Kulola, Kupikana Ni Kola Wumi: Buku 4

Yakummanyisya

Ali uli wosope!
Mlungu akusanonyelwa ni kusamalila jwalijose, camnope mnope wele ŵakumpikanila ni kumtumicila Jwalakwe.
Mpikane yiyatendekwe kalakala mnope mpela muŵalembele Mmalemba ga Mlungu, Bayibulo, ni mloleje yitusitusi yayili m'buku jakalajo.
Naga mkupikana kusona kuti [Ngo], mlole Citusitusi cakuyicisyaco.

Citusitusi 1: Liŵasa Lyatisile Sala

Lute 1: 1-5

Mlungu jwapanganyisye ŵandu nambo ŵandu ŵalesile kumpikanila Mlungujo.
Mlungu ŵasagwile ŵandu ŵa Isilayeli kuti ampikanileje ni kumlambila.
Nambo soni mtundu wa Isilayeli ŵamjimucilaga Jwalakwe.
Ŵaliji mkulambila yisanamu ni milungu ja wunami mpela ŵangosyo ŵane wiŵasyungulile ŵanganyawo.
Mlungu ŵatumisye ngondo soni sala kuti ŵandu ŵa Isilayeli, kulinga kwawucisya kwa Jwalakwe Msyene.
Mundaŵi jasalaji liŵasa line lyaganisisye yakwawula kucilambo caMoyabi kuti akapate yakulya.
Ŵatemi mcilambo cacilendoco kwa yaka 10.
Ŵalume ŵawilile kukoko.
Ŵanace ŵawo wosope ŵaŵili ŵalombele acakongwe ŵa ku Moyabi peko. Nambo ŵanacewo ŵawile nombe kukoko.
Mama ŵawo ŵasigele ni acakwegwawo ŵaŵili ŵala mcilambo cacilendoco. [Ngo]

Citusitusi 2: Naomi Ni Lute Ŵawujile Ku Isilayeli

Lute 1: 6-22

Nangolo jwa liŵasa lila ŵaliji Naomi.
Acakwegwegwe ŵaliji Lute ni Olipa.
Naomi ŵaganisisye yakuwujila kucilambo ca Isilayeli.
Lute ni Olipa ŵalongene pawulendowo wakuja kucilambo ca Isilayeli.
Naomi ŵawusisye ŵanganyawo acitiji: "Ligongo cici ŵanganyamwe mkunguya une? Ana mkuganisya kuti cingole ŵanace ŵane ŵacalume kuti amlombe ŵanganyamwe? Jawulagani kumangwenu ŵanace ŵangu.
Ngalambele mnope kuti mbate ŵalume ŵane."
"Mlungu andesile une."
Olipa ŵamkumbatile Naomi ni kwalanga nipo ŵajile kwa cinangolo wakwe ku mangwakwe.
Nambo Lute ŵamkanilile Naomi ni jwatite: ”Mkasimundekasya kulongana. Kulikose kucimjawule none jwakwe cinjawuleje nipo kulikose kucimkatame none jwakwe cingatame.
Ŵandu ŵenu taciŵa ŵandu ŵangu nipo Mlungu jwenu, taciŵa Mlungu jwangu.“
Myoyo Lute ŵalongene ni Naomi ku Betelehemu mcilambo ca Isilayeli. [Ngo]

Citusitusi 3: Lute Ali Mgowola Mumgunda

Lute 2: 1-23

Naomi ni Lute ŵaliji ŵakulaga mnope.
Ali awujile ku Betelehemu, Lute ŵatite kwa Naomi:
"Ngwawula ngawululeje mmigunda ja ŵandu, naga akangundisye."
Jwalakwe jwapite mumgunda mu ŵaliji mkugowola ŵamasengo.
Msyene mgundawo lina lyakwe jwaliji Bowasi.
Ŵawusisye ŵamasengo ŵakwe ya jwamkongwe jwacilendojo jujwaliji mumgunda mwakwe.
Jumo jwa ŵamasengowo jwatite: "Jwalakweju jwaku Mowabu jwayice akuno ni Naomi."
Bowasi ŵapikene yambone wujwaliji mkwatendela akwegwegwe.
Ŵam'weni kuti ali jwamasengo jwambone. Myoyo ŵamsalile Lute kuti: "Mtameje akuno ni ŵamasengo ŵanguwa ŵacikongwe, mloleleje mgunda ŵakugowola ŵanduŵa, ni mkuyeje panyuma paŵaliŵa."
Ŵasalile ŵandu ŵa ŵamtendelaga masengo ŵala kuti akamtendaga cipongwe, nambo amleceleje yine yakuti alokotanyeje.
Kulikuswele Lute ŵamsalile Naomi kusalala mtima kwa Bowasi.
Naomi ŵatite: ”Mlungu amjaliwasye jwalakwejo! Ali mlongo mjetu jwakuŵandicila.” [Ngo]

Citusitusi 4: Lute Ni Bowasi Paluŵala Lwakuputila Tiligu

Lute 3: 1-18

Mu Isilayeli naga jwamlume kuwa, ni kuti jwakutama pakuŵandikana najo jwamkongwejo akwenela kumlomba.
Lisiku line Naomi ŵam'wusisye Lute kuti: "Ana ngaŵa namsosele malo gakuti akamleleje?"
Bowasi niwo alongo ajetu. Ligulo lino taŵeje alimkuputa yagowola yawo .
Myoyo mjoje ni m'wale yakuwala yenu yambone.
Ni mjawule paluŵala pakuputilapo. Mkamlolelecesye pakugona, ali agonile lugono mkamgonele pa makongolo pakwe.
Lute ŵatesile mpela muŵaŵecetele Naomi.
Paŵajimwice Bowasi ni kumsimana Lute pamakongolo pakwe ŵamanyilile kuti akusaka kuti amlombe.
Myoyo Bowasi ŵatite..... mkasimjogopa. Cinamtendele yosope yamumbendile.
Wosope ŵammusi muno akumanyilila kuti mli jwamkongwe jwambone. [Ngo]

Citusitusi 5: Bowasi Ni Acakulungwakulungwa Wa Mu Betelehemu

Lute 4: 1-22

Bowasi ŵaŵilasile acakulungwakulungwa wosope pa cipata ca Betelehemu.
Mundu jwine jwapakuŵandikana ni jwakamlombile Lute, nambo wosope ŵajitikene kuti Bowasi amlombe.
Pakwiticisya cilanga, jwakuŵandikana najo jula ŵampele Bowasi ngwaŵila.
Ŵelewu ŵaliji msyungu wa mu Isilayeli. Myoyo Bowasi ŵamjigele Lute ni kumlomba.
Ŵakwete mwanace jwamlume lina lyakwe Obedi. Jwamkongwejo jwammusimo jwatite kwa Naomi: “Acimbicikwe Ambuje wakanamleka mli ŵangali cisukulu cakuti cimleleje.
Jwalakweju awe jwakumanyika mnope mu Isilayeli kuwusalalisya umi wenu ni kumsamala mundaŵi jawukalamba wenu.”
"Pakuŵa mkwegwenuju, jwakusamnonyela mnopeju ali cenene, kulekangana ni kola ŵanace ŵacilume 7, am'welecele jwalakweju."
Acimijangu, Lute ŵacisimene cisangalalo paŵaliji mkumtumicila Mlungu ni ŵandu ŵakwe.
Obedi ŵaŵele sambano angangagwe Daudi, mcimwene jwamkulungwa jwa Isilayeli, ni kwa yisukulu yakwe.
Ŵaliji mcimwene jwakwapunda wosope.
Citulijiganye ya jwalakweju pa citusitusi cakuyicisyaco. [Ngo]

Citusitusi 6: Maliya Ni Lilayika Lya Mlungu

Luka 1:26-36

Yipagwo yejinji panyuma pa Lute, Mlungu ŵasagwile jwamkongwe jwine kuti amtumicileje Jwalakwejo.
Lina lyakwe Maliya. Jweleju jwaliji mu lukosyo lwa Lute.
Maliya ŵaliji mwalimwalipe. Jwaliji jwamtomeledwe kuti alombedwe ni Yusufu.
Nambo mkinalombane, lilayika lya Mlungu lyam'wonecele Maliya ni lyatite: "Mkasimjogapa Maliya. Mlungu amsalalile mtima. Timkole mwanace jwamlume nipo ticimpa lina Yesu.
Taciŵa Mwanace jwa Mlungu Jwamacili Gosepe.

Ucimwene Wakwe pa cilambo ni kwinani ngasiwumala kose.
Maliya ŵalijanjile lilayikalyo acitiji: "Une ndili jwakutumicila jwa Ambuje. Yitendekwe kwangune mpela yatite pakuŵeceta ŵalakwe."
Maliya ŵakwete citumbo kupitila mmacili ga Msimu Ŵaswela nipo ŵaŵelece Mwanace jwamlume ŵamtele lina Yesu.
Myoyo Maliya mamagwe Yesu mtendele wuŵe ni Jwalakwejo.
Ligongo lyakuti Maliya ŵampikanilaga Mlungu, Yesu, jwali Mkulupusyo jwacilambo cosope, jwapali mwa jwalakwejo.
Naga tulikumpikanila Mlungu Jwalakwe akusatenda yekulungwa yambone kupitila mwetuwe. [Ngo]

Citusitusi 7: Hana Ŵapopesile Kwa Mlungu

1 Samuele 1:1-20

Napundape ndaŵi ja Lute mcilambo ca Isilayeli mwapali jwamkongwe jwine lina lyakwe Hana.
Nombe jweleju jwaliji jwakumtumicila Mlungu.
Ŵamkwakwe ŵaliji mkumnonyela Hana mnope, nambo jwalakwe nganasangalalaga ligongo nganam'ŵelecela jwamlumejo mwanace jwalijose.
Caka cilicose ŵaliji mkwinjila Mnyumba ja Mlungu mwele muŵaliji mkulambila Mlungu ku Siloyi. Ŵaliji mkujigala yakupeleka ni kuyitenda mbopesi kwa Mlungu.
Hana ŵajinjile mnyumba ja Mlungu ni ŵapopesile.
"Ambuje Mlungu, naga mkungumbucila une ni kumba mwanace jwamlume, papopo cinjimpeleka Kwenumwe pawumi wakwe wosope."
Jwalakwe ŵaliji mkutenganya ngomo paŵaliji mkuŵecetana ni Mlungu, nambo maloŵe nganigapikanikaga.
Eli, jwamkulungwa jwa ŵambopesi, ŵam'weni. Nipo jwaganisyaga kuti akolelwe ukana.
Nambo Mlungu ŵalipikene lipopelo lya Hana, nipo palipapite kandaŵi Hana ŵakwete mwanace jwamlume. Ŵampele lina lyakuti Samuele. [Ngo]

Citusitusi 8: Kamwanace Samuele Mnyumba Ja Mlungu

1 Samuele 1:24-28, 2:12-27, 3:1-21

Samuele pa jwaliji ciŵela mwanace jwamwana, Hana ŵampelece kwa Mlungu.
Ŵamjigele kuti akatameje ni Eli mnyumba jakupopelela ja ku Siloyi
Eli ŵamjiganyisye Samuele yicajileje pakumtumicila Mlungu.
Eli ŵakwete ŵanace ŵaŵili wacilume. Ŵaliji ŵambopesi nambo ŵaliji ŵa ulemwa mnope.
Myoyo Mlungu ŵalesile kuŵecetana ni ŵandu kupitila mwa ŵambopesi ŵeleŵa.
Lisiku line Samuele ŵagonile lugono mnyumba ja Mlungu.
Papopo Mlungu ŵamŵilasile Samuele.
Samuele ŵawutucile kwa Eli ni watite: "Mbice, ana mumbilasile?"
Nambo Eli ŵatite: "Nganinam'ŵilanga; jawulagani mkagone."
Yeleyi yatendekwe kakwana katatu.
Papopo Eli ŵamanyilile kuti jwaliji Mlungu juŵam'ŵilangaga Samuele.
Myoyo ŵamsalile Samuele kuti akamjanje Mlungu kuti akajile: "Aŵecete, Ambuje, pakuŵa jwakutumicila jwenu akupikana."
Mlungu ŵaŵecete kakajinji ni Samuele nipo sambano jwaliji jwa mbopesi jwamkulungwa, jwakulocesya ni soni jwakulongolela mu Isilayeli. [Ngo]

Citusitusi 9: Samuele Ŵajipopelele Isilayeli

1 Samuele 7:2-14 ni Kutyoka 20:25

Eli ŵakwete ŵanace ŵaŵili wu ŵaliji ŵambopesi. Ŵaliji ŵa ulemwa.
Myoyo Mlungu ŵapele cilango.
Ŵawulajidwe pangondo nipo Ayisilayeli ŵagonjile kwa Afilisiti.
Kwayaka yakupunda 20 Afilisiti ŵaliji mkulamulila Isilayeli.
Panyuma pakwe Samuele ŵatite kwa ŵandu: "Naga ŵanganyamwe mkuwujila kwa Mlungu ni mtima wosope, ni kulilekasya mwacimsyene kulambila milungu ni kulipeleka mwacimsyene kwa Ambuje, ni kwatumicila ŵelewo jikape, camtosye ŵanganyamwe mmyala mwa Afilisiti."
Ayisilayeli ŵampikanile Samuele. Ŵasongene wosope pampepe. Papopo Samuele ŵapelece mbopesi kwa Mlungu ni ŵapopelele Isilayeli.
Afilisiti ŵasongene pampepe kuti ŵajonanje Ayisilayeli.
Nambo Mlungu ŵatumisye kulindima kwakwajogoya ŵanganyawo.
Afilisiti ŵatisile ligongo lya woga, nipo Ayisilayeli ŵapakombwele kwagonjesya Afilisiti ŵosopeŵo. Mlungu ŵalamulile lukosyo lulilose acitiji: "Une ndili Ambuje Mlungu jwenu. Mkakola milungu jine nipo mkajitumicilaga.” [Ngo]

Citusitusi 10: Samuele Ŵamsagwile Saulo Pakumjitila Mawuta

1 Samuele 8:1 mbesi -kupitilisya mpaka 10:1

Mlungu ŵaliji mcimwene msyesyene jwa Isilayeli nipo Samuele, mkulamulidwa ni Mlungu, ŵalongolele ŵandu wosope.
Ligongo lyakuti ŵa mitundu jine ŵakwete acayimwene ŵawoŵawope, Ayisilayeli nombe ŵasakaga mundu jutaŵe mwenye jwawo.
Samuele nganasangalala paŵapikene yeleyi.
Nombe Mlungu ŵamsalile jwalakwejo kuti: "Mpikane kwa yosope yele ŵandu yam’salile mmwejo; ngakumkana mmwejo mpela mcimwene jwawo iyayi, nambo akungana Une."
Jwapali mcanda jwine lina lyakwe Saulo. Jwaliji jwamlewu ni jwakuwoneka cenene.
Lisiku line Saulo ŵapite kukumjendela Samuele.
Samuele paŵam'weni alimkwika Mlungu ŵatite kwa Samuele: “Aju ni junamsagwile.
Ciŵalamulileje ŵandu ŵangu.”
Myoyo Samuele ŵajigele mgawo wa mawuta.
Ŵamjitile Saulo mawutago mumtwe.
Aci caliji cimanyisyo cakulosya kuti asagulidwe kuŵa mcimwene.
Kwayaka 40 Saulo ŵaliji mkwalamulila Ayisilayeli. [Ngo]

Citusitusi 11: Saulo Ŵapapulenye Mkanjo Wa Samuele

1 Samuele 15:1-29

Amaleki ŵaliji ŵandu ŵa ulemwa ŵanganyaŵa ŵalagasyaga Ayisilayeli.
Myoyo Samuele ŵatite kwa mwenye Saulo: “Mpikane utenga ŵakutyocela kwa Mlungu.
Mkatimbe Amaleki ni mkajonanje kwene ni yosope yayili yawo. Mkasimwalecelela ŵanganyawo.”
Mlungu ŵamkamucisye Saulo ni ŵangondo ŵakwe kuti ŵagonjesye Amaleki.
Nambope nganampikanila Mlungu. Ŵaliji mkutumicila yinyama yakunonyelesya mnope ya Amaleki yiyaliji yambopesi ja Mlungu nipo nganam'wulaga mcimwene jwa Amaleki.
Papopo Samuele ŵatite kwa Saulo: "Ligongo lyakuti mgakanile maloŵe ga Ambuje, ni kuti Ambujewo amkanile mmwejo kuti m'ŵe mcimwene."
Samuele ŵagalawice kuti atyoce nambo Saulo ŵakamwile mkanjo wa Samuele.
Wapapucile mmyala. Myoyo Samuele ŵatite:
Mlungu awupapulenye ucimwene wa Isilayeli kutyocelaga lelo jino nipo awupelece kwa ŵandu ŵangalandana ni mmwejo.
Acimjangu, Saulo ŵapelece mbopesi kwa Mlungu, nambo nganampikanila ni kumtumicila Mlungujo.
Samuele ŵampikanilaga ni kumtumicila Mlungu moŵa gosope ga umi wakwe.
Kupikanila kusamsangalasya Mlungu kupunda ni mbopesi.
Mlungu ŵatite soni kuti tacimpa ucimbicimbi jwalijose jwakumcimbicisya Jwalakwe. [Ngo]

Citusitusi 12: Yesu Mnyumba Ja Mlungu

Luka 2:41-50 ni 1:35

Pali papite yaka yejinji panyuma pa Samuele, jwapali mwanace mcilambo ca Isilayeli lina lyakwe Yesu.
Maliya ŵaliji mamagwe, nambo nganakola atatigwe pacilambo pano, pakuŵa mamagwe ŵakwete citumbo kupitila mmacili ga Msimu Ŵaswela.
Yesu pa ŵaliji ni yaka 12, Maliya mamagwe ni Yusufu ŵapite ku Yelusalemu nipo Yesu nombe ŵalongene. Pa ŵawujilaga kumangwawo, Yesu ŵasigele, myoyo ŵaliji mkumsosasosa.
Gali gamasile moŵa gatatu, ŵamsimene Yesu mnyumba ja Mlungu.
Ŵaliji mkuŵecetana ni aciŵalimu wa Ciyuda yakwambaga Mlungu.
Maliya mamagwe ŵatite kwa Jwalakwe: "Mwanace ligongo cici mtusawisye camti yiyi?
Twaliji mkudandawula pakulinga kumsosasosa Mmwejo."
Nambo Yesu ŵatite: "Ana nganamanyililape kuti ngwenela kuŵa mnyumba ja Atati ŵangu?"
Yesu piŵaliji mnyamata mpela Samuele ŵamanyilile kuti ayice kukumtumicila Mlungu.
Yili cenene kutanda kumtumicila Mlungu tuli ciŵela ŵanace.
Yesu ŵayice kukwalongola ŵandu wosope kuti awujile kwa Mlungu.
Mlungu ali mcimwene, Jwakulongola jwa jwalijose. [Ngo]

Yakummanyisya 2

Ŵane mwa ŵandu wu ŵapali kalakala ŵaliji ŵakutumicila ŵa Mlungu. Aji programuji cijimsalile mmwejo mwele Mlungu ŵatesile kuŵa ŵakulongolela wa ŵandu.
M'wunukule ni kulola ciwulili cakuyicisyaco naga mkupikana kusona kuti [Ngo].

Citusitusi 13: Daudi, Jwakucinga Jwangali Woga

1 Samuele 16:1-13; ni 17:34 ni 15:23

Saulo ŵaliji mcimwene jwandanda jwa Isilayeli, nambo nganampikanilaga Mlungu.
Mlungu ŵamlesile Saulo ni nganamkamucisya soni.
Jwapali mnyamata jwine lina lyakwe Daudi.
Jwaliji mkucinga ngondolo sya babagwe.
Jwaliji mkukulupilila mwa Mlungu jwacijumi ni nganajogopaga yakogoya yiliyose.
Lisiku line lisimba lyayice ni lyakamwile ngondolo jimo.
Daudi ŵaliwuleje lisimbalyo ni ŵajikulupwisye ngondolojo.
Jwaliji mkwimba nyimbo syakusangalasya ni pangwe acilumbaga Mlungu.
Syelesi ni Nyimbo sya Malumbo ndaŵi sine tukusatiga Masalimo nipo ndaŵi sine Sabuli. Jele bukuji jikusimanikwa Mmaloŵe ga Mlungu, Bayibulo.
Daudi ŵaliji mkutama mpela muŵasoselaga Mlungu kuti ŵandu wosope atameje kele katameko.
Saulo ŵaliji ciŵela mcimwene mu Isilayeli, nambo Mlungu ŵaliji ali amsagwile kalape Daudi kuti aŵe mcimwene mmalo mwa Saulo. [Ngo]

Citusitusi 14: Daudi Ni Cimundu Cakogoya

1 Samuele 17:1-54 ni 2:30

Japali ngondo sikati ja Filisitina ni Ayisilayeli.
Afilisiti ŵakwete cimundu cakogoya lina lyakwe Goliyati.

Caliji mkwagumila Ayisilayeli cicitiji: "Msagule mundu...... naga akombole kumenyana ni une ni kumbulaga, tuŵe acikapolo wenu nambo naga ngamkumbulaga, ŵanganyamwe cim'we acikapolo wetu."
Ŵandu ŵa Isilayeli ŵaliji mkumjogopa Goliyati. Paliji pangali jwampaka kumenyana ni jwalakwe. Mcanda jula Daudi jwapite kukwalola acakulugwe kuluŵala lwakumenyanila kula. Jwalakwe ŵatite: "Ana jwele mFilisitiju nduni jwangakumjogopa Mlunguju?
Ngakwenela kwajogoya ŵangondo ŵa Mlungu jwacijumi!"
Daudi nganamjogopaga Goliyati. Ŵamanyilile kuti Mlungu tamkamucisye kuti aciwulaje cimunduco ligongo jaliji ngondo ja Mlungu.
Myoyo Daudi ŵajigele legeni nipo ŵaliponyisye liganga kucaliji cimunduco lyaciputile pawusyo sikati ja meso ga cimunduco. Goliyati ŵagwile pasi nipo ŵam'wutucile.
Jwajigele upanga wa Goliyati ni ŵamsinjile palukosi. [Ngo]

Citusitusi 15: Saulo Ŵalinjile Kuti Am'wulaje Daudi

1 Samuele 18:1 ni 19:10

Pandanda Saulo ŵaliji ŵakumnonyela Daudi ligongo lyakuti ŵakulupwisye Ayisilayeli.
Daudi ŵaŵele msilikali jwamkulungwa mu Isilayeli nipo Ayisilayeli ŵaliji ŵakondwa kuti ŵalongoleleje.
Pelepo Saulo ŵatandite wiwu nipo ŵaliji mkumjogopa Daudi.
Lisiku line Daudi ŵaliji mkumjimbila Saulo nyimbo ni pangwe jakwe. Saulo ŵasacile kum'wulaga Daudi ligongo msimu wakusakala wamyicilile jwalakwe. Saulo ŵalokwete lipanga lyakwe ni ŵaliponyisye kwa Daudi, nambo lyamkulwisye ni lyakanilile mwipupa.
Panyuma pa yeleyi Saulo ŵalinjile kuti am'wulaje Daudi kakajinji.
Nambo Mlungu ŵamcinjilicisye Daudi pakumtumisya mwanace jwa Saulo, Yonatani, ni Ayisilayeli ŵajinji kuti akamkulupusye Daudi kwa amagongo ŵakwe.
Nambope Daudi ŵatilile kumalo gakutalicila ku cipululu kumtila Saulo. [Ngo]

Citusitusi 16: Daudi Ŵawulecelele Umi Wa Saulo

1 Samuele 26:1-25 ni Aloma 12:19

Saulo ni ŵangondo ŵakwe ŵapite kuti akamkamule Daudi mcipululu.
Lisiku line cilo Saulo ni ŵandu ŵakwe ali agonile, Daudi ni mjakwe Abisayi, ŵakwaŵile mpaka mlugono lwa Saulo.
Abisayi ŵasacile kuti am'wulaje Saulo mcimwene jwamlugono jula, nambo Daudi ŵamlekasisye.
Daudi ŵatite: ”Mlungu tacimpa cilango jwalijose jucamlagasye mcimwene Jwakwe juŵamsagwile.“
Daudi ŵajigele lipanga ni kamtala kamesi kikaliji ku mitwe kwa Saulo.
Ali atyosile Daudi ŵagumisile kuti ŵajimusye ŵanduwo, ni ŵatite kwa Abinala jwele jujwakwete ulamusi ŵakumlondela mcimwenejo kuti:
“Nganimwalondela ambuje wenu. Mlolecesye palipo. Ana lipanga ni mesi ga mciwiga gigaliji ku mitwe kwamcimwenejo gali kwapi?"
Panyuma pa yeleyi Daudi ŵatite kwa Saulo: ”Mpela yindite pakuwulecelela umi wenu lelo jino, Mlungu awulecelele nombe umi wangu ni kungulupusya kutyocela kumasawusyo gangu gosope.“
Acimjangu, mkawucisyaga ŵele ŵakumtendela yakusakala, pakuŵa Mlungu Msyene tacapa cilango ŵele ŵakuyitenda yeleyo.
Yili yipite yeleyi, Saulo ŵalesile kwawulaga Daudi. [Ngo]

Citusitusi 17: Daudi Ŵamsagwile Kuŵa Mcimwene

1 Samuele 31:1-6 ni 2 Samuele 5:1 - 7:16

Afilisiti ŵayice soni kuti amenyane ni Ayisilayeli.
Mwenye Saulo, ni mwanace jwakwe Yonatani ni mkulugwe ŵawulajidwe pangondojo.
Papopo ŵandu ŵamtesile Daudi kuŵa mcimwene jwa Isilayeli.
Daudi ŵataŵile nyumba jakwe mu msinda wa Yelusalemu.
Mlungu ŵatite kwa Daudi: ”Namlekasisye kucinga ngondolo, nipo namtesile kuŵa mcimwene sikati ja ŵandu ŵa Isilayeli.
Tinjimkusya, kuŵa jwamkulungwa mnope pacilambo capasi.“
Myoyo Mlungu ŵamtendesye Daudi nipo ŵampele macili kuti ŵagonjesye amagongo ŵa Isilayeli. [Ngo]

Citusitusi 18: Daudi Ni Beteseba

2 Samuele 11:1; 12:20 ni Kutyoka 20:14

Lisiku line Daudi ŵaliji mkwenda pa msakasa wa nyumba jakwe.
Ŵam'weni jwamkongwe jwakusalala ali mkoga.
Daudi ŵamnonyele kuti aŵe jwakwe. Jwamkongwejo lina lyakwe ŵaliji Beteseba
Jwalakweju jwalombedwe ni Uliya jujwaliji msilikali jwa ŵangondo ŵa Daudi.
Pa jele ndaŵiji Uliya kwaliji kwangali, ŵaliji kungondo jiŵamenyanaga ni amagongo ŵa Isilayeli.
Myoyo Daudi ŵatumisye utenga kwa jwakulamulila jwa ŵangondowo.
Ŵamsalile jwakulamulilajo kuti alolecesye kuti Uliya awulajidwe ku ngondoko.
Panyuma pakwe Daudi ŵamjigele Beteseba kuŵa ŵamkwakwe.
Nambo yiŵatesile Daudi nganiyimnonyela Mlungu.
Mwanace jwandanda jwamlume jwa Daudi ni Beteseba jwawile, nipo Daudi ŵam'wendile Mlungu kuti amkululucile pa yicindu yakogoya yiŵatesileyo.
Maloŵe ga Mlungu gakuti: "Mkasimtenda cikululu." [Ngo]

Citusitusi 19: Nyumba Ja Mlungu

1 Mbili 22:1-19

Daudi ŵamlemwecesye Mlungu, kutendaga jwalakwejo jwaliji mkumnonyela Mlungu nipo ŵasakaga kuti amtumicileje.
Ŵasakaga kuti ataŵe nyumba jekulungwa mnope ja Mlungu kuti ŵandu mpaka asonganeje ni kumlambilaga Mlungu.
Nambo Mlungu ŵatite: "Mkasimtaŵa nyumba ja Lina Lyangu, ligongo m’wuleje ŵandu ŵajinji.
Cimkole mwanace jwamlume jutaciŵa jwamtendele ni jwakupumula.
Lina lyakwe taciŵa Solomoni. Jwalakwejo ni jutacitaŵa nyumba ja Lina Lyangu.
Cinjiwutamika pa citengu ucimwene wakwe mu Isilayeli mpaka kalakala.“
Daudi ŵakosecele yindu yejinji yanyumba ja Mlungu mkinaŵe kuwa, nambo Solomoni ni jujwataŵile nyumbajo.
Jele nyumba ja Mlungujo jaliji jakusalala mnope.
Jajigele yaka 7 kuti jimale kulinganya.
Ŵandu ŵa Isilayeli ŵaliji mkumlambila Mlungu mujele nyumbajo ku Yelusalemu, kwayaka yayijinji.
Ŵanganyawo nganamliŵalila Daudi kuti jwaliji mcimwene jwamkulungwa mnope. [Ngo]

Citusitusi 20: Yesu Ŵayice Mu Yelusalemu

Mateyo 21:1-11

Yili yipite mpela yaka 1000 panyuma Daudi, Yesu ŵapali.
Yesu ali cisukulu ca mwenye Daudi.
Mamagwe ŵaliji mwalimwalipe lina lyawo Maliya.
Jwalakweju jwapali mwakusimonjesya kupitila mmacili ga Msimu Ŵaswela.
Yesu ali Mesiya jwa Mlungu.
Ŵaliji mkwajiganya ŵandu ya usyesyene wa Mlungu.
Ŵatesile yakusimonjesya ni macili ga Mlungu.
Saulo ni Daudi ni uwe wosope twamlemwecesye Mlungu.
Nambo Yesu jikape nganakola ulemwa wuliwose.
Lisiku line ŵajinjile mu Yelusalemu ali akwesile pa bulu.
Ŵandu ŵakopwece ku kumcingamila Yesu ali mkugumila acitiji:
"Hosana kwa mwanace jwa Daudi!" Hosana jigopolela kuti: mkulupusyo.
Wosope ŵaliji mkugumila kuti: “Kupunda ni ucimbicimbi uwe ni Jwele jwakwisa mlina lya Mlungu.“
Pakuŵa ŵandu ŵayiweni kuti Yesu ŵaliji ŵakumpunda mcimwene Daudi.
Jwalakwejo ali Mcimwene kupunda acayimwene wosope. [Ngo]

Citusitusi 21: Likungulu Lyampele Eliya Yakulya

Acayimwene 17:1-6

Panyuma pa Daudi ni Solomoni acayimwene ŵane ŵaliji mkulamulila Isilayeli.
Jumo jwakwe jwaliji mkuwilangwa Ahabu. Jwalakweju ŵakwete jwamkongwe jwa ulemwa lina lyakwe Yesebele.
Yesebeleju jwawuleje ŵandu ŵajinji ŵaŵamkuyaga Mlungu, nipo jwaliji mkwacisya ŵanduwo kuti alambileje cisanamu lina lyakwe Bala.
Eliya ŵaliji jwakulocesya jwamkulungwa mnope jwa Mlungu.
Ŵapite kwa Ahabu ni ŵatite: "Ambuje, Mlungu jwa Isilayeli akusiŵalekaga wele ŵa jwakutumicila, cikuciŵa kwangali ula mu yaka yayikwisayi mloleleje yindite pakumsalilayi."
Myoyo Mlungu ŵatumisye sala jakogoya mcilambo ca Isilayeli.
Nambope Mlungu ŵaliji mkumnonyelape jwakutumicila jwakwe Eliya.
Ŵamtumisye Eliya kumalo gakuŵilangwa Selefati, kweleko jwaliji mkumwa mesi ga mlusulo, nipo kundaŵi kulikose likungulu lyaliji mkwika ni mkate ni nyama kuti Eliya alye. [Ngo]

Citusitusi 22: Eliya Ni Moto Wa Mlungu

1 Acayimwene 18:16-46

Caka catatu mu sala jeleji, Eliya ŵasalile Ahabu kuti ŵaŵilanje ŵandu wosope ŵa Isilayeli ni ŵakulocesya ŵosope ŵiŵaliji mkumtumicila mlungu jwawunami jula Bala, kwitumbi lyakuŵilanjidwa Kalimeli.
Ŵasalile jemanjajo kuti: "Naga Ambuje ali Mlungu, mwakuye, nambo naga Bala ali Mlungu, mumkuye." Nambo pangali juŵajanjile.
Papopo Eliya ŵatite kwa wosopewo: “Mkatujigalile ng'ombe sya mikambako siŵili.
M'wulece wumo ŵambopesi ŵa Bala, Ambuje mkambako wumo ŵambopesi.
Nambo akisiŵakunda kuti ajikolecesye moto.
Une nombe cingosecele mkambako winewo, nambo none ngingolesya moto.
Ŵanganyamwe mkolanje mlina lya mlungu jwenu nipo une cingolanje Mlina lya Ambuje.”
Eliya ŵaliji mkuŵeceta ya Mlungu jwakuŵecetaga ni ŵandu nipo Mlungu jwakusasungaga Maloŵe Gakwe.
Eliya ŵatite: "Mlungu jwakwitika ni motowu - Jwalakwejo ali Mlungu."
Ŵandu ŵajitikene ni yiŵaŵecete Eliya.
Lisiku lyamtundu ŵambopesi ŵa Bala ŵaliji mkukolanga mlungu jwawo.
Ŵaliji mkuŵina ali mkujisyungulila mbopesi jawo jila nipo ŵaliji mkulikatakata acimsyene pacilu pawo.
Nambo moto nganiwukolela kose. Kwigulo Eliya ŵakosecele mbopesi jakwe.
Ŵaŵendile ŵandu kuti ataje mesi pa mbopesi jakwe jila ni sasu syakwe.
Papopo jwalakwe ŵapopesile kwa Mlungu.
Mwandaŵi jijojo moto wagwile kutyocela kwiwunde ni wayicile pa mbopesi ja Eliya.
Ŵakolesisye mbopesi jila pampepe ni sasu syakwe.
Ŵandu ŵosope ŵagumisile acitiji: "Ambuje - ali Mlungu!" [Ngo]

Citusitusi 23: Eliya Ŵapite Kwinani

1 Acayimwene 19:1-21 ni 2 Acayimwene 2:1-14

Eliya ŵawuleje ŵambopesi wosope ŵala ŵa Bala, ligongo ŵaliji ŵa ulemwa.
Pelepo ŵamkwawo mwenye Ahabu, Yesebele ŵasacile kum'wulaga Eliya.
Eliya ŵajogwepe, myoyo ŵatilile mcipululu kwakutalika.
Kweleko Mlungu ŵampocele Eliya.
Ali aŵecete Mlungu ni Eliya jwalakwe nganakola soni woga.
Jwalakwe ŵapitilisye kwajiganya ŵandu kuti ŵalambileje Ambuje Mlungu.
Pa ŵalamwile Mlungu, Elisha ŵa ŵele jwakamucisya jwa Eliya.
Lisiku line piŵaliji mkwenda pampepe, cigeleta ca moto capite sikati jawo mwakuwutuka mnope nipo Mlungu ŵamjigele Eliya ulendo kwinani mucimbunga, nipo Elisha ngam'wona soni. [Ngo]

Citusitusi 24: Eliya Ni Mose Pampepe Ni Yesu

Luka 9:28-36

Yaka 700 panyuma pa Eliya, Yesu pa ŵatamaga pacilambo pano, ŵajigele ŵakulijiganya ŵakwe ŵatatu ulendo kwitumbi ku kupopela.
Yesu pa ŵaliji mkupopela, Mose ni Eliya ŵam'wonecele.
Ŵakulijiganya ŵala ŵam'weni Yesu, Mose ni Eliya ali mkuŵala mnope ni lumbili lwa Mlungu.
Papopo Mlungu msyene ŵaŵecete kutyocela kwinani.
Ŵatite: "Aju ni Mwanace Jwangu jwamsaguce. Mumpikanicisyeje."
Acimjangu, Mlungu ni ŵandu ŵacikulile mnope mu Isilayeli ŵatulanjisye uwe wosope kwa Yesu.
Yesu ŵayice pa cilambo pano ni ŵawile mpela mbopesi ja ulemwa wetu ni ulemwa wa ŵandu wosope, ligongo Mlungu ŵasacile kwakulupusya ŵandu wosope kupitila mwa Mesiya Jwakwe mtendele ŵuwe ni Jwalakwejo. Yesu ali Mkulupusyo jwele Mlungu juŵamjimwisye kutyocela ku ŵawe.
Nambo Mlungu akusapeleka umi wangamala kwa ŵele ŵakupikanila Maloŵe Gakwe. Mkulupilile mwa Jwalakwe ni mumpikanileje.
Myoyo mumpikanile Jwalakwe ni mpate umi ŵangamala mwa Jwalakwe.