unfoldingWord 02 - Bue buchã ikẽma kowe ywype
Đề cương: Genesis 3
Số kịch bản: 1202
ngôn ngữ: Ache
Chủ đề: Sin and Satan (Sin, disobedience, Punishment for guilt)
Khán giả: General
Thể loại: Bible Stories & Teac
Mục đích: Evangelism; Teaching
Trích dẫn Kinh Thánh: Paraphrase
Trạng thái: Approved
Bản văn này là một hướng dẫn cơ bản cho dịch và thu âm trong các ngôn ngữ khác. Nó phải được thích nghi với nền văn hóa và ngôn ngữ để làm cho nó phù hợp với từng khu vực, nơi nó được sử dụng khác nhau. Một số thuật ngữ và khái niệm được sử dụng có thể cần một lời giải thích đầy đủ hơn hoặc thậm chí bị bỏ qua trong các nền văn hóa khác nhau.
Kịch bản
Adam, dja breko emi ury gatu ekõawe go ka gatuechepe Apã Wachu djapowe idja puarã. Pypyllãwe tyru dja eche pechewã. Go nongabu djepe krymballã rekollã, bue buchã ĩllã buare kowe ywype. Kreybu wywy wata gatu ekõ ka gatupe, djawu reko Apã Wachudji emi.
Go ka gatupe rõ ekõawe membo kabewãwãngi. Djawuma kudjãndji: „Apã Wachu ko kiuare dje ullãwã wyra lla wywy kowe ka gatupe?“
Gobu kudjã inama: „Apã Wachu kiuwe orepe, ore wyra lla wywy upawã. Ãwe wyra lla bue gatu kuawãngi, bue buchã kuawãngi emi idja orepe ukallã. Apã Wachu orepe kiuma: Dje go wyra lla ubu, emi go lla pokobu, manowerã.“
Membo rõ djawu pepyma kudjãpe: „ Apã Wachu kainawe pendjepe! Pendje manollãwerã. Apã Wachu kua gatu, pendje go wyra lla ubu, ekõwerã Apã Wachu nonga. Bue gatu wywy pendje kuawerã, bue buchã wywy emi, idja kuaty nonga.“
Gobu kudjã maĩ reko wyra lladji, wechãma kbegatu, ẽ gatu mirõrã. Gogi bue kua gatu djue emi. Go buare wyra lla matãma, uma emi. Mẽ bitallãma dja imepe, dja djawẽwatygipe. Gobu gogi uma emi.
Gobu dja chã owoma, wechãma, go rõ echeche. Gobu peche djue dja eche, djapoma wyra odji, dja eche pechewã.
Gobu kbe’e emi dja breko wendubu, manonga Apã Wachu wata ekõ ka gatupe, djemima Apã Wachu idjape wechãllãwã. Gobu Apã Wachu pukama achepe: “Adam, maty rõ dje enda?” Gobu Adam inama: “Cho wenduma, manonga dje wata ekõ ka gatupe. Gobu cho krymballãma, cho tyrullã buare. Go buare cho djemima.”
Gobu Apã Wachu inama: “Awa rõ djepe kiuare dje rõ echeche? Dje ko uma wyra lla, cho inawe dje ullãwã?” Kbe’e djawu pepyma: “Dje chope meare kowe kudjã. Gogi rõ mewe chope wyra lla’a.” Gobu Apã Wachu djawuma kudjãpe: “ Bue rõ dje djapowe?” Gobu kudjã djawu pepyma: “Membo rõ chope kainare.”
Apã Wachu membope buema mondo ĩ buchãwã: “Dje kra matã ekõwerã, ywy kui dje uwerã. Dje emi kudjã, edji byllã buchãwerã. Gobu emi dje tay wywy dja memby wywy emi, edji byllãwerã. Etakrã dja irõndy rõ biriwerã dje tõpe, dja pychã atape emi dje chuwerã.”
Gobu Apã Wachu inama kudjãpe: “Cho djapowerã, dje memby opobu, dje achy buchãwã. Dje kuarawerã dje imepe, dje ime rõ chidjawerã djedji.“
Apã Wachu inama kbe’epe: “Dje wendu buare dje breko djawu, dje wendullãma cho djawu. Kowebu rõ ywy buchãmbawerã. Dje ywy tyrõ puy ekõwerã pendje bue uwã rekowã. Gobu dje manowerã, dje echedji rõ ekõwerã ywy.“ Gobu kbe’e dja brekope bykuama Ewa. Go rõ inambyty “Mẽwãngi ache wywype ekõwã”, idja rõ ache wywy ai’idjiwa. Gobu Apã Wachu we piredji djapoma tyru Adam emi Ewa puarã.
Gobu Apã Wachu inama: “Kowebu ache nandje nonga roma ekõ go lla u buare, bue gatu kuapama, bue buchã emi. Gogi ullãwerã wyra lla manollãndydjiwagi, go rupi go rãwe manollãwã.“ Go nonga Apã Wachu buema mondo Adam emi Ewape ka gatu puare. Gobu Apã Wachu mĩma dja buepytygi chidjaechegi ka gatu ikẽ lluãndype, warõ rekowã, duwegi go wyra lla manollãndydjiwa ullãwã.