unfoldingWord 04 - Isor Pora Abram Logote Niom Banaise
Samenvatting: Genesis 11-15
Scriptnummer: 1204
Taal: Nagamese
Thema: Living as a Christian (Obedience, Leaving old way, begin new way); Sin and Satan (Judgement, Heart, soul of man)
Gehoor: General
Genre: Bible Stories & Teac
Doel: Evangelism; Teaching
Bijbelse verwijzing: Paraphrase
Toestand: Approved
De scripts dienen als basis voor de vertaling en het maken van opnames in een andere taal. Ze moeten aangepast worden aan de verschillende talen en culturen, om ze zo begrijpelijk en relevant mogelijk te maken. Sommige termen en begrippen moeten verder uitgelegd worden of zelfs weggelaten worden binnen bepaalde culturen.
Tekst van het script
Ban-pani hoa bisi sal pichete, manukhan prithibi te arubi bisi bhorta hoise aru taikhan bisi pap kamkhan kuri thakise aru ekjon-ekjon apaste bia kam kuri thakise. Aru sob manukhan ekta bhasa he cholai thakise, aru taikhan sob ekta sahar banaikena eki logote thakijabole bhabona kurise, aru Isor pora tai khanke prithibi sob bhorta kuribi koa kotha taikhan mananai.
Taikhan bisi phutani hoise aru Isor pora taikhan ke kineka tai laga kothakhan manikena thakibo lage itu niomkhan juntu dise sob bhangai dise. Aru taikhan ekta utcha ghor banabole kurise, juntu sorgo tok punchibole paribo. Isor tetia dikhise tai khan ineka eki logote thakile, aru bisi bia kam kuribole paribo.
Itu nimite, Isor pora taikhan laga ekta bhasake apaste buji napabole laga bisi bhasa kuridise, aru taikhan ke prithibi laga alag alag jagate khedai dise. Kuntu taun tae khan banai thakise utu taun ke Babel matise, itu laga motlob ase ‘ulta-pulta kuridia.’
Ekso sal pichete, Isor pora ekjon manu, jun laga nam Abram thakise, taike kotha koise. Isor Abram ke koise; “Apuni laga desh aru ghor manukhan ke charibi, aru utu desh te jabi juntu ami apuni ke dikhabole ase. Ami apuni ke asis dibo aru apuni ke dangor desh banabo. Apuni laga nam bisi utcha kuridibo. Jun apuni ke asis kuribo ami tai ke asis dibo, aru jun apuni ke shrap kuribo ami tai uporte shrap rakhidibo. Aru apuni pora ami sob deskhan ke asis dibo.”
Isor pora koa nisina Abram kurise. Tai laga maiki Sarai aru tai kiniloa noukarkhan aru jiman dhonkhan komaise itu khan sob loikena Isor dekhai dia desh Canaan phine jaise.
Jetia Abram Canaan te punchise, Isor tai ke koise: “Apuni laga chuku pora jiman mati dikhibole paribo, utu sob ami apuni ke dibo aru hodae nimite apuni laga khandankhan laga hobo.” Aru Abram utu desh te thaki jaise.
Melchizedek nam laga ekta manu thakise, aru tai Isor Pormeswar laga pujari asile. Ek din jetia Abram lorai jitikena ahi thakise, tetia tai aru Abram lok kurise. Tai Abram ke asis dise aru koise: “Isor Pormeswar, jun swarg aru prithibi laga malik ase, Abram ke asis dibi!” Aru Abram ji-ji samankhan lorai te dhurikena anise itu sob laga dos bhag Melchizedek ke dise.
Bisi sal hoijaise, hoilebi Abram aru Sarai ke bacha hoanai. Isor Abram ke kotha koise aru kosom dise tai ekta chokora pabo aru tai laga khandankhan asman te ginti kuribole napara tarakhan nisina hobo koise. Abram Isor laga kosom biswas kurise. Aru Isor pora Abram ke dharmik ase koise, kilekoile Abram Isor laga kosom ke biswas kuri thakise.
Tetia Isor pora Abram logote ekta kotha milaise. Jetia niom milai, tetia duita bhag manukhan majote kotha milaithake. Hoilebi iyate toh Isor pora Abram ke mora nisina ghumabole dise aru tai logote kotha milaise, hoilebi Abram Isor laga awaz hunibo pari thakise. Isor tai ke koise; “Ami apuni ke nijor laga chokora dibo. Aru Canaan laga desh apuni laga khandankhanke dibo.” Hoilebi tetia tok Abram ke chokora hoanai.