Livro 3
![Livro 3](https://static.globalrecordings.net/300x200/lll3-00.jpg)
Contur: Joshua, Deborah, Gideon, Samson. 24 sections. It has a picture book to go along with the recording.
Numărul scriptului: 420
Limba: Takwane
Temă: Eternal life (Salvation); Character of God (Nature, character of God, Word of God (the Bible), Power of God / Jesus); Living as a Christian (Obedience, No other gods, idols, Victory, Faith, trust, believe in Jesus); Bible timeline (Gospel, Good News); Sin and Satan (Spiritual Warfare, Deliverance, Judgement)
Public: General
Stil: Monolog
Gen: Bible Stories & Teac
Scop: Teaching
Citat biblic: Extensive
Stare: Publishable
Textul scenariului
Livro 3 Madhu owambeela
![Livro 3 Madhu owambeela](https://static.globalrecordings.net/300x200/lll3-00.jpg)
Ogonjiha ni Yesu:
Nlogo nakadda Ezarayeli mudhaarini elabo ya wigubuddu. Vano Nabwiya Mulugu
ahatapula vaari va amwiddani ewa. Aliwa yahihiya elabo yo wigubuddu, vano
yahidhowa elabo yethaniwa Kanaha. Mulugu aharoromeliha wi avahe elabo ele
akadda Ezarayeli, wi ekale yeewa malabweene. Thalako dha nivuru ndda na nethaaru
musawo wa murawa onowuwonihani nyo, woona Mulugu akamihedheliiye nlogo
naye nivolowa mwilaboni mule. Wiiwe yoruma, vano osugwe yonihelo eli vakukuuve
ogewile yoruma ela.(*)
1 Yonihelo yowambela
![1 Yonihelo yowambela](https://static.globalrecordings.net/300x200/lll3-01.jpg)
Exodo 17:8-13
Zozuwe onawana ni Amalekita (Exodo 17: 8-13)
Akadda Ezarayeli yahikalana musogoleli mulubale eriwa Mozezi.Namakamihedha
ewa a vakukuuve eriwa Zozuwe, daasogolela anyakoddo a Wizarayeli. Dila ya
Wigubuddu odhowa oKanani, akadda Ezarayeli yahirijiwa ni mulogo wa Amalekita.
Mozezi ahinvaha nlamulo Zozuwe wi hasakule anyakoddo ovuwesesa wi
yakihedhege nlogo neewa. Vano aliwa kayanna elemelelo ya mukoddoni, vowi ndo
aliwa wiroromeliha weewa watewene waali mwa Mulugu. Woona wi oliye
hogonjiha. Mozezi ahimwaddela Zozuwe wiira:
We wawanaga ni Amalekita miyo ginakalege vadhulu va mwango gilobelege ni
ddooddo ya Mulugu mmadani mwaaga.’’ Nuwi ndo Mozezi alobelaga mada aye
egaali owathukuleleene odhulu, nlogo naye nowagonjiha Amalekita. Vano mada a
Mozezi yonyemela kaakwaniha othukulela vadhulu wi alobele wa Mulugu mudhidhi
mujinjeene,ogoma wommalihiha olobela. Vano Amalekita yowagonjiha akadda
Ezarayeli. Arawu ddibila a Mozezi ni Huri, yahimukeratiha Mozezi vanibweni vano
omwihiddeela moono dhaye, othukulela vadhulu pamadhene ofiyedha egudduguddu,
vano Mulugu omukamihedha Zozuwe wagonjiha amwiddani ewa.*
2 Yonihelo ya nabiili
![2 Yonihelo ya nabiili](https://static.globalrecordings.net/300x200/lll3-02.jpg)
Numeros 19:1-33
Anameddelela elabo yo Kanani (Numeros 19:1-33)
Akadda Ezarayeli egaddamele elabo yo Kanani, Mozezi aharuma anameddelela kumi
ni abiili wi yoone elabo ya. Yasakuliwa mulobwana mmohi a nihimo na nlogo nlogo.
Egavirile malabo makumi manayi yahiwelawo waddela nlogo dhedho dhoniliiwa.
Zozuwe ni Kalebi yahiira: Elabo eyo sapama yoreela, yadhooja,- ndoweni nithukule
ekale yehu Mulugu oli ni hiyo, mwahikalena woova:’’ Vano athu amohi yowoga
dhoweleliha mundduli wiiraga:
Athu eli elabo yo Kanani boolapa ohiyana ni hiyo’’ , aliwa bolibesesa, vano elabo eyo
sowopiha,’’ dhowoga dhimohi dhahidhihaga woova munlogoni, vano yahikoodda
ovolowa mwilaboni mule. Mulugu ahitakaleliwa vajinjivene mwaha wahokalana
nroromelo athu ala. Nabwiya ahinvaha nlamulo Mozezi wi awelelihe nlogo
mwiddeddereni wiira: Kaavo muthu vadhulu va yaaka makumi menddi, omwihiya
Zozuwe, ni Kalebi, onakalena owodha wovolowa mwilaboni mule.-
Mwa yaaka makumi manayi akadda Ezarayeli yaheedda moholowa mwiddeddereni.
Ofiyedha mulogo wawale otolowa, ni mwaha wahorumedhela mwa Mulugu. *
3 Yonihelo yanethaaru
![3 Yonihelo yanethaaru](https://static.globalrecordings.net/300x200/lll3-03.jpg)
Josue 3:1-17
Yohiddeleya ya mudhidhi; (Josue 3:1-17)
Mudhidhi vang’onong ‘onove, nlogo nahinawelele mundduli mmiganoni mwa
Kanani, Mozezi ahikwa omwihiya Zozuwe woona musogoleli a nlogo. Mulugu
ahimwaddela Zozuwe wi okale owisasanyedha wi wavolowe mwilaboni mule ni
nlogo nawo:-
Nlogo natenene nahimaga kobela ya mwihinje mulubale Jorodamu. .-
Mudhidhi wa yaaka elene mwihinje ole wahithabwa odhaala. Zozuwe ahiira, wi
mulogo wateene mudhe seresere ya mwihinje, wi Mulugu oneere wiriha matikiniho
malubale. Anamukutho yathukulilege mwanddeya wa Mulugu yaligi osogolo wa
nlogo. Zozuwe ahithongaga wi mukitele mwinko. Vano manyalo ewa eganyingalile
mahinje, Mulugu ahigawa mwihinje ole okala makukuru meenddi, wi nlogo naye
nivire nahinyethile. Vowi ndo, nlogo niviragave anamukutho yaligive vaari va
mwihinje owumeene, ofiyedha muthu ogomihedha ovira. Anamukutho egalabuwe,
mwihinje ole, mahinjeya yahiwelelaga mwakaleligiiwa. Zozuwe ni nlogo natenene
yegi omutamala Mulugu.*
4 Yonihelo yanenayi
![4 Yonihelo yanenayi](https://static.globalrecordings.net/300x200/lll3-04.jpg)
Josue 6:1
Othukuliwa wa Zheriko (Josue 6v1)
Mulogo wateene wa Ezarayeli wahimaga waddamela ni mudhi weriwa Zheriko.-
Yego yowambeela yafuneyesesa wi yirena waali wawigaramo MaKaninewu
mwilaboni mule, vowi Mulugu karumedhiha wi ekale vamohi ni nlogo naye, neerege
wathegiha. Mudhi mulubale wo Zheriko waali webaribareene woliba. Akadda
Ezarayeli yowubuwela wi nnathukule addi mudhi ole!. Mungero a Nabwiya
ahikumelela wa Zozuwe ahimwaddeliha mukalelo wothukulana elabo ya Zheriko
wiira: Mweedde ni nlogo nawo waddamela ni mudhi oyo dila emohi valaboni,
mwahiwogile naari ndhu nimohi, malabo matanu nammohi.Nlabo na netanu na biili
anamukutho ethukule mwanddeya wa Mulugu vasogolo wa nlogo ni palaza mmadani.
Mweedde dila tanu na biili waddamela mudhi oyo, dila ya netanu na biili,
mvudhelele palaza, vano nlogo nikuwege ni madhu otaama vinakwanelihigiiwa.
Cinga ninerege obwanyuwa,kadda munyakoddo akopolo a nlogo, oneerege
ovolowamo wi yakalegemo. Zozuwe ni nlogo naye yahirana woona mwamwaddele
Mulugu, cinga nahibwanyuwela vati vano mudhi ole wahithukuliwa. Mulugu
ahawaddela wiira; munahise yego mmudhini mule. Mulobwana mmohi eriwa Akani,
ahinvaanya Mulugu.*
5 Yonihelo yanetanu
![5 Yonihelo yanetanu](https://static.globalrecordings.net/300x200/lll3-05.jpg)
Josue 7:1-12
Ogonjihiwa wowuukuula (Josue(7:1-12)
Akadda Ezarayeli yahidhiveliwa vajinjivene ni mukalelo wa Mulugu. Ahakamihedha
ovolowa muZheriko. Mudhi wowaddamela wa amwiddani, weriwa Ayi,
addamanesese ni Zheriko.- Zozuwe aharuma anameddelela abiili wi yoone mudhi ole,
Vano egawelilewo yahiira; mudhi ole bu mung’onong’ono anyakoddoya
bang’onong’onoove enang’anela. Vano Zozuwe ahirumedhela. Waruma anyakoddo
vang’onong’onoove wi yathukule mudhi ole wo Ayi.Ni mwaha worurumusiwa
anyakoddo a nlogo na Ezarayeli, moyeva mwa anyakoddo o Ayi yahiwana koddo ni
kopolo. Anyakoddo a nlogo yahithawa vamentoni veewa ajinji oporeya, Zozuwe ni
anyakoddo a nlogo na Ezarayeli yahukuwa vajinjivene, aliwa kayanonelamo
mwahaya Mulugu adhe ahakamihedhege, woona malabo amundduli. Vano elobelaga
wa Mulugu, oliye ahiira: Ezarayeli ohuthega mwaha wothukula dhego dhokoddihiwa,
okuma peeno odhowa osogolo kamudha mukala oliba ni amwiddani enyu, mwafuna
mvenyihevo vaari va nlogo dhego dhowiiya wi dhibwanyuliwe, mmusayele mbavaya
mumvenyihevo vaari va nlogo.-
Akamu obuwelela wiira kaavo ogoonile nde dhirilimina, vano woona wiira yowiiya
eng’onong’onoove kinamwirele obure muthu.Vano yahaddeliha mulogo wateene wi
yothega enogwadda wiwanana wenyu ni Mulugu, vamohi ni athu amohi.*
6 Yonihelo ya netanu nammohi
![6 Yonihelo ya netanu nammohi](https://static.globalrecordings.net/300x200/lll3-06.jpg)
Josue 7:14-26
Othongiwa wa Akamu (Josue 7:14-26)
Zozuwe ahitugumanya nlogo natenene na akadda Ezarayeli vamentoni va Mulugu.
Zozuwe ahathonga wiira; mahimo mateene a mudhi ni mudhi ekumelelege wa
anamukutho.-
Mulugu ahimoniha Zozuwe wi Akamu daali namathegaya. Zozuwe ahimwirela
Akamu wiira ;ogaddele wirile ddi?.-
Akamu ahakula wiira :Miyo gihimuthegela Mulugu. Vano goniliimi maleya apama o
Babiloniya, ni mukuwa, ni nibwe noolapa na mutheengo mulubale, gahithukula miyo
ologoha vati va musasa vaaga .-
Alobwana ang’onong’onoove yahidhowaga mmusasani mwa Akamu yahifwanyaga
dhego nde dhowiiya. Akamu ni dhego dhile, dhahibwanyuliwaga woona Mulugu
mwathongeliye, vano owali wa Mulugu wahisusa vaari va nlogo naye. Mulugu
ahiwoga ni Zozuwe wiira : wathukule anyakoddo awo ateene odhowe mudhi wa Ayi.
Miyo gineere wuvaha mmadani mwawo, mwahoove.-
Ezarayeli yahirana woona mwawaddelele Nabwiya Mulugu. Vano yahithukula mudhi
wa o Ayi:-
Dhowi nda dhinopadduwa mwa hiyo kandha nanda omugonjiha sathana nakalana
yothega mwigumini mwehu. Eli yofuneya, osoriha dhothega dhehu wa Mulugu wi
nikale oleveleliwa. Mulugu oneere onivaha ogonjiha mwa dhoweeha dhinambeela
onipadduwela.*
7 Yonihelo ya netanu na biili
![7 Yonihelo ya netanu na biili](https://static.globalrecordings.net/300x200/lll3-07.jpg)
Josue10:1-14
Nlabo nothabwa odhidhima mu thalakoni (josue10:1-14)
Vano aKaninewu ale yahalilege egewile wa ogonja wulubale wewo Mulugu
wavahiliye nlogo naye, ni omugonjiha Ayi. Milogo dhatedhene dho Kanani ajinji
yahimoova Ezarayeli: Makingi matanu a nlogo no Kanani yahitugumana ni
anyakoddo ewa ajinjeene wi ewanena mwiddani ewa mowiwanana,
akadda Ezarayeli. Vano Mulugu ahiwoga ni Zozuwe :
“Kawawoove we oneere wagonjiha.” Zozuwe ni anyakoddo aye yahedda ode oriba,
watewene. Yaharurumusa amwiddaniya yahithawa ni ovoreyiwa wulubale. Mulugu
aharuma anyakoddo amwiddani wi ethawe muzongwe amaralala, ajinji yahikwa.
Koddo yahiwanihagave nutakaleliwa wene ofiyedha nlabo naatenene. Zozuwe
kakalana mudhidhi mmohiya wowi ulene wi agonjihena a kaninewu, ajinjene nlabo
ddendde. Vano ahilobelaga wa Mulugu wi adhidhimihe nlabo ndde ofiyedha
omungonjiha mwiddani ogomihedha; Mulugu ahirana ele yalobilege Zozuwe.
Kannakalegewo naari nlabo nowi ndale wiwelela ndhu na mulobwana mmohi, naari
wakulela odhidhimiha nduwa opadduwa nupadduwa.*
8 Yonihelo yanetanu na thaaru
![8 Yonihelo yanetanu na thaaru](https://static.globalrecordings.net/300x200/lll3-08.jpg)
Josue 23:1 - 24:31
Zozuwe onosuziha ni oxagiha nlogo munlamuloni na Mulugu (Josue 23:1-24:31)
Nuwi ndo egagonjihile ma Kaninewu mowaddamela , Zozuwe ahigawa elaboya
vodheela mahimo kumi na menddi ayene yadhowile mmavade mwiwa, yahidhowana
ni dhokalana dhiwa ni dhifuwo dhiwa: Dhigavirile yaaka dhijinjidhene, Zozuwe
mulobwana owuluula, ahithana mulogo wateene wa akadda Ezarayeli. Zozuwe
ahawaddela wiira:
Mubuwele dhego dhulubale dhatedhene dhinirele Nabwiya vonivaha elabo ela
yapama vamohi ni onikamihedha wagonjiha amwiddani ehu, Nabwiya ohakwanihela
yororomeliha yaaye yaateene. Vano dhinova vuruwanani:- Mukaleve omuroromela
Nabwiya mwiwelelege malamulo aye ni murima wateene. Namwihiya, Nabwiya oliye
oneere onihiya muwari monikamihedha mwa amwiddani ehu nubuwele pama peeno
murumeedhe baaniya ofwanelela wawimelela, akala ba aMulugu ebewene a makolo
ehu amuha marafula, naari Nabwiya Mulugu.=Vano nlogo nateene nahakula ni
murima wateene:Hiyo nnamwimelelege Nabwiya Mulugu yeeka bahi.-
Akwaaga Mulugu onowakwanihela dhororomeliha dhaaye dhinanireliye iyo. Oliye
ohuvaha elaboya wa nlogo naye na Ezarayeli, vano ohunivaha nroromeliho wa mburo
wodhulu. Mulugu ohukamihedha nlogo naye vowagonjiha amwiddani ewa oKanani.
Vano Nabwiya Yesu Kristu onerege onikamihedha omugonjiha mwiddani ehu malabo
mateene. Othabwesesa ddiyabo.vowi nda enofwanela nikalesese ororomeleya mwa
Nabwiya wi mu dhororomeliha dhapama, dhakwanele mu dhigumini mwehu.*
9 Yonihelo yanetanu nenayi
![9 Yonihelo yanetanu nenayi](https://static.globalrecordings.net/300x200/lll3-09.jpg)
Juizes4:1-10
Ezarayeli onowiddiwalela mwa Mulugu (Juizes4:1-10)
Zozuwe nuukwa dhahivira yaaka dhijinjidhene, anamabaliwelamo axa yahonile
matikiniho a Mulugu yahinyengethiwa ni milogo dhohiwelela dhawaddamele, aliwa
yowirana dhanningo wawebedha a Mulugu ebewene, omwihiyaga Nabwiya. Mwaha
wa ela, Nabwiya kakamihedhe dila biili .-
Milogo dhowaddamele dhahiwanana wagonjiha akadda Ezarayeli. Vano Mulugu
kaddiwalile aliwaya.- Mulugu ahasakula athu vaari va nlogo naye, ayene yalive
ororomela mwa Oliye ahawira aliwa asogoleli owakihedha nlogo naye vaari va
makathamiho, mowi nda yowasuziha dila dha Mulugu. Mmohi asogoleli ala aali
mwihiyana eriwa Ddibora. Mudhidhi olene kingi mmohi o Kanani, Zhabim
ahisasanya koddo ni Ezarayeli. Ddibora ahimusakula musogoleli mmohi a nlogo naye,
Baraki wi akihedhege nlogo. Mwaha wi Mulugu aharoromeliha wi gineere owana
koddo vaari va aliwa. Mowawakihedha Baraki ahiwoga ni Ddibora wi gineere oya
okoddoni, nyo Ddibora mwayawove.
Ddibora ahimwaddela Baraki wiira; “Miyo ginoyawo, vano Mulugu oneere ompeleka
Sisera, musogoleli mulubale wanyakoddo a Zhabim kingi o Kanani, mmadani mwa
mwihiyana.*
10 Yonihelo ya neekumi
![10 Yonihelo ya neekumi](https://static.globalrecordings.net/300x200/lll3-10.jpg)
Josue 4:11-16
Mulugu onomukamihedha Baruki omungonjiha Sisera.(Josue 4:11-16)
Ddibora ni Baraki enosogolela anyakoddo akadda Ezarayeli, ayene yagonjihile anyakoddo a Zhabim ni Asisera ni masupaadda ewa bahi. Ma Kaninewu yahikalana dheewa dhowanana dhijinjidhene, vano Mulugu ahimurumiha muzongwe mulubale a pevo ewanagave koddo, wi dhowanana koddo dha ma Kaninewu dhahikalena mabasa, vale athawilegevo ni meddo di Sisera bahi yeeka.*
11 Yonihelo ya nekumi ni emohi
![11 Yonihelo ya nekumi ni emohi](https://static.globalrecordings.net/300x200/lll3-11.jpg)
Juizes 4:17-23
Mwihiyana mmohi ahimpa Sisera.(Juizes 4:17-23)
Sisera musogoleli mulubale anyakoddo a ma Kaninewu ahimuthawa Ddibora ni
Baraki wipita mmwangoni, mmusasani mwa mwihiyana ethaniwa Zhayeli, obuwelaga
wi gili vo libavene . Nuwi ndo agamalile oja, Sisera ahigonelagavo, Zhaeli
ahiddoddaga vati mugogo wotogowa ni nunddo, ompana Sisera, omwihiya vati va
musasaye.Vahinavire mudhidhi wowinjivene, dhigereye nda, Bakari ahikumelelaga
amusayega Sisera, vano mwihiyana ole ahiraga gihimpa ni mugogo gimokomele va
muru. Wula waali ogonja wulubale wa akadda Ezarayeli modheela ma Kananita.
Madhu a Ddibora yaali ebaribari yeriliye Sisera onapiwe ni mwihiyana.*
12 Yonihelo ya neekumi na biili
![12 Yonihelo ya neekumi na biili](https://static.globalrecordings.net/300x200/lll3-12.jpg)
Juizes5:11-31
Ezarayeli onakeratela wirana mowubuwelela otapuliwa weewa. (Juizes5:11-31)
Akadda Ezarayeli ajinji yahidhiveliwa mwaha wowagonjiha maKaninewu Ddebora,
Baraki, ni akadda Ezarayeli ateene yahiiba vano yahiina emutamalaga Nabwiya. Athu
amohiya enobuwela wi ahiyana bolodhowa vano alobwana binna kopolo, vano
Mulugu onolaba ni athu abiilene mulobwana ni mwihiyana, ayene enamuroromela
oliye.Akadda Ezarayeli yaali odhiveliwa vokalana musogoleli woona Ddibora, aali
woona mmeewa. Akwaaga : Mulugu onalaba ni alene enakalahi bolodhowa wi
yagonjihe ale a kopolo. Mulugu ohumuruma Yesu wi anivuluse muwari mwa
mwiddani ehu, Sathana.- Athu abure ehimpa yesu. Vano Mulugu ohumudhana Yesu
dila biili agaali mugumi. Vano oliye ohumugonjiha Sathana mmobuweleloni athu
abure . Yesu onowanda ovaha owodha wa egumi enamudhivela Mulugu ni egumi ya
malabo mateene; ateene enamuroromela ni omwiwelela Mulugu.Ndhiveliwena
nimuthithimihe Mulugu ebaribari.
Ovuruwane vano osuuze odheela muthalakoni wi okale namagonjiha ni Mulugu.
Osugwe yonihelo yoharela, we weewa yoruma ela.*
13 Yonihelo ya neekumi ni thaaru. ********
![13 Yonihelo ya neekumi ni thaaru. ********](https://static.globalrecordings.net/300x200/lll3-13.jpg)
Juizes 6:1-34
Giddiyawu ni mungero a Mulugu (Juizes 6:1-34)
Mwaha wosogoleliwa Ddibora ni Baraki, nlogo na Ezarayeli nalive nororomela mwa
Mulugu yaaka dhijinjidhene.
Vano asogoleli ewa egakwile, yahimwihiya Nabwiya aliwa wathithimihaga a Mulugu
ebeweene o Kanani.- Mowi ndo Mulugu ahapeleka mmadani mwa amwiddani eewa,
ala yahagonjiha. Mulugu ahirumedhela wi mulogo mmohi weeriwa aMediyanita wi
yathonge aliwa mwa yaaka tanu na biili, aMediyanita yowawiyela yobwanyula
dhodhala dhewa.
Mowikasopa a milugu ebewene aliwa kayawiwelela yakuwaga efunaga wakihedhiwa,
nuwi ndo yahimuloba Mulugu ebaribari wi avuluse. Nlabo, nimohi muzombwe
ethaniwa Giddiyawu amwepethaga tirigu mburo woneliyemo wi bowipiteya,
vowaguvavene mungero a Nabwiya ahikumelela voliye wiira: Malojelo mulobwana
ovuwa a Mulugu! Nabwiya akale ni we. Odhowe wamutapule Ezarayeli mwa
aMediyanita: )) Giddiyawu ahimwakula mungero wiira:Ginatapule avi nlogo naaga…
Miyo gili aani?.-
Mungero ahimwakula Wiira: Mulugu oli ni we.- Giddiyawu ahisasanyaga oja wi
anvahe Nabwiya. Mungeroya ahikahinyaga ojawa ni ddooddo yaaye vano wahizhaga,
vowaguvavene mungero ole ahirimelaga vamentoni va Giddeyawu.- Giddeyawu
ahinonaga wi muselu wapama ola onadheela wa Mulugu.
14 Yonihelo ya nekumi neenayi
![14 Yonihelo ya nekumi neenayi](https://static.globalrecordings.net/300x200/lll3-14.jpg)
Juizes 6:25-32
Giddiyawu onowabwanyula a mulugu ebeweene. (Juizes 6:25-32)
Giddiyawu ahinona wi Mulugu dimusakule wi avuluse nlogo naye mwa amwiddani
ewa. Oliye kanonilesese erena avi ndhadha. Ababe, Giddiyawu, ni amohi
amwimudhini mwaye yahimaga ebuwa emohi yowathithimihavo a milugu ebewene
yeeriwa Bahala ni mulugu eriwa Asthorothi. Mulugu ahimwirela Giddiyawu wiira:
Obwanyule ebuwa ya Bahala otongwihe dhosema dhofwanafwaniha nimulugu
Asthorothi.- Mahiyu alene Giddiyawu ni aadhari aye yahibwanyulaga ebuwa ya
Bahala yahikakathaga yofwanafwaniha yosema ya Asthorothi.-
Aliwa yerilena ni mahiyu. Woona wi aliwa yawovaga athu a muluwani mwewa
otakaleliwa. Dhigereyeve nda nlogo nahimoonaga wi di Giddiyawu wabwanyule
amulugu ala, aliwa yahitakaleliwaga vajinjiveene ofiyedha efunaga ompa Giddiyawu.
Ababe, Giddiyawu, omwakihedha yeraga: Akala Abahala Mulugu,nnafuneladdi
okamihedhiwa.-
Vigavirile mudhidhi Giddiyawu ahinoniha nlogo wi Mulugu dimwirele wi owanena
amwiddani awo, Mulugu a kopolo dhateene oneere ogivaha ogonja. Akwaaga Mulugu
dili pogo ohiya amulugu a muthamuko naari a mabwe. Mulugu ebaribari yeeka bahi
dili ofwanelela wi nimuthithimihege.
15 Yonihelo ya neekumi natanu
![15 Yonihelo ya neekumi natanu](https://static.globalrecordings.net/300x200/lll3-15.jpg)
Juizes 7:1-7
Anyakoddo a Giddiyawu enosakuliwa (Juizes 7:1-)
Mamediyanita yahiiwa ovenya wa Ezarayeli odhowa okoddoni; Vano yahitugumana
nikuru nimohi nlubale na anyakoddo wi yawane.-
Vano Giddiyawu ahatugumana alobwana; ajinjeene woona mowakwanela. Vano
Mulugu ahiwoga wiira: Athu eli niwe ehithabwa winjiva. Wawelelihe vade ateene
owoova ni ohuliba murima.- Alobwana ajinjene yahiwelelaga mmavade mweewa.
Mulugu ahiwelelaga owoga ni Giddiyawu wiira: Nivevanove athu ehithabwa winjiva;
Wathukule wadhowena wiiko waweehe wawoone enang’wa avi mahinje.- anyakoddo
ajinji yerege okokora wi eng’we, woona mwanabwa. Vano amohi yegi waakapula
mahinjeya ni mada, ala yaligi owakwana muthengo wa mazana maraaru anyakoddo.
Mulugu ahiwogaga wiira: Ni muthengo ola wa anyakoddo mazana maraaru gineere
wakihedhana nlogo naaga ni ale enawoniha goyi.- (*)
16 Yonihelo ya neekumi ni tanu nammohi
![16 Yonihelo ya neekumi ni tanu nammohi](https://static.globalrecordings.net/300x200/lll3-16.jpg)
Juizes 7:19
Ogonja wa Giddiyawu.(Juizes 7:19)
Anyakoddo a Mediyanita yaali omaga misasa dhewa mukadoni mwa mwango,
winjiva wenjiviliwa yahakwanamo mukadoni mwatemwene. Aliwa yahikalana
alobwana ajinji, makameelo ohelengeya. Giddiyawu anna alobwana mazana
maraaruve bahi, vano Mulugu ahawaddela aliwa wiira. Giddiyawu ahawikaga muthu,
muthu palaza, mutigo ni mulinga mohikala yego.Aliwa yahapelelaga misasa dha ma
Mediyanita vaari va mahiyu vano yegi okuwa vajinjivene yoobaga ma lipenga
epwesaga mulinga ekuwaga: Mwa Nabwiya, mwa Giddeyawu.-Mamediyanita mofwanyiwa morurumusa yegi othamaga vevo bure bure, ewanaga vakaleligiwa
aliweneve, vano amohiya ethawagave. Akwaaga vano nigalive vang’oonove Mulugu
oli ni hiyo vano ogonja bwebaribari.(*)
17 Yonihelo ya neekumi na tanu na biili
![17 Yonihelo ya neekumi na tanu na biili](https://static.globalrecordings.net/300x200/lll3-17.jpg)
Juizes14:1
Munyakoddo mmohi ovuwa eriwa Samusamu (Juizes14:1)
Ofiyedha mudhidhi Giddeyawu agaliwo.-Nlogo naaye naali nororomela mwa
Nabwiya, vano oliye agakwile, mulogo waaye wateene wahiwela wathithimihaga a
mulugu ebewene a Makaninewu. Nuwi ndo Mulugu ahirumedhela wi Mafilistewu
emugonjihe Ezaaryeli vano emwiire mudhaari. Mulugu ahimusasanyedha mulobwana
mmohi eriwa Samusamu wi asogolele Ezarayeli, nlogo naaye. Vano Samusamu
agabaliwe, ababe yahimuthikithela wa Mulugu aliwa yahiroromeliha wi kadha esatha
mathithi aye Samusamu naari kadha ang’wa kaacaso. Nda dhaali dhitonyihedho
dhoneyiha wi oliye aali a Mulugu. Vano Samusamu agonuwile. Oliye ahimuthomela
mwana mwihiyana mFilistewu, mwa mudhidhi olene muneba wa Mulugu wonvaha
kopolo dhilubale, mwa mwili Samusamuya, wi oliye amutapule Ezarayeli. Vano
ababe egamaruwe olenddo wonvelela wi yasasanye dha matelo, edhowaga mundila
poddogoma ahagunddaga. Muneba wa Mulugu wahinvahaga Samusamu kopolo
dhijinji ofiyedha oliye ompa poddogoma ni mada aye.
Samusamu aali a kopolo dhijinji vano egumi yaaye yaali yohadhihela yapama
moomwiwelela Mulugu. (*)
18 Yonihelo ya neekumi ni tanu natharu
![18 Yonihelo ya neekumi ni tanu natharu](https://static.globalrecordings.net/300x200/lll3-18.jpg)
Juizes 15:1
Samusamu ni akwaddwe. (Juizes15:1)
Mukalelo wa Samusamu wodhowa omusakula mwihiyana vaari va amwiddani a
nlogo naaye ababe kayadhiveliwe vajinjivene, vano kayanna mukalelo mmohi
wowiira. Vano mwihiyanaya wubuwela waaye kawaali wofwanelela ni Samusamu,
wi motakaleliwa mwaye ahapa Mafilistewu makumi maraaru nuwi ndo vigavirile
mudhidhi Samusamu ahimuwelela mwihiyanaye, vano amooyaye yahimuteliha ni
mulobwana mmohi, Samusamu motakaleliwesesa ahahidda akwaddwe mazana
maraaru ahamaga abiili, abiili mwiila ni makokothokwa a munddo ohiddaga yegi
oburula mmiddani mwa Mafilistewu vano yahipahaga midda dhatedhene dha
Mafilistewu. Mafilistewu yaharumaga anyakoddo ajinji wi yamwihidde Samusamu.
Ni mwaha wowopopihiwa nlogo na Samusamu nahimwakwaniha omwihidda,
ommaga onvelela wa Mafilistewu. Vano muneba wa Mulugu wahinvaha kopolo
dhijinji Samusamu oliye ahipadhaga mingoyi dhamagiwigiyena ahiddoddaga
egabwagabwa ya buuru waapana anyakoddo a Mafilistewu nlabo ddendde. Samusamu
ahakela kopolo dhilubale mwa mwiili wi atapulena nlogo naaye odheela mugoyini
mwa Mafilistewu. Vano murima waaye kawaali wateene mwa Nabwiya, Mulugu
haye. Wahiroromeleya waaye ni Mulugu bu mwaha wobwanyuwa waaye. (*)
19 Yonihelo ya neekumi natanu neenayi
![19 Yonihelo ya neekumi natanu neenayi](https://static.globalrecordings.net/300x200/lll3-19.jpg)
Juizes 16:4
Ogonjihiwa wa Samusamu.(Juizes 16:4)
Samusamu ahimoona mwihiyana mmohiya oliye omwaddamela, ndina naye aali
Dalila.- Asogoleli aMafilistewu yahinvaha korowa dhijinjidhene wi oone dha wipipini dha
kopolo dhilubale dha Samusamu. Onvaha dhowakula dhovirigana. Momukohakoha
wi oliye ahikalena kopolo ere havi.
Nda dhahimukathamiha Samusamu, vano oliye kandile ovilela omamalelowa
ahimwaddeliha ebaribari yateene. Oliye ahimwaddeliha mwihiyana aaye wiira:
mwaha wa nroromeliho nerilena ababa vamohi ni amma wi mattitti aaga kidha
esathiwa woona etonyihedho ya othikitheliwa wa Mulugu, vano muthu di muthu
agisatta mattitti aaga kaginakalana kopolo, ginakala woona muthu muthuve. Nlabo
nimohi Samusamu egi ogona, Dalila ahawithanaga anyakoddo a Mafilistewu
moomaleya yahisasanyedhaga wi emmage Samusamu. Mmohi mwa aliwa omusatta
nttitti Samusamu. Vano oliye agavenyile ahixixaga wi awoone, Vano Mulugu
ahimwihiyaga. Mafilistewu yahimukonaga wapudulamo mento aaye, omudhowana
omukaliha perezu. Mafilistewuya yomulabiha ni goyi ya othika mucini, ola waali
mudhidhi wowukuwa wa Samusamu vamohi ni nlogo naaye. Samusamu ahubuwelela
wi obure girihedhe menkaga mwaha wohiya dila ya Mulugu. (*)
20 Yonihelo ya makumi menddi
![20 Yonihelo ya makumi menddi](https://static.globalrecordings.net/300x200/lll3-20.jpg)
Juizes 16:23
Samusamu onowabwanyula Mafilistewu.(Juizes 16:23)
Samusamu agalive morabula muperezuni, ahikalana mudhidhi mujinjeene wowihina
ethithimihiwe egumi yaaye.- Mafilistewu modhiveliwa vajinjivene ni mukalelo
wowihi mwiddani eewa othabwesesa, Samusamu yahimala omukona, yahikalana
mobuwelelo owisasanyedha. Okeratela wiirana ni omubuwelela Mulugu ewa
Ddagomu.
Mowi nda mattitti a Samusamu yahiwelela wunnuwa, vano oliye ahinona wi dhakala
dhowenyeya gineere okalana mudhidhi wogonjiha mwa dila biili wa mulogo waaga.
Nlabo nasakuliwe wiirana mukutho wa Ddagomu mulugu a Mafilistewu,
yahimuthukulaga Samusamu wihina emwadherihe, oliye kanda woona, vano
Mafilistewu yahimwimelihaga ni mapadda menddi yahiddeela nyuba yateene elubale
ya Ddagomu. Vano ahakwaniha ogonja wulubale wa nlogo naaye. Vowi Mulugu
ahikanna mmobuweleloni ogonja mwigumini mwa Samusamu mofuna wi, akale
musogoleli ovuwa a nlogo naaye; Mulugu vano ohukalana mmobuweleloni mwaye ni
hiyo. Mowi nda, eli yofwanela wi nikale ororomeleya wawiwelela madhu a Mulugu.
(*)
21 Yonihelo ya makumi menddi ni emohi
![21 Yonihelo ya makumi menddi ni emohi](https://static.globalrecordings.net/300x200/lll3-21.jpg)
Luc. 8:26
Yesu onowigara muneba dhabure.(Luc. 8:26)
Yesu akala Wizarayeli yaaka dhijinjidhene mudhidhi wa Giddiyawu ni Samusamu
ogavirile. Mulugu ahinfwanya mulobwana mmohi anna mineba dhabure.
Mulobwana ola, vomoona Yesu ahitongwaga okokora vamentoni vaaye eraga : Miyo
ginna ddi ni nyo, Yesu, mwaana a Mulugu odhulu wolapesesa?- mineba nda
dhahinona wi Yesu di mwana a Mulugu, Yesu ahithongaga wi mineba dhabure wi
dhimwihiye. Mineba nda dhahivolowaga mu nikuruni nlubale na guluwe dhaaligi
vakukuve, guluwe dha movoreyiwa ni mineba dhabure dhahikubuwelaga mmbara
okwa ni mahinje. Ale yerelege onamoona dhopadduwa ndha ehinonesesa wi Yesu
ahikanna owodha odhela mwa ddiyabo ni dhothongi dhaye. Mulobwana ola muliba
okalana mineba dha burre ohuyilihiwa woona yonihelo ya mahala malubale oliye
afunaga amuharege Yesu wewo wadhowigiye. Vano Yesu ahimwaddelaga wiira
owele wakale ni amudhi aawo wasorihe dhatedhene Nabwiya a thagaraga dhuwireliye ni wuyiliha we. Oliye ahiwelelaga omudhini vano mudhi wateene ole wahiwaga
dherilena Yesu ni mulobwana ole. (*)
22 Yonihelo ya makumi meenddi ni biili
![22 Yonihelo ya makumi meenddi ni biili](https://static.globalrecordings.net/300x200/lll3-22.jpg)
Luc. 19:45
Yesu onoweeliha Gerezha.(Luc. 19:45)
Yesu nlabo nimohi ahidhowaga waali nyuba ya Mulugu oZheruzale ndda naali niburo
wewo Mazhudewu, walobeliwa yiraganawo mukutho wa Mulugu. Vano ohiya nda,
naali niburo noguliha malondda wewo aliba malondda wagulihisu anenyama, ,amohi
yohiyanihawo korowa.Yesu motakaleliwa vajinjivene, vano egi wawigaranamo ni
muwasuwasu anenyama ni anamaguliha mba mule mwa Mulugu, othathilaga
korowadha burebure. Yesu ahawaddelaga aliwaya wiira:
Dhihilebiwa mmaleboni; Wi nyuba yaaga eneriwege nyuba ya malobelo- vano nyo
muhurugunusa okaliha nikungu naliba wiiya.- Yesu ni efunelo yaaye yoweela
owiddana ni dhothega.- Mowikaleliha alobwana ale, ni mowihelamo yaali
anyagerezha. Vano Yesu ahinona mirima dhiwadha, oliye naari kadhiveliwena. (*)
23 Yonihelo ya makumi menddi ni thaaru
![23 Yonihelo ya makumi menddi ni thaaru](https://static.globalrecordings.net/300x200/lll3-23.jpg)
Mateus 28:16
Yesu onowelela okalana egumi mudhidhi wookwa ogavirile. (Mateus 28:16)
Asogoleli a Mazhuddewu kayarumeedha wi Yesu di mwana a Mulugu. Vano
kayafuna wi oliye akale kingi ewa.
Mwahaya buleena yamusumeliwa emwinkedha ni dhego dhijinji dhahofwanela, Oliye
yahimmaga, omudhowana omathongiwelo.-
Mazhuddewu mamohive yahimpa Yesu ya, omukomela vamuraddini. Nuwi ndo nlabo
nanethaaru oliye ahiwelela okalana egumi, mwaha wi Mulugu ahinvaha kopolo
odheela okwa.- Ajinji anamasuza aaye ni nlogo yahimoona Yesu pamadhene
erumedha wi ebaribarene oliye mugumi. Mwa malabo makumi manayi, Yesu aligi ni
anamasuuza aaye, ajaga ni aliwa asuuzihaga madhu a Mulugu. Ahinathukuliwe
adhowiwana odhulu vamentoni veewa ahiiraga:
Gihivahiwa owodha watewene wa odhulu ni vati, mudhowe vano mwawirele
anamasuuza a Mulogo wateene. Mwasuuzihaga dhego dhatedhene
dhinowaddelesimini, vano miyoya gili ni nyo malabo mateene ofiyedha
omamarihedho.(*)
24 Yonihelo ya makumi menddi nenayi
![24 Yonihelo ya makumi menddi nenayi](https://static.globalrecordings.net/300x200/lll3-24.jpg)
Efesio 6:10
Anyakoddo a Mulugu (Efesio 6:10)
Hiyo nihiwa mwaha wa thalako nda woona Mulugu wakamihedhiye akadda Ezarayeli
ni wagonjiha amwiddani eewa. Nuwi ndo vano ki hiyovano?-
Mulugu oneere onikamihedha ? Madhu a Mulugu enonubusedha wi kopolo dhehu
kadhinakwana. Vowi nda naloba wa Yesu wi anilevelele dhothega dhehu, oliye
onowirana. Kopolo dhaye dhinolaba mwa iyo wi anikamihedhe vanlaboni. Mwaha wi
iyo nihikalana mwiddani mmohi ahofwanelela, ddiyabo. Woona Yesu ohumugonjiha
nambureya, vano ohuniroromeliha wi nakala ororomeleleya, mmadhuni aye vano
nnere omugonjiha mwiddani ehu. Yesu ononivaha kopolo dhowi nikale oliba
mowehiwa. hiyo nnofuna wi nikalena yonikamihedha yowakwana. 1 Yowambeela :
Eli yofuneya wi niwogege ebaribari, vano nikalege ni ebaribariya.
2 Yanabiili nadhivelege akwihu vano niregena dhowogowa. Ela enakale
yowithithihedha yammurimani mwehu.
3 Yanetharu : Niirele onamoona wi Yesu bahi dili mukamihedhi wi nikalena
murenddele ni Mulugu vamohi ni mwaddamani ehu. Ela enakale mwa manyalo ehu
woona sapatho dha vowihivale dhinathawihege wi nihare dila ya ddiyabo.
4 Yanenayi vadhulu va dhatedhene enofwanelela wi nikalena nroromelo nimohi
nowarala ni Mulugu, oyene onalabihe ni yowakwanihedha odheela mogunddiwani ni
Sathana
5 Yanetanu: Ekuru ya mmuruni yofuneya- Ovulusiwa.Yesu ononivulusa mugoyini
yanifwanelele, mwaha wa dhothega dhehu, ahiddelaga madhu a Mulugu, woona
supaadda na muneba, ola onakale woona futhi yowanihana modheela mwiddani ehu
owopiha.-
Akala nlabo ni nlabo nnowara dhenyakoddo nnerege okalave ahothikeya. (*)