Look, Listen & Live 3: Victory through GOD

Y Pamegafuan

Inufunan na Dios yu ili na Israel tafenu affu da ngamin danu kalabadda. Awaya tam matudwan megafu nira, yaya na maginna tam ta mafia anna y dumaddan nga letrato ta kulor tsokolate nga libro nu makaginna kamu ta unneng akum naw.

Mafolu nga letrato: Nakilaba si Josue karunnu Amalicita

Exodus mafulu pitu:walu adde ta mafulu tallo

Danuri Israelita y awan ira ta bukudda nga davvun yaya nga makalakalay ira ta kannag. Si Moses y mong ifafalu nira. Pinili na yu bagitolay ngamanagak ta Josue tafenu mabalinan kapitan na batalyon. Danuri Israelita isinanlong danu Amalicita, yatta na kinagi ni Moses ka Josue, umay kamu tafenu labanan tam danu Amalicita armasu ay mangag da ta ukol, afotun nga tame y tagukuk na Dios. Ya nga na nakafotun yu lima ni Moses na tame y tagukuk na Dios. Afu ta da gafai da Josue anna yu ira Israelita danuri Amalicita. Ngem nu makartagena ngu na si moses tagbanna ay ari na meffutun ni tagukuk na Dios, Danuri gaffu Amalicita y mangaf-fu ta laban yaye nga y futtan danag na dua nga lalaki y mefutun danuri lima ni Moses adde ta gavi. Anna y naffunan na Dios si Josue ni affutan danu Amalicita.

Mekarwa nga letrato: Danum magitarun adda nga prutas ta Canaan

Numero mafulu tallo: tadday adde ta mafulu appa:tallu pulu lima

Initabba na Dios nga iya na karana Israelita yu davvun na Canaan. Yaya naddok si Moses ta mafulu ta dua nga lallaki tafenu magitaron ta davvun. Kabalinan na appa ta fulu nga aggaw, nattoli ira anna inifamag da danuri nasingadda. Si Josue anni Caleb y azza inibulu da nga makasta nga damag. “Yu dabbun y matava aru y gatto sa anna issi, zo taw yu bunga na kayora. Danuri madjan tori ay masisikan. Ngem ari ittam maganassing. Nu y Dios ay maayayo ittam, bulunan na ittam tori nga dabbun.” Ngem danuri duma nga nagitaron ay egga bulu da marake nga damag. Kinagi da nga danuri tolay ta Canaan ay puli na higante, gafu taw nassing danuri Israelita nga tullung ta Canaan. Gafu taw, napporay y Dios ta ariadda pangurug sa. Yaya initoli na ira ta kannag ta appata fulu nga dagun. Ngamin nga Israelita nga ari nangurug ta Diosay ay natay ta kannag.

Mekallu nga letrato: Yu paddaki danuri Israelita ta dappā

Josue tadday:tadday adde ta siyam, anna tallo:tadday adde ta mafulu pitu

Angena patay ni Moses si Josue nanali nga nangifolu karanu Israelita. Kinagi na Dios ka Josue, “Mangifara ka anna ngamin nga Israel ta paddaki ta dappa na Jordan mappange ta davvun nga iya ko sangay nikamu.” Kinagi na Dios ka Josue danu langan na sangaw. Danuri pari ay azza kahon danga dakal balor na, nga nu agalan ni kahon na tabba. Nakkarga yaw ta bilin na Dios nga nakatura ta tapping na batu. Kinagi na Dios nira nga akkatan da yu kavan na tabba anna maddaki ta dappā, motun yu danum na dappā, ngem tangu ta nakavatay danu takki danu pari ta danum ay nagimmang y pagagi naw anna nammaga yu dappā. Danuri pari ay nanaddak tu tang-nga na dappā, tafenu makaraki danuri tolay nga umay ta Canaan nga mamaga y davvun.

Mekappa nga letrato: Y alitu na Jerico ay narabbā

Josue annam: tadday adde ta duafulu-pito

Danu Israelita ay nakkampo ta Canaan nga aranni ta ili nga nu agaladda ay Jerico. Kinagi na Dios ka Josue, “Inya ku na ta lima nu y Jerico. Mallefuan kamu ta ili na Jerico kabulun nu ngamin danuri suddalo ta unak na annam nga aggaw. Kavulun danuri pito nga pari nga azza vulūda nga trumpeta ta uluanan na kavan na Dios. Ta mekapito nga aggaw, mallefuan kamu ta ili mamifitu anna susufan danu pari yu trumpeta. Kavalinan na ay makkali nga maggigiddan danu tatolay ta masikan. Anna yu alitu na ili ay marabbā ann awwaya na ngana nga makatallung danu tatolay taw.” Kingawa lagud ni Josue addanu tatolay ngamin nga kinagi na Dios nira. Y alitu na ili ay narabba anna natallung danuri Israelita yu ili. Kinagi na Dios nira nga awā ira afan nga para ta baggi da.

Mekalima nga letrato: Y pattammang danu Israelita kara nu taga Ai

Josue mekapito:tadday adde ta mafulu ta duwa

Y Ai, at tadday karanu kalavan nga ili nga aranni ta ili na Jerico. Maway va yaw nga matallung ni Josue, yayanga nagirok ta lallaki tafenu umay magitaron ta ili. Nattoli danu nagitaron anna nakkagi, “Ariammu ngana irok ngamin nga tatolem, tafenu labanan y Ai, kekavutti laman danu lallaki ra.” Yaya naddok laman ta vutti nga bilang na suddalo na Israel. Ngem inaffu na tatolay na Ai danuri suddalo na Israel. Danuri karwan nga suddalo na Israel ay nammatay ann adanu karwan ay nattammang para ta inangō da. Nappalittukak si Josue ta Dios. Ngem kinagi na Dios, “Danuri Israelita ay nakaliwa, ira ay nakkoko anna nakkamkamati, yaya ari ira makataddak ta atuvang na karama da.”

Meka annam nga letrato: Y Sentensiya ni Acan

Josue pito: mafulu appa adde ta walu:duafulu siyam

Innunnuk ni Josue yu ngamin nga Israelita ta atubang na Dios anna inifasingan na Dios ka Josue nga si Acan y nakaliwa sa. Kinagi ni Josue ka Acan, “Kagian mu nu anni kingwam?” Kinagi lagud ni Acan, “Kurkurug! Nakaliwa ka ta Dios. Danu in-inā ku ta Jerico ay za nasingan ku makasta nga afungi, kuartu, anna bareta nga vulawan, inā ku danaw. Nasinga nga kurug danuri kinoko ni Acan nga netutu ta tolda na. Yaya nga dinusada si Acan nga matay, ta bilin na Dios. Nafawan y poray na Dios, kinagi Na, “Afan mu ngamin nga suddalo, umune kamu ta tallungan nu y Ai. Ari kamu massing, ta iniya kungana yu interu nga ili ta lima nu (kua nu ngamin sangaw ira). Kinurug da lagu ngamin nga kinagi na Dios, inaffu da lagu yu ili nga Ai.

Mekafito nga letrato: Y pagimmang na Bilak anna Vulan

Josue mafulu:tadday adde ta mafulu appa

Y marake nga makifagili ta Canaan ay nangigafu nga massing ta Israel. Danuri lima nga tribu na Canaan ay nattatadday tafenu lavanan da y Israel. Ngem kinagi na Dios ka Josue, “Ari ka massing nira.” Ayay nga si Josue addanu suddalo ay nallawan tafenu lavanadda danuri tribu ann adanaw nga tribu ay nakkakarera gafu ta firmi nga assing da. Su maddagun nga mattammang danuri karama da ay pinaguran na Dios ta darakal nga tapping na yelo. Aru nira y nammatay. Inituluy da nallavan ade tanga-aggaw. Kinagi ni Josue, “Bilak magimmang ka!” Pinagimmang na Dios si bilak anna vuilan ta aggaw galaman nuri adde mavalin nga affutan na Israel yu ngamin nga kalavadda. Ari na vuluvunga nautru yu kunnuri. Iniffunan na Dios y Israel tafenu affutadda danu marake nga tribu na Canaan.

Mekawalu nga letrato: Tinudduan ni Josue danu tatolay

Josue duafulu ta tallo: tadday adde ta duafulu appa anna duafulu ta walu

Y Canaan ay nabbalin nga davvun danu Israelita, kagitta na initabba nira na Dios. Tangu-nga si Josue ay laka-lakay ngana, inunnuk na danu ta tolay. Kinagi na karanaw, “Mappasikan kamu, magimuguk kamo ta pattutul ta livro na bilin na Dios. Nu sikamu ay masservi ta dios-diosan maddusa kamu sangaw ta mafia nga davvun nga iniya na nikamu ta Dios. Maddesision kamu sanga nu sinni ikaya nu passervian.” Danuri ngamin nga tatolay ay initabba da nga masservi ira ta Dios. Wawagi, tinuppal na Dios danu ngamin nga initabba na ka Josue anna ta ili na Israel. Iniddan na ira ta bukudda nga davvun anna inafu da ngamin nga karama da. Y Dios initabba nittam y lugar ta langi adde noka. Y Dios ay manuppal ngamin nga initabba na. Y karama tam ay y demonyo ngem azza nerumruma nga mangifofolu nga mangafu ta demonyo. Yaya y Yafu tam nga si Jesu-Kristo. Mawak tam nga tumuttol anna masservi Sa. Yaya sanga mawak mu mappili nu sinni y emmu passervian.

Meka siyam nga letrato: Nangivovuk si Debora para ta Dios

Danu ukum appa:tadday adde ta meka siyam

Tangu ta patay ni osue danuri Israelit ay nallikuk ta Dios. Nangirayrayaw ira ta dios-diosan danu Cananeo. Yaya nga niddan na Dios danuri Cananeo ta sikan kontra karanu Israelita, anna ira ay nakikavulun ira ta ari makasta. Si Devora ay tadday nga manono nga vavay, tadday yaya nga nabbalin nga ukum ta Israel. Danuri tolay ay zimiki tafenu makkiddaw ta tavarang. Pinaruvan na nga mattoli danu Israelita ta Dios. Tadday aggaw, inagalan na si Barac, mangifofolu ta suddalo na Israel. Kinagi na sa, ifulu mu danu mafulu nga lallaki ta vukik na Tabor. Si Sisera addanu suddalo na Canaan ay lube tafenu labanadda kamu. Ngem y Dios y mangya nikamu ta balligi kontra nira. Ngem si Barak ay naganassing, kinagi na ka Debora, “Nu arian nakami, vulunan ariak tori umay.” Yaya nga kinagi ni Debora sa, “Umaya nikamu, ngem iya na Dios yu sikan ta tadday nga vavay kontra ka Sisera. Y pakerayawan ay ari ume nikaw.”

Meka mafulu nga letrato: Y Dios ay nanguffun tafenu maffu Sisera

Danu ukum appa:mafulu adde ta mafulu-pito, lima:mafulu ta siyam, adde ta duafulu

Si Debora anni Barak addanu Israelita ay minay ta vukik na Tabor. Si Sisera anna ngamin nga suddalo na Cananeo ay nallawan tafenu makilavan nira. Si Sisera ay azza nga gatu nga kalesa na. Danuri Israelita egga lamon palataw ta limada. Danuri Cananeo ay minay ta aggik na dappa aranni ta bukik na Tabor, ngem danu kalesa ra ari makalakak ta motun nga ukul. Yaya nga nayyanuk ta dakal nga danum tutta dappa. Innafu na suddalo na Israel danuri Cananeo. Ngamin nga suddalo ay natay. Si Sisera laman y nakatammang, nakkarera minarrayu nga takki-takki laman.

Meka mafulu ta tadday nga letrato: Pinapatay ni Jael si Sisera

Danu ukum appa:mafulu pito adde ta duafulu ta tallo

Si Sisera ay nattammang anna minay ta tolda na na tadday nga vavay nga y nagan na Jael. Kinagi na ka Sisera, “Tullung ka! Ari ka maganassing.” Si Jael ay ari yaya tadday nga Israelita., yaya simillung si Sisera ta tolda na turi nattutu. Iniddan na ta inuman nga gatō si Sisera, anna kinallabban na ta makannak nga ulō anna si Sisera ay nakakaturuk. Si Jael ay nanga ta para tulus na tolda anna panōtō. Keimammo nga minaranni si Jael ka Sisera lagay na nga nakaturuk; anna initunnō na yu tulos ta ulo na, yaw ay simiffu adde ta davvun. Sanga lagu limibbe si Barak nga magal-alek ka Sisera. Inagalan na si Jael ta tolda na anna kinagi na, “Ekka taw ipasingakku nikaw y tolay nga al-aleram mu.” Si Sisera ay magga-idda nga awanattu inango, za tulus na netunno ta ulo na nga siniffu adde ta davvun.

Meka mafulu-dua nga letrato: Nasselevra danuri Israelita

Danu ukum meka-lima:tadday adde ta tallo fulu tadday

Y Dios y nangya ta sikan na Israel tafenu affutadda danuri Cananeo. Si Debora anna Barak ay nakkansion ta pangirayrayaw anna pabbalvalō ta Dios. Nakkunsuelo ngamin nga tatolay, nakkansuelo ira ta egga mangifofolu nira nga kagitta ni Debora. Yaya ay kagitta na yena nira. Zinayaw da gafa si Jael gafu ta ari maganassing ka Sisera. Inusa na Dios danaw nga dua nga vavay tafenu melilli y Israel. Wawagi, nag usa y Dios ta anningam tam ay makafi tafenu mapabballigian danuri masiksikan. Azza va masikan nga kalavatan ngem zinak na Dios si Hesus tafenu ililli na ittam ka demonyo. Mararame nga tatolay na namafatay ka Hesus. Abbattadda nga awa yaya to sikan. Ngem natolay yaya galan. Inaffu na si demonyo anna ngamin nga marake nga tatolay. Iddan na ta sikan anna awatto adde na nga inangō danu mangurug anna tumuttul Sa. Yaya makkansion ittam, maggalō, anna mangirayrayaw ta tadday nga kurug nga Dios.

Pamegafuan ta dumaddan nga parte

Y demonyo ay mangil-illoku kontra karanu tumuttul ta ikaya ni Hesus. Ngem ipasingan na nittam y Dios nu kunnasi ittam mabballigi kontra ta demonyo. Maggina anna maggigiammo karanaw nga istorya (naggafu ta biblia). Innan y dumaddan ng letrato nu makaginna kamu ta uni nga kunnaw.

Meka mafulu tallo nga letrato: Si Gideon anna anghel na Dios

Danu ukum mekannam:duafulu lima adde ta tallo fulu dua

Danu Israelita ay kekatul ta Dios, nappadday ira ta marake nga gannuk. Yaya nga inikaveng na Dios danu Medianita nga mappatul ira ta pito ragun. Zinaval danu Medianita danu mulmula na Israelita. Danu Israelita makivovuk ira ta Dios tafenu ililli na ira. Tadday nga aggaw za tadday nga lalaki nga mannagan ta Gideon nga mattututu nga magani ta trigo, tafenu ariadda masingan danu Medianita. Tadday nga anghel na Dios nappasingan ka Gideon. Kinagi na sa, “Umay ka taw ta illlli mu danu Israelita karanu Medianita.” Ngem kinagi ni Gideon, “Kunnasik lagu nga melilli y Israel... sok ay makafi laman.” Kinagi na Dios, “Sok ay kavulummu. “Si Gideon ay nangya ta makan tuta anghel. Inafefuan yaya na anghel usa na yu tagukuk na insigida nga nagganga yu afui ay yu anghel ay nappawan. Ammo ni Gideon nga yuri nga uvovuk ay nagafu ta Dios.

Meka mafulu appa nga letrato: Vinurā ni Gideon daruri dios-diosan

Danu ukum annam:duwafulu lima adde ta tallo fulu dua

Y pamilya ni Gideon ay nagiray rayaw ka Baal anni Asera, danuri dios-diosan na Canaan. Kinagi na Dios ka Gideon, “Waratammu yu altar ni Baal na nifafadday na yamam anna gappatan mo yu kallang ni Asera ta aggik naw. Mappatadak ka ta altar nga mefarang ngō ta Dios.” Si Gideon ay naganassing ta tatolay ngem ikā na tumuttul ta Dios. Yaya na ta gavu nuri nangivulu yaya ta mafulu nga kallaki ann binurā da danu dios-diosan. Danu tatolay ay napporay ikā da nga papatayin si Gideon ngem iniyugā nu yama na. Wawagi, y Dios ay mas dakal anne karana dios-diosan nga kayu anna bato. Mawag nga segida nga kurugan y Dios.

Meka mafulu lima nga letrato: Y pangnginum ta danum danu suddalo ni Gideon

Danu ukom pito:tadday adde ta pito

Inunnuk ni Gideon danuri lalaki ng suddalo na Israel. Danu Medianita ay nattatadday tafenu lavanadda danu Israelita. Ngem kinagi na Dios ka Gideon, “Sobra karu danu tatolem, nu asinni maganassing awaya na nga na lubbē.” Aggi ngamin nga suddalo nga kavulun na ay lumibbe ta babalay da. Kinagi uttro na Dios ka Gideon, “Aru kamu fagalan. Umay kanu ta aggik na dappa anna paruvakku ira para nikaw.” Yaya inuvutu ni Gideon danu suddalu na turi ta aggikna dappa tafe uminum. Aru nira y nappalittukak anna mininum nga kagitta na kitu. Tallo gatu laman nira y mininum ta danum nga inusa na da yu lima da. Yaya nga kinagi na Dios, “Danaw nga tallo gatu nga tolay nga mininum usa da y lima ra y makaffu ta Medianita.

Meka mafulu ta annam nga letrato: Pinalefuanan danu tolay ni Gideon yu kampo na Medianita

Danu ukum mekafito: mafulu ta dua adde ta dua fulu ta lima

Y dakal nga batalyon danu Medianita ay nakkampo ta aggik na dappa. Azza suddalo da anna kamelyo nga ari mavilang y karu na. Si Gideon ay egga laman tallu gatu nga tolay na, ngem kinagi na Dios nu anni y ovran da. Iniddan ni Gideon ta trumpeta y kadatadday nga tolay anna isingan nefay ta unak na banga awattu nandjan. Ta pattangnga na gavi na nilefuanan da yu kampo na Medianita. Mavulu ira nga nappadday ta masikan nga uni. Sinufan da danu trumpeta anna pinakka da danu banga anna nakkalli ira ta masikan, “Y palataw ay para ta yafu Dios anna para ka Gideon.” Danu Medianita nafalla, anna havurun, anna nallavan lavan ira. Nakkakarera ira minarayyu ta kampo da. Anna inafu ira na Israelita. Wawagi, maske ittam ay makafi anna vutti y bilang kunē kara Gideon, ta uffun na Dios inaffu ta yu masikan nga kalavan nga si demonyo.

Meka mafulu pito nga letrato: Si Samson ay namafatay ta Leon

Damu ukom meka mafulu tallo:tadday adde ta mafulu appa: mafulu ta siyam)

Ta patay ni Gideon danu Israelita ay nallikuk ta Dios. Inikaveng na Dios y marake nga Filesteo nga pinarigā ira. Naddōk y Dios ta mangifolu nga masikan nga mangililli ta Israel. Y nagan na ay Samsun. Pinadday yaya nga masikan na Espiritu na Dios. Ngem arianna inusa y sikan na tafenu ililli danu Israel karanu Filesteo. Inusa na y sikan na ta baggi na lava yaya ay tumuggay ta Dios. Nangyā yaya ta tadday nga Filesteo nga vavay. Yaya nga kinagi na ta yama na, afannu yaya para niō, ta yaya ay makayaya niō. Ta angeni Samson ta balay na vavay tadday nga leon y ziminafun sa. Si Samsun ay nefallo ta sikan, yaya nga innafu na yu leon, usa na lan yu lima na. Inivoda na yu vavay nga Filesteo ngem yaw vavay ari na id-iddukan yaya. Yaya nga pinafatay na danu tallo fulu nga Filesteo ta poray na.

Meka mafulu ta walu nga letrato: Si Samson adda nu maggi-gillayuk nga kitu na kakaywan

Danu ukom mafulu ta lima:tadday adde ta mafulu ta pito

Si Samson ay minay mangana karanu taga Filesteo tafenu afab na yu atawana, ngem iniya yaw na yama na ta duma nga lalake ta mabbalin nga atawa na. Kinagi ni Samson, sanga magivalō ka kara nuri Filesteo. Nanaw yaya naggafu yaya ta tallo gatu nga kitu na kakaywam. Pinaggi-galu na ira ta ifu da ta taggi dua anna ginabbinan na ira ta isingan. Kavalinanna ay inibbattab ba ira ta katriguan danu Filesteo, yaya nga natuggian danuri ka triguan na Filesteo. Danuri Filesteo ay napporay ka Samson. Pinaruvadda yaya nga papatayan, ngam si Samson ay nakala ta pangal na asno. Yaya pinafatay na ta marivu nga Filesteo.

Mekamafulu siyam nga letrato: Y paggappō danuri Filesteo ta vū ni Samson

Danu ukom mafulu annam:appa adde ta dua fulu dua

Yu vū ni Samson ay arifanga nagappatan adde ta kavatti na. Yu afaddu nga vū na ay pagasinnan nga yaya ta kuana Dios nga mamasikan sa. Si Samson ay natuttulluy la nga tumuggay ta Dios. Yaya ay minay ta janna Filestea nga vavay nga mannagan ta Delilah, pinaruvan na ngamin tafenu mannanuam na y ituttuttu ni Samson natta yaya ay masikan. Ta uryan kinagin gala ni Samson. “Sō ay inifay na Dios nu y vū ku ay magappatan mafawan y sikan ku. Tadday nga gavi, ta pakkatuuk ni Samson, inagalan ni Delilah danuri Filesteo ginappō da yu vū na. Yaya nga nanawan na Dios kagiddan na yaw ay nafawan yu sikan na. Inigalū danu Filesteo si Samson anna pinaddul da yu mata na. Anna initutū da ta affukutan ngem y vū na ay minafaddu otru.

Mekaduafulu nga letrato: Y paddara ni Samson karanu Filesteo

Danu ukom mafulu annam:duafulu tallu adde ta tallo fulu-tadday

Danu mangifofolu karanu Filesteo ay magiyatang karanu dios-diosan, inilawan da yu vuling nga si Samson inā da ta affukutan anna pinataddak da yaw ta tangnga na dua kallang na balay tafe yaya ay pagayaman da. Si Samson ay naddasal ta Dios, kinagi na, “Nonofan nak Dios ku ta oras naw ay otran nak passikanan.” Kavalinan na ay sinammi ni Samson yu kallang na balay. Namerigan na anna inusa mangamin nga sikan na yu balay ay narabba anna yu ngamin nga Filesteo nga za turi. Si Samson anna ngamin nga nangifofolu koranu Filesteo ay navuvulū ira nga nammatay. Y Dios y nangya ta balligi ka Samason lavan karanu Filesteo, ngem gafu ta siminuggay natay yaya nga ari nassingan yu pangaffu na. Wawagi, nu iyawa tam y paginango tam ta Dios, ay iddan na ittam ta sikan taffenu affutan tam yi demonyo, anna ngamin nga marake nga plano na. Ngem mawag nga usa tam y sikan ta passervi ta Dios nga ari para ta baggi tam laman.

Meka duafulu tadday nga letrato: Pinafanaw ni Hesus yu marake nga espiritu

Lukas walu:duafulu annam adde ta tallo fulu siyam

Pappasa na aru nga dagun anna tiempo kara Gideon anni Samson si Hesus ay natolay. Tadday aggaw, egga nam-ammo na na tadday tolay nga sinallungan na marake nga espritu. Yaw nga lalaki ay nappalittukak ta atuvang ni Hesus nga nakkagi, “Anni y kingwa nikaw Hesus, anā na kautu-uturan na Dios?” Ammo nadaw nga espiritu yaya ay anak na Dios. Zinō ni Hesus danu espiritu nga panawadda yu lalaki danu espiritu ay simillung karanu bavui nga azza turi. Yaya nga danu bavui ay nakkarera ta vevay, ngamin ira ay nalaggabban. Nassingan danuri tatolay nga si Hesus y makafangwa annē ta demonyo. Anna ta ngamin nga marake nga espiritu. Maski danu espiritu ay tumuttul Sa.

Meka duafulu dua nga letrato: Pinafanaw ni Hesus danuri marakke nga tolay

Lukas mafulu siam:appa ta pulu lima adde ta appa ta walu; anna Juan dua:mafulu t

Tadday nga aggaw si Hesus ay minay ta balay na Dios turi ta Jerusalem. Danuri mallaklaku ay azza turi ta balay na Dios. Ira ay mallaklaku karanu ayam nga medatun. Ngem ira ay magalek ta kuartu nga megafu ta pangilloku ra ta duma. Napporay si Hesus, kinagi na nira, “Y balay ay managan, ta balay nga addasallan, ngem pinadday nu nga adjanan na minakoko.” Sinavū Na danuri marake nga mallaklaku anna ngamin nga ayam da ta lawan, si Hesus anā na Dios.
Egga Sa y katunungan, sik’an, anna makafangwa nga mamafanaw danuri marake nga tatolay mappalawan ta balay na Yama Na. Ngem, danuri karwan nga Hudyo ay napporay anna kinagida, “Ifasingan mo nikami nga azza katunungan mo nga kuammo danaw!” Simibba si Hesus daralan nu y balay, ta unak na tallo aggaw ay utro ku pataddaggan.”

Mekaduafulu tallo nga letrato: Si Hesus ay natay anna atru natolay

Mateo duafulu pito:tallo-fulu tallo adde ta duafulu walo:duafulu

Danuri Hudyo y namafatay ka Hesus, yaya ay inifato da ta kruz nga kayo anna natay. Ngem ta mekallo nga aggaw, yaya ay natolay galan, iniddan na Dios si Hesus ta pakafangwa lavan ta kamatayan. Ari na yaya otru nga matay. Nasingan danu ta tolay nga si Hesus ay kurug nga anā na Dios. Kinagi ni Hesus karanu tumuttol Sa, “Inyawa na niō y ngamin nga pakafangwa ta langi anna davvun. Gungwā kamu anna pabbalinan nu nga tumuttul niō ngamin nga tolay nga ngamin nga lugar. Tuduan nu iran nga tumuttul karanu inibilin ko nikamo. Anna segida dā nga kavulun.” Si Hesus ay makafangwa lavan ta demonyo, liwa, anna patay. Iniyawā na y na espirituan nga pamendisyon ta ngamin nga tumuttol sa. Ikaya na nga ivallay tam yaw nga uvovuk ta ngamin.

Mekduafulu appa nga letrato: Y suddalo na Dios

Efeso annam:mafulu adde ta mafulu ta walo

Inaffu ni Hesus yu demonyo. Iniddan ittam ni Hesus ta pakafangwa lavan ka demonyo. Mwag nga nakafran ittam kagitta na suddalo nga nakafaran ta laban. Olu, mawag nga ittam ay manguvovuk ta kakurugan. Mawag tam kakurugan nga nakalevu nittam kagitta na sintoron. Mawag tam nga iddukan y kagitta, anna mappaday ta mafia. Yaw ay kagitta na sippak nga manerra ta marake nga plano na demonyo lavan nittam. Mawag nga ivallay tam ta duma nga si Hesus y dalan na imammo. Yaw ay kagitta na addakua nga makafagarayu ta makesiddukal nga fadday na demonyo. Mawag tam mangurug ta Dios, tafenu fermi nga melilli. Yaw ay kagitta na sangga nga mangimuguk nittam ta paddarup na nittamta demonyo. Inililli na ittam ni Hesus gafu ta sentensiya na karanu nakalivatattam. Yaw ay kagitta na kallovung nga mangililli nittam ta espiritu adde ta pagultimuan na patay. Y ovovuk na Dios (Biblia) ay kagitta na tadday nga palataw, mawag tam yaw nga usan tafenu pagimammattan ngamin nga kasiryan nga ang-angwa na demonyo. Mawag nittam nga makivovuk ta Dios ta dasal anna tuttulan danu bilin Na. Anna sigurado nga mawattat tam y pangaffu lavan ta demonyo, ta liwa, anna awattu pagultimuanna nga patay.