Varerya, Wiriyana Navetho Okhalemo Livuru a Neshehse 4

Mapatcherero

Moni asinthamwene. Muluku onnanisivela ni wathokoroya othene nave onnavaha makhalelo osivela wa othene yawo anamurumela ni omwiwelela. Owiriyane itchu serenye mmiyakha sakhalai seiyo sirempwe mPipiliani, weyo owehe eruku ya livuru a ntchalo. Wiwa oruwa wu (*) Eneneryo varerya eruku enatcharavo.

Eruku Yopatchera 1: Emusi Yahitchawa Ethala

Rute 1:1-5

Muluku ahapachusha atchu, nnya othene yamutchekela Yowo. Muluku ahathanla nloko na Israyeli wi ekhale atchuawe, wi emurore Yowo nave emurumeleke Yowo. Enamwi eri hiha, ilukuluku ikina saya aIsrayeli yanamutchekela Yowo. Yawo yanathamalela sophwaniherya sopatcha ntoko maloko makina yahimusuwenle Muluku. Vanthowa neno Muluku anarumiherya ikhotcho ni etala, mwa makhalelo awi nloko nawe nirukunuwe wa sotcheka saya ni otchikela omova Muluku. Mpuwa mwa aIsrayeli wakhalamo emusi yupuwelenle ovinya mwelaponi mwaya eyaka okhala elapo y'oMoabita wariwo olya. Yakhala weiwo miyakha khumi (10) ophiyera okhwa wa atithiaya. Anamwane opili a emusi yela yahathela anamwane a nloko nenne neriwa Amoabita. Nave anamwane yala yakhwa mwelukulukwene yele. Yahahiya asaraya eri anamukhwele ehinono anamwane, ni amayaya vamoha asipwiyamwanaya eli mwelapo yele yorakamelana.

Eruku Yanawili 2: Naomi Ni Rute Anakokela Waisrayeli

Rute 1:6-22

Mayi emusi yele itchaniwa Naomi, nave asipwiyamwanawe Amoabita yitchaniwa Rute ni Orfa. Naomi ahupuwelela okokela elapo ya Israyeli. Rute ni Orfa yarowa elapo ya Israyeli. Naomi ahi wa yowo: "Ntakhara sheni onerawe okitchare miyo? Onupuwela wi kinammuyara mwana ani othele? Okokele owani mwanaka! Kohuluvalela oyara. Muluku okinyanyala miyo!" Orfa amunula Noemi, nave akokela owannyawe. Navetho Rute alotcha ni Noemi ii: Muhikikokihe wi kohiyeni, vawi weiwo munatchunanyu wi muyekewo nri vamoha. Nloko nanyu nnarwa nikhala nloko naka nave Mulukuanyu ori Muluku aka. Vawi hiha, Rute amutchara Noemi oBetlehemu mu elapo y'aIsrayeli.

Eruku Yaneraru 3: Rute Onaya Ohatcha

Rute 2:1-23

Ephinye oBetlehemu, Rute ahi wa Naomi, "Kihiyeni kirowe omatcha wi kitchotcheke seiyo inamora mmatchani wa yowo kineraka okhoveni wawe kiphwanyewo ikharari". ( Naomi ni Rute yatepa ohawa ) Rute atchuna ophwanya ematcha anamalapa yahatchayamo wi atchotcheke ikhani khani. Mwanene ematcha yele ari mutchu orela nsina nawe Boazi. Boazi ahakoha anamalapawe sa muthiyana ahamusuweleiye yowo ari mmatchani mwawe. Mmoha a yowo ahi:"Ola mMoabita yola orwile oMoabe ni Naomi". Boazi ahiwa sa witchatchala wawe ni apwiyamwanawe. Nave anamona alapaka vopwaha wi aikhaviherye mwanene vamoha ni apwiyamwanawe. Vawi yowo alotcha ni Rute: " Owatchamele anamutekoaka ohepha vawi yawo enarwa yokhaviherya weyo". Boazi alotcha ni anamutekoawe wi ehiyeke solya ikhani-khani mutchuli wi yowo atchotcheke. Rute akokela owannyawe ni solya sintchipale nave Naomi amuthamala Muluku vawi anona makhapeleliwoawe ti Boazi. Naomi ahi: "Mulukuaka mmurelihe yowo! Yowo tawatananoahu".

Eruku Yanesheshe 4: Boazi Ni Rute

Rute 3:1-18

Yakhalamo yokhovelela mwaIsrayele yawi; Muthiyana akhwa iyawe mulopwana osuwanyeya awatchamanano taya omuthela ( namukhwele ). Nihiku nimoha Naomi alotcha ni Rute: "Miyo nkikhanle owavyera mulopwana wi okhaleno ntchekona (anokhapelela)?". Boazi ti mwatchamaniahu. Ohiyu yola ani akhale vamoha ni anamalapawe weiwe anamuthanlayawo thiriku. Wireheryele ni owarela phama. Waphiya oye vava onereiye akhalevo. Akona, weyotho wakone watchamela inani sawe nave yowo onarwa asuwela wi onnatchuna wi otheliwe ti yowo. Rute aherano yeyo Naomi amulenleiye. Boazi avinyaleiye amphwanya Rute wametchoni vawe asuwela wi onatchuna omuthela yowo. Ahi wa yowo: "... Ohove. Kinamwerano va weyo sothene okivenkawe. Anamutekoaka othene asuwela wi weyo wa muthiyana awitchatchala (aphama)" .

Eruku Yanethanu 5: Boazi Onavahiwa Miruku Ni Atokwene a Obetlehemu

Rute 4:1-22

Boazi awitchana atokwene a miruku a mBetlehemu. Mmoha a yawo awatanano taphwanenle omuthela Rute,othene yahemererya wi Boazi amuthele yowo. Mwa eneneryo ya wemererya, mulopwana ole amunnya Boazi isantaliya sawe. Yela yari yokhoveleleya mwa aIsrayeli. Vawi Boazi ahitaphuwa wi amuthele Rute . Boazi ni Rute yakhalano mwana nsina nawe eriwa Obede. Rute ahi wa Naomi, "Muluku achichimihiwe. Yowo hohinye wovaha mulopwana wi anokhapelela. Mvuwe mwa aIsrayeli nave ovaheni okumi wahihano mwa nyuwo okhapeleleni ilukuluku sothene. Wi pwiyamwana yowo onamusivelawe ophwaha anamwana athanu n'eli, ovahiwa oyara." Anna, Rute ophwanya ohakalala otokotoko amurumenleiye Muluku ni mulokoawe. Obede akhala apwiyawe Davide, mwene mutokotoko a Israyeli nave mu nihimoni akhala mwene a othene. Nnamuhuserya sa yowo mwa eruku enatcharavo.

Eruku Yanethanu Namoha 6: Mariya Ni Munkelo a Muluku

Luka 1:26-38, 2:1-7

Evinre mahiku a nihimo na Rute, Muluku amuthanla muthiyana mukina wi amurumeleke. Nsina nawe ari Mariya. Ayariwe mwa emusi ya Rute. Mariya ari mwali akameliwe ni mulopwana awitchaniwa Yosefe. Nnya ehakunve othelana Munkelo ahoneya wa Mariya. Ahi wa yowo: " Ohove, Mariya. We wophwanya ikharari va mithoni va Muluku. Weyo onarwa omuyara mwana nave onarwa omutchuwa nsina nawe Yesu. Yowo ani akhale mwana a Muluku ohimala". Mariya alotcha ni Munkelo wi mi kiri kapuro a Apwiya. Sereye seiyo mukilenlanyu". Munepa Wawela wamukhuruwela Mariya, yowo arupala, ayara mwana mwamulopwana amutchuwa nsina nawe Yesu. Mariya tamuyanre Yesu mwana a Muluku. Ntakhara Mariya ahimwiwelela Muluku, Mvulusha Yesu ayariwe ti yowo. Hiyo namwiwelelaka Muluku, Yowo onnanreliha.

Eruku Yanethanu Napili 7: Ana Onnanvekela Muluku

1 Samuel 1:1-20

Emanle mahiku a Rute, mwelapo yaIsrayeli, akhalawo muthiyana itchaniwa Ana. yola anamurumela Muluku ni omwiwelela yowo. Ana ari otchimwa ntakhara hayara. Eyakha niyakha yanrowa ompa wa Muluku nipuro yamuthamalayano Muluku. Yanavelela ephepa wa Muluku. Ana arowa ompani ya Muluku ii: "'O Muluku, mwakupuwela mukivaha mwana, hiha kinamochichimihani nyuwo mahiku othene a okumiaka". Amanle olotcha olotcha ni Muluku iyano sawe satanyeya, akhala awumala. Eiya, mutokwene ohela ephepa, amona. Upuwela wi ohapaliwe evinyu. Muluku ahiwa mavekelo a Ana. Vohilekela amuyara mwana mwamulopwana amutchuwa Samueli. Asinthamwene, Muluku ti atithihu awirimu wakhala wi ninnamusivela yowo nanveka onnanivaha. Muluku onnasuwela yeyo enathowa anamwanawe. Yowo onnavaha munsina na Yesu. Olelo akhelani yovaha ya Muluku.

Eruku Yanethanu Natcharu 8: Samuel Mu Empa Ya Muluku

1 Samuel 1:24-28, 2:12-21, 3:1-21

Samuel ari nikwiya Ana anvelela yowo mu sothene wa Muluku. Wi akhaleke ni mutokwene-a-iphepa Eli mu empa ya Muluku yeyo eri oSilu. Eli amuhusiha Samuel omurumela Muluku. Mulipa-a-ephepa Eli akhalano anamwanawe eli yawotho yari alipa-a-iphepa nnya yala yamutchekela Muluku. Muluku ahiya olotcha ni atchu mpuwa mwa alipa-a-iphepa yala. Nihiku nimoha Samueli avinnyevo oya okona, motutusha Muluku amwitchana nsina nawe. Samuel atchimaka awireheryelene aya akhaleiyewo Eli alotchano: Mi kiri va, nyuwo mokitchana? Nave Eli amwakhula: "Miyo nkiwitchanne, hawe wakone!" Iha sahereya mu ilukuluku tcharu. Vava Eli arora wi ti Muluku amwitchana Samuel, nave alotchano: "Wiwatho witchana olotche: Mulotche Apwiya, kapuroanyu onniwa". Muluku analotcharu ni Samuel mu elukuluku ni elukuluku nave yowo akhala mulipa-a-ephepa mutokotoko ni mutokwene a Israyeli. Muluku onnanitchana mwa makhalelo mamohamoha. hankoni nitheteye maruahu niwe witchana wa Muluku.

Eruku Yanethanu Nasheshe 9: Samuel Onnavekelela Atchuawe

1 Samuel 7:2-14

Muluku t'ekhaikhai vawi hiha ahalaka anamwane ohileleya a mutokwene-a-iphepa Eli, yawo yakhwile okhotchoni vamoha antchipale a aIsrayeli mu elapo yaweriwa Filistiya. Miyakha makhumi meli aIsrayeli yari akapuro mmatani wa afilistiya. Nave Samueli ahalela atchu ii: "Mwahiya ni omwalanano miluku sothene ni okokiherya mirimanyu w'Apwiya wi mmulapeke Yoworu, Yowo onanwopolani mw'afilistiya". Va nthowa n'ekoi aIsrayeli yonihiwaya ni amwitchaniaya yamwiwelela Samuel. Yawo yarowa mu nipuroni nenlo nathanliwe ti Samueli; nave yowo ahavelela iphepa ni ovekela wa Muluku ntakhara a Israyeli. Afilistiya v'osuwela wireheryela wu yathukumana wi yawaneno aIsrayeli nave Muluku aharumiherya makatchamiho a maluku Afilistiya yahova etchawa. Muluku olamulela wa mulokwawe ohikhaleno Muluku mukina nya miyo mekhaka.

Eruku Yanekhumi 10: Samuel Onnamureliha Saul Wi Akhale Mwene a Israyeli

1 Samuel 8:1 - 10:1

Muluku ari Mwene eparipari a Israyeli, nave Samueli anaholela muloko wa Muluku, nyenya atchu yamutchuna mutchu wi akhale mwen'aya, ntoko ilapo ikina. Samueli iwaleiye yoveka ya muloko achimwano, Muluku alotchano yowo: "Tahi yowe atchu okhontchaya nnya miyo. Wawiriyana atchu analotchaya nave wavahe mwene". Akhala mmiravo a makhalelo ophwanelela yowo ari orakamasha mwa aIsrayeli, nsina nawe ari Saul. Nihiku nimoha Saul aya omwetchelela Samuel. Samuel amonneiye arwaka Muluku alotchano: "Tiyola mulopwanene, ani akhale mwene atchuaka". Samuel akusha nipotoro nawe na makhurwa, ni omuyeherya vamuro va Saul. Yela yari eneneryo yoniherya wi yowo ahathanliwa okhala mwene. Miyakha makhumi masheshe Saul ahalamulela aIsrayeli.

Eruku Yanekhumi Nammoha 11: Mamalelo a Omwene Wa Saul

1 Samuel 15:1-29

Mmahiku a Samueli nakhala nloko naitchaniwa Amalakita yawo yashimwinhe aIsrayeli atchu a Muluku. Wari Samuel mulopwana a ephepa a Muluku alotcha wa mwene Saul masu a Muluku: "Wiriyana masu ala a Muluku; owiphe amalakita ni opahula sothene aryayano". Muluku amukhaviherya Saul ni anakhotchoawe mmpuwa mwa owaniha waya atchu yale ohileleya yawo athoriheiye ntakhara opwaloaya. Nave Saul hamwiwelenle Muluku amwipithiha mwene aAmalakita ni enamawe yochichimiheya ni wisotherya ni masu ariki atchuna ere ephepa wa Muluku. Samuel akumanano Saul alotchano: "Ntakhara sheni weyo ovannyawe malamulo a Apwiya yowo hawemerenrye ntoko mwene". Wari Samuel arukununweiye wi aroweke, Saul aphara yowarawe yeyo ahula makupa meli nave Samuel ahi: "Muluku okawanya omwene wa Israyeli ni omunnyererya mulopwana okhweleya wophwaha weyo". Asinthamwene, Saul ovelela iphepa wa Muluku, nnya hamwiwelenle. Samuel amurumela ni omwiwelela Muluku mahiku othene a okumiawe. omwiwelela Muluku.

Eruku Yanekhumi Napili 12: Yesu Mpa Mwa Muluku

Luka 2:41-50

vinre miyakha mintchipale sa olamula wa Samuel, Yesu ari mwana asitithinya, Yosefe ni Mariya yamukeriha Yowo oYerusalemu weiwo wariwo efesta niwi asuwele empa ya Muluku (Mariya ari amannya Yesu, nyenya Muluku ari atithinya). Veri va muloko muntchipale Yesu arimela asitithinya Mariya ni Yosefe yanamwavya makupa othene. V'okutchula vaya yamphwanya mu empa ya Muluku areryaka ni Ahusiha ni Atokwene a aYuda sa masu a Muluku. Mariya alotcha ni Yesu: "Tisheni weyo onerenlawe? Miyo ni atithia nanwavya!" Nave Yesu awakhula: "Kari mpa w'Atithiaka". Yesu areiye mwana ntoko Samuel, Yowo anasuwela wi karwele omurumela Muluku. Ori waphama opatchera omurumela Muluku ori mwana. Yesu arwenle wakokiherya atchu wa Muluku. Yowo ori Mwene a eparipari ni Mutokwene a atchu othene.

Mapatchereryo

Alopwana akina yawo yariwowo yari akapuro a Muluku mwaha yola onathoriherya ovitheya wa ikuru sawe Muluku enreno hai makhalelo a miyaha iha. Sinaphwanyeya omamaliheryo wa livuru a ntchalu owehe eruku owiriyanaka ovarerye eruku enatcharavo weyo owiriyanaka ovuwa wu.

Eruku Yanekhumi Natcharu 13: Davide Mukukhula Owali a Iputcheputche

1 Samuel 16:1-13, 17:34-35

Saul ari mwene opatchera a oIsrayeli nave hamwiwelenle Muluku; vawi Muluku amuhiya Saul ni ohimukhaviheryatho. Akhalavo mmiravo a mukukhula nsina nawe Davide, yowo akhapelela iputcheputche s'atithinya. Mwa nroromelo nawe mwa Muluku eparipari, yowo hova etchu. Nihiku nimoha, akukhulaka, mwatcho arwa aphara enamawe Davide ni wuma wa murima amwakiha amwipha ni ekopoawe. Davide anamuhakalaliha Muluku mwa sotesene ereiye. Va nthowa nenlo Muluku amuthanla wi akhale mwene mu nipuroni na Saul.

Eruku Yanekhumi Nasheshe 14: Davide Ni Mulopwana a Wopiha Goliate

1 Samuel 17:1-54, 2:30

Mu elukuluku yele yakhalawo ekhotcho mpuwa mwa Israyele ni afilistiya. Afilistiya yakhalano munakhotcho awopiha nsina nawe Goliate, yowo ahakoha aIsrayeli mwa makhalelo ariki: "Mmuthanle mulopwana... yowo awupa okipwaha miyo, akiwerya okipha, hiyo nnarwa nikhala akapuro anyu... nnya miyo kanwerya omwipha, nyuwo munamukhala akapuroahu". Nloko na Israyeli nantepa omova Goliate, nave harivovo owanano yowo. Nyenya mmiravo Davide ahi, "Tani nfilistiya yola ( ohimusuwenle Muluku ) vawi ( hiha hanawerya ) anakhotcho a Muluku? Davide hamonveru. Ansuwela wi Muluku onammukhaviherya omwipha nakhotcho yola vawi ekhotcho ti ya Muluku. Davide atchotcha maluku mathanu, nimoha ahela va mphiryani nave anvonyano Goliate amphoreiha vayutchi. Goliate ahuwela vathi, nave Davide amutchimakela amuluha. Akusha nlema nawe amukwatchano muru. Nihiku nenle aIsrayeli yahawerya afilistiya. Muluku onnawunnuwiha yawo aniyeviha.

Eruku Yanekhumi Nathanu 15: Mwene Saul Onnererya Omwipha Davide

1 Samuel 18:1 - 19:10

Vopatchera Saul amuthamala Davide v'omwipha Goliate ntakhara ahavulusha aIsrayeli. Davide akhala munakhotcho ororomeleya w'atchu othene nave yanamwilelela yowo. Opatchera vavale Saul anamukhalela nrima Davide ni omova yowo. Nihiku nimoha Davide amopaka tchakarawe wa mwene Saul, munepa wonanara wanvolowela Saul ni okhwela omwipha Davide, ahererya omwipa ni nnivaka. Opatchera vavale Saul ahavyavya omwipha Davide, nave mu sothene Muluku amopola Davide kapuroawe mu omurumiha Jonatano, mwana a Saul, navetho aIsrayeli antchipale yamukhaviherya Davide walapiha amwitchan'awe. Davide amutchawa Saul ni oya elapo yorakamela.

Eruku Yanekhumi Nathanu Nammoha 16: Davide Hanakhwela Omaliha Okumi Wa Saul

1 Samuel 26:1-25; aRoma 12:19

Saul ni anakhotchoawe yamwavyavya omphara Davide mutakhwane ntoko mutchu opahula. Ohiyu omoha, Saul ni alopwanawe erikimurupa, Davide ni mukhweiye Abisayi yavolowa vate va Saul. Abisayi atchuna omwipha mwene arikimurupa, nave Davide amuhiha. Davide ahi "Muluku onammulaka yowo ani amwerele opwalu mwene othanliwawe". Davide akusha nivaka vamoha ni epiya ya mahi seiyo sari wamuru wa mwene. Yavinnyayavo vate wa Saul ni okusha nivaka ni epiyawe, Davide ahanveiha Abner mutokwene asurtato omulipelela mwene: "Nyu hamunamulipelela mutokwenanyu" Vareryani v'orukurerya vanyu. Nri wowi nivaka ni epiya yeyo yari wamuru wa mwenanyu? Davide alotcha wa Saul hiha ntoko miyo kikhapelenlaka okumia, Muluku onnakhapelela okumiaka nave onnakitaphula mu sokatchamiha sothene. Davide amvinyeravo nave saul atchikela owanyawe. Akwaka muhimwerele opwalo yowo onawerelani opwalo, Muluku mekheiyeru onamwalaka.

Eruku Yanekhumi Nathanu Napili 17: Davide Othanliwa Okhala Mwene

1 Samuel 31:1-7; 2 Samuel 5:1 - 7:16

Votcharana vaya Afilistiya yawanano aIsrayeli. Mwene Saul vamoha ni mwanawe Jonatan yahikhwa okhotchoni. Yamuthanla Davide okhala mwene aIsrayeli. Davide ateka empawe ya nchichimiho mmutchetcheni w'oYerusalemo. Muluku ahi wa Davide, " miyo kowitchana wakukhulawewo iputcheputchesa, kiwera mwene atchuaka aIsrayeli. Kinarwa kiwera weyo mutokwene nave omwenea onarwa wikhalelaru. Muluku amwera mwene mutokotoko navetho anvaha ikuru sawalapihano amwitchani aIsrayeli.

Eruku Yanekhumi Nathanu Natcharu 18: Davide Ni Bateseba

2 Samuel 11:1 - 12:20; Exodo 20:14

Nihiku nimoha Davide etchetchaka ompan wawe amona muthiyana orerasha arapaka. Davide ammutchuna yowo. Nsina nawe ari Bateseba. yowo ari mwara a Urias munyakhotcho a Davide. Urias ari okhotchoni, Davide arumiha mitchaka wa mutokwene awe akhotcho wi emwiphe Urias. Davide ahikushera Bateseba wi akhale mwariye. Nyenya yeyo Davide enreiye, hiyamuhakalalinheru Muluku. Mwana opatchera Davide amuyanreiye ni Bateseba ahikhwa. Davide anveka Muluku okhurumuwela wa itchu sonanara enreiye. Masu a Muluku ani: " Ohiraruwe".

Eruku Yanekhumi Nathanu Nasheshe 19: Empa Ya Muluku

1 Cronicas 22:1-19

Davide amutchekela Muluku, nya yowo anamusivela Muluku nave anatchuna omurumela Yowo. Nave anatchuna oteka empa etokotoko ( ekeresha) wi atchu emuthamalekemo Muluku. Muluku ahi: " Weyo honateka empa mu nsina naka ntakhara wowipha atchu. Weyo onarwa okhalano mwana mmoha awitchatchala ni amuretchele, nsina nawe Salomau. Yowo tani ateke empa mu nsina naka. Kinarwa kitikitherya omwenawe mwa aIsrayeli okhla-wokhala. Davide areheryela sothene sokhweleya otekano empa, nave Salomau tatenke. Empeyo ya Muluku yatepa orera. Yatekiwa miyakha mithanu namili. Nloko naIsrayeli namuthamala Muluku mmiyakha masana-masanene. Atchu hiyatchuwanle wi Davide ari mwene mutokotoko.

Eruku Ya Makhumimeli 20: Ovolowa Wa Yesu Oyerusalemo

Mateyu 21:1-11

Ivinre miyakha sintchipale mu olamulelo wa Davide, Yesu ayariwa. Yesu ta munloko na Davide. Amanya yari mwali awitchaniwa Mariya. Atithinya ti Muluku aikurusha. Yesu ari, navetho ori mulipa-omurumela a Muluku. Yowo analotcha eparipari ya Muluku wa atchu. Nave anerano sotikiniha mwa ikuru sa Muluku. Saul, nari Davide ni hiyo othene a elapo ya vathi nomutchekela Muluku. Nyenya Yesu hatchenkeru. Nihiku nimoha Yesu avolowa oYerusalemo amuwenle mwana a puro. Atchu yarowa okumana ni Yesu enyakulaka: " Hosana wa mwana aDavide" Hosana ti yotaphulela novuluwa. Yawo yanyakula:" mutokotoko tiyowo onarwela mu nsina na Yesu". Atchu yahona wi Yesu ari mutokwene ompwaha Davide. Yowo Mwene a mamwene othene.

Eruku Ya Makhumi Meli Namoha 21: Eliya Mulipa-A-Miririmo a Muluku

1 Reis 17:1-6

Opwaha Davide ni Salomau mamwene makina yalamula wa aIsrayeli. Mmoha a yawo ari mulopwana eriwa Acabe. yowo akhalano mwariye ari namuku itchaniwa Yezabel. Awipha atchu a Muluku, nave ahalamulela atchu wi ekokhorele muluku Bala. Eliya ari mulipa-a-miririmo mutokotoko a Muluku. Arwa wa Acabe ii: " nthowa na sotcheka sa, epula herwa erupa ophiyera miyakha miraru ni emeya". Mwawihiha etala yarwa mwelapo ya aIsrayeli, nya Muluku amukhapelela Elia amuruma oya okhala oKerife, weiwo waphwanyeyawo mahi a Muluku . Mahiku othene woshishelo ni othana ipalame sanarwano ipau ni enama onvaha Eliya. Muluku onnakhapelela arummwawe, vawi hiha hankoni nimurumele nave nimuroromele Yowo.

Eruku Ya Makhumimeli Napili 22: Eliya Ni Moro Wa Muluku

1 Reis 18:16-46

Omakutchuwelo wa mwakha waneraru wa etala, Eliya alotcha ni Acabe wi awitchane atchu othene aIsrayeli ni alipa-a-miririmu a Bala wi yakumane omwako Karmelo. Ahi wa yawo: "Yarimwi Apwiya eri Muluku, mwatchareni Yawo, vano warimwi Bala ari muluku, mutcharenitho yowo". Havovo akhunle. Eliya ahi wa othene: Munruhele anamwane a nyope eli anakhorro. Mmuhiye mulipa-a-miririmo a Bala amuthanlevo omuhela ephepa. Ahikhale ani ahelevo moro. Miyotho kinammurehererya mwana a nyope aka, navetho miyo nkihelavo moro. Vava weyotho witchane nsina na mulukua, mitho kinamwitchana nsina n'Apwiyaka. Eliya alotcha sa Muluku yowo ahusinheiye atchu ni Muluku Yowo onathokororya masu awe. Eliya alotcha: "Muluku Yowo onakhula mwa moro, Yowo tori Muluku ". Atchu yamwemererya Eliya, nihiku nothenene alipa-a-miririmo yamwitchana mulukuaya. Yanina erukureryaka ephepaya yanisokola ni miyalo. Nyenya hiwariwoworu moro. Oshekuwa, Eliya areherya ephepawe. Ahaveka atchu wi ehele mahi ephepa ni ikuni. Emanle orikelela mahi, Eliya avekela wa Muluku. V'ohilekela moro warwa Wirimu va ephepa ya Eliya, waheyela ephepa ni mahi. Atchu othene yakhuwela, "Apwiya - ori Muluku".

Eruku Ya Makhumimeli Natcharu 23: Eliya Onaya Wirimu

1 Reis 19:1-21; 2 Reis 2:14

Eliya awipha alipa-a-miririmo othene a Bala ntakhara hiyarino ikuru. Mwara a mwene Acabe, Yezabel ahererya omwipha Eliya. Eliya ahova, atchawela makupa orakamela. Weiwo Muluku akumana ni Eliya. Muluku amanle olotcha ni Eliya harinono wova. Ahititelela wahusiha atchu omukokhorela Apwiya-Muluku mmoharu (Muluku eparipari). Muluku amuruma Eliseu wi amukhaviheryeke Eliya. Nihiku nimoha yetchaka vamoha, ekharo ya makereta ya moro yarwa Wirimu emukusha Eliya. Eliseu hamonnetho Eliya.

Eruku Ya Makhumimeli Nasheshe 24: Eliya Ni Mose Vamoha Ni Yesu

Luka 9:28-36

Ivinre miyakha masana mathanu nameli (700) a mahiku a Eliya, mu elukuluku ya Yesu, Yesu ahakusha ohuseryawe araru (okhovelelanano) ayano omwakoni ovekela. Yesu arikinvekela, Mose ni Eliya arwa wa Yowo. Ohuseryawe araru yawona yawo (Yesu, Mose ni Eliya) esarenye nchichimiho (warya) na Muluku. Muluku va mekheiye alotcha Wirimu ii: "Ola ti mwanaka othanliwa, mwiweleleni Yowo" Anna, Muluku ni Arummwa othene a Israyeli annanthonyera wa Yesu. Yesu orwa v'elaponi wi akhwe ntoko ephepa ya sotcheka sahu ni sotcheka sa atchu othene mu ilukuluku sothene, ntakhara Muluku onatchuna wavulusha atchuawe mwa Yesu Kristo. Yesu ti Mvulusha ahu Yowo Muluku onvihaleiye w'okhwani. Muluku onnavaha okumi wohimala wa yawo anaiwa masuawe ekhapelela ni wiwelela.