Үз, сонс, амьдар 6-р ном Есүс багш Байв

Танилцуулга

Сайн байцгаана уу? Найзууд аа? Наашаа ирээд хамгийн агуу Нэгэн Багшийг харцгаана уу. Түүнийг Есүс гэдэг юм. Та хуурцагийг сонсонгоо зурагнуудыг үзээрэй. Дохио дуугарах бүрд дараачийн зураг руугаа шилжээрэй.

Зураг 1: Есүс хүмүүст сургааль айлдаж байлаа

Матай 5-р бүлэг

Зурган дээрээс та Есүс Христ хүмүүст Бурханы тухай зааж буйг харж байна. бид бүхнийг бүтээсэн Нэгэн бол цорын ганц үнэн Бурхан юм. Хүмүүс гэм, нүгэл, бузар булайг үйлдсэнээр Бурханаас тусгаарлагдсан хэдий ч Бурхан биднийг үргэлж хайрладаг билээ. Есүс Бурханаас ирсэн. Тэр Бурханы талаар бүгдийг мэднэ. Учир нь Тэр Бурханы Хүү. Есүс хүмүүст юуг зааж сургаж байсан талаар ярьж өгье. Ингэснээр та ч бас Жинхэнэ Амьд Бурханыг таньж мэднэ.

Зураг 2: Хоёр байшин

Матай 7:24-27

Есүс хоёр хүний талаарх нэгэн түүхийг ярьж өгөв. Нэг нь байшингаа хадан дээр барьсан тул суурь нь бат байлаа. Бороо орж, салхи салхилан, байшинг нүдсэн боловч тэр нь нурсангүй. Нөгөө эр нь байшингаа элсэн дээр барьжээ. Бороо орж, салхи салхилан, байшинг нүдсэнд байшин нурав.
Бид ч мөн адил амьдралаа бат суурин дээр босгон байгуулах хэрэгтэй юм. Тэрхүү бат суурь нь Бурханы тушаал зааврыг дуулгавартай дагах аваас амьдралын зовлон бэрхшээлтэй нүүр тулах цагт бид маш хүчирхэг байх төдийгүй муу ёрын сүнс сатан ч биднийг сүйтгэж үл чадна.

Зураг 3: Гэрлээ цацруул

Матай 5:14-16

Харанхуй байвал та гэрлээр юу хийх вэ? Зурган дээр байгаа хүн гэрлээ өндөрт барьснаар байшин доторх бүх хүмүүсийг гэрэлтүүлж байна. Харин нөгөө эр нь мунхаг тул гэрлээ савны доор нуужээ.
Есүс бол ертөнцийн Гэрэл бөгөөд Тэрээр Бурхан руу очих замыг заадаг. Бид Түүний үгийг дагаваас бусад хүмүүс биднээс Бурханы гэрлийг харах болно. Есүс хэлэхдээ: “Хүмүүс та нарын сайн үйлсийг хараад тэнгэр дэхь Эцэгийг тань алдаршуулахын тулд та нарын гэрэл тэдний өмнө тийнхүү гэрэлтэг” гэж айлдсан билээ. Бид Бурханы гэрлийг нуух ёсгүй. Харин ч Есүсийн талаар сонсгож, Түүнийг харуулах нь зохистой юм. Ингэснээр тэдгээр хүмүүс ч бас Бурхан руу очих замыг мэдэж авах болно.

Зураг 4: Ром хүн Еврей хүнийг зодсон нь

Матай 5:38-42

Хараач! Ром цэрэг еврей хүний хацрыг нь алгадаад хувцсыг нь авчихлаа. Тэр хүн одоо яах хэрэгтэй вэ? Есүс хүмүүст: “Чамайг буруутгагчаас хариугаа битгий ав. Хэн баруун хацрыг чинь алгадна, түүнд нөгөө хацраа тавьж өг. Хэрэв хэн нэг хүн цамцыг чинь авахыг хүсвэл дээлээ бас түүнд өг” гэж сургасан юм. Биднийг гомдоосон хүмүүсээс бид хариугаа авах хэрэггүй. Учир нь Бурхан бидэнд: “Би чиний өмнөөс өшөөг чинь авах болно” гэж айлдсан билээ. Бурхан бузар мууг үйлдэгч хүн нэг бүрийг энэ амьдралд нь болон үхсэнийх нь дараа ч шийтгэх юмаа. Харин Есүс бидэнд дайснууд чинь муу хандвал сайнаар хариул хэмээн захидаг билээ.

Зураг 5: Бурханд залбирах нь

Матай 6:5-15

Энэ зурган дээр хоёр хүн Бурханд залбирч байгаа харагдаж байна. Нэг нь гадаа гудамжинд зогсоод удаанаар залбирч байлаа. Учир нь тэр хүн бусад хүмүүс өөрийг нь хараад магтаасай хэмээн хүсч байв. Харин Бурхан ийм залбиралд хариулдаггүй. Есүс: “Чи залбирахдаа дотоод өрөөндөө орж хаалгаа хаагаад нууцаар оршигч Эцэгтээ залбир. Нууцаар харагч Эцэг чинь чамд буцааж төлнө” гэж айлдсан. Бурхан бидэнд юу хэрэгтэйг мэддэг учраас бид Түүнд утгагүй хоосон үг хэрэглэн дахин дахин давтан залбирах шаардлагагүй байдаг билээ. Бид залбирлаараа Бурханыг магтан хүндэтгэж, бусдын төлөө ч гуйн залбирах хэрэгтэй. Бид мөн өөрсдийн үйлдсэн буруу зүйлийнхээ төлөө гэмшин, Бурханаас өршөөл гуйж, муу ёрын сүнс сатаны бузар замаас хол байлгахыг гуйх нь зохистой ажээ.

Зураг 6: Хогийн ургамал тариалагч хорон санаат хүмүүс

Матай 13:24-30, 36-43

Сайн үр суулгасан талбайд хорон санаат хүмүүс ирээд хогийн ургамлын үр цацчихаж гэнэ. Тэд бол газрын эзний дайснууд нь байлаа. Газрын эзэн буудайг хамтад нь зулгаачихна гэж болгоомжлоод ургасан хогийн ургамлыг түүж авсангүй. Тэгээд ургац хураах цагийг хүлээв. Эцэст нь тэрээр буудайгаа тусад нь хураан авч, харин хогийн ургамлыг нь шатаалаа.
Ах дүү нар минь, муу ёрын сүнс болох сатан нь дэлхий дээр байгаа Бурханы хүмүүсийн дунд бузар мууг тарьсан байгаа. Гэхдээ цаг нь болоход Есүс дахин ирэх болно. Тэгээд Бурханыг дагагчидыг бузар муу хүмүүсээс тусгаарлаж, тэгээд Өөрийн хүмүүстэйгээ үүрд хамт байх болно. Харин Бурханыг эсэргүүцдэг бузар муу хүмүүс муу ёрын сүнс сатантай хамт мөнхийн галд шатах аж.

Зураг 7: Есүс болон хүүхдүүд

Матай 18:1-6, 19:13-15

Есүсийн гарыг нь тавиулж, тэдний төлөө залбируулахын тулд хүмүүс Түүн дээр хүүхдүүдийг авчирсанд шавь нар нь тэднийг зэмлэж, явуулах гэж оролдлоо. Харин Есүс: “Хүүхдүүдийг зөвшөөр. Над руу ирэхийг нь бүү болиул. Учир нь тэнгэрийн хаанчлал бол эдний адил хүмүүсийнх юм” гэлээ. Мөн Тэрээр үргэлжлүүлэн: “Та нар өөрчлөгдөж, хүүхдүүдтэй адил болохгүй бол тэнгэрийн хаанчлалд орохгүй. Иймээс хэн өөрийгөө энэ хүүхдүүд адил даруу болгоно, тэр нь тэнгэрийн хаанчлалд хамгийн агуу нь болно” гэсэн юм.
Ах дүү нар аа, өөрийгөө бусдаас илүү хэмээн бардамнан боддог нэгэн бол Есүсийн жинхэнэ дагалдагч биш юм шүү.

Зураг 8: Хоньчин ба хонин сүрэг

Матай 18:12-14

Есүсийн ярьсан түүх: “100 хоньтой хоньчин эр байжээ. Гэтэл нэг хонь нь төөрөөд алга болчихож гэнэ. Ингээд хоньчин 99 хонио орхиод төөрч одсон ганц хонио эрж олохоор явлаа. Тэгээд тэр алдсан хонио олчихоод төөрөөгүй 99 хониноосоо илүүгээр түүнд баярлав”. Үүний нэгэн адилаар БУРХАН биднээс нэг ч хүнийг Өөрөөс нь холдон төөрч одоосой гэж хүсдэггүй. Учир нь төөрсөн хүмүүс сатаны бузар муу замаар алхсаар байдаг. Есүс бол сайн хоньчин. Учир нь Тэрээр Бурханы замаас төөрсөн хүн нэг бүрийг аврахаар ирсэн юмаа.

Зураг 9: Өршөөлгүй зарц

Матай 18:21-35

Нэгэн зарц хаанаасаа насаараа төлж дийлэхээргүй их мөнгө зээлчихжээ. Хаан түүнийг боол болгон худалд хэмээн тушаав. Сайхь эр сөгдөн мөргөж, өршөөл эрэхэд хаан өрөвдөж, түүний бүх өрийг нь хүчингүй болгоод явуулж гэнэ.
Нөгөө зарц өөрт нь багахан мөнгөний өртэй өөр нэг зарцыг барьж аваад багалзуурдан, түүнийг шоронд хийлгэчихэв. Энэ талаар хаан сонсоод ихэд хилэгнэн: “Би чамд өршөөл үзүүлсний нэгэн адилаар чи ч бас найздаа нигүүлсэнгүй хандах ёстой байсан юм” гэлээ. Ингээд хаан тэр зарцыг бүх насаар нь шоронд суулгажээ.
Найзууд минь ээ, Бурхан бидний үйлдсэн бүх гэм нүглийг уучилдаг билээ. Үүний адил бид ч бас бидний эсрэг буруу мууг хийсэн хүмүүсийг уучлах хэрэгтэй юм.

Зураг 10: Ажилчид хөлсөө хүртсэн нь

Матай 20:1-16

Энэ хүмүүс хөлсөө авах гэж иржээ. Эхний хүнийг бүр орой болсон хойно хөлсөлсөн тул тэрээр өчүүхэн бага ажил хийсэн байв. Гэвч газрын эзэн нь маш өгөөмөр сэтгэлтэй хүн байсан тул түүнд бүтэн өдрийн цалинтай дүйх 1 зоос өгчээ. Дараагийн эр нь хагас өдөр, харин гурав дахь нь өдөржин ажилласан байсан боловч тэд бүгд ижил 1, 1 зоос л авав. Бүтэн өдөржин ажилласан эр ихийг авна хэмээн гомдоллож гэнэ. Харин газрын эзэн түүнд: “Анд минь, би чамд шударга бус хандаагүй билээ. Чи 1 зоосоор ажиллахыг өөрөө зөвшөөрсөн шүү дээ. Би мөнгөө хэрхэн зарцуулах нь миний эрх. Намайг өглөгч байлаа хэмээн чи дургүйлхэнэ үү?” гэлээ.
Үүний адил Бурхан Есүст итгэгч хүн бүрд мөнх амийг өгөх болно. Гэхдээ энэ бол сайн үйлс хийснийх нь төлөөх төлбөр биш харин Түүний өгөөмөр саналыг хүлээн авсан хүн бүрт өгч буй Бурханы бэлэг билээ.

Зураг 11: Хаалганы гадна үлдсэн 5 эмэгтэй

Матай 25:1-13

Есүс хуримын найр болохыг хүлээж буй 10 эмэгтэйн тухай түүхийг ярилаа. Шинэ хүргэн шөнө дунд гэнэт ирэхэд 5 эмэгтэй нь түүнийг утгахаар бэлэн байв. Тэгээд тэд тосон дэнлүүгээ асааж, шинэ хүргэний хамт хуримын найранд оржээ. Харин үлдсэн 5 эмэгтэй нь мунхаг байлаа. Тэдний дэнлүүний тос нь дууссан тул жаахныг худалдаж авахаар явцгаав. Ингээд тэдний эзгүйд хаалгаа хаачихав. Эмэгтэйчүүд эргэж ирээд “Биднийг оруулаач” хэмээн орилолдоход шинэ хүргэн тэдэнд: “Би та нарыг танихгүй юм байна” гэж хариулжээ.
Найзууд минь, Есүс одоо тэнгэрт байгаа ч Тэр нэг л өдөр энэ дэлхийд дахин ирнэ. Тэр нь хэзээ гэдгийг бид мэдэхгүй. Иймээс бид Түүнтэй уулзахад бэлэн байх хэрэгтэй. Есүс ирж Өөрийн хүмүүсээ аван, Мөнхийн улсад хамт амьдрах юм. Харин энэ үед бэлэн бус байх хүмүүс Тэнгэрийн хаанчлалд орохгүй.

Зураг 12: Эзэнтэн ба Түүний зарц нар

Матай 25:14-30

Бид Есүсийг эргэж ирэхэд хэрхэн бэлдэх хэрэгтэй вэ? Зурган дээр гарч буй эр гэртээ буцан ирж байгаа нь энэ. Түүний эзгүйд боолууд нь мөнгий нь хямгадаж байв. 2 зарц нь худалдаа наймаа хийж мөнгийг нь өсгөсөн байжээ. Иймээс эзэнтэн эргэж ирээд 2 зарцаа хоёуланг нь шагнав гэнэ. Харин гурав дахь зарц нь эзнийхээ өгсөн мөнгийг өсгөөгүйгээр үл барам газарт булчихсан байв. Үүнийг сонссон эзэн нь ихэд хилэгнэн залхуу боолоо гэрээсээ хөөжээ.
Есүс Өөрийг нь эргэж ирэх хүртэл биднийг шаргуу ажиллаасай гэж хүсдэг. Бид бүхэн бусдыг хайрлаж, тэдэнд туслан, Бурхан Эзнийхээ талаар ярьж өгдөг байх хэрэгтэй. Хожим нь Есүс ирээд: “Сайн байна. Над дээр ирж Миний баяр хөөрөөс хуваалцагтун” гэх болно.

Зураг 21: Есүс харь эмэгтэй 2

Марк 7:24-30

Нэг өдөр нэгэн харь эмэгтэй Есүс дээр ирэв. Учир нь бяцхан охин нь чөтгөрт эзэмдүүлчихсэн байсан тул Есүсээс чөтгөрийг хөөн зайлуулахыг гуйжээ. Есүс еврей хүн байсан бөгөөд Еврейчүүдэд туслахаар ирсэн. Тэр Өөрийн хүмүүстээ туслахаасаа өмнө харь хүмүүст туслах ёстой юу? Энэ нь яг хүүхдүүд өлсгөлөн байхад түрүүлээд нохойд юм өгдөгтэй адил юм. Харин сайхь эмэгтэй Есүст: “Ширээн дор байгаа ноход хүртэл хүүхдийн хаясан үйрмэгийг иддэг шүү дээ” гэж хариулахад Есүс түүнд: “Надад итгэх итгэл чинь агуу юм. Иймээс гуйсан зүйлээ чи авлаа” гэлээ. Өнөөх эмэгтэй гэртээ очоод хүүхдээ орон дээр хэвтэж байхыг, чөтгөр зайлуулагдсаныг олж үзэв.
Есүс үндэс угсаа үл хамааран биднийг хайрлаж, бидэнд тусладаг. Тэрбээр биднийг хэн болох, хаана амьдардагаас үл хамааран зөвхөн Өөрт нь итгэхийг хүсдэг юмаа.

Зураг 22: Есүс хэлгүй, дүлий эрийг эдгээсэн нь

Марк 7:31-37

Хүмүүс Есүс рүү хэлгүй, дүлий хүнийг авчирч гэнэ. Есүс тэр хүний чихэнд нь хуруугаа хийж, дараа нь хэлэнд нь хүрэв. Есүс тэнгэр дэхь Эцэг рүүгээ дээш харж, мөнөөх эрд: “Нээгд” гэж тушаасанд нөгөө эр сонсож, ярьж чаддаг боллоо. Эргэн тойронд нь байсан хүмүүс шагшин гайхаж: “Тэр бүгдийг сайнаар үйлдсэн. Тэр дүлийг сонсголтой болгож, хэлгүйг ярьдаг болголоо” хэмээн ярилцаж байв.
Есүс бидний чихийг ч бас нээж, ингэснээр бид Бурханы үгийг сонсож, ойлгож чадах юм. Түүгээр үл барам Есүсийг магтан хүндэтгэж, бусдад Түүний үнэнийг ярих болно.

Зураг 23: Есүс сохор хүнд хараа оруулсан нь

Марк 8:22-26

Нэг удаа Есүс нэгэн сохор хүнийг тосгоноос гаргаад, нүдийг нь нулимсны дараа түүнээс: “Чи ямар нэгэн юм харж байна уу?” гэж асуухад нөгөө хүн хараад: “Би хүмүүсийг харж байна. Тэд явж буй мод мэт харагдаж байна” гэлээ. Тэр дахин мутраа нүдэн дээр нь тавихад тэр хүний нүд нь засарч, бүгдийг сайн харах болжээ.
Найзууд аа, сатан бидний сүнсний мэлмийг сохор болгодог учаас бид Есүсийн талаарх үнэнийг харж, ойлгож чаддаггүй билээ. Иймээс бид Есүс Эзэнээс бидний нүдийг нээж өгөхийг гуйх хэрэгтэй. Ингэснээр бид ч бас Есүсийн талаарх жинхэнэ үнэнийг мэдэх болно.

Зураг 24: Есүс сүнс шүглэсэн хүүг эдгээсэн нь

Марк 9:14-27

Нэгэн хүн сүнс шүглэсэн хүүгээ Есүс рүү авчирлаа. Муу сүнс хүүг байнга тамладаг байв. Есүсийг хармагц мөнөөх сүнс хүүг тэр даруй газар унагаж, татвалзуулж гарлаа. Үүнийг харсан эцэг нь: “Та юуг ч хийж чаддаг юм бол бидэнд туслаач” хэмээн уйлж эхлэв. Есүс түүнд: “Итгэлтэй хүнд бүх юм боломжтой” гэж хэлээд “Би чамд тушааж байна. Түүнээс гар” гэлээ. Тэр сүнс бархирч, түүнээс гараад дахиж түүнд орсонгүй.
Есүс орчлон ертөнцийн хийгээд энэ дэлхийн бүх сүнс болон бурхадаас дээгүүр эрх мэдэл, хүч чадалтай Нэгэн билээ. Дээрх үйл явдалаас хойш удалгүй иудейгийн удирдагчид Есүсийг загалмайд цовдлов. Гэвч 3 хоногийн дараа Есүс үхлээс дахин амилсан бөгөөд энэ бол үнэхээрийн гайхамшигтай явдал байлаа. Ингэж Есүс сатан болон үхлийг үүрд ялсан юм.
Есүс бол Бурханы цорын ганц Хүү нь мөн.