Wa Ita'ita, wa Ata'atahi, na wa Miya, Buka Fafafaligigi Esega. Yesu In Tanuwaga

Wa Ita'ita, wa Ata'atahi, na wa Miya, Buka Fafafaligigi Esega. Yesu In Tanuwaga

План-конспект: From Matthew and Mark. 24 sections. It has a picture book to go along with the recording.

Номер текста: 423

Язык: Buhutu

Тема: Sin and Satan (Deliverance, Light/Darkness, Sin, disobedience); Christ (Son of God, Life of Christ, Authority, Jesus, Our Shepherd); Eternal life (Salvation, Broad & Narrow Ways); Character of God (Grace and Mercy, Nature, character of God, Word of God (the Bible), Power of God / Jesus); Living as a Christian (Prayer, petition, Obedience, Forgiveness, Faith, trust, believe in Jesus, Children of God, Assurance, Spiritual Life, Christian values); Bible timeline (End Time, Second Coming, Gospel, Good News); Problems (Evil Spirits, demons, Sickness, Problems, troubles, worries)

Aудитория: General

Стиль: Monolog

Жанр: Bible Stories & Teac

Цель: Teaching

статус: Publishable

Текст программы

Side A, Liba Famahata

Side A, Liba Famahata

BUHUTU
Look, Listen & Live 6
Wa Ita’ita, wa Ata’atahi, na wa Miya,
Buka Fafafaligigi Esega.
Yesu In Tanuwaga
(Jesus Teacher and Healer)
Haidagu Yauwedo! Au laoma be ada Tanuwaga au failobahim. Hesana mate Yesu. Au ata’atahi lau keseti yai na tautau au ita’itai. Yena dagugu ami atahi mate, tautau au bui.

Picture 1: Tautau Bwa’ibwa’ina, Yesu Dodoga ya Fa’atadi

Picture 1: Tautau Bwa’ibwa’ina, Yesu Dodoga ya Fa’atadi

Mataiyo 5:1-2

Tautau yai te, Yesu Keliso Yaubada wasana dodoga ya fafa’atadi. Mahudo’ida Yaubada ya ginaulida. In Yaubada wananahana. Dodoga mate Yaubada sa lau afulen pa’awa edi heyaya yo miyamiya heyaheyayadi yai. In moho, Yaubada ya fanuhada.
Yesu Yaubada lisina yai ya laoma. Yaubada ena laulau mahudo’ina ya sibai (pa’ana In Yaubada Natuna). Yesu ya laoma be dodoga ya fatalahadi sidohana haba Yaubada edi sibasiba bodaina.
Au ata’atahi haba somo Yesu dodoga ya fatalahadi emi e dede, haba Yaubada Wananahana Mwahumwahulina ami sibai hinaga.

Picture 2: Tautau Fafaluwagana, Luma Luwaga

Picture 2: Tautau Fafaluwagana, Luma Luwaga

Mataiyo 7:24-27

Yesu dodoga luwaga wasadi ya dedei. Hesa ena luma ume’ehu hewana yai ya fa’obiyo. Ena aba obiyo ya adidili. Hwayahwayau ya laoma mate hige i guli.
Hesa ena luma gelegele yai ya fa’obiyo. Hwayahwayau ma usa’usana ya laoma, be lumana ya ya’i.
Ita hinaga bena eda mwahuli ai ume’ehu te fa’obiyo.
Ibe Yaubada wasana ya lau fa’ata’en te awa’abiyen, haba te adidili yena pilipili te faho’inadi.
Yo Satani ibege gonowana i fadihodihoda.

Picture 3: Tautau Fafafaihonana, Eda Mala Bena sa Ita

Picture 3: Tautau Fafafaihonana, Eda Mala Bena sa Ita

Mataiyo 5:14-16

Ai kamumu haba mala sidohana em abi’abina? Doga hesa tautau yai ena mala ya abi hitin, be dodoga haisa luma yai mala ya feledi.
Taumoho hesa mate yauyaulena. Ena mala ya simo noho ubuna yai. Yesu mate tano’ubu ana mala. Eda’eda ya lau Yaubada lisina, ya fa’itada. Yena ena liba te awa’abiyedi, dodoga haisa haba Yaubada ena mala ai lisida sa itayama.
Yesu iyen,
“Emi mala ti sina dodoga ai lisidi, haba emi laulau loholohodi sa itadi, be Tamamiu Galewa yai sa tole hitin.
Yaubada ena mala tabu ta simo, bena haidada sa ita, yo Yesu wasana sa atahiyen.
Be haba eda’eda ya lau Yaubada lisina sa sibai hinaga.

Picture 4: Tautau Fafatina Loma Dogana Yudeya Dogana ya Talai

Picture 4: Tautau Fafatina Loma Dogana Yudeya Dogana ya Talai

Mataiyo 5:38-42

Loma hiyala dogana Yudeya ya talai hola au ita! Solodiyana ya tala ma’uda dogana ana luhuluhu ya abi hinaga. Dogana haba somo ya ginauli?
Yesu dodoga ya falibadi, iyen,
“Sai somo ya ginauli faheyaya ai lebem tabu am hala u abi. Yena sai ya lau papalim, tefa hesa hinaga u felen, be aniniya i oi.
“Sai am luhuluhu ya abi, am gogoma luhuluhuna hinaga u felen.”
Sai ya talaida tabu ada hala ta abi hinaga, pa’ana Yaubada iyen,
“Yau haba am E fofo, yo Yau haba am hala E abi.”
Heyaya tau ginaulidi Yaubada haba ya panisidi, pe’i ai mulina o ma miyadi. Ya falibada mate, heyaya maisana bena loholoho te ginauli ada waiyunu ai lisidi.

Picture 5: Tautau Fafafaligigina, Te Lau’u’ula Lau Yaubada Lisina

Picture 5: Tautau Fafafaligigina, Te Lau’u’ula Lau Yaubada Lisina

Mataiyo 6:5-15

Tautau yai te, dodoga luwaga sa laulau’u’ula lau, Yaubada lisina. Hesauna mate eda’eda la’ila’ina yai ya obiyo, na ya lau’u’ula. Ena fanuha bena dodoga sa no’ono’o’en. Yaubada lau’u’ula lolofa ibege i buidi.
Yesu iyen,
“Yena wa lau’u’ula, u lau em ai bili, be eda’eda u gudu na u lau’u’ula lau Tamam Yaubada lisina. Haba Tamam somo wa ginauli modigafuhi ya itam, maisana ya felem.”
Eda fanuha somo Yaubada ha’a ya sibai. Hige bena fuya ou’ou’uli ta fafaliba. Bena moho lau’u’ula yai te fafadebasae, yo haidada bena edi te lau’u’ula. Bena ena nuwa afule te an’etai somo heyaheyayadi te ginaulidi, yo te an’etai, be ya bobodiyeda Satani ena laulau heyaheyayadi yai.

Picture 6: Tautau Faligigi Esega, Doga Heyayana Li’e ya Lau Falili

Picture 6: Tautau Faligigi Esega, Doga Heyayana Li’e ya Lau Falili

Mataiyo 13:24-30, 36-43

Dodoga heyaheyayadi li’e sa lau falili gabu fwaufwau yai. Iti mate tanohi tanuwagana ana waiyunu. Tanohi tanuwagana hige i lagau pa’ana ibe li’e loholohodi i sulu esegahidi. Edi anaho ya bagiyen. Na habahim ya lisi be hawahawa ya gabu goludi.
Haidagu, Satani dodoga heyaheyayadi ya toledi Yaubada ena dodoga maidadi tano’ubu yai te. Yena ana fuya ya mahano, Yesu haba ya fuyoma. Yaubada tau awa’abiyenna yo tau heyaya haba ya fakasadi. Yesu enehena haba ya abidi be maidana sa miya, na heyaheyayadi haba ya gabu goludi ma’edi Satani.

Picture 7: Tautau Faligigi Luwaga, Yesu Yo Wawaya Kiki’ina

Picture 7: Tautau Faligigi Luwaga, Yesu Yo Wawaya Kiki’ina

Mataiyo 18:1-6, 19:13-15

Fuya esega dodoga nanatudi sa ledima Yesu lisina. Edi fanuha bena wawaya ni Yesu ya abi’inadi yo edi ya lau’u’ula lau Yaubada lisina. Ana hewali bena sa dui fafuyodi, na Yesu mate, ana hewali edi nuwatuhu hige i fanuha be iyen,
“Ti otawa ti laoma lisigu, tabu au guduguduidi. Yaubada ena basileiya mate wawaya enehedi.”
Yesu ana hewahewali ya falibadi, iyen,
“Bwagana ami buibui, be umi doha wawaya kiki’ina te, Yaubada ena basileiya ibege au luhu sola,”
Aniyona mate, Yena sai ya fakiu fuyoi doha wawaya mate, Yaubada ena basileiya yai ya la’i.”
Afahaidagu, salumadi sa nuwa saesae, yo bena sa la’i wananaha habahim dodoga haisa, mate ibege ti famuli watanigu.

Picture 8: Tautau Faligigi Faihona, Sipisipi yo Tau Ita Watanidi

Picture 8: Tautau Faligigi Faihona, Sipisipi yo Tau Ita Watanidi

Mataiyo 18:12-14

Yesu dede te ya dedei, iyen,
“Doga hesa ena sipisipi 100. Esega ya banban yo fede ya tafo ya’aya’asi. Yo fede sipi 99 ya gela afuledi na ya lau asi’asinana ya lau yo’oi. Gegegena wa ya lobahi, nuwana mate ya amna wananaha.
“Gonogonowana mate Yaubada hige i fanuha bena sai la’i i asina, pa’ana Satani ena laulau sa lau watan.”
Yesu mate In sipisipi tau ita watanidi loholohona.
Ya laoma be taumoho yo waihin Yaubada sa lau afulen mate, ya fafuyodima.

Picture 9: Tautau Faligigi Fati, Tau Paisowa Heyayana

Picture 9: Tautau Faligigi Fati, Tau Paisowa Heyayana

Mataiyo 18:21-35

Tau paisowa hudo’i ya anhagahaga ba’isa lebena yai hige gonowana bena i famaisadi. Ba’isa ya liba bena tau paisowana sa lau’une’en. Doga wa ya liba gadogadola, yo fede, ba’isa ya ita nuwatohatoha’en.
Hagahaga mahudo’idi ya yoga afuledi, na ya faliba, be ya lau. Tau an’une wa doga hesa ya ita, in hinaga ya an’une taumoho te lisina yai. Yo fede ya talai ya ofi ya falau deli. Tau paisowa haisa ba’isa ena sa liba. Manana ya bala, be taumoho bwa’ibwa’ina ya faliba, iyen,
“Sidohana be hidam hige u nuwatohatoha’en doha yau E nuwatohatoha’em.”
Yo fede tau paisowa wa deli yai ya tole.
Afahaidagu, Eda heyaya mahudo’idi Yaubada ya nuwa afuledi, be ita hinaga yena sai somo ai lisida ya ginauli faheyaya bena hinaga te nuwataluwedi.

Picture 10: Tautau Safuhudohudo’i, Tau Paisowa Maisadi sa Abi

Picture 10: Tautau Safuhudohudo’i, Tau Paisowa Maisadi sa Abi

Mataiyo 20:1-16

Tau paisowa sa laoma maisadi sa abidi. Maisa tau abi bwa’iyen mate, in ya paisowa mulita. Paisowa begana moho ya ginauli. In moho tanohi tanuwagana mate doga gadogadosisina.
Lahai hudohudo’i maisana ya felen. Hesa mate lahai la’i yai ya fatubu ya lau maimailafi. Tau paisowa mulita mate in hwalahwalala ya lau ee—, ya lau famailafi, in moho mahudo’idi maisadi gonogonowadi.
Tau lau famailafi ya fatalapili. Bena maisana ya la’i. Yo fede tanohi tanuwagana iyen,
“Hidagu, yau hige ya angafuhim. Nuwam hehena yai, be wa paisowa. Yau egu ginauli be egu nuwatuhu somo E lau watan mate, logena. E gadosisiyem na sidohana be wa manabalaegu?”
Salumadi Yesu sa sunuma’en mate mwahuli hige Anadan, fafamaisa gesana Yaubada haba ya feledi.

Picture 11: Tautau Safuhudohudo’i Esega, Wawahin Faligigi Eda’eda Ganamulina yai

Picture 11: Tautau Safuhudohudo’i Esega, Wawahin Faligigi Eda’eda Ganamulina yai

Mataiyo 25:1-13

Wawahin safuhudohudo’i wasadi Yesu ya dedei.
Iti mate fafanahi mata’asina sa bagibagiyen. Tau nahi wa i’ipa atipuna yai ya laoma.
Wawahin faligigi mate iti sa nonoha, be sa failobahim.
Edi lampa sa gabudi na ma’edi sa lau mata’asi yai. Na faligigi mate yauyauledi. Edi lampa hige adi kelesin. Yo fede sa lau edi sa unedi. Mulidi yai eda’eda sa gudu. Sa mahano fuyoma, sa yogayoga, tiyen,
“Bena ‘e luhuwa!”
Tau nahi iyen,
“Hige gonowana! E fakaumiu!”
Afahaidagu, Aho ite, Yesu In Galewa yai, na fuya hesa haba ya lidima tano’ubu.
Lahaina hige ta sibai. Bena te nonoha, be te failobahin. Yesu enehena haba ya auledi be sa lau Galewa, na salumadi hige ti nonoha mate ibege ti lau Galewa.

Picture 12: Tautau Safuhudohudo’i Luwaga, Ba’isa yo Ena Tau Paisowa

Picture 12: Tautau Safuhudohudo’i Luwaga, Ba’isa yo Ena Tau Paisowa

Mataiyo 25:14-30

Yesu ena fuyoma yai haba sidohana eda nononoha? Doga la’ila’i hesa tautau yai te mate ya mahano fuyoma ena nu’u. Ya lau ma’ena tau paisowa ena moni sa ita watanidi. Ena tau paisowa luwaga ena moni sa fapaisowa be ya la’i. Edi ba’isa ya fuyoma tataudi luwaga ya famaisadi.
Fafafaihonana ena ba’isa ena moni ya pului.
Be la’ina gonogonowana. Ba’isa manana ya bala, pa’ana in doga tau tausi’ololona. Yo fede ya we’a taluhi, ena luma yai.
Yesu ena fanuha bena ena te paisowa yee—, ya fuyoma. Ita bena haidada te gadosisiyedi yo te saguhidi na te fatalahadi be Yaubada sa sibai. Haba Yesu iyen,
“Ya loholoho, u laoma be egu Ba’isa ma’em au kwade.”

Introduction to Part 2: Book 6, Side B, LIBA FAMAHATA

Introduction to Part 2: Book 6, Side B, LIBA FAMAHATA

Yaubada wasana Yesu dodoga ya fa’atati, yo ya fa’ita lobahidi, mate gigibwali Yaubada lisina yai ya abi. Tautau au ita’itai, na yena dagugu ami atahi mate, au kalasi boda.

Picture 13: Tautau Safuhudohudo’i Faihona, Yesu ya Babasito

Picture 13: Tautau Safuhudohudo’i Faihona, Yesu ya Babasito

Maleko 1:4-11

Beyabeyana Isalaela yai doga hesa hesana Diyon Babasito. Dodoga ya falibadi bena sa nuwabui na Yaubada Wananahana sa fadebasae. Salumadi Diyon sa kawawananhaen mate, sa babasito. Itete mate edi fanuha bena Yaubada edi heyaya ya nuwa afuledi yo edi laulau ya falifalihudi fafa’ilalana. Heyaya mate, Yaubada ana waiwaiyo’o. Diyon iyen,
“Muligu yai tau laoma ya gigibwali wananaha habahim yau. In haba Yaubada Yaluwana Tabuna yai ya fababasitoimiu.”
Yesu ya laoma Diyon lisina. In hige ena heyaya. In moho, ya fanuha bena ya babasito. Yesu ya pohema ho’owa yai, fafa’ilala hesa ya tubu. Yaubada Yaluwana Tabuna doha waliliya ya lofoma hewana yai. Galewa yai Yaubada ya libama, iyen,
“Um Natugu. E kwade lisim yai.”
Fuyana yai Yesu no’o abi’abidi boludi ya lau ginauli, be dodoga sa ita mate, Yaubada ena gigibwali ya felen.

Picture 14: Tautau Safuhudohudo’i Fati, Tau Faisagusagu Yesu ya Yogaidi

Picture 14: Tautau Safuhudohudo’i Fati, Tau Faisagusagu Yesu ya Yogaidi

Maleko 1:14-20

Yesu ya fanuha bena dodoga sa saguhu, Be Yaubada wasana ya fa’atadi, haba libana sa tubehi. Lahai esega Yesu gabogabo sadaina yai ya laulau na tau hama fati ya itadi.
Yesu ya falibadi iyen,
“Au lau watanigu haba doga ona’onana E fatalahamiu.”
Yo fede edi hagida sa lau afuledi, na ma’edi Yesu sa lau. Dodoga faligigi faihona hinaga ya fasinabodi. Tatau safuhudohudo’i luwaga te ma’adi paisowa. Hesadi mate tau fa’ona wasawasa. No’o abi’abidi Yesu ya ginaulidi, mate sa itadi. Yo fede, sa siba mate, in Yaubada lisina yai ya laoma.
Yena Yesu te awa’abiyen, be te lau watan, haba te siba mate, in hinaga Yaubada lisina yai ya laoma. Ya fanuha bena Yaubada wasana ya fatalahada, be haba haisa edi te liba.

Picture 15: Tautau Safuhudohudo’i Faligigi, Doga Kadukadumana?

Picture 15: Tautau Safuhudohudo’i Faligigi, Doga Kadukadumana?

Maleko 1:40-45

Fuya ma’esega taumoho kadukadumana ya laoma Yesu lisina. Ya tulibono Yesu nuwanuwana yai, na iyen,
“Yena wa fanuhagu, mate u faloholohogu.”
Dodoga haisa hige ti fanuha bena ti lau ai fadidina pa’ana ya kaduma. In moho, Yesu ya nuwatohatoha’en. Yo fede ya abi lau tauna yai, na iyen,
“E fanuham. U loholoho!”
Maihalana yai, taumoho wa ana kaduma ya wulu. Nuwana ya amna be ya fatalahadahada’en.
Afahaidagu, heyaya doha kaduma, ya hinelida Yesu lisina yai. Na yena te lau Yesu lebena In gonowana eda heyaya ya nuwa afuledi.

Picture 16: Tautau Safuhudohudo’i Faligigi Esega, Taumoho Luma Hewana yai sa Fadalolo

Picture 16: Tautau Safuhudohudo’i Faligigi Esega, Taumoho Luma Hewana yai sa Fadalolo

Maleko 2:1-12

Yesu mate luma hesa ganahewana yai, Yaubada wasana dodoga edi ya dedede. Dodoga fati taumoho dabidabina sa iloloiyama Yesu lisina. In moho, hige gonowadi bena ti luhu lau, pa’ana ganahewa hige susuhana.
Yo fede luma hewana yai gali sa ginauli, na sa fadalolo lidiyen. Yesu tau asiyebo ya faliba, iyen,
“Natugu, em heyaya E liba afuledi.”
Yudeya tanutanuwagadi haisa Yesu sa manabala’en. Tiyen,
“Yaubada ibona gonowana heyaheyaya ya nuwa afuledi!”
Hige ti kawawananaha mate Yesu In Yaubada Natuna. Yo fede Yesu taumoho wa ya faliba, iyen,
“U mwaito, be em aba eno u abi, na u lau em luma!”
Doga wa ya laulau! Yesu ya fa’itadi mate, In Yaubada Natuna. Ma’ena gigibwali, be gonowana heyaya ya liba afuledi, gonogonowana doha Yaubada ena gigibwali ya fapaisowa, be ada asiyebo ya faloholohodi.

Picture 17: Tautau Safuhudohudo’i Faligigi Luwaga, Yesu Taumoho Nimana ya Faloholoho

Picture 17: Tautau Safuhudohudo’i Faligigi Luwaga, Yesu Taumoho Nimana ya Faloholoho

Maleko 3:1-5

Tautau yai te ita mate, Yesu maidana Yudeya baba’isadi. Yudeya edi lahai tabuna yai, Yaubada sa fadebasae. Edi laugagayo ya libaen mate tabu lahaina yai sai i paisowa. Taumoho hesa mate ma’edi nimana ya dagelo. Yudeya mate Yesu sa maisimoi, bena somo doga dagedagelona ai lisina ya ginauli, bena sa ita. Yesu dodoga ya mode’edi, na iti hige edi mode hesa. Edi fanuha bena Yesu edi laugagayo ya utusi, haba sa wunui. Yo fede Yesu baba’isa ya fati’oidi, iyen,
“Eda laugagayo iyen, somo bena ai lahai te, te ginauli? Doga bena te saguhi e hafena?”
Yudeya hige somo ti libaen. Yo fede Yesu doga wa ya faliba, iyen, “Nimam u lolon!”
Nimana ya lolon. Mahudo’idi sa ita mate ya loholoho!
Afaidagu, Yaubada bena te fadebasae, yo haidada bena te ita lau lisidi hinaga; do’ata eda fadebasae Yaubada lisina mate, kufana, hige aniyona.

Picture 18: Tautau Safuhudohudo’i Faligigi Faihona, Yesu Hwayahwayau ya Fadaumwali

Picture 18: Tautau Safuhudohudo’i Faligigi Faihona, Yesu Hwayahwayau ya Fadaumwali

Maleko 4:35-41

Yesu ma’ana hewahewali waga yai sa awa, be sa lau gabogabo tefana. Hige walolona na hwayahwayau la’ila’i sa lobahi.
Gabogabo ya hin welafi, edi waga yai begana haba sa bulu. Yesu mate ya eno hwafu ganahewa yai. Ana hewali sa fanohi, na tiyen,
“Tanuwaga, ita pe’i hanahanauma yai, na sidohana hige u mode?”
Yesu ya tasi obiyoma, be hwayahwayau yo bagodu ya falibadi, iyen,
“U towa motu!”
Yo fede, ya daumwali. Yesu ana hewali ya falibadi, iyen,
“Pa’ana somo be ami wasabu? Hige emi sunuma lisigu yai?”
Ana hewali sa no’o, be tiyen,
“Ite sai? Hwayahwayau yo bagodu alinana sa awa’abiyen te!”
Afahaidagu, Yesu ena gigibwali ya la’i, habahim, ginauli mahudo’idi edi gigibwali. Tabu ta wasabu na ta kawawananaha’en moho.

Picture 19: Tautau Safuhudohudo’i Faligigi Fati, Waihin Dodoga Baiwadi Pwaludi yai

Picture 19: Tautau Safuhudohudo’i Faligigi Fati, Waihin Dodoga Baiwadi Pwaludi yai

Maleko 5:25-34

Waihin baiwa pwaluna yai te, mate ya asiyebo bolima safuhudohudo’i luwaga.
Ya sibai mate Yesu gonowana ya faloholoho. In moho, Yesu ya ma’e’en be hige gonowana i faliba. Ya nuwanuwatuhu, iyen,
“Ibe ana luhuluhu moho E abi’ina, haba E loholoho.”
Yo fede Yesu ana luhuluhu ya abi’ina, hige walolona yo fede ya loholoho.
Yesu amna ya abi mate, gigibwali ya lau afulen. Yo fede ya obiyo tohai, na iyen,
“Sai agu luhuluhu ya abi’ina?”
Dodoga sa ouli, Yesu sa gana panpanen, na waihin ya nuwatuhu lobahi mate. in ya libalibaen. Yo fede ma wasabuna ya laoma be ya tulibono nuwanuwana yai, na Yesu iyen,
“Em sunuma lisigu yai ya faloholohom. Ma nuwa loholohom u lau.”
Tano’ubu yai te dodoga sa ouli. In moho Yesu esega-‘esega ya sibai yo ya bobodiyedi. Um ya bobodiyem hinaga. Ya fanuham bena wa laoma lisina yo wa sunumaen.

Picture 20: Tautau Taumoho Esega ya Pe’i, Yesu yo Tine’eu Pe’ipe’ina

Picture 20: Tautau Taumoho Esega ya Pe’i, Yesu yo Tine’eu Pe’ipe’ina

Maleko 5:22-24, 35-43

Diyailusi mate, doga hesa la’ila’i. Natuna mate ya asiyebo. Ya lau faliba, bena Yesu ya laoma, be ya faloholoho. Yesu hola hige i abi mahanoma, na tine’eu wa yawasina ya ofi.
Yesu Diyailusi ya faliba, iyen,
“Tabu u wasabu, u kawawananaha moho.”
Dodoga mate sa tantan, na Yesu ya duidi sa lau. Diyailusi ma lahuna ya auledi, be sa lau tine’eu ena aba ota.
Yesu tine’eu pe’ipe’ina nimana yai ya abi, na iyen,
“Tine’eu, u obiyo!”
Makai! maluwaga! Ya tasi mwaito, be ya laulautiga yo kalahe sa felen.
Pe’i mate Satani ena mada loholohona, in moho Yesu ena gigibwali be ya leihafihafiti.
Salumadi sa kawawananaha yo sa lau watan mate, pe’i hige ti wasabuwen.
Yesu ya adidili habahim, Satani, heyaya yo pe’i.

Picture 21: Tautau Taumoho Esega ya Pe’i Esega, Yesu yo Waihin Ta’ota’owawana

Picture 21: Tautau Taumoho Esega ya Pe’i Esega, Yesu yo Waihin Ta’ota’owawana

Maleko 7:24-30

Fuya ma’esega, ta’owawa waihinina ya laoma Yesu lisina. Natuna waihin mate, yaluwa heyayana ya luhufi. Bena ya faliba. be ya liba dui. Yesu mate In Yudeya, ya laoma bena Yudeya ya saguhidi.
“Gonowana ta’owawa ya saguhidi habahim ena dodoga wananahadi? Ita’itana haba doha wayowa te fakalahedi, na wawaya sa guliguliyam.”
Na waihin Yesu ya faliba iyen,
“Wawaya adi mapula sa be’u lidi hatahata ubudi yai, mate wayowa haba sa andi.”
Yesu iyen,
“Em sunuma ya la’i wananaha lisigu yai. Somo wa an’etai haba wa abi.”
Waihin wa ya fuyo ena luma mate, yaluwa heyayana wa natuna ya lau afulen. Dodoga sulu hudo’i-hudo’i mate Yesu ya fanuhadi yo ya saguhidi. Ena fanuha bena te sunuma’en, bwagana ita sai o somo yai te laoma.

Picture 22: Tautau Taumoho Esega ya Pe’i Luwaga, Yesu yo Doga Beya Tuituina yo Alina Wesawesasana

Picture 22: Tautau Taumoho Esega ya Pe’i Luwaga, Yesu yo Doga Beya Tuituina yo Alina Wesawesasana

Maleko 7:31-37

Dodoga haisa taumoho hesa sa leyama Yesu lisina. Ya tubuma mate ya do’odo’o, yo hige gonowana i liba komokoma’i. Yesu nimana gigina ya lolon lawen dogana beyana yai. Na habahim lelona ya abi’ina. Yesu ya ita’ita hasa Galewa, na Yaubada ya an’etai, taumoho wa ya faliba, iyen,
“U taso’e!”
Hige walolona, na beyana sa ta’afasi yo ya liba sa dudulai. Dodoga sa no’o, be tiyen,
“Yesu ginauli mahudo’idi ya ginaulidi mate, sa dudulai. Dodoga beya do’odo’odi yo alina wesawesasadi ya faloholohodi!”
Yesu hinaga gonowana beyada ya so’edi, be haba gonowana Yaubada ena Liba te atahi, yo te nuwatuhu lobahi. Haba Yesu te no’o’en hinaga, be wasana dodoga te faliba komakoma’inidi.

Picture 23: Tautau Taumoho Esega ya Pe’i Faihona, Yesu Matatoutou Hesa ya Faloholoho

Picture 23: Tautau Taumoho Esega ya Pe’i Faihona, Yesu Matatoutou Hesa ya Faloholoho

Maleko 8:22-26

Fuya esega Yesu taumoho matatoutouna ya aulen, be ya lawen nu’u mulimulina. Yesu kanisona yai doga wa matana ya fa’wau, na iyen,
“Somo la’i wa ita, e hige’e?”
Matana begadi ya falaladi, be iyen,
“Dodoga E itadi. In moho, nenedi doha oyagi ti laulautiga.”
Yo fede, matana ya abi’ina fuyo’idi. Habahim Yesu yo dodoga haisa ya ita komakoma’inidi.
Afahaidagu, Satani yaluwada ya elitoudi, be ibege Yesu ta ita yo ta sibai. In moho, Yesu bena te an’etai, be matada ya falaladi. Haba In hinaga te sibai.

Picture 24: Tautau Taumoho Esega ya Pe’i Fati, Yesu Gwama Hesa Yaluwa Heyayana Ganahewana yai ya Lib

Picture 24: Tautau Taumoho Esega ya Pe’i Fati, Yesu Gwama Hesa Yaluwa Heyayana Ganahewana yai ya Lib

Maleko 9:14-27

Taumoho hesa natuna ya leyama Yesu lebena. Gwamana mate yaluwa heyaya lisina yai, be fuya ou’ouli ya kamkam fafatabubu. Yaluwa heyayana Yesu ya ita, yo fede, gwama ya lofe lidiyen tanohi yai. Tamana ya tan, iyen,
“Yena gonowam somo wa ginauli, u saguhimai.”
Yesu iyen,
“Ginauli mahudo’ina mate, gonowana yena sai ya kawawananaha Yaubada lisina yai.”
Habahim, Yesu ya liba lau yaluwa heyayana lebena yai, iyen,
“Gwama u lau afulen!”
Ya tan walawalaui, na yaluwa wa ya kalamahano. Yesu ena gigibwali ya la’i habahim, yaluwa ou’ouli yo guyau tano’ubu yai te.
Mulina yai Yudeya baba’isadi Yesu sa wunui. Habahim no’o laulau’una ya taumahata.
Yesu ya mwaito fuyo. Pe’i yo Satani ya leihafihafitidi. Pa’ana Yesu In Yaubada Natuna Wananahana.
##

\h End of Book 6: Jesus – Teacher and Healer.
\h Translated 23/1/06, Patrick Sadileutu
\h Checked by P. S. 2/06.
\h keyboarded 11/2007, Mary Cooper
\h computer editing and checking, √ Russ Cooper, 2008-11.

Схожая информация

Free downloads - Here you can find all the main GRN message scripts in several languages, plus pictures and other related materials, available for download.

"Look, Listen and Live" audio-visual - A set of 8 programs of 24 pictures each for evangelism and Christian teaching. The series presents Old Testament characters, the life of Jesus, and the young church.

How to use GRN Audio visual resources - 2: Going Deeper - This article gives further explanation of how people learn from the stories, and why the stories do not have a lot of commentary.

Аудиотека GRN - Евангелистские и базовые Библейские учебные материалы , присущие людским нуждам и культуре в различных стилях и форматах

Copyright and Licensing - GRN shares it's audio, video and written scripts under Creative Commons

Creating DVDs using the GRN Slide show Videos - How to burn DVDs for specific people groups you are trying to reach

Choosing the right audio or video format - What audio and video file formats are available from GRN, and which one is best to use?