LLL 8 Dagiti Aramid ti Nasantoan nga Espiritu

Pangrugian

Naimbag nga aldaw tayo. Ti programa nga inkayo mangngegan ket mangisuro maipanggep iti Nasantoan nga Espiritu ti Dios. Kitaen ti ladawan a maris ube a libro ket dumngeg, iyakar iti sumaruno a ladawan no mangngeg ti kastoy nga uni. (Tukar)

Umuna a Ladawan. Nagsubli ni Hesus sadi Langit

Aramid 1:1-11

Makitatayo iti ladawan a ni Hesus ket nagsubli sadi langit, ket bayat a kitkitaen isuna dagiti adalanna nga agpangpangato, adda ulep a nanglinged kenkuana iti imatangda. Apay a napan ni Hesus sadi langit? Idi punganay kaduan ti Dios ni Hesus, ket pudno isuna a Dios. Kalpasan ti nasurok a dua ribo a tawen, bimmaba ni Hesus ditoy daga manipud langit. Naipasngay isuna babaen iti Santo Espiritu, iti maysa a birhen a managan Maria nga agnanaed iti ili ti Bethlehem. Nagtaeng a kas tao ni Hesus, tapno ipakitana no siasino ti Dios. Kayat ti Dios a maaddaantayo iti nasayaat a relasyon kenkuana. Ngem saantayo a nagbalin a pudno iti Dios ket dinadaeltayo ti nasayaat a relasyon kenkuana. Gapu iti daytoy nga inaramidtayo, saantayo a napadayawan ti Dios ken nangted daytoy iti pakaibabainantayo. Amin tayo agbibiag iti basol. Patay ti supapak ti basol, ngem ay-ayaten ti Dios iti isu amin a tattao. Nagaramid isuna iti wagas tapno maisublitayo kenkuana. Imbaonna ni Hesus babaen iti pannakailansa idiay Krus nga uray awan iti naaramidna a basol iti Dios. Babaen iti ipapatayna, naisubli ti nasayaat a relasyon tayo iti Dios. Naimatangan dagiti adu a tattao no kasano iti pannakatayna iti Krus ngem adu kadagiti adalan ken adalanna ti nakaimatang no kasanu isuna a nagungar manipud ken patay. Daytoy met ti oras a kinuna ni Hesus kadagiti adalanna, “Ngem inton umay kadakayo ti Espiritu Santo, maikkankayto iti pannakabalin. Dakayto ti mangpaneknek iti maipapan kaniak idiay Jerusalem, iti entero a Judea ken Samaria, agingga iti ungto ti daga.” Kalpasan ti panangisaona iti daytoy, nakitada a nagpangato sadi langit a kas makitatayo iti ladawan. Dumtengto ti nadayag nga panagsublina tapno ukomenna dagiti tattao iti daytoy a lubong. Dagiti amin a tattao a nakanggeg iti Naimbag a Damag maipanggep ken Hesus, namati ken nagtalek kenkuana, ket maaddaan iti biag nga agnanayon kas annak ida ti Diyos. (Tukar)

Maikadua a Ladawan. Ti Yaay ti Espiritu Santo

Aramid 2:1-12

Idi immuli ni Hesus sadi langit, naguurnong dagiti adalan iti maysa a balay tapno agkararag. Pagammoan, nakangngegda iti daranudor a naggapu sadi langit, kasla ungor ti napigsa nga angin a nangpunno iti entero a balay nga ayanda. Nakakitada kadagiti sinan-dila nga apuy a nagwaras ken saggaysa a nagdisso iti tunggal maysa kadagiti adda sadiay. Napnoda amin iti Espiritu Santo kas iti inkari ni Hesus, ket nangrugida nga agsao iti naduma-duma a pagsasao maipanggep iti Dios. Tungtungpalen ni Hesus dagiti karina. Intedna ti Espirituna maipaay kadagiti amin a tao a nangted pammadayaw kenkuana nga addaan kinapudno ken pammati. (Tukar)

Maikatlo a Ladawan. Ti Mensahe ni Pedro kadagiti Tattao

Aramid 2:13-41

Idi a bimmaba ti Espiritu Santo kadagiti adalan ni Hesus, addada iti ili ti Jerusalem iti ayan dagiti Judio. Iti dayta a panawen, adu kadagiti Judio ti adda idiay Jerusalem a naggapu iti nagduduma a luglugar tapno agrambakda iti piesta dagiti Judio, makapagsaoda kadagiti naduma-duma a pagsasao. Tinulungan ti Espiritu Santo dagiti adalan ni Hesus nga agsao kadagiti amin a pagsasao tapno amin a tattao sadiay a makangngeg ket maawatanda ti mensahe maipanggep ken Apo Hesus iti bukodda a pagsasao. Ngem pinanunot ken imbaga dagiti tattao a dagiti adalan ni Hesus ket nabartekda. Maysa kadagiti adalan ni Hesus a ni Pedro ket timmakder kaduana dagiti sangapulo ken maysa pay nga adalan. Nagsaoda kadagiti adu a tattao, “Saan a nabartek dagitoy a tattao a kas inpagarupyo, gapu ta maikasiyam pay laeng nga oras iti bigat, napnoda iti Santo Espiritu ti Dios.” Nangasaba ni Pedro iti Naimbag a Damag a maipanggep ken Hesus. Adu a tattao ti namati kadagiti inkasaba ni Pedro. Nagpabautisarda kas pakailasinan ti pananglikudda kadagiti basbasolda. Inawatda met ti Espiritu Santo ti Dios ket nangrugida a sumurot kadagiti insursuro ni Hesus. (Tukar)

Maikapat a Ladawan. Dagiti Immuna a Namati a Kristiano

Aramid 2:42-47; 1 Corinto 11:17-34

Iti dayta nga aldaw, adu kadagiti tattao ti Jerusalem ti nagtalek ken nagbalin nga adalan ni Hesus. Inawat dagitoy a tattao ti Santo Espiritu ti Dios ket nangrugida a naguummong a kas iti maysa a dakkel a pamilia ket daytoy ti nangrugianan iti Nakristiyanoan nga Iglesia. Saan a nabayag, dagitoy a tattao ket inawaganda Kristiano. Inurnong ken inlakoda dagiti sanikuada sada imbunong ti naglakoanda segun ti kasapulan ti tunggal maysa, ket raemenda ti tunggal maysa. Inaldaw-aldaw a mapanda a sangsangkamaysa iti templo ti Dios idiay Jerusalem. Sadiay, sangsangkamaysada nga agkararag ken agdayaw iti Dios. Dagiti adalan ni Hesus a nagbalin nga apostoles ti nangisuro kadakuada maipanggep ti Sao ti Dios. Sansangkamaysa met daggiti Kristiano kadagiti balbalayda nga agsasango a mangan kadagiti taraonda. Masansan nga agkakaduada tapno aramidenda ti Nasantoan a Pangrabii. Imbilin ni Hesus kadagiti adalanna nga aramidenda daytoy iti kasta a wagas. Iti rabii a liniputanda ni Hesus, kaduana dagiti adalanna iti pangrabii ket innalana ti tinapay, kalpasan ti panagyamanna iti Dios, pinispisina ti tinapay ket intedna kadagiti adalan. Ti tinapay iladawanna ti bagi ni Hesus a nasugsugat idiay krus maipaay kadatayo. Kasta met kalpasan ti pangrabii, innala ni Hesus ti kopa ket intedna kadagiti adalanna. Ti kopa iladawanna ti dara ni Hesus a nagayos idiay krus maipaay kadatayo. Imbilin ni Hesus kadagiti adalanna nga aramidenda daytoy a kas panglagip kenkuana. Ti siasinoman nga agtalek ket sumurot ken Hesus ket nasken nga aramidenna ti Pangrabii ti Apo, gapu ta kuna ti Sao ti Dios, “…tunggal mangankayo iti daytoy a tinapay ken uminumkayo iti daytoy a kopa, ipakaammoyo ti ipapatay ti Apo agingga ti panagsublina.” (Tukar)

Maikalima a Ladawan. Mapaimbag ti Tao a Pilay

Aramid 3:1 - 4:4

Iti maysa a malem, napan da Pedro ken Juan iti Templo tapno agkararag. Maysa a lalaki a pilay ti nakatugaw iti ruangan. Nayanak a pilay ket iti kaanuman ket saan a makapagna. Idi makitana da Pedro ken Juan a sumrek iti Templo, dinawatna iti limosda. Kinuna ni Pedro kenkuana, “Awan kwartak ngem itedko kenka ti adda kaniak: iti nagan ni Hesu-Kristo a taga-Nazaret, ibilinko a magnaka!” Iniggaman ni Pedro ti makannawan nga imana ket tinulonganna a timmakder. Dagus a timmibker dagiti susuop ti pilay. Kalpasanna, kimmuyog kada Pedro a simrek iti Templo. Naglaglagto a nagdaydayaw iti Dios. Saan a ni Pedro ti nangpaimbag iti lalaki. Ti pammati ken Hesus ken iti pannakabalin ti Santo-Espiritu ti nangpaimbag kenkuana. Naawat na ti sagut a nasay-sayaat pay ngem ti kuarta. (Tukar)

Maikainnem a Ladawan. Ti Agassawa a Nagulbod

Aramid 4:32 - 5:1-11

Maysa a lalaki managan Bernabe ti nangilako kadagiti sanikuana ket intedna ti kuarta kadagiti apostoles tapno makatulong kadagiti marigrigat. Maysa nga agassawa a managan Ananias ken Safira ti nangilako met kadagiti sanikuada. Ngem nangilemmeng iti paset ti naglakoanda a maipaay iti bagida. Maysa laeng a bagi ti pirak ti inted ni Ananias ken Pedro. Nagulbod ken Pedro gapu ta kinunana nga intedna amin ti naglakoanda iti sanikuada. Ammo ni Pedro nga agul-ulbod ni Ananias, ket sinaludsodna ken Ananias, “Ananias, apay a paiturayanka ken ni Satanas ket inulbodmo ti Espiritu Santo babaen iti panangilemmengmo iti dadduma a naglakoam? Saan a tao ti inulbodmo, no di ket ti Dios!” Apaman a nangngeg ni Ananias daytoy, napasag ket natay. Simrek dagiti agtutubo a lallaki, binungonda ti bangkay ni Ananias sada inruar a napan intanem. Kalpasan ti sumagmamano nga oras, sumrek met ni Safira. Dina ammo ti napasamak iti asawana. Nagulbod met isuna ken Pedro maipanggep ti naglakoanda. Ket kinuna ni Pedro kenkuana, “Apay a nagtulaganyo nga agassawa a suoten ti Espiritu ti Apo? Denggem dagiti arimpadek! Addan iti ruangan dagiti lallaki a napan nangitanem iti asawam. Umaydaka met iruar!” Napasag a dagus ni Safira iti sakaanan ni Pedro ket natay. Saan nga impateg ni Ananias ken Safira iti panagdayaw iti Dios ken iti Espirituna gapu iti panagulbod. Nagpammarangda a kas mannangted, ngem kinuranganda ti kuarta a naglakoanda iti sanikuada. Ammo ti Dios dagiti nadadakes ken nasasayaat a panunot iti tunggal maysa kadatayo, ket awan iti mailimedtayo kenkuana. (Tukar)

Maikapito a Ladawan. Ti Pannakatay ni Esteban

Aramid 6:1 - 8:3

Makita iti ladawan ti maysa a grupo dagiti tattao a inuborda ti maysa a lalaki a managan Esteban. Agserserbi isuna a kas pangulo ti simbaan, tumultulong kadagiti marigrigat a tattao iti Jerusalem. Natured a mangiwaragawag iti Naimbag a Damag ti Dios kadagiti tattao ken agar-aramid kadagiti datdatlag babaen ti pannakabalin ti Espiritu Santo. Ngem adda dagiti Judio a simmupiat kenkuana. Impanda ni Esteban iti pangukoman ket pinabasolda isuna, ibagada nga agsasao ni Esteban iti maibusor iti Dios. Ngem saan a nagbuteng ni Esteban, gapu iti pannakabalin nga inted kenkuana ti Santo Espiritu. Kinuna ni Esteban kadagiti Judio nga isuda ti gapu iti pannakatay ni Hesus a dimteng tapno mangted kadagiti tattao ti biag nga agnanayun. Kalpasanna, timmangad isuna sadi langit ket nakitana ti dayag ti Dios. Ket kinunana, “Kitaenyo! Silulukat ti ruangan ti langit ket makitak ti Anak ti Tao a sitatakder iti makannawan ti Dios!” Nagpungtot dagiti Judio kenkuana ket inruarda iti siudad sada inubor ni Esteban kabayatan ti panagkararagna iti kastoy, “Apo Hesus, awatem toy kararuak.” Sakbay a natay ket impukkawna, “Apo, dimo kuma ipabasol daytoy kadakuada.” Ket natay apaman a naisaona daytoy. Dagiti nangubor ken Esteban ket impanda dagiti kagayda iti sakaanan ti maysa nga ubing a pangulo dagiti Judio a managan Saulo. Immanamong ni Saulo iti pannakapapatay ni Esteban. Uray kadagitoy a panawen, dagiti tattao nga addaan pammati ken agserserbi iti Dios ket mapadpadasanda iti nakaro a pannakaparigat manipud kadagiti managdakdakes a tattao. Ngem iti kaanoman, saan ida a binaybay-an ti Dios, uray pay ken patay. (Tukar)

Maikawalo a Ladawan. Dagiti agbibiahe a Taga Etiopia

Aramid 8:4-8, 26-40

Iti dayta nga aldaw, ni Saulo ken dagiti dadduma a kabusor ti Simbaan ti Kristiyano ket nangrugi a mangidadanes kadagiti amin a namati idiay Jerusalem. Gapu iti daytoy, nagsisina dagiti namati iti naduma-duma a lugar. Maysa a lalaki managan Felipe iti napan iti siudad ti Samaria. Idiay nga ikaskasabana kadagiti adu a tattao iti Naimbag a Damag maipanggep ken Hesus ket adu kadakuada iti namati ken Hesus. Babaen iti maysa nga anghel, kinuna ti Dios ken Felipe, “Agsaganaka a mapan iti abagatan. Surotem ti dalan nga agturong idiay Gaza manipud Jerusalem.” Tinungpal ni Felipe ti inbaga ti Dios kenkuana. Iti ladawan makitatayo iti maysa a napateg a tao a naggapu iti Etiopia. Agbibiahe isuna a nakalugan iti maysa a karuahe. Basbasaenna ti libro nga insurat ni propeta Isaias maipanggep iti maysa a tao a nadusa iti saan a nalinteg a wagas, ngem saanna a maawatan ti basbasaenna. Kinuna ti Espiritu Santo ken ni Felipe, “Magnaka iti asideg ti lugan.” Nagtaray ni Felipe nga immasideg ket nangngegna ti opisial nga agbasbasa iti libro ni propeta Isaias. Sinaludsod ni Felipe, “Maawatam met laeng ti basbasaem?” Insungbat ti opisial, “Kasano a maawatak no awan met mangipalawag kaniak?” Daytoy ti paset ti surat a binasana, “Kasla karnero a maipan iti pagpartian, kasla urbon ti karnero a naulimek no mapukisan. Ket awan a pulos ti inyesngawna. Iti pannakairurumenna, naikkat ti kalinteganna. Awanto ti makaibaga maipapan iti kaputotanna, ta naggibusen ti biagna ditoy daga.” Kalpasanna dinamag ti opisial kenni Felipe, “Sinno kadi ti sarsaritaen ti propeta? Ti bagina kadi wenno sabali?” Ket rinugyan ni Felipe nga ilawlawag iti opisial maipanngep ken Apo Hesus nga imbaon ti Dios. Ket ti opisial namati ket tinarigagayanna a sumurot ken Hesus. Bayat iti panagkaduada a nagadaliasat, kinunana kenni Felipe, “Adtoy ti danum. Ania ti makatiped ti panagbautisarko?” Binautisaran ni Felipe ti opisial ket intuloyda ti nagdaliasat nga agawid nga addaan ragsak. Intuloy met ni Felipe ti panangikaskasabana kadagiti Sao ti Dios iti adu nga ili. (Tukar)

Maikasiam a Ladawan. Ti Parmata ni Pedro Maipanggep kadagiti Animal

Aramid 10:9-18

Maysa nga aldaw, napan ni Pedro iti tuktok ti balay tapno agkararag. Nabisinan bayat ti panagkarkararagna ket kayatna ti mangan. Iti dayta met la nga kanito, nagparparmata. Nakitana a naglukat ti langit ket adda dagiti amin a kita ti animal. Kinuna ti maysa a timek, “Pedro, tumakderka. Pumartika ket manganka.” Ni Pedro ket maysa a Judio ket iti linteg dagiti Judio, dagiti animal a nakita ni Pedro ket maibilang a narugit ket saan a kanen. Insungbat ni Pedro, “Saanko a maaramid dayta, Apo. Ni kaanoman, diak pay nangan iti maibilang a narugit wenno di rumbeng a kanen.” Nagsao manen ti timek, “Dimo ibilang a narugit ti dinalusan ti Dios.” Namitlo daytoy a naaramid ket kalpasanna, naiguyod a naipangato sadi langit ti banag a nakitana. Bayat ti panangut-utob ni Pedro iti kaipapanan ti nakitana iti parparmata, simmangpet dagiti tallo a lallaki ket sapsapulenda ni Pedro. (Tukar)

Maikasangapulo a Ladawan. Ti Naimbag a Damag Maipaay Kadagiti amin nga Ili

Aramid 10:1-8, 19-48

Dagiti tallo a lallaki a mangsapsapul ken Pedro ket naggapu iti bangir nga ili, imbaon ida ti maysa a lalaki a managan Cornelio. Ni Cornelio ket maysa a panguloen dagiti armada ti Romano. Kayatna nga ited ti pammadayaw ken pagserbian ti Dios. Nagparang kenkuana ti maysa nga anghel ti Dios ket kinunana nga surutenna ni Pedro. Dagiti Judio ket ibilangda a narugit dagiti Romano, ngem inpakita ti Dios ken Pedro babaen iti sirmata nga awan iti siasinuman a narugit. Gapu ta awaten ti Dios ti amin a tao manipud iti nadumaduma nga ili a mamati kenkuana ken agaramid kadagiti nasasayaat. Simmurot ni Pedro kadagiti lallaki ket napanda iti balay ti Romano. Idi a makita ni Cornelio ni Pedro, nagparintumeng ken nagrukbab iti sangoananna. Ngem pinatakder ni Pedro ket kinunana, “Tumakderka, ta taoak met a kas kenka! Damagek ngarud no apay nga inayabannak.” Imbaga ni Cornelio maipanggep iti anghel. Kalpasanna kinuna ni Pedro, “Makitakon a pudno nga awan tao nga idumduma ti Dios.” Ket intuloy ni Pedro nga insuro ken Cornelio iti maipanggep ken Hesus. Ni Cornelio ken iti sibubukel a pamiliana ket namati ken inawatda ti Santo Espiritu ti Dios ket nagbalinda nga adalanna. Ay-ayaten ti Dios ti amin a tattao, aniaman ti tribu ken pagsasao, iti maris wenno kudil. Ni Hesus ket saan nga immay tapno isalakanna laeng dagiti Judio. Kayatna nga ited ti biag nga agnanayon kadagiti amin a tattao. Kayatna nga amin nga ili ket mamati ken agserbi kenkuana. (Tukar)

Maikasangapulo ket Maysa a Ladawan. Ni Pedro iti Pagbaludan

Aramid 12:1-11

Ti ari dagiti Judio a ni Herodes ket nangrugi da mangidadanes kadagiti adalan ni Hesus ken dagiti namati a kamkameng iti Iglesia. Pinapatayna ti apostol a managan Santiago ket pinabaludna ni Pedro. Maysa a rabii, bayat ti pannaturog ni Pedro iti nagbaetan ti dua a soldado ket nakakawar. Pagamoan nagparang ti maysa nga anghel ti Apo ket kinunana, “Bumangonkan! Darasem!” Dagus a naikkat ti kawar dagiti imana. Sinurotna ti anghel a rimmuar iti pagbaludan. Naglukat ti ruangan nga awan nangsagsagid ken awan nakalapped iti panagruarda. Impagarup ni Pedro nga agparparmata, agingga a makaruar iti pagbaludan ket nadanunda ti maysa a kalsada, pagammoan la ta nagpukaw ti anghel. (Tukar)

Maikasangapulo ket Dua a Ladawan. Ni Pedro ken Dagiti Gagayyemna nga Agkarkararag

Aramid 12:12-19

Kabayatan ti kinaadda ni Pedro iti pagbaludan, adu kadagiti gagayyemna iti naguummong tapno ikararagda isuna. Idin a nakaruar ni Pedro, dagus a napan iti pagtaengan nga ayan dagiti gagayyemna. Iti dayta a rabii, adu kadagiti namati iti adda idiay, agkarkararag maipaay ken ni Pedro. Nagtugtog ni Pedro iti ruangan ket maysa a babaonen a babai nga agnagan Roda ti napan nangammo no siasino ti nagtugtog. Idi mangngegna ti timek ni Pedro, iti napalalo a ragsakna, dinan linuktan ti ruangan no di ket nagtaray a napan iti uneg ket impakaammona kadagti tattao nga adda ni Pedro, “Adda ni Pedro iti ruangan.” Ngem saan a namati kenkuana ket kinunada, “Mauyongka!” Intuloy ni Pedro iti nagtugtog. Idi nga luktanda ti ruangan, nakitada ni Pedro a nakatakder iti ruangan, ket nasdaawda. Sinaritana kadakuada no kasano ti panangiruar ti Apo kenkuana iti pagbaludan. Mangmangngeg ti Dios dagiti kararag dagiti agtalek kenkuana. Kinuna ni Hesus, “No pagannamungan ti dua kadakayo ditoy daga ti aniaman a dawatenyo, itedto kadakayo ni Amak sadi langit. Ta no sadino ti ayan ti dua wenno tallo nga nagummong gapu iti naganko, addanak kadakuada sadiay.” (Mateo 18:19-20)

Pangrugian ti sumaruno nga istorya

Kadagiti sumaganad a ladawan ket iyam-ammok ti lalaki a managan Saulo. Adda isuna idi patayenda ni Esteban. Idi natay ni Esteban, inkeddengna a mapan iti siudad ti Damasco. Ginandatna nga ipabalud amin a namati sadiay. Bayat iti panagdaliasatna, maysa a nakakaskasdaaw ti napasamak. (Tukar)

Maikasangapulo ket Tallo a Ladawan. Ti Lawag ken ti Timek manipud sadi Langit

Aramid 9:1-9

Bayat iti panagdaldaliasat ni Saulo a mapan iti siudad ti Damasco, pagammoan adda naraniag a makasisirap manipud sadi langit. Napasag iti daga ket nangngegna ti timek a nagkuna, “Saulo, Saulo, apay nga idadanesnak?” Sinaludsod ni Saulo, “Siasinoka Apo?” Kinuna ti timek, “Siak ni Hesus nga idadanesmo. Ngem tumakderka, ket inka iti siudad ket maibaganto kenka iti aramidem.” Nangngeg dagiti kadua ni Saulo ti timek ngem awan ti nakitada a tao. Timmakder ni Saulo, immulagatna dagiti matana ngem saanen a makakita. Iti kasta, kinibinda nga impan idiay Damasco. Tallo aldaw a di nakakita. Saan met a nangan wenno imminum. (Tukar)

Maikasangapulo ket Uppat a Ladawan. Ti Bulsek a ni Saulo ken ni Ananias

Aramid 9:10-20

Adda iti maysa a pagtaengan idiay Damasco ni Saulo a bulsek. Imbaon ti Dios ti maysa a lalaki a managan Ananias ken Saulo. Ni Ananias ket maysa a namati ket adalan ni Hesus. Ammona a ni Saulo ket adu ti naaramidna a saan a nasayaat kadagiti namati idiay Jerusalem. Ngem uray pay iti kasta, nagtulnog latta ni Ananias iti ibabaon ti Dios, napan isuna ken ni Saulo. Kinuna ni Ananias ken ni Saulo, “Kabsat a Saulo, imbaonnak ni Apo Hesus a nagparang kenka iti dalan idi umayka ditoy tapno makakitaka manen ken mapnoka iti Espiritu Santo.” inpatay ni Ananias dagiti imana ken Saulo ket nakakita manen ni Saulo. Inawatna ti Santo Espiritu manipud iti Dios ket nabautisaran tapno ipakitana kadagiti tattao a maysa isunan nga adalan ni Hesus. Kalpasanna, napan ni Saulo kadagiti Judio tapno ikasabana kadakuada iti maipanggep ken Hesus. (Tukar)

Maikasangapulo ket Lima a Ladawan. Ti Kararag dagiti Namati kadagiti Misionero

Aramid 11:25, 26, 13:1-3

Iti ili a maaw-awagan Antiokia, adda dagiti bunggoy dagiti namati a naguummong tapno agdayaw iti Dios. Isuda dagiti immuna a namati a maawagan Kristiano, dagiti adalan ni Hesus. Simmurot ni Saulo ken ni Bernabe tapno mangasaba kadagiti tattao sadiay. Maysa nga aldaw, dagiti panguloen ti iglesia ket nagayunar ken nagkararagda. Ti Santo Espiritu ket nakisarita kadakuada ket kinunana, “Ilasinyo da Bernabe ken Saulo. Isuda ti pinilik a mangaramid iti trabaho a maituding kadakuada.” Kayat ti Dios a ni Saulo ken ni Bernabe ket mapan kadagiti tattao a saan pay a nakangngeg iti Naimbag a Damag maipanggep ken Apo Hesus. Makitatayo iti ladawan a nakaparintumeng ni Saulo ken ni Bernabe. Inpatay dagiti panguloen ti iglesia dagiti imimada kada Saulo ken Bernabe ket nagkararagda. Kalpasanna, imbaonda ni Saulo ken Bernabe tapno mangasaba iti Naimbag a Damag maipanggep ken ni Hesus kadagiti lugar nga adayu iti Antiokia. Isuro ti Sao ti Dios kadatayo, “Inkay iti intero a lubong ket ikasabayo ti Naimbag a Damag kadagiti amin a parsua.” (Marcos 16:15)

Maikasangapulo ket Innem a Ladawan. Nangasaba ni Pablo maipanggep ken Hesus

Aramid 13:4-52

Napan ni Saulo ken Bernabe kadagiti nadumaduma nga ili kadagiti adayo a luglugar. Daytoy met iti panawen a ni Saulo ket naawagan iti baro a nagan na a Pablo. Makitatayo iti ladawan a napanda kadagiti tattao iti uneg ti “Balay a pagkarkararagan” dagiti Judio. Inikkanna ida kadagiti naindaklan a propeta, pangulo ken manursuro. Inkasabada maipapan iti Maysa nga umay tapno isalakanna ida kadagiti basbasolda. Isuna ni Apo Hesus. Idi nga immay ni Hesus, adu kadagiti Judio ti saan a mamati kenkuana. Saanda a maawatan no siasino ni Hesus, ket saanda a dinayaw ni Hesus nga imbaon ti Dios. Dumngegkayo a nalaing gapu ta ti mensahe iti pannakaisalakan ket naited kadatayo. Dagiti tattao ken dagiti pangulo ti Jerusalem ket saanda a maawatan no siasino ni Hesus. Ket saanda a maawatan dagiti isursuro dagiti propeta a basbasaenda tunggal aguummongda. Ket inukom ida ni Hesus kas iti kinunana kadagiti propeta. Uray awan iti makitada a gapu tapno papatayenda isuna, dinawatda ken Pilato a patayenda isuna. Kalpasanna, ni Hesus ket natay idiay Krus, imbabada ket impanda iti maysa a tanem ngem pinagungar isuna iti Dios manipud ken patay. Kalpasan iti adu nga aldaw, nagparang isuna kadagiti adalanna. Ket nagtalinaed isuna a sibibiag ket ni kaanuman saanen a matay. Intuloy ni Pablo ti nangasaba, “Rebbengyo ngarud nga ammoen, kakabsat, a babaen ken ni Hesus, maipakaammo kadakayo ti pannakapakawan dagiti basbasol. Rebbengyo pay nga ammoen a ti siasinoman a mamati kenkuana mapakawan amin a basol a saan a mapakawan segun ti Linteg ni Moises. Adu kadagiti Judio iti nadumaduma a luglugar iti namati kadagiti inkasaba ni Pablo, ken adu dagiti naipatakder nga ig-iglesia kadagiti nadumaduma a luglugar, ngem adu met dagiti saan a namati. Adu latta iti saan a mamati no ikasabatayo ti maipanggep ken Hesus. Ngem ti kayat ti Dios a mangngeg ket mamati dagiti amin a tattao iti Naimbag a Damag maipapan ken Apo Hesus tapno maisalakanda. (Tukar)

Maikasangapulo ket Pito a Ladawan. Ti Sirmata ni Pablo iti Maysa a Lalaki manipud Macedonia

Aramid 16:6-10

Kalpasan iti adu a tawen, napan manen ni Pablo kadagiti ig-iglesia. Kaduana dagiti sumagmamano a lallaki, maysa kadakuada ni Silas. Kayatda a mapan iti ili ti Bitinia, ngem saan ida a pinalubusan ti Santo Espiritu a mapan idiay. Iti rabii, adda parmata ni Pablo ket nakitana ti maysa a lalaki a taga-Macedonia a sitatakder nga agpakpakaasi kenkuana. “Umayka koma idiay Macedonia, ta tulongannakami.” kinunana. Dagus nga ammo ni Pablo nga aw-awagan ida ti Dios tapno mapan idiay Macedonia. Tarabayen ti Dios ti siasinuman a sumurot ken Hesus. No dadduma, tumarabay ti Dios babaen kadagiti sirmata wenno tagtagainep, ngem masansan a tartarabayennatayo babaen kadagit sauna, “Biblia” ket babaen iti Santo Espiritu kadagiti kaunggan ti pusotayo. (Tukar)

Maikasangapulo ket Walo a Ladawan. Ni Pablo ken Silas idi Naggingined

Aramid 16:16-35

Nagtungpal ni Pablo ken ni Silas iti Dios ket napanda idiay Filipos iti ili ti Macedonia. Ket inkasabada kadagiti tattao maipanggep ken Apo Hesus. Babaen iti nagan ni Apo Hesus, napaksiatda dagiti dakes nga espiritu a nangadipen iti maysa a balasang. Ginura isuda dagiti tattao agsipud ta adu a kuarta ti matgedanda babaen iti panagpadles ti balasang. Tiniliwda ni Pablo ken Silas sada indatag kadagiti opisiales ti siudad ket kinabkabilda ida sada impan iti pagbaludan. Idi tumengnga ti rabii, agkarkararag da Pablo ken Silas ken agkankantada kadagiti himno a pagdaydayaw iti Dios. Agdengdengngeg kadakuada dagiti dadduma a balud. Pagammuan, nagginggined iti napigsa. Nagunggon ti entero a pundasyon iti pagbaludan. Naglukat a dagus dagiti amin a ridaw ket naikkat ti kawar dagiti amin a balud. Impagarup dagiti agbambantay a naglibasen dagiti balud. Iti kasta, inasutna ti kampilanna ket papatayenna koman ti bagina. Ngem impukkaw ni Pablo, “Dimo ranggasan ta bagim! Adda kami amin ditoy!” Nagpaala ti agbambantay iti silaw ket simrek a dagus iti ayanda ket agtigtigerger iti buteng a nagrukbab iti sakaanan da Pablo ken Silas. Kalpasanna, inruarda ida, “Appo, ania ti rumbeng nga aramidek tapno maisalakanak?” Kinunada, “Mamatika ken Apo Hesus ket maisalakankanto, sika ken ti Pamiliam.” Namati ken nagtalek ti agbambantay ket dagus a nabautisaranda a sangapamiliaan. Inyawidna da Pablo ken Silas sana pinakan ida. Nagrag-oda a sangapamiliaan. Ket napanda iti adayo. Iti panawen a narikut iti mapaspasamak, nasken a dayawentayo ti Dios. (Tukar)

Maikasangapulo ket Siam a Ladawan. Ni Pablo ken ti Altar a Maipaay iti Dios a di am-ammo

Aramid 4:12, 17:16-34

Makitatayo iti ladawan a ni Pablo ket kitkitaenna ti altar. Nakaisurat iti altar ti sao nga, “Maipaay iti Dios a di Am-ammo.” Naipatakder daytoy idiay siudad ti Atenas. Adu dagiti didiosen idiay, gapu ta dagiti Atenas ket agdaydayawda kadagiti agsasabali a didiosen. Saanda nga am-ammo iti pudno ken sibibiag a Dios. Kayatda a maammuan ti ikaskasaba ni Pablo, ket kinuna ni Pablo kadakuada, “Makitak a relihiosokayo iti amin a banag. Ta iti panagpasiarko iti siudadyo ken pannakakitak kadagiti disso a pagdaydayawanyo, nasarakak ti maysa nga altar a nakaisuratan ti kastoy, ‘maipaay iti Dios a di Am-ammo.’ Nupay diyo am-ammo dayta a pagdaydayawanyo, isu ita ti ipakaammok kadakayo.” Inkasaba ni Pablo iti pudno ken ti Dios a nangparsua iti amin a banag. “Ti Dios ti namarsua ti lubong ken kadagiti amin a linaonna, isu ti Apo ti langit ken daga. Saan nga agnanaed kadagiti templo nga aramid dagiti tao.” Kinuna ni Pablo a mabalinda a maam-ammo ti Dios babaen ken Apo Hesus, a pinagungar ti Dios manipud ken patay. Idi mangngeg dagiti sumagmamano a tattao daytoy, kinatawaanda ni Pablo, ngem dadduma kadakuada kayatda a maammoan a nasayaat maipanggep ken Apo Hesus, ket adu kadakuada iti namati ken simmurot iti Apo. Ni Hesu-Kristo laeng iti mangisalakan. Awan iti sabali a dios wenno relihion iti makaisalakan iti tao manipud kadagiti basbasolda. (Tukar)

Maikaduapulo a Ladawan. Impanda ni Pablo iti Pangukoman

Aramid 18:1-17

Makitatayo a ni Pablo ket adda iti peggad. Adda isuna iti siudad ti Corinto, adu iti managdakdakes iti dayta a lugar. Dagiti Judio iti Corinto ket supringenda dagiti isursuro ni Pablo. Ikaskasaba ni Pablo a ni Hesus ket “Mesias”, ti Pinili ti Dios. Maysa a rabii, nakisarita ti Dios ken Pablo ket kinunana, “Dika agbuteng. Ituloymo latta ti agsao ket dika maupay, ta addaak kenka. Awanto ti mangranggas kenka, agsipud ta adu ti taok iti daytoy a siudad.” Nagtalinaed ngarud ni Pablo iti Corinto ket inkasabana ti Sao ti Dios kadagiti tattao ket adu dagiti namati kadagiti insurona. Ngem dagiti Judio a nangsupring kenkuana ket kasta unay iti pungtotda. Maysa nga aldaw, nagtataripnongda tapno tiliwenda ni Pablo, ket impanda iti pangukoman ket pinabasolda a mangisursuro iti saan nga umno. Ngem saan ida nga impangag ti gobernador ket pinaruarna amin ida iti pangukoman. Gapu iti daytoy, naisalakan ni Pablo ket intuloyna iti nangasaba iti Naimbag a Damag maipanggep ken Hesus, uray no adu dagiti mangsupring kenkuana. (Tukar)

Maikaduapulo ket Maysa a Ladawan. Insalakan dagiti Soldado ni Pablo manipud kadagiti Kabusorna

Aramid 21:1 - 22:24

Nagsubli ni Pablo tapno pasiarenna dagiti baro a patakder nga iglesia. Pinapigsana ti pakinakem dagiti mamati nga agtuloyda iti panangsurot ken Apo Hesus. Sumagmamano kadagiti mamati ket nakisarita ken Pablo a saanen nga agsubli idiay Jerusalem. Ammoda nga adu iti kabusorna idiay iti manggandat a mangpapatay kenkuana. Ngem kinuna ni Pablo kadakuada, “Saanak la a sisasagana a mareppet. Sisasaganaak pay a matay idiay Jerusalem, gapu ken Apo Hesus.” Idi nakadanun ni Pablo, nagtataripnong dagiti Judio ket dinuroganda dagiti tattao a tiliwenda ni Pablo. Ket ginandatda a patayen iti kalsada. Inyadayo dagiti sumagmamano a soldado ti Roma manipud iti pungtot dagiti tattao. Timmakder ni Pablo iti agdan. Kinasaritana dagiti tattao ket imbagana kadakuada no kasanona a naam-ammo ni Hesus ken nagbalin a pasurot. Ngem impukkaw dagiti tattao, “Patayen ti kasta a tao! Saan a rumbeng nga agbiag!” innala dagiti soldado ni Pablo ket inserrekda iti kuartel tapno mailisi manipud kadagiti tattao. Saan a mabuteng ni Pablo a matay. Ammona a maysa a dakkel a gun-guna iti agur-uray kenkuana sadi langit manipud kadagiti amin a sinagabana maipaay iti nagan ni Apo Hesus. (Tukar)

Maikaduapulo ket Dua a Ladawan. Nangasaba ni Pablo kadagiti Napapateg a Tattao

Aramid 23:11, 25, 26

Nagtalinaed ni Pablo iti pagbaludan iti dua a tawen. Gandaten dagiti Judio a patayen ni Pablo, ngem nagparang kenkuana ti Apo ket kinunana, “Dika agdanag! Pinaneknekam ti maipapan kaniak ditoy Jerusalem, ket masapul a kasta met ti aramidem idiay Roma.” Indarum dagiti panguloen ti Judio iti gobernador ti Roma ni Pablo ket impanda ken ni Agripa, ti ari dagiti Judio. Saan a nagbuteng ni Pablo iti uray siasinoman. Natured a kinuna ni Pablo iti gobernador, iti ari ken reyna iti maipanggep ken Hesus. Imbagana kadakuada no kasano a nagparang ni Hesus kenkuana iti kalsada nga agturong iti Damasco ken no kasano na nga imbaon tapno ikasabana ti Naimbag a Damag kadagiti tattao iti amin a disso. Naallukoy ket namati ni ari Agripa ken Hesus. Ammona nga awan naaramid ni Pablo a dakes. Dinawat ni Pablo iti emperador ti Roma tapno idiay a pangukoman ti Romano maimbestigaran. Impan ngarud ni Agripa ni Pablo idiay Roma. Ti Roma iti kadakkelan a siudad iti intero a lubong iti dayta a panawen ket idiay nga agnanaed ti emperador, ti kapatgan a pangulo. Adda iti napateg a panggep ti Dios para ken Pablo. (Tukar)

Maikaduapulo ket Tallo a Ladawan. Adda iti Peggad ni Pablo

Aramid 27:13-44

Impan dagiti soldado ni Pablo idiay Roma kaduana dagiti dadduma pay a balud. Nagluganda iti barko a nagdaliasat iti baybay. Iti uneg ti sangapulo ket uppat nga aldaw a panaglayagda iti baybay, sinabat ida ti napigsa a bagyo. Kinuna dagiti limmugan iti barko a mataydan. Maysa nga anghel iti nakisarita ken Pablo, “Dika agbuteng, Pablo! Masapul a sumaklangka iti Emperador. Ket gapu ta naimbag ti Dios kenka, isalakanna ti amin a kinakuyogmo iti barko.” Saan a nabayag, naisadsad ti barko iti narabaw a paset ti danum ket naperdi ti barko. Timmapuak dagiti tattao iti danum. Naglangoy dagiti dadduma ket dagiti dadduma kimpet iti tali wenno iti narakrak a paset ti barko. Nakadanonda amin iti igid ti baybay nga awan naan-ano kadakuada. Iti daytoy a pasamak, maamoantayo a ti Dios ket addaan ipapaaramid kadatayo, ket isalakannatayo manipud kadagiti aniaman a mabalin a mangdangran kadatayo. (Tukar)

Maikaduapulo ket Uppat a Ladawan. Naibalud ni Pablo idiay Roma

Aramid 28:16-31; Roma 8:38-39

Nagtalinaed ni Pablo iti pagbaludan ti Roma iti dua a tawen. Pinalubusanda isuna nga agtalinaed iti sabali a pagtaengan a bantayan ti maysa a soldado. Naragsak a mangpasangbay kadagiti amin a mangpasiar kenkuana. Ket ikasabana met kadakuada maipanggep iti Pagarian ti Dios ken ni Apo Hesus. Nagaramid ni Pablo kadagiti surat maipaay kadagiti mamati ti iglesia a napananna sakbay a naibalud. Dagitoy a suratna ket adda iti Biblia, tapno maammoan dagiti amin a tattao iti dalan nga agturong iti Dios. Naglasat ni Pablo kadagiti adu a rigat gapu iti ebanghelio ken ayatna ken Hesus. Adu nga daras a napadasanna iti kinaranggas ken pannakaubor manipud kadagiti tattao, napadasanna iti nagbisin ken awan pagnaedanna. Ket kamaudiananna, panangpatay iti indusa dagiti Romano kenkuana. Ngem iti immuna a suratna maipaay kadagiti mamati iti Roma kinunana, “Awan duduak nga awan ti makaisina kadatayo iti ayatna: ti patayman wenno ti biag, dagiti angheles man wenno dagiti sabali a nailangitan nga agturay wenno pannakabalin, ti agdama man wenno ti masakbayan, ti kangatoan a law-ang man wenno ti kaunggan ti daga. Awan a pulos iti sangaparsuaan ti makaisina kadatayo iti ayat ti Dios gapu ken Cristo Jesus nga Apotayo!” Ti sibubukel a biagtayo itedtayo iti Dios. Pagserbiantayo isuna ket ikasabatayo ti Naimbag a Damag tapno maammoan ti intero a lubong nga inted ni Hesus ti biag nga agnanayun a kadua ti Dios.