Talenu, Ivwililenu Na Kuyoya 4 Mukanda Wamuchiwana - Vangamba Ja Kalunga

Kulumbununa

Tunamimeneka mwane musana wuno. Kalunga atuzanga tuvosena kaha nawa eji kutulamanga nawa. Kavumbi nakalemesa kamutela zangi yenyi yinatulingisa etu kumuzachila na kumwononoka ikiye. Jino ivwililenu, mwane mwivwenga evi vyasolokele kumyaka yakunyima nganomu vachisoneka mukanda wa Kalunga, utale nawa meso ove hamuvwimbimbi mu mukanda waulombo wa usungwa. Omu nawivwa chivumo numba walumune muvwimbimbi unahatemo. (Kwimba)

Muvwimbimbi watete (1) Tanga nayichina zala yakalombolombo

Lute 1:1 - 5

Kalunga ikiye atengele vatu vosena, oloze vamwalumukilile. Kalunga asakwile vaIsalele vamutachikize nakulifukulanga kuli ikiye mwomwo avazangile. Ahakile lushiko navakiko kusolwesa upahu wa likoji lyenyi muli Isalele kuli vakakaye vosena. Asakwile vaIsalele mangana atohwese lijina lyenyi ivene mukachi kamafuchi osena. Oloze halwola lumwe, lifuchi lya Isalele lyamuvulu mwinenga Kalunga. Kaha hinavalifukula kumakombelo nakutulunga vaze vakuhumikiza nganomu alingilenga mafuchi akwavo aze avanyengumukile. Kalunga anehele majita na jizala yakalombolombo hali va Isalele mangana avanehe cheka kuli ikiye. Kwapwile zala yakalombolombo tanga yimwe yafuminemo muze mulifuchi nakuya kulifuchi lyava Mowave vakawaneko kulya. Vatwamine mulifuchi lya vaMawove myaka likumi. Sevo afwilile kuze. Vana venyi vamalunga vavali vambachile mapwevo javo vavali vakuli vaMowave. Hakushimbula nakutwama navaze vana nawa vafwile. Jino nevo navaze vane yewenu jenyi vavali vasalile muze mulifuchi lyaungeji. (Kwimba)

Muvwimbimbi wamuchivali (2) Nowemi na Lute nava hiluka ku Isalele

Lute 1:6 - 22

Nowemi ikiye apwile nevo yatanga yize yatwamine mulifuchi lya Mowave. Mapwevo javana venyi vapwile va Mowave. Majina avo apwile ou Lute mukwavo Opa. Nowemi ashinganyekele kuhiluka cheka kulifuchi lyenyi. Hakuhiluka Lute na Opa vayilenga nenyi. Hakuvamona, avahulishile ngwenyi, “Mwomwo ikaze muli nakwijila nayami? Ami nangukwapwa cheka navana navakapwa malunga jenu? Hilukenu kwimbo, enu vana va napwevo; Ami nawa ngunakolo lyehi kangweshi kupwa cheka na lunga. Kalunga nangutalisa lyehi nyima.” Opa amusweswenyele Nowemi ahilukile ayile cheka kuli visemi jenyi. Oloze Lute amukakachilile Nowemi na kumwamba ngwenyi, “Kanda unguhilwisa amiko. Kweshokwo nauya vene nayami nanguya nove, oku naukatwama kukiko nanguka twama nayami. Vatu jove navakapwa vatu jami, Kalunga kove Kalunga kami.” Ngocho Lute ayile na Nowemi ku Mbetelema mulifuchi lyava Yuta. (Kwimba)

Muvwimbimbi wamuchitatu (3) Lute mwahela muwande

Lute 2:1 - 23

Nowemi na Lute vakalikijile chikuma. Lute ambile kuli Nowemi ngwenyi, “Imana tuhu nguyenga mumawande nakutondatonda vize vanasezeseze hakuhelahela kuli weshowo mwapwa nakeke yakungwitavila kuhela.” Ayile muwande muze awanyine vaka-kuzata valinakuhela jimbuto. Mwenya uze wande apwile ikiye Mbowaze. Ahulishile vaka-kuzata muwande wenyi hali ou pwevo mukalifuchi lyeka ali muwande wenyi. Vakiko vamukumbulwile ngwavo, “Ou mwana pwevo nafumu kuli va Mowave neza na Nowemi.” Mbowaze evwile lyehi likoji lize asolwelele kuli nayewenu. Amumwene nawa ngwenyi ou mwana pwevo napu nyamalikita. Kaha ahanjikile kuli Lute ngwenyi, “Achitwame kuno nava ka-kuzata jami vama pwevo. Talanga kuze navazachila malunga, vali nakuhela muwande. Oloze kava vana vama pwevo munyima.” Avalwezele malunga vaze vazachilenga muwande wenyi kuhona kumulinga mwamupi, shina vamuseleko manona aze vapwilenga nakuhela muze muwande. Haufuku vene uze Lute amuhichililemo Nowemi likoji lya Mbowaze. Nowemi ambile ngwenyi, “Kalunga amukisule! Uze lunga apwa kausoko wetu.” (Kwimba)

Muvwimbimbi wamuchiwana (4) Lute na Mbowaze kuchi zungwilo

Lute 3:1 - 18

Likumbi limwe Nowemi ahanjikile kuli Lute ngwenyi, “Ove mwanami, ngwatela ngukuwanyineko zuvo yove muze nauyoyelanga. Mbowaze ikiye kausoko ketu. Ufuku walelo mwapwa kuchizungwilo nakupepa muzungu. Liwahise sana likwite maji ove, vwala kuvwala chove chamwaza. Kaha shikumuka ku chizungwilo. Omu mwaya nakusavala utachikize kweshokwo mwasavala, yako ukamufukunune chikoki kaha uka savale kumahinji enyi. Mwakakulweza mwakulingila.” Lute alingile nge omu amulwezele Nowemi. Amu Mbowaze ahindukile amwene Lute kumahinji enyi, atachikijile ngwenyi Mbowaze mwamumbata kupwa puwenyi, mwomwo echi chikiko chapwilenga chisemwa chava Isalele hamakumbi aze. Kachi nge lunga mwafwa muli va Isalele, kausoko wauze nafu nahase kumumbata uze tuliwe. Shikaho Mbowaze ahanjikile kuli Lute ngwenyi, “Kanda mwivwa womako. Nangukulingila vyosena naulomba. Ove vakuhana kalemesa kuli vosena vatwama muno mwimbo.” (Kwimba)

Muvwimbimbi wamuchitanu (5) Mbowaze navakulwane vamu mbetelema

Lute 4:1 - 22

Mbowaze avasanyikile vakulwane vosena kuchikolo cha kuMbetelema. Kwapwile umwe kausoko nawa asakile kumumbata Lute, oloze vosena valitavijile ngwavo Mbowaze atela kumumbata vene ou Lute. Kusoka chivwasano, kausoko kenyi azulile sapato nakumuhana Mbowaze. Echi chapwilenga chisemwa mukachi kavaIsalele. Ngocho Mbowaze ambachile Lute kupwa jino puwenyi. Vasemene mwana walunga ikiye ovete. Mapwevo vahanjikile kuli Nowemi ngwavo, “Vamulemesenga Yehova ou nazeneka kumina muzukulu wakukulama ove. Apwenga wapuho nakwalumuna cheka kuyoya chove na kukulama ha ushinakaji wove. Hali nokowenu lyove ou nakuzange ove wamwemwene kuli ove kuhambakana vana vatanu navavali, naseme.” Ovete, ikiye apwile kaka ya Ndavichi, mwangana wamunene wava Isalele. (Kwimba)

Muvwimbimbi wamuchitanu naumwe (6) Maliya na kangelo kaKalunga

Luka 1:26 - 38; 2:1-7

Hakuhita cha myaka kufuma hali kuli Lute, Kalunga asakwile nawa pwevo mukwavo amuzachile. Lijina lyenyi apwile ikiye Maliya. Apwile wakufuma kutanga ya Lute. Maliya apwile mujike. Vamushikile kumumbata kuli lunga walijina lya Yosefwe. Oloze shimbu kanda valimbate, kangelo ka Kalunga alisolwele kuli Maliya. Amwambile ngwenyi, “Kanda wivwa womako, ove Maliya, ove unawane uselewa kuli Kalunga. Yove naupwa na mwana naukasema nawa mwana walunga, ukamaluka lijina lyenyi Yesu. Mwakapwa wamulemu, navakamuvuluka ngwavo mwana wa ou alitulaho. Wangana wenyi kaweshi kukeza kuka kumako.” Maliya amuhulishile uze kangelo, “Echi nachikasoloka ngachilihi, mwomwo ami ngumujike?” Uze kangelo amukumbulwile ngwenyi, “Shipilitu Wajila mwakeza hali ove, kaha ngolo ja ou alitulaho najikapwa hali ove. Shikaho ou wajila mwakasemuka navakamuvuluka ngwavo Mwana Kalunga.” Maliya ahanjikile ngwenyi, “Ami ngundungo yamwata wami. Chipwenga vene nganomu unahanjika kuli ami.” Maliya emichile lijimo kaha asemene mwana wa lunga. Amulukile ngwenyi ikiye Yesu. Omu mukiko apwile Maliya naye yaYesu, apwile wakutuma kafuma kuli Kalunga. (Kwimba)

Muvwimbimbi wamuchitanu nayivali (7) Hana mwalomba kuli Kalunga

1 Samwele 1:1 - 20

Hakukuma chamakumbi aze a Lute, kwapwile cheka pwevo mukwavo mulifuchi lya Isalele, apwile ikiye Hana. Apwile pwevo lya Elekana. Lunga lyenyi amuzangilenga chikuma, oloze Hana kawahililengako. Mwomwo kamu semenene vana lunga lyenyiko. Elakana apwile na pwevo mukwavo, lijina lyenyi Penyina, apwile navana. Ikiye amusawilenga nakumuhenda Hana mwomwo Yehova kamuhanyine lusemoko. Hamwaka hamwaka vayilenga kutembele ya Kalunga yapwilenga ku Shilo. Vambachilenga mawana, na vyakulumba kuli Kalunga. Jino Hana ayilenga kutembele nakulomba nakulilanga kuli Kalunga. “Ove Kalunga, kachi nge naukangwanuka ami nakunguhana mwana, nangukamuhana kuli ove makumbi osena mwakayoyonga.” Mivumbo yenyi yandendele omu ahanjikile na Kalunga. Oloze vize apwile nakuhanjika kavyevwikileko. Jino uze kapilishitu Eli amumwene Hana, amushinganyekelele ngwenyi ou pwevo napende. Omu amutenukilile, Hana amulwezele kapilishitu ngwenyi ngwapwanga nakulomba mwomwo nguli nachiteli kumuchima wami. Eli amukumbulwile ngwenyi, “Yako mukuunda, kaha Kalunga kavaIsalele akulingile nge omu unalombela kuli ikiye.” Kalunga evwile kulomba cha Hana, omu mwahichile makumbi amwe apwile nalijimo asemene mwana walunga. Amulukile ikiye Samwele. (Kwimba)

Muvwimbimbi wamuchitanu nayitatu (8) Kanyike Samwele mutembele ya Kalunga

1 Samwele 1:24 - 28; 1 Samwele 2:12 - 21; 1 Samwele 3:1 - 21

Shimbu apwile Samwele achili kanyike, naye Hana amuhanyine kuli Kalunga. Ikiye amutwalile ou mwana kuli Eli mutembele yakushilo. Eli atwaminenga nauze kanyike muzuvo yaKalunga. Amu nangwilenga Samwele kuzachila Kalunga. Kapilishitu Eli apwile navana vamalunga vavali tupilishitu, oloze vapwile na kulinga mwamupi. Hakuvulumuna chavo, Kalunga kahanjikilenga cheka kuli vatuko kuhichila muli ava tupilishituko. Omu Samwele apwile nasavala lyehi mutembele ya Kalunga. Kalunga amusanyikile, “Samwele! Samwele!” Samwele alahilile kuli Eli etavile ngwenyi, “Yami uno; unangusanyika ami.” Oloze Eli amulwezele ngwenyi, “Kangwakusanyikileko; yako ukasavale.” Chasolokele mapapa katatu. Jino Eli atachikijile ngwenyi Kalunga ikiye apwanga nakumusanyika Samwele. Amulweze Samwele k umukumbulula Kalunga; ngwenyi, “Hanjika ove Yehova, mwomwo ami ngamba yove nguli nakukwivwilila.” Kaha Kalunga amusanyikile cheka Samwele, etavile ngwenyi, “Ijiva kuhanjika ove Mwata, ngamba yove ali nakukwivwilila.” Kalunga amulwezele Samwele ngwenyi linwomu nangusopesa zuvo ya Eli mwomwo ha vilinga vyavipi vyavana venyi. Samwele amuhichililemo Eli omukwachile chimene. Kalunga apwilenga nakushimutwila na Samwele hatando yayivulu. Alingile kupwa jino kapilishitu wamunene, kapolofweto twamina muli va Isalele. (Kwimba)

Muvwimbimbi wamuchitanu nayiwana (9) Samwele mwalombela va Isalele

1 Samwele 7:2 - 14; Kulovoka 20:2, 5

Kalunga ateselemo lushiko luze hali vana vakuhuka vakapilishitu Eli. Vavajihile mujita, kaha vaIsalele vavafungulwile kuli va Fwilishite. Makumi avali (20) a myaka va Fwilishite vayulilenga va Isalele. Jino Samwele ahanjikile kuli vatu vosena, “Lifumisenu tulunga vavaka mafuchi eka, kaha lihanenu kuli Kalunga muzachilenu ikiye kaha mwakamisokola mumavoko ava Fwilishite.” VaIsalele vononokele Samwele. Valikungulwile vosena hamwe kuchihela chimwe. Samwele ahanyine chilumba kuli Kalunga alombelele nawa vaIsalele. Kava Fwilishite valikungulwile valwe jita nava Isalele. Oloze Kalunga atumine vula yayinene chikuma yamalolwa hali va Fwilishite. Vachinyine chiwomawoma, kaha va Isalele vandomene va Fwilishite vosena. (Kwimba)

Muvwimbimbi wamulikumi (10) Samwele mwawawisa Saulu namaji

1 Samwele 8:1 - 10:1

Kalunga ikiye apwile mwangana wamuchano wavaIsalele kaha Samwele atetekelele vatu. Oloze jino vaIsalele vatondele mutu apwenga mwangana wavo, nge omu nawa chapwilenga kumiyachi kwavo vapwile nava myangana javo. Omu Samwele evwile chihande kana kawahilileko. Oloze Kalunga amulwezele ngwenyi, “Keshi nge vanakane yoveko, oloze yami vanakane kupwa ngumwangana wavo. Vevwilile tuhu vahane mwangana.” Kapwile mukweze umwe walijina lya Saulu. Apwile wakutaluka wa chihanga chamwaza kumutala. Likumbi limwe Saulu ayile nakumeneka Samwele. Omu Samwele amumwene ali nakwiza, Kalunga amulwezele ngwenyi, “Ou ikiye lunga mwakayula vatu jami.” Shikaho Samwele ambachile saji yamaji. Ayihingunwine mumutwe wa Saulu. Chinjikizo chakulumbuna kupwa vana musakula apwenga jino mwangana. Saulu ayulilenga vana va Isalele myaka makumi awana (40). (Kwimba)

Muvwimbimbi wamulikumi naumwe (11) Kalunga mwamukana Saulu

1 Samwele 15:1 - 29

Muchiyulo chamwangana Saulu, vaAmaleke vazangamishile vaIsalele mujila jajivulu. Kaha Samwele amulwezele mwangana Saulu ngwenyi, “lvwa mazu anafumu kuli Kalunga. Vanongese vaAmaleke vosena na vyosena vatwama navyo vin ongese; kanda mukasezaho chuma chavo na chimweko.” Mujita yavo Kalunga apwile kusali ya mwangana Saulu navaIsalele, kaha vahashilenga kuvandoma vaAmaleke. Oloze chipwe tuhu Kalunga apwile kusali yavo. VaIsalele kavononokele mulizu lize avalwezeleko. Vyosena vize vya vaAmaleke vawanyine mujita va Isalele vakiko vavimbachile ngwavo vakamulumbilevyo Kalunga. Mwangana wava Amaleke nawa kavamujihi leko. Valikangile kulizu lize avalwezele Kalunga. Kaha Samwele ahanjikile kuli Saulu, “Mwomwo yove unali pambula kuli vize akulwezanga Kalunga, shikaho nakukane nayove nawa.” Samwele alumukile nakumuseza Saulu. Saulu akwachile kulihina lya Samwele. Kaha lize lihina lyapulikile mulivoko lyenyi. Samwele amwambile ngwenyi, “Yehova napulu lyehi wangana wava Isalele muli ove kuputuka lelo nauhane lyehi kuli mukwenu weka kuzomboka yove.” Saulu ahanyine mawana akulumba kuli Kalunga. Chipwe kononokelenga kalungako. Oloze Samwele mukuyoya chenyi ononokelenga nakuzachila Kalunga mukuyoya chenyi chosena. (Kwimba)

Muvwimbimbi wamulikumi nayivali (12) Yesu muzuvo yaKalunga

Luka 2:41 - 50; 1:35

Samwele ayoyele afwile, mwahichile myaka yayivulu, numba Kalunga himwatuma mwanenyi Yesu hano hamavu nge kanyike muli va Isalele. Asemukile nakupwa mwana Maliya. Omu Yesu ahetele myaka likumi nayivali, Maliya na lunga lyenyi Yosefwe vayile ku Yelusalema. Ikiye ayile navo hamwe. Hakuhiluka chavo, Yesu ajimbalile. Visemi jenyi vamutondele makumbi atatu vejile nakumuwana mutembele ya Kalunga. Ali nakuhanjika nava kakunangula java Yuleya vya Kalunga. Maliya amwambile ngwenyi, “Ove mwanetu, ika unatulingila mangana? Twapwanga nakukutonda iso na yami na kulizakamina.” Yesu amukumbulwile ngwenyi, “Ika mwapwanga na kutondela? Ami ngwatela kuzata milimo yatata muzuvo yenyi?” Omu Yesu apwile kanyike nganomu apwile Samwele, atachikijile ngwenyi nguneza nakuzachila Kalunga. Yesu ejile mangana atwaminyine vatu vosena cheka kuli Kalunga, kaha Kalunga ikiye mwangana wamwenemwene, ikiye twamina yavosena.

Muvwimbimbi wamulikumi nayitatu (13) Ndavichi kafunga wakuhamuka

1 Samwele 16:1 - 13; 1 Samwele 17:34, 35

Saulu ikiye apwile mwangana watete wava Isalele, oloze kononokelenga Kalungako. Kalunga amusezele Saulu, kamukafwilenga chekako. Kwapwile mukweze umwe walijina lya Ndavichi. Ndavichi apwilenga namulimo wakutalanga mikoko ja ise. Afwelelenga Kalunga. Muli ikiye kamwapwile womako. Likumbi limwe ndumba akwachile mukoko. Ndavichi amujihile uze ndumba nakupulula uze makoko. Ahashilenga kwimba myaso ya mwaza hatando yosena ambilenga myaso ya kusangejeka Kalunga. Myaso yize ambilenga vayivulukilenga ngwavo jisamu, tunahase kuyiwana mu mazu a Kalunga, mukanda wenyi. Ndavichi apwile lunga umwe ou Kalunga evwilile kuwaha. Kalunga amusakwile apwenga mwangana wakushisa muli Saulu. Oloze apwile mwangana omu afwile jino Saulu. (Kwimba)

Muvwimbimbi wamulikumi nayiwana (14) Ndavichi na chindundulume chalunga

1 Samwele 17:1 - 54; 2:30

Kwapwile jita mukachi kava Isalele nava Fwilishite, jino muli va Fwilishite mwapwile chindundulume vavulukilenga ngwavo Ngolyate. Ikiye atambakanyinenga ngwenyi, “Sakulenu lunga. Mwahasa kulwa nayami nakungujiha kaha natupwa tuvandungo jenu, kachi nge ami nangu mujiha kaha namupwa muvandungo jetu.” Evwishilenga woma va Isalele. Naumwe pimbi wakulwa nenyi. Ndavichi likumbi limwe ahanjikile ngwenyi, “Ou ka Fwilishite kana ikiye iya numba achikimisa nakwivwisa woma, lizavu lya maswalale jaKalunga wakuyoya?” Kaha Ndavichi kapwile na woma wa Ngolyateko. Atachikijile ngwenyi Kalunga mwamukafwa mangana amujihe uze chindundulume chalunga mwomwo kulwa kana chapwile cha Kalunga shikaho. Jino Ndavichi ayile kuli mwangana Saulu amwitavise ayenga alwenga na Ngolyate kaha mwangana etavile. Ngocho Ndavichi ayile nakulwa na Ngolyate, ambachile lekeni yenyi ahakilemo lilolwa alyashile kumutwe wa Ngolyate, aholokele hamavu kaha Ndavichi amulahilile. Nakumbata washi lize likunga lyenyi nakuvatula mutwe wa Ngolyate. Omu vamwene va Fwilishite vosena ngwavo chindume chavo vanamujihi nafu, lyehi vachinyine. Maswalale javaIsalele vavahangasanyine na kuvahasa. (Kwimba)

Muvwimbimbi wamulikumi nayitanu (15) Saulu mwasaka kumujiha Ndavichi

1 Samwele 18:1 - 19:10

Hakulivanga Saulu awahililenga na Ndavichi mwomwo ikiye alwilile va Isalele, kaha vatu vamuzangilenga Ndavichi. Apwile liswalele wamunene twamina yava Isalele. Va Isalele vasulukilenga nenyi kaha vamukavilenga. Jino Saulu amwivwililenga chipululu Ndavichi. Likumbi limwe omu apwile nakwimba mwaso hakalyalya kenyi kumeso a Saulu. Shipilitu wamupi ejile hali Saulu. Ambachile likunga nakwasa Ndavichi, oloze kalyamukwachileko, lyatuvile hambango. Saulu atwalililengaho lika nakufwila kumujiha Ndavichi. Oloze Kalunga amukingile hakumuhana Yonatane mwana Saulu na vaIsalele vakwavo vamukafweko Ndavichi. Chipwe ngocho Ndavichi achinyine kumeso a Saulu na kuchinyina kwakusuku. (Kwimba)

Muvwimbimbi wamulikumi nayitanu naumwe (16) Ndavichi mwamutetela Saulu

1 Samwele 26:1 - 25; Vaka-loma 12:19

Likumbi limwe Saulu alongesele maswalale jenyi vayenga vakamukwate Ndavichi muze mupambo. Ufuku umwe omu alingile Saulu hanasavala lyehi mutulo navaze apwile navo nawa vanasavala lyehi, Ndavichi nasepa lyenyi Avishayile vengilile muchilombo chava Saulu ufuku nakulivemba. Avishayile asakile amujihe Saulu oloze Ndavichi amuhuhumwine. Amulwezele ngwenyi, “Kalunga mwa zangamisa weshowo mwapihisa ou wenyi asakula kupwa mwangana.” Oloze Ndavichi ambachile likunga na mulondo wa meya uze wapwile ku mutwe wa ikiye Saulu. Omu valingile jino hivana lovokamo lyehi muchilombo, Ndavichi atambakanyine chikuma nalizu lyakukanguka kutonesa maswalale ja Saulu. Ambile kuli Avanale apwilenga nakulama mwangana ngwenyi, “Ove Avanale, kawamulamina mwata woveko. Achitalatale umone. Nyi likunga lya mwangana lilikuli na mulondo uze wameya wapwanga kwakamwihi nayikiye ku mitwe wenyi?” Omu Ndavichi akumishile, ahanjikile kuli Saulu, “Nganomu chinapu likumbi lyalelo ngunapululula mwono wove, shikaho Yehova namono kulema cha mwono wami nakugusokola kuponde yosena.” Ngocho Ndavichi afumineko ayilile mujila yenyi, na Saulu nawa ahilukile kwimbo. (Kwimba)

Muvwimbimbi wamulikumi nayitanu nayivali (17) Ndavichi mwapwa mwangana

1 Samwele 31:1 - 6; 2 Samwele 5:1 - 7:16

Va Fwilishite vejile cheka nakulyasa na va Isalele, jino mwangana Saulu, na mwanenyi Yonatane hamwe navakwavo vana venyi vavajihile kujita. Vatu vamulingishile Ndavichi kupwa mwangana wava Isalele. Atungile nganda yenyi mu Yelusalema. Kalunga ahanjikile kuli Ndavichi ngwenyi, “Tala ami ngwakufumishile kukulama mikoko. Nakukulingisa kupwa umakakuyula vatu jami va Isalele. Jino nangufuma kanyisa lijina lyove, nge mwamajina amalunga vavalemu hano hamavu.” Omu va Fwilishite vevwile ngwavo Ndavichi vanamulingisa kupwa mwangana, vosena valikungulwile vayenga vakalwe nenyi jita. Ndavichi afwelele Kalunga nakulinga mweshomwo amulwezele Kalunga, shikaho va Fwilishite avahopwelenga chikuma. Hakutwalililaho, avafungulwile vaFwilishite vosena. (Kwimba)

Muvwimbimbi wamulikumi nayitanu nayitatu (18) Ndavichi na Mbetesheva

2 Samwele 11:1 - 12:20; Kulovoka 20:14

Likumbi limwe Ndavichi apwile nakutambuka helu lyazuvo yenyi yanganda. Hakutambuka helu lyazuvo yenyi amwene pwevo wamwaza apwile nakusana. Ndavichi amwivilile chipepa omu amumwene. Lijina lyauze pwevo apwile ikiye Mbetesheva. Pwevo lyaUliya ou apwile liswalale mu lizavu lya maswalale ja Ndavichi. Uliya ayile kujita nakulyasa navakakole java Isalele. Jino Ndavichi hakumwivwila chipepa uze pwevo amusanyikile eze kuli ikiye. Asavalile nenyi. Uze pwevo afumine ahilukile kuzuvo yenyi. Jino uze pwevo omu atachikijile ngwenyi ngulinajimo kaha atumine mazu kuli Ndavichi. Nakumulweza Ndavichi atumine nawa mazu, kuli kapitau kamaswalale jenyi vamulweze mangana Uliya amujihise kujita. Uliya afwile kaha Ndavichi jino ambachile uze pwevo lya Uliya. Echi chuma kana Kalunga kevwile nacho kuwahako. Mwana uze watwatwa asemukile kuli Ndavichi na Mbetesheva afwile. Ndavichi alombele kuli Kalunga amukonekele ha hakulinga chuma chaunyengwe ngana. Ndavichi amuvendejekelenga puwenyi Mbetesheva, kaha asavalile nenyi cheka. Asemene cheka mwana mukwavo walunga kaha amulukile ngwenyi Solomone. Jino Kalunga amuzangile Solomone. (Kwimba)

Muvwimbimbi wamulikumi nayitanu nayiwana (19) Tembele ya Kalunga

1 Mujimbu 22:1 - 19

Ndavichi avulumwine kuli Kalunga, oloze ikiye azangilenga Kalunga nakuzanga nawa kumuzachila. Ajinyine kutunga tembele yayinene, nayipwanga ya kuliwanyina vatu nakumulemesa Kalunga. Oloze Kalunga alwezele Ndavichi ngwenyi, “Ove kaweshi kutunga zuvo yalijina lyamiko. Mwomwo yove unamwange manyinga amavulu hamavu kumeso ami. Oloze jino mwanove walunga, Solomone ikiye lunga wakuunda na kunoka, ikiye mwaka-tunga eyi zuvo yami. Nangukamuhana kunoka kufuma kuli vakole jenyi kwosena. Kaha nangukakolesa litanda lyenyi lyawangana, hali va Isalele haya myaka na myaka.” Ndavichi alongesele vyakutungisa zuvo ya Kalunga mu Yelusalema shimbu kanda afwenga. Oloze Solomone ikiye ayitungile. Tembele kana yambachile mwaka yitanu nayivali hakukuma chayo. Yapwile yauhashi hamyaka yayivulu, kaha Ndavichi kavamuvulyamineko. Va Isalele vamulemeselenga Kalunga muze vene mutembele ya muYelusalema mwomwo apwile mwangana wamunene. (Kwimba)

Muvwimbimbi makumi avali (20) Yesu mweza mu Yelusalema

Mateu 21:1 - 11

Mwahichile myaka tununu, kufuma haze afwile Ndavichi, Kalunga amutumine Yesu hano hamavu kupwa nge kemba. Naye mujike Maliya. Yesu apwile ngamba ya Kalunga wamunene. Ikiye anangwilenga muchano waKalunga kuli vatu. Azachilenga nawa vinjikizo navikomowesa mungolo ja Kalunga. Saulu na Ndavichi hamwe na hamwe na tuvosena tunavulumuna mulonga wa shili kumeso aKalunga. Oloze Yesu kavulumwineko. Likumbi limwe anyinyine ha livuvu lya chimbulu omu angilile mu Yelusalema. Vatu vavavulu vayile nakumusesa Yesu nakulikuwa, “Hozana mwana Ndavichi!” Hozana eli lizu lyalumbunuka nge ngwavo ‘kavumbi kapwenga kove’. Kaha nawa vatambakanyine ngwavo, “Atokwa ou mweza mu lijina lya Mwata!” Vatu vamumwene Yesu ngwavo amuhambakana Ndavichi. Mwangana azomboka vamyangana vosena. (Kwimba)

Muvwimbimbi makumi avali naumwe (21) Makololo navamulisa Elija

1 Vamyangana 17:1 - 6

Hanyima ya Ndavichi na Solomone kapwile nawa vamyangana vakwavo vayulilenga va Isalele. Umwe wavo apwile ikiye Ahave. Ou Ahave alingilenga muze mwapihile chikuma kumeso a Kalunga. Alemeselenga likombelo lya Mbale atungile nawa lijiko lya kulumbila Mbale. Ambachile nawa pwevo wakulifuchi lyeka, apwile ikiye Yezevele, apwile muka-kulinga mwamupi. Ajihishilenga vangamba ja Kalunga nakushinjila vatu vapwenga nakulifukula kumakombelo ambale. Jino Elija apwile kapolofweto wamunene ka Kalunga halwola vene luze. Ikiye ayile kuli Ahave nakumulweza ngwenyi, “Nganomu Yehova, ou Kalunga kava Isalele, ayoya, ngwazachila yami, kakweshi kupwa lyume chipwe vula mu myaka eyi kuvanga hamazu ami kaha.” Kalunga atumine zala yakalombolombo mulifuchi lya Isalele. Ngocho, Kalunga amulaminenga ngamba yenyi Elija. Amutumine ku ngalila yeka vavulukilenga ngwavo kelite. Kuze ahashilenga kunwa meya a mwana kalwiji. Chimene na ufuku chingoloshi makololo vamutwalililenga Elija mbolo na nyama alyenga. (Kwimba)

Muvwimbimbi makumi avali nayivali (22) Elija nakakahya kaKalunga

1 Vamyangana 18:16 - 46

Mumwaka wamuchitatu wazala ya kalombolombo Elija alwezele Ahave asanyike vatu vosena va mulifuchi lya Isalele natupolofweto twavo vaze vazachililenga Kalunga wakulyonga vaMbale, vayenga kupili ya Kalamele. Kaha ahanjikile ngwenyi, “Nge Yehova napu Kalunga kaha mukavenu, kaha kachi nge Mbale nawa napu Kalunga ngocho mukavangizenu.” Naumwe pimbi ahashile kumukumbulula. Jino avalwezele ngwenyi, “Yenu mumbate vakuji javangombe vavanene vavali munehe. Tupolofweto vaMbale vasakuleho umwe wamunene apwenga wana wakulumba. Kanda na mumuhaka hakakalyako. Kaha jino ami nawa nanguwahisa ou mukwavo, ami kangweshi mumuhaka hakakalyako. Kaha yenu musanyika lijina lya Kalunga kenu, ami nawa nangusanyika lijina lya Kalunga kami. Kalunga owo mwakumbulula mukakahya. Kaha ikiye vene Kalunga.” Vatu vamwitavilile. Ngocho tupilishitu twambale vamusanyikile Kalunga kavo likumbi lyosena. Vakinyinyine kulijiko lyavo lyakulumbila, nakuli tuva najipoko vavene. Oloze kakahya kapwile kauchi. Ha chingoloshi Elija nawa awahishile uze chimuna chenyi. Amuhakile halijiko kaha alwezele vatu vamumwangile uze chimuna meya amavulu chikuma jikunyi josena japwile mumeya kaha. Alombele kuli Kalunga. Kukasumuka kakahya kaholokele kufuma mwilu hali uze chimuna cha Elija. Kochele uze wana wakulumba wa Elija najikunyi na meya hamwe. Jino vatu vapwile kuze vatambakanyine na mazu akukanguka ngwavo, “Yehova ikiye Kalunga!” Haze vene Kalunga atumine vula nazala yakalombolombo yakumine. (Kwimba)

Muvwimbimbi makumi avali nayitatu (23) Elija mwaya mwilu

1 Vamyangana 19:1 - 21; 2 Vamyangana 2:1 - 14

Elija ajihile tupilishitu twaMbale vosena mwomwo vapwile vipapoki. Pwevo lya mwangana Ahave Yezevele azalile na kole yakujiha Elija. Ngocho Elija evwile woma, achinyine nakuya kwakusuku mupambo. Kaha kuze Kalunga alisolwele kuli ikiye. Omu Kalunga akumishile kuhanjika na Elija muli ikiye, jino kamwapwile cheka womako. Ikiye atwalilileho nakunangula vatu valifukule kuli Kalunga umwe kaha wamuchano. Kwapwile nawa lunga mukwavo lijina lyenyi apwile ikiye Elisha. Halushimbi lwaKalunga ikiye apwile muka-kukafwako Elija. Likumbi lumwe vosena vavali vapwile nakutambuka hamwe, litemba lyejile lyakakahya mukachi kavo. Kalunga amumbachile Elija mukakundukundu nakumutwala mwilu. Elisha kamumwene cheka Elijako. (Kwimba)

Muvwimbimbi makumi avali nayiwana (24) Elija na Mose hamwe na Yesu

Luka 9:28 - 36

Myaka makulukaji atanu na avali (700) hakukuma chayo hali Elijah, omu Yesu apwile hano hamavu. Likumbi limwe ayile natumbaji twenyi vatatu kupili nakulomba. Va Mose na Elija, tupolofweto vavali ja Kalunga vasolokele. Vaze tumbaji vatatu vamwene upahu wakumunyika hali vakiko. Kalunga himwahanjika kuli vakiko nalizu lyakufuma mwilu ngwenyi, “Ou ikiye mwanami ngwasakula, mwivwililenu ikiye.” Yesu ejile hano hamavu nakulwila vatu vosena kaha afwile kupwa chimuna wakuvatula hashili yetu najishili javatu vosena nawa vamiyachi yosena, mwomwo Kalunga nazange kulwila vosena kuhichila muli Yesu, ikiye umwe atumine. Yesu ikiye vene mulwilo wetu ou Kalunga ahanyine ulemu hakusanguka kufuma kuvafu. Kalunga ikiye mukakuhana kuyoya chachihya kuli vosena nawevwa lizu lyenyi, na kumufwelela, nakumelemesa ikiye. Ikiye azanga atwame nayetu mukuyoya chino tuli nacho na chize nawa chili nakwiza kulutwe cha haya myaka yosena.