Vanja, Yevelela Kuenda Kala Elivulu Lia 4 Akuenje Va Suku

Ulandu

Kalunga! Suku o sole omunu lomunu kuenda o tata omanu vosi, puãi ca piãla enene o tata vana vo pokola kuenda vo vumba. Yevelela eci ca pita konyima yalima alua, ndomo ca sonehiwa Vondaka ya Suku, Embimbiliya, kuenje vanja koviluvialuvia vielivulu li yeluluka. Eci o yeva ocisungo cilo, tuvula ociluvialuvia ci kuayimo.

Ociluvialuvia Ca 1: Epata Li Tila Onjala

Ruti 1:1-5

Suku wa lulika omanu vosi, puãi ovo, omanu, vo ñualelapo. Suku wa nola epata lia Isaleli okuti vo kũliha kuenda vo fendela. Ovo va eca ongangu kolofeka viosi vi lisungue lavo. Puãi olonjanja vimue, va Isaleli va sinila Suku. Kuenje va fendaila oviteka kuenda olosuku viesanda ndeci ca lingainga olofeka vi lisungue lavo. Suku wa nena ovoyaki lonjala ku va Isaleli, ha va tiula vali kokuaye.
Voloneke viaco vimue vionjala, epata limue lia sokiya oku enda kimbo lia va Mowavi oku ka sanda okulia. Ovo va kala kofeka oyo yamale ci soka alima ekuĩ. Isia kumue lomala vaye valume oko va fila. Te lika ina kuenda olondatembo viaye vivali akãyi (ovimbumba) ovo lika va supapo vofeka yaco oyo yiñi.

Ociluvialuvia Ca 2: Noemi La Ruti Va Tiukila Kisaleli

Ruti 1:6-22

Ina yepata liaco olio ndoto onduko yaye Naomi. Olondatembo viaye viakãyi va Mowavi, olonduko viavo Ruti la Arape. Naomi wa sokiya oku tiukila kofeka ya Isareli. Ruti la Arape va enda laye vungende waco wo Ki Isaleli. Noke Naomi wa popia lavo hati, "Wendeli nye lame? Ame he ñuete vali vimo omala valume okuti va linga va veyene? Tiukili ño, amala vange, endi lonjila yene, omo ndakuka enene oku kuela vali si ci tẽla ... oku ku sokololi co ku mbala ca lua ndomo eka lia Yehova lia mbeta." Kuenje Arape wa sipula Naomi yu wa tiukila konjo yolonjali viaye. Ruti puãi wa lamelela Nahomi, kuenje wa popia hati: "Ku ka milike oku ku tunda hã si liweka oku ku kuama, momo oku wenda lamevo haiko ngenda, oku o ka sikila haiko ha sikilavo. Omanu vove va linga omanu vange, Suku yene o lingavo Suku yange." Kuenje Ruti wa enda la Nahomi ko Beteleme kofeka ya Isaleli.

Ociluvialuvia Ca 3: Ruti Vepia Lioku Ungula

Ruti 2:1-23

Eci va tiukila ko Beteleme, Ruti wa popia la Nahomi hati: "Ngenda kovapia si noluluila pokati kovitungu viu o Ñuatela ohenda."
Naomi la Ruti va kala olohukui. Eye wa enda kepia oko kua kala olonalavayi via kala loku ungula osevata. Muelepia onduko yaye eye Boasi. Eye wa pula kolonalavayi viaye eci ukayi ocingendeleyi a kala loku linga vepia. Ukmue pokati kavo wa kumbulula hati: "Ufeko o eye u Moavi una weya la Naomi, wa tunda kofeka ya Mowavi." Boasi wa yeva uwa eye a lingila ndatembo yaye. Wa limbuka okuti eye ongunja yocili. Oco wa popia la Ruti hati: "Kala palo ocipepi lafeko vange. Ovaso ove a vanje vepia omu va kasi loku ungula kuenje va kuama."
Eye wa popia lolonalavayi viaye hati ku ko lingi cimue civi, puai sipo olomema oco eye o viungule. Ruti wa sapuila Naomi ohenda Boasi o kuatela. Nahomi wa popia hati "Yehova o sumuluise!" Eye wa amisako hati: "Ulume waco o ngandietu muele;..."

Ociluvialuvia Ca 4: Ruti La Boasi Pocimbandi

Ruti 3:1-18

Eteke limue Nahomi wa popia la Ruti hati: "Amolange siu ku sandela hẽ omangu yokuti o kala ciwa? Boasi ngandietu. O'nolosi yilo eye o pekula osevata pocimbandi. Oco lisukula, lisieketa ulela, wala uwalo wove wa velapo. Lokila kocimbandi. Eci a pekela kũlihisa apa a pekelela, noke kuendepo, sikulula kolomai viaye, pekela. Leye oku sapuila eci o linga." Ruti wa linga ndeci Nahomi o sapuila. Eci Boasi a pasuka wa sanga Ruti kovolu aye, eye wa kũlihile okuti eye wa yongola oku u kuela, momo caco eci oco ca kala ocituwa Kisaleli koloneke viaco. Eci ulume a file, umue pokati kepata wa sesamela oku kuela ocimbumba caco. Noke Boasi wa popia la Ruti hati: "...ku ka yokoke. Hu lingila cosi o nukuila, momo vakuetu vosi vimbo va ku kũliha okuti ove vukãyi wocili."

Ociluvialuvia Ca 5: Boasi Kuenda Akulu Vo Ko Beteleme

Ruti 4:1-22

Boasi wa kovonga ekui liakulu oku ñualehela kombundi ya Mbeteleme. Kua kala umue ukuepata ukuavo wa kala lomoko yoku kuela Ruti, puãi ovo vosi va litava okuti Boasi eye u kuela, omunu ukuavo hayeko. Oku yika ondaka yaco, vakuepata va eca ku Boasi oluhaku luaye. Eci oco ca kala ocituwa Kisaleli. Oco Boasi wa kuela Ruti. Ovo va cita omola onduko yaye eye Ovede. Kuenje akãyi va popia la Naomi hati: "Yehova a sivayiwe a sivayiwe, omo etaili lilo ka ku sile ño omo, omõla lakamue. Onduko yaye yi kemale Kisaleli. Kuenje o linga ukuakupindula omuenyo wove haeye oku tekula eci o kuka. Omo ndatembo yove una oku sole haeye wa velapo kokuove okuti omala epanduvali valume va sule eye wo cita."

Ociluvialuvia 6: Maliya Kuenda Ungelo Wa Suku

Luka 1:26-38, 2:1-7

Kovaso yalima alua o voloneke via Ruti, Suku wa nola ukãyi ukuavo oku u vumba. Onduko yaye Maliya. Eye wa kala ukuepata lia Ruti. Maliya wa kala ufeko ka kũlihile ulume. Eye wa tindikiwile lulume wa tukuiwa Yosefe. Puãi osimbu handi ka va kuelele , ungelo wa Suku wa lisituila ku Maliya. Wa popia laye hati: "A Maliya ku ka yokoke, momo Suku wa ku nolela esumuluho. Kuenje tala, o mina, o cita omola ulume, u luka Yesu. Eye o linga unene, o tukuiwa Mõla a Tõlo, kuenje Yehova Suku o wiha ocalo ca isiaye Daviti. O viala ño hu epata lia Yakomba, kuenje usoma waye ko sulila." Oco Maliya wa pula ungelo hati: "Eci hẽ ci tava ndati ulume sio kũlihile?" Ungelo wo kumbulula hati: "Espilitu li Kola li ku wila, lunene wa Tõlo u ku tuvika . Oco omõla o citiwa o tukuiwa o kola, Eye Mõla a Suku." Maliya wa popia hati: "Tala ndupika wa Yehova. Ci lingiwe ndondaka yove." Maliya wa mina, kuenje wa cita omõla ulume. Eye wo luka Yesu. Kuenje ndoco, eye wa linga ina ya Yesu.

Omo Maliya a pokola ku Suku, Yesu, Onjovoli, wa citiwila kokuaye. Eci etu tu pokola ku Suku, eye o tẽlavo oku lingila vokuetu ovina vinene.

Ociluvialuvia 7: Hana O Likutilila Ku Suku

1 Samuele 1:1-20

Kovaso yoloneke via Ruti, kua kala ukãyi ukuavo vofeka ya Isaleli onduko yaye Hana. Eye wa vumbavo Suku kuenje wa yonguile oku u pokola. Veyaye wo solele puãi Hana ka kaile lesanju, momo ka tẽlele oku sanga omõla. Ulima lulima ovo va enda enda konembele ya Suku ko Silo. Va kuata ovilumba, kuenje va vi lumba ku Suku. Hana wa enda konembele ya Suku, kuenje wa popia hati: "A Yehova Ukualohoka, nda o tava oku vanja kohali yufeko wove loku njivaluka, okuti oku njivala hacoko, puãi weca kufeko wove omõla ulume, ame omõlaco ndu weca ku Yehova oloneke viosi viomuenyo waye."
Eci a kala loku likutilila ku Suku, omela lika ya menoha, puãi ondaka ka ya yevalele. Eli ocitunda cinene, wo mõla. Oco wa sima hati wa kolua.
Suku puãi wa yeva ohutililo ya Hana, kuenje kovaso yaco wa cita omõla ulume. Wo luka Samuele.

Ociluvialuvia 8: Oñaña Samuele Vonembele Ya Suku

1 Samuele 1:24-28, 2:12-21, 3:1-21

Osimbu Samuele a kala handi okamõla, Hana wo tumbika ku Suku. Eye wa enda laye ku Eli konembele ko Silo. Eli wa longisa Samuele ndomo a tẽla oku vumba Suku. Eli wa kala lomãla vavali. Ovo va kala asongui vetavo puãi va kala omanu vãvi. Kuenje Suku wa liwekapo oku talavaya lasongui ava ndovikuata viaye poku popia lomanu. Eteke limue Samuele wa pekelako vonembele ya Suku. Ocipikipiki Suku wa vilikiya onduko yaye. Samuele wa lupukila ku Eli loku popia hati: "Ame ulo; wa mbilikiya." Puãi Eli wa popia hati: "Sia ku vilikiyile. Tiukila ka pekeleko." Eci ca lingiwa olonjanja vitatu. Kuenje Eli wa limbuka okuti Suku eye wa kala loku vilikiya Samuele. Eye wa popia la Samuele hati nda Suku wa ku vilikiya tambulula hati: " Popia a Cime , momo ukuenje o yeva." Suku wa popia la samuele olonjanja via lua, kuenje eye wa linga ocitunda cinene, haeye upolofeto kuenda usongui kisaleli.

Ociluvialuvia 9: Samuele O Likutilila Isareli

1 Samuele 7:2-14; Etundilo 20:2,5

Suku wa kangisa omãla va vĩha va Eli. Ovo va fila kovita, kuenje Isaleli wa yuliwa la va Filisiti. Valima 20 va Filisiti va viala va Isaleli.
Kuenje Samuele wa popia lomanu hati: "Nda ocili vu kasi loku livela lutima wene wosi oku tiukila ku Yehova, imbipo olosuku viosi via va kualofeka levi via va Asitalote ho tiamisi ovitima viene ku Yehova loku u vumba eye lika. Kovaso eye u popeli povaka a va Filisiti." Va Isaleli va pokola ku Samuele. Va likongela pamosi. Samuele wa eca ocilumba ku Suku kuenda wa likutilila Isareli. Va Filisiti va kokela oku yaka la va Isaleli. Puãi Suku wa va tumisa ofela yonupi ya likuama lolondindimo via lua. Va Filisiti va tila lusumba, kuenje Isaleli wa kuata epondolo lioku va yula vosi yavo.

Ociluvialuvia 10: Samuele O Vialeka Saulu Lulela

1 Samuele 8:1 - 10:1

Suku wa kala osoma yocili ya va Isareli kuenje Samuele eci a kala vemehi liovihandeko via Suku, wa songuila omanu. Omo olofeka vikuavo via kala lolosoma viavo muele, oco va Isaleli va yonguilevo umue o linga soma yavo. Samuele ka sanjukilile ondaka yaco eci a yi yeva. Puãi Suku wa popia laye hati: "Yeva cosi omanu va popia love, momo haveko va ku yanduluka,ame muele va njanduluka okuti si lingi vali Soma yavo." Kua kala umue ukuenje onduko yaye Saulu. Eye wa lepa calua haeye wa posoka. Eteke limue Saulu weya oku nyula Samuele. Eci Samuele o mola yo wiya, Suku wa popia la Samuele hati:" U eye nda nola. Eye o laika oku viala omanu vange." Kuenje Samuele wa kuata vokangalafa kulela. Wa itila ulela vutue wa Saulu. Eyi ya kala ondimbukiso yokuti eye wa noliwila oku linga osoma. Vakuĩ akuãla kalima, Saulu wa viala ndosoma ya va Isareli.

Ociluvialuvia 11: Saulu O Tola Onanga Ya Samuele

1 Samuele 15:1-29

Volonoke viuviali wa Saulu, va Amaleke va nyola va Isaleli lolonjila viñi viñi. Samuele wa popia la soma Saulu hati: "Yevelela ondaka yi tunda ku Suku yiti: '...yaka la va Amaleke kuenda nyola ovina viosi viavo. Ku ka va siliye;" Suku wa kuatisa Saulu kumue lolohoka viaye oku yula va Amaleke. Puãi va Isareli va sinila Suku. Ovo va popela loku seleka ovinyama via velapo via va Amaleke vioku lumbila Yehova kuenda ka va pondele Soma ya va Amaleke ndomo Suku a va handeleka. Kuenje Samuele wa popia la Saulu hati: "Omo wa pañula ondaka ya Ñala Eye wa ku pañulavo okuti ku lingi vali osoma." Samuele wa ñualapo ha tiukila. Saulu wa kakatela kuwalo wa Samuele. Wa tola kokuokuo kuaye. Kuenje Samuele wa popia hati: "Oku upisa etaili, Yehova wa ku nyeha uviali wa va va Isareli, wo weca kukuẽle wa ku velapo."

Saulu wa eca ovilumba ku Suku, puãi ko pokuile. Samuele wa pokola loku vumba Suku oloneke viosi viomuenyo waye.

Ociluvialuvia 12: Yesu Vonjo Ya Suku

Luka 2:41-50, 1:35

Kovaso yalima alua oloneke via Samuele, ki Isaleli kua kala omõla umue onduko yaye Yesu. Onduko ya inaye Malia, puãi Isiaye Suku. Olonjanja viosi, Yesu wa pokola ku Suku. Eci a kala lekuĩ lialima kalima avali Maliya la veyaye Yosefe va ile ko Yelusalayi. Yesu wa ile lavo. Poku tiukila, Yesu ka vo muile, kuenje vo vanjiliya. Kovaso yoloneke vitatu yu vo sanga vonembele ya Suku. Eye wa kala loku vangula lalongisi va Yundeya ovina via Suku. Maliya wa popia laye hati: "Amolange nye wa tu ci lingila? Tala, ame la so tua ku sanda lohele ya lua." Eye wa va kumbulula hati: "Ka wa kũlihili okuti nda sesamela oku kala oku kuli ovina via Tate?" Eci Yesu a kala omõla nda Samuele wa kũlihile okuti weyilila oku vumba Suku. Yesu weyilila oku songuila omanu oku tiukila ku Suku. Momo Suku eye osoma yocili haeye usongui womanu vosi.

Ulandu

Vamue pokati komanu vanene va pita kulo kilu lieve va kala akuenje va Suku. Okasete kalo ka ku lekisa ndomo Suku a va lingisa asongui vanene vomanu. Tuvula ociluvialuvia ci kuayimo eci o yeva ocileñi cilo.

Ociluvialuvia 13: Ndaviti, Ungombo Ukuotõyi

1 Samuele 16:1-13, 17:34-35

Saulu wa kala osoma yatete ki Isaleli, puãi eye wa amamako oku sinila Suku. Suku wa yanduluka Saulu, kuenje ka lo kuatisa vali. Kua kala ukuenje umue onduko yaye Ndaviti. Eye wa lava lava olomeme via isiaye. Suku wa nolele ale Ndaviti ha piñala Saulu pomangu yusoma. Ndaviti wa kolelele Suku, kuenje ka kaile lohele yeci ci linga usumba. Eteke limue ohosi ya kuata yimue pokati kolomeme. Ndaviti wa ponda ohosi, kuenje wa popela omeme. Eye wa tunga ovisungo viwa, kuenje olonjanja viosi wa imba ovisungo viesivayo ku Suku. Ovisungo viaco vi tukuiwa hati Olosamo, kuenje vi sangiwa Vondaka ya Suku, Embimbiliya. Ndaviti wa linga omunu umue Suku a yongola okuti oco ci tuwa omanu vosi.

Ociluvialuvia 14: Ndaviti Kuenda Ocindululu

Samuele 17:1-54, 2:30

Kua kala uyaki pokati ka Isaleli la va Filisiti. Pokati ka va Filisiti pa kala ocindululu ca tukuiwa Ngoliata. Eye wa kalukila va Isaleli hati: "Noli ulume. ...Nda eye o tẽla oku liyaka lame loku njipa, etu tu linga apika vene, puãi nda ame ndo wipa, ene vu linga apika vetu."
Alume va Isaleli va kala lusumba wa Ngoliata. Lomue wa yongola oku liyaka laye. Umalehe Ndaviti wa popia hati: "Ociyamba caco eci cu Filisiti nga eye elie okuti o vayela olohoka via Suku o kasi lomuenyo?" Ndaviti ka kaile lusumba wa Ngoliata. Eye wa kũlihile okuti Suku o tẽla oku u kuatisa oku ponda ocindululu, momo uyaki wa kala wa Suku. Oco Ndaviti wa enda oku ka lisanga la Ngoliata, wa imba eka vekolombele, wopamo ewe, wa li kapa vepipili, wa limba, kuenje lia veta u Filisiti kupolo, lia iñila kupolo waye, kuenje u Filisiti wa kupukila posi, kuenje wa kuata kosipata yaye, yu wa yi somola vocilalo, wo wipaya kuenje wa topola layo utue waye. Eci va Filisiti va mola okuti onoyi yavo va kolelele ya fa, va tila. Alume va Isaleli va va landula loku va yula.

Ociluvialuvia 15: Saulu O Seteka Oku Ponda Ndaviti

1 Samuele 18:1 - 19:10

Kefetikilo Saulu wa sanjukilile Ndaviti, momo wa popela va Isareli. Ndaviti wa linga omunu unene ukuoyaki haeye usongui ki Isaleli. Va Isaleli va sanjukila oku u kuama. Puãi Saulu wa kuatela Ndaviti onya. Eteke limue Ndaviti wa kala loku sikila Saulu ohalupa. Eteke limue espilitu lĩvi lieya ku Saulu, kuenje wa imba onjelia yaye ku Ndaviti, puãi ya ponya kuenje ya toma vocimano. Kovaso yaco Saulu wa seteka olonjanja via lua oku ipa Ndaviti. Puãi Suku wo tata, wo popela poku tuma omola a Saulu Yonatão kuenda valua vakuavo va Isareli oku kuatisa Ndaviti kovanyali vaye. Haimo lumue Ndaviti wa sukila oku tilila kupãla ha puluka peka lia Saulu.

Ociluvialuvia 16: Ndaviti O Siliya Omuenyo Wa Saulu

1 Samuele; Roma 12:19

Saulu kumue lolohoka viaye va ile oku ka kuata Ndaviti vekalasoko. Uteke umue, osimbu Saulu kumue lalume vaye va kala loku pekelako, Daviti kumue lekamba liaye Avisiai va iñila okañunuñunu vocilombo ca Saulu. Avisiai wa yonguile oku ipa soma osimbu a pekelako, puãi Ndaviti wo tutuiya. Eye hati: "Suku o laika oku yambula wosi o linga cĩvi kombuavekua yaye." Saulu wa yelula onjelia ya kala kovitue viaye kumue lesanga liovava. Eci va tunda vocilombo, Ndaviti wa kaluka, wa vilikiya alume va kala loku pekela. Eye wa popia la Avinele, ulume wa kala locikele coku tata soma hati: "Ove kua tatele cime cove. Vanja kolonele. Onjelia ya Soma kumue lesanga liovava via kala kovitue viaye vi kasi pi?" Kovaso yaco Ndaviti wa popia la Saulu hati: "Ndeci omuenyo wove u kola kovaso ange etaili haico omuenyo wange u kole kovaso a Yehova. Eye a mopele kolohali viange viosi."
Kuenje Ndaviti wa enda lonjila yaye, Saulu wa tiukila konjo.

Ociluvialuvia 17: Daviti O Linga Osoma

1 Samuele 31:1-6; 2 Samuele 5:1 - 7:16

Va Filisiti veya vali oku liyaka la va Isaleli. Soma Saulu, lomolaye Yonatão la vamanji vakuavo va fila kuyaki. Kuenje omanu va vialeka Ndaviti ha lingi Soma Ki Isaleli. Eye wa tunga elombe liaye vimbo lia Yelusalayi. Suku wa popia la Ndaviti hati: "Nda ku upa kupange wungombo lowu woku kuama evanda loku ku linga ombiali yomanu vange va Isaleli. ...Cilo onduko yove ndi yi lingisa yinene ndolonduko vinene vialume kulo kilu lieve." Eci va Filisiti va yeva hati Ndaviti wa linga osoma, vosi yavo va sokiya oku liyaka laye. Ndaviti puãi wa kolela Suku yu wa linga ndeci Suku o handeleka, kuenje wa yula va Filisiti. Vokuenda kuotembo wa yula va Filisiti vosi.

Ociluvialuvia 18: Ndaviti La Batisieva

2 Samuele 11:1 - 12:20; Etundilo 20:14

Eteke limue Ndaviti wa kala loku endela kutulu welombe liaye. Eye wa mola ukai umue wa posoka wa kala loku yua. Ndaviti wa yongola oku likapela ukãyi waco. Onduko yukãyi Batisieva. Eye wa kala ukãyi wa Uliya, umue pokati kasualali a Ndaviti. Uliya wa ile oku ka yaka lovanyali va Isaleli. Ndaviti wa yeva ondaka yaco eyi, kuenje wa tuma ondaka kusongui wovita. Eye wo lomboluila okuti o sukila oku kuata ukũlihiso wokuti Uliya wa fila kovita. Kuenje Ndaviti wa kuata Batiseva loku linga ukãyi waye muele. Puãi eci Ndaviti a linga ndeti ka ca sanjuisile Suku. Omõla a Ndaviti la Betisieva wa fa, kuenje Ndaviti wa pinga ongecelo ku Suku yũvi a linga. Ondaka ya Suku yiti, "Ku ka pekelise." Kuendavo "Ku ka ipaye."

Ociluvialuvia 19: Onembele Ya Tungiwila Suku

1 Asapulo 22:1-19

Ndaviti wa lingila Suku ekandu, haimo lumue eye wa solele Suku kuenda wa yonguile oku u vumba. Eye wa yonguile oku tunga onembele yimue yinene, omo omanu va tẽla oku ñuualehela loku fendela Suku. Puãi Suku wa popia hati: "Ove wa pesela osonde yalua, wa linga ovita vinene, oco ku tungila onduko yange onjo, momo wa pesela osonde yalua kilu lieve, kovaso ange. Oco,o ka cita omola ulume, o linga ukuepuyuko, kuenje ndu wiha epuyuko kovanyali vaye vosi, vana va ñuala, onduko yaye Salomone, kuenje koloneke viaye ngeca ombembua lepuyuko ki Isaleli. Eye o tungila onduko yange onjo. O linga omolange, lame ndinga isiaye, kuenje ñolisa ocalo cuviali waye ki Isaleli, oloneke ka vi pui." Osimbu handi ka file, Ndaviti wa angiliya ovina via lua ha vi kala vonembele ya Suku ko Yelusalãyi, puãi Salomone eye wa yi tunga. Ya ambata alina epanduvali oku yi tẽlisa. Ca kala ocitumalo cimue ca posoka calua. Va Isaleli va fendaila Suku vonembele eyi ko Yelusalãyi vokuenda kuovita vialima, kuenje ovo ka va la ivalako okuti Ndaviti wa kala osoma yinene.

Ociluvialuvia 20: Yesu Iya Ko Yelusalãyi

Mateo 21:1-11

Kovaso yeci ci soka ohulukãyi yalima kovaso yoloneke via Ndaviti, Yesu wa citiwa. Yesu wa kala ukuacikoti ca soma Ndaviti. Inaye ufeko ka kũlihile ulume londuko ya Maliya.. Isiaye Suku Ukuonene wosi. Kilu lieve Yesu wa kala ukuenje wa velapo wa Suku. Eye wa longisa omanu ocili ca Suku. Wa linga ovikomo lunene wa Suku. Saulu la Ndaviti kuenda vosi yetu tumanu tu sinila Suku. Puãi Yesu ka la linga ekandu. Eteke limue eye wa iñila vo yelusalayi locimbulu. Omanu va enda oku ka lisanga laye loku kaluka: "Hosana ku Mola a Ndaviti!" Hosana ca lomboloka ''popela". Kuenje ovo va kalukavo hati: "U iyilila vonduko ya Ñala a sivayiwe!" Omanu va limbuka okuti Yesu wa velapo okuti Ndaviti o sule. Eye Soma wa velapo olosoma viosi.

Ociluvialuvia 21: Ovikuamanga Vi Tekula Eliya

1 Olosoma 17:1-6

Kovaso ya Ndaviti la salomone, kua moleha olosoma vikuavo via viala Isaleli. Yimue, omunu umue londuko Ahava. Eye wa kala lukãyi umue ũvi cala londuko Isevele. Eye wa ponda oloñame via lua via Suku kuenda wa kisika omanu oku fendela olosuku via Bahale, osuku yimue yesanda. Koloneke viaco Eliya wa kala upolofeto unene wa Suku. Eye wa enda ku Ahava, kuenje wa popia laye hati: "La Yehova Suku ya Isareli o kasi lomuenyo, haeye ndukuakuvumba, anyamo alo ka ku kala olume ndaño ombela, te nda londaka yange." Oco Suku wa tuma onjala kofeka ya Isaleli. Haimo lumue Suku wa amako loku tata ukuenje waye Eliya. Eye wa tuma Eliya kofeka yimue ya tukuiwa Keriti kuenje kuaco oko eye wa nyua nyua ovava o volui kuenda omele lomele ovikuamanga vio nenela ombolo lositu oco a lie.

Ociluvialuvia 22: Eliya Kuenda Ondalu Ya Suku

1 Olosoma 18:16-46

Kulima watatu wonjala, Eliya wa popia la Ahava ha kovongela komunda Kerimele omanu vosi va Isaleli kuenda ovapolofeto va vumba Baale osuku yesanda. Eye wa popia lavo hati: "Nda Yehova eye Suku, u kuami. Nda Baale u kuami." Omanu voha ño ne. Kuenje Eliya wa popia hati: "Noli olongombe vivali. Ovapolofeto va Baale va nole ongombe yavo yoku lumba . Puãi ka va ka kapeko ondalu. Ame hangiliya ongombe yikuavo, puãi si kapiko ondalu. Oco vilikiyi onduko ya Suku yene, kuenje ame mbilikiya onduko ya Yehova." Eliya wa popia hati: "Suku una o tambulula londalu eye muele Suku." Omanu va tava kondaka ya Eliya. Eteke liosi, ovapolofeto va Baale va vilikiya osuku yavo. Va piluka loku ñuala ñuala kutala una va tunga kuenda va litãla tãla lolomoko. Puãi ka kua kaile ondalu. Koñolosi Eliya wa angiliya ocilumba caye coku pia elisi. Wa pinga omanu oco va kapeko ovava alua kocilumba caye lo kolohui. Kuenje wa likutilila ku Yehova. Vocipikipiki, ondalu ya Yehova ya lokila kocilumba ce Eliya. Ca yoka ocilumba, lovava. Kuenje omanu vosi va kaluka vati: "Yehova eye Suku!"

Ociluvialuvia 23: Eliya O Londa Kilu

1 Olosoma 19:1-21; 2 Olosoma 2:1-14

Eliya wa ponda ovapolofeto vosi va Baale, momo va kala vãvi ca lua. Ukãyi wa soma Ahava, Isevele wa sokiyile oku ipaya Eliya. Eliya wa kuata usumba; omo liaco wa tililila kocitumalo cimue ocipãla, vekalasoko. Kuaco oko, Yehova wa lisanga la Eliya. Pana okuti Suku wa vangula laye, ka kuatele vali usumba. Wa amamako oku longisa omanu oku fendela Suku umosi lika haeye Suku yocili. Londaka ya Suku, Elisia wa linga oñuatisi ye Eliya. Eteke limue eci ovo va kala loku endela pamosi, ekalu limue liondalu lia pita pokati kavo, kuenje Suku wa ambata Eliya loku enda laye kilu vocipepe. Kuenje Elisia lalimue eteke a muile vali Eliya.

Ociluvialuvia 24: Eliya La Mose Va Lisanga La Yesu

Luka 9:28-36

Eci okuti pa pita ovita epanduvali kalima, kovaso yoloneke vie Eliya, Yesu wa kala kulo kilu lieve, kuenje eteke limue, pokati kolondonge viaye wa nolapo vitatu yu wa enda lavio komunda oku ka likutilila. Eci Yesu a kala loku likutilila, Mose le Eliya va moleha kokuaye. Olondonge vitatu via va mola va nina lulamba. Kuenje Suku eye muele wa popia oku upisa kilu. Eye hati. "U eye Omolange nda nola; U yeveleli."(U Omolange haeye wange wa soliwa. U yeveleli.)
Yesu weyile kulo kilu lieve, kuenje wa fa ndocilumba cakandu etu kuenda cakandu omanu vo kolotembo viosi, momo Suku, Lomolaye Yesu, o yongola oku popela omanu vosi. Yesu eye Onjovoli yetu una eye a pindula kolofa. Puãi Suku eca lika omuenyo ko pui kuava vosi va yevelela Ondaka Yaye kuenda vo kolela loku U pokola.