Look, Listen & Live 4

Bia Hmai Thi

Ka dua le hna! Pathian cu a mah nawl a ngai i a rian a tuanmi hna lawng kha a dawt hna i a hnak kar ah a tenh peng hna. Hi a hman i a dik mi tuanbia hna hi hmanthlak cauk na zoh pah in ngai hna law theihternak 'Aw' na theih fate a changtu hmanthlak dang kau i zoh philh hlah.

Hmanthlak pakhatnak: Inchungkhar kharkhat mangtam ruang ah ramdang ah an zam

Ruth 1:1-5

Pathian nih mi vialte cu a rak ser hna. Sihmanhselaw amah kha an kal tak. Cu cun Pathian nih Israel mi hna kha amah zul ding ah le bia ding ah ai thim hna. A si nain Israel mi hna zong nih cun an kal tak ve i siasal le a dik lo mi pathian hna kha an va biak. Pathian nih Israel mi hna cu amah sin ah an kir than awk kha a duh hna. Cu caah ral le mangtamnak hna kha an sin ah a rak tlun ter. Inchungkhar pa khat cu mangtam ruang ah Moab timi ram ah an kal. Moab ram ah kum hra chung an um hnu ah hringtu an pa cu cu ka ram ah cun a thi. An fapa pa hnih nih Moab ngaknu an thit hna. Cu fapa pahnih hna zong cu an thi ve i an nu cu a fapa pahnih hna nupi he Moab ram ah cun a tang.

Hmanthlak pahnihnak: Naomi le Ruth Israel ah an kir

Ruth 1:6-22

Mah cu chungkhar an nu cu Naomi a si. A fapa le nupi hna cu Ruth le Orpah an si. Noami cu Israel ram kir than awk ah ai tim. Ruth le Orpah hna nih an zulh. Naomi nih a fanu le hna sin ah hi tihin a chimh hna. “Ka fa le nan nu le nan pa hna sin ah kir cang ko u, ka zul duh ti hlah u. Israel ram ka phak tik ah nanmah an thi kho dingmi fapa kan hrin piak kho hna lai lo. Hi ram ah hin cun Bawipa nih a hmai a ka chit lo,” tiah a ti hna. Orpah nih cun anu Naomi kha a biang ah a hmanh ta i a nu le a pa sin ah a kir than. Ruth tu cu anu Naomi ban ah ai awk i, “Ka nu kir cu rak ka fial hlah, na kalnak paoh ah kal ve ka duh. Na miphun cu ka miphun an si lai i na biakmi Pathian zong ka biak ve lai” tiah ati. Cu ti cun Naomi cu Ruth he Israel ram ah an kal ti.

Hmanthlak pathumnak: Ruth cu facang tuannak lo ah rian a tuan

Ruth 2:1-23

Naomi le Ruth cu an si a fak ngai ngai. Nikhat cu Ruth nih a nu sin ah a kal i, “Ka nu, facang tuannak lo ah ka kal ter. Rawl an kal tak mi ka va khawm lai” tiah a nawl. Ruth cu lo pakhat ah a phan. Cu lo ngei tu cu Boaz ti mi pa a si. Boaz nih a lo i ara mi ramdang nu khi a hodah a si tiah a riantuantu hna kha a hal hna. An nih nih hi ngaknu hi Naomi he a ra mi Moab mi phun Ruth asi tiah an leh. Ruth cu anu Noami cung ah a that zia kha Boaz nih a theih. Riantuan kha teimak tein a tuan kha a hmuh tik ah Ruth sin ah a thawh i, “facang tuan tu hna sin ah rawl tuan dih tiang um ve ko” tiah a ti. A rawl tuan tu hna sin ah Ruth kha tha te in zohkhenh awk ah le amah caah rawl hna kha kal tak pah awk ah a chimh hna. Zanlei inn a tlun tik ah anu sin ah Boaz nih a cung ah vel a ngeih zia kha a chimh. Naomi cu ai lawm tuk i, “Bawipa nih thlawchuah pe ko she, a mah cu kan chungkhat a si” tiah thla a cam.

Hmanthlak pali nak: Ruth cu Boaz lo ah a riak

Ruth 3:1-18

Israel ram ah hin nupi a ngei mi pa a thih tik ah amah he ai neih mi pa nih a thihtak mi a nupi kha a thit khawh. Ni khat cu Naomi nih Ruth sin ah hitihin a chim. “ Na caah va kan kawl piak lai i cu cun nangmah tein inn le lo he na um kho lai. Boaz hi kan chungkhat asi” tiah a ti. Nihin zanlei ah Boaz facang a zap lai. Thiang tein i khawlhtawl law na thil tha bik mi i hruk hna. Cun Boaz riantuan nak ah na va kal lai. Zanriah a ei dih tik ah Boaz khawika ah a ih kha tha te in na va ngiat lai. A hngilh tik ah a ke hram te ah na va it te lai,” tiah bia a cah. Ruth nih anu Naomi chim bantuk te in a tuah. Zing lei Boaz ai thangh tik ah Ruth a kei hram ah a ih ko kha a hmuh. Ruth nih a va ah ser a duh kha fiang te in a theih caah hi ti hin a chimh. “Ruth, na ka hal mi paoh kan al lai lo. Zei caah tiah nangmah cu mitha na si kha aho paoh nih an in theih dih mi na si” tiah a ti.

Hmanthlak panga nak: Boaz nih Bethlehem khua hruaitu hna a auh hna

Ruth 4:1-22

Boaz nih Bethlehem khua upa pahra hna kha khua kutka ah a auh hna. Ruth hi a dang chungkhat asi mi pa nih thit awk a si ko nain Boaz tu nih thi ko she tiah an hna a tla cio hna. An hnatlaknak langhter nak ah Naomi chungkhat pakhat nih Boaz kha a kedan a pek. Hi hi Israel mi hna nunphung a si. Cu cun Boaz nih Ruth kha a thit colh. Obed timi fapa an ngeih. Minu pakhat nih Naomi kha hi tihin a hnemh. “Bawipa nih nangmah zohkhenh tu ah tupa an pek. Ruth zong nih an dawt tuk. Ruth hi na caah fapa pasarih nakin a sung deuh” tiah a ti.
Hawi le hna, Ruth cu Pathian le a miphun caah rian a tuan tik ah a lung a si tuk. Obed hi Israel siangpahrang David i a pu a si.

Hmanthlak paruk nak: Mary le Pathian vancung mi

Luke 1:26-38

Ruth a thih hnu chan tampi a liam hnu ah Pathian nih ngaknu pakhat kha amah riantuan tu ah a rak thim. A min cu Mary asi. Mary cu Ruth hrinsor asi. Mary cu nuthiang asi. Joseph an timi pa he an rak i ham cang. An i thit hlan ah Pathian vancungmi pakhat Mary sin ah a lang i hiitihin Mary kha a chimh. “Tih hlah Mary! Pathian na cung ah ai lawm. Fapa na hrin lai i Jesuh tiah min na sak lai. Amah cu cungnung bik Pathian fapa a si lai. Mary nih hi tihin a leh, “Keimah cu Bawipa salnu ka si. Na chim bantuk in cang ko seh” a ti. Cun Pathian thlarau cu Mary sin ah a ra. Fa a pawi i fapa a hrin. Cu ti cun Mary cu Pathian fapa Jesuh i a nu a si.

Hmanthlak pasarih nak: Hanah cu Pathian sin ah thla a cam

1 Sam 1:1-20

Ruth a thih hnu ah Israel ram ah hin Hannah ti mi nu a rak um. A va nih a dawt tuk ko nain fa a ngeih lo ruang ah a lung re a thei. Hannah le a in chung pa cu kum fate Shiloh khua Pathian biak inn ah an kal i Pathian sin ah rai an thawi, thawhlawm an pe tawn. Nikhat cu Hannah nih Pathian sin ah hi ti hin thla a cam. “Bawipa, na salnu hi na ka philh lo i fapa na ka pek asi ah cun a nun chung na rian tuan ding ah kan pek lai,” tiah bia a kamh. Pathian sin ah thla a cam lio ah hin a aw a chuak kho lo, a hmur a thir dih kha tlangbawi Eli nih a hmuh tik ah zuu a ri rua tiah a zumh. Bawipa nih Hannah thlacam nak kha a theih piak i fapa a hrin. Afa cu Samuel tiah min a sak.

Hmanthlak pariat nak: Hngakchiapa Samuel cu Pathian inn ah a um

1 Sam 1:24-28, 2:12-17, 3:1-21

Samuel cu a ngakchiat lio te in anu Hannah nih Pathian sin ah a pek i Shiloh khua tlangbawi Eli sin ah a um ter. Eli nih Samuel cu Pathian duhning nun kha a cawnpiak. Eli nih fapa pahnih a ngeih hna. Tlangbawi rian an tuan nain an sual ngai ngai. Cu caah Pathian nih tlangbawi hna hmang in ami hna sin bia chim kha a ngol. Zan khat cu Samuel cu Pathian inn ah a riak. Pathian nih Samuel cu a auh. Eli sin ah a va tli i “Hi ka ah hin ka um ko, na ka au maw?” tiah Eli cu a hal. Eli nih, “Kan au lo, va kal law dai te in va it ko” tiah a leh. Pathian nih Samuel cu vawithum tiang a auh. Eli nih hihi Pathian aw a si lai ti a theih tik ah Samuel kha, “va kal law, bawipa bia chim ko, na sal pa nih ka ngaih ko tiah va let” tiah Samuel cu a fial. Cu hnu cun Pathian nih Samuel sin ah voi tampi bia a chim. Samuel cu Israel mi hruai tu le profet lianngan ah a hong si.

Hmanthlak pakua nak: Samuel nih Israel mi hna caah thla a cam

1 Sam 4:10-11, 7:2-14

Eli fapa hna cu an sual tuk caah Pathian nih dan a tat hna. Philistine ral a doh ter hna i cu raldohnak ah cun an thi. Philistine hna nih Israel mi hna cu ral an tei hna caah kumkul chung an uk hna. Cun Samuel nih Israel mi hna sin ah hi ti hin a chim. “Bawipa sin ah nan kir than i ramdang pathian nan biak mi hna kha nan hlawt hna i Israel Pathian lawng kha nan i bochan ah cun Philistian mi hna sin in an luat ter hna lai” tiah a ti hna. Israel mi hna nih Samuel bia an ngeih. Hmunkhat te ah an i pum i Pathian sin ah raithawinak an pek, thla an cam. Philistine mi hna cu Israel mi hna kha va tuk awk ah an i tim. Sihmanhselaw Pathian nih Philistine ralkap hna sin ah totho fakpi in a hran ter i an tih tuk caah an zam dih. Cucaah Israel mi nih Philistine ral cu fawite in an tei khawh.

Hmanhlak pahra nak: Samuel nih Saul kha chiti a thuh

1 Sam 8:1-9, 9:15 - 10:1

Israel mi hna siangpahrang ngai ngai cu Pathian asi nain Samuel nih amah ai awh in a hruai hna. An pawng um miphun dang hna nih an mah te cio in siangpahrang an ngeih dih cio caah Israel mi hna zong nih mi pakhat kha an siangpahrang si ter i ngeih kha an duh ve. Hi kong a theih tik ah Samuel cu ai lawm lo. Sihmanhselaw Pathian nih Samuel sin ah hitihin a chim. “Israel mi nih an siangpahrang ah an duh lo mi cu nangmah si lo in keimah tu ka si caah an bia ngai in siangpahrang cu pe ko hna usih” tiah a ti. Cu can ah Saul timi tlangval pakhat a rak um. Saul cu a pumrua a tha i amui dawh fawn. Nikhat cu Saul cu Samuel sin len ding ah a kal. Samuel nih Saul a hmuh tik ah Pathian nih Samuel sin ah “Hi tlangval pa hi ka mi hna hruaitu ding cu asi” tiah ati. Samuel nih chiti thol a lak i Saul lu cung ah a tawih. Cucu siangpahrang ah a thim tinak asi. Saul nih kum 40 chung Israel mi hna kha a hruai hna.

Hmanthlak hlekhatnak: Saul nih Samuel puan a thleh

1 Sam 15:1-29

Amalekite timi miphun hi Israel miphun a tihram tawn tu an si. Samuel nih Saul siangpahrang sin ah hitihin a chim. “Pathian sin ara mi bia cu hi hi asi. Amalekite mi vial te hi na thah dih hna lai. An ngeihmi thil vial te zong na hrawh dih lai,” tiah a ti. Pathian bomhnak thawng in Saul le a ralkap hna nih Amalekite mi hna kha ral an tei hna. Asinain Israel mi hna nih Pathian bia kha ngai lo in Amalek siangpahrang an thah lo hlei ah an satil hna kha that lo i Pathian sin raithawinak tu ah an hman hna. Cu caah Samuel nih Saul sin ah hitihin a chim, “Bawipa nawl pekmi na ngaih lo caah Pathian nih nangmah cu siangpahrang sinak in an hlawt” tiah ati. Samuel cu chuah ai timh lio ah Saul nih Samuel puan kha ai tlaih i a tllek. Cun Samuel nih Saul cu hitihin a chimh than, “Pathian nih Israel pennak cu na kut chung in a lak i a thleh dih cang. Nangmah nak in a tha deuh mi pa sin ah a pek cang” tiah a ti.

Hawi le hna, Saul siangpahrang pa nih hin Pathian sin ah raithawinak cu a pek len ko na in a bia a ngai duh lo. Samuel cu a nun chung Pathian nawl ngai bu tein rian a tuan caah Pathian a cung ah ai lawm. Raithawinak nak in nawlngeihnak nih Pathian lung a ton deuh.

Hmanthlak hleihnih nak: Jesush cu Pathian biaknak inn ah a um

Luke 2:41-50

Samuel thih hnu in kumtampi a luan hnu ah Jesuh cu Israel ram ah hngakchia a rak si. Mary hi a nu a si i a pa cu Pathian a si. Jesuh kum 12 asi lio ah anu Mary le Joseph he Jerusalem khua ah an kal. Jesuh cu an sin in a tlau diam i nithum an kawl hnu ah Pathian biak inn ah an va hmuh. Judah biak nak saya pawl he Pathian kong an rak i caih lio asi. Mary nih Jesuh sin ah, “ kan thin a phang tuk i pei kan rak in kawl cu” tiah a ti. Jesuh nih a thawh i “ka pa inn ah pei ka um ko cu” tiah a leh. Samuel bantuk in Jesush zong nih hngakchia asi lio te hin apa rian tuan tu ding a si kha ai hngalh cia ve. Mi vialte kha Pathian sin hruai awk ah a ra. Zei caah tiah Pathian cu cungnungbik siangpahrang a si, mikip hruaitu zong a si.

Side-B Introduction

Pathian riantuantu sal lianngan kan timi hna hi can khat lio ah vawlei cung ah khua a rak sa ve mi mi lianngan hna an si. Atu kan chimmi tuanbia hna nih hin Pathian sal hna zeitin dah Pathian nih thawnnak a rak pek hna ti kha an langh ter. Ralrin peknak aw na theih fate a dang hmanthlak kau in zoh kha philh hlah.

Hmanthlak hleithum nak: Tuukhal pa David

1Sam 16:1-13, 17:34-35

Saul cu Israel siangpahrang a hmasa bik a si nain Pathian nawl a rak ngai lo. Cu caah cun Pathian nih Saul cu a hnu a chit i bawmhnak a pe ti lo. Cu can lio ah David timi ngakchia pa pakhat a rak um. David cu apa tuu a zohkhenh tu asi. Amah cu a nungmi Pathian kha ai bochan i harnak ton zong a tih lo. Nikhat cu chiandeih pakhat nih a tuu pakhat kha a tleih. David nih chindeih kha a thah i a tuu kha thihnak in a khamh khawh. Thanglawi dawh te ai ser i cu cun Pathian thangthatnak hla a sa tawn. David cu Pathian lung a tongmi pa a si. Cu caah Pathian nih David cu Saul siangpahrang rian chawng tu ding ah a thim.

Manthlak hleili nak: David le Goliah

1Sam 17:1-54

Hi lio can ah hin Philistine mi le Israel mi hna ral an i do. Philistine mi lak ah a ngan tuk i a thawng tuk mipa Goliah ti mi a um. Goliah nih Israel mi hna kha, “Nan lak ah a thawng bik nan ti mi pakhat in thim u law a ka thah khawh ah cun kan phun ning in nan sal ka si dih lai. A sinain keimah nih ka thah a si ve ah cun kan sal ah na cang dih lai” tiah a hro hna. Israel mi hna nih Goliah an hmuh tik ah an tih tuk, a hohmanh nih an ngamh lo. Tlangval no te David nih cun a tih lo. Zei caah tiah Pathian nih a ka bomh ko lai tiah a zumh. Cun David nih a thawh i “Aho dah Pathian a zum lo mi Philistine pa cu a si? A nungmi Pathian mi a zuamcawh awk asi lo. Pathian nih a ka bomh lai i, mithawngpa cu ka thah khawh lai tiah a ti. A chhai ai lak i Goliah cal ah thaithlolh in a chaih i Goliah cu vawlei ah a tlu.Goliah pum cung ah David cu a kai i amah vainam lila in Goliah cu hngawng a tan. Cu cun Israel mi nih Philistine hna cu an tei hna.

Hmanthlak hleinga nak: Saul nih David kha thah a zalh

1Sam 18:6 - 23:29

A thawk ka ah cun Saul cu David cung ah ai lawm. Zei caah tiah David cu Israel mi hna kha Philistine ral in a khamh tu hna a si. Israel mi na nih David kha an dawt i an upat. A hnu ah Israel ralkap tha le hruaitu ah a hong si. Cu tik ah Saul cu David cung ah nahchuahnak a ngei i David kha thah a duh. Nikhat cu David nih Saul siangpahrang caah hla a phuah mi a tum lio khuachia kha Saul lungchung ah a lut i David kha feikawl in a hei khawt nain a nganh i vampang tu a khen. Cu hnu zong ah David thah awk ah vawi tampi ai zuam. Saul fapa Jonathan le a dang Israel mi hna nih David cu an bomh. A si nain Saul kut in luat awk a herh caah theserawn ah a zam.

Hmanthlak hleiruk nak: David nih Saul nunnak a zuah

1Sam 26:1-25

Saul le a ralkap hna cu David tlaih awk ah these rawn ah cun an va kal. Zan ah Saul le a ralkap hna an i hngilh lio ah David le a hawipa Abishai hna cu Saul le a ralkap an ihnak ah a thli tein an va lut. Abishai nih Saul ai hngilh lio a hmuh tik ah thah a zalh kha David nih a hmuh i a thlauh. David nih hi tihin a chimh, “Pathian nih ai thim mi siangpahrang harnak a pe tu cu dan a tat hna lai” tiah a ti. Cun David nih Saul lu pawng ah a um mi fei le tithawl kha a lak. Saul te riahnak in an chuah hnu ah David cu a au i, “Nan bawipa tha tein nan veng lo, zoh hmanh u nan bawipa fei cu hika ah hin a um”. David nih Saul kha hi ti hin a chimh. “Nihin ah na nunnak kan zuah bantuk hin Pathian nih ka nunnakcu ka zuah ve ko seh” tiah a ti. Cu thawk cun Saul nih David thah awk a zuammi kha a ngol.

Hmanthlak hleisarih nak: David cu siangpahrang a hong si

1 Sam 31:1-7; 2 Sam 5:1-25, 8:1-15

Phlistine mi nih Israel mi kha an tuk than hna. Cu ral an tuk nak ah Saul le Jonathan an thi. Saul a thih caah David cu Israel siangpahrang asi. David nih a siangpahrang inn kha Jerusalem khua ah a sak. Pathian nih David cu hi tihin a chimh, “Ka miphun Israel mi hna hruaitu ding ah tuu na khalhnak in kan lak. Adang mi lianngan hna ban tuk in mi lianngan ah kan ser ve lai” tiah a ti. Cu cun Pathian nih David cu lianghnagannak a pek i Israel mi hna ral vialte tei kho ding in thawnnak zong a pek.

Hmanthlak hleiriat nak: David le Bathsheba

1Sam 11: 1 - 12:20

Nikhat ah David cu siangpahrang inncung i ai chawh lio ah nungak dawh ngai mi ti ai khawlh lio kha a hmuh. Cu nungak cu sualpi awk ah David cu a hiar tuk. Hi minu hi a min ah Bathsheba a si i David ralkap bawi pakhat Uriah ti mi pa nu pi a si. Cu lio cu Uriah ralram ah a um lio a si. Daviid nih Uriah cung ralbawi sin ah Uriah hi raltamnak ah kuat i ral kut in thih ter awk ah a chimh. Uriah cu a thi i anupi cu David nih a nupi ah a tuah. David thilsual a tuah mi ruang ah Pathian ai lawm lo. Cu caah Bathsheba he an fa tir a thi. David nih a thilsual tuahmi caah Pathian sin ah ngaihthiam a hal.

Hmanthlak hleikua nak: Pathian biaknak inn

2 Sam 7:1-29; 1 Chr 22:1-19

David cu Pathian sin ah sualnak a tuah nain Pathian kha a dawt i a rian tuan zong a duh thiam thiam. Cu caah cunPathian caah biaknak inn nganpi sak a tim. Sihmanh selaw Pathian nih David sin ah, “David, nangmah cu minung tampi thi na luan ter caah ka caah biaknak inn cu na sa kho lai lo. Fapa na ngei lai i nafapa Solomon tu nih ka caah biakinn cu a sak te lai. A caah pennak ka ser piak lai. Cu pennak cu a zungzal in a hmun lai” tiah a chimh. David nih Biakiin saknak thingrua a nun chung a damh i a khawn. A sinain Solomon hi innsa tu cu asi. Solomon nih kum 7 chung a sak i ai dawh ngai ngai. Cu Biakinn cu Israel mi hna nih kum za tam pi Pathian an biaknak. A sinain David cu an siangpahrang ngan bik a si kha an philh kho lo.

Hmanthlak pakul nak: Jesuh Jerusalem khua ah a lut

Matt 21:1-11

David a thih hnu kum 1000 hrawng ah Jesuh cu a chuak. Amah cu David hrinsor a si. Apa cu cungnung bik Pathian a si. Anu cu ngaknu thiang Mary asi. Jesuh cu Pathian riantuan tu sal lianbik a si. Mi hna kha a dikmi Pathian kong a cawnpiak hna. Khuaruahhar tampi zong Pathian thawnnak in a tuah. Saul, David le kan dihlak in Pathian hmai ah a sual dih mi kan si. A sinain Jesuh cu sualnak pakhat zong a tuah bal lo. Ni khat ah Jesuh cu laa cit bu in Jerusalem khua ah a lut. Mipi nih an don. “Hosana! David fapa, Pathian min in ara mi cu thangthat le sunpar co ko seh” tiah an au. Mi vialte nih Jesuh cu David siangpahrang nak in a lianghnagan deuh kha an hmuh. Vawlei cung siangpahrang vialte cung siangpahrang asi.

Hmanthlak kulkhat nak: Langak hna nih Elijah rawl an chanh

1Kings 16:29 - 17:6

David le Solomon hna hnu ah Isral ram cu siangpahrang tampi hna nih an uk. Siangpahrang pakhat pa min cu Ahab asi. Anupi cu Jezebel a si i a sual ngai mi a si. Hi nu nih hin Pathian zum mi mitampi a rak thah hna. Cu lawng si lo in Baal timi milem pathian kha a hringhram lo in a biak ter hna. Cu lio can ah Elijah cu Pathian prophet lianngan a rak si. Elijah cu Ahab sin ah a va kal i, “A nungmi Israel Pathian thawnnak thawng in a ra lai mi kum 3 chung Israel ram ah ruah a sur lai lo” tiah a va chim. Cu ti cun Pathian nih Israel ram ah mangtam fak pi in a tlun ter. A sinain a salpa Elijah cu Pathian nih a zohkhenh. Tiva te in ti a din khawhnak Cherith timi hmun ah a um ter i nichiar te langak hna nih rawl a chanh tawn.

Hmanthlak kulhnih nak: Elijah le Pathian mei-alh

1Kings 18:16-39

Mangtam kumthum nak ah Elijah nih Ahab siangpahrang le a mi hna kha Carmel tlang ah a auh hna. Elijah nih hi ti hin a chim, “Bawipa hi Pathian asi ah cun amah hi zul u law bia u, asi lo ah Baal hi pathian asi ah cun zul u law bia u,” tiah a ti hna. Baal pathian sin raithawi nak caah cawtum pakhat kha an thah. Cun Elijah nih Baal saya hna sin ah, “nan pathian kha au u law kei zong kan pathian kha ka auh ve lai. Mei-alh in kan auhnak a kan let tu paoh hi Pathian hman cu an si lai,” tiah a chimh hna. Baal saya hna cu chun-ni-tlak in an raithawinak an kulh i an lam, thla an cam i an pathian cu an auh, an mah le an mah kha nam in an i at. Si hmanh selaw mei-alh a bal ra lo. Zanlei sang ah Elijah nih a Pathian sin ah raithawnnak cu a timhtuah ve. A raithawi nak sa cu ti ah a hnim ta hnu ah thla a cam. Chikkhat te ah van cung in mei-alh a hong tum i raithawinak sa le ti cu an kang dih. Cu cu an hmuh tik ah mipi hna nih an i thawh i, “Bawipa cu a nungmi Pathian asi” tiah an au.

Hmmanthlak kulthum nak: Elijah cu vancung ah a kai

1Kgs 19:1-21; 2Kgs 2:1-14

Baal saya hna cu an sual tuk caah Elijah nih a thah dih hna. Cu caah Jezebel nih Elijah cu kan thah ve lai tiah a tlerh. Elijah nih a tih caah ramlak theserawn ah a zam. Cu ka ah cun Pathian nih Elijah cu a va ton tawn. Cun Elijah nih a tih ti lo. Mi hna kha a hman mi Pathian pakhat lawng biak awk ah a cawnpiak hna. Elisha kha amah bawmtu ah a thim. Nikhat cu an pahnih in lam an len lio ah vancung in mei-alh rangleng ahong tum i an kar ah a lut. Elijah cu pusim nih vancung ah a cawi caah Elisha nih a hmu kho ti lo.

Hmanthlak kulli nak: Elijah cu Jesuh le Moses le tiah an lang ti

Luke 9:28-36

Jesuh chan lio ah Elijah hi vawlei ah a rak ra than. Nikhat cu tlang cung ah Jesuh le Moses he hmunkhat ah a mui a hong i langh. Hi mi lianngan hna cu Pathian sunparnak in an ceu kha minung pathum hna nih an hmuh hna. Cu lio te ah Pathian nih van cung in bia a chim, “Mah hi ka fapa a si....a bia nan ngaih lai” tiah ati.

Hawi le hna, Pathian le Israel milianngan vialte hna nih hin Bawi Jesus hi an kan sawh piak mi cu a si. Jesus cu mivial te kan caah rian tuan ding ah sal bantuk in a ra. Kan sualman pek awk raithawinak caah a thi nain kan thlarau kha zungzal nunnak pek awk caah thihnak in a tho than. Cucaah a mah bia hi ngai u law zungzal nunnak kha nanhmuh khawh lai.