Talenu, Ivwililenu Na Kuyoya 1 Mukanda Watete - Kuputuka Na Kalunga
![Talenu, Ivwililenu Na Kuyoya 1 Mukanda Watete - Kuputuka Na Kalunga](https://static.globalrecordings.net/300x200/lll1-00.jpg)
Đề cương: Adam, Noah, Job, Abraham. 24 sections. It has a picture book to go along with the recording. This is a Simple, Long version.
Số kịch bản: 418
ngôn ngữ: Luvale
Chủ đề: Sin and Satan (Judgement, Sin, disobedience, Satan (the devil)); Christ (Sacrifice / Atonement); Eternal life (Salvation); Character of God (Grace and Mercy, Nature, character of God, Word of God (the Bible)); Living as a Christian (Worship, Obedience, Faith, trust, believe in Jesus); Bible timeline (Creation, Prophecy, fulfillment of, Gospel, Good News); Problems (Problems, troubles, worries)
Khán giả: General
Kiểu dáng: Monolog
Thể loại: Bible Stories & Teac
Mục đích: Teaching
Trích dẫn Kinh Thánh: Extensive
Trạng thái: Translation
Kịch bản
Kulumbununa
![Kulumbununa](https://static.globalrecordings.net/300x200/lll1-00.jpg)
Tunamimeneka mwane muvosena. Twayenu tulinangulenu hali vatu vamwe ava vapwileko hakulivanga hamavu. Talenu jino ha mivwimbimbi mumukanda uchila mukiko namivwilila. Kuli evi natulinangula kufuma vene mu mukanda waKalunga. Alumunenu muvwimbimbi unakavemo omu namwivwa. (Kwimba.)
Muvwimbimbi watete (1) Kalunga atengele Alama na tunyama nawa
![Muvwimbimbi watete (1) Kalunga atengele Alama na tunyama nawa](https://static.globalrecordings.net/300x200/lll1-01.jpg)
Kuputuka 1:1 - 2:14
Kwatwama Kalunga umwe kaha. Apwa shipilitu. Atachikiza vyosena atwama nawa kwosena nakwosena. Hakuputuka Kalunga kaha ukawenyi apwileko; Na chuma cheka chauchi chapwileko lyehi shimbu kanda Kalunga. Akakaye tunamono ngana makumbi ano, kakapwilekoko. Kalunga ikiye atengele vyosena. Hakulivanga atengele musana. Numba nawa jino utanga tanga, mavwi na mavu. Ikiye ahanduwine nawa meya natunda ngocho jimbuto japutukile jino kusoka. Kalunga atengele likumbi, kakweji hamwe navatanganyika nawa. Keshi ovyo kahako, oloze Kalunga aumbile nawa mutu wa kuyoya hamavu kufuma kulukungu lwaha mavu Kaha ahwiminyinemo mwono wenyi. Ikiye mutu watete wakulivanga . Kalunga amuhanyine ou mutu wata na Ulemu waunene: Shikaho amutengele mutu muchifwanyisa cha ikiye Kalunga. Kalunga amutengele mutu mangana amutachikize, mangana Shipilitu yenyi hamwe na Shipilitu ya Kalunga vyipwenga hamwe. Vishinganyeka nakufwila chamutu vyalitavize na evi vyaKalunga kaha atambukile na Kalunga. Kalunga amulukile ikiye Alama. (Kwimba)
Muvwimbimbi wamuchivali (2) Pwevo Lya Alama
![Muvwimbimbi wamuchivali (2) Pwevo Lya Alama](https://static.globalrecordings.net/300x200/lll1-02.jpg)
Kuputuka 1:27 - 28; Kuputuka 2:15 - 25
Jino Kalunga amuhakile Alama muwande wamwaza wa Etene. Kaha amulwezele ngwenyi muulamenga. Mwapwile mitondo yamiyachi namiyachi, na mutondo wakutachikijila kuwaha na kupihya na mutondo wakuyoya. Alama vamuhanyine lusesa mangana aluke tunyama vosena majina hamwe natujila. Kalunga avatengele nalunga na pwevo mwaya miyachi yavo yosena. Uze lunga Alama kapwilenga nawakulikafwanenyiko, Kalunga achimwene ngwenyi chinapihi. Ngocho ashinganyekele kumutengele Alama pwevo wa kulikafwa nenyi. Kalunga amusavalikile Alama tulo twatuvulu. Afumishileko lupachi lwa kukahachi ka Alama. Kalunga kulupachi elu kukiko atengele pwevo. Kaha Kalunga amuneheleleyo lunga. Lunga na pwevo vapwilenga uselesele, mukachi kavo kavalivwilenga sonyiko. Kalunga avakwiswile na kuvalweza ngwenyi, “Kasemenunga na kuvula hamavu. Kaha mukayulenga hamavu. Mukapwe nawa nawata hali vaishi vamuKalunga lwiji, na tujila vosena vatwama hamavu.” Kalunga avahanyine va Alama na Eve mitondo yosena yakwimako mihako nawa. (Kwimba)
Muvwimbimbi wamuchitatu (3) Linoka muwande
![Muvwimbimbi wamuchitatu (3) Linoka muwande](https://static.globalrecordings.net/300x200/lll1-03.jpg)
Kuputuka 2:16 - 17; Kuputuka 3; Isaya 14:12
Muze muwande, Kalunga amulwezele mutu ou Alama ngwenyi, “Kumitondo yosena yili omu wande unahase tuhu kulyako, oloze kanda namukalya ku kumutondo uze wakutachikijila kuwaha nakupihya. Kachi nge namukalyako namukafwa.” Oloze Satana ejile nakumwonga pwevo lya Alama. Ou Satana apwile iya? Ikiye apwile kangelo ka Kalunga, oloze alikangile na Kalunga ou amutengele. Kujina chenyi Satana chapwile kachi ngwenyi alitohwese nakulyeseka hamwe na Kalunga, chikiko chalingishile Satana kumuhanga mwilu. Alingile jino kupwa muka kole wa Kalunga. Ngocho Satana ejile kuli pwevo muze muwande muchifwanyisa cha linoka. Amwongele ngwenyi, enu ka mweshi kufwako nge namulya kumihako yamutondo uze namikanyisa Kalunga, wakutachikiza kuwaha na kupihya. Kaha uze pwevo hakwivwa ngocho aheleleko nakulya ahanyineko nawa nalunga lyenyi Alama. Omu valileko hahaze vene kukasumuka valimwene vali jino uselesele valivwilile sonyi. Kaha vatachikijile jino ngwavo tunavulumuna, Kalunga tunahono kumwononoka, nakumuhana ulemu. Echi chalingishile usoko wavo naKalunga kuhona kupwa nge omu wapwile hakavanga. Vakiko vali tongelele mafo vavene mangana valivembe na kumuchina Kalunga vamuswame. (Kwimba)
Muvwimbimbi wamuchiwana (4) Alama na Eve navapwa kusali ya Wande
![Muvwimbimbi wamuchiwana (4) Alama na Eve navapwa kusali ya Wande](https://static.globalrecordings.net/300x200/lll1-04.jpg)
Kuputuka 3:14 - 24
Kaha Kalunga ejile kuli Alama na pwevo lyenyi na kuhanjika kuvahulisa evi valingile. Vamulwezele omu avongelelemo linoka, Kalunga jino amwangwile linoka nakumwamba ngwenyi: “Mwomwo ove yove unalingisa ngana, naupwanga ukwangula, naukalavilanga halijimo lyove.” Avalwezele nawa va Alama na pwevo lyenyi omu nachikapwa kuzangamisa chavo. Kalunga ahanjikile kuli pwevo ngwenyi, “Nangukatohwesa misongo yove ha kusapuluka.” Kuli Alama nawa amwambile ngwenyi, “Mwomwo ove wevwililanga mu mazu apuwove nakulya ku mutondo, shikaho mavu nawapwanga akwangula. Nauzatangaho nangolo mangana ukalovole kulya chove.” Jino Kalunga avalingilile kuvwala cha lilambu lya kanyama nakuvavwika. Kushishisa mu mafo aze valiuvile vavene. Haze vene Kalunga avahangile. Nakuvafumisa muze muwande. Alama alukile pwevo lyenyi ngwenyi ikiye Eve. Kulyalymuna ngwavo ikiye ‘wakuyoya’. Eve asemene vana na Alama. Vatu vosena vafuma kuli Alama na Eve. Vakwechi chisemwa chashili yakufuma kuli va Alama na Eve. Mutu himutu na navulumuna nakulewununa Kalunga. Shikaho usoko na Kalunga unasepunuka. Oloze Kalunga amushikile Alama na Eve ngwenyi likumi limwe umwe wamutanga yavo mwakeza nakumuhasa Satana. Ou lunga kana mwakatunanga cheka naKalunga, nakulingisa usoko wetu na ikiye kupwa walambwe, na kutuhana kuyoya chamyaka yosena. (Kwimba)
Muvwimbimbi wamuchitanu (5) Nowa mwasonga wato waunene
![Muvwimbimbi wamuchitanu (5) Nowa mwasonga wato waunene](https://static.globalrecordings.net/300x200/lll1-05.jpg)
Kuputuka 6:1 - 7:5
Jino vana Alama na Eve nachisemunwino chashishilemo vavulile chikuma. Oloze vazalile naupapwoki navilinga vyavo nawa vyapihilenga kumeso aKalunga. Kaha Kalunga apihililile nakulinyenga mumuchima wenyi. Hali mutu ou atengele. Mumyaka vene yize kwapwile lunga walijina lya Nowa. Kalunga awahilililenga nenyi kaha likumbi limwe Kalunga alwezele Nowa ngwenyi, “Nangunongesa vatu vosena vali hamavu mwomwo hamavu hanazale lyehi naulyanyi. Nowa, songa wato waunene. Tala nguli nakuneha livaji hamavu hosena mangana livanongese ava vakwechi myono yakuyoya ngwatengele. Oloze nanguhaka lushiko nayove. Shikaho yako wingile muwato waunene, yove napuwove hamwe navana vove namapwevo javo hamwe. Kaha ukambatako ku tunyama nakuli tujila, kumiyachi yavo yosena. Ukengile nawo muze muwato waunene kaha ukavalame vavatonyi, yove nawa ukalimbachila kulya chove nawa hamwe natunyama vosena vaze naukapwa navo muze muwato waunene.” Amulwezele Kalunga cheka nawa Nowa omu mwatela kusongela uze wato waunene. Nowa alingile vyosena vamulwezele kuli Kalunga. Nowa anangwilenga nawa nakuva lweza vatu vatwame mwamwaza nakulikata chavo hamwe naKalunga kavo. (Kwimba)
Muvwimbimbi wamuchitanu naumwe (6) Livaji lyalinene
![Muvwimbimbi wamuchitanu naumwe (6) Livaji lyalinene](https://static.globalrecordings.net/300x200/lll1-06.jpg)
Kuputuka 7:6 - 23
Omu Nowa akumishile kusonga uze wato waunene, Nowa, na tanga yenyi vengilile muze muwato waunene hamwe na tunyama engilile navo muwato waunene. Kalunga asokele kulipito nakuvasokelelamo. Vula jino yapatukile kunoka hamavu makumbi makumi awana. Tuselwoke twameya va tuvikile kwishi ya mavu. Ngocho hamavu hosena hapwile livaji lyalinene. Vatu natunyama vosena vapwile kuweluka wauze wato waunene vafwile. (Kwimba)
Muvwimbimbi wamuchitanu nayivali (7) Kangolo lushiko lwa Kalunga
![Muvwimbimbi wamuchitanu nayivali (7) Kangolo lushiko lwa Kalunga](https://static.globalrecordings.net/300x200/lll1-07.jpg)
Kuputuka 7:24 - 9:17
Jino Nowa natanga yenyi natunyama vapwile muze muwato waunene mwaka umwe. Vula kayanokele cheka hamavuko meya omine chau. Vosena vapwile muze mu wato waunene. Kalunga jino asokwelele ku chikolo kaha valovokelemo. Kaha Nowa amutungililile lijiko lyakulumbila Kalunga. Nganomu munamono hano. Nowa ambachile kanyama kupwa wana wakulumba halijiko lyakulumbila Yehova. Echi chamwivwishile jino Kalunga kuwaha. Alishingile lushiko ngwenyi kangweshi cheka kukanongesa cheka tengeso yami yavaka kuyoya nalivajiko. Nanguhaka chijikizo chalushiko mwilu chakongolo. Shikaho nalelo lino ngana cheji kutwanukisanga muchano wenyi. (Kwimba)
Muvwimbimbi wamuchitanu nayitatu (8) Kaposhi Kambavele
![Muvwimbimbi wamuchitanu nayitatu (8) Kaposhi Kambavele](https://static.globalrecordings.net/300x200/lll1-08.jpg)
Kuputuka 11:1 - 9
Kalunga alwezele va Nowa hamwe nava na venyi vatatu ngwenyi vakaseme vana vavo vavavulu nakuzalisa kaye kosena. Oloze vakachisemunwino chavo kavevwililileko, vashinganyekele kuli kungulula hamwe mangana vatunge limbo lyalinene nakaposhi wamusuku wakuheta na mwilu. Vazangile kulitohwesa vavene nakukana kumutohwesa Kalunga. Kalunga amwene limbo lize vatungile nauze kaposhi vatungile, kaha atachikijile kulikanga nakulitohwesa chavo. Kaha Kalunga jino alyambile mumuchima wenyi ngwenyi, “Vatu vosena vanapu umwe vali nakuhanjika lilimi limwe, echi vanaputuka kulinga kaveshi kakweshi na chuma nachikavakahuhwilako. Twatuyenu, tusulukenu hamavu mangana tuvaluwanganyise lilimi lyavo kuchina muli vakivo namupwa kulivwasana umwe namukwavo.” Kaha alingilemo. Muno mumuvwimbimbi kana, vatu jino kavalivwasanyine umwe namukwavoko. Kaha limbo lize kavalitungile chekako oloze vatu vaze vali mwangililile nakuya nakuyoyela kumitamba yikwavo. (Kwimba)
Muvwimbimbi wamuchitanu nayiwana (9) Yopa mwalemesa Kalunga
![Muvwimbimbi wamuchitanu nayiwana (9) Yopa mwalemesa Kalunga](https://static.globalrecordings.net/300x200/lll1-09.jpg)
Yopa 1:1 - 12
Jino kwapwile lunga umwe wa lijina lya Yopa. Ikiye amulemeselenga nakumwalisa umwe kaha Kalunga wamuchano. Yopa apwile wakuzeneka katenga, wakulonga wakulihenda nawa ku kupihya. Apwile nawa navana vamalunga vatanu navavali, vamapwevo vapwile vatatu. Ikiye ahanyinyinengako vanavenyi mawana akulyanukila. Alombelenga kuli Kalunga mangana ahase kukonekela vana venyi. Kachi nge, vanamuvulumuna Kalunga kavo.
Kalunga amwivwililenga Yopa kuwaha. Yopa jino vamukiswile kuli Kalunga hakumuhana luheto lwalunene, Yopa apwile namautanga avimuna hamwe navangamba vavavulu. Likumbi limwe Satana aliwanyine naKalunga. Kalunga amulwezele Satana ngwenyi ou Yopa ikiye mutu ngulinakwivwila kuwaha. Satana haze vene aputukile kumwimanyina nakole Yopa nakumuvangijikila kumeso aKalunga. Ngwenyi ou Yopa ali nakukulemesa, na kukwalisa ove Kalunga mwomwo yaluheto unamuhane, “Kachi nge ove naumwangula nakumutambula luheto lwosena ali nalwo, ikiye mwakutoleka.” Kalunga nawa atachikijile makuli nakwonga chosena cha Satana. Kalunga cheka nawa atakijile Yopa napu mutu wamwenemwene ou vazangile kuli Kalunga amwivwishilenga kuwaha. Kalunga amuhanyine lusesa Satana amweseke Yopa amutambule vyosena vize apwile navyo Yopa. (Kwimba)
Muvwimbimbi wamulikumi (10) Kulishona cha Yopa
![Muvwimbimbi wamulikumi (10) Kulishona cha Yopa](https://static.globalrecordings.net/300x200/lll1-10.jpg)
Yopa 1:13 - 22
Ou muvwimbimbi, unatulweze ukalu wa pwile hali Yopa. Vangamba jenyi va munehelelenga mijimbu yayipi. Ngamba yenyi umwe ejile kuli ikiye Yopa lumbushi amulwezele mazu ngwenyi vaka-kole valukukanga nakujiha va ngamba jove nakwiva nawa navangombe jove vaze vaku-koka matemba nakulimisa, navimbulu. Omu uze kanganda apwile kanda akumise kwaula weka cheka ejile. Kaha amulweze nawa mujimbu ukwavo ngwenyi, kwasolokanga muveso jino ou muveso washikishilanga hali mikoko jove nahali tufunga nakuvajiha. Ngamba mukwavo nawa nayikiye ejile kuli Yopa. Amulwezele ngwenyi vihwanga valukukanga mikoko jove kaha vosena vanavevi. Kanganda mukwavo ejile nakulweza jino mujimbu waupi chikuma, kaha amulwezele ngwenyi, “Ove mwata! Shimbu vana vove vapwanga nakuli kungulula nakulya kuzuvo yaumwe, kakundukundu wamunene atutulanga zuvo nakujiha vosena.” Ou jino ukiko wapwile mujimbu waupi chikuma hamijimbu yosena kuli Yopa. Jino Yopa omu evwile eyi mijimbu yosena ngocho. Ikiye atewile kumutwe wenyi afukamine mambuli enyi hamavu nakuli lambanga hamavu. Jino alyambile ngwenyi, “Yehova anguhanyine kaha nawa ikiye natambula. Kaha lijina lyenyi lileme.” Numba mu vyuma vyavikalu vize vyamuwanyine, Yopa kamuhombwanyishile Kalungako chipwe kumuleununa chipwe kuyayavala. Oloze ikiye apwilenga nakumusakwilila Kalunga. (Kwimba)
Muvwimbimbi wamulikumi na umwe (11) Kuyanda cha Yopa
![Muvwimbimbi wamulikumi na umwe (11) Kuyanda cha Yopa](https://static.globalrecordings.net/300x200/lll1-11.jpg)
Yopa 2:1 - 41:34
Satana amwene ngwenyi Yopa kumana ikiye ali lika nakutwalilaho nakumwalisa Kalunga, Jino Satana alwezele kalunga ngwenyi, “Kachi nge ove nawenyeka mujimba wenyi kaha ikiye mwakwangula ove Kalunga.” Kaha Kalunga amwitavishile satana amweseke tuhu Yopa. Satana anehele musongo wamahute hamujimba wenyi wosena. Yopa ambachile chihanda chachizanda nakulikonga ha mujimba wenyi wosena. Jino pwevo lya Yopa ahanjikile kuli lunga lyenyi Yopa ngwenyi, “Mwangule Kalunga mangana ufwenga kwove!” Jino Yopa amukumbulwile ngwenyi, “Tutambule kuwaha oloze tukane kutambula kupihya numba?” Masepa jenyi nawa vawana vejilenga kuli ikiye nakumwamba hamakumbi amavulu. Vasakilenga vatachize mwomwo ika ou Yopa ali nakuyanda ngana.
Vakiko valyambile ngwavo Yopa pamo nalingi mwamupi kuli Kalunga. Shikaho jino alinakumuzangamisa. Mazu osena vahanjikile vaze masepa jenyi Yopa kawetavilileko. Ahehwilenga jijila ja Kalunga kenyi, Yopa kamusezele Kalunga kenyiko. Shikaho Kalunga ejile nakulisolola kuli vaze masepa jayopa, Kalunga kavamweneseleko mwomwo ika Yopa ahichilile muukulu uze, Kalunga ukwechi ngolo kaha ngolo jenyi kajatwama nahajakuminakoko. Kalunga atachikiza vyuma vyosena atachikize vize vyamwenemwene atela kutuhana. Keshi ngocho kahako, ikiye cheka nawa atachikiza mwomwo ika echi kwechelelanga ukalu utuwane mukuyoya chetu. (Kwimba)
Muvwimbimbi wamulikumi nayivali (12) Yopa navamushishilamo
![Muvwimbimbi wamulikumi nayivali (12) Yopa navamushishilamo](https://static.globalrecordings.net/300x200/lll1-12.jpg)
Yopa 42:1 - 17
Muvwimbimbi kana ou tunamono Yopa ali kanawa na kupwa lihando cheka. Jino nangumilweza omu chasolokele. Hamakumbi aze Yopa alihumanganyine na Kalunga, Yopa anukile kulema chaKalunga naunene wenyi. Kaha alimwene kuhengesa chenyi hakusaka kumuhula Kalunga jila jenyi nakujina chenyi. Kalunga atenukilile nawa Elifwaze, umwe wavaze masepa ja Yopa vejilenga nakumuhenda Yopa, ngwenyi, “Ami Kalunga nguli na matoto nayove namasepa jove, mwomwo kamwahanjikanga mwamwenemweneko, hakunguvuluka ami Kalunga.” Nganomu alingile ngamba yami Yopako. Avalwezele ngwenyi yenu kuli Yopa mukalihanyine wana wakulumba enu vavene. Kaha mwakalembelela hali enu. Yopa avalombelele masepa jenyi. Kalunga atambwile chize kulomba. Omu vyalingile vyosena evi vinahichi lyehi Kalunga amwanukile Yopa kaha amuwahishile cheka amuhanyine luheto nawa. Masepa navausoko ja Yopa vejile nakulya nenyi vamunehelele mawana. Kalunga amuhanyine Yopa nawa vana vamalunga vatanu navavali navana vamapwevo nawa va mwaza vihanga vatatu. Ngocho jino Yopa ayoyele myaka yayivulu amwene vazukulu jenyi kaha afwile muushinakaji wenyi.
Muvwimbimbi wamulikumi nayitatu (13) Apalama mwaseza lifuchi lyenyi
![Muvwimbimbi wamulikumi nayitatu (13) Apalama mwaseza lifuchi lyenyi](https://static.globalrecordings.net/300x200/lll1-13.jpg)
Kuputuka 12:1 - 13:4
Muvwimbimbi ou munamonomo Apalama na puwenyi Salai, hamwe namuhya wenyi Lote navangamba Javo. Vali nakuya jino tunda yayisuku chikuma, mwomwo Kalunga amulwezele Apalama ngwenyi, “Seza lifuchi lyove, navakuzuvo yaiso uyenga kulifuchi lize nangukulweza. Nangukakulingisa ukapwe umuyachi waunene nangukakisula ove. Vatu vosena vahamavu navakapwa vakukisula muli ove.” Ngocho Apalama afwelele chikupu kushika cha Kalunga chize amushikile. Ikiye na tanga vafumine mulifuchi lize apwile navayise. Akatukile ikiye navangamba jenyi navaze apwile navo, vambachile luheto lwavo vayile. Vata mbukile makumbi amavulu palanga nomu vahetele mulifuchi lya Kanane. Muze vene kalunga alisolwelele kuli Apalama nakumulweza ngwenyi, “Nangukakuhana eli lifuchi kuli vakaTanga yove.” Apalama apwilenga nakutambuka lika nomu ahetele kushekeme kusulo ya lifuchi lya Kanane, zala ya kalombolombo yengilile muze mulifuchi lyosena. Kamwapwile chipwe kulya chimweko mangana valyenga. Apalama hamwe navatu jenyi vanungulukile nakuya ku lifuchi likwavo lya Ijipitu, mangana vakatondeko kulya. Hakukuma chazala yakalombombo Apalama ahilukile cheka ku lifuchi lya Kanane, mwomwo afwelele jishiko amushikile Kalunga. (Kwimba)
Muvwimbimbi wamulikumi nayiwana (14) Apalama na Lote
![Muvwimbimbi wamulikumi nayiwana (14) Apalama na Lote](https://static.globalrecordings.net/300x200/lll1-14.jpg)
Kuputuka 13:5 - 18
Apalama na Lote vatwaminenga hamwe mulifuchi lya Kanane. Vapichile vimuna vavavulu jino kakwapwile chana chachinene chakuvalishila vimunako. Kaha likumbi limwe tufunga twavo vaputukile jino kulikokojesa. Apalama ambile kuli Lote ngwenyi, “Kanda natulizungisako. Chipwe mukachi kafunga twove nava vayamiko. Yove na yami tunapu muundumbu wetu. Kaha yove achisakule kala kumutamba oku usake uyengako.” Jino Lote alisakwilile kuze kwapwile kwamwaza nakulisuulwisa yivene. Asakwile chana chawilo chakukalwiji Yotau. Akuze nawa kwapwile membo eka amanene akutwamako. Lote atungile kuze vene kwapwile chinema chachinene chapwile kwakamwihi nayize nganda yayinene vavulukilenga ngwavo Sotome. Vatu vatwaminenga musotome vilinga vyavo vyapwilenga vyaupapwoki kavamwivwishilenga kuwaha kalungako. Oloze Apalama kwenyi aliyoyelelenga muchana cha lifuchi lya Kanane. Muze Kalunga alisolwele kuli ikiye cheka nakumwamba ngwenyi, “Lifuchi eli unamono ngana nangukuhanalyo kupwa lyove nava katanga yove myaka yosena.” (Kwimba)
Muvwimbimbi wamulikumi nayitanu (15) Apalama navalihumangana na Mwangana wa Kuunda
![Muvwimbimbi wamulikumi nayitanu (15) Apalama navalihumangana na Mwangana wa Kuunda](https://static.globalrecordings.net/300x200/lll1-15.jpg)
Kuputuka 14:1 - 24
Hashimbu yize Lote atwaminenga muchinema chize, jita yejile kuze. Lote na vakatanga yenyi vosena vavakwachile ulamba nakuya navo hamwe navatu vakwavo vapwilenga mulifuchi lya Sotome. Jino Apalama alongesele lizavu lyavaka kwasa jita, kaha akatukile nakuya navo vakapululule Lote kujita kana. Kaha vayile nakulwa na vaka-kole. Vaka-kole vavajihile nakupululula vosena vaze vakwachile naluheto lwavo. Omu vafumine kujita, valihumanganyine. Namwangana nge omu munamono hamuvwimbimbi ou mwangana lijina lyenyi ikiye Mekizeteke. Mwangana wa nganda yayinene vavulukile nga ngwavo Salema, kulumbununa ngwavo “kuunda”. Ou mwangana apwilenga nawa kapilishitu ka Kalunga ou alitulaho alifukwilenga kuli ikiye. Ikiye anehele vindanda na vinyo kuli Apalama ahanjikile kuli Apalama ngwenyi, “Ove upwenga wuwakukisula kuli Kalunga wakulitulaho. Ou ahananga vakakole jove mumavoko ove.” Ngocho Apalama alifukwile hamavu kumeso a Mekizeteke nakumuhana mawana. Jino mwangana wa Sotome nayikiye asakile amuhane Apalama mawana mwomwo amupulwilile ou mwangana vatu jenyi, oloze Apalama akanyine kutambula uze wana kuli mwangana wamupi. (Kwimba)
Muvwimbimbi wamulikumi nayitanu naumwe (16) Apalama navatanganyika
![Muvwimbimbi wamulikumi nayitanu naumwe (16) Apalama navatanganyika](https://static.globalrecordings.net/300x200/lll1-16.jpg)
Kuputuka 15:1 - 21; Kuputuka 17:1 - 19
Jino omu alingile Apalama hanapululula lyehi Lote hamwe navaze vosena vapwile mu Sotome. Lote jino ahilukile cheka mulifuchi lize mwapwilenga valinga vyavipi. Oloze Kalunga amulwezele Apalama ngwenyi, “Ove Apalama kanda wivwa womako. Ami yami lukepwe lyove. Nangukakuhana fweto yayinene.” Oloze Apalama anyengetelelenga muchima wenyi mwomwo Kalunga kamuhanyine mwana walungako mangana apwenga swana yenyi. Kaha Kalunga amulowele kuweluka nakumulweza ngwenyi, “Andula meso ove utale kwilu lava jino vatanganyika. Mukiko vene muna vakapwa vakatanga yove mukuvula chavo nge vatanganyika.” Apalama etavile lushiko amulwezele Kalunga, chipwe tuhu kapwile namwanako. Kaha Kalunga atambwile lufwelelo lya Apalama, lufwelelo luze lwa mulingishile kwoloka na kalunga. (Kwimba)
Muvwimbimbi wamulikumi nayitanu nayivali (17) Uze kemba Ishimele
![Muvwimbimbi wamulikumi nayitanu nayivali (17) Uze kemba Ishimele](https://static.globalrecordings.net/300x200/lll1-17.jpg)
Kuputuka 16 na 17
Talenu! Apalama ali lyehi na mwana walunga. Chapwile ngana: Apalama atwaminenga mulifuchi lya Kanane likumi lya myaka, atalililenga akatambule chize amushikile Kalunga kamuhana, jino Salai pwevo lya Apalama, kapwile na mwanako. Kaha Salai apwile na ngamba yenyi wapwevo apwile ikiye Hangale. Oloze ou Salai asakile Hangale aseme mwana na Apalama, Salai jino akamutambule uze mwana akamulingise kupwa mwanenyi wa mulijimo lyenyi. Mukiko vene mwa yilenga chisemwa chavo hamakumbi aze. Kaha uze Hangale ndungo ya Salai alimwene na Apalama apwile nalijimo lyakuli Apalama. Haze vene Salai pwevo lya Apalama evwile jino lushiushiu ngocho ayanjishilenga Hangale. Haze vene Hangale achinyine kumeso a Salai. Kangelo kaKalunga amuwanyine Hangale kaha amuvendenjekele. Kalunga amulwezele Hangale, “Linwomu vene naupwa namwana wa lunga. Ukamuluka ngwove ikiye Ishimele, mwomwo Kalunga nevu kuyanda chove.” Kulumbununa ngwavo ‘Kalunga nevuko’. “Ou kemba ikiye mwakapwanga nge chimbulu muchipapa; mavoko enyi nawakapwa hali vatu. Mavoko avatu nawa na wakapwa hali ikiye, Mwakayoyanga na kole navandumwenyi vosena.” Ishimele asemukile jino ikiye sevo yavatu vamuyachi wamaalambu. Mwahichile myaka likumi nayitatu numba uze kemba walijina lya Ishimele asemuke, Kalunga ejile kuli Apalama nakwamba ngwenyi, “Ami yami Kalunga wangolo josena; tambukanga kumeso ami upwenga wakuzeneka katenga. Kaha nangukolesa lushiko lwami ngunalishiki mukachi kove na yami shikaho tanga yove vakavule kuhambakana. Elu lukiko lushiko lyami na yove ngwami: naukapwa nawa usevo yamafuchi osena. Kaveshi kukavuluka cheka ngwavo Apalamako; Lijina lyove ove jino Apalahama, nangukulingisa upwenga usevo yava kamafuchi osena ahamavu.” Mwomwo Kalunga amulukile lijina lyalihya, kaha Apalahama atachikijile ngwenyi Kalunga mwakamuhana chisemunwino cha chinene. Kalunga ahanjikile cheka kuli Apalahama nakumulweza ngwenyi, “Lifuchi lya Kanane lyosena nangu kalihana kuli ove navakachisemumwino vosena navakeza kulutwelwove; nangukapwa ngu Kalunga kavo. Kaha nawa hali puwove Salai. Sala likiko lijina lyenyi. Nangumukisula na kukuhana mwana wa lunga muli ikiye mwaka-sema mwana walunga. Cheka Sala mwakapwa nevo yava kamafuchi osena. Vamyangana ja mafuchi navakalovoka muli ikiye.” (Kwimba)
Muvwimbimbi wamulikumi nayitanu nayitatu (18) Vangeji vatatu
![Muvwimbimbi wamulikumi nayitanu nayitatu (18) Vangeji vatatu](https://static.globalrecordings.net/300x200/lll1-18.jpg)
Kuputuka 18:1 - 15
Likumbi limwe malunga vatatu vejile kuli Apalahama kumbalaka yenyi. Hakachi kavaze malunga vatatu, umwe apwile Kalunga ivene. Omu avamwene Apalahama alimbilile chameso hamavu alifukwile kumeso avo. Kaha akatukile ayile amulwezele puwenyi Sala mangana avatelekele kulya. Ngocho Sala ateleke kaha vava zumbwile vaze malunga. Omu Apalahama anehele kulya kumeso avo vamuhulile ngwavo, “Nyi puwove ali kulihi ou vene Sala?” Apalahama avakumbulwile ngwenyi, “Ali mwane muze mumbalaka.” Kaha Kalunga amushikile Apalahama ngwenyi, “Tala ami nangukeza cheka kuli ove hamwaka nawizaho halwola vene luno. Sala ou puwove mwakemita lijimo naku kasema mwana walunga.” Oloze Sala omu evwileko, asehele mwomwo Sala apwile hanakolo lyehi chikuma myaka yenyi yakusemuka inahichile lyehi. Kalunga amuhulishile Apalahama ngwenyi, “Puwove Sala nasehe ika omu nambe ngwenyi, ‘Nanguhasa kusema mwana oholili omu ngunashinakajiwa lyehi ngana?’” Kalunga ahanjikile ngwenyi, “Kuli chuma chimwe chachikalu kuli Ami tahi? Kumana jino nangukeza kuli ove cheka halwola lwakutongola mwaka nawizaho numba jino puwove Sala mwakapwa na mwana walunga.” (Kwimba)
Muvwimbimbi wamulikumi nayitanu nayiwana (19) Apalahama mwahakwila Sotome
![Muvwimbimbi wamulikumi nayitanu nayiwana (19) Apalahama mwahakwila Sotome](https://static.globalrecordings.net/300x200/lll1-19.jpg)
Kuputuka 18:16 - 19:29
Omu jino vaze vangeji vakatukile nakuya muungeji wavo, na Apalahama nawa apwile na kutambuka navo mu nyima yavo. Vatalishilenga chakuya ku Sotome. Kaha Kalunga amulwezele Apalahama ngwenyi ngunalakana kuya kulifuchi lya Sotome mwomwo Kalunga ajinyine kunongesa membo aze apwile kusotome na ngomola mwomwo vilinga vyavatu kana Kalunga kevwile navyo kuwahako. Hakiko kalunga ajinyine kuvazangamisa. Vasezele nawa vishinganyeka vya Kalunga vyakujila vya hali lunga na pwevo. Kaha naulyanyi nawa wavulile. Apalahama anukile Lote. Ahanjikile kuli Kalunga amwihwile ngwenyi, “Emwata naukavazangamisa vaka-kwoloka nava kuhengesa hamwe tahi? Kumana muka-kusopesa vaka-mavu ahonene ika kulinga mwamwenemwene?” Apalahama haze vene aputukile kulembelela Kalunga. Kalunga amulwezele Apalahama ngwenyi kangweshi kukanongesa Sotomeko nge namukwapwa vaka-kwoloka likumi. Omu Kalunga akumishile kuhanjika mazu awa kuli Apalahama, kaha amusezele Apalahama ahilukile kwimbo. Oloze mu Sotome kamwapwile vangamba jaKalunga likumiko. Vaze Tunganda twa Kalunga vavali hakwingila muze mulifuchi lya Sotome vamwenemo vilinga vawunyengwe muli vatu. Shikaho Kalunga asolwele kekhe hali Lote. Vaze tunganda twaKalunga vakiko vamulwezele Lote afumemo, alovokemo musotome hamwe natanga yenyi. Vamulwezele nawa ngwavo kanda utala kunyimako. Ngocho Kalunga atumine kakahya kufuma mwilu kochele lifuchi lya Sotome na ngomola vatu vosena vapwile muze vanongele. Lote natanga yenyi vachinyinemo. Oloze pwevo lyalote omu vapwile nakulovokamo atalile munyima alumukile kaumbu kamungwa. Apalahama amulembelele Kalunga apulule vatu vosena vaka-kwoloka. Oloze Lote navana venyi vamapwevo vayoyele, mwomwo Kalunga anukile Apalahama hakulembelela hali Lote. (Kwimba)
Muvwimbimbi makumi avali (20) Apalahama na chilumba
![Muvwimbimbi makumi avali (20) Apalahama na chilumba](https://static.globalrecordings.net/300x200/lll1-20.jpg)
Kuputuka 21:1 - 22:19
Jino Sala pwevo lya Apalahama ahetele mu myaka makumi atanu na wana (90) kaha asemene mwana wa lunga, Nganomu amu shikile Kalunga Apalahama. Apalahama ahetele myaka likulukaji limwe (100). Uze mwana walunga vamulukile ngwavo ikiye Isaka, kulumbununa ngwavo “miselo”. Omu apwile mukweze kanda akole, Kalunga amwesekele Apalahama lufwelelo lyenyi. Amwambile ngwenyi, “Ove Apalahama mbata ou mwanove Isaka wazanga kanguhaneyo kupwa wana wakungulumbila ami.” Ngocho Apalahama ononokele mulizu lyaKalunga kaha alongesele vyosena ayile kuchana na mwanenyi Isaka. Kupwa wana wakulumba waKalunga. Apalahama ambachile jikunyi nakumutwikajo isaka. Oloze ikiye Apalahama ambachile kakahya na poko. Omu vapwile vose vavali hamwe, Isaka amuhulishile, “Tata nyi mwana mukoko wawana wakulumba ali kulihi?” Apalahama akumbulwile, “Kalunga ivene, Mwalitalila chimuna wawana wakulumba ove mwanami.” Apalahama atungile lijiko lyakulumbila, ahakileho jikunyi, mwanenyi amukashile nakumusavalika halijiko lyakulumbila lize atungile Apalahama. Asolomwene poko yenyi mangana jino amujihe Isaka, kangelo kaKalunga ahanjikile kuli Apalahama nakumuhuhuma, “Kanda unangika mavoko ove hali owo mwanako, chipwe kumulinga mweka. Jino ngunatachikiza ngwami unevu woma waKalunga, mwomwo kawanguminyine ami mwanoveko, ikiye mwanove umwe kaha.” Apalahama amwene livuvu lya mwana mukoko nalijingila mukachi kachiputa. Amumbachile nakumuhana kapwa wana wakulumba kushisa muli Isaka. Kalunga amulwezele Apalahama ngwenyi, “Shikaho ove Apalahama yove kawanguminyine ami mwanoveko, mwanove umwe kaha. Ami nagulishinga kuli ove halijina lyami ami ivene ngwami: nangukakukisula ove nakukuhana ove tanga yiyivulu. Navakavula nge omu vavula vatanganyika vamwilu nge nawa musekeseke kungenge yakukalunga-lwiji. Kuhichila muli ove tanga yosena vakamafuchi osena hamavu navakapwa vakukisula, mwomwo hakwononoka chove kuli ami.” (Kwimba)
Muvwimbimbi makumi avali naumwe (21) Apalahama nava ngamba jenyi
![Muvwimbimbi makumi avali naumwe (21) Apalahama nava ngamba jenyi](https://static.globalrecordings.net/300x200/lll1-21.jpg)
Kuputuka 24:1 - 25:11
Jino Apalahama omu apwile hana shinakajiwa lyehi, kaha asanyikile vangamba jenyi ahanjikile kuli vakiko ngwenyi, “Lishingenu likumbi lyalelo ngwenu namukahiluka kulifuchi lyami nakulivausoko jami, nakumumbachilako ou mwanami pwevo, Isaka.” Apalahama kazangile mwanenyi aseze eli lifuchi lyalushiko lyaKalungako, chipwe nakumbachila mwanenyi pwevo wakufuma mu Kananeko. Vangamba jenyi vononokele kumazu aze avalwezele Apalahama, kaha uze ngamba akatukile nakuya kulifuchi lya Nahole. Kuze amulombele Kalunga amutwaminyine hakuka musakwila pwevo wamwenemwene Isaka. Mwana pwevo wa mwaza kumeso lijina lyenyi Laveka ejile kulishima nakuswita meya. Aswichile meya muze mulishima nakumuhana ngamba ya Apalahama na kuli va ngamela vaze apwile navo likumi. Ngamba ya Apalahama atachikijile jino ngwenyi Kalunga nangutwaminyina kuli ou mwana pwevo. Ikiye ngulinakutonda, Kalunga nangutwaminyina vene. Kumana ou mwana pwevo ikiye muzukulu lya songo ya Apalahama. Uze ngamba afukamine hamavu kumeso a Kalunga amwalishile ikiye, mwomwo amukumbulwile muze alombele naku mutwaminyina hakuya kuli vaka-tanga ya mwata wenyi. Ngocho jino uze mwana pwevo Laveka alingile jino kupwa pwevo lya Isaka. Apalahama afwile omu ahetele myaka likulukaji limwe na makumi atanu na vali namyaka itanu (175). (Kwimba)
Muvwimbimbi makumi avali nayivali (22) Yesu mwasemuka
![Muvwimbimbi makumi avali nayivali (22) Yesu mwasemuka](https://static.globalrecordings.net/300x200/lll1-22.jpg)
Mateu 1:18 - 25; Ngalesha 4:4, 5
Mazu aKalunga apwa amuchano. Ikiye kapwa muka-kwongako. Mwomwo amulwezele Alama ngwenyi likumbi limwe ami nangukatuma ou Wami ngwasakula mangana akamuchike Satana. Amulwezele Nowa ngwenyi nangukanongesa vaka-kulinga mwakuhenga. Kalunga nawa amu mwenesele Yopa vyuma vyamwaza eji kutulingilanga etu. Amulwezele nawa Apalahama kulama jishiko jenyi. Hamuvwimbimbi kana ou tunamono kemba lijina lyenyi Yesu. Asemukile mulwola lwamwenemwene mulifuchi lyava Fwilishite, Navalyalumuna ngwavo likiko Isalele. Naye ya Yesu apwile lijina lyenyi Maliya. Apwile wakutanga ya Apalahama naIsaka. Maliya apwile mujike kalimwene nalungako Palanga nakukusemuka cha Yesu apwile nalijimo lyakuli shipilitu wajila. Yesu kapwile naise waku chisemwa chautuko. Kalunga ikiye ise. Yesu kaha nahase kuneha jikisu kuli vatu vaha-kaye vosena hamavu. Ikiye ambachile kulikehesa chosena chautu mangana etu kulutwe tukawane ulemu kuli Kalunga. Asemukile mukutesamo lushiko lwaKalunga luze ngwavo Satana likumbi limwe navaka mu chika mutwe. Mangana vatu vosena vakasokoke muundungo wa Satana. Yesu ejile mangana atuswenyese cheka kuli Kalunga. (Kwimba)
Muvwimbimbi makumi avali nayitatu (23) Kufwa cha Yesu
![Muvwimbimbi makumi avali nayitatu (23) Kufwa cha Yesu](https://static.globalrecordings.net/300x200/lll1-23.jpg)
Ngalesha 3:13 - 14
Kaha Yesu azovolokelenga nakupwa jino vupu ya lunga, Aputukilenga kunangula vatu jijila jaKalunga. Nakulinga vinjikizo vyakusolwesa nakulilumbununa ivene chikupu afumine kuli Kalunga. Vatwamina vamwe vamumauka amakumbi aze kavamwitavililengako ikiye. Vamujihile Yesu hakupapalila ha chitondo chakusepasana. Kaha liswalale umwe ambachile likunga nakumutuva Yesu kuluhachi lwenyi vamone vene Yesu nafu. Shimbu kanda Yesu asemuke hano hamavu. Kalunga amulwezele Alama ngwenyi naukafwa nge naukalya kumihako yauze mutondo. Tuvosena tunalikange nakuhona kumwononoka, kufwa chahaya myaka chatutela. Tachikizenu nawa ngwenu nge muze Kalunga amuhanyine Apalahama uze livuvu lya mwana mukoko amujihe kupwa wana wa chilumba wakushishisa muli Isaka. Ngocho mukiko nawa Kalunga, hazangi yakutuzanga etu kuchina vatu vosena navakanonga, chize chahaya myaka. Atumine Yesu hali yove na yami kupwa wana wakulumba ha milonga yetu yashili najisonyi javatu vosena. Kalunga atuzanga tupwenga tuvana venyi. Eyo, mukiko mwaya muchima waKalunga. Oloze shili na sonyi vinanehe kutu handunwisa mukachi ketu naKalunga. Yesu ikiye jila yakututwala na kutuhilwisa kuli ise Kalunga. Yesu ejile mangana yove na yami akatuhilwise na kutuwanyisa kuli Kalunga ketu. (Kwimba)
Muvwimbimbi makumi avali nayiwana (24) Yesu ayoya
![Muvwimbimbi makumi avali nayiwana (24) Yesu ayoya](https://static.globalrecordings.net/300x200/lll1-24.jpg)
Yowano 20:19 - 29
Jino tumbaji twa Yesu vasavalikile mujimba wenyi mu chimbumbe. Mujimba wenyi wapwile mu chimbumbe makumbi atatu. Kalunga amusangwile kufuma kuvafu! Kufwa kachapwile na ngolo jakukanyisa Yesuko, ou Mwana Kalunga. Omu alingile Yesu nasa nguka lyehi alisolwele nawa kuli tumbaji. Kaha vakiko valikomokelele. Kambaji umwe, walijina lya Tomase, kapwile hamwe navakwavo omu alisolwele Yesu kuli vakikoko. Tomase ambile kuli vakwavo ngwenyi, “Kuvanga nganamono viveza vyajimbandu jajimbambo mumavoko enyi. Nakuhaka nawa munwe wami muze vapapalilile jimbambo, ngukwate na mavoko ami kuluhachi kuze vamutuvile likunga, numba ami ngwitave.” Jino omu mwahichile chalumingo chimwe Yesu alisolwelele cheka kuli tumbaji. Kaha vosena valikomokelele. Tutalenu ha muvwimbimbi ou kanawa. Tunamumono Yesu ali na kumulweza Tomase viveza, na jimbandu jajimbambo vamupapalilile mumavoko enyi. Kaha amulwezele ahake mavoko enyi kuluhachi. Yesu amuhuhumwine Tomase, “Kanda naupwa umuka kukakasanangako fwelelanga.” Tomase afwelele. Yesu avalwezele ngwenyi, “Vanatokwa vaze vanetava chakuzeneka kungumona ami.” Shikaho etu katwatela kupwa nganomu alingile Tomaseko ikiye akakasanyine mulwilo mwata wenyi, Kalunga kenyi. Etu twatela kupwa nachivezu chakwanuka ngwetu mazu aze ahanjikile Kalunga kuli Alama ngwenyi nangukatuma umwe ikiye mwakeza nakuchika Satana nakwenyeka ngolo jaliyavolo hali etu. Yesu afwile hakulusu asanguka kuvafu, Amuhashile Satana. Satana keshi nangolo hali vatu vaze vamufwelela Yesu na kwononoka mwata Yesuko. Nganomu Kalunga amushikile Apalahama lushiko ngwenyi, “Muli ove Apalahama vakamafuchi nava kavakisula kuhichila muli yove.” Kukisula kana chinapu jishili jetu vanajikonekela na jisonyi jetu vanajifumisa. Natu tambula kuyoya chachihya muli Yesu. Ulemu na usoko wetu naKalunga unahiluka cheka. Tunahase kufwa etu kumujimba natuyoya hali Kalunga myaka yosena. Kukisula kana nachiza kaha hakufwelela muli Yesu. Kuhichila mu vyosena evi, kalunga mwatambula ulemu waunene.