Buukhu 1 Woone, Wiiwe ni okhale
![Buukhu 1 Woone, Wiiwe ni okhale](https://static.globalrecordings.net/300x200/lll1-00.jpg)
План-конспект: Adam, Noah, Job, Abraham. 24 sections. It has a picture book to go along with the recording.
Номер текста: 418
Язык: Xirima
Тема: Sin and Satan (Judgement, Sin, disobedience, Satan (the devil)); Christ (Sacrifice / Atonement); Eternal life (Salvation); Character of God (Grace and Mercy, Nature, character of God, Word of God (the Bible)); Living as a Christian (Worship, Obedience, Faith, trust, believe in Jesus); Bible timeline (Creation, Prophecy, fulfillment of, Gospel, Good News); Problems (Problems, troubles, worries)
Aудитория: General
Стиль: Monolog
Жанр: Bible Stories & Teac
Цель: Teaching
Библейская цитата: Extensive
статус: Publishable
Текст программы
Masu oopacera
![Masu oopacera](https://static.globalrecordings.net/300x200/lll1-00.jpg)
Mooni asinthamwenaaka. Moone, musome wa atthu oopaceriha okhala mwa elapo ya vathi. Awo annoosuwelihani vancipale sa Muluku mmoharu eekhaikhai. Mwehe moone ethoonyihero sa buukhu ooxeera. Mwehe ethoonyihero yoowaattamela mwiiwe oruma.
Ethoonyihero 1: Opakiwa wa Adamu ni inama
![Ethoonyihero 1: Opakiwa wa Adamu ni inama](https://static.globalrecordings.net/300x200/lll1-01.jpg)
Maphattuwelo 1:1 - 2:14
Woopacera, khiyaariwo etthu ekina mweelaponi. Muluku aakhanle paahi. Ariwo Muluku mmoharu paahi. Owo munepa, hiyo khanimwera omoona. Owo ookhalano owera wootheene. Owo oosuwela itthu sootheene. Owo ori mapuro ootheene. Muluku aapaka sootheene sirí osulu ni vathi. Owo aampaka mutthu mwa ntthupi na etthaya. Owo aamvaha mutthu munepa, weera amusuwele Muluku. Tivavonto, Muluku aamutteha mulopwana nsina na Adamu. Adamu aahaavaha masina asinama ootheene yaawo Muluku aapankaawe. Muluku aahoona sootheene aapankaawe weera saari sooreera.
Ethoonyihero 2: Mwaara a Adamu
![Ethoonyihero 2: Mwaara a Adamu](https://static.globalrecordings.net/300x200/lll1-02.jpg)
Maphattuwelo 2:15-25
Muluku aamukuha Adamu mmatta mooreera weera elimeke ni athokororeke. Yaakhala asinama a maloko ootheene, sithiana ni silopwana, ni khaariwo nthamwenaawe Adamu. Muluku aamuruuhela Adamu ikhove sitokotoko. Muluku aakuxa niparari nimoha na moono muthiana wa Adamu, aampaka muthiana. Muluku aamuruuhela Adamu weera akhaleke nthamwenaawe. Mulopwana ni amwaarawe yaahkala oohiwara, ni khayoona wuuliha muru. Awo yannawera otthekula ni Muluku, sintoko nthamwenaaya annene. Khawariwo othanana, okhwa naari itthu soonanara mwa mapuro yaale ootikiniha.
Ethoonyihero 3: Enoowa ni ottheka
![Ethoonyihero 3: Enoowa ni ottheka](https://static.globalrecordings.net/300x200/lll1-03.jpg)
Maphattuwelo 3:1-8
Muluku aamuleela Adamu: "Muceeke miri sootheene soowiima siri mmattamo. Vano muhice mwiri ole woosuweliha sooreera ni soonanara. Niwooko, nihiku muneeraanyu muce, munookhwa." Mutthu aakhala ehuhu yincipale ni murettele ni Muluku ni itthu Muluku aapankaawe. Vano yoonanara yannathurumela. Satana aari mungelo a wiirimu, aawana ni Muluku. Owo aatthuna okhala mutokweene ompwaha Muluku. Muluku aamoomola Satana wiirimu, hiihotho Satana aathatuwa mwiittani a Muluku ni a mutthu aapankiwe ni Muluku. Satana aamurweela mwaarawe Adamu iipintheene mu'nowani. Owo aamwooka mwaarawe Adamu eeraka: Muluku khanoosivelani. Owo aamweerela mwaarawe Adamu: Nyuwo mwacaaru mwiri ola, khamukhwa, ettiithu. Amwaarawe yaahooca ni yaamvaha Adamu. Awo khiyaamwiiwelenle Mpattuxa, ni minepa saya saahookhwa sintoko Muluku aahimalaawe. Vanaano vanaano yaaheerera wiipiitha weera Muluku ahiwoone, moowuulihani muru niwooko awo khiyaawannre.
Ethoonyihero 4: Woomoliwa wa mmatta
![Ethoonyihero 4: Woomoliwa wa mmatta](https://static.globalrecordings.net/300x200/lll1-04.jpg)
Maphattuwelo 3:14-25
Muluku aawoomola Adamu ni amwaarawe wa omatta, weera aasempihe yoonanara yootepaxa. Woona omatta, waakhala mwiri mmoha waari wa okumi woohimala. Muluku aatthuna waasembiha oca soowiima sa mwiri owo. Owo aamweerela Adamu: "Weera weyo wohooca yoowiima ya mwiri kookhoottihenraaka, yoolaphiwa elapo yootheene niwooko na weyo. Weera ophwanye yooca, ngweereke orettheela vancipale. Wa muthiana, Muluku aamweerela: "Kinoowaaceerera ohaawa wa, wooyárani."
Enowa, Muluku aaheerela: "Niwooko na ela opankaawo, onoolamphwa, ngweereke wiipurula ni erukulu." Enowa yaathatuwa mwiittani aatthu.
Adamu aahaatteha amwaarawe nsina na Eva. Eva aahaayara anamwane ancipale. Ootheene hiyo ti anamwanaawe.
Hiyo nri okhwipi ni Muluku. Hiyotho khannamwiiwelela Muluku antoko Adamu. Vano Muluku aamuroromeliha Adamu weera nihiku nimoha anoomuruma mutthu mmoha. Owo onoongwina Satana ni (stuk uitgeval uit opname) onoonihokoloxera wa Muluku. Mulopwana owo ti Yeesu Kristu.
Ethoonyihero 5: Noowa ni nikhula ntokotokoxa
![Ethoonyihero 5: Noowa ni nikhula ntokotokoxa](https://static.globalrecordings.net/300x200/lll1-05.jpg)
Maphattuwelo 6:1-22
Nloko naamutthanre Adamu ni Eva neetta mumphironi wa Satana. Muluku aathanana ompakawawe mutthu. Mutthu aamutthara Muluku aari mmoha paahi, Noowa. Nihiku nimoha Muluku aahima amuleela Noowa, eeraka: "Kohuumiha murimaaka waaphwatta atthu ootheene, niwooko elapo yootheene yoosareya soonanara. Opake nikula ntokotoko weera wiivuluxe. Opake nikula nnene sintoko kineeraaka kooleele. Miyo kinoorupiha epula etokotoko, yeeyo eneera ephwate itthu sootheene siri ni okumi. Wamalihá opaka nikula nno, ovoloweke weyo ni amwaraawo, ni anamwanaawo ni axaaraya. Waakuxe waavoleihe munikulani axinama amaloko ootheene, eeli eeli, muthiana ni mulopwana, ni ipalametho hiiho, weera osunke okumaaya."
Noowa aapaka sootheene sintoko Muluku aamulenlaawe.
Ethoonyihero 6: Maahi asanraaya mulaponi
![Ethoonyihero 6: Maahi asanraaya mulaponi](https://static.globalrecordings.net/300x200/lll1-06.jpg)
Maphattuwelo 7:1-24
Ehuhu yeeyo Noowa apakaka nikula ntokotokoxa, annaaleela atthu eeraka Muluku onoopwatta elapo. Noowa annaaleela weera, ovuluxiwa, ori orukunxa murima ohiiya miteko soonanara ni otthawela munikulani. Awo khiyaatthuna omwiiwelela Noowa aahimaawe. Nimalakaru opakiwa nikula ntokotokoxa, Noowa ni ahimaawe ni asinama ootheene yaavolowa mootthawelamo. Muluku aawala nsele. Epula yaapacera orupa. Yaarupa othana ni ohiyu, mahiku miloko mixexe, erupaka elapo yootheene. Maahi yaaneeliha itthu sootheene mpaka nyaako. Itthu sootheene saarino okumi, saahookhwa. Noowa paahi, ni yaale yaari vamoha munikulani ntokotokoxa, yaakhalano okumi.
Ethoonyihero 7: Muura ni yoororomeliha ya Muluku
![Ethoonyihero 7: Muura ni yoororomeliha ya Muluku](https://static.globalrecordings.net/300x200/lll1-07.jpg)
Maphattuwelo 8:13-22
Epula emaanleene, elapo yaamala eyaakha emoha ehuumále. Noowa ni amusaawe ni asinama ootheene yaakhumamo munikulani ntokotokoxa, weera epacereke okhala okumi munyowani. Noowa amvahaka asante, aamveleela Muluku mwaamunama mmoha. Muluku ahaakhulela yooveleela ya Noowa ni Muluku aahela muura osulu, eeraka: "Miyo nkirwa kiphwattatho ni maahi sootheene sirino okumi. Ihuhu sootheene kineeraaka kooneke muura, nkeereke wuupuwela yoororomelihaaka."
Asinthamwenaaka, noonaka muura nuupuweleke weera Muluku onnavuluxa. Ehuhu ya Noowa naari nikula naavulunxe.
Ninnoona weera hiyo nri nloko na Noowa anamattheka. Tivawo, Muluku eenraawe, kinoothoriha elapo emaara yanaaveeli. Ehuhuweene yeeyo, Muluku anaathorihe elapo ni mooro. Atthu ootheene yaale animuroromela Muluku eekhaikhai, khontthuneya woova, niwooko Mvuluxa Muluku omurummaawe, Yeesu Kristu, nikulá nootthawelamu.
Ethoonyihero 8: Empa ya o Babel
![Ethoonyihero 8: Empa ya o Babel](https://static.globalrecordings.net/300x200/lll1-08.jpg)
Maphattuwelo 11:1-9
Anamwane a Noowa yaakhalano asinamwanaaya ancipale. Muluku aahaaleela weera musareyeke elapo yootheene, vano awo khiyaatthuna omwalamwala. Atthu yaahiiye omwiiwelela Muluku ni yaheera: "Nrowe nipake ebooma etokotoko, ni empa etokotoko eniiphiye wiirimu. Muluku aahoona etthu yaapankaaya ni aahoonatho wiiwuwiha waya. Ni Muluku aaheera: "Atthu ootheene ari vamoha, ni ootheene anuuluma nuulumo nimoha. Itthu soothesene antthunaaya opaka, anoowera. Nrowe nikhuruwe náankanyere muulumwaya weera ehiiwananeké mukina ni mukhwaawe. Mwaawéhe atthu ari va ethoonyihero ela. Awo kheniiwanana mukina ni mukhwaawe. Hiiho atthu ootheene yaahiya opaka esidade etokotokoxa. Yaarowa okhala mapuro mancipale oohiyanahiyana. Ohiiwelela wa atthu wohaankanyera muulumo mancipale. Ohiiwelela onnaamwalamwaliha atthu mukina ni mukwaawe, ni onnaamwalamwalihatho ni Muluku.
Ethoonyihero 9: Mulopwana mmoha ooreera murima nsinanaawe Yoopi
![Ethoonyihero 9: Mulopwana mmoha ooreera murima nsinanaawe Yoopi](https://static.globalrecordings.net/300x200/lll1-09.jpg)
Yoopi 1:1-12
Mulopwana a ethoonyihero ela, nsinanaawe Yoopi. Owo aamvekela Muluku eekhaikhai paahi ni anniiva enama anahisa amvahaka Muluku eekhaikhai paahi. Owo khaatthara iphiro soohiiwelela, iphiro sa Satana. Nihiku nimoha Satana aamwaatamela Muluku amootheraka Yoopi. Muluku aamuleela Satana weera, Yoopi mulopwana oowiiwelela ni oororomeleya, tivawo Muluku aamureelinhaawe weera owo akhalé oopuha. Vano Satana aaheera, Yoopi, onnoovekelani nyuwo niwooko oraawé oopuha. Satana aaheera: "Mwaakitthunihaka weera miyo kimwaakhe opuha wawe wootheene, munoomoona weera owo onimoolaphani. Muluku aasuwela weera Sataana onimootha. Muluku aasuwela weera Yoopi onookilapa naari ahaangweene. Muluku aamwaakhulela Satana weera okuxeke opuha wootheene wa Yoopi.
Ethoonyihero 10: Yoopi ori muwiinlani
![Ethoonyihero 10: Yoopi ori muwiinlani](https://static.globalrecordings.net/300x200/lll1-10.jpg)
Maphattuwelo 1:13-22
Nihiku nimoha anamiteko a Yoopi yaaruuha mitthenga soothananiha. Sootheene saaphinye nihiku nimoha. Namuteko oopacera aaphiya anahima eeraka, amwiittani a Yoopi ahiiya inamasawe sootheene. Ahimaliihe olokolola, namuteko mukina aaphiya anahima eeraka, mooro wohiiva ikhondolo sootheene vamoha ni amukukhula. Anaararu aaphiya anahima eeraka, anamwiiya yaawiiya axinamaawe yaateexa mirintti. Mukina aaruuha mitthenga soothananihaxa. Owo eenre: Anamwanaanyu yaari vamoha yaahakalalaayavo ecaaka. Yaavira eyuupuru anaphwata empa mpaka yaathukumannaayamo ni yaahookhwa ootheene." Yoopi aamettha maihaawe ooniheraka othanana. Yoopi aamorela vathi ni ariipiweene murima. Owo aaheera: Apwiya aavaha, ni Apwiya aakuxa. Ooreelihiwa ekhalé Apwiya." Soothesene iya, Yoopi khaamutthekenle Muluku.
Ethoonyihero 11: Ohaawa wa Yoopi
![Ethoonyihero 11: Ohaawa wa Yoopi](https://static.globalrecordings.net/300x200/lll1-11.jpg)
Yoopi 2:1-4
Satana aahoona weera nlelo Yoopi onnamuttiittimiha Muluku. Satana aamweerela Muluku: "Waakhanle weera mwaakeemihera onanariha erutthu ya Yoopi, owo aamoolaphani. Muluku aamutthuniha Satana weera amweerere Yoopi. Satana aavinya amvulaliha Yoopi ni saamukhuma ithuku sitokweene erutthu yootheene yaakhuma marohi. Amwaarawe yaamweerela: "Omulaphe Muluku ni okhwe." Yoopi aahaakhula: "Naakheleke itthu sooreeraru mmatatani mwa Muluku, nikhootteke soonanara?"
Yaahoorwa asinthamwenaawe Yoopi araru yannalokolola ni yoowo mahiku mancipale. Awo yaaheerera waasaasa waarwaayavo ohaawa wa Yoopi. Awo yaaheera weera Yoopi oompahula Muluku, tivawo Muluku onoomuttaruxa. Yoopi khaakhulenle seiyo yaahimaaya. Ohaawa wawe wootheene, Yoopi khaahingye omutthara Muluku. Ommaleloni, Muluku aalokolola ni Yoopi amuleelaka waarwaayavo ohaawa wawe. Muluku aaweerelatho asinthamwenaawe Yoopi ni aahaapwapwela (repreendeu): Nyuwo moomuleela etthu yoowootha Yoopi.
Muluku oosuwela itthu sootheene. Ti Yoowo paahi oneera athanle okumi wooreera hoye-hoye woonanara wa hiyo.
Ethoonyihero 12: Ovinyereera wa Yoopi
![Ethoonyihero 12: Ovinyereera wa Yoopi](https://static.globalrecordings.net/300x200/lll1-12.jpg)
Yoopi 42:1-17
Vecaambuloni, munnamoona Yoopi weera oolama ni mpuhi. Miyo kinimooleelani moota sikhumelenlaaya. Weerera wootheene wa Satana, Yoopi khaamuhingye Muluku. Niwooko Yoopi khoohiyono aamusivela Muluku niwooko na opuha. Tivawo Muluku aahuupuwela omureeliha Yoopi veeli. Muluku aalokolola ni mmoha aasinthamwenaawe Yoopi eeraká: "Miyo kohoonyonyeriwa ni weyo ni asikhwawo eeli niwooko khamwaahimme ekhaikhai sa miyo ni namutekwaaka Yoopi. Muluku aahaaruma weera erowe wa Yoopi aavekelele. Yoopi aahaavekelela asinthamwenawe ni Muluku aahaalevelela. Ovinyera vaavaale, Muluku aamulamiha Yoopi ni aapuha veeli. Asinthamwenaawe Yoopi ni amusaawe yahoorwa ohakalala ni yaaruuha itthu soovaha. Muluku aamvaha Yoopi anamwane athanu neeli asilopwana, ni araru asithiyana. Yoopi aakhwiiye uuluvanleene vancipale.
Muluku onthuna ororomeliwa ni olipa murima moohaawani. Hiyo naahaawaka, Muluku oosuwela ninghaawelaahu. Ti yoowo ongwehaweha itthu sootheene sineereya.
Masu oopacera
![Masu oopacera](https://static.globalrecordings.net/300x200/lll1-00.jpg)
Asinthamwene, kinnatthuna wooleelani mwaha wa mulopwana iitthaniwa Abramu. Abramu annamutthara Muluku, niwooko na yoowo atthu ancipale aareelihiwa. Mweheke yoocaambuliwa ya muhoolo mwiiwa oruma.
Ethoonyihero 13: Wiitthaniwa wa Abramu
![Ethoonyihero 13: Wiitthaniwa wa Abramu](https://static.globalrecordings.net/300x200/lll1-13.jpg)
Maphattuwelo 12:1 - 13:4
Vecaambuloni va, mummoona Abramu, amwaarawe Sarayi, musuluwaawe Looti ni anamitekwaawe. Awo anrowa mukwaha woorakama. Muluku aalokolola ni yaawo eeraka: "Ohiye elapowawo, nlokonawo ni amusawo ni oroweke elapo kineeraaka kiwoonihere. Miyo kinimoopaka nloko ntokotoko. Kinimooreeliha, niwooko na weyo anooreelihiwa maloko ootheene amulaponi. Abramu aaroromela soororomelihiwa sa Muluku. Owo ni asikhwaawe yaakuxa itthu sootheene yaaraayano enattimula mukwaha wa mahiku ancipale mpaka ophiya elapo yooKana. Weiwo, Muluku aamukhumelela Abramu. Muluku aamweerela: "Ela elapo kineeraaka kaavahe anamwanaawo."
Ethoonyihero 14: Abramu ni Looti
![Ethoonyihero 14: Abramu ni Looti](https://static.globalrecordings.net/300x200/lll1-14.jpg)
Maphattuwelo 13:5-18
Abramu aakhalano musuluwaawe yaathaananaaya, nsinanawe Looti. Oweeli, Abramu ni Looti, yaakhalano ikhondolosaya sincipale. Amukukhula a Looti ni Abramu yannawana niwooko khasaariwo sooca sookwanela. Abramu aamuleela Looti: "nihiwaneke yeehuru. Nrowe nimwalamwale. Muthannleke mpantta mmoha muntthunaanyu wa elapowene yeela. Nyuwo mwaarowáka moono mmoha, miyo kinrowa moono mukina. Looti aathanla elapo yooreera yaari etthaaciri ni maahi. Looti aamaka vakhatoni waattamela esidade yoSodoma. Muluku aamweerela veeli Abramu: "Elapo yootheene mpaka weiwo maithwaawo anoonaayawo, kinimwaavaha anamwanaawo. Asinthamwene, onaamukhala ntoko atthu akina aakhalano itthu sooreera onipwaha hiyo, nrowe nimuroromeleke Muluku ntoko Abramu weera Muluku anikhapelele.
Ethoonyihero 15: Abramu ookumana ni mwene a murettele
![Ethoonyihero 15: Abramu ookumana ni mwene a murettele](https://static.globalrecordings.net/300x200/lll1-15.jpg)
Maphattuwelo 14:1-24
Atthu asidade yooSodoma yaari oonanara murima. Looti akhalaka okhatoni hiihaale, yaakhumelela ekhotto. Looti ni amusaawe yaavariwa ni atthu ootheene o Sodoma. Abramu ni anamitekwaawe yaarowa omoopola Looti. Awo yahaawina amwiittani enawoopola atthu ootheene ni itthu saya. Ahokolowaka okhottoni, yaakumana ni mwene antoko munoonaanyu veecaambuloni va. Nsina na mwene ola neeriwa Melkisedeki. Aarí mwene eelapo yooSalem, ontaphulela murettele. Owo aaritho musaserdoti a Muluku eekhaikhai. Owo aamuruuhela Abramu yooca ni yoowura. Abramu aamukokhorela Melkisedeki ni aamvaha yoovahaawe. Mwene o Sodoma aatthuna omvaha itthu Abramu niwooko noomoopola, vano Abramu aakhootta waakhela etthu ya mweneene yoowo oonanara murima. Vano Looti, khuupuwenle nnene aahokoleela okhala vakhiviru wa esidadeene yeeyo.
Asinthamwene, nrowe nikhale ntoko Abramu, nihitthareke iphiro saatthu oonanara.
Ethoonyihero 16: Abramu anaalikela ithenyeeri
![Ethoonyihero 16: Abramu anaalikela ithenyeeri](https://static.globalrecordings.net/300x200/lll1-16.jpg)
Maphattuwelo 15:1-21
Abramu aari nthamwene aMuluku. Vano Abramu annathanana niwooko owo khaarino mwaana. Muluku aamwiitthana vaate wa empaawe ni aamweerela: "Owehe itheneeri, ni waalikele, waaweraka. Anamwanaawo eniikhale hiiho, ntoko itheneeri sirí osulu. Abramu aaroromela soororomelihiwa sa Muluku, ni hiiho aamusiveliha Muluku vancipale. Muluku aamweerela: anamwanaawo anookhalano elapo ya oKana.
Ethoonyihero 17: Mmiravo nsinanawe Ismayel
![Ethoonyihero 17: Mmiravo nsinanawe Ismayel](https://static.globalrecordings.net/300x200/lll1-17.jpg)
Maphattuwelo 16:1-16
Saavira iyaakha sincipale ni amwarawe Abramu khiyaayara. Sarayi aakhalano epottha yeeriwa Hakari. ASarayi aatthuna weera Abramu amuyare mwaana ni Hakari, mwaaneene yoowo akhaleke awawe. Eyo yaari etthu yaakhoveleliwe.
Hakari, arupalakaru erukulu, aapacera ohaapwattha ASarayi. Hiiho, ASarayi yaapacera omuhasula Hakari, mpaka Hakari otthawa. Muluku aamuruma ngelo weera ammaalihe Hakari. Owo aamuleela weera aarwa omuyara mwaana mulopwana aneera iitthaniwe Ixmayeli. Nsina nno ninthapulela "Muluku oniiwa." Muluku eenre weera onoomureeliha mwanaawe. Owo anaakhale atiithi anloko ntokotoko. Owo anaawane naatthu ootheene. Ixmayeli aayariwa ni vahoolowaya aathatuwa tiithi a miloko sootheene sa Arabiya.
Vahoolo wa iyaakha mulokó ni tthaaru sa oyariwawawe Ixmayeli, Muluku aamuromeliha-tho Abramu weera owo ni ekhapirwaawe yootheene eniyaakhele elapo yootheene ya oKaana wa mahiku ootheene.
Vano Abramu ni ekhapiraawe yaatthuneiya wiiwelela masu a Muluku. Abramu aarinaawe iyaakha ehalaka emoha okwana ncira, Muluku aamwaattamela anamweerela: "Miyo ti Muluku a ikuru sootheene. Mweette va maithoniwaka ni mukiiwelele mwa sootheene mumpangkaanyu. Miyo kinoolipihaxa wiiraana variyariwahu ni kinimwaanceerera ekhapiraanyu ekhalaka atthu ancipale. Wu ti wiiraanyiha kinoopankelaakani. Mmwikhale tiithi a miloko sincipale. Tivawó khamurwa mwiitthaniwa-tho Abramu, mene Abrahaamu.
Niwoko na nsina nyowani Muluku aamutthenghaawe, Owo aasuwela weera Muluku aarwa omuvaha ekhapira etokotoko. Muluku aamweerela-tho Abrahaamu: "Kinimoovahani elapo yootheene ya oKaana ni mpaka-tho wa ekhapiraanyu ni nkikhale Mulukuwaaya-tho.
Muluku aceenca-tho nsina na amwaraaya Sarayi amuttehaka Sara. Muluku aamuroromeliha omureeliha ni omuyara mwaana a Abrahamu.
Ni Muluku aamuleela Abrahamu eeraka: "Ni amwaarawe aSara, onoomuyara mwaana. Mwa yoowo, miyo kinookwanihera seyo karoromeliihaaka.
Imaara sikina hiyo, ntoko Abrahaamu ni Sara, ninneerera opaka itthu ni mootaahu muneenaahu. Eyo enoowereya atannyera ohaawa othanana wa atthu ancipale. Ontthuneiya omuroromela Muluku, nimwiiwelelaka ni nimwehereraka Owo weera akwanihere soovaanelasawe.
Ethoonyihero 18: ASara enootheya
![Ethoonyihero 18: ASara enootheya](https://static.globalrecordings.net/300x200/lll1-18.jpg)
Maphattuwelo 18:1-15
Nihiku nimoha, Abrahamu arinonweene iyaakha miloko mithanu ni mixexe ni ithanu niixexe, yahaakhumelela anamitthenga araru a Muluku. ASara yaamwaapeya sooca weera yaavahe alettowaya. Aletto yeera ekilaantheene vamunttuusini vaate. Anamitthenga yaamukoha Abrahamu yeeraka: Ari wowi amwaarinyu ASara? Abrahamu aahaakhula: "Ari mmukotthani mmo. Muletto mmoha aarí Muluku muneene. Owo aamweerela Abrahamu: "eyaakha yoomaalo, ehuhu si yeela, kinimoohokoleela emyeereke amwaarawo ekhalannene mwaana mulopwana." Saara aahiiwa iiwakaru, aamutheya niwooko aarino iyaakha miloko mithanu ni mixexe. Owo khaaroromenle. Vano Muluku aamukoha Abrahamu: "Heeni Saara othenyaawe eeraka, neereke kinookhalano mwaana kuuluvanleene? Yookhala etthu yoorikaxa ni Muluku? Saara onookhalano mwaana mulopwana."
Ethoonyihero 19: Abrahamu omvekelela oSoodoma
![Ethoonyihero 19: Abrahamu omvekelela oSoodoma](https://static.globalrecordings.net/300x200/lll1-19.jpg)
Maphattuwelo 18:16 - 19:29
Anamitthenga araru a Muluku yaahoorwatho olokolola naaAbrahamu. Yaamweerela Abrahamu, Muluku onoophwata esidade yooSodoma ni yooKomora niwooko atthu a weiwo ti oonanara murima. Abrahamu aamuupuwela Looti ni aaheera, Apwiya munimwaaphwata ale oororomeleya vamoha ni alavilavi? Abrahamu aapacera omucoondelela Muluku weera ahiphwate oSodoma. Ommaleloni Muluku aaheera, Miyo kaaphwanyá atthu mulokó oororomeleya, nkhimphwata oSodoma. Anamitthenga a Muluku yaaphiyaaya oSodoma, yaahoona soonanara sincipale sa atthu. Khiyaariwo naari atthu mulokó yaamuttittimiha Muluku osidade. Ariwo mutthu mmoha paahi oororomeleiya, Looti. Anamitthenga yaamuleela Looti weera atthaweke ni amusaawe, ni weera ahiwehe ottuli. Muluku aamoriha mooro mwincipale osulu onaphwata esidade oSodoma ni Komora ni atthu ootheene yaari weiwo. Looti ni amusaawe etthawaka, amwaarawe yaaweha ottuli, yaathatuwa nluku na maakha. Yaavulungwe yaari Looti ni anamwanaawe eeli asithiyana.
Ethoonyihero 20: Ovaha enama ya Abrahamu
![Ethoonyihero 20: Ovaha enama ya Abrahamu](https://static.globalrecordings.net/300x200/lll1-20.jpg)
Maphattuwelo 21:1 - 22:19
Sara aaraaweno iyaakha miloko mithanu ni mixexe, aamuyara mwaana mulopwana, ntoko Muluku aamuroromelinghalaawe Abrahamu. Nsinanawe eeriwa Isaki, ontaphulela otheya. Isaki areene mmiravo, Muluku aamweerera Abrahamu. Muluku aatthuna omoona Abrahamu aamwiiwelelaka. Muluku aaheera: "Omukuxe mwanawo mmoharu yoowo onimusivelaawo, wamwiive wampake yooveleela wa Miyo." Abrahamu aamwiiwelela Muluku. Abrahamu aaroromela weera Isaki ookhwa, Muluku anoomvenxa mookhwaani akhalekenotho okumi. Ntoko munoonaanyu veecaambuloni, owo aahiirehera weera ampanke mukuttho mwanawe.
Abrahamu avinxaka moono weera amuhome Isaki, mungelo a Muluku aalokolola wiirimu. Owo eenre: "Abrahamu, ohimpanke yoonanara mwanawo. Vano miyo koosuwela weera weyo onnamoova Muluku, niwooko khookikhoottihenre mwanawo mmoharu. Wowaakuveya, Abrahamu aahoona ekhondolo ephanreene vamiiwani. Owo aapaka mukuttho ekhondolo yeeyo nipuro na mwanawe. Muluku aamweerela: "Weenre okiiwelela, kinimooreeliha ni niwooko na weyo, kinooreeliha maloko ootheene mmwelaponi.
Ethoonyihero 21: Amwaarawe Isaaki
![Ethoonyihero 21: Amwaarawe Isaaki](https://static.globalrecordings.net/300x200/lll1-21.jpg)
Maphattuwelo 24:1 - 25:26
Abrahamu uuluvanlaawe aamwiitthana namutekwaawe ni aamweerela: Orowe elapowaaka wa amuswaaka wamuruuhe mwaara a mwanaka Isaki. Abrahamu khaatthuna weera Isaki apwahe elapo aaroromelihiwaawe, naari amuthele muKaana yaakhala elapoweene yeeyo. Namuteko aahiiwelela ni aaheetta mukhwaha woorowani elapo ya oNahor. Owo aamvekela Muluku weera amukhavihere omoona muthiana eera akhalé mwaarawe Isaki. Muthiana ooreera eeriwa Rebeka aavinya omawaani arowaka orika maahi. Namuteko Abrahamu aamvekenlaawe maahi owura, owo aamvaha ahakalanleene aahaavahatho axinamaawe mulokó. Namuteko aasuwela weera Muluku ookeettiha mpaka va muthiana ola, ni weera muthiana aamwaasaawe, ti yoola. Namuteko aahoonelela weera ola musuluwaaya amunna a Abrahamu. Namuteko aamulapa Muluku weera aahaakhula mavekelwawe. Hiiho Rabeka aari mwaarawe Isaki.
Abrahamu aakhwiiye ni iyaakha ncira ni miloko mithanu ni miili ni iyaakha ithanu. Muukumini mwawe wootheene, aaroromela soororomelihiwa sa Muluku. Tivawo, Muluku aamwaakhulela ni aamureeliha. Mpaka olelo, Muluku onnaareeliha ootheene yaale anroromela soororomelihiwa sawe.
Ethoonyihero 22: Oyariwa wa Yeesu
![Ethoonyihero 22: Oyariwa wa Yeesu](https://static.globalrecordings.net/300x200/lll1-22.jpg)
Mat. 1:18-25; Galatas 4:4-5
Masu aMuluku ti eekhaikhai. Muluku aamuleela Adamu weera kinoomuruma mulopwana mmoha. Mulopwana owo onoongwina Satana. Muluku aamuleela Nowa weera onimwaaphwata atthu oonanara mirima. Muluku aamoonihera Yoopi weera onnatthuna itthu sooreeraxa wa hiyo. Wa Abrahamu Muluku aamoonihera weera Owo onnakwanihera soororomeliha sawe.
Veecaambuloni va, nnamoona mmiravo Yeesu Kristu.
Ehuhu yeeyo Muluku aathanlalaawe, aayariwa Yeesu elapo ya oIsrael. Amayawe yaari mwaamwali yiitthaniwa Maria, yaari anloko na Abrahamu ni Isaki. Yeesu khayaringwe niwooko na mulopwana, ti Munépa Wootteela muneene aapanke sootikiniha mmirimani mwa Maria. Yeesu ti yoowo onruuha mareeliho mulaponi, niwooko owo aarweenle ongwiina Satana ni onikuxa onihokoloxera wa Muluku. Soororomelihiwa sootheene sa Muluku sookwaniheriwa mwa Yeesu.
Ethoonyihero 23: Okhwa wa Yeesu
![Ethoonyihero 23: Okhwa wa Yeesu](https://static.globalrecordings.net/300x200/lll1-23.jpg)
Galatas 3:13-14
Yeesu aahunnuwa, aathatungwaawe mutokwene aahusiha atthu ephiro ya Muluku. Owo aapaka sootikiniha sincipale ooniheraka elapo weera owo orwiye wa Muluku. Atthu ancipale oonanara mirima khiyaamuroromenle, yaamukuxa emwiiva emuthomeya va muttandani. Osúwanyeyawawe weera oohookhwa, nakhotto mmoha aamuhoma mpararini ni nivaka. Veekhaikhai, owo aahookhwa.
Asinthamwenaaka, Muluku aamuleela Adamu weera, wacaru mwiri ola, onimookhwa. Hiyo ootheene noomutthekela Muluku niphwanenle okhwa woohimala. Yeesu okhwiiye weera akuxe ottaruxiwa waari wawihu.
Abrahamu yaahiiva ekhondolo ya mukutho nipuro na Isaki, vano Muluku oonivaha mwanawe weera akhwé nipuro nahu. Hiiho, Yeesu oomaliha soottheka sahu. Weera Satana ikurusawe sirí niwooko na soottheka sahu, ikurusawe sootheene soomalihiwa vamuttandani Yeesu aamalihaawewo soottheka sahu.
Ethoonyihero 24: Yeesu ori ni okuumi
![Ethoonyihero 24: Yeesu ori ni okuumi](https://static.globalrecordings.net/300x200/lll1-24.jpg)
Yohane 20:19-29
Asinthamwenaawe, Yeesu, erutthwaawe yaariha munihiyeni. Yeesu aakhala munihiyeni mahiku mararu. Nihiku nanaararu, aavinyerera mookhwaani. Okhwa khawaawera omvara Yeesu, yoowo arwiiye wa Muluku. Yeesu aahixoonihera wa ohuseraawe ni aari eriyaraaya. Ootheene yaatikhina. Oohusera mmoha iitthaniwa Tomas khaariwo Yeesu iixoonihenraawe. Tomas aaweerela: "Miyo kaahoona makhwatta amisomaari saavolongwaayawo mmatatani, ni kaahivoleiha ntatanaka nipuro naavinre nivaka mpararini, nkinaakhulela. Yaavinre esumana emoha, Yeesu aahiixoonihera wanaaveeli.
Mweheke veecaambuloni. Yeesu onoonihera makhwatta a mmatatani ni ommweerela Tomas, ovoleiheke ntatanawo mpararini. Yeesu aaheera: "Muhiye ohovela, murorómele." Yeesu aaheeratho, ooreelihiwa ti yaawo anroromela ehikoonne. Asinthamwene, nihikhale ntoko Tomas yoowo aamuhovela Muluku. Nikhale ntoko Abrahamu aaroromenle soororomelihiwa sa Muluku ni anatthariha. Hiyo nnimusuwele Muluku, namuroromela Yeesu ninamutthariha. Hiiho, nnimwaakhela yoovahiwa ya okumi woohimala.