unfoldingWord 03 - الطوفان

بعد زمن طويل ، بقى في ناس كتار عايشين في الدنيا . الناس بقو اشرار جدا وعنيفين . والحاجة ده كعب شديد الله قرر يدمر الدنيا بطوفان تقيل.

لكن الله كان مبسوط من نوح .لان هو كان راجل صالح, عايش في نص الناس الاشرار . الله كلم نوح عن الطوفان التقيل الماشي يعملو . عشان كدة قال ليه يبني مركب كبير .

الله قال لنوح يعمل مركب طوله ١٤٠ متر ، عرضه ٢٣ متر ، وارتفاعه ١٣.٥ متر . ويبنى المركب من خشب و يعمل ليه تلاتة طوابق وغرف كتيرة و يعمل سقف وشباك . المركب دي تحفظ نوح واسرتو وكل انواع الحيوانات البرية بامان في زمن الطوفان .

نوح طاع الله. هو واولاده التلاتة بنوا المركب زي ما الله وراهم. والمركب شال سنين كتير عشان يبنو, لانو كان كبير شديد . ونوح ادى انذار لناس عن الطوفان الجاي وقال ليهم يرجعو لله ،لكن الناس ما صدقوا كلامه .

الله امر نوح واسرته يلموا اكل كفاية ليهم و للحيوانات المعاهم . لما جهزوا ااى حاجة ، الله كلم نوح و مرتو و اولاده التلاتة ونسوانهم بانو ده الزمن االمناسب عشان يخشوا المركب ، وكانوا كلهم تمانية نفر .

الله رسل ذكر و انثى من كل الحيوانات و الطيور لنوح في المركب عشان يعيشو معاهم في زمن الطوفان . الله رسل سبعة ذكور وسبعة اناث من كل الحيوانات البستخدموه للذبيحة ,لمن كلهم دخلو جوه المركب ، الله بنفسه قفل باب المركب .

بعداك المطربدأ يصب شديد, وصب لمدة اربعين ليل ونهارباستمرار! كمان الموية بقت تطلع من تحت الارض . وكل شي في الدنيا بقت مغطى بالموية ، حتى الجبال العالية .

كل الحاجات العايشة على الارض اليابسة ماتت ، الا الناس و الحيوانات الكانو فى المركب . المركب بقى عايم فوق الموية ، و حافظت على كل الحاجات الفيها من الغرق بامان .

بعد الامطار وقفت ، كان المركب عايم فوق الموية لمدة خمسة شهور , والموية بدت تقل شوية . وفي يوم من الايام استقر المركب فوق جبل , ولسع الدنيا كانت مغطى بموية . بعد تلاتة شهور تاني ، بدت رؤوس الجبال تظهر .

بعد أربعين يوم تانين ، نوح رسل غراب عشان يتاكد لو الموية نشفت ولا لسع . والغراب طار عشان يشوف محل ناشف لكن مالقى اي مكان ناشف .

بعد زمن نوح رسل حمامة لكن برضو ما لقت مكان ناشف ، وجات راجعة لنوح ، بعد أسبوع نوح رسل الحمامة للمرة التانية ، وجات راجعة بفرع شجرة الزيتون! والموية بدت تنقص , والنباتات بدت تقوم من جديد .

نوح انتظر لأسبوع تاني ورسل حمامة للمرة التالتة . وفي المرة ده لقت مكان تقعد فوقو وما جات راجعة ،لانو الموية بدت تجف!

وبعد شهرين الله قال لنوح , " انت واسرتك وكل الحيوانات اطلعوا من المركب هسع . والدو واملؤ الارض بعيال كتير وعيال عيالك ". بعداك نوح واسرته طلعوا من المركب .

بعد نوح طلع من المركب ، بنى مذبحة وقدم ذبيحة من بعض الحيوانات البستخدموه ذبيحة . الله كان مبسوط من الذبيحة وبارك نوح واسرته.

الله قال، " انا بوعد انو تاني ما بلعن الارض بسبب اعمال الناس الشريرة ، او ادمر الدنيا بطوفان، مع انو الناس خطاة من زمن هم صغار".

بعداك الله عمل قوس قزح كعلامة لوعده . وكلما يظهر قوس قزح في السماء ، الله بتذكرالحاجه وعده ومع الناس.