Leleskani, Vwiyani Ndipu Jani Ndi Umoyu Buku Lanambala 6: Yesu Msambizi Ndi Wakuchizga

Mazgu Ngakwamba

Timoneni abwezi. Ntchakunozga ukongwa kuti muvwiskiyi uthenga wamampha. Musanawale tisambilengi zaku Yesu, msambizi kweniso mchizgi wa nthenda zosi. Toni buku la mtambu lo ndi buku lanambala 6.

Wonani Chakujambuwa Chanambala 1

Mateyu 1:18-2:1-12, English: Mateyu 5

Chiuta wangupangana ndi wayisraeli kuti wakawatumiyanga mtaski yo wazamukuwataska ku viheni vyawu. Wayisraeli wangulindizga kwa vyaka vinandi kufikiya po Yesu Khristu mwana waku Chiuta wanguziya pa charu chapasi. Yesu wanguwaku kuziya mwaku Maria mwali yo ndipu wanguja mucharu chapasi kwa vyaka machumi ngatatu ndi vitatu. Yesu wangwenda mu malu nganandi kusambizga zaku Chiuta. Iyu wangusankha wanthu tchumi ndi wawi kuwa wasambili waki ndipu wanguwasambiza kwa nyengu yitali.

Wonani Chakujambuwa Cha Nambala 2

Mateyu 7:24 -27; 1 Wakorintu 3:9-15

Pachakujambuwa ichi muwona nyumba ziwi. Yesu wangusambizga za munthu wakuchenje yo wanguzenga nyumba yaki pa jalawi. Penipo chimphepu chikulu ndi maji vinguza, nyumba yo yinguwa cha. Yesu wangukambaso za munthu munyaki wakupusa yo wangumanga nyumba yaki pa mchenga ndipu po yinguza vuwa ndi chimphepu chikulu nyumba yo yinguwa kwakuchitiska mantha. Nyumbayo yengavi chikhomu chakukho. Abwezi, mu umoyu widu wachikhristu titenere kuma pa chikhomu cho akutiwikiya Ambuya widu Yesu Khristu ndipu Iyu ndiyu chikhomu chidu.

Chakujambuwa Cha Nambala 3

Mateyu 5:14-16; Yohani 8:12

Pachakujambuwa ichi muwona wanthu watatu ndi nyali zawu. Iwu wakhumba cha kwenda mumdima chifukwa vakofya ndi viheni vinandi vichitika mu mdima. Yesu wanguza pacharu chapasi ndipu wanguti "ini nde nyali ya charu chapasi ndipu yosi wakurondo ini wakawanga ndi nyali ya umoyu wamuyaya ndipu wakayendanga mu mdima cha." Abwezi, asani tingamfumba Yesu kuti watigowoke zakwananga zidu ndikumudana Iyu kuti wawi mumitima yidu, tikawanga nawu ukweru ndipu ukweru ndi mdima vingaja malu ngamoza cha.Po ukweru utuza, mdima uthawa. Akhristu mbukweru wa charu ndipu ntchakukhumbikwa ukongwa kuti ukweru uwu uwoneke ku wanthu wosi pacharu chosi chapasi.

Wonani Chakujambuwa Cha Nambala 4

Mateyu 5:38-42

Pa chakujambuwa ichi muwona msilikali wachiroma. Waroma wenga mtundu wanthazi ukongwa wo waykjuy wusanga mtundu wayisraeli po Yesu wenga pa charu chapasi. Wayisraeli wanguwatinkha waroma chifukwa wenga ndi nkhaza. Kweni Yesu wanguwasambizga wanthu kuti wangawezgiyanga chiheni ku munthu weyosi cha. Iyu watinge "asani munthu wapuma dakama laku limoza, umupaskiso linyaki. Asani mnyaki wakutoliyani chakuvwara, mpaskeniso chakudika ndipu asani munthu wakunyamuliskani katundu pa mtunda umoza muluti nayu mitunda yiwi. Abwezi, Yesu wasambizganga za ufumu wakuchanya wo ngwakusiyana ndi ufumu wa charu chapasi. Iyu wanguziwa kuti asani wanthu wangawezge chiheni, vingapangiska waka kuti kutinkhana kulutiliyengi kwambula kugowokerana. Yesu wakhumba wanthu wakurondo Iyu kuti wachitengi vamampha nanga nkhu warwani wawu viyo. Ndipu Iyu watitisambizga kuti tanjengi warwani widu.

Wonani Chakujambuwa Cha Nambala 5

Mateyu 6:5-15; Afilipu 4:4-8

Yesu wangusambizga wanthu za pempheru. Nyengu zinyaki isi tiwona nge tingakwaniska cha kupemphera kwaku Chiuta chifukwa tikuziwa cha kupemphera. Abwezi, kupemphera nkhukambiskana ndi Chiuta nge ndimo tikambiskiyana ndi wakwanjiwa widu. Tipempheri kwa Ada widu kupolote mwaku Yesu Khristu. Tingajikwezganga cha pamasu paku Chiuta. Tikambiskani ndi ada widu ndi viwongu. Tigowoke wo watinangiya ndipu tikankhuski Chiuta nyengu zosi. Tipemphere wanyidu ndi ntchitu yaku Chiuta panu pa charu chapasi. Tingawanga wakudinginyika cha , kweni mu vyosi, tipereki vyakutisuzga vyosi mumarombu alinga kuti vivwiki kwa Ambuya Chiuta widu kuporote mwaku Yesu Khristu. Nyengu zosi tipempheri kuti khumbu laku Chiuta lichitikengi panu pasi.

Chakujambuwa Cha Nambala 6

Mateyu 13:24-30

Nyengu zinandi Yesu wasambizganga pakugwiriska ntchitu zintharika. Ndipu yimoza mwa ntharikazo yenga ya munthu yo wangupanda mbewu zamampha za tirigu m'munda mwaki. Zuwa linyaki po iyu wenga mtulu, murwani waki wanguluta kwachipanda duru pakati pa munda wa tiriguwo. Wati wayamba kukuwa tirigu, duru nayu wakuliyanga nayu pamoza. Wantchitu waki wangufumba mwini munda wakuti "asi mungupanda tirigu m'munda mwinu? Nanga duru uyu watuliya pani? Kumbi mukhumba tikamutuzgemu duru yo?" Mwini munda wangumuka wakuti "ndi murwani wachita ichi. Kumutuzgamu cha duru yo pakuti mungamuzguliya kumoza ndi tirigu. Vilekeni vikuliyi pamoza kufikiya nyengu yakuvuna. Duru tizamukumutaya ku motu ndipu tirigu tizamuwika mu nkhokwi." Yesu wangung'anamuliya fanizu ili kuti ndimu kukawiyanga pakumala kwa charu. Mwana wa munthu wazamutuma wangelu kwaziwawunganya pamoza wosi wakuchita uheni. Iwu wazamuponyeka mu ng'anju yamotu ko kwazamkuwa kuliya ndikukuta minyu. Abwezi kumbi mwezemukuwa tirigu pamwenga duru?

Chakujambuwa Cha Nambala 7: Yesu We Ndi Chanju Chikulu Ukongwa Pa Wana

Mateyu 18:1-6, 19:13-15

Zuwa linyaki wazimayi wanguza ndi wana wawu kwaku Yesu alinga kuti wawatumbiki ndikuwapemphere wana wo. Wati wawona ichi wasambili wangukhumba kuwakanizga wana wo kweni Yesu wanguti "zomerezgani wana wazi kwaku ini. Pakuti asani mung'anamukengi mtima cha ndikuja nge mwana, mukaserenga cha mu ufumu wakuchanya." Yesu wanguwasambizgaso kuti mura mu ufumu wakuchanya ndi munthu yo watijichepeska nge mwana. Chiuta wakhumba ifwi timugomezgengi Iyu nge ndimo wana wagomezge wapapi wawu. Asani tingachita viyo tamusere mu ufumu wakuchanya.

Wonani Chakujambuwa Cha Nambala 8

Mateyu 18:12-14

Yesu wanguwakambiya wanthu za muliska yo wenga ndi mbereri matchumi tchumi. Yimoza mwa mbereri zo yingusowa. Mliskayo wanguleka mbereri zosizo ndikurondo yimozayo kufikiya wanguyisaniya ndipu wangukondwa ukongwa. Muliskayo mbambuyafwi Yesu Khristu ndipu mbereri yakusowayo ndi munthu weyosi yo wareka kurondo Yesu Khristu. Chiuta wakhumba cha kuti ifwi tisowi. Tiyeni tipemphere wanyidu ndikuwakambiya zaku Yesu alinga kuti nawu wasaniyi umoyu wamuyaya mwaku Yesu Khristu. mwaviyo iwu nawu wakasaniyanga mwawi wakuza kwaku Yesu ndikusaniya umoyu wamuyaya.

Chakujambuwa Cha Nambala 9

Mateyu 18:21-35

Petro wanguza kwaku Yesu ndiwangumufumba wakuti "Ambuya kumbi ndingagowoke m'bali wangu kalinga asani wandinangiya? Kumbi panyaki kangawa kankhondi ndi kawi?" Pakumumuka Yesu wangukamba ntharika ya wanthu wo wenga ndi ngongoli ndi mwenechu chuma. Munyaki wenga ndi ngongoli ya ndrama zinandi ndipu mnyaki wenga ndi ngongoli yandrama yimana. Viyo mweni ndrama wanguwagowoke ngongoliyo. Kweni yo wangugowokereka ngongoli yikulu wanguchimangiska mnyaki yo wenga ndi ngongoli yaki yimanavi. Wati wawona ichi mwenechu wa chuma wanguchimuponya mu jeri munthu yuwa chifukwa wenga muheni. Ndipu Yesu wanguti nasiso titenere kugowoke wanyidu ndi mtima widu wosi. Asani titondeka kugowoka Ada widu wakuchanya wakatigowokiyanga cha.

Chakujambuwa Cha Nambala 10

Mateyu 20:1-16

Nyengu yinyaki Yesu wangukamba ntharika ya munthu yo wenga ndi munda ndipu wangulembera wanthu panyengu yakulekanalekana ndipu wosi wanguwapaska malipiru ngakuyananayanana. Wo wangwamba ntchitu ndi mlenji wangudandaula chifukwa wanguwapasa malipiru ngakuyanana ndi wo wangwamba ntchitu mwakuswera. Abwezi wanthu yawa wangupangana zamalipiru po wagwiranga ntchitu ndipu wangulipirika kwakulingana ndi phanganu. Ichi chititisambizga kuti nyengu zosi titenere kuwa wakuwonga pa vyosi vo Chiuta watitipaska. Chiuta wangatipaska vo titenere kuronde kutuliya kwaku Iyu ndipu isi kwidu kutenere kuwa kuwonga nyengu zosi pakuti ili ndilu khumbilu laku Chiuta kutuliya kwaku isi kuziya mwa Ambuyafwi Yesu Khristu.

Chakujambuwa Cha Nambala 11: Kumbi Yesu Wazengi Zukwanji

Mateyu 25:1-13

Baibolu lititikambiya kuti tiziwa cha zuwa pamwenga nyengu yo waziyengi kweni tiwi wakunozgeka. Yesu wangukamba za ntharika ya wamwali chumi wo walindizganga mweni nthengwa kuti wafiki ku zowala zo. Amwali yawa wenga ndi nyali zawu. Wankhondi wenga ndi mafuta ngakusunga kweni wankhondi wengavi. Mweni nthengwa wanguswera viyo mafuta ngaku wo wengavi kusunga ngangumala. Iwu wangwesa kupempha kuwanyawu kweni kuti wanguwapaska cha. Viyo iwu wanguluta kwachipenja mafuta . Mweni zowala wangufika ndipu wati wasere wangujara chisasa. Wati waweku kukupenja mafuta, wangwesa kuti wasere kweni mweni nthengwa wanguti watiwaziwa cha iwu. Abwezi, Yesu watitikambiya kuti tiwi wakunozgeka nyengu yosi pakuti tiziwa cha nyengu yo Iyu waziyengi. Tiwi nge amwali wankhondi wo wenga wakuchenje.

Chakujambuwa Chanambala 12: Yesu Wasambizga Kuti Po Titimulindizga Iyu Tigwiriski Ntchitu Vyawanang

Mateyu 25:14-30

Yesu wangukamba ntharika ya munthu munyaki yo wanguluta pa ulendo ndipu wanguwasiliya wantchitu waki watatu chuma chaki. Wakwamba wangumupaska matalenti ngankhondi, wachiwi wanguronde ngawi ndipu wachitatu wanguronde talenti limoza. Wati waweku ku ulendu waki, wangudana wantchituwo kuti wawoni mo wachitiya malonda. Wantchitu wawi wangusaniya phindu kusazgiyapu pa matalenti ngo wanguronde. Kweni wachitatuyo wanguwezga talenti lo mo lenge. Mweni chuma wangukondwa cha ndi wachitatuyo viyo iyu wangumulonda ndalama yo ndikumupasa yuwa wangupanga zakusazgiyapu tchumi ndi chimoza kutuliya ku watalenti wankhondi wo wangupasika. Wanguwadana wo iwu wangupinduwa ndi matalenti ngo wangupasika kuti wasere mu unkhankhu waki. Chiuta wakutipaska vyawanangwa vakupambanapambana kuti timutewete Iyu. Kumbi mugwiriska ntchitu vyawanangwa vo kwaku imwi mwija? Pamwenga pakumutewete Iyu? Tiyeni tigwiriski ntchitu vyawanangwa vo Chiuta wakutipaska nanga uli vingawoneka nge vimana.

Chakujambuwa Cha Nambala 13

Maliko 1:4-11

Mariko wenga m'bwezi waku Yesu ndipu wangulemba vinthu vinandi vakusambizga vaku Yesu. Iyu wangulemba vaku Yohani mbatizi yo wanguza kuwa mneneri wawayisraeli. Iyu wajanga mu bozwa. Ndipu wanthu wanandi wazanga kwaku Iyu kuti wazivwi mazgu ngaku Chiuta. Yohani wanguwakambiya wanthu za kunozgeke kuza kwaku Mesiya ndi kuti wanthu wo wareki vyakulakwa vyawu. Wo wangumurondo Yohani wabatizikanga mu msinji wa Yorodani. Pati pajumpha nyengu yimanavi, Yesu wanguza kwaku Yohani ndikumupempha kuti wamubatizi ndipu kunguwa kuti Yohani wangumubatiza. Po Yesu watuwanga m'maji, mzimu waku Chiuta wungusikiya paku Iyu nge ndi nkhunda ndipu kunguvwika mazgu kutuliya kuchanya ngakuti "uyu ndiyu mwana wangu wakwanjiwa ndipu mwaku Iyu ndikondwere." Yesu wangubatizika kurongo wanthu kuti wenga wakunozgeka kwamba ntchitu yakupharazga uthenga wamampha. Isi nasi titenere kubatizika kurongo kuti tatuwaku ku uheni ndipu taronde mtaski. Ubatizu ung'anamuwaso kuti isi sonu tikhumba kurondo Yesu Khristu ndi kureka nthowa zakali ziheni.

Wonani Chakujambuwa Chanambala 14

Marko 1:14-20

Yesu wati wabatizika wangwamba kupharazga watinge "nyengu yawandika ndipu ufumu waku Chiuta wepafupi , ng'anamukani ku viheni vinu ndipu vwanani mu uthenga wamampha." Po wayendanga mphepeti mwanyanja ya galileya wangusaniya Simoni ndi Andreya ndipu wanguwakambiya kuti wamurondo Iyu. Yesu wanguwakambiya kuti wawengi walovi wawanthu. Yesu wangusankha wanthulumi tchumi ndi wawi kuwa wasambili waki. Iwu wanguja ndi Yesu ndipu wanguwasambizga vinthu vinandi vaku Chiuta kuti nawuso wakasambizgi wanthu wanyaki. Abwezi, msanawale Yesu wakhumba kuti tiwi wakumurondo Iyu. Asani talapa ndikutuwaku ku mphulupulu zidu, ndikuzomerezga kuti Iyu watirongozgi mu umoyu widu, ndi kuti te wasambiri waki. Yesu Khristu wakhumba cha kuti tiwi wanthu wakujikondweska isi tija kweni kuti umoyu widu tijariyi Iyu yo wangutifwiya ndikuyukaso

Wonani Chakujambuwa Chanambala 15

Maliko 1:40-45

Kwenga munthu munyaki yo wenga ndi nthenda ya khati. Munthu uyu wanguza kwaku Yesu wanguti "Ambuya asani mukhumba, munditozgi ku khati ili" ndipu Ambuya wangukoreka ndi chitima ndi munthuyo ndi wangunena nayu "ndikhumba kukuchizga, tozgeka sonu." Penipo munthu yuwa wangutozgeka. Abwezi, kumbi muziwa kuti uheni we nge khati. Khati ndi matenda ngo ngaturya liwavu losi kweni uheni uturya mzimu ndi umoyu widu. Asani tatondeka kusaniya mankhwala ngakuchizga khati, liwavu losi lilyika ndi nthenda yo. Mwaviyo asani tingatondeka kusaniya mankhwala nga uheni, umoyu widu ndi mzimu widu vizamunangika ndipu asani tafwa tizamulekana ndi Chiuta kwamuyaya. Vwiyani ku waroma 6:23; mphotu ya uheni ndi nyifwa kweni chawanangwa chaku Chiuta ndichu umoyu wamuyaya mwa Ambuyafwi Yesu Khristu.

Wonani Chakujambuwa Cha Nambala 16

Maliko 2:1-12

Ndipu po Yesu wangusere mu Kaperenamu, wanthu wanandi wanguza kwaku Iyu. Zuwa linyaki Yesu wanguluta kwachichezga kunyumba yinyaki ndipu wanthu wanguza kwazivwiya uthenga. Nyumbayo yinguzaza mkati ndi kubwalu viyo mwakuti pengavi mpata. Wanthu wanyaki wanguma pa bwalu kuvwiya mazgu ngo Yesu wasambizganga. Wanthulumi wanayi wanguza ndi mnyawu yo watamanga vinjenji ndipu wangumunyamuwa ndi bedi laki. Pakuti pengavi mpata wakuti waziyi kwaku Yesu, iwu wangusasuwa denga lanyumba lo ndikumusiskiya wakutamayo po Yesu wenga. Yesu wati wawona chivwanu chawu wanguti ku wakutamayo "mwana wangu vagowokereka vyakulakwa vyaku." Kweni wala wakukasopi wo wenga penipo wanguzizwa kuti Iyu wenga wakwenere cha kugowoke mphulupulu. Viyo wanguwanawana kuti Yesu wangunyoza Chiuta. Ndipu Yesu wanguwachenya wakuti "kumbi chapafupi ntchinthu uli? Kugoweke viheni panyaki kukambiya wakutamayo kunyamuwa mphasa yaki ndikuti wayendi?" Penipo Yesu wangumukambiya munthuyo "soka, pinga mphasa yaku ndipu yenda." Munthu yuwa wanguchizgika penipo.

Wonani Chakujambuwa Cha Nambala 17

Maliko 3:1-6

Ndipu Yesu wangusere mu sunagogi mo mwenga munthu wajanja lakupunduka. Pa zuwa ili wanthu wosi wangulereze alinga kuti wawoni asani Yesu wamuchizgengi munthuyo pakuti lenga zuwa lasabata alinga kuti wamuzengi mulandu. Yesu wangumudana munthu wakutamayo ndikumukambiya kuti wami pakati. Yesu wanguwafumba wanthu wo wenga mu kasopi asani kwenga kwamampha kuchita chamampha pamwenga chiheni pa zuwa lasabata. Kweni wanthu wosi wanguja cheti. Yesu wanguwona kutiwanthu yawa wenga ndi mitima yakumira ukongwa ndipu wanguti kuwakutamayo "nyoroska janja laku." Ndipu penipo janja lakilo lingunyoroka. Warongozi wasunagogi wangutuliya pabwalu ndiwangupangana zamo wangamubayiya Yesu. Wanthu yawa wengavi chanju pa wanthu wanyawu nanga mpha munthu yuwa wenga ndi janja lakupunduka. Abwezi, titenere kurongo chanju kuwanthu wosi pakuti chanju chituliya kwaku Chiuta ndipu ichi ntchilongolelu chikulu kuti isi tewakukhristu asani titanja wanyidu.

Wonani Chakujambuwa Cha Nambala 18

Maliko 4:35-41

Yesu wasambizganga wanthu wanandi mphepeti mwa Nyanja ya galileya ndipu mazulu wangukambiya wasambili waki kuti wayambukiyi kusirya linyaki lanyanjayo. Po Yesu wangusere mungalawa wangugona tulu pakuti wanguvuka ndipu chimphepu chikulu chinguyuka panyanjapo. Wasambili wanguchita mantha kuti wafwengi viyo wanguluta kwachimuyuska Yesu. Yesu wanguwachenya wasambiri waki kuti wengavi chivwanu. Wasambiri wangukambiskana wakuti "kumbi ndi yani mwenuyu wakuti nanga ndi mphepu zivwiya Iyu?" Abwezi, Yesu wakusintha cha. Nanga imwi chivwanu chinu che uli mwaku Yesu? Kumbi asani vinthu vanangika mu umoyu winu mudandaula? Vwanani mwaku Chiuta nyengu zosi pakuti palivi cho chingakuwonekiyani imwi cho Yesu wareka kuziwa

Wonani Chakujambuwa Chanambala 19

Maliko 5:21-23, English: Maliko 5:25-34

Kwekosi ko Yesu walutanga wanthu wamurondonga. Iwu wavwiyanga visambizgu vya mazgu ngaku Chiuta. Zuwa linyaki munthu wakudanika Yairo wanguza kwaku Yesu wakuti "mwana wangu mnthikazi we pafupi kufwa, zani muziwiki manja paku iyu ndipu wakachilanga." Yesu wanguzomera ndipu wanguluta nayu. Wanthu wanandi wangurondo iwu ndipu pakati pawu penga mnthikazi yo wasuruwanga ndopa kwa vyaka tchumi ndi viwi yo wanguwanawana kuti asani wangakhwasa munjirira waku Yesu wakachizgikanga. Munthikazi uyu wanguchita ichi ndipu wanguchira. Penipo Yesu wangufumba za munthu yo wangumukhwaska pakuti wanguvwa kuti nthazi zaki zingutuwamu. Mzimayi yuwa wanguza ndikujikama pamasu paku Yesu ndipu Yesu wanguti kwaku Iyu, "wamwana chivwanu chaku chakutaska luta muchimangu ndikuchizgika." Abwezi, yapa tiwona kuti chivwanu ntchakukhumbika kuti isi tironde chigowoke cha vakulakwa vidu. Chivwanu ntchakukhumbikaso kuti tichizgiki kumatenda ngosi. Titenere kuwika chivwanu chidu mwa Ambuya Chiuta widu. Iyu wangaziwa kuchizga matenda ngidu ngosi.

Wonani Chakujambuwa Cha Nambala 20

Marko 5:22-24, 35-43

Po Yesu wangulutiliya paulendu wakuluta kwaku Yairo, wanthu wangumukambiya Yairo kuti mwana waki wataika ndipu wareki kumusuzga Yesu. Kweni Yesu wanguti "ungopanga cha, vwana." Yesu wanguwakambiya wanthu kuti wajariyi ndipu wanguto Petro, Yohani ndi Yakobi ndi wanguluta nawu kunyumba yaku Yairo. Wati wafika ku nyumba ko wangusaniya wanthu waliya maliro. Yesu wanguwakambiya kuti mwanayo wafwa cha kweni we mutulu. Ndipu wanthu wanguseka. Yesu wanguwakambiya wanthu kuti watuwi mnyumbamo. Yesu wanguto Yohani, Petro ndi Yakobi, Yairo ndi muwoli waki ndikusere nawu muchipinda cho mwenga msungwanayo. Ndipu Yesu wangumuko pajanja msungwanayo ndi wanguti "msungwana iwi ndinena nawi, yuka!" penipo msungwanayo wanguyuka ndi kwamba kwenda. Ndipu Yesu wanguwakambiya kuti wamupasi chakurya. Abwezi, Yesu wendi nthazi zakuyuska wanthu kuwakufwa, palivi cho chitondeka ndi Yesu Khristu.

Wonani Chakujambuwa Cha Nambala 21

Maliko 7:24-30

Lenga dangu la wayisraeli kureka kusazgana ndi wanthu wamitundu yinyaki pamwenga wakubwaru. Zuwa linyaki Yesu wanguluta ku Turo ndipu nanga kwenga kutali, wanthu wanguvwa mbwenu zaku Yesu ndi nthazi zaki. Kwenga mathikazi yo wenga ndi mwana yo wangukoreka ndi mizimu yiheni ndipu ma uyu wanguza kwaku Yesu kuti wamutuzgi viwandavo. Kweni Yesu wanguti chakurya ntcha wana kuti ntcha wagalu cha . Kweni ma yo wanguti nanga mbagalu nawu waturya vo vituwa pa thebulu la mbuyawu. Ndipu Yesu wanguti "chifukwa cha kumuka kwaku kwamampha, luta chiwanda cho chatuwamu mu msungwana waku" ma yo wanguluta kunyumba ndipu wangusaniya kuti mwana yo wachira uli ndimo Yesu wangukambiya. Yesu watingi wanguza kwaziwovya wana wayisraeli dankha ndipu kovya ma waku Suro kwenga nge kupereka chovyu ku munthu wakutali. Yesu wangumwanja ma uyu kweni wangukhumba kuwona chivwanu chaki. Ma uyu wangujichepeska ndipu wenga wakunozgeka kuronde kekosi kwaku Yesu. Yesu wakuza kuti wanthu wosi wamitundu yosi wataskiki ku ukapolu waku satana.

Wonani Chakujambuwa Cha Nambala 22

Maliko 7:31-37

Yesu wati watuwaku ku Turo wanguluta ku Sidoni. Wanthu wanguza nayu munthu wambura kuvwa ndi wambula kulongoro. Wangupempha Yesu kuti wamuchizgi. Yesu wangutuwapu nayu munthu yuwa ndiwanguwika vikumbu mumakutu nga munthuyo, ndiwangudira mata pasi ndikukhwasa lilimi lamunthuyo. Yesu wangulereska kuchanya ndiwanguti, "banuka." Penipo munthu yuwa wangujulika makutu ndi wanguwereweta umampha. Yesu wangukambiya wanthu kuti wangakambiyanga weyosi cha za vo vinguchitika. Kweni wanthu yawa wanguja cheti cha iwu wanguti, "wachita vyosi vamampha, wapanga wanthu kuvwa ndi kulereska viyo."

Wonani Chakujambuwa Cha Nambala 23

Mariko 8:22-26

Yesu ndiwasambiri waki wanguluta ku Bethsaida ndipu wanthu wanguza nayu munthu wambula kuwona alinga kuti wamuchizgi. Yesu wangumuto munthuyo ndikutuwa nayu mumsumbawo. Ndipu Yesu wati wadira mata ndikuwika manja m'masu mwaki wangumufumba munthuyo asani wanguwona ndipu munthuyo, wanguti wawona wanthu nge vimiti vitenda. Ndipu Yesu wanguwikaso manja m'masu nga munthuyo ndipu wanguwona umamphamampha. Ndipu Yesu wangumukambiya munthuyo kuti waluti kwawu. Munthu yuwa wangukondwa ukongwa kuti wangulereska. Abwezi, wanthu wanandi wendi khungu lamumzimu ndipu watenda mumdima wamphulupulu. Yesu watiti Iyu ndiyu ukweru wa charu chapasi.

Wonani Chakujambuwa Cha Nambala 24

Maliko 9:14-31

Zuwa linyaki wasambili wasuskananga ndi wanthu wakusopa pakuti wangutondeka kutuzga demoni yo wangusuzga mwana yo watondekanga kurongoro. Yesu wanguti "imwi wanthu wambura chivwanu, kumbi ndijengi namwi mpaka zuwanji? Zani nayu kunu kwangu." Ndipu demoni lati lawona Yesu, lingumuponya pasi mnyamatayo ndipu wangwamba kunyutuka. Ndipu Yesu wangufumba awiski wamnyamatayo asani wavwananga mwaku Chiuta. Iwu wanguzomera kuti Yesu wamuwovyi kuwura chivwanu kwaki. Yesu wanguko janja la mwanayo ndipu wanguma. Wati waluta wanthu wosi, wasambili wangufumba Yesu chifukwa cho wangutondeke kutuzga demonilo. Yesu wanguti " demoni la viyo lingaziwa kutuwa ndi rombu ndi kufunga kurya." Abwezi, Yesu ndi mwana waku Chiuta. Iyu wendi nthazi kuthereska satana ndi wademoni waki wosi. Ndi Yesu pe yo wangakumasuwani ku nthazi ya mizimu yiheni.