LLL 4 Dagiti Adipen ti DIOS

LLL 4 Dagiti Adipen ti DIOS

ਰੂਪਰੇਖਾ: Ruth, Samuel, David, Elijah. 24 sections. It has a picture book to go along with the recording. This Simple script is meant for unwritten languages where the translation must be oral.

ਸਕ੍ਰਿਪਟ ਨੰਬਰ: 421

ਭਾਸ਼ਾ: Ilokano

ਥੀਮ: Sin and Satan (Sin, disobedience); Christ (Birth of Christ); Eternal life (Salvation); Character of God (Nature, character of God, Word of God (the Bible), Power of God / Jesus); Living as a Christian (Obedience, Faith, trust, believe in Jesus, Children of God, Humility); Bible timeline (Prophecy, fulfillment of, Gospel, Good News, People of God)

ਦਰਸ਼ਕ: General

ਸ਼ੈਲੀ: Monolog

ਸ਼ੈਲੀ: Bible Stories & Teac

ਮਕਸਦ: Teaching

ਬਾਈਬਲ ਦੇ ਹਵਾਲੇ: Extensive

ਸਥਿਤੀ: Unclassified

ਸਕ੍ਰਿਪਟ ਟੈਕਸਟ

Pangrugian

Pangrugian

Naimbag nga aldaw gayyem. Ay-ayaten ti Dios dagiti amin a tao ken addaan ti Dios iti panangipateg iti isu amin. Maikari ti Dios nga umawat kadagiti isu amin a pammadayaw. Mabalin tayo nga agserbi ken sumurot Kenkuana gapu iti ayatna. Denggenyo ti maysa nga istorya a napasamak adun a tawen ti napalabas, pasamak a nakasurat iti Sao ti Dios, ti Biblia. Kitaen ti ladawan iti duyaw a libro ket iyakar iti sumaruno a panid nu mangngeg daytoy a tukar. (Tukar)

Umuna a Ladawan: Ti Panagpanaw ti Pamilya gapu iti Panagbisin

Umuna a Ladawan: Ti Panagpanaw ti Pamilya gapu iti Panagbisin

Ruth 1:1-5

Pinarsua ti Dios iti amin a tao, ngem tinallikudan da ti Dios. Gapu iti panagayat ti Dios iti Israel, pinili na ida tapnu maam-ammo da ken dayawenda ti Dios. Nakitulag ti Dios kadakuada tapno makita ti intero a lubong dagiti nakakaskasdaaw a bendisyon ti Dios. Inaramat ti Dios ti Israel tapno maam-ammo iti Naganna kadagiti amin a disso. Ngem ti Israel masansan a salungasingenda ti Dios. Nagdaydayawda kadagiti didiosen a kas kadagiti dadduma a nasion iti aglawlawda. Nangibaon ti Dios iti riribuk ken panagbisin iti Israel tapno agsublida iti Dios. Iti dayta a panawen, inkeddeng ti maysa a pamilia a mapanda iti Moab tapno agbirok iti makan. Nagnaedda iti dayta a disso iti uneg ti sangapulo a tawen. Didiay a natay iti amada. Dagiti dua nga annak a lallaki ket nakaasawada iti Moabita. Kalpasanna, natay met dagiti annak a lallaki. Ti laeng ina da ken dagiti dua a manugangna a babbai iti nabati iti dayta a pagilian. (Tukar)

Maikadua a Ladawan: Nagsubli ni Ruth ken Noemi idiay Israel

Maikadua a Ladawan: Nagsubli ni Ruth ken Noemi idiay Israel

Ruth 1:6-22

Ti ina ti pamilia ket ni Noemi. Dagiti Moabita a ni Ruth ken ni Orfa dagiti manugangna. Inkeddeng ni Noemi nga agsubli iti pagilianna. Simmurot met ni Ruth ken Orfa. Kinuna ni Noemi kadakuada, “Annakko, masapul nga agsublikayo. Apay a kayatyo ti sumurot kaniak? Makaanakak pay aya iti mangasawa kadakayo? Agawidkayon kadagiti balbalayyo, ta baketakon a makiasawa manen. Uray pay no kunak nga adda namnamak ket makiasawaak ita a rabii tapno aganakak, makauraykayo kadi agingga a makadakkel dagiti annakko? Daytoy kadi ti makalapped iti pannakiasawayo iti sabali? Annakko, ammoyo a narigat a mapasamak dayta. Binaybay-annak ti Apo, ket maasianak kadakayo.” Kalpasanna, inagkan ni Orfa ti katuganganna sa nagpakada, ket nagawid. Ngem nagbati ni Ruth ket kinunana, “Diyo koma kiddawen a panawankayo. Palubosandak koma a sumurot kadakayo. Umayak iti sadinoman a papananyo. Agnaedak iti sadinoman a pagnaedanyo. Kailiak metten dagiti kailianyo, ket ti Diosyo isu metten ti Diosko.” Simmurot ni Ruth ken ni Noemi idiay Bethlehem iti Juda. (Tukar)

Maikatlo a Ladawan: Ni Ruth iti Talon

Maikatlo a Ladawan: Ni Ruth iti Talon

Ruth 2:1-23

Narigat iti panagbiag ni Ruth ken Noemi. Imbaga ni Ruth ken Noemi, “Innak idiay taltalon ket agbakbaknaak kadagiti dawa a mabati dagiti agan-ani. Agyanak iti likudan ti siasinoman a mangipalubos nga agbakbaknaak iti dawa a mabati.” Iti kasta, napan ni Ruth iti taltalon, ket nagbakbakna kadagiti dawa a malabsan dagiti agan-ani. Ni Boaz iti akinkukua iti dayta a talon. Sinalusod ni Boaz kadagiti pangulo ti agan-ani nu siasino ti gan-gannaet a babai iti taltalonna. Simmungbat ti maysa kadakuada, “Isu ti ganggannaet a babai a kinakuyog ni Noemi a naggapu idiay Moab,” Nadamag ni Boaz iti kinasayaat ni Ruth iti katuganganna ket nakitana iti kinagagetna. Kinunana ken ni Ruth, “Agyankan ditoy ket makipagtrabahoka kadagiti babbai. Siputam no sadino ti paganianda, ket sumurotka kadakuada.” Binilin ni Boaz dagiti tattaona a di da an-anoen ni Ruth, ken mangibatida iti dawa tapno maurnongna. Iti dayta a rabii imbaga ni Ruth ken Noemi maipanggep iti kinaimbag ni Boaz. Kinuna ni Noemi, “Bendisionan koma ti Apo dayta a tao.” Kinuna pay ni Noemi, “Asideg a kabagiantayo dayta a tao.” (Tukar)

Maikapat a Ladawan: Ni Ruth ken Boaz iti Pagirikan

Maikapat a Ladawan: Ni Ruth ken Boaz iti Pagirikan

Ruth 3:1-18

Maysa nga aldaw, kinuna ni Noemi ken Ruth, “Masapul nga ibirokanka iti asawam, tapno adda met bukodmo a taeng. Laglagipem a kabagianta ni Boaz. Isu ti among dagidi babbai a kinaduam a nagani iti talonna. Denggem ti ibagak. Agpairik ni Boaz iti trigo inton rabii. Agdigoska, agbangbangloka ket ikawesmo ti kapintasan a pagan-anaymo saka mapan iti pagpapairikanna. Ngem dimo ipadpadlaw ken ni Boaz ti kaaddam agingga a malpas a mangan ken uminum. Siputam a naimbag no sadino ti pagturoganna. Inton namnamaem a nakaturogen, mapanka iti ayanna, ilukaismo ti ulesna, ket agiddaka iti sakaananna. Ibagananto ti rumbeng nga aramidem.” Inaramid ngarud ni Ruth dagiti inbaga kenkuana ni Noemi. Idin a mariing ni Boaz ket nakita na ni Ruth iti sakaananna, ammona a kayatna a pakasaran gapu ta isu iti kadawyan ti Israel iti dayta a panawen. No matay ti maysa a lalaki iti Israel, iti asideg a kabagian iti mabalin a mangasawa iti nabalona nga asawa. Ket kinuna ni Boaz ken ni Ruth, “Dika agdanag, Ruth. Ammo dagiti amin nga umili a naimbagka a babai. Aramidek amin a dawatem.” (Tukar)

Maikalima a Ladawan: Ni Boaz ken dagiti Pangpangulo iti Bethlehem

Maikalima a Ladawan: Ni Boaz ken dagiti Pangpangulo iti Bethlehem

Ruth 4:1-22

Nangayab ni Boaz iti sangupulo a pangpangulo iti Bethlehem. Adda pay maysa a kabagianda nga umuna nga addaan karbengan a mangasawa ken ni Ruth, ngem inkeddengda a ni Boaz iti mangasawa kenkuana. Tapno mapatibker iti nagtutulaganda, inuksot ti kabagian ni Boaz ti sapatosna sana inted kenkuana. Daytoy ti kaugalian ti Israel. Inyawid ni Boaz ni Ruth kas asawana ket naaddaanda iti anak a lalaki a managan Obed. Kinuna dagiti babbai ken ni Noemi, “Madaydayaw koma ti Apo! Ita nga aldaw, inikkannaka iti apoko a mangaywan kenka. Sapay koma ta agbalinto a nalatak ti ubing iti Israel! Ipatpategnaka ti manugangmo. Ad-adu ti inaramidna kenka ngem ti pito a lallaki nga annak. Ita, inikkannaka iti apoko a mangted iti baro a biag kenka ken mangted iti talged iti kinabaketmo.” Kalpasanna, ni Obed nagbalin a lilong ni David, ti naidaklan nga ari ti Israel. (Tukar)

Maikainnem a Ladawan: Ni Maria ken ti anghel ti Dios

Maikainnem a Ladawan: Ni Maria ken ti anghel ti Dios

Luke 1:26-38, 2:1-7

Adu a tawen ti napalabas iti kalpasan ni Ruth, nagpili ti Dios iti maysa a babai tapno agserbi kenkuana. Ti nagan na ket Maria. Nagtaud isuna iti pamilia ni Ruth. Ni Maria ket maysa a birhen a naituding nga agpakasar iti maysa a lalaki a managan Jose. Ngem sakbay da nga agkallaysa, maysa nga anghel ti Dios iti nagparang ken ni Maria. Kinunana kenkuana, “Dika agbuteng, Maria, ta pinaraburannaka ti Dios. Agsikogkanto. Ipasngaymonto ti maysa a lalaki, ket panaganamto iti Jesus. Naindaklanto. Maawaganto iti Anak ti Kangatoan. Pagbalinento ni Apo Dios nga ari, a kas ken ni David a kapuonanna. Iturayannanto iti agnanayon dagiti kaputotan ni Jacob, ket dinto agpatingga ti panagarina.” Nagdamag ni Maria iti anghel, “Kasano a maaramid daytoy idinto a maysaak a birhen?” Simmungbat ti anghel, “Umayto kenka ti Espiritu Santo. Salinongannakanto ti pannakabalin ti Dios. Daytoy ti gapuna a nasantoanto ti ubing, ket maawaganto nga Anak ti Dios.” Simmungbat ni Maria, “Adtoyak nga adipen ti Apo. Maaramid koma kaniak, kas insaom.” Nagsikog ni Maria ket inpasngay na ti maysa a maladaga a lalaki ket pinanagananna daytoy iti Jesus. (Tukar)

Maikapito a Ladawan: Nagkararag ni Ana iti Dios

Maikapito a Ladawan: Nagkararag ni Ana iti Dios

1 Samuel 1:1-20

Kalpasan iti panawen ni Ruth, adda maysa a babai iti Israel a managan Ana nga asawa ni Elcana. Ay-ayaten unay ti asawana ni Ana, ngem saan isuna a naragsak gapu ta saan isuna a makaanak. Ni Elcana ket addaan annak iti maysa pay nga asawana a ni Fenina. In-insultuloen na ni Ana ke katkatawaanna gapu iti saan a panangipalubos ti Dios nga aganak isuna. Tinawen a mapmapanda iti templo ti Dios idiay Silo tapno agdayaw ken mangipaay ti daton iti Dios. Napan ni Ana iti templo tapno agkararag iti Dios ken nagsangit, “O Apo a Mannakabalin-amin, ipangagnak kadi nga adipenmo. Kitaem ti parikutko ket lagipennak! Wen, dinak koma liplipatan! No ikkannak iti anak a lalaki, ikarik nga idaton kenka iti unos ti panagbiagna.” Bayat iti panagkarkararag ni Ana iti Dios, nakita isuna ni Eli a pangulo dagiti saserdote, agkutkuti dagiti bibigna ngem saan a sumngaw ti timekna. Gapu iti daytoy, impagarup ni Eli a nabartek ni Ana. Immasideg daytoy ket kinunana kenkuana, “Nabartekka! Isardengmo daytoy binabartek nga aramidmo ket agpausawka.” “Saanak a nabartek, apo.” Insungbat ni Ana. “Saanak a nakainum! Maladingitanak, ket agkarkararagak. Yeb-ebkasko dagiti parikutko iti Apo. Dimo koma ipagarup a dakesak a babai. Kastoy ti makitam a panagkararagko gapu ta nakaro ti ladingitko.” Gapu iti daytoy, kinuna ni Eli, “Inka ngarud a sitatalna. Sapay koma ta ited ti Dios ti Israel ti dinawatmo kenkuana.” Sinungbatan ti Dios ti kararag ni Ana. Ket dimteng ti panawen a naganak isuna iti maysa nga ubing a lalaki. Ket pinanaganan na daytoy iti Samuel. (Tukar)

Maikawalo a Ladawan: Ti Ubing a ni Samuel iti Templo ti Dios

Maikawalo a Ladawan: Ti Ubing a ni Samuel iti Templo ti Dios

1 Samuel 1:24-28, 2:12-21, 3:1-21

Idi ubing pay ni Samuel, indaton ni Ana iti Dios. Inpan ni Ana ni Samuel idiay templo iti Silo tapno makadua ni Eli. Sinurwan ni Eli ni Samuel nu kasanu iti agserbi iti Dios. Addaan dua a lallaki nga anak ni Eli, papadi da ngem saan da a sumursurot iti Dios. Isu nga insardeng ti Dios iti makisarita babaen kadagiti papadi. Maysa a rabii, bayat a nakaidda ni Samuel iti uneg ti templo. Inawagan ti Dios ni Samuel, “Samuel! Samuel!” Nagtartaray a napan ken ni Eli, “Adtoyak, apo, ta inayabannak,” kinunana. Ngem kinuna ni Eli, “Anakko, dika inayaban; agsublika iti iddam.” Tallo a daras a napasamak daytoy. Ket nabigbig ni Eli a ni Yahweh ti mangaw-awag ken ni Samuel. Ket kinunana ken Samuel a sungbatanna ti Dios ket ibagana, “Agsaoka, Apo, ta dumdumngeg toy adipenmo.” Inawagan manen ti Dios ni Samuel iti maikauppat a daras ket kinunana, “Agsaoka, Apo. Dumdumngeg toy adipenmo.” Kinuna ti Dios ken Samuel nga asidegen iti panangukomna ti pamilia ni Eli gapu kadagiti dakes nga ar-aramiden dagiti annakna. Kabigatanna, sinaludsod ni Eli nu ania dagiti imbaga ti Dios kenkuana, ket inbaga ni Samuel amin dagitoy. Adu a daras a nakisarsarita ti Dios ken ni Samuel ket nagbalin isuna a nalaing a padi, propeta ken pangulo ti Israel. (Tukar)

Maikasiam a Ladawan: Nagkararag ni Samuel para iti Israel

Maikasiam a Ladawan: Nagkararag ni Samuel para iti Israel

1 Samuel 4:1-21, 7:2-14; Exodo 20:2,5

Inaramid ti Dios dagiti inbagana maipapan kadagiti managdakdakes nga annak ni Eli. Natay dagiti annak ni Eli iti gubat idi a maabak ti Filisteo ti Israel. Iti uneg ti dua pulo a tawen dagiti Filisteo ti nangituray iti Israel. Kinuna ni Samuel kadagiti tattao, “No naimpusoan ti panagsubliyo iti Apo, masapul nga iwaksiyo dagiti didiosenyo ket ibellengyo dagiti kinitikitan nga imahen ni diosa nga Astarte. Ikonsagrar yo a naan-anay ti bagiyo iti Apo ket isu laeng ti pagdaydayawanyo tapno isalakannakayto iti bileg dagiti Filisteo.” Nagtulnog dagiti Israelita ken ni Samuel. Naguummong da iti maysa a disso. Ket nangipaay ni Samuel iti daton maipaay iti Dios ket nagkararag para iti Israel. Idin a darupen dagiti Filisteo ti Israel, nagparnuay ti Dios ti gurruod a namagbuteng kadagiti Filisteo ket nagtatarayda a pimmanaw ket nabalinan ti Israel a napagbaligian dagiti Filisteo. (Tukar)

Maikasangapulo a Ladawan: Pinulutan ni Samuel ni Saul iti Lana

Maikasangapulo a Ladawan: Pinulutan ni Samuel ni Saul iti Lana

1 Samuel 8:1 - 10:1

Ti Dios iti pudno nga ari ti Israel ket ni Samuel iti mangidaldalan kadagiti tattao para iti Dios. Ngem kayat dagiti Israelita a maaddaanda iti ari kas kadagiti dadduma nga ili. Saan a naragsakan ni Samuel idi mangngeg na daytoy. Ngem kinuna ti Dios kenkuana, “Ipangagmo ti amin nga ibaga dagiti tattao kenka, ta saan a sika ti linaksidda no di ket siak ta didakon kayat a mangituray kadakuada.” Adda maysa a baro a managan Saul, natayag ken nataer. Maysa nga aldaw, napan ni Saul ken ni Samuel. Idi a makita ni Samuel ni Saul, nagsarita ti Dios ken ni Samuel, “Daytoy ti lalaki nga imbagak kenka. Isunto ti mangituray kadagiti tattaok.” Nangala ngarud ni Samuel iti sangabotelia a lana ket imbukbokna iti ulo ni Saul. Daytoy iti pagilasinan nga isuna iti pinili nga agbalin nga ari. Iti uneg ti uppat a pulo a tawen, ni Saul ti nangidaulo ti Israel kas ari. (Tukar)

Maikasangapulo ket Maysa a Ladawan: Linaksid ti Dios ni Saul kas Ari

Maikasangapulo ket Maysa a Ladawan: Linaksid ti Dios ni Saul kas Ari

1 Samuel 15:1-29

Iti panawen ti panagari ni Saul, adu a daras a dinadael ti Amalekita ti Israel. Kinuna ngarud ni Samuel ken ni ari Saul, “Denggem ti sao a naggapu iti Dios. Inka rauten dagiti Amalekita, ket dadaelem a mamimpinsan ti amin a sanikuada. Awan ti ibatim a sibibiag. Tinolongan ti Dios ni Saul ken dagiti armadana tapnu parmekenda dagiti Amalekita. Ngem sinalungasing dagiti Israelita ti Dios. Imbatina dagiti kasasayaatan nga ayup dagiti Amalekita tapno idatonda iti Dios ket saanda met a pinatay ti ari ti Amalec a kas iti imbilin ti Dios. Ket kinuna ni Samuel ken ni Saul, “Kaykayat kadi ti Apo ti maikkan iti daton ken sakripisio ngem panagtungpal kenkuana? Nasaysayaat ti agtulnog kenkuana ngem ti agidaton iti kasayaatan a karnero. Dakes a kas iti panagkulam ti panagsukir kenkuana ket maysa a basol ti kinatangsit kas iti panagdayaw kadagiti didiosen. Gapu ta linaksidmo ti bilin ti Apo, linaksidnaka nga ari.” Timmallikud ni Samuel tapno pumanaw, ngem ginammatan ni Saul ti kagayna ket napigis. Kinuna ni Samuel kenkuana, “Inikkat ti Apo kenka ita nga aldaw ti pagarian ti Israel ket itedna iti sabali a nasaysayaat ngem sika. (Tukar)

Maikasangapulo ket Dua a Ladawan: Ni Hesus iti Templo ti Dios

Maikasangapulo ket Dua a Ladawan: Ni Hesus iti Templo ti Dios

Lukas 2:41-50, 1:35

Adu a panawen ti napalabas kalpasan ni Samuel, imbaon ti Dios ti anakna a ni Hesus iti daytoy a lubong kas maysa a maladaga iti Israel. Naiyanak isuna a kas anak ni Maria. Idi sangapulo ket dua ti tawenna, ni Maria ken ti asawana a ni Jose ket napan idiay Jerusalem kaduada ni Hesus. Idin nga agsublida, nadlawda a saandan a kadua ni Hesus ket binirbiruk da isuna. Iti maikatlo nga aldaw, nabirukanda ni Hesus idiay templo a nakatugaw a kaduana dagiti manursuro iti Linteg. Dumdumngeg isuna kadakuada ken agdamdamag. Nasdaaw dagiti nakangngeg iti sungbat na ken iti kinasiribna. Kinuna ni Maria, “Anakko apay nga inaramidmo daytoy kadakami? Kasta unay ti danagmi ken ni amam a mangbirbirok kenka.” Simmungbat ni Hesus, “Apay aya a binirbirokdak? Diyo kadi ammo a masapul nga addaak iti balay ni Amak?” Idi nga ubing pay ni Hesus a kas ken ni Samuel, ammo nan nu apay nga adda isuna idiay, tapno agserbi iti Dios. Dimmakkel ni Hesus ket immad-adda pay iti kinasirib na. Maay-ayu unay ti Dios kenkuana kasta met dagiti tattao. (Tukar)

Maikasangulo ket Tallo a Ladawan: Ni David, Ti Natured a Pastor

Maikasangulo ket Tallo a Ladawan: Ni David, Ti Natured a Pastor

1 Samuel 16:1-13, 17:34-35

Ni Saul iti umuna nga ari ti Israel, ngem agtultuloy ti panangsalungasing na iti Dios. Isu a pinanawan isuna ti Dios ket saannan a tinulungan. Adda maysa nga ubing a lalaki managan David. Isuna iti agay-aywan kadagiti karnero ni tatangna. Addaan panagtalek ni David iti Dios ken saan isuna a mabuteng iti aniaman a peggad. Maysa nga aldaw natiliw ti leon ti maysa kadagiti karnerona. Pinatay ni David ti leon ket naisalakanna ti karnerona. Agar-aramid pay ni David kadagiti napipintas a tukar ken agkankanta iti pagdaydayaw iti Dios. Dagiti kanta na ket maaw-awagan “Dagiti Salmo” a masarakan iti Sasao ti Dios, ti Biblia. Kaay-ayu ti Dios ni David, isu a pinilina tapno agbalin nga ari kalpasan ni Saul. Ngem nagbalin laeng isuna nga ari idi natay ni Saul. (Tukar)

Maikasangapulo ket Uppat a Ladawan: Ni David ken ti Higante

Maikasangapulo ket Uppat a Ladawan: Ni David ken ti Higante

1 Samuel 17:1-54

Naggugubat ti Israel ken dagiti Filisteo. Kadua dagiti Filisteo ti maysa a higante a ni Goliat. Nagpukkaw kadagiti Israelita ket kinuna, “Pumilikayo iti maysa kadagiti tattaoyo a makiranget kaniak. No mapataynak, mangabak ket agbalinkamto a tagabuyo; ngem no mapatayko mangabakak, ket dakayonto ti agbalin a tagabumi.” Nagbuteng dagiti Israelita ken ni Goliat ket awan iti mayat a makilaban kenkuana. Kinuna ti ubing a ni David, “Sinno aya daytoy a saan a nakugit a Filisteo a mangkarkarit iti armada ti sibibiag a Dios?” Saan a nagbuteng ni David iti higante ket dinawat na kenni ari Saul a palubusanna nga isuna iti makiranget ken ni Goliat ket pinalubusan met ti ari. Napan ni David ken ni Goliat ket kinunana kenkuana, “Umayka makiranget kaniak a sikakampilan, sigagayang ken sipipika, ngem sangoenka iti nagan ti APO a Mannakabalin-amin a Dios ti armada ti Israel a kinaritmo Maammoanto ti entero a pagilian nga adda Dios ti Israel, ket makitanto dagiti amin a naummong ditoy a dina masapul ti kampilan wenno gayang a pangisalakan kadagiti tattaona. Agballigi ti Apo iti gubat ket iyawatnakayo amin iti pannakabalinmi.” Kalpasanna, nangala ni David iti bato iti supotna nga impallatibong na iti muging ni Goliat. Napuntaan ti muging na ket limmumlum ket natuang a napakleb iti daga. Timmaray isuna a napan ken ni Goliat, innalana ti kampilan ket pinutolanna. Idi a makita dagiti Filisteo a natay ti maingelda, nagtatarayda nga immadayo. Kinamat ket inabak ida dagiti armada ti Israel. (Tukar)

Maikasangapulo ket Lima a Ladawan: Ginandat ni Saul a Patayen ni David

Maikasangapulo ket Lima a Ladawan: Ginandat ni Saul a Patayen ni David

1 Samuel 18:1 - 19:10)

Idi un-una, maragragsakan ni Saul ken ni David gapu iti panangisalakanna iti Israel. Kaay-ayu dagiti taga Israel ni David. Nagbalin isuna a nalaing a suldado ken pangulo iti Israel. Naragsakda a sumursurot kenkuana. Ngem nagimon ni Saul ken ni David. Maysa nga aldaw, kabayatan ti panagtukar ni David iti arpa, adda dakes nga epiritu a nangituray ken ni Saul, nakaiggem isuna ti gayang ket namindua a ginayangna ni David. Ngem adda ti Dios ken ni David babaen iti anak na a Jonathan ken dagiti dadduma nga Israelita. Ngem kasapulan a tumalaw ni David tapno maiyadayo ken ni Saul. (Tukar)

Maikasangapulo ket Innem a Ladawan: Insalakan ni David ti Biag ni Saul

Maikasangapulo ket Innem a Ladawan: Insalakan ni David ti Biag ni Saul

1 Samuel 26:1-25; Roma 12:19

Maysa nga aldaw, napan ni Saul ken ti armadana iti let-ang tapno biruken da ni David. Iti dayta a rabii, bayat iti pannaturug ni Saul ken dagiti soldadona, sililimed a simrek da David ken ni Abisai iti kampo ni Saul. Kayat a patayen ni Abisai ti matmaturog nga ari, ngem linapdan isuna ni David. Kinuna ni David kenkuana, “Saanmo a dangran! Awan duadua a dusaen ti Apo ti siasinoman a mangranggas iti pinili na nga ari.” Innala ni David ti gayang ken ti pagkargaan ti danum iti uluanan ni Saul. Idi a nakaruwar dan iti kampo, nagpukkaw ni David tapno mariing dagiti soldado ni Saul. Pinukkawanna ni Abner, ti maingel a mangsalsalaknib iti ari, “Abner, apay a di mo sinalakniban ti apom nga ari? Ita, kitaem no sadinno ti ayan ti gayang ti ari. Sadinno ti ayan ti pagkargaan ti danum iti abay ti ulona?” Kinuna ni David ken ni Saul, “Ita nga aldaw, inyawatnaka ti Apo iti pannakabalin ko ngem dika rinanggasan, sika a pinili na nga ari. Inispalko ti biagmo ita nga aldaw, kasta koma met ti (aramiden) kaniak ti Apo ket ilisinak iti amin a riribuk.” Napan ni David iti papananna ket nagawid met ni Saul. (Tukar)

Maikasangapulo ket Pito a Ladawan: Nagbalin nga Ari ni David

Maikasangapulo ket Pito a Ladawan: Nagbalin nga Ari ni David

1 Samuel 31:1-6; 2 Samuel 5:1 - 7:16

Ginubat dagiti Filisteo iti Israel. Ni ari Saul, ti anakna a ni Jonathan ken dagiti dadduma pay nga annakna a lalaki ket natay iti gubat. Nagkaykaysa iti amin a ni David ti agbalin nga ari ti Israel. Nangipatakder ni David iti palasiona iti ili ti Jerusalem. Kinuna ti Dios ken ni David, “Innalaka iti pagpastoran iti karnero ket tinudinganka a mangituray kadagiti Israelita. Pagbalinenka a nalatak a kas kadagiti katan-okan nga agtuturay ditoy lubong. Idi a madamag dagiti Filisteo a ni David ti nagbalin nga ari, nagsaganada amin a makigubat kenkuana. Ngem nagtalek ni David iti Dios ket inaramid na amin nga imbilin ti Dios kenkuana. Ket dimteng ti panawen a naparmek na amin a Filisteo. (Tukar)

Maikasangapulo ket Walo a Ladawan: Ni David ken ni Batseba

Maikasangapulo ket Walo a Ladawan: Ni David ken ni Batseba

2 Samuel 11:1 - 12:24; Exodo 20:14)

Iti panawen a napan nakigubat dagiti ari, saan a simmurot ni David ket nagbati idiay Jerusalem. Maysa a rabii, bayat iti panagpagpagna ni David iti tuktok ti palasio, natannawaganna ti maysa a babai nga agdigdigos. Kayat ni David a tagikuaen ti babai. Batseba ti nagan ti babai nga asawa ni Urias a maysa kadagti soldado iti armada ni David. Ni Urias iti dayta a panawen ket nakigubat iti kabusor ti Israel. Pinaala ni David ni Batseba ket kinaiddana daytoy. Kalpasanna, nagawid ni Batseba ket gapu iti napasamak nagsikog daytoy ket impakaammo na ken ni David. Nangted iti bilin ni David iti kapitan ti armada, ket kinunana a baybay-anda a matay ni Urias iti paggugubatan, ket isu ngarud iti napasamak, natay ni Urias. Kalpasanna, innala ni David ni Batseba tapno agbalin nga asawana. Imbaon ni Yahweh ni propeta Natan ken ni David tapno ibagana a saan a nasayaat iti inaramid na. Kastaunay iti panagbabawi ni David iti naaramid na a basol ket dimmawat iti pammakawan iti Dios. Kinuna ni Natan ken ni David, “Pakawanennaka ti Apo iti basolmo; saanka a matay. Ngem gapu ta sinukirmo ti Apo, matayto ti agbalin nga anakmo.” Nagayunar ni David ket nagkarkararag iti manu nga aldaw. Ngem impalubos ti Dios nga agsakit iti nakaro ti anak ni David ken ni Batseba ket natay daytoy. Dinanggayan ni David ni Batseba nga asawana. Iti saan a nabayag, nagsikog manen ni Batseba ket nangipasngay iti maysa a lalaki ket pinanagananda daytoy iti Solomon. Ay-ayaten ti Dios ni Solomon. (Tukar)

Maikasangapulo ket Siam a Ladawan: Ti Templo Maipaay iti Dios

Maikasangapulo ket Siam a Ladawan: Ti Templo Maipaay iti Dios

1 Cronicas 22:1-19, 28:1-7

Nagbasol ni David iti Dios, ngem ay-ayatenna ti Dios ket kayatna nga ituloy iti panagserbina kenkuana. Kayatna a mangipatakder iti napintas a templo a mabalin a paguummongan dagiti tattao nga agdayaw iti Dios. Ngem kinuna ti Dios kenkuana, “Saan a sika iti mangbangon iti templo a pakaidayawan iti naganko gapu ta maysa ka a soldado ken adu iti pinataymo. Ngem ni anakmo a ni Solomon nga addaan talged ken talna. Itedkonto iti Israel ti talna ken talged kabayatan ti panagturayna. Nangisagana ni David kadagiti banag maipaay iti templo ti Dios idiay Jerusalem sakbay a natay, ngem ni Solomon iti nangibangon daytoy. Pito a tawen iti nabubos iti panakaipatakder iti templo. Nagdaydayaw dagiti tattao iti Israel iti daytoy a templo ti Jerusalem iti uneg ti gasut a tawen, ket saanda a linipat ni David a kas maysa a nalaing nga ari. (Tukar)

Maikaduapulo a Ladawan: Napan ni Hesus idiay Jerusalem

Maikaduapulo a Ladawan: Napan ni Hesus idiay Jerusalem

Mateo 21:1-11

Maysa nga ribo a tawen kalpasan ni David, imbaon ti Dios ni Hesus iti daytoy a lubong kas maysa a maladaga. Ni Hesus ti naindaklan nga agserserbi iti Dios. Insurona kadagiti tattao iti kinapudno maipanggep iti Dios. Nagaramid kadagiti datdatlag babaen iti pannakabalin ti Dios. Ni Saul ken ni David ken datayo amin ket nagbasol iti Dios. Ngem ni Hesus iti kaanuman saan a nagbasol. Maysa nga aldaw limmugan ni Hesus iti maysa nga asno ket napan idiay Jerusalem. Rimmuar dagiti tattao tapno sabatenda ni Hesus ket nagpukkawda, “Hosanna, Anak ni David!” Ti kayat a sawen ti Hosanna, ‘dawdawatenmi nga isalakannakami.’ Impukkawda pay “Bendisionan koma ti Dios ti umay iti nagan ti Apo! Madaydayaw koma ti Dios!” Nakita dagiti tattao a ni Hesus ket nabilbileg ngem ni David. Isuna iti naindakklan nga ari, ti napili ti Dios a Mesias, nga impadto dagiti propeta adu a tawenen ti napalabas. Isuna iti ari dagiti amin nga ari. (Tukar)

Maikaduapulo ket Maysa a Ladawan: Pinakan dagiti Uwak ni Elias

Maikaduapulo ket Maysa a Ladawan: Pinakan dagiti Uwak ni Elias

1 Ar-Ari 16:29-33, 17:1-6

Kalpasan ni David ken ni Solomon, adda pay dagiti ari a nangidaulo ti Israel ket maysa kadagitoy ni Ahab. Adu dagiti inaramid na a saan a makaay-ayo iti sanguanan ti Dios. Nagdayaw isuna iti didiosen a ni Baal. Nangipatakder isuna iti templo ken altar maipaay ken Baal idiay Samaria. Nagpakasar isuna iti gangannaet a babai a managan Jezebel a nakaro ti kinamanagdakdakesna. Adu iti pinatayna nga adipen ti Dios, ken pinilit na dagiti tattao nga agdayaw iti didiosen a ni Baal. Ni Elias ket maysa a naindaklan a propeta iti dayta a panawen. Napan isuna ken Ahab ket kinunana kenkuana, “Iti nagan ti Apo a sibibiag a Dios ti Israel, isu a pagserserbiak, isapatak nga awanto ti linnaaw wenno tudo kadagitoy umay a tawen agingga nga ibagak nga adda agtinnag.” Ket nangibaon ti Dios iti pinagbisiin iti Israel. Ngem no pay kasta, nataginayun iti panangaywan ti Dios ken ti adipenna a ni Elias. Imbaonna ni Elias iti maysa a lugar a maaw-awagan Kerit a mabalin isuna nga uminom iti waig ken adda dagiti uwak a mangyeg iti tinapay ken karne iti tunggal bigat ken rabii kas taraonna. (Tukar)

Maikaduapulo ket Dua a Ladawan: Ni Elias ken ti Apuy ti Dios

Maikaduapulo ket Dua a Ladawan: Ni Elias ken ti Apuy ti Dios

1 Ar-Ari 18:16-46

Iti maikatlo a tawen iti panagbisin, kinuna ni Elias ken ni Ahab nga ayabanna dagiti amin nga tattao ti Israel ken dagiti propeta nga agdaydayaw iti didiosen a ni Baal, idiay Bantay Carmel. Immasideg ni Elias kadagiti tattao ket kinunna, “Kaano nga ikkatenyo ti panagduaduayo? No ti Apo ti pudno a Dios, agdaydayawkayo kenkuana; ngem no ni Baal isu ti Dios, agdaydayawkayo kenkuana.” Ngem saan a simmungbat dagiti tattao. Ket kinuna ni Elias, “Mangyegkayo ti dua a toro a baka. Alaen dagiti propeta ni Baal ti maysa, patayenda sada rangrangkayen ket iparabawda ti kayo a pagsungrod – ngem dida pasgedan. Kasta met ti aramidek iti sabali a baka. Kalpasanna, bay-anyo nga agkararag dagiti propeta ni Baal iti didiosenda ket agkararagak met iti Apo. Ti mangyeg ti apuy a kas sungbatna iti kararag, isu ti Dios.” Immannamong dagiti tattao. Dagiti papadi ni Baal nagkararagda iti didiosen da iti dayta nga aldaw. Nagsalsalada iti lawlaw ti altar ken sinugsugatda dagiti bagbagida iti patadem. Ngem awan dimteng nga apuy. Rinabak ni Elias ida ket kinunana, “Ipigpigsayo ti agkararag! Maysa a dios ni Baal! Nalabit agar-arapaap wenno nagpakkni wenno nagbiahe. Wenno nalabit a matmaturog ket masapul a riingenyo!” Ngarud, impigpigsa dagiti propeta ti nagkararag ken intuloyda ti nagsala, ngem awan dimteng nga apuy.

Idin nga oras iti panangidaton, tinarimaan ni Elias ti altar ti Dios a narba ket nangkali iti kanal iti aglikmut ti altar. Inkabilna dagiti kayo iti altar, rinangrangkayna ti baka ket imparabawna kadagiti kayo. Kalpasanna, kinunana kadagiti tattao, “Punnoenyo ti uppat a karamba ti danum ket ibuyatyo iti daton ken iti kayo.” Kinunana kadakuada nga aramidenda daytoy iti mamintallo a daras agingga nga ti daton, ti kayo ken ti kanal ket mapunno iti danum. Kalpasanna, nagkararag isuna iti Dios, “O Apo a Dios da Abraham, Isaac ken Jacob, ipaneknekmo itan a sika ti Dios ti Israel. Wen, iparangarangmo a siak ti adipenmo ket imbilinmo nga aramidek amin dagitoy.” Dagus a bimmaba ti apuy manipud langit iti daton ni Elias ket nakset ti daton, kayo, ken namagaan ti kanal ti lawlaw ti altar. Idi a makita dagiti tattao, nagpaklebda ket kinunada, “Ti Apo isu ti Dios, ti Apo isu laeng ti Dios!” Kalpasanna, nagkararag ni Elias nga agtudo ket pinagtudo ti Dios. Ket nalpas ti panagbisin. (Tukar)

Maikaduapulo ket tallo a Ladawan: Maipan ni Elias sadi Langit

Maikaduapulo ket tallo a Ladawan: Maipan ni Elias sadi Langit

1 Ar-Ari 19:1-21; 2 Ar-Ari 2:1-14

Pinatay ni Elias dagiti propeta ni Baal gapu iti kinamanagdakdakesda. Gapu iti daytoy, ti asawa ni ari Ahab a ni Jezebel ginandatna a patayin ni Elias. Nagbuteng ni Elias, naglibas ket napan iti adayo a lugar iti let-ang. Idiay a sinarak ti Dios ni Elias. Kalpasan a nakisarita ti Dios kenkuana, naawan iti panagbuteng kenkuana. Intuloyna nga insuro dagiti tattao nga agdayaw iti maymaysa a pudno a Dios. Imbilin ti Dios ken ni Elias a pilienna ti maysa a mannalon a managan Eliseo tapno kaduana a kas propeta. Maysa nga aldaw bayat iti panpannagnada, pagammoan adda umap-apuy a lugan a pakigubat a guyguyoden dagiti umap-apuy a kabalio iti baetda ket naipangato ni Elias sadi langit babaen iti alipugpog. Ket manipud idin, saanen a nakita pay ni Eliseo ni Elias. (Tukar)

Maikaduapulo ket uppat a Ladawan: Ni Elias ken Moises kadua ni Hesus

Maikaduapulo ket uppat a Ladawan: Ni Elias ken Moises kadua ni Hesus

Lucas 9:28-36

Pito gasut a tawen kalpasan ni Elias, idi nga adda ni Hesus iti daytoy a lubong, intugotna ti tallo kadagiti adipenna iti maysa a bantay tapno agkararag. Bayat iti panagkarkararag ni Hesus, nagbalbaliw ti langana. Ket makasisirap ti pudaw dagiti pagan-anayna. Kellaat a nagparang dagiti dua a lallaki – da Moises ken Elias – ket makisarsaritada kenkuana. Nargaan iti turog idi da Pedro. Ngem idi makariingda, nakitada ti dayag ni Hesus ken dagiti dua a lallaki a nakatakder iti abayna. Adda nangngegda a timek manipud iti ulep a nagkuna, “Daytoy ti Anakko, ti pinilik. Isu ti denggenyo.” Idi agpukawen ti timek, ni laengen Hesus ti nakitada. Bimmabada manipud bantay, ket ni Hesus intuloyna ti nagisuro ken nagaramid kadagiti nakakaskasdaaw a banbanag.

Ni Hesus immay iti daytoy a lubong kas maysa nga adipen ti Dios. Inpakitana kadatayo no kasano iti kayat ti Dios a wagas iti panagbiag tayo. Iti maikatallopulo nga tawenna, nangrugi isuna a nagisuro kadagiti tattao ken nagaramid kadagiti adu a datdatlag. Idi nga agtawen isunan iti tallopulo ket tallo, intedna ti biagna, innalana amin a pannusa a para koma kadatayo. Iti panagtulnogna iti Amana ti nagbalin a dalan tapno maisubli ti napintas a relasyontayo iti Dios, nawayawayaan iti basol, bain ken buteng. Intan-ok ti Dios ni Hesus babaen iti panagungarna manipud ken patay. Ited met ti Dios ti baro a biag kadagiti tattao nga agtalek ken Hesus ken dayawen isuna kas maysa a Dios.

Ituloy iti panagdengngeg kadagiti istorya tapno maamuan pay iti maipanggep ken Hesus ken nu kasano a maibilang tayo iti pamiliana.

ਸੰਬੰਧਿਤ ਜਾਣਕਾਰੀ

Free downloads - Here you can find all the main GRN message scripts in several languages, plus pictures and other related materials, available for download.

"Look, Listen and Live" audio-visual - A set of 8 programs of 24 pictures each for evangelism and Christian teaching. The series presents Old Testament characters, the life of Jesus, and the young church.

How to use GRN Audio visual resources - 1: Sharing the Gospel made easy - This article gives an introduction to some of the many different ways the GRN audio visual resources can be used in ministry.

How to use GRN Audio visual resources - 2: Going Deeper - This article gives further explanation of how people learn from the stories, and why the stories do not have a lot of commentary.

The GRN Audio Library - Evangelistic and basic Bible teaching material appropriate to the people's need and culture in a variety of styles and formats.

Choosing the audio or video format to download - What audio and video file formats are available from GRN, and which one is best to use?

Copyright and Licensing - GRN shares it's audio, video and written scripts under Creative Commons

Creating DVDs using the GRN Slide show Videos - How to burn DVDs for specific people groups you are trying to reach