Look, Listen & Live 2: Mighty Men of GOD
План-конспект: Jacob, Joseph, Moses. 24 sections. It has a picture book to go along with the recording. This Simple script is meant for unwritten languages where the translation must be oral.
Номер текста: 419
Язык: Kalinga, Tanudan
Тема: Sin and Satan (Deliverance, Judgement, Sin, disobedience); Christ (Jesus, Our Substitute, Sacrifice / Atonement); Eternal life (Salvation); Character of God (Nature, character of God, Word of God (the Bible)); Living as a Christian (Obedience, No other gods, idols, Forgiveness, Faith, trust, believe in Jesus); Bible timeline (Law of God, Gospel, Good News); Problems (Problems, troubles, worries)
Aудитория: General
Цель: Teaching
Features: Monolog; Bible Stories; Paraphrase Scripture
статус: Approved
Сценарии - это основные инструкции по переводу и записи на другие языки. Их следует при необходимости адаптировать, чтобы сделать понятными и актуальными для каждой культуры и языка. Некоторые используемые термины и концепции могут нуждаться в дополнительном пояснении или даже полностью замещаться или опускаться.
Текст программы
Introduction
Igammuyo de ossaan ya tuttuwa’e Apo Dios? Parubusanak ud man-ul-ullit panggop atta udum un tago we nangigammo kan siya. Ilan yo de iglato atte ididdilaag na we libro ya indisan yo mandongor. Ilan yo de sumaruno we iglato no dongron yo de signal.
Umuna we Iglato - Da duwa e mansunod
Da duwa e mansunod atta anna’e iglato mantatawanda. Sa osa we ngadan na Esau alisto we manganop. Ak Jacob, we ban-og we sunod na nansagana ak ampiya e makan yakon adipon mangatod kan Esau. Kanan Jacob kan Esau, “Umuna, inginam kan sakon de tawid no.” pi’on Jacob aran de tawidna atta dadakkorda we umoy otyan atte panguro we laraki. Ippon mangwaan Esau atte tawid na. Akus ak sosomkona de iggana atte buwang na, siya gapu we ingngina na de tawid na ate amis-an we kakan. Pi-ona ngadan Jacob – “Kusit” ya sa ugali’n Jacob kusitona da udum. Linamyongana (Pinormunana) de mismo we amana.
Maikagwa we Iglato - Sa in-inop Jacob
Sinasangnga-an Esau ak Jacob wot ginandatna we gongaton, sadi de ummawidan Jacob manipud ate buroy da. Ilan yo de iglato! Inggaw de in-inop Jacob. Innila na Apo Dios ad langit ya da Angheles Apo Dios we man-usog atte lubong. Kanan Apo Dios kan Jacob,” Ittok kan sika ya da ganak no de anna’e luta. Losan we tago atte lubong mapagasatan gapu kan sika. Awadak kan sika takon ay no ngani ayam”. Igammon Apo Dios we ak Jacob nakusit, yakon pipi-ona ak Jacob ya pi-ona baliwan siya. Siya de gapu we inittana siya atta kakaskasda-aw we kari.
Maikatlo we Iglato - Da Jacob kan Laban
Intultuloy Jacob we manlamlamyong atta udum, yakon sin-udduman kad as lamyongan da agos siya. Ummoy ak Jacob nansiput atte igaw ni uloitugna we Laban. Pi-ona asawa-on de ban-og we anak Laban ngadan na Rachel. Nansipot kan Laban ak pito we tawon ta siya banat na kan siya. Oni kad siniliban Laban ak Jacob we asawa-ona yan de ummuna we anakna’e babai. Nansipatona Laban ak Jacob atte kasi e pito’n tawon de banat na kan Rachel. Nilamyongan Jacob ak Laban. Innarana da ambabaro we animal atta tangkor Laban. Osa kad e orgaw kanan Apo Dios kan Jacob,”Mansubli ka atte luta’n da amam.”
Maika upat we Iglato - Inabat Jacob ak Apo Dios
Moryad otyan ak Jacob we mansubli atte boroydayakon umogyat kan Esau. Da manlamyong atta udum, kaaduwan umogyatda ak mabaros da. Osa e labi atte kaddaran na umoy atte ilina, dinatugan ni osa e tag oak Jacob. Nampatoy da kan Jacob atte sillabiyan. Anna kad we dumungit ak init, nilugasin nit ago de ngorwingaw Jacob. Igammon Jacob we sat ago norpu kan Apo Dios. Adipon orgon loog we makapatoy ak Jacob, wot kanana,” Adikpon sika parubusan inggana’k basbasam sakon,” kanan ni tago kan Jacob,” sa ngadan no dakompon ak orgon Jacob ta Israel”. Sa Israel’ pi-ona ugudon’ principe we makasanggor kan Apo Dios.Kinwan Apo Dios ak Jacob,”mangkukusit,we nakabsut , ta ossana siya principe. Nansubli ak Israel atta kaboroyna we angginaok.Nambalin ak ama ni dakor we umili ye tago we manaydayaw kan Apo Dios.Gagayyum, losan tako sumukil atta pi-on Apo Dios no kuskusiton tako da udum, yakon ak Apo Dios imbaon na de tago we mambalbaliw kan ditako.Siya de Apo we Jesu Cristo.
Maika lima we iglato - Sa in-inop ak Josheph
Ak Jacob we kasin Apo Dios nginadanan ak Israel inggaw da nasawaran ak duwa we lallaraki we anakna.Sa pipi-ona we anak ak Joseph. Inatod Jacob kan Joseph de ambaro we silop. Ummuna da susunod Joseph kan siya. Osa kad we labi nang-ininop. Oni kad kanana atta sunodna,”Dongron yo de inin-inop ko.Inggaw tako atte pappayaw we manguyon atta nagapas we trigo.Da inuyon yo linikwos da de inuyon ko wot manyukonganda.” Sarga’n da susunod na.Pi-ona ugudon de inin-inop na manyang-ut tago atte ban-og we sunod tako?Sinasangngaan da ak Joseph wot inaponda de gundawayda we manangran kan siya.
Maika onom we Iglato - Nailako ak Joseph
Da sunud Joseph anggargarabon da da tangkon da we adayo atte boboroy. Kanan Jacob kan Joseph, “inka ud ilan no nalisi pagay igaw da sunodno ya ambaro pagay da tangkon da”. Innilan kadda susunod na ak Joseph we umoy kan dida, nantuturaganda we gonngaton siya, binodanganda siya atte ambaro we silopna wot iggada atta ammamag-an we bubon. Oni kad sa osa kan dida kanana, “ngani ganabon tako we mangngat atte sunod tako? “unoyna no ilako tako siya e puyong.” Usto we dummatong da mampoporak (trader) atte igawda wot ilakon da sunod na ak Joesph duwampuro we buras we tanso (silver). Pinuligadanda de silop Joseph atte dara ni kalding wot iyoyda atte amada. Sa amomonakon Jacob, gingngatda pagitaron we animal ak Joseph. Inibila siya we amod de ladingit na.
Maika pito we iglato - Ak Joseph ya sa lawing e babai
Da mampoporak inlako da ak Joseph atte ili’n da Egypto.Nambalin ak puyong nit ago we mangngadan ak Potiphar.Annat ak Apo Dios kan Joseph wot namballigi atta losan we koona. Oni pon nambalin ak pangpangaton da losan we mansiputon atte boroy Potiphar.Angkosdor we babaro ak Joseph. Pi-on ni asawa’n Potiphar we mangkuwana siya. Impadas na we piliton ak Joseph we makasuyup kan siya. Igammon Joseph we buwat na inidyana siya.Tinaynana de boroy yakon inyagwod ni asawa Potiphar de silop na.Imparangnana de silop atte asawana wot pandayaana ak Joseph we pinadasna ipugod siya.Iniggan potiphar ak Josehp ate baballudan.
Maika waro we Iglato - Ak Joseph atte baballodan
Ininggaw ak Apo Dios kan Joseph atte baballudan. Umon-oni kad inigga da ak Joseph we pangat da udum e balud. Sa pangatda bobo-onon ni ari ya sa manu-uto tinapay ni ari nibarud da gos. Osa e laki, losan da nang-in-inop. Kanan Joseph kan dida,”Igammo’n Apo Dios we mangisarupati atte in-inop. Ibaga yo kan sakon da in-inop yo.” Imbaga’n ni bubu-unon kan Joseph, “ Sa in-inop ko, inggaw de wakar ni ubas weturo de panga na. innarak da ubas wot posposok atte tasa wot innatod ko kan ari.” Imbagan Joseph de pi-ona ugudon de in-inopna, kanana, “ No marakpos de turo we orgaw ibukat ni ari sika a insubli dika atte sipot no.” imbagan os ni man-uuto tinapay in-inopna kan Joseph, yakon sa in-inopna pi-ona ugudon we umoy kad de turo we orgaw mabitay we matoy. Sa bubu-onon nawayawaya-an wot sa kokopya ak tinapay gingngat da we isun ni impiilan Apo Dios kan Joseph. Ininggawak Joseph atte baballudan atte duwa e tawon.
Maika siyam we Iglato - Sa in-inop ni Ari
Wot sa Ari ad Egypt inggaw de in-inop. Innilana da pito we mantaaba e baka adani atte tawwang. Da pito we angkadaguili we baka nallotaw da ot kanonda da pito we antataba we baka. Ippon mangibaga atte Ari de pi-ona ugudon de in-inopna. Wot sa pangpangaton da bubu-onon ni Ari imbagana atte Ari panggop kan Joseph. Sa Ari inayagana ak Joseph wot lumawa atte baballudan, wot imbagan Joseph de pi-ona kanan de in-inop. Kanana, “Imbagan Apo Dios de awad we koona. Awad de pito’n tawon we ambaro we apit ad Egypt. Magangpot kad sumaruno we pito’n tawon we urat.” Innilan ni Ari we andi de Espiritu’n Apo Dios kan Joseph, wot koona siya we mangituray atte losan we Egypt.
Maika simpuro we iglato - Ak Joseph nanturay ad Igypt
Madama kad de pito’n tawon we anmbaro we apit , namonponak Joseph ak pagoy ari.Dummatong kad de pito we urat impasukmon na de pagay atta tago.Inggaw at de urat ad canaan. Da simpuro we sunod Joseph ummoyda nanukmon ad Igypt. Adida pon igammo we ak Joseph de mangituray, yakon inlasin na dida. Pnandayaana dida ak espya wot imbarud na dida turo we argaw. Wot kanana kan dida ,”Tapno ponnoko we matuttuwa kayo we tago, idatag yo de udidi we sunod yo kan sakon.Imbuna na de osa atta mansusunod at baballudan wot imparubos na da udum we mangara ak pagoy we itallayda atta kaboroyda.
Maika simpuro ya osa we Iglato - Ak Joseph inigammo’n da sunod na
Umogyat da sunod Joseph we ansubli ad Egypt yakon adipon nabayag masapur da gos de pagoy. Napilit da we awiton de udidi we sunod da, ak Benjamin wot umoy da kan Joseph. Siya siya we adimpon Joseph imbagbaga de kinatatago na. initda na dida Irik yakon intaro na we inigga da nangina we banag atta upit da. Oni kad imbo-on na da bubu-onon na ta pandayaan na dida we inakawan da siya. Da losan we mansusunod nanyukong da kan Joseph we ampakpakaasi, isuna da bintok we trigo atte in-inop Joseph. Adimpon Joseph miyattom we mangilibak atte kinatatago na. kinaworna ak Benjamin we alluruwa wot kanana kan dida,” Sakon de sunod yo we Joseph we imporak yo. Ummayaw da mansusunod atta boroy da wot ibaga da atte Amada,”Sissiya e matattago ak Joseph. Siya de mangituray ad Egypt.
Maika simpuro ya duwa we Iglato - Da Jacob kan Joseph ad Egypt
Sa narakay we Jocab innawit na da kaboroyna ya da losan we odon na wot ummoy da matago ad Egypt. Amod de layad na miilana Joseph kasin. Impatay na de ima na atta laraki we anak Joseph wot binasbasana da laraki ta ambalin da mangipangat atta tribu ad Israel. natoy ak Joseph ad Egypt we narakarakay. Umogyat da sunod Joseph maigapu atte kamali we kinwa da kan Joseph. Yakon kanan Joseph kan dida,”Adi kayo umogyat. Namanday kayo lawing kan sakon yakon linigos Apo Dios ak ambaro, tapno maisalakan de biyag de adu we tago.” Gagayyom, awad de ossaan ad langit we nangatngato no ak Joseph. Sa ngadan na ak Apo Jesu Kristo. Da lawing we tago gingngat da siya, yakon binaliktad Apo Dios da lawing we makwa atte ambarowan tako losan. Ummoli Apo Dios manipud atte katoy. Sa sana makwa e pakawanona da losan we basur tako, midoga da lawing we koon tako atta udum. Makwa e ilisi ditako atte dusa we katoy ippon patinggana.
Maika simpuro ya turo we Iglato - Moses we utting
Ak Moses osa we Israelite. Niyanak ad Egypt turo’n gasut we tawon manipud matoyak Joseph. Sa ari ad Egypt buwat na inona atta Israelita. Pinilit na dida we mansipot arig di puyong wot ibilin na atta losan we ampapaanak we gongaton da da miyanak we laraki e utting. Miyanak kad ak Moses intaro’n ni inana siya. Iniggana siya atte damos wot itarona atte lolloda atte igid ni tawwang. Sa sunod na e Miriam summisikad atte adani ta itotollong na. dummatong de anak ni Ari we umoy man-amos atte tawwang. Indasana de damos ya sa utting we Moses. Simsimmok na we aran ta koonak anakna. Dummakor ak Moses atte palasyo ni ari wot adarona da ugalin da Egyptian.
Maika simpuro ya upat we Iglato - Ak Moses ya sa gumilgillayab we lullugam
Osa we orgaw innilan Moses de Egyptian we porpana baigon de puyong we Israelite. Pi-ona badangan da kuwana e tago, siya gapu we ginngat na de Egyptian. Ummawid ak Moses ta iyogyat na de sanga’n ni ari. Sa unos di upat puro we tawon natago atte desierto we nangadanan ak Sinai. Osa kad we orgaw innila na de banag we kakasdaaw. Innilana da lullugam we umapopuy, yakon adipon masgob. Naka-ugud ak Apo Dios kan Moses manipud atte umap-apuy we lullugam, kanana, “Innilak de imonda we nanguy-uyong atta kuwak we tago. Iba-on ko sika te sana ta umoyka te ari ad Egypt ta ipangat no da tagok we manaynan atte pagilian.”
Maika simpuro ya lima we Iglato - Nansubli ak Moses atte Ari
Man-agawa ak Moses yakon nantarok kan Apo Dios wot mansubli ad Egypt. Ummunod ak sunod na we Aaron kan siya. Kananda atte Ari, sa Apo Dios da Israel, imbagana, parubusamda tagok we umayaw.” Yakon kanan ni Ari adikpon igammo de Apo Dios ya adikpon iparubos da Israel we umayaw”. Oni pon kanan Apo Dios kan Moses,” Ibagam kan Aaron ta arana de surkod nay a ibintog na atte sango ni Ari ta mambalin ak urog.” Pinati’n Aaron wot sa Ari innila na de kababalin Apo Dios, yakon adina pon itadon we umayaw da tago. Oni kad adu we kakaskasdaaw (Miraculo) we banag we patigmaanna atta Egyptian. Pinaloswa na de danum we dara tapno ippon inomon da tago. Iniggana da kadadagan we pasamak, da tokak lingaw, dudun kan da dararo ad Egypt. Nangkakatoy da animal ya da tago nasigaban da, yakon sa Ari’n da Egyptian adina pon pagay (iparubos) itadun we umayaw da tago.
Maika simpuro ya onom we Iglato - Sa naidatun we ubbo’n ni Karnero (Lamb)
Nakaugud ak Apo Dios kan Moses kasin, we kanana,” Ibagam atta Israel we kada simburyan mangara ak ubbo we karnero ya gingngat da. Mangarada atte darana ya impuligad da atte poste ni sawang da. Sacayoc de losan we luta ad Egypt. Gonngatok de losan we panguro we anak. No ilak de dara lausak dikayo ya adik pon saguidon dikayo.” Kiningwan Apo Dios de awat de imbaga na. Losan e laraki we aanak de Egyptian nangkakatoy da. Ippon natoy atta papanguro we Aanak da Israelites. Oni pon pinaayag de Ari ak Moses wot kanana,” Lumawa kayo. Sika ya da losan we tago de paguilian. Inkayo ya dinaydayaw yo de Apo Dios yo.
Maika simpuro ya pito we Iglato - Nangoy de tago atte Baybay
Impangat Moses da tago we lumawa ad Egypt. Impuyot Apo Dios dida we isunan antaknang we tukod di liboo ya apoy. Yakon summanga da Egyptian ta nalipsutan da da puyong da. Sa Ari ya da soldado na dinogdog da da Israel to isublina dida. Dummatong da Israelite atte dakor we baybay wot adida pon makadormang. Annat da Egyptian atte maodogda. Adipon makalisi da Israel. Kanan Moses kan dida,” adi kayo makimot! Miila yo de awad e koon Apo Dios ta isalakan dikayo”. Oni pon linukatan Apo Dios de daran we mooy atte baybay. Nangoy da Israelite atte ammamag-an we dot-ar ni baybay. Pinadas da Egyptian tun-udon dida yakon sa danum kasin nan-abat wot litupona dida. Namin naanud da Egyptian ya naisalakan da Israel.
Maika simpuro ya siyam we Iglato - Ak Moses atte Bilig Apo Dios
Dummatong da Israelite atte bilig ad Sinai, nan-osog ak Apo Dios atte bilig kuyogna da kidur kan kilat, liboo ya apuy. Imbagana da anne ugud kan Moses,” Sakon de Apom ya Apo Dios no. Ippon udum ak Apo Dios no. Adida ka ayyokong atta kinitikitan ya dinaydayaw no. Adim babarangon we mangusar ate ngadan ko. Sosomkom de mikapito we orgaw ya koom pasig ampurkas. Dayawom da Amam kan Inam. Adika pumatoy. Adika makiabig. Adika man-akaw. Adim pandayaan da udum atte tuli. Adim aguman da kuwa’n da udum.” Nagangpat kad insurat Apo Dios da sadi we lintog atte topak ni bato wot iyosog Moses manipud atte bilig atta losan we tago.
Maika duwampuro we Iglato - Sa Urog atte toktok ni adili
Umangar da tago panggop atte makan we porpan Apo Dios itton kan dida. Dinusan Apo Dios dida atte nangibo-onana atta naguita we urog kan dida. Aduda tago we natoy atte kotob da urog. Ummibil da we ampaturong kan Moses wot adawdawatan Moses dida. Oni kad imbagan Apo Dios kan Moses,” kumwa ka urog ya iniggam atte toktok ni adili, awad kad makotban makwa e itollong nay a natago.” Wot mangwa ak Moses ak urog we buransi ya da mangitollong naisalakan. Ak Moses de kapanosan we mammadto’n Apo Dios we natago ad Israel. Sa unos ni opat puro we tawon impangat na da tago atte desyerto. Sakbay kad we natoy ak Moses kanan Apo Dios kan siya,” Asiyak mangibo-on ak osa e mammadto we isum manipud atta Israelites. Asina ibaga atta tago da losan we ibilin ko.”
Maika duwampuro ya osa we Iglato - Pinakan Jesus da Tago
Ummoy kad de adu we tawon da tago ad Israel nanginap da sabali we mammadto we awat Moses. Wot anungos na kad niyanak ak Jesu Kristo atte ili ad Israel. Insuro na da tago panggop kan Apo Dios we awat na de kiwwan Moses. Ummoy da tago atte desierto we lugar ta dongron da siya. Naurat da yakon ippon makan. Inggaw osa we babaro we nangdon ak lima’n boras we tinapay ya duwa e baran-og we ugadiw. Innara’n Jesus de tinapay ya ugadiw wot manggappiya kan Apo Dios. Oni kad pinakanana da losan e tago we norpu atte sadi ye makan. Inggaw da nasurok we liman libo we tago kan dida. Kananda tago,” Ippon duwaduwa na e sana de mammadto.” Kanan Jesus kan dida,” Sakon de tinapay ni Biag. Da awad we umali kan sakon adida pon maurat, ya da mamati kan sakon adipon gudas mauwaw.
Maika duwampuro ya duwa we Iglato - Naka-ugud ak Jesus kan Moses
Da Moses kan Elijah losan da mammadto’n Apo Dios. Natago da atte adu-adu gay we tawonsakbay we dummatong ak Jesus atte lubong. Takon ay no katti, osa kad we orgaw namparang we kaduwa da Jesus atte toktok ni bilig. Da turo we sana luminang we amod de padda na awat ni kilat. Igammo’n Jesus we madandani matoy wot nakaug-uggud kan da Moses kan Elijah pangggop atte umadani we katoy na. da turo we gagayyom Jesus dingngorda da nan-uugudanda. Oni pon dummotong da libo-o wot tangbana dida losan. Sa gingan Apo Dios nan-ugud manipud atte libo-o we kanana, “Sana de anakko – dongron yo siya” nagangpot kad de ginga nan-ugud abus ak Jesus ak innila da gagayyom na.
Maika duwampuro ya turo we Iglato - Natoy ak Jesus gapu kan ditako
Da tago ad Israel inidyan da ak Jesus wot gongaton da siya. Inlansan da soldado atte kayo we kurus. Ginngat da gos indoga da duwa e tago kan siya. Da anna e duwa man-aakaw ya pumapatoy da yakon ak Jesus adina pon dinada-il da lintog Apo Dios. Tokon no katti, sika ya sakon dinada-il tako da lintog Apo Dios. Lobbong tko we ganabon de dusa’n Apo Dios de ippon patinggana we katoy. Yakon ak Apo Dios pipi-ona da tago we losan. Adina po pi-on we matoy tako ingga-inggana, wot imbo-onna ak Jesus, sa anakna, ta arana da dusa tako. Sa matattaguwan Moses, sa dara’ ni ubbo’n we ni karnero siya de nangisalakan atta pamilia we Israelite. Ak Jesus we cordero’n Apo Dios, natoy we daton ta maisalakan tako. Sa dara na siya de bayad da basur tako. Losan we tago we tumangad kan Jesus maisalakan. “Inngaton kad Moses de buransi we urog, sa anak da tago (Jesus) masapur we maipangato, tapno da losan we mamati kan siya mangdon ak biyag we ing-inggana.
Maika duwampuro ya upat we Iglato - Ak Jesus ad Langit
Sa natoy we long-ag Jesus niilibon, yakon sa mikatlo we orgaw, ummuli ye natago kasin! Adu we tago de naka-ugud kan siya. Lummabas kad de upat puro we orgaw ummuli (Nampangato) ad langit, isuna de itotollong yo we Iglato. Sissiya we matattago Apo Dios we inggana te sana. Ak Moses mabigbig kan madaydayaw we pangat ya mammadto’n Apo Dios, yakon ak Jesus, Anak Apo Dios. Adayo de kabalinana no ak Moses. Impangat Moses da Israel we andormang atte baybay wot maisalakan da. Yakon dummatong ak Jesus ta isalakan ditako losan we umunod kan siya. (Ak osa’n orgaw) sa masakbayan we orgaw, mansubli we awatna de inona we ummuli ad langit. Awitona da losan we mamati kan siya ta makaigawda kan siya ad langit. Gagayyom, nakasagana kayo we sumurot kan Jesus? Turon dumatong siya e sana.”Mamati ka kan Apo Jesu Kristo wot maisalakan ka”.