Look, Listen & Live 4: Servants of GOD

Y Pamegafuan

Makasta nga aggaw nikamu wawagi, Id-iddukan na Dios ngamin nga tumuttul anna masservi Sa. Ginnan anna innan danu nesimmu ta panuttuttul mu karana letrato (ta ngila nga libro) innan y tumuttul nga letrato nu maginnan yaw ng uni.

Olu nga letrato: Y pabbakwi na tadday nga familya ta abbivisin

Ruth tadday: anna tadday-adde ta lima)

Pinaratu na Dios ngamin nga tolay ngem ira ay nallikok yaya nga pinili na Dios y Israel tafe iyamammu anna irayrayaw yaya. Ngem sagida nga mattuggay y Israel ta Dios. Mangirayrayaw ira ta nadduruma nga dios-diosan kagita na karuan nga tatolay. Nangirok y Dios ta gerra anna bisin ta Israel tafe mattoli galan ira Sa. Tadday nga familya y naddisisyon nga umay ta davun na Moab tafenu magalek ta makan. Ta unak na mafulu nga ragun nga nadjan ta duma nga ili. Tori ngana natay y yama da. Y dua nga anā nga lalaki ay nakaatawa ta Moabita. Ngem natay galan dannu dua nga anā na nga lallaki. Navattang ta yena u dua nga manugang da nga babbay ta dayu nga davvun nori.

Meka ruwa nga letrato: Nattoli ta Israel da Naomi anni Ruth

Ruth tadday: annam-addde ta duafulu duwa

Ŷ yena na pamilya ngori ay mannaganta Naomi. Danuri manugang na nga babbay nga Moabita ay da Ruth anni Orpah. Naddesisyon si Naomi nga mattoli ta davvun na Israel. Siminuttul da Ruth anni Orpah ta pabbiyahi na. Kinagi ni Naomi nira. “Mattoli kamu na ta balay nu anā ku. Natta kamu fagalan tumuttol niyo?” Awan na kuna ta anā nga lallaki nga awayya nga mabalin nga atawa. So ay nilikuran na Dios. Inumattan ni Orpah si Naomi nagena nattoli ta balay danu nagana na. Ngem si Ruth ay navattang ka Naomi, kinagi na, “Anna nakuan ikaveng nga panawan taka. Nu sitaw y angayammu tora gafa umay. Danu ka lugarammo y mabbalin nga kalugarakku. Y Dios mo mabbalin nga Dios ku. Yaya siminuttul si Ruth ka Naomi nga minay da Bethlehem ta davvun Israel.

Mekallo nga letrato: Si Ruth ta kakomanan

Ruth dua:tadday adde ta duwafulu tallu

Si Naomi anni Ruth ay nefallo ta Ziga. Kinagi ni Ruth ka Naomi, “Pangayan na sa ngata koman, tafe maddammo ta ammay.” Yaya lagu ay minay ta koman ta sitaw i jan na danu malangan ay maggatak ta ammay. Y akakwa ta davvun ay innagan na Boaz. Inyavu na karanu malangan megafu ta dayu nga bavay ta kakomanan na. Kinagi da, “Yaya ay tadday nga Moabita nga kavulun ni Naomi nga lumibbe.” Naginna ni Boaz nu kunnasi yaya nga nabbalin nga tadday nga mafia nga manugang ta katuganan na. Nasingan na nga yaya ay mafia nga malangan. Yaya kinagi na ka Ruth, “Maffirmi ka ta jan dano malangan adde ta mavalin ira maggatak ta ammay.” Kinagi na karanu masserbi sa nga ariadda nga attakitan. Ngem ikaveng nu yaya nga maddammo ta trigu. Ta gavi ta kinagi ni Ruth ka Naomi y megafu ta mafia nga kingwa ni Boaz. Kinagi ni Naomi, “Bendisyonan na nakwan yaya na Dios! Yaya ay aranni nga parientes tam.”

Mekappa nga letrato: Si Ruth anni Boaz ta Abbayuan

Ruth tallo:tadday -adda ta mafulu ta walo

Nu matay y tadday nga lalaki na Israel, awayya na nga ivoda na masaranni nga parientes na navalonga atawa na. Tadday nga aggaw kinagi ni Naomi ka Ruth, “Mawak nga etta ka iyaleranta matawam tafenu egga lavva y balem. Si Boaz ay parientes tam, yaya ay mappavayu ta ginatak sanga nga gavi. Mazzigu ka anna mappatali ta makasta nga sinnum mu. Gumukak ka ta abbayanan nu sitaw y jan na. Takkillalam mu nu sitaw y pagiddan na sonu makaturuk, magidda ka ta kiddanan na. Kinurug lagu ni Ruth y kinagi ni Naomi sa. Kalukag ni Boaz ay nasingan na nga azza ta kiddanan na si Ruth. Ammu na nga ika na bavay nga yaya ay ivoda na. Kinagi na sa, “Ovrakku y ngamin nga ika mu Ruth gafu ta ammu na ngamin nga sikaw ay massipo nga bavay.

Mekalima nga letrato: Si Boaz adda nu lallakalakay nga mangifofolu ta Bethlehem

Ruth Appa:Tadday adde ta duafulu dua

Nanga si Boaz ta mafulu nga lallaki, karanu lallakalakay nga mangifofolu ta ili, ngem ngamin ay minannugu nga yaya ay mefangngo ka Boaz. Tafe mafakurug y natratuadda, iniyā danu pafaryentes na y safatus na ka Boaz. Yaw ay tadday ta negagangay nga ta Israel. Gafu tori iná ni Boaz si Ruth, ay yaya nabbalin nga atawa na. Neddan ira ta anā pinanaganan da yaw ta Obed. Kinagi danu babbay ka Naomi, “Merayrayaw y Dios, iniddan naka ta tadday nga afū nga manaron nikaw. Anna manugang nga mangayayā nikaw nga kunne ta mas aru annē ta pito nga anā.” Wawagi, nalek ni Ruth nga nagkunsuwelowan tanguta nasserbian na ý yama ni Jesse nga yama gafa ni David nga nabbalin nga dakal nga patul na Israel.

Mekannam nga letrato: Si Maria anna anghel na Dios

Lucas tadday duwafulu annam adde tallo fulu ta walo

Aru nga pulpuli y nappasa kavalinan ni Ruth, napili ý Dios ta tadday nga bavay tafenu masservi sa ý naganna ay Maria. Yaya ay naggafuta puli ni Ruth. Si Maria ay tadday nga birhen. Yaya ay netabba ta lalaki nga mannagan ta Jose, ngem nage da nabboda, tadday nga anghel na Dios, ý nappasingan ka Maria. Kinagi na ka Maria, “Ari ka massing Maria, nakalek ka ta pamendisyon ta Dios. Sikaw ay mavussi anna maganā ta tadday nga lalaki, y ynagan mo sango sa ay Hesus. Yaya ay mabbalin nga dakal agalan da yaya ta anā na kot-otunan.” Kinagi ni Maria ta anghel. “Zitao ý arifan nga bavay na yafu mesimmu niyo sigun ta ovovuk mu. Y marenu nga espiritu na Dios ay limibbe ka Maria. Yaya ay navussi anna naganā ta tadday nga lalaki yaya nga si Maria ay nabbalin nga yena ni Hesus anā na Dios.

Mekapito nga letrato: Naddasal si Ana ta Dios

Olu Samuel tadday:tadday adde ta duafulu

Pappasa na tiempo na tiempo ni Ruth, ta davvun na Israel azza tadday vavay nga mannagan ta Ana id-iddukan yaya nu atawa na, ngem ari makunsuwelo si Ana gafu ta awan yaya maski tadday nga anā. Kada ragun yaya umay ta balay na Dios ta Silo. Ira ay mangidatun anna mangiyatang ta Dios. Minay si Ana ta balay na Dios. Kinagi na, “O Dios ku, zō ay tagenappan mu anna iddan nā ta anā ku, iyawa ko so nikaw nga masservi adde ta matolay yaya.” Magguy-guyu y virik na ta pakiovovuk na ta Dios ngem awatta uni nga maginna taw. Si Eli, yu pangulo na pari ay nasingan na yaya. Inabbā na yaw nga naellaw. Ngem naginna na Dios y dasal ni Ana. Ta labbē na tiempo yaya ay naganā ta tadday lalaki. Ininagana yu abbing ta Samuel.

Mekawalu nga letrato: Y abbing Samuel ta balay na Dios

Olu Samuel tadday:duafulu appa adde ta duafulu walu; anna dua:mafulu-dua adde t

Tunggaw ta abbing fagala si Samuel ay iniyawa na ni Ana ta Dios. Yaya ay iniyangay na ka Eli ta Silo. Sinuduan ni Eli si Samuel nu kunnasi nga passervian na y Dios. Egga y dua aga anā na nga lallaki ni Eli. Ira ay pari, ngem minappadday ira ta marake. Yaya nga inigimmang na Dios y pakifaguvovuk na tatolay, megafu karanu pari. Tadday gavi si Samuel ay magga-idda tafe makaturuk ta unak na balay na Dios. Inikallā na lan nga inagalan na Dios y nagan na, nakkarera si Samuel ka Eli ay kinagi na, “Azawā taw gafu ta inayalan nā. Ngem kinagi ni Eli, “Ari zo y nagagal anā ku magidda ka otru.” Nesimmu yaw ta namitallo. Gafu turin nawatan ni Eli nga awaya na y Dios ta magagal ka Samuel. Yaya nga kinagi na ka Samuel nga simibbak ta Dios nga kagian na, “Maguvovuk ka, afu ta maginna yu arifam mu. Naguvovuk y Dios ta me-aru ka Samuel anna yaya ay nabbalin nga dakal mangallavvun anna mangifofolu ta Israel.

Mekasiam nga letrato: Inirasal ni Samuel y Israel

Olu Samuel appa:mafulu adde ta mafulu tadday anna pito:dua adde mafulu ta appā

Pinarigā na Dios danuri anā na lallaki ni Eli. Ira ay natay ta tadday gera anna naffu y Israel karanu taga Filesteo. Ta maturuk a duafulu-dagun ay nangifangulo y Filesteo ta Israel kinagi ni Samuel ta tatolay, “Nu sikamu y mattoli ta Afu ta ngamin ng futu mu ay iryan nu danuri dios-diosan anna massirvi kamu ta Dios; ililli na kamu ta lima na danuri Filesteo.” Siminuttul danu taga Israel ka Samuel. Naggunnok ira ta tadday nga lugar. Naddatun si Samuel ta Dios anna inirasal na y Israel. Naggagon danu Filesteo tafenu tallungan da otru y Israel, ngem nangiyawā y Dios masikan nga bagyo nira. Nakkakarera danuri Filesteo gafuta assing da, yaya nga inaffu ira na Israel.

Mekafulu nga letrato: Inafefuan ta denu ni Samuel si Saul

Olu Samuel walu:tadday adde ta siam anna siam:mafulu ta lima adde ta mafulu:tadd

Y Dios ay kurug nga patur y Israel nga pinanguloan ni Samuel para ta Dios. Ngem ikaya na Israel nga tadday tolay y mappatol nira, gafu ta duma ay egga lava y patul da. Anna inikaya y kunnaw nga naginna ni Samuel, ngem kinagi nira na Dios, “Ari sikaw y nanakitan da nga patul da nu ari sō. Iddan mo ira ta tadday nga patul.” Egga y tadday nga bagitolay nga mannagan ta Saul. Yaya ay atannang anna mataraki. Tadday aggaw pinasyar ni Saul si Samuel. Ta pakasingan ni Samuel ka Saul nga umar-aranni, kinagi sa na Dios, “Zō taw yu lalaki nga kinagi nikaw! Yaw ay egga y pakafangwa na ta jakku nga ili.” Gafu ta kunnuri inā ni Samuel y adyanan na denu inivuvu na ta ulu ni Saul. Yaw ay pagisinnan nga yaya y nafili nga mabbalin nga patul. Ta unak na appatta fulu nga dagun ay nangifangolu si Saul nga kunna patul ta interu ili na Israel.

Meka mafulu ta tadday nga letrato: Naggegge si Saul yu afungi ni Samuel

Olu Samuel mafulu lima:tadday adde ta dua-fulu ta siam

Danuri Amalicita ay kekarake nga tatolay ngā napadday y daral ta Israel. Yaya kinagi ni Samuel ka patul nga Saul, “Maginna ka ta uvovuk nga maggafu ta Dios. Pafatayammu ngamin nga Amalicita anna dabbatan mo ngamin nga kukuara.” Inuffunan na Dios si Saul anna ngamin nga batalyun, tafenu affutadda danuri Amalicita, ngem ira ay tumuggay ta Dios. Inililli da ngamin nga ayam danu Amalicita tafenu idatun da ta Dios anna ariadda pinafatay yu patul na Amalec. Kinagi ni Samuel ka Saul, “Gafu ta pinallikuaran mo y dorok na Dios, yaya nga nallikuran naka nga maballin nga patul.”
Ta pangiganwā ni Saul nga manaw, inifugak ni Saul y gattak na afungi ni Samuel anna yaw nagegge ta lima na. Kinagi ni Samuel sa, “Iniryan na Yafu y pappatulan ta Israel sanga nga aggaw, anna iniyawā na ta tadday nga tolay nga mas mafia anne nikaw.” Wawagin, si Saul ay nangyā ta atang ta Dios ngem arianna inikittu. Si Samuel ay siminuttul anna nasservi ta Dios ta ngamin nga aggaw anna pakkatolay na. Y pattutul ay makapakunswelo ta Dios, anne ta maski nga anni iyawā Sa.

Meka mafulu dua nga letrato: Si Hesus ta Balay na Dios

Lukas dua:appatafulu tadday adde ta lima fulu

Kavalin na tiempo ni Samuel, egga y tadday nga abbing nga mannagan Hesus nga naddakal ta Israel. Si Maria y nanaddak nga nabbalin nga yena na. Ngem y Dios y Yama na. Tungaw si Hesus ay mafulu dua y dagun lan, yaya ay minay ta Jerusalem kavulun na da Maria anni Jose. Nesinna si Hesus nira ay inalek yaya da Maria anni Jose. Pappasa na tallo nga aggaw, nalek nira si Hesus ta Balay na Dios. Yaya ay nakipagivovuk ta mamaestro megafu ta Dios. Kinagi ni Maria, “Nefallo y vurung mi ta pagal-alec mi nikaw.” Ngem kinagi ni Hesus, “Sō ay mawag nga mappermi ta Balay na Yamā.” Tungngaw ta abbing fagalaman si Hesus kunne ka Samuel, ammo na nga yaya ay mawag nga masservi ta Dios. Si Hesus ay miney taw tafenu mattoli y kusto nga pakannammo danu tatolay ta Dios, gafu ta y Dios yaya y kurug nga patul anna mangifangolu ta ngamin.

Y Pamegafuan ta dumaddan nga parte

Y Pamegafuan ta dumaddan nga parte.
Karwan karanuri kadakkalan nga tolay nga natolay tungngaw ay nassirvi ira ta Dios. Danaw nga istorya ay makagi nga meyinak yu kafafangwa ra (nu kunnasi ira nga dakal nga nasservita Dios). Innan y tumuttul nga letrato nu maginnan yaw nga uni.

Meka mafulu tallo nga letrato: Si David, y makeyangngo nga Pastor

Olu Samuel mafulu annam:tadday adde ta mafulu tallo anna mafulu pito:tallofulu a

Si Saul y olu nga patul y Israel ngem sinuggay na y Dios. Yaya nga nilikuran na Dios si Saul. Azza tadday nga bagitolay nga mannagan ta David. Yaya ay minanaron ta karnero na yama na. Yaya ay mangurug ta matolay nga Dios. Ari yaya maganassing ta didigra. Tadday nga aggaw inā na leon yu tadday nga karnero na. Pinafatay ni David yu leon anna inillili na yu karnero na. Si David ay tadday nga malaing nga minatoka anna minafadday ta makakasta nga kansion nga pangirayrayaw ta Dios. Si David y ikayā na Dios nga parigan na ngamin nga tolay yaya nga pinili na Dios si David mabbalin nga patul ta kavalin ni Saul.

Meka mafulu appa nga letrato: Si David anni Goliat

Olu Samuel mafulu-pito:tadday adde ta limafulu-appa

Azza tadday nga gerra ta tangnga na batalyon na Filisteo anna Israel. Danaw nga Filisteo ay egga dakal nga suddalo da nga mannagan ta Goliat. Nakkalli ta masikan nga kinagi na, “Mappili kamu ta tadday nga lalaki... nga nu sō y mafafatay na, mabbalin nga arifan dakami, ngem nu yaya y matay, sikamu y mabbalin arifan anna masservi nikami.” Maganassing danuri tatolay na Israel ka Goliat. Awattu mayā sa nga lumavan. Yu abbing nga si David ay nakkagi, “Sinni yaw nga Filisteo nga ari makan-annammu ta Dios? Arianna awayya nga karitan y batalyon na matolay nga Dios.” Ari sa maganassing si David. Awayya yaya nga offuran na Dios tafe papatayan na higante.Nannukkam yaya ta batu ta sufū anna pinalassitan na si Goliat. Nakanna yaya ta mukā na ay neluddak sa yu batu. Si Goliat ay nafaruku nga nattun ta davvun. Nakkarera si David nga minaranni sa, inusa na y palataw ni Goliat inifaggappo na ta ulu na galaman. Yaya nga yu batalyon na Israel ay maffu na danu Filesteo.

Meka mafulu ta lima nga letrato: Inigagangay ni Saul nga papatayan na si David

Olu Samuel mafulu-walo:annam adde ta duafulu tallo anna duafulu siyam

Tangu ta olu si Saul ay makonswelo ka David gafu ta inililli na y Israel. Iniddū na taga Israel si David. Yaya nga nabbalin nga malaing nga suddalo anna mangifangolu. Si Saul ay nangigafu nga mangavuvu ka David. Ikayā na nga papatayin si David. Ta tadday nga aggaw nappadday si David ta tadday nga kansion para ka Saul ta arpa na. Tadday nga marake nga espiritu y simillung ka Saul. Inā na y tadday nga balas na pana ay inifayang na ka David, ngem yaw ay nepasa sa ay nekanna ta zizing. Kavalin naw pinaruvan na faga ni Saul nga papatayin si David ta aru nga otru. Y anā ni Saul nga si Jonathan anna danuri Israelita ay inifunan da nga makatammang si David, ngem mawag na fagalan nga makkarera ta kannag tafe makalilli ka Saul.

Meka mafulu annam nga letrato: Arianna pinafatay ni David si Saul

Olu Samuel duafulu annam:tadday adde ta duafulu lima

Si Saul addanu batalyon na ay minay ta kannag tafenu gafutadda si David. Ta gavi nuri, si Saul anna danu tolay na ay nakakaturug, si David anna yu kofun na nga si Abisai ay nallammang nga minay ta kampo ni Saul. Ikayā ni Abisai nga pafatayan y nakakaturug nga patul ngem ginamma ni David. Kinagi na nga, “Parigatan na Dios nu sinni y mangattakī ta pinili na nga patul.” Ina ni David y bala’s na pana anna banga ta oluanan ni Saul. Ta pakalawadda ta kampo nagkalli si David tafenu malukag danu tatolay. Kinagi na, “Arianu sinarun y yafu nu nga patul.” Law yu balas na pana anna patul.” Kinagi ni David ka Saul, “Inimugurakku sanga y paginangomo parē nakuan nga kunnaw y kuan niō na Dios. Ta kavalin naw iniyammang ni Saul y pangigagangay na nga mamafatay ka David.

Meka mafulu pito nga letrato: Pinabbalin da patul si David

Olu Samuel tallo fulu ta tadday:tadday adde ta annam anna mekarua Samuel lima:ta

Danuri Filesteo ay nakilavan mangana ta Israel. Natay ta pakilavan si patul nga Saul anni Jonathan. Si David y initalida nga patul na Israel. Pinataddak na yu balay na ta siudad na Herusalem. Kinagi na Dios ka David, “Inā taka nga naggafu ta panaron ta karnero, anna kingwa taka nga nabbalin a patul na ili nga Israel. Paddayan taka nga dakal na karakalan nga tolay ta davvun.” Yaya nga pinadday na Dios nga karakalan si David anna iniddan na yaya ta pakafangwa nga affutan na ngamin nga kalavan na Israel.

Meka mafulu-walu nga letrato: Si David anna Bathseba

Mekarwa Samuel mafulu ta tadday:tadday adde ta mafulu dua:duafulu

Tadday aggaw nallaka-lakak si David ta atō na baley na. Nakasingan yaya tadday nga minakasta vavay nga mazzigō. Ikayā ni David nakuan nga malā na yaw nga vavay. Y nagan naw nga vavay ay Bathsheba. Yaya y atawa ni Uria nga suddalo na batalyon ni David. Nanaw si Uria tafenu makigerra kara nuri kalavan na Israel. Nappetuvuk si David ta turā ta kapitan na batalyon. Kinagi na ta kapitan nga siguradduan na nga matay si Uria ta gerra. Inā ni David si Bathsheba nga mabbalin nga atawa na. Ngem yu kingwa ni David ay arianna inikaya na Dios. Y olu anā da David aani Bathsheba ay natay. Nakkiddaw si David ta pamakoman na Dios gafu ta kedakē nga kingwa na.

Mekamafulu siyam nga letrato: Yu Balay para ta Dios

Mekarwa Samuel Pito:tadday adde ta duafulu siyam anna olu Cronicas duafulu-dua:t

Nalliwā si David ta Dios. Kunnu faga, id-iddukan na y Dios anna ikaya na nga passervian. Ikayā na mapataddak ta tadday nga dakal ng balay tafenu paddayawan ta Dios. Ngem kinagi sa na Dios, “Ari sikaw y mappatannang ta baley gafu ta aru y pinafatem nga tolay. Maiddan ka sangaw ta anā mo, nga y panginagammu sa ay Solomon. Yaya y mappatannang ta baley. Pakaladdak ko pappatulan na adde ta adde noka.” Aru y iniganwā ni David para ta Balay na Dios nagena matay, ngem si Solomon y namataddak taw. Kekasta na Balay na Dios. Pito ragun y nawag tafenu mafataddak yaw. Danuri Israelita naddaydayaw ta ballay na Dios ta Herusalem gatu-gatu nga dagun. Ariadda vuluvuga nattaman nga si David y nabbalin ng dakal nga patul da.

Mekduafulu nga letrato: Limibbē si Hesus ta Herusalem

Mateo duafulu tadday:tadday adde mafulu tadday)

Kabalin na marivu ragun ka David, neyanā si Hesus yaya ay naggafu ta puli ni Patul David. Y yenā na ay si Birhen Maria. Anna y yamā na ay Karakalan nga Dios. Si Hesus y katannangan nga masservi ta Dios. Sinudduan na y ngamin nga tatolay ta kakurugan ta megafu ta Dios. Nappadday yaya ta mekafallā megafu ta pakafangwa na Dios. Si Saul anna si David anna ngamin nga tatolay ay nalliwa kontra ta Dios ngem si Hesus vuluvuga ay ari nakaliwa. Tadday nga aggaw, nattakay ta taday nga urbon tullung ta Herusalem. Nakkakalli danu tatolay nga nakkagi, “Hosanna (Y Karakalan) anā ni David! Dakal Y miney taw gafu ta nangan na Dios!” Gafu ta nassingan danu tatolay nga si Hesus ay mas dakal anne ka David. Yaya y patul ta ngamin nga patul ta davvun.

Mekaduafulu tadday nga letrato: Pinakan na mammanū si Elias

Olu Patul Mafulu annam:duafulu siyam adde ta Mafulu pito:Annam

Kabalinan da David anni Solomon, aru faga nga patul y nangifangulo ta Israel. Tadday nga nangifangolu ay mannagan ta Ahab. Egga y atawa na nga kedakē nga y nagan na ay Jesabel. Aru y pinafatay na nga tumuttuttul ta Dios, anna pinuersa na y tatolay nga masservi anna maddayaw ta rebultu ni Baal. Si Elias ay dakal nga minallavvun na Dios. Minay yaya ka Ahab nga nakkagi, “Ta nagan nga makafangwa nga matolay nga Dios na Israel, ari vuluvuga maguran ta unak na tallo dagun.” Yaya nga nangyawa y Dios ta nefallo nga abbibisin ta enteru davvun na Israel. Kunnu faga ay inimuguran na Dios y arifanna nga si Elias. Pinangay na si Elias ta tadday nga lugar nga y nagan na ay Cherith, nga nu sitaw awayya yaya uminum ta dannum nga maggafu ta avugī. Kada aggaw danu mammanu ay itultuluradda si Elias ta makan.

Meka dufulu dua nga letrato: Si Elias anna Afuiy na Dios

Olu patul mafulu walo: mafulu annam adde ta tallofulu siyam

Ta meka tallo nga ragun nga abibisin, inifagal ni Elias si Ahab anna ngamin nga tatolay ta vukik na Carmen. Kinagi na nira, “Nu y afu ay Dios, tuttulan nu yaya, ngem nu si Baal y dios yaya tuttulan nu.” Tatolay ay namafatay ta baka nga iyatang da ka Baal.
Kinagi ni Elias kadanu pari ni Baal, “Magagal kamu ta dios nu, ta magagalā ka Afu Dios. Nu sinni y manabbak nga megafu ta afuiy, yaya y Dios.” Tanga-gavi nga magag-agal danuri pari ni Baal ta diosda. Mattala ira nga mavvu-vuelta ta atang da anna binigiradda y baggi ra nga inusadda y ilā. Ngem awattu afuiy. Ta gavi iniganwā ni Elias yu atang na. Sinukkuvan na faga yaw ta danum anna naddasal yaya ta Dios. Tafenu kunnuri mangifagu ka ke Dios ta afuiy nga naggafu ta langī. Sinugian yu atang angē yuri danum. Ngamin nga tolay ay nakkagi, “Y Afu – Yaya y Dios!”

Meka duafulu tallo nga letrato: Si Elias neyangay ta langī

Olu Fatul mafulu siyam:tadday adde ta duafulu tadday anna mekarua patul dua:tadd

Pinafatay ni Elias danuri pari ni Baal gafu ta ira ay sovra ta dakē. Inigagangay ni Jesabel nga papatayan na si Elias. Naganassing si Elias. Nakkarera yaya ta kannag. Turi ay nassimmu ira annā Dios. Nafawan y assing ni Elias. Itinuluy na y nagituddu ta tatolay nga paddayawadda y tadtadday anna kurugan nga Dios. Pinili ni Elias si Eliseo tafe uffunan na yaya. Tadday aggaw nagkavulu ira nallaka-lakak, tadday nga kariton na afuiy y nappatangnga nira. Iniyuri na Dios si Elias nga minay ta langī ta megafu ta alifūfūk, ariana ngana vuluvuga nassingan ni Eliseo.

Meka duafulu appa nga letrato: Si Elias kavulun ni Hesus anna si Moses

Lucas siyam:duafulu walo adde ta tallo fulu annam)

Ta tiempo ni Hesus, (Pito gatū y nappasa), Nappasingan si Elias. Tadday nga aggaw nappasingan yaya ta bukik kavulun na si Hesus. Si Moses y dakal nga minallavvun nga natolay nage faga ka Elias ay nappasingan va nga kavuludda. Tallo nga tolay y nakasingan nira nga manannawak ta gloria na Dios. Y Dios mismo ay nakkagi nga naggafu ta langī, kinagi Na, “Yaw y Anā Ko maginna kamu Sa.” Wawagi, y Dios anna ngamin nga darakal nga tolay na Israel ay initudda ittam ka Hesus. Lumibbe si Hesus tafenu massirvi ta ngamin nga tolay. Nidatung yaya nga navvu ta liliwa tam. Na ta yaya motru natolay, naggafu ta patay tafenu mangiyawa ta pattolay na y espiritu ta adde na adde noka. Yaya nga maginna kamu Sa tafenu makalek ka ta īnangō nga awatto adde na.