unfoldingWord 21 - Pathienin Messia Pêk A Tiem

A tira inthokta khan, Pathienin Messia hung tir a tum ta hrim a nih. Messia hung tir ding thu tiem hmasatak chu Evi le Adam kuoma a nih. Evi thlaa inthoka mi hung pieng chun rûl lu chu a suknawi ding a nih ti’n Pathienin a thu a tiem a. Evi thlêmtu rûl chu Setan a nih. Thutiem umzie chu hung ding Messia chun Setan chu a hne let dêr ding tina nih.

Pathienin Abraham kuomah amaa inthokin khawvêla hnamtin la thawvengin malsawmin um an tih tiin thu a tiem a. Hi malsawmna hi hung ding Messia in hnamtin ta ding sandamna lampui a hung hawngna ding hi a nih.

Pathienin Mosie kuomah Mosie anga zawlnei dang ka hung inngîr ding a ni ti’n thu a tiema. Hi hi khom hi hung ding Messia chanchin a thutiem tho kha a nih.

Pathienin David kuomah Messia chu David thlaa inthok ngeia hung pieng ding a ni ti’n thu a tiem a.

Pathienin zawlnei Jeremi hmangin Israelhai kuoma a thutiem ang kha ni lo, Thutiem Thar a siem ding thu a tiema. Thutiem Thar a chun Pathienin an lungrilah dân thupêkhai chu ziek a ta, mihai chun Pathien hre tang an ta, anni chu a mihai hung ni tang an ta, an suolnahai ngaidam tang a tih. Messia chun Thuthlung Thar chu a siemthar ding a nih.

Pathien zawlneihai khoma hung ding Messia chu zawlnei, thiempu le lal ni kop a ti an tih. Zawlnei chu Pathien thuhai hre a, Pathien thuhai chu mihai kuoma puongdartu a nih. Hung ding Messia chu zawlnei famkim a ni ding a nih.

Thiempu chu mihai ta dinga an suolnahai ngaidam dinga Pathien kuoma inthawina inhlân pêk tu a nih. Thiempuhai chun Pathien kuomah mihai ta dingin an trongtrai bawk hlak. Hung ding Messia ruokchu thiempu laltak niin Pthien kuomah ama ngei chu inthawina famkim in an hlân ding a nih.

Lal chu lalram chunga lalm mipuihai chunga rorêltu a nih. Hung ding Messia chu a thlatu David lalthrungphaa thrungin laltak ning a ta, chatuonin khawvel pumpui chungah inlal a ta, ringum takin ro rêl a ta, thu tlûkna indik siem kumkhuo tang a tih.

Pathien zawlneihai chun hung idng Messia chanchin hi kong tinrêngin an hril lawk a, zawlnei Malaki chun Messia a hung hma chun zawlnei ropui tak a hung hmasa ding a nih tiin a lo hril lawk a. Isai chun messia chu nunghâk thienghlima inthoka pieng ding a ni thu a lo hril lawka. Mika chun Messia chu Bethlehem khuoa a pieng ding a thu a hril bawk a.

Isai chu Messia chu Galili ramah um a ta, lungril rimsihai le intânghai suokna ding le salhai kuoma zalênna dingin thlamuongna thu hril a tih. Isai bawk chun Messia chun dam nawhai sukdam a ta, nasêthai le, mitdelhai dam, trawngtheinawhai le kebaihai khom sukdam a ti a lo ti bawk a.

Isai bawk chun Messia chu a sanbovin theidain um a ta, hnawlin um bok a tih a ti a. Zawlnei danghai khoma, Messia thattuhai chun a silfênhai insemin, thrum vawr an ta, a ruolpan inmantir bawk a tih an tih. Zakari chun a ruolpa chun ama chu an mantir theina dingin tangka 30 lang a tih tiin a lo hrillawk bok a.

Zawlneihai khoma Messia thi ding dân an lo hril lawk seng a. Isai chun chil sâk khumin nuizat siemnân hmang an ta, vuong an tih a lo ti a. Chun a nakah sun an ta, thinglêrah khaiin a thi ding a ni thu khom a lo hril lawk bawk a.

Messia chu suol nei lova, mi famkim a ni ding a nih. Mihai suolna laa hremna tuorin a thi ding a nih. A tuorna lei chun mihriemhai le Pathien inkâr a chun inremna intlun a tih. Hi hi lei hin Messia vuok nawia a um chu Pathien lawm zawng a nih.

Messia thi ding thu chau puong lovin Pathienin thinaa inthawkin a kei tho nawk ding a nih tiin zawlneihai chun an lo hril lawk a. Messia thina le a thonawkna lei chun Pathienin sandamna lampui a lo siemna chu sukkim ni tang a ta, Thuthlung Thar an tran ding an tah.

Messia hungna ding thu hi zawlneihai kuomah Pathienin thiltam takin a lo inentira chu Messia kha a la hung el nawh a. Hril lawkna tawp tieng kum 400 nêka tam a fe hnungin, a hun bi a hung kim chun Pathienin Messia chu khawvêla hin a hung tir chau a ni kha.