unfoldingWord 42 - ພຣະເຢຊູສະເດັດຄືນສູ່ສະຫວັນ
概要: Matthew 28:16-20; Mark 16:12-20; Luke 24:13-53; John 20:19-23; Acts 1:1-11
文本编号: 1242
语言: Lao
听众: General
类型/流派: Bible Stories & Teac
目的: Evangelism; Teaching
圣经摘录: Paraphrase
状态: Approved
脚本是翻译和录制成其他语言的基本指南，它们需要根据实际需要而进行调整以适合不同的文化和语言。某些使用术语和概念可能需要有更多的解释，甚至要完全更换或省略。
文本正文
ໃນວັນທີ່ພຣະເຢຊູຊົງເປັນຄືນມາຈາກຕາຍ ມີອັກຄະສາວົກ 2 ຄົນກຳລັງເດີນທາງໄປຍັງເມືອງທີ່ຢູ່ໃກ້ຄຽງ. ໃນຂະນະທີ່ພວກເຂົາກຳລັງເດີນທາງໄປນັ້ນ ພວກເຂົາກໍໄດ້ສົນທະນາກັນກ່ຽວກັບເຫດການທີ່ເກີດຂຶ້ນກັບພຣະເຢຊູ. ພວກເຂົາມີຄວາມຫວັງວ່າພຣະເຢຊູຈະມາເປັນພຣະເມຊີອາ ແຕ່ພຣະອົງພັດຖືກຂ້າ ແລ້ວກໍຍັງມີພວກຜູ້ຍິງເວົ້າກັນວ່າພຣະອົງຍັງມີຊີວິດຢູ່. ພວກເຂົາບໍ່ຮູ້ວ່າຄວນຈະເຊື່ອຂ່າວໃດ.
ພຣະເຢຊູໄດ້ປະກົດແກ່ພວກເຂົາແຕ່ພວກເຂົາບໍ່ສາມາດຈື່ພຣະອົງໄດ້. ພຣະອົງຊົງຖາມພວກເຂົາວ່າກຳລັງສົນທະນາເຖິງເລື່ອງຫຍັງກັນ. ແລ້ວພວກເຂົາກໍໄດ້ເລົ່າເຖິງເຫດການທີ່ແປກປະຫຼາດຫຼາຍເຫດການທີ່ເກີດຂຶ້ນກ່ຽວກັບພຣະເຢຊູໃນລະຫວ່າງ 2-3ວັນທີ່ຜ່ານມາ. ພວກເຂົາຄິດວ່າພວກເຂົາກຳລັງສົນທະນາກັບນັກທ່ອງທ່ຽວທີ່ຍັງບໍ່ຮູ້ກ່ຽວກັບເຫດການທີ່ເກີດຂຶ້ນໃນນະຄອນເຢຣູຊາເລັມ.
ແລ້ວພຣະເຢຊູກໍໄດ້ອະທິບາຍພຣະຄຳຂອງພຣະເຈົ້າກ່ຽວກັບພຣະເມຊີອາໃຫ້ພວກເຂົາຟັງ. ພຣະອົງໄດ້ເຕືອນໃຫ້ພວກເຂົາລະນຶກເຖິງຖ້ອຍຄຳທີ່ຜູ້ປະກາດພຣະຄຳໄດ້ບອກໄວ້ວ່າພຣະເມຊີອາຈະຕ້ອງທົນທຸກທໍລະມານແລະຖືກຂ້າໃນທີ່ສຸດ. ແລ້ວໃນວັນຖ້ວນສາມຈະຊົງເປັນຄືນມາ. ເມື່ອມາຮອດບ່ອນທີ່ພວກເຂົາຄິດວ່າຈະພັກຢູ່ນັ້ນກໍເປັນເວລາຄ່ຳແລ້ວ.
ຊາຍ2ຄົນນັ້ນໄດ້ເຊື້ອເຊີນໃຫ້ພຣະເຢຊູໃຫ້ພັກຢູ່ກັບພວກເຂົາແລະພວກເຂົາກໍພັກຢູ່ທີ່ນັ້ນນຳກັນ. ໃນຂະນະທີ່ພວກເຂົາກຳລັງຈະກິນເຂົ້າແລງ, ພຣະເຢຊູໄດ້ຈັບເຂົ້າຈີ່ຂຶ້ນມາແລ້ວໂມທະນາຂອບພຣະຄຸນພຣະເຈົ້າສຳລັບອາຫານແລະຫັກເຂົ້າຈີ່ນັ້ນ. ທັນໃດນັ້ນພວກເຂົາກໍຈື່ໄດ້ວ່າພຣະອົງຄືພຣະເຢຊູ. ແຕ່ພຣະເຢຊູກໍໄດ້ຫາຍໄປຈາກພວກເຂົາແລ້ວ.
ແລ້ວຊາຍ2ຄົນນັ້ນກໍລົມກັນວ່າ, “ຜູ້ນັ້ນແມ່ນອົງພຣະເຢຊູ! ເພາະເມື່ອພຣະອົງໄດ້ອະທິບາຍພຣະຄຳຂອງພຣະເຈົ້າໃຫ້ພວກເຮົາຟັງ ໃຈຂອງພວກເຮົາກໍຮ້ອນຮົນເໝືອນໄຟຢູ່ພາຍໃນພວກເຮົາ! ”ແລ້ວພວກເຂົາກໍກັບຄືນໄປຍັງນະຄອນເຢຣູຊາເລັມ. ເມື່ອພວກເຂົາໄປຮອດ ພວກເຂົາກໍເລົ່າໃຫ້ອັກຄະສາວົກຄົນອື່ນໆຟັງແລະບອກພວກເຂົາວ່າ “ພຣະເຢຊູຍັງມີຊີວິດຢູ່! ພວກເຮົາໄດ້ເຫັນພຣະອົງແລ້ວ!”
ໃນຂະນະທີ່ພວກເຂົາກຳລັງສົນທະນາກັນຢູ່ນັ້ນ ພຣະເຢຊູກໍປະກົດທ່າມກາງພວກເຂົາແລ້ວກ່າວວ່າ, “ສັນຕິສຸກຈົ່ງມີແກ່ທ່ານທັງຫຼາຍ!” ພວກອັກຄະສາວົກຄິດວ່າພຣະອົງເປັນຜີ ແຕ່ພຣະເຢຊູຊົງກ່າວວ່າ, “ເປັນຫຍັງພວກທ່ານຈິ່ງເກີດມີຄວາມຢ້ານແລະສົງໄສ? ຈົ່ງເບິ່ງມືແລະຕີນຂອງເຮົາ. ຜີບໍ່ມີຮ່າງກາຍເໝືອນຢ່າງເຮົາ.” ເພື່ອພິສູດໃຫ້ພວເຂົາເຫັນວ່າພຣະອົງບໍ່ແມ່ນຜີ ພຣະອົງຊົງບອກໃຫ້ພວກເຂົາເອົາອາຫານມາໃຫ້ກິນ. ພວກເຂົາໄດ້ເອົາປີ້ງປາໃຫ້ພຣະອົງແລ້ວພຣະອົງກໍຊົງກິນໃຫ້ພວກເຂົາເບິ່ງ
ພຣະເຢຊູກ່າວວ່າ, “ເຮົາໄດ້ບອກພວກເຈົ້າທັງຫຼາຍແລ້ວວ່າ ທຸກສິ່ງທຸກຢ່າງທີ່ຖືກຂຽນໄວ້ໃນພຣະຄຳຂອງພຣະເຈົ້າກ່ຽວກັບເຮົາຈະຕ້ອງສຳເລັດ.” ພຣະອົງຊົງເປີດໃຈຂອງພວກເຂົາເພື່ອພວກເຂົາຈະໄດ້ເຂົ້າໃຈເຖິງພຣະຄຳຂອງພຣະເຈົ້າ. ພຣະອົງຊົງກ່າວ່າ, “ມີຄຳຂຽນໄວ້ແລ້ວວ່າ, ‘ພຣະເມຊີອາຈະຕ້ອງທົນທຸກທໍລະມານແລະຕາຍແລະຈະເປັນຄືນມາໃນວັນຖ້ວນສາມ.”
ຍັງມີຄຳຂຽນໄວ້ອີກວ່າອັກຄະສາວົກຂອງເຮົາຈະປະກາດໃຫ້ທຸກໆຄົນກັບໃຈໃໝ່ເພື່ອພວກເຂົາຈະໄດ້ຮັບການອະໄພຈາກບາບກຳຂອງພວກເຂົາ. ພວກເຂົາຈະເລີ່ມປະກາດຈາກເຢຣູຊາເລັມ ແລະໄປຈົນເຖິງທຸກຄົນທຸກແຫ່ງຫົນ. ພວກເຈົ້າທັງຫຼາຍຈະເປັນພະຍານເຖິງເລື່ອງນີ້.
ພຣະອົງໄດ້ຊົງປະກົດໃຫ້ພວກສາວົກເຫັນເປັນເວລາຫຼາຍຄັ້ງໃນລະຫວ່າງ 40 ວັນທີ່ພຣະອົງຢູ່ກັບພວກເຂົາ. ມີຄັ້ງໜຶ່ງ ພຣະອົງໄດ້ປະກົດໃຫ້ປະຊາຊົນຈຳນວນ 500 ຄົນໃນເວລາດຽວກັນ! ພຣະອົງຊົງເຮັດຫຼາຍຢ່າງເພື່ອພິສູດວ່າພຣະອົງຍັງມີຊີວິດຢູ່ ແລະໄດ້ສອນເລື່ອງຣາຊອານາຈັກຂອງພຣະເຈົ້າໃຫ້ພວກເຂົາ.
ພຣະເຢຊູຊົງເວົ້າກັບພວກສາວົກຂອງພຣະອົງວ່າ, “ອຳນາດທັງໝົດໃນສະຫວັນແລະແຜ່ນດິນໂລກໄດ້ມອບໃຫ້ແກ່ເຮົາແລ້ວ, ເຫດສະນັ້ນພວກທ່ານຈົ່ງອອກໄປ, ຈົ່ງເຮັດໃຫ້ຄົນທຸກຊາດເປັນລູກສິດ, ໃຫ້ເຂົາຮັບບັບຕິສະມາໃນພຣະນາມແຫ່ງພຣະບິດາ, ພຣະບຸດແລະພຣະວິນຍານບໍລິສຸດ. ສັ່ງສອນພວກເຂົາໃຫ້ຖືກຮັກສາທຸກໆສິ່ງທີ່ເຮົາໄດ້ສັ່ງພວກເຈົ້າໄວ້ແລ້ວນັ້ນ. ນີ້ແຫຼະ ເຮົາຢູ່ກັບເຈົ້າທັງຫຼາຍທຸກໆວັນຈົນສິ້ນໂລກນີ້.”
ຫຼັງຈາກ40ວັນທີ່ພຣະອົງເປັນຄືນມາຈາກຕາຍ ພຣະອົງໄດ້ສັ່ງສາວົກຂອງພຣະອົງວ່າ, “ຈົ່ງລໍຖ້າຢູ່ໃນນະຄອນເຢຣູຊາເລັມ ແລ້ວເຈົ້າທັງຫຼາຍຈະໄດ້ຮັບພຣະຣາຊທານຣິດເດດ ເມື່ອພຣະວິນຍານບໍຣິສຸດເຈົ້າຈະສະເດັດມາເຖິງພວກເຈົ້າ.” ແລ້ວພຣະເຢຊູກໍສະເດັດຂຶ້ນສູ່ສະຫວັນແລະກ້ອນເມກກໍໄດ້ປົກຄຸມພຣະອົງຈາກສາຍຕາຂອງພວກເຂົາ. ພຣະເຢຊູຊົງນັ່ງເທິງເບື້ອງຂວາຂອງພຣະບິດາເຈົ້າເພື່ອປົກຄອງທຸກໆສິ່ງ.