinga 2:42 - 47; Ikolinde 11

Ha likumbi lize vatu vavavulu muYelusalema vamufwelele Yesu, vapwile jino vakakumukavangiza. Vatu vaze vamutambwile Shipilitu Wajila valikungulwilenga hamwe kupwa tanga yayinene chapwile jino kuputuka cha liuka lyavaka-kulishitu. Numba jino hakutwalaho nava vavuluka ngwavo vaka-kulishitu. Valipangilililenga vikwata vyavo umwe namukwavo valaminenga mwavo. Hakumbi hakumbi vayilenga kutembele yayinene yaKalunga munganda. Mukiko vapwilenga nakulombela nakumwalishila Kalunga vosena hamwe. Tumbaji, vakiko vapwile jino tuposetolo, vaka kunangula mazu aKalunga. Vaka-kulishitu valikungulwilenga kumazuvo avo, valipangililenga kulya chavo. Hajilwola jimwe valilenga kulya chavo hamwe vachivulukilenga ngwavo, Kulya cha Mwata. Yesu avalwezele tumbaji twenyi kutwalililangaho nakulinga momumwe. Haufuku uze shimbu kanda Yesu vamusukuke, atwamamine nakulya natumbaji omu alingile hanasakwilila lyehi ambachile chindanda achipuzwile nakuhana kuli tumbaji twenyi. Chindanda chinapu chinjikizo cha mujimba wa Yesu ou navaka-jihila hali enu hakulusu. Mwomumwe nawa ambachile nalupasa avahanyinelwo tumbaji twenyi vamwemo. Vyakunwa vinapu vyakutwanukisa manyinga enyi aze navakahichishila hali vakiko hakulusu. Yesu avashikile tumbaji twenyi vakalingemo nakumwanukilangaho ikiye. Shikaho weshowo mwa mufwelela nakulihana ivene kuli Mwata Yesu mwalama Kulya cha Mwata, nganomu amba Kalunga mumazu enyi, “Enu hakutwama kumesa nakulya echi chindanda nakunwa mulupasa elu, muli nakuvilika kufwa cha Mwata palanga nomu mweza.” (Kwimba)

Muvwimbimbi wamuchitanu (5) Mukaluuta navamuka

Muvwimbimbi wamuchitanu (5) Mukaluuta navamuka

Vilinga 3:1 - 4:4

Likumbi limwe vaPetulu na Yowano vayile kutembele yaKalunga nakulomba. Muka-kulomba lomba atwaminenga kuwingililo. Atwaminenga muluuta kufuma hakusemuka chenyi kahashilenga kutambukako. Avalombele vaPetulu na Yowano mali. Petulu ambile kuli ikiye ngwenyi, “Kangweshi namaliko, oloze na ngukuhana ocho ngulinacho. Mulijina lya Yesu wakunazaleta, katuka, tambuka!” Petulu amukwachile kulivoko lyenyi lyachilyo, amukafwile kumwimika. Kaha mahinji natukukunya twauze lunga twajikijile nangolo. Ikiye ayile mutembele hamwe na Petulu na Yowano. Aputukile nakutambuka, nakutumbwojoka nakuwahilila, nakumwalisa Kalunga nawa. Kachi nge Petulu ikiye ahindwile uze lungako. Lufwelelo muli Yesu nangolo jaShipilitu Wajila yaKalunga lwamuhindwile ikiye. Atambwile wana wa mwenemwene kuhambakana mali. (Kwimba)

Muvwimbimbi wamuchitanu naumwe (6) Valunga napwevo vaze vaka-kwonga

Muvwimbimbi wamuchitanu naumwe (6) Valunga napwevo vaze vaka-kwonga

Vilinga 4:32 - 36; Vilinga 5:1 - 11

Lunga walijina lya Mbalanape alanjishile mavu enyi nakuhana mali kuliuka likafwe vaka-kuhutwa. Valunga napwevo nawa, vapwile Ananiya na Safwila, navakiko valishikile kulinga momumwe. Oloze valiswekelele mali amwe kupwa avo. Ananiya anehele kaha chimbwa kuli Petulu. Nakumwonga Petulu, nakumulweza ngwavo awa akiko mali osena. Oloze Petulu atachikijile ngwenyi nongo, kaha ahanjikile kuli Ananiya ngwenyi, “Ananiya, chinapu ngachilihi numba umwonge Shipilitu Wajila nakuliswekela mali amwe ove yavene aze unalanjisa mavu? Ove kawongele vatuko oloze Kalunga.” Ananiya aholokele hamavu wakufwa. Malunga vakweze vamwe vamumbachile nakumufunda. Na Safwila nawa engililemo naikiye. Katachikijile vize vyamusolokelele lunga lyenyi Anananiyako. Safwila naikiye nawa ongele kuli Petulu aha mali. Petulu ahanjikile kuli ikiye, “Mwalivwasanyinanga ika ove kumweseka Shipilitu ya Mwata? Tala! Mahinji amalunga aze ali kuchikolo, nava kutwala na yove nawa.” Haze vene aholokele hamavu kumahinji aPetulu nakufwa. Ananiya na Safwila kava mwononokele Kalunga na Shipilitu yenyiko hakumwonga. Valifwanyishile kupwa vamwenemwene, oloze vakiko valiswekelele cheka amali muwiji. Kalunga atachikiza vya mwaza navishinganyeka vyavipi muli etu tuvosena. Kakweshi chuma chimwe chakuswekako kuli ikiye. (Kwimba)

Muvwimbimbi wamuchitanu naivali (7) Setefwano navamujiha

Muvwimbimbi wamuchitanu naivali (7) Setefwano navamujiha

Vilinga 6:1 - 8:3

Talenu! Eli lizavu vyavatu vali nakumwasa ou lunga walijina lya Setefwano. Apwile twamina muliuka, akafwilenga vatu vakakuhutwa muYelusalema. Ikiye anangwilenga namazu aKalunga hatoma azachilenga nawa vikomowesa mungolo jaShipilitu Wajila. Oloze vaYuleya vamwe vamuhamikilenga ikiye. Vamutwalile Setefwano ku zango vamu vangijikilile ikiye ngwavo natukana Kalunga nakusaula mazu enyi. Echi kacha mwivwishile Setefwano womako. Mwomwo Kalunga amuhanyine ngolo muli Shipilitu Wajila. Setefwano alwezele vaze vaYuleya, mwamujihile Yesu uze ejile nakuneha kuyoya chamyaka yosena. Kaha atalile mwilu amwene Kalunga na Yesu nemana kuchihela chaulemu waKalunga kulivoko lyachilyo lyaKalunga. Ambile nawa ngwenyi, “Talenu! Ngunamono mwilu munasokoloka na Mwana Mutu nemana kulivoko lyachilyo lya Kalunga!” VaYuleya vevwile kupihya chikuma vamuzukukililena ku mwasa malolwa vamukokele kuweluka wanganda. Shimbu vapwile nakumwasa malolwa, alombele, “Mwata Yesu, tambula Shipiliitu yami.” Omu apwile kwakamwihi nakufwa, atambakanyine nakukanguka, “Mwata, kanda uka vapayishila ha jishili javoko.” Malunga vaze vamwashile Setefwano malolwa, valile mahina avo kumahinji amukweze vaka-Yuleya lijina lyenyi Saulu. Etavijile Setefwano kufwa chenyi, nalelo lino ngana vatu vali na kulemesa Kalunga nakumuzachila, vali nakuvamwenesa ukalu kuli vatu vavapi. Oloze Kalunga na Shipilitu yenyi keshi kuvasezako. Chipwe navavajiha. (Kwimba)

Muvwimbimbi wamuchitanu naitatu (8) KaEchopa mwaya ungeji

Muvwimbimbi wamuchitanu naitatu (8) KaEchopa mwaya ungeji

Vilinga 8:4 - 8, 26 - 40

Hamakumbi aze Saulu navamwe vaka-kole javaka kulishitu vaputukule kuyanjisa liuka hamwe nava kakufwelela Yesu vapwile muYelusalema. Hakuvayanjisa vavavulu vachinyine. Lunga walijina lya Fwilipu ayile kunganda ya Samaliya. Muze avambulilenga vatu mujimbu wamwaza vakuvuluka Yesu kaha vatu vavavulu vafwelele. Kuhichila muli kangelo, Kalunga alwezele Fwilipu, “Katuka yako jila yamupambo yize yakuya kufuma muYelusalema nakuya ku na Ngaza.” Fwilipu alingile nganomu vamulwezele kuli Kalunga. Mumuvwimbimbi tunamono lunga wamulemu alinakufuma kulifuchi lya Echopa. Apwile nanyinyi mulitemba lyenyi nakuya. Oku alinakutanga mazu aKalunga akufuma hamukanda wa kapolofweto Isaya mujimbu wakuvuluka umwe mwakayanjila kwoloka, oloze uze ka Echopa kawamulumbunukilile aze mazu apwile nakutanga. Kaha Shipilitu yaKalunga amulwezele Fwilipu ayenga kuze kulitemba, Fwilipu atuchililileko evwile uze lunga ali nakutanga. Ikiye amuhulishile uze lunga: “Vinakulumbunukila evi ulina kutanga?” Uze lunga akumbwile ngwenyi: “Nangutachikiza nga chilihi kuvanga kupwenga ou mwangulumb unwinawo ami?” Apwile nakutanga hamukanda wamazu vasoneka ngwavo: “Ikiye vamutwalile mwamukoko navaya nakujiha. Nge mukoko ou mwalyungumika kuli vaka-kumuteula, kasokolwele mukanwa kenyiko. Alinyishile kapwile namulongako. Afwile chakuhona vana. Kuyoya chenyi vachi fumishile hano hamavu.” Uze lunga waka Echopa amuhulishile Fwilipu, “Achingulweze ami, iya ou kapolofweto apw ile nakuvuluka? Yivene nyi mutu weka?” Fwilipu aputukile kumu lumbunwina vya Yesu uze atumine Kalunga. KaEchopa asakile naikiye mangana amukave Yesu. Fwilipu nauze kaEchopa vapwile nakuya mujila yavo kaha uze kaEchopa ambile ku Fwilipu ngwenyi, “Tala, meya awa. Chika nachinguhonesa kuhona kungumbapachisa?” Fwilipu amumbapachile kaEchopa ahilukile kulifuchi lyenyi wakuwahilila chikuma. Kaha Fwilipu atwalililengaho lika na kwambulula mujimbu wamwaza mu jimbongi josena. (Kwimba)

Muvwimbimbi wamuchitanu naiwana (9) Petulu mwamona chimweno chatunyama

Muvwimbimbi wamuchitanu naiwana (9) Petulu mwamona chimweno chatunyama

Vilinga 10:9 - 18

Likumbi limwe Petulu akandukile helu ya zuvo nakulomba. Evwile zala azangile alyenga vimwe. Halwola ikiye amwene chimweno chakukomwesa, chakutuma kufuma kuli Kalunga. Amwene lihina lyalinene naliza kufuma mwilu natunyama vosena vakulihandununa vali muze mulihina. Lizu lyahanjikile kuli Petulu, “Imana Petulu, jiha ulyenga.” Petulu apwile kaYuleya kujishimbi javaYuleya jamba ngwajo tunyama vosena vaze amwene vapwile vamajilo kanda kuvalyako. Jino Petulu akumbulwile, “Mwamuchano nduma, Mwata! Kanda lyehi ngulwenga chuma chachipi chimwe.” Lizu lyejile kulikiye nakuhanjika ngwalyo, “Kanda uvuluka chuma vanatomesa lyehi kuli Kalunga ngwove chachipiko.” Echi chasolokele mapapakatatu lize lihina vatwalile mwilu cheka. Omu Petulu apwile nakushinganyeka omu chalumbunukilile chize chilota malunga vatatu vejile kuzuvo yenyi nakumutalatala ikiye. (Kwimba)

Muvwimbimbi wamulikumi (10) Mujimbu wamwaza wa mafuchi osena

Muvwimbimbi wamulikumi (10) Mujimbu wamwaza wa mafuchi osena

Vilinga 10:1 - 8, 19 - 48

Malunga vatatu vejile vafumine kumbongi yeka vavatumine kuli lunga walijina lya Kolonelyu. Ou Kolonelyu apwile twamina walizavu lyavaka-kwasa jita muLoma. Apwile muka-kumukomoka Kalunga naku muzachila. Kaha kangelo alisolwele kuli ikiye ayenga amuwane Petulu. VaYuleya vakiko vamwenenga maLoma kupwa vatu vakuhona kutoma vavapi, oloze Kalunga asolokele kuli Petulu muchimweno kana avulukile mutu wosena kupwa wakuhona kutomako. Kalunga atambula vatu vosena vakufuma kumafuchi osena navamulemesa ikiye nakumukomoka nakulinga mwamwaza. Petulu ayile navaze malunga hamwe kuzuvo yauze mukulwane vakaLoma. Omu Kolonelyu amumwene Petulu alifukwile kuli ikiye hamavu. Oloze Petulu amwambile ngwenyi, “Katuka. Ami ngunapu ngulunga wamokomoko. Jino nanguhula ngwami ika unangusanyikila?” Kolonelyu amulwezele Petulu vyauze kangelo. Petulu ambile ngwenyi, “Oholili jino ngunamono ngwami Kalunga katwama na chihandwako.” Kaha atwalileho nakumulweza vya Yesu ou asolola Kalunga kuli vatu. Kolonelyu natanga yenyi vamufwelele Yesu, vatambwile Shipilitu Wajila wa Kalunga vapwile vangamba jaKalunga. Kalunga azanga vatu vosena, kala lilimi, muyachi, mutundu wachikova. Yesu kejile nakulwila kaha vatu vavaYuleya kahako. Ikiye azanga kuhana mwono wakwilila myaka kuli vatu vosena. Kaha nawa azanga mafuchi osena vamwitavile ikiye nakumuzachila. (Kwimba)

Muvwimbimbi wamulikumi naumwe (11) Petulu mukamenga

Muvwimbimbi wamulikumi naumwe (11) Petulu mukamenga

Vilinga 12:1 - 11

Helote, mwangana wavaYuleya, aputukile kuyanjisa vaka-kumu kavangiza Yesu, liuka lyava kakulishitu. Aliyanjishilenga ajihishile na kaposetolo Yakova nakumuhaka Petulu mukamenga. Ufuku umwe Petulu, apwile vanamukase namalenge avali, nasavala mukachi kavaka kumulama. Kukasumuka kangelo neza nakumuhindula Petulu. Ahindukile amwambile ngwenyi, “Katuka, washiwashi!” Haze vene malenge aze vamukashile Petulu kumavoko ambitukile. Kaha amukavangijile uze kangelo amulowele kuweluka wakamenga. Vikolo vyavikungo vyakukamenga vyosena vyalisokwelele vivene kaha naumwe pimbi avahonesele kuhona kulovoka. Petulu ashinganyekele nge kulota kaha, oloze omu vahetele kuweluka uze kangelo alelanganyine wauchi. (Kwimba)

Muvwimbimbi wamulikumi naivali (12) Petulu namasepa vaka-kulomba

Muvwimbimbi wamulikumi naivali (12) Petulu namasepa vaka-kulomba

Vilinga 12:12 - 19

Hashimbu apwile Petulu mukamenga masepa jenyi vavavulu vakungulukile na kumulombela ikiye. Omu vamufumishile mukamenga Petulu ahambakanyinyine kuzuvo kuze vapwile vakwavo. Vaka-kufwelela vavavulu vapwile kuze naufuku, kumulombela ikiye Petulu. Petulu angongomwezele kulipito kaha ngamba wapwevo lijina lyenyi Londa ayile mangana asokolole kulipito. Omu evwile lizu lya Petulu kulipito kasokweleleko, ayile cheka kuli vakwavo nakuvalweza, “Petulu ali kulipito!” Kavamwitavilileko vamwambile ngwavo, “Unaza luka.” Oloze Petulu apwile hanga chimwangongo mweza lika. Kaha ha kusokolola kulipito vamuwanyine nemana ikiye, kuze kulipito, valikomokelele. Petulu avahichililemo omu Kalunga akumbulwile kulomba chavo hakumulovola mukamenga. Kalunga mwevwa kulomba nakukumbulula vilombelo vyavaze vafwelela muli ikiye. Yesu ahanjikile ngwenyi, “Kachi nge muli enu vavali hamavu namwivwasana chose chuma namulomba, nava kavalingilacho kuli tata atwama mwilu. Okwo kuli vavali chipwe vatatu navakungulukila muliji na lyami, ami nangupwanga navo hamwe.” (Mateu 18:19-20) (Kwimba.)

Muvwimbimbi wamulikumi naitatu (13) Mumunyi na lizu lyakufuma mwilu

Muvwimbimbi wamulikumi naitatu (13) Mumunyi na lizu lyakufuma mwilu

Vilinga 9:1 - 9

Mivwimbimbi yayindende yinashishimo ami nangumilweza mujimbu walunga walijina lya Saulu, ikiye lunga umwe apwileko kukufwa cha Setefwano. Omu Setefwano valingile vanamujihi lyehi, Saulu ashinganyekele jino kuya ku Ndamashiku. Mangana akavahake vaka-kufwelela mukamenga kuze.

Omu Saulu apwile nakuya ku Ndamashiku muteleleji waunene wamumunyikile kufuma mwilu haze vene aholokele hamavu. Lizu lyahanjikile kuli ikiye lya kumusanyika ngwavo, “Saulu, Saulu mwomwo ika weji kunguyanjishilanga ami?” Saulu amuhulishile, “Ove yoveya, mwata?” Lize lizu lyamukumbulwile ngwalyo, “Ami yami Yesu, ou weji kuyanjisanga. Katuka yako munganda, navakakulweza omu yove watela kukalinga.” Vaze malunga vapwile na Saulu na vakiko nawa vevwile lizu eli, oloze nachuma vamwene chauchi. Saulu ahindukile apwile kapuputa kaha. Malunga vaze vamukwachile kulivoko nakumutwala munganda ya Ndamashiku. Makumbi atatu Saulu apwile kapuputa. Kalileko kanwineko. (Kwimba)

Muvwimbimbi wamulikumi naiwana (14) Kapututa Saulu na Ananiya

Muvwimbimbi wamulikumi naiwana (14) Kapututa Saulu na Ananiya

Vilinga 9:10 - 20

Hano tunamono kapuputa Saulu ali muzuvo yili munganda ya Ndamashiku. Kalunga atumine lunga walijina lya Ananiya. Ananiya apwile muka kwitava muka-kumu kavangiza Yesu kulishitu. Atachikijile Saulu nayanjisanga vaka kwitava mu Yelusalema. Ananiya ononokele Kalunga akatukile nakuya kuli Saulu. Ananiya ambile kuli Saulu ngwenyi, “Ndumbwami Saulu; Mwata Yesu ou alisolwele kuli yove mujila haze wapwile nakwiza kuno, ikiye nangutumu mangana yove umone cheka kaha naupwa wa kuzala na Shipilitu Wajila.” Ananiya amunangile mavoko Saulu, kaha Saulu upuputa wenyi wamufumine. Atambwile Shipilitu Wajila kufuma kuli Kalunga kaha vamumbapashile kulweza vatu nge jino ou lunga napu muka-kumu kavangiza Yesu. Saulu jino ayile kuli vaYuleya nakuvambulila mujimbu wa Yesu, wamwaza. (Kwimba)

Muvwimbimbi wamulikumi naitanu (15) Liuka navalomba vatume ava navatwala mujimbu wa mwaza

Muvwimbimbi wamulikumi naitanu (15) Liuka navalomba vatume ava navatwala mujimbu wa mwaza

Vilinga 11:25, 26; Vilinga 13:1 - 3

Mumbongi yimwe ya lijina lya Andeyoka, lizavu lyavaka-kufwelela vali kungulwile hamwe na kumwalisa Kalunga. Lizavu lyapwile lyava kaliuka lya ku Andeyoka. Vakiko vatu valivangile kuvavuluka ngwavo vaka-kulishitu. Saulu ayile hamwe na Mbalanape nakunangula vatu kuze. Likumbi limwe vatwamina valiuka valitwaminyine kulya cha kulomba vosena hamwe. Shipilitu Wajila ahanjikile kuli vakiko ngwenyi, “Nguhandunwinenuko ami va Mbalanape na Saulu kumilimo ami nguna vasanyikila.” Kalunga azangile Saulu na Mbalanape vayenga kuli vatu kanda vevwenga mujimbu wa Yesu. Munamono Saulu na Mbalanape vanafukuma hano hamuvwimbimbi, vatwamina valiuka vanangikile mavoko avo hali ava vatu vavali. Kaha vava sulwile jino vayenga na kwambulula mujimbu wa Yesu kumembo aze ahandunukile kufuma kundeyoka. Kalunga mumazu enyi atunangula etu, “Yenunga kumafuchi osena na kwambulula mujimbu wamwaza kuli vosena.”

Muvwimbimbi wamulikumi naitanu naumwe (16) Paulu mwambulula mujimbu vakuvuluka Yesu

Muvwimbimbi wamulikumi naitanu naumwe (16) Paulu mwambulula mujimbu vakuvuluka Yesu

Vilinga 13:4 - 52

Saulu na Mbalanape vayile kumembo amanene na membo amandende kujingalila jajisuku. Kaha halwola vene elu hakiko Saulu vamwalumine lijina lyalihya, Paulu. Ali lwanyine navatu vavaYuleya mumazuvo akulombela, nganomu munamono hano. Vavanangwilenga hakuvalweza ngwenyi, “Kalunga kava tu javaIsalele asakwile visemi jetu avalingishile kupwa lifuchi lyalinene. Ava hanyine tu polofweto vavanene, vatwamina na kuvanangula. Avavulukilile nawa umwe mwakeza mangana akavalwile kufuma kujishili. Ikiye Mwata Yesu. Hakwiza chenyi, ikiye vaYuleya vavavulu kava mwitavilileko. Kavamutachikijileko kaha kavamufukaminyine ou vatumine kuli Kalunga. Avalwezele ngwenyi, “Ivwililenu kuli etu, mwomwo jino mujimbu waulwilo vana uhane kuli etu. Vatu vamuYelusalema na vatwamina javo kavapwile na keuluke kakumutachikiza Yesuko. Mazu avapolofweto vatangilenga kawavalumbunukililengako hakuwatanga ha sambata ha sambata. Vamu hungile Yesu nganomu vahanjikile vapolofweto. Chipwe kava mu wanyinyine mulonga wakutela kufwako, vatwalilileho nakumuyanjisa Pilatu amujihise Yesu. Omu Yesu valingile vana mujihi lyehi, vamutwalile hamavu kumufumisa hakulusu nakumuhaka muchimbumbe. Oloze Kalunga amusangwile kufuma kuvafu! Mwahichile makumbi amavulu numba alisolole kuli vakakumu kavangiza. Oholili valika kunangula vatu kumuvuluka Yesu. Yesu keshi kukafwa chekako.” Kaha Paulu atwalilileho na kuvanangula ngwenyi, “Vandumbwami, ivwililenu! Talenu kuno tunanehe ou mujimbu: muli Yesu mukiko jishili navahasa kujikonekela. Weshowo mwahaka lufwelelo lwenyi muli Yesu lunga chipwe pwevo navamutambula kuli Kalunga, mwasokoka. Usoko wavo na Kalunga naupwa jino wamwaza. Oloze vosena vaka kukakasana nakuhombwanyisa muchano waKalunga, navaka va zangamisa kuli Kalunga.” Ngocho vaYuleya navatu vavavulu vakamafuchi eka vawitavilile ou mujimbu, ngocho mauka amavulu jino aputukile kutungika, chipwe ngocho vamwe nawa kavetavilileko. Nayetu nawa hamwe na hamwe vatu kaveshi kutwivililako omu natuvalweza vya Yesu. Kalunga nazange vatu vosena vevwenga na kufwelela mujimbu wamwaza wa Yesu mangana vavalwile. (Kwimba)

Muvwimbimbi wamulikumi naitanu naivali (17) Paulu navamumwenesa chimweno chalunga wakufuma kuMesoton

Muvwimbimbi wamulikumi naitanu naivali (17) Paulu navamumwenesa chimweno chalunga wakufuma kuMesoton

Vilinga 16:6 - 10

Myaka yahichile, Paulu ayile nakutala mauka. Ambachileko na malunga vamwe vava ndende kaha. Naumwe nawa lijina lyenyi Silase. Vayenga kulifuchi lyakumbitunya, oloze Shipilitu ya Yesu avakanyishile kuya. Haze vene naufuku Paulu amwene chimweno. Muze mu chimweno amwene lunga wakufuma ku Mesotonya ahanjikile kuli ikiye, “Twaya kuMesotonya utukafweko.” Paulu atachikijile ngwenyi Kalunga ikiye nangusanyika nguyenga kuMesotonya. Kalunga eji kukinginga vaze navamukavangiza Yesu, hamwe mwakinga muvilota, chipwe muvimweneso, oloze azachisa kuhichila mumazu atwama mumukanda, ukiko mukanda waKalunga nakuhichila milimo ya Shipilitu mumichima yetu. (Kwimba)

Muvwimbimbi wamulikumi naitanu naitatu (18) Paulu na Silase mu mundenda

Muvwimbimbi wamulikumi naitanu naitatu (18) Paulu na Silase mu mundenda

Vilinga 16:16 - 35

Paulu na Silase vononokele Kalunga nakuya kungaliya ya Fwilipi muMesotonya. Kwakuze vanangwilenga vatu vya Yesu. Mulijina lya Yesu mukiko vafumishile vashipilitu vavapi kufuma muli uze kanyike wapwevo. Chalingishile vatu vamwe kupihilila mwomwo avapichishilenga kufuma kuze kuvisava alingilenga. Omu wamwene ngwavo kalilo ketu kana kumu. Vavambachile va Paulu na Silase kuvatwala kuli vakakuyula, navakulwane kwakuze vava vetesele vikote nakuvahaka mukamenga. Mukachi kaufuku vapaulu na Silase vapwile nakulomba nakwimba myaso yaku mwalisa Kalunga muze mukamenga, oloze vafunge vakwavo vapwile navo muze vapwile nakuvevwilila. Kukasumuka mundenda wasolokele. Mapito asokolokele, malenge osena vava kashishile vafunge ambitukile. Mukulwane wakulama kuvafunge ashinganyekele ngwenyi vafunge vosena vana chinyimo lyehi munjele. Ikiye evwile woma nakusaka jino kulijiha ivene. Paulu amusanyikile, “Kanda naulijihako! Tuvosena yetu vano!” Mukakulama vafunge asanyikile linongo, alahilililemo washi alifukwile hamavu kumahanji a Paulu na Silase oku alinakuchikima. Avalowelemo nakuvaneha kuweluka, avahulile ngwenyi, “Enu vamwata, nangulinge ika mangana vangulwile?” Vamukumbulwile ngwavo, “Fwelela kuli Mwata Yesu navakulwila yove navaka zuvo yove.” Uze mukulwane wakulama kukamenga na vakazuvo yenyi yosena vavalwilile hakuhaka lufwelelo lwavo hali Yesu; vapwile vaku wahilila. Uze muka kulama kukamenga avalaminenga va Paulu na Silase palanga nachimene ava suwile; vayile kwavo kupwa vatu vakusokoka. Chipwe mujilwola ja maukalu twatela lika kumwalisa Kalunga. (Kwimba)

Muvwimbimbi wamulikumi naitanu naiwana (19) Paulu nalijiko lyakulumbila lya Kalunga wakuhona kutachi

Muvwimbimbi wamulikumi naitanu naiwana (19) Paulu nalijiko lyakulumbila lya Kalunga wakuhona kutachi

Vilinga 4:12; 17:16 - 34

Hamuvwimbimbi Paulu ali nakutala vasona halijiko lyakulumbila. Vanasonekaho ngwavo 'lya Kalunga ou vahona kutachikiza.' Lijiko kana lyapwile munganda ya Etene. Mwapwilenga makombelo amavulu mwomwo vatu vaku Etene valifukwilenga kuli tulunga vamakombelo vakuli handundununa. Kavamu tachikijile Kalunga wamuchano wakuyoyako. Malunga vamu Etene vasakilenga kutachikiza vihande muka apwile naku vanangula Paulu. Ikiye avambile ngwenyi, “Enu malunga vaka Etene! Ami ngunamono ngwami munapu muvaka-kulemesa, mwomwo ami omu ngwatambukilanga na kujinguluka membo ngwatalanga ha chuma mweji kulemesanga, ngwawanga lijiko lyakulumbila hali mazu: LYA KALUNGA WAKUHONA KUTACHIKIZA. Ou Kalunga, mweji kulifukwilanga wakuhona kutachikiza, ikiye vene umwe nguli nakumilweza.” Paulu avalwezele vya muchano waKalunga ou atenga vyosena. Ikiye mwata wa lilu na mavu. Ikiye katwama mu jitembele jakutunga namavoko avatuko. Paulu nawa avalwezele vatela kumutachikiza kuvanga kuhichila muli Mwata Yesu, ou ikiye vasangwile kuli Kalunga kuvafu. Jino malunga vamwe vamusehele Paulu. Vakwavo vamwe vasakile vali nangule vihande vya kuvuluka Yesu. Vakwavo va mwitavilile ikiye. Yesu kulishitu kaha ikiye mulwilo. Shikaho kakweshi Kalunga wekako chipwe kulemesa cheka nachihasa kulwila vatu kufuma kujishili najisonyi javoko. (Kwimba)

Muvwimbimbi makumi avali (20) Paulu nava mu twala kuzango

Muvwimbimbi makumi avali (20) Paulu nava mu twala kuzango

Vilinga 18:1 - 17

Nganomu munamono mumuvwimbimbi, ou Paulu ali muku-kaluhwa. Mulimbo lya Kolinde. Muze mwapwile vatu vavilinga vyavipi. VaYuleya vapwilenga muze navakiko nawa valihamikilenga na Paulu, hakuvalweza ngwenyi Yesu ikiye Mesiya, umwe vasakula kuli Kalunga. Ufuku umwe Mwata ahanjikile kuli Paulu nakumwamba ngwenyi, “Kanda mwivwa womako; twalililaho na kwambulula, kanda kuho lako. Ami nangupwa nove, kakweshi kupwa umwe mwakulinga mwamupiko chipwe kukulemeka oveko, mwomwo nguli navatu vali muno mwimbo.” Jino Paulu atwaminenga mu Kolinde kuze anangwilenga vatu, vavavulu vetavile ku mazu enyi. Oloze vaYuleya valihamikilenga navo vamwivwilililenga lwiso. Kaha likumbi limwe vamulukukile nakumukwata nakumutwala kuzango. Vamu vangijikilile ngwavo nanangulanga vyakuhenga. Oloze uze nguvulu kavevwilileko avahangilemo vosena muzango. Mukiko Paulu ayovokelele hakuhona kumulinga mwamupi kaha atwalilileho kuvanangula vya Yesu, numba tuhu kwapwile vakaku lihamika nenyi vasakilenga vamuhonese. (Kwimba)

Muvwimbimbi makumi avali naumwe (21) Maswalale nava muyovola Paulu kufuma kuli vaka-kole

Muvwimbimbi makumi avali naumwe (21) Maswalale nava muyovola Paulu kufuma kuli vaka-kole

Vilinga 21:1 - 22:24

Paulu ahilukile cheka nakumeneka mauka vatungile amahya. Nakukolezeza vaka-kwitava vatwalilileho kumukavangiza Yesu. Vamwe vaka-kwitava vamulembelele Paulu kanda mwaya kuYelusalema chekako. Mwomwo vatachikijile vaka-kole jenyi vavavulu vali kuze nakusaka ngwavo vamujihe. Oloze Paulu avakumbwile ngwenyi, “Ami ngunalizange keshi hakungukasa kahako oloze namukufwila muYelusalema halijina lya Mwata Yesu.” Omu jino ahetele muYelusalema, vaYuleya vakatwile chizungo muvatu. Vamufumbukilile Paulu. Maswalale vamu Loma vamwe vamufumishilemo muli vatu. Paulu ayile emanyine haweluka wa chilombo chamaswalale. Ahanjikile kuli vatu avahichilililemo omu valiwanyine na Yesu numba apwenga mukakumukavangiza. Oloze vakiko vaputukile kutambakana mazu nangolo, “Mujihenu! Katela kuyoyako!” Maswalale vamuhakile Paulu mukamenga mangana vamupululule kufuma kuvatu. Paulu kapwile nawoma vakufwako. Ikiye atachikijile fweto yili nakumu vandamina mwilu ya vosena vali nakuyanjila hali Yesu. (Kwimba)

Muvwimbimbi makumi avali naivali (22) Paulu mwambulula mazu kuli vatu vavalemu

Muvwimbimbi makumi avali naivali (22) Paulu mwambulula mazu kuli vatu vavalemu

Vilinga 23:11; 25, 26

Paulu atwamine mukamenga myaka yivali. VaYuleya vasakile kumujiha ikiye. Oloze Mwata alisolwele kuli ikiye Paulu nakumwamba ngwenyi, “Likolezeze! Nganomu yove unambulula lyehi unjiho wakunguvuluka ami muYelusalema, jino yove watela nawa nakwambulula mu Loma.” Vatwamina javaYuleya vamu vangijikilile Paulu kumeso anguvulu kaha amutumine Paulu kuli mwangana Angilipa, mwangana vawaYuleya. Paulu kapwile nawoma waka lamutuko. Amulweze nguvulu hatoma, na mwangana nauze nawa wapwevo vya Yesu. Avalwezele omu alisolwelelemo Yesu kuli ikiye mujila yakuya ku Ndamashiku nomu amu tuminyinyine Yesu ikiye ayenga nakwambulula mujimbu wamwaza kuli vatu vosena kwosena. Mwangana Angilipa akunyukile hakusaka kumufwelela Yesu. Ikiye atachikijile ngwenyi Paulu kalingile chuma chachipiko. Paulu asolokele kumeso a nguvulu vamunene mu Loma. Alombele nawa mangana chihande chenyi chiyenga kuli nguvulu wamunene wa mu Loma. Asakile vamusopese kuzango ya nguvulu wamunene kuze. Ngocho amwitavilile Paulu ayenga. Loma yapwile nganda yayinene muno mukaye ha myaka yize, kaha nguvulu uze apwile muka kuyula wamulemu atwaminenga muze. Kalunga apwile nakujina chenyi chakulipwila hali Paulu. (Kwimba)

Muvwimbimbi makumi avali naitatu (23) Paulu muukalu

Muvwimbimbi makumi avali naitatu (23) Paulu muukalu

Vilinga 27:13 - 44

Mwaswalale vamutwalile Paulu kuLoma hamwe navafunge veka nawa. Vayile muwato vaunene (vavuluka ngwavo mbopolo) kuzauka Kalunga lwiji. Hamakumbi likumi na awana (14) yize mbopolo yapwile muukalu. Nyamanganda wamunene ejile. Vatu vaze vapwile muze mumbopolo vali zakaminyine ngwavo natufwa. Kangelo kaKalunga ahanjikile kuli Paulu, “Kanda namwivwa womako, Paulu. Yove kuvanga wimane kukusopesa kuli nguvulu wamunene, muka-kuyula wamulemu wamunganda yaLoma; Kalunga mwalwila vosena vali nayove hamwe mumbopolo.” Omu yalingile yize mbopolo nayisaka jino kuheta kutunda yaputukile kupazuka vihanda mumeya. Vatu vatumbukilile mumeya. Vamwe vahashile kuhala, vakwavo vakwashile kuli vize vipazu vya mbopolo. Vosena vakandukile kanawa. Aha tunalinangula ngwetu kumana Kalunga atwama namulimo waunene waku zata hali etu tuvosena, apwa wangolo jakutusokola kufuma mu maukalu osena natuhitamo. (Kwimba)

Muvwimbimbi makumi avali naiwana (24) Paulu mwapwa funge kuLoma

Muvwimbimbi makumi avali naiwana (24) Paulu mwapwa funge kuLoma

Vilinga 28:16 - 31; Wava-kaLoma 8:38 - 39

Hano tunamono Paulu ali muLoma. Apwile muufunge kuze myaka ivali. Ikiye vamwitavilile kutwama muzuvo yenyi yakufwetela naliswalale wakaLoma kumulama. Vosena navapwilenga nakuya nakumumeneka avatambwokeselenga. Avanangwilenga vya wangana waKalunga na Mwata Yesu. Paulu nawa asonekele mikanda kumauka aze ayile nakutala shimbu kanda vamukase, nakunangula chikuma. Mikanda vene eyi yatwama mu mukanda wa Kalunga, wapwa wavatu vosena vali nangule vyaKalunga najijila jenyi. Paulu ayanjile chikuma hakumu zanga Yesu namujimbu wamwaza. Hamwe vamuvetelenga nakumwasa malolwa, kuyanda na jizala nakuhona kwakusavala. Ku kumisako vamujihile kuli maLoma. Oloze mumikanda yenyi ya kulivanga kuli vaka-kufwelela vakuLoma avasonekelele ngwenyi, “Ami ngunahase lyehi chipwe kufwa chipwe kuyoya, chipwe vangelo numba vandemone, chipwe oholili numba tuhu kulutwe, numba kala vaka ngolo, numba ku jindama numba muwihi, numba mu chuma chakutenga chimwe, kakweshi kacheshi kunguhandununa kuzangi yaKalunga eyi yili muli kulishitu Yesu Mwata wetuko.” Kalunga atuhana lyehi jingolo hali vosena vafwelela muli Yesu navakakumuzachila kulishitu Yesu. Natuhana kuyoya chetu kuli ikiye. Tumuzachilenu nakutwala mujimbu wamwaza mangana vaka-mavu vosena vamutachikize Yesu ngwavo ikiye mukakuhana mwono wahaya myaka yosena na Kalunga nawa.

ข้อมูลที่เกี่ยวข้อง

สื่อบันทึกเสียงรูปแบบmp3, ซีดี, เทปคาสเซ็ท - องค์กรจีอาร์เอ็น มีสื่อบันทึกเสียงต่างๆ หลายพันภาษา เนื้อหาสื่อบันทึกเสียงตรงกับความจริงในพระคัมภีร์ เป็นเรื่องราวเกี่ยวกับความรอดและชีวิตคริสเตียน

ดาวน์โหลดฟรี - ที่นี่ท่านสามารถค้นหาบทความต่างๆ ของจีอาร์เอ็นในภาษาต่างๆ พร้อมทั้งภาพประกอบ และสื่ออื่นๆ ที่สามารถดาวน์โหลดได้

ห้องสมุดสื่อบันทึกเสียงข่าวประเสริฐของจีอาร์เอ็น - เจ็ดสิบกว่าปีที่นักบันทึกเสียงขององค์กรจีอาร์เอ็นได้บันทึกเสียงภาษาของชนกลุ่มน้อยต่างๆ และได้ผลิตสื่อบันทึกเสียงข่าวประเสริฐมากมาย

Copyright and Licensing - GRN shares it's audio, video and written scripts under Creative Commons

Choosing the right audio or video format - What audio and video file formats are available from GRN, and which one is best to use?