unfoldingWord 17 - David Kuoma Pathien Thuthlung

Saula chu Israel lal hmasatak a nih. Mipuiin an dit zawng taka, dung insâng le hmêl thra, ngainobei tak a nih. A tîr chun Saula chun a thaw thra hle a, a nakie tieng chun Pathien thu awi ta lovin misuol a hung ni el ta a, chuongchun ama aia lal la hung ni ding mi dang Pathienin a thlang ta a.

Pathienin Israel tlangval a hming David chu Saula zova Israel lal dingin a thlang a, David chu Bethlehem khuo a um, beram vêngtu a nih, Beram a vênglai chun, beramhai hung setum, savom le sakeibaknei a that veve a. David chu Pathien ringa, a thu zawmtu, fel le nun innêm tak a nih.

David chu sipai hrât le hotu hrâttak khom a nih. Tlangvâl, tleirawl a ni lai khom milien, Goliath an ti chu a bei a. Goliath chu indo thiem sipai le hrât tak el, meter thuma dung insâng a nih. Nisienlakhom Pathienin David chu a thrangpuia, Goliath chu a thata, Israelhai chu a sansuok ta a.

Saula chun David a hung thîk trana, voi tamtak that a tum a. Nikhat chu David that tumin Saula chun a zonga. David inbikna pûk sûnga chun Saul chu a lût fûk a, ana chu David chu a va hmu nawh. Saula chu that nêkin lal hung ni ân chu naw zie sukchiengna dingin Daid chun Saula puonhmawr chu a rûkin a va âtthlâk pêk a.

A tawpa chun, Saula chu indona hmunah a thita a, David chu Israel lal a hung ni ta a. Lal thratak a ni leiin, mipuiin an lawm a. Pathienin David chu mal a sawm a, an hlaw tling tir a. David chu voitam tak indonaah a thranga, Pathienin hnena pêk hlak a, David chun Jerusalem khawpui a rûn a, a lâka, ama khawpuiin a siema. Davidin ro a rêl sûng chun Israel ram chu a hrâtin a hausa em em.

Mitinin Pathien an bieka, a kuoma an inthawi theina dingin David chun Tempul bawl a nuom ta a. Kum 400 sûnglai zet Intuokna Puonin, Mosie’n a bawl a khan mihaiin Pathien an biekin, a kuoma an inthawi hlak a.

Pathien chun zawlnei Nathan kuoma hi thucha hi anchawitira, David kuoma a tira, “Nangchu indomi I ni leiin ka ta dingin in mi bawl pêk naw ti nih. I naupa’n bawl lem a tih. Nisienlakhom nang chu nasatakin mal sawm ka ti che. I insunga mi pakhatin Israel lalthrungphaa thrungin rorel a ta, ama chu Messia ti nîng a tih!” Ama chu Pathien mithlang, suola inthoka khawvel sansuoktu ding chu tiin.

Chuong thu chu Davidin a hriet chun Pathien kuoma lawmthu hrilin an pâk ta a, Pathienin David kuoma ditsakna nasatak le malsawmna tamtak pêk a tiem a. Messia hung hun ding sawttak el, kum 1000 sûng deu thaw Israelhai in an lo nghâk a nih.

David chun feltak le ringum takin kum tamtak ro a rêla, Pathienin mal a sawm bawka. Amiruokchu, a hun tawp tieng chun râpthlâk tak elin Pathien laka a suol el ta a.

Nikhat chu, a sipaihai indona hmuna an umzing laiin David chu a sûnin a hung tho hara, nuhmei hmêl thra deu el insil lai a hei hmu a. Chu nuhmei hming chu Bathseba a nih.

Thlîrzui naw pei tumta nêkin, David chun chu minu chu va thruoi dingin mi a tir el ta a. chuonghcun a lo zâlpui a, a tirkîr nawk el a. Hun sawtnawte hnung chun Bathseba chun David kuomah nau von a ni thu chanchin a hei hril a.

Bathseba pasal Uria chu David sipai ringumtak a nih. David chun Uria chu indona hmuna inthokin a ko kîra, a nuhmei zâlpui dingin a hril a. Nisienlakhom sipai popo indona a an thranglaia intienga lo kîr chu a nuom naw a. David chun Uria chu râl zuolna laitaka inhmatawngtira, an thata, a thi theina dinga remruot dingin sipai hotu, Joab kuomah lekha a thona. Chu lekha chu inchawitirin Uria chu indona hmun tieng chun a tir suk a.

Uria chu râlin an that hnung chun David-in Bathseba chu nuhmeiin a nei ta a. David chu naupasal a nei pêk a. David thilthaw dân chun Pathien a suk lungawi ta naw a. Chuongchun a thilthawdân chung chang Pathien a lawmnaw thu hril dingin zawlnei Nathan chu David kuoma Pathienin a tir a. David chun a suol a sima, Pathienin a ngai dam a. Hun nuhnung tieng chun, harsat huna khom David chun Pathien ringin a bêl tlat lem ta hlak a nih.

Nisienlakhom David suolna lei chun a naupasalte chu a thi ta a. A hun nuhnung tieng chena khom David insûnga chun indona le insuolnain a mâksan naw a, chun David thilthawtheina chu nasatakin a tlahnuoi a. David chu Pathien kuoma ringum lovin um sienkhom Pathien chu David kuoma a thu tiemhai a ring a um zing a.