Vanja, Yevelela Kuenda Kala Elivulu Li 8 Ovilinga Vi Espilitu Li Kola

Ulandu

Kalunga! Vocipama cilo njongola oku ku lomboluila eci ci tiamela Ke Espilitu li Kola lia Suku ukamuenyo. Vanja koviluvialuvia vielivulu lievala likusuka (purple) osimbu o yevelela kokasete. Tuvula ociluvialuvia ci kuayimo eci o yevelela ocisungo eci.

Ociluvialuvia Ca 1: Yesu O Tiukila Kilu

Ovilinga 1:1-11

Vanja kociluvialuvia. Yesu o kasi loku votoka kilu lieve loku endela velende oku loña kilu. Olondonge viaye vi kasi loku ci tulukila, Yesu eye Suku ocili, kuenje eye wa tunda kilu loku iya kulo kilu lieve konyima yo lo 2.000 kanyamo. Wa citiwa lufeko ka kũlihile ulume, onduko yufeko waco Maliya, vimbo lia tukuiwa Mbeteleme. Yesu wa linga omunu ha lekisa ndomo Suku a tuwa. Omo liolonjila viavo vĩvi, omanu vosi va pembula Suku. Va linga akandu. Ekangiso liekandu okufa kuenda oku litepa la Suku. Puãi Suku o sole omanu vosi. Eye ka yongola okuti ovo va enda vonjembo, ocitumalo cekangiso. Oco Yesu eyilila ha tali ohali, omo liakandu etu. Ekangiso liaco olofa. Omanu vavi va ponda Yesu poku u valela komindikiso yuti. Omanu va lua va mola ndomo eye a fila komindikiso yaco, puãi va lua pokati kolondonge vio kuama va molavo kovaso yepinduko liaye kolofa. Kuenje oco eye a popia lavo hati: "Puãi, eci Espilitu li kola liu wili, oco vu kuata unene, kuenje vu linga olondonge viange vo Yelusalãyi, lo vo Yundeya yosi, lo vo Samalya kuenda toke kasulilo okilu lieve." Kovaso yoku va ĩha ocihandeleko eci, Yesu wa londa kilu velende ndomo vu ci lete vociluvialuvia eci. Eteke limue eye o laika oku tiuka kulo kilu lieve ndeci a ci linga poku londa ha sombisa omanu vosi vokilu lieve. Omanu vosi va yeva Ondaka Yiwa ya Yesu, kuenje vo kolela loku u pokola, va kasi locali comuenyo ko pui wa Suku.

Ociluvialuvia Ca 2: Espiritu Li Kola Liya Londalu

Ovilinga 2:1-12

Tuli Yesu a londa kilu haico olondonge viaye via litava oku liongoluila vonjo yimue ha va likutilila. Kuenje Espilitu lia Suku lieya kokuavo ndeci Yesu a likuminyile. Vocipikipiki kua yevala ocileñi ca tunda kilu ca setahãla okuõla kuocipepe. Omanu va mola cimue ca lisetahãla lalimi ondalu. Alimi ondalu a linga alua, kuenje a vata ku vakuetavo omunu lomunu. Ovo veyuka le Espilitu li Kola lia Suku, kuenje va fetika oku sapula valimi akuavo ovopange a komohisa a Suku. Yesu, olonjanja viosi o tẽlisa olohuminyo viaye; eye wa tuma Espilitu liaye komanu vosi va laika oku U pokola kuenda oku U kolela.

Ociluvialuvia Ca 3: Petulu O Kundila Omanu

Ovilinga 2:13-41

Espilitu li Kola lia Suku lieya kolondonge vimbo lio Yelusalãyi vofeka ya va Yundeya.
Koloneke viaco vo Yelusalãyi mua kala va lua va Yundeya, va tunda kolofeka viñi vñi. Ovo va vangula alimi aiñi aiñi. Espilitu li Kola lia kuatisa olondonge via Yesu oku popia alimi aco o osi oco okuti omanu vosi va tẽla oku yeva loku kuata elomboloko liondaka ya Yesu Kilistu valimi avo muele.
Puãi omanu vamue va sima vati olondonge via Yesu via kolua ovinyu. Kuenje umue pokati kovapostolo wa tukuiwa Petulu wa votoka kumue lovapostolo vakuavo ekui la mosi. Eye wa kundila owiñi, kuenje wa popia hati: "Alume ava ka va koluele ndeci wa simi." Petulu wa va kundila Ondaka Yiwa ya Yesu. Omanu va lua va tava kolondaka via Petulu, Ovo va papatisiwa ndondimbukiso yoku yelisua kakandu. Va tambulavo Espilitu li Kola kuenje va fetika oku kuama onjila ya Yesu.

Ociluvialuvia Ca 4: Ekongelo Lia Tete Lia Va Kuakilistu

Ovilinga 2:42-47; 1 Korindo 11

Eteke liaco omanu va lua vo Yelusalãyi va kolela Yesu, kuenje va linga oloñame viaye. Omanu vaco ava va tambula Espilitu li Kola lia Suku, va likongaila ndepata linene, kuenje caco eci ca linga efetikilo liekongelo lia Kilistu. Noke omanu vaco ava va tukuiwa Vakuakilistu. Ovo va liavaila ovikuata viavo kuenda va likuataila ohenda omunu lukuavo, ca lomboloka okuti va likuataisa pokati. Oloneke viosi va enda enda konembele yinene ya Suku ko Yelusalãyi. Oko, ovo va likutalaila kuenda oku sivaya Suku olumue. Olondonge, vina noke via linga apostolo via va longisa Ondaka ya Suku. Vakuakilistu lavovo va liongoluaila kolonjo viavo, oko va ikile oku lila pamosi okulia. Koloneke via sokiyiwa ovo va timbola ombolo loku nyua ovinyu vokulia kumue ku likasilili kua tukuiwa Ondalelo ya Ñala (Omesa ya Ñala). Yesu wa handelekele olondonge viaye oku linga ndoco. Uteke una wa kala ocipepi loku valeliwa, eye wa kuata ondalelo lolondonge viaye, kuenje eci a pandula, wa kuata ombolo, wa yi timbula kuenje wa yeca kolondonge viaye. Ombolo ondimbukiso yokuti etimba lia Yesu li laika oku va tekela komindikiso. Mumosi haimo, Yesu wa kuatavo okopo yovinyu, kuenje wa yeca kolondonge viaye ha va yi nyui. Ovinyu ondimbukiso yosonde yaye ya va pesekela komindikiso. Yesu wa handeleka olondonge viaye oku ci linga ndonjivaluko yaye.
Omo liaco, wosi o kolela kuenda o pokola ku Ñala Yesu o ka lialiavo Omesa ya Ñala, momo ondaka ya Suku yiti: "Olonjanja viosi vu lia ombolo yilo loku nyua okopo yaco, wu sapula okufa kua Ñala toke iya." (I Korindo 11:26)

Ociluvialuvia Ca 5: Ocilema Ongeyi Ci Sakuiwa

Ovilinga 3:1 - 4:4

Eteke limue, Petulu la Yoano va enda konembele ya Suku oku ka likutilila. Ongeyi yimue ya tumala pombundi. Eye wa kala ocilema tunde kucito waye, kuenje ka tẽlele oku enda. Oco wa pinga olombongo ku Petulu la Yoano. Petulu wa popia laye hati: "Opalata lulu si kuete, puãi eci ñuete oco hu iha. Vonduko ya Yesu Kilistu u Nasala, enda!" Petulu wo kuata peka liondio, yu wo kuatisa oku votoka. Kuenje haico olomahi viaye lolongolongolo via kolisua. Wa iñila vonembele ya Suku la Petulu kuenda Yoano. Wa enda loku tẽha tẽha kuenda oku sivaya Suku. Petulu hayeko wa sakula ulume u. Ekolelo ku Yesu Kilistu kuenda unene we Espilitu li Kola lia Suku ovio vio sakula. Eye wa tambula ocali cimue ca velapo okuti olombongo vi sule.

Ociluvialuvia Ce 6: Ulume Lukai Waye Va Fa

Ovilinga 4:32-36, 5:1-11

Ulume umue wa tukuiwa Barnaba wa landisa epia liaye, kuenje wa eca olombongo viaco kekongelo ha vi kuatisa olohukui. Ulume lukãyi waye, olonduko viavo Ananiya la Safila, va simavo oku ci linga. Puãi Ananiya wa soleka olmbongo vimue ha vi lingi viaye kuenda ukãyi waye. Va nena lika onepa yimue yolombongo ku Petulu. Va kemba Petulu loku popia hati olombongo ovio lika evi. Petulu wa kũlihile okuti eye o kasi loku kemba, kuenje wa popia la Ananiya hati: "A Ananiya, nye Satana a yukisila vutima wove uhembi woku kemba Espilitu li Kola loku soleka onepa yondando yepia?...Kua kembele omanu, te Suku."
Vonjanja yaco muele haico a kupuka, kuenje wa fa. Akuenje vamue vo wambata, kuenje vo kenda. Ka pa pitile osimbu, Safila wa iñila. Eye ka kũlihile eci ca pita la Ananiya. Safila layevo wa kemba Petulu kondaka yolombongo. Petulu wa popia laye hati: "Nye wa litaveli pokati oku nyika Espilitu lia Ñala? Olomahi viava va kenda veyove vievi puvelo, kuenje va ku ambatavo." Vonjanja yaco muele haico a kupukila kolomahi via Petulu, kuenje wa fa. Etu tua sesamela oku kuatisa olosuke puãi ka tua seamelele oku kemba Suku pamue omunu umue ukuavo. Suku wa kũliha ovisimilo viwa levi vĩvi vokuetu vosi.

Ociluvialuvia Ce 7: Stefano O Pondiwa

Ovilinga 6:1 - 8:3

Vanja! Ocisoko cimue comanu ca kala loku sasõla lovawe ulume wa tukuiwa Stefano. Eye wa kala usongui wonembele, oku kuatisa olosuke vo Yelusalãyi. Eye wa longisa ciwa ondaka ya Suku kuenda wa linga ovikomo lunene we Espilitu li Kola. Puãi vamue va Yundeya vo patãla. Ovo va kuata Setefano loku u tuala kekanga loku u pindika kuenda oku u kembela hati wa tomba Suku kuenda wa patãla Ondaka yaye. Puãi Setefano ka kaile lohele, momo Suku wo wiha Unene le Espilitu liaye. Setefano wa lomboluila va Yundeya vaco okuti ovo va ponda Yesu u weyilile oku eca omuenyo ko pui. Va Yundeya va tema, yu vo tundisila kosamua yimbo, kuenje va fetika oku wasa ovawe. Osimbu va kala loku u sasõla eye wa likutilila hati: "A Ñala Yesu tambula omuenyo wange." Eci a kala ,loku tula omuenyo wa popia hati: "A Ñala ku ka va tendele ekandu eli." Omanu va sasõla Setefano, va yala uwalo waye polomai viukuenje umue usongui u Yundeya wa tukuiwa Saulu. Eye wa tava olofa via Setefano. Ndaño muele etaili lilo, omanu va yongola oku sivaya loku vumba Yesu, va talisua ohali lomanu vãvi. Puãi Suku kuenda Espilitu li Kola liaye lalimue eteke a va yanduluka ndaño muele va pondiwa lomanu.

Ociluvialuvia Ce 8: Ongende U Etiopia

Ovilinga 8:4-8, 26-40

Eteke liaco Paulu kuenda ovanyali vakuavo Vekongelo lia Kilistu va fetika ocili oku kangisa vakuetavo vo Yelusãlayi. Valua va tila vimbo liaco.
Ulume umue onduko yaye Filipu, wa tilila kimbo lio Samaliya. Kuaco oko, eye wa sapuila omanu va lua Ondaka Yiwa ya Yesu Kilistu, kuenje va lua va tava. Noke, Suku wa sapuila Filipu vungelo oku enda letapalo li pita vekalasoko li tunda ko Yelusalãyi toke ko Gaza. Filipu wa pokola ku Suku. Vociluvualuvia cilo, tu lete omunu umue wa kemala ca lua, ukuafeka ya Etiopia. Eye wa kala loku endela vekalu liaye. Wa kala loku tanga Ondaka ya Suku ya tukula umue o tala ohali yimue ka sesamelele, puãi u Etiopia ka kaile lelomboloko liondaka yaco. Espilitu lia Suku lia popia la Filipu oku enda kekalu liaco. Filipu wa lupukilako, kuenje wa yeva ulume wa kala loku tanga. Eye noke wa fetika oku lomboluila u Etiopia Ondaka ya Ñala Yesu una Suku a tuma. U Etiopia layevo wa yonguile oku kuama Yesu. Eci va kala loku endela kumue, eye wa popia la Filipu hati, "Vanja, ovava ya. Nye si papatisiwila?" Filipu wa papatisa u Etiopia, kuenje eye wa tiukila kimbo liaye lonjolela ya lua. Filipu wa amamako loku kunda Ondaka Yiwa kovaimbo aiñi aiñi.
Ndeci Filipu, etu tua sesamela oku pokola kuenda oku lomboluila vakuetu Yesu oco ovo va tẽle oku U kolela kuenda oku kuata omuenyo ko pui.

Ociluvialuvia Ce 9: Ocinjonde Ca Petulu Ca Tiamela Ku Ananiya

Ovilinga 10:9-18

Eteke limue Petulu wa londa kutulu wonjo oku likutilila. Eci a kalako wa kuata onjala, kuenje wa yonguile cimue coku lia Kowola yaco eye wa mola ocinjonde cimue ci likasi, ca tumiwa la Suku. Eye wa mõla elasola limue linene lia tunda kilu lovinyama viosi. Kua yevala ondaka ya popia la Petulu yiti: "A Petulu, votoka, ipa, lia." Petulu wa kala u Yundeya kuenje ocihandeleko ca va Yundeya citi, ovinyama viaco eye a mola via vĩha, kuenje ka via sesamelele oku vi lia. Omo liaco, Petulu wa kumbululoa hati: "A Ñala hacoko. Ame sia la lia cimue caño pamue cimue ca vĩha." Noke kuo yevalela vali yimue ondaka yiti: "Ca yelisa Suku ku ka ci tukule caño." Eci ca lingiwa lutatu, kuenje haico ocikuata ca yeluiwa kilu. Osimbu Petulu a kala loku tãtala kuenda oku komoha okuti ocinjonjoyi eci nda mola ca lomboloka ndati, konjo kua moleha alume vatatu va kala loku u vanjiliya."

Ociluvialuvia Ce 10: Ondaka Yiwa Yeyilila Olofeka Viosi

Ovilinga 10:1-8, 19-48

Alume vatatu va tunda kimbo limue likuavo, kuenje alume vaco va tumiwa lomunu wa tukuiwa Korneliu.; Korneliu wa kala usongui wovita via va Roma. Korneliu wa yonguile oku sumbila kuenda oku vumba Suku. Ungelo wa Suku wa moleha kokuaye, kuenje wo handeleka oku enda oku ka sanga Petulu. Va Yundeya va tendele va Roma ndomanu vaño ka va yelisilue, puãi Suku wa lekisa Petulu vocinjonde okuti eye ka sesamelele oku tukula omunu hati ka yelisilue. Suku o tambula omanu vakualofeka viosi, vana vo sumbila haivo va linga eci ca sunguluka. Petulu wa enda lalume toke konjo yesualali eli lia va Roma. Eci Korneliu a mola Petulu, wa kekamela kovolu a Petulu, kuenje wo fendela, puãi Petulu wa popia laye hati: "Votoka. Lamevo ndimunu. ... Oco mula siti, Nye wa ñovongela?" Korneliu wa lomboluila Petulu ondaka yungelo. Noke Petulu wa sapuila Korneliu eci ca tiamela ku Yesu u wa situlula Suku komanu. Korneliu lepata liaye va tava ku Yesu, kuenje va tambula Espilitu li Kola lia Suku, kuenje va linga akuenje va Suku.

Suku o sole omanu vosi, vakualimi osi, lapata osi la vakuavala aiñi aiñi. Yesu keyilile oku popela lika va Yundeya. Eye o yongola oku eca omuenyo ko pui komanu vosi. Eye o yongola okuti olofeka viosi viu kolela kuenda viu vumba.

Ociluvialuvia Ce 11: Petulu Vokayike

Ovilinga 12:1-11

Noke, Helonde, Soma ya va Yundeya, eye muele wa fetika oku kangisa oloñame via Yesu, okuti Ekongelo lia Kilistu. Eye wa ipaya upostolo Tiango kuenda wa imba Petulu vokayike. Uteke umue Petulu wa kutiwa lalienge avali kuenda wa pekela pokati kasualali avali. Vocipikipiki ungelo wa pasula Petulu loku popia hati: "Pasuka lombili!"
Vonjanja yaco muele haico alienge a loluka kovoko aye. Wa tunda vokayike, wa kuama ungelo. Ombundi yutale ya va yulukila ño oyo muele, kuenje lomue wa va talamisa. Petulu wa sima hati onjoyi toke eci a pitila kosamua, voluwa, kuenje ungelo wo sia.

Ociluvialuvia Ce 12: Petulu Lakamba Vaye Vakuakulikutilila

Ovilinga 12:12-19

Tuli Petulu a tunda vokayike haico a popoluila konjo ya Maliya, ina ya umue pokati kovapostolo. Uteke waco valua vakuetavo va kalako oku likutilila Petulu. Petulu wa totola kepito, kuenje ufeko umue onduko yaye Roda wa enda oku ka yulula. Eci a yeva ondaka ya Petulu, ka tavele oku yulula epito, puãi wa tiukila lolupesi oku ka sapuilako vakuavo hati :"Petulu o kasi kepito!" Ovo ka va ci kolelele, kuenje va popia laye hati: "Vuyui!" Petulu puãi wa amako loku totola. Eci va yulula epito loku limbuka okuti eye o tãyi, va komoha ca lua. Petulu wa lomboluila ndomo Suku a tambulula alombelo avo poku wupa vokayike.

Vakuetavo va sesamela oku kuata ocituwa coku liongoluilila oku likutilila. Suku o yeva kuenda o tambulula olohutililo via vosi vana vo kolela. Onjanja yimue Yesu wa popia hati: "...nda vavali pokati kene va litava oku likutilila cimue, ci va lingiwila la Tate o kasi kilu. Momo apa pali vavali pamue vatatu va liongoluila vonduko yange haipo ñasi pokati kavo."

Ulandu

Voviluvialuvia vitito vi kuayimo ha ku lomboluila eci ci tiamele komunu umue wa tukuiwa Saulu, ulume wa kalavo polofa via Setefano. Noke Saulu wa sokiya oku enda kimbo limue lia tukuiwa Damasku. Eye wa simile oku ka kuata vakuetavo loku va kapa vokayike. Vungende mua moleha ocikomo cimue.

Ociluvialuvia Ce 13: Ocinyi Kuenda Ondaka Ya Tunda Kilu

Ovilinga 9:1-9

Ocinyi cinene cokilu ca tua, kuenje Saulu wa kupukila posi. Ondaka ya popia laye hati: "A Saulu a Saulu, nye o ñangisila?" Saulu wa tambuluila hati: "A Ñala ove elie?" Ondaka yiti: "Ame Yesu u o kasi loku kangisa." Alume va kala la Saulu, lavovo va yeva ondaka, puãi lacimue va mola. Saulu wa votoka, puãi wa kala omeke. Alume vo kuata peka, kuenje va enda laye toke ko Damasko. Saulu wa kala omeke oloneke vitatu. Eye ka lile ndaño oku nyua. Ocili Saulu wa kala ongangala loloñame via Yesu. Puãi Suku o tẽla oku pongolola omunu eye omunu

Ociluvialuvia Ce 14: Saulu Omeke Kuenda Ananaiya

Ovilinga 9:10-20

Palo tu lete Saulu omeke vonjo yimue vo Damasko. Suku wa tuma kokuaye omunu umue wa tukuiwa Ananiya. Ananiya wa kala ukuetavo kuenda oñame ya Yesu Kilistu. Eye wa kala lukũlihiso wokuti Saulu wa linga ovina vĩvi ku vakuetavo ko Yelusalãyi. Haimo lumue Ananiya wa pokola ku Suku, kuenje wa enda ku Saulu. Ananiya wa popia la Saulu hati: "A manjange, a Saulu, Ñala Yesu una wa ku tukulukila vonjila eci weya, eye wa numa kokuove okuti o letuluka, kuenje o yuka Espilitu li Kola." Ananiya wa kapa ovaka aye ku Saulu, kuenje upeke haico wo tunda. Eye wa tambula espilitu li Kola lia Suku, kuenje wa papatisiwa oku lekisa omanu okuti cilo wa linga oñame ya Yesu. Oco Saulu wa enda ku va Yundeya kuenje wa va kundila Yesu.

Ndeci Ananiya, etu tua sesamela oku pokola ku Suku, kuenje ka tua sesamelele oku kuatela omanu ohele. Oco Suku o laika oku talavaya letu loku lomboluila vakuetu ndomo va popeliwa.

Ociluvialuvia Ce 15: Olohutililo Viekongelo Vi Tuma Alongisi

Ovilinga 11:25-26, 13:1-3

Vimbo lia Andiokeya, ocisoko cavakuetavo ca likongela oku fendela Suku. Ocisoko eci comanu ca kala ekongelo li Andiokeya. Ovo va tukuiwile Vakuakilistu. Paulu wa endeleko la Barnaba oku ka longisa omanu. Eteke limue asongui vekongelo va likongelela oku likandangiya okulia kuenda oku likutilila. Espilitu li Kola lia popia lavo hati: "Nepelipo Balanamba la Saulu ha va lingi upange nda va kovongela." Suku wa yonguile okuti Saulu la Balanamba va enda va ka sanga omanu ka va la yeva Yesu. Vociluvialuvia cilo, o lete ndomo Paulu la Balanamba va kekama kolongolo. Asongui vekongelo va va kapa ovaka avo, kuenje va va likutilila. Noke va tuma Saulu la Balanamba oku ka longisa Ondaka Yiwa kolofeka via kala ocipãla lo ko Andiokeya.

Ondaka ya Suku yi longisa hati: "...Kuendi kuosi kilu lieve. Kundi Ondaka Yiwa koviluvo viosi." (Marko 16:15)

Ociluvialuvia Ce 16: Paulu O Kunda Yesu

Ovilinga 13:4-52

Saulu la Balanamba va enda kovaimbo alua anene la atito a kala ocipãla. Koloneke viaco oco Saulu a tukuiwa onduko yaye yokaliye ya Paulu. Ovo va lisanga lomanu volonjo viokulikutilila via va Yundeya, ndomo o ci lete palo. Ovo va va longisa, kuenje va popia lavo hati: "Suku ya va Isaleli wa nola olonjali vietu loku va linga epata linene. Eye wa va ĩha ovapolofeto vanene, lasongui kuenda alongisi. Ovo va tukola Una weya ha va popela kakandu. Eye Onjovoli Yesu Kilistu. Eci Yesu eya, valua va Yundeya ka vo kolelele. Ka va kaile lelomboloko liaye, kuenje ka va tẽlele oku fendela U wa tumiwa la Suku." Paulu la Balanamba va longisa omanu okuti ndaño Yesu ka la linga cĩvi haimo lumue wa pondiwa. Puãi Suku wo pindula kolofa. Lalimue eteke a ka fa vali.

Omunu wosi o kapa ekolelo liaye ku Yesu Kilistu, o tambuiwa la Suku, kuenje ekalo liaye la Suku li sunguluka. Puãi vosi va tãtala kuenda va yola ocili ca Suku va ka sombisiwa la Suku. Vamue va Yundeya kuenda omanu va lua vakualofeka vikuavo va tava kondaka ey,i kuenje kua moleha akongelo alua, puãi va lua ka va tavele.

Omanu halonjanja viosiko va ka tava kokuetu eci tu va kundila Yesu. Puãi Suku o yongola okuti omunu eye omunu o yeva kuenda o kolela Ondaka Yiwa ya Yesu, kuenje o popeliwa.

Ociluvialuvia Ce 17: Suku O Songuila Vali Saulu

Ovilinga 16:6-10

Eci pa pita alima amue, Paulu wa pasula vali akongelo ava. Eye wa enda lalume vamue, kumue lulume umue onduko yaye Sila. Ovo va yonguile oku enda ko Bitinia, puãi Espilitu lia Yesu ka lia tavele okuti va enda. Kuteke waco Paulu wa kuata ocinjoyinjoyi. Vocinjoyinjoyi eye wa mola omunu wa tunda ko Makendonia yu wa popia laye hati: "Yokila ko Makendonia oco o tu kuatise." Vonjanja yaco muele haico Paulu a kũliha okuti wa kovongiwila oku enda ko Makedonia.

Suku o laika oku songuila vosi vana va yongola oku kuama Yesu. Olonjanja vimue eye o songola lolonjoyi pamue lovinjoyinjoyi, puãi ca piãla enene Suku o tu songuila lolondaka Vielivulu liaye, Embimbiliya kuendavo lupange we Espilitu li Kola vovitima vietu. Vakuetavo va sesamela oku pinga ku Suku oku va songuila kovina viosi va linga. Ovo va sesamela oku U kolela loku va lekisa ndomo vo pokola.

Ociluvialuvia Ce 18: Paulu La Siluano Vocilemawe

Ovilinga 16:16-35

Paulu la Siluano va pokola ku suku, kuenje va enda ko Filipu ko Makendonia. Oko ovo va sanga evelo lioku kundila Yesu omanu. Vonduko ya Yesu ovo va tundisa ocilũlulu cĩvi ca kala vufeko umue. Caco eci ca temisa omanu vamue, kuenje Paulu la Siluano va tipuiwa kuenda va imbiwa vokayike. Vokati kuteke ovo va kala loku likutilila kuenda oku imba ovisungo viesivayo ku Suku vokayike va kala. Ocipikipiki kueya ocilemawe ca lua. Apito a yuluka kuenda alienge olomandekua viosi a kutuluka. Ondavululi ya sima hati olomandekua viosi via tila. Eye wa sakalaele ca lua okuti, oku sulako, wa si oku liponda. Kuenje Paulu wa kaluka yu wa popia laye hati: "Ku ka lilinge cimue. Vosi tua suapo!" Kaleyi kovokayike (Ndavululi) wa enda la Paulu kuenda Siluano kosamua kuenje wa va pula hati: "A vacime cange, ndinga nye si popeliwa?" Ovo vo kumbulula hati: "Kolela Ñala Yesu kuenje o popeliwa, ove lonjo yove yosi." Kaleyi ko vokayike kumue lonjo yaye va kapa ekolelo liavo ku Yesu Kilistu, kuenje va sanjuka ca lua. Kaleyi ko vokayike wa tata Paulu la Siluano, kuenje omele ya kuamamo va kutuluiwa. Kuenje va enda ndomanu va yovoka. Eci oloneke vi tatama etu lopo tua sesamela oku sivaya Suku.

Eci etu tu U kolela loku pokola Kondaka Yaye, tu tẽla oku u vumba oku kuosi tu kasi.

Ociluvialuvia Ce 19: Paulu Kuenda Utala Wa Suku Ka Kũlihiwile

Ovilinga 17:16-34

Vociluvialuvia cilo, Paulu o kasi loku vanja kutala. Ocisonehua ci kasiko ci lombolola 'ku suku ka kũlihiwile'. Utala wa kala kimbo lia Atenai. Kuaco oko kua kala oviteka via lua, momo va Atenai va fendaila olosuku viñi viñi. (Eci omanu va tunga cimue noke va ci fendela, caco eci ci linga ociteka cavo). Ovo ka va kũlihile Suku yocili haeye ukuamuenyo. Va Atenai va yonguile oku kũliha eci Paulu a kala loku longisa, kuenje eye wa popia lavo hati: "Alume va Atenai, kovina viosi ndo limbuki okuti wa piãli oku sumbila olosuku. Momo, eci nda ñuala ñuala, kuenje nda mõla oviñumañuma vi tiama kafendelo ene, oco nda sanga utala u kuete ocisonehua eci: KU SUKU KA KŨLIHIWILE. Oco, u vu kasi loku fendaila ño lapungunjumba, eye ndu sapuili. (Cilo ame njongola oku ku sapuili Suku undeti ene ka wa kũlihili.)" Paulu wa va lomboluila Suku yocili u wa tunga ovina viosi. Eye eye Cime cilu losi. Eye ka kasi volonembele via tungiwa lovaka omanu.
Paulu wa va lomboluila okuti ovo va sesamela oku kũliha Suku vu Yesu Kilistu una Suku a pindula kolofa. Alume vamue va yola Paulu epembe, puãi vakuavo va yongola oku kũliha ca velapo eci ci tiamela ku Yesu, kuenje vo kolela.

Yesu Kilistu eye lika Onjovoli. Ka kuli layimue osuku pamue etavo li tẽla oku popela omanu kakandu avo (Ovilinga 4:12)
Tu setahãli Paulu, kuenje tu koleli Ñala Yesu. Nda etu tu U kolela ka tu kala lohele yoku U sapuila vakuetu oco ovo va tẽlevo oku U vumba. Noke ovo va ka tẽlavo oku liangiliyila oku iya kuaye kilu lieve eci a ka sombisa omanu vosi.

Ociluvialuvia Ca 20: Paulu O Tualiwa Kekanga

Ovilinga 18:1-17

Ndomo o ci lete vociluvialuvia cilo, Paulu o kasi vovitangi. Eye o kasi vo Kolindo. Vimbo liaco mua kala va lua va vĩha. Va Yundeya va kala vo Kolindo lavovo va patãla Paulu, momo eye wa va sapuila hati Yesu eye Kilistu (Mesiya). Eteke limue Ñala wa popia la Paulu hati: "Ku ka kuate usumba, puãi longisa, ku ka liweke. Momo ame ñasi love kumue, kuenje lomue oku yakisa ha ku lingi cĩvi, momo ñuete omanu va lua vimbo lilo." Kuenje Paulu wa kala ko Kolindo oko a longisa omanu, kuenje va lua va tava kondaka yaye. Puãi va Yundeya vo patãla vo kuatela onya. Eteke limue, ovo va liyaka la Paulu, kuenje vo tuala kekanga. Ovo vati Paulu o kasi loku longisa ovina vĩvi. Haimo lumue soma ka va yevele, kuenje wa va tundisa vosi vombala. Kosamua, va Yundeya ava va tema ndeti va tipula asongui va va Yundeya va kolelelevo Yesu. Puãi Paulu wa puluka ka lemehiwile, kuenje wa amamako oku sapula Yesu ndaño latatamiso alua.

Ociluvialuvia Ca 21: Asualali a Popela Paulu Kovanyali Vaye

Oilinga 21:1 - 22:24

Paulu wa tiukila oku ka nyula akongelo okaliye. Eye wa vetiya vakuetavo oku kuamelela loku kuama Yesu. Vamue vakuetavo va livondela Paulu okuti ka endi vali ko Yelusalãyi. Ovo va kala lukũlihiso wokuti valua pokati kovanyali vaye va kala ko Yelusalãyi, kuenje va sokele oku wipa. Puãi Paulu wa popia hati: "Ame nda kapelako, haku kutiwako lika , puãi nda kapelakovo oku fila ko Yelusalãyi vonduko ya Ñala Yesu." Eci a pitila ko Yelusalãyi, va Yundeya va sosuiya omanu ha vo katukila. Va seteka oku wipala vokololo. Asualali vamue va Roma vopa Paulu pokati kowiñi wo temela. Paulu wa enda wa ka talamela kosamua kocitumalo casualali. Eye wa kundila owiñi. Ovo puãi va fetika oku kaluka vati "Wipayi! Ka sesamela ku kala lomuenyo!" Asualali va kapa Paulu vokayike ha vo popela povaka omanu. Paulu ka kale lohele yokufa.
Eye wa kũlihile okuti onima yinene, kilu, yi tãyili vosi vana va tala ohali vonduko ya Yesu.

Ociluvialuvia Ca 22: Paulu O Kundila Omanu Va Kemala

Ovilinga 23:11, 25 - 26

Oko ko Yerusalai, ~Nala wa lilekisa ku Paulu kuenje wa popia hati: "Kolisako. Momo ndeci wa njimbila uvangi ko Yerusalayi haico o njimbilavo uvangi ko Roma." Asongui va Yudea va pindika Paulu kombiali ya Roma kuenje va tuma Paulu ku Agripa soma ya va Yudea, Paulku nlomue a kuatela usumba. Eye wa kunda Yesu kombiali lo ku nasoma, Eye wa va sapuila ndom o Yesu a moleha kokuaye konjila yo ko Damasko kuenda ndomo Yesu o tuma oku ka kunda ondaka yiwa komanu kuosi oku va kasi. Soma Agripa wa kala ocipepi loku tava ku Yesu. Eye wa kulihile okuti Paulu ka lingile cimue civi. Paulu wa pinga kombiali ko Roma. Eye wa yonguile oku sombisiwa ko Roma. Agripa wa tava okuti Paulu enda. Olupale lua Roma oluo lua velelepo kunene koluali luosi koloneke viaco, ombiali yaluo oko ya kala. Suku wa kuatela Paulu ocisimilo cimue ca litepa, ci likasi.

Ociluvialuvia Ca 23: Paulu Vohele

Ovilinga 27:13-44

Asualali va ambata Paulu toke ko Roma kumue lolomandekua vikuavo. Ca va kisika oku enda lokawato oku yoka okalunga. Voloneke ekuĩ la kuãla, owato wa sangiwa lofela yonupi. Omanu va kala vowato va sima hati tu laika oku fa. Ungelo wa Suku wa popia la Paulu hati: "A Paulu, ku ka yokoke.O talama kovaso a Kaisale, kuenda Suku wa ku ĩha vosi va endela kumue love vo Naviyu." Ka pa pitile osimbu, owato weya ocipepi lo kongongo, kuenje wa fetika oku nyolehẽla vovava ka a longele. Omanu va tehela vokalunga. Vamue ca tava oku yua, vakuavo va kakatela vowato. Vosi yavo va pitila ciwa.

Oku upisa opo, vosi yetu tu lilongisa okuti eci Suku a tu ĩha upange umue woku linga, eye o kuetevo ongusu yoku tu tiula kũvi wosi.

Ociluvialuvia Ca 24: Paulu O Linga Omandekua Ko Roma

Ovilinga 28:16-31; Roma 8:38-39

Palo tu lete Paulu ko Roma. Kuaco oko eye wa kala vokayike eci ci soka alima avali. Wa taviwa oku kala vonjo yaye muele a fetela. Vonjo yaco wa kalamo lesualali liu Roma lio lava. Eye wa tambola omanu vosi veyaeya oku u nyula. Eye wa va longisa eci ca tiamela kusoma wa Suku kuenda Yesu Kilistu. Paulu wa sonehelavo ikanda akongelo eye a nyula eci handi ka kapiwile vokayike loku amamako oku va longisa. Ikanda viaco evi vi kasi Vembimbiliya oco omanu vosi va lilongise olonjila via Suku. Paulu wa tala ohali yalua omo lia Yesu Kilistu kuendavo omo Liondaka Yiwa. Olonjanja vialua eye wa tipuiwa kuenda vo sasola lovawe, kuenda wa kala onjala haeye ka kuatele onjo. Oku sulako va Roma vo wipa. Puãi kukanda umue eye a sonehela vakuetavo ko Roma wa popia hati: "Momo nda kolela okuti ndaño okufa, ndaño omuenyo, ndaño ovangelo, ndaño olombiali, ndaño ovina viacilo, ndaño ovina vi laika oku iya, ndaño ovonene, ndaño ovina viokilu, ndaño ovina viokalunga, ndaño ociluvo cikuavo, lacimue ci tẽla oku tu tepa kocisola ca Suku ci kasi vu Kilistu Yesu Ñala yetu."

Suku eca unene ku wosi o kolela kuenda o vumba Yesu Kilistu. Tu eci omuenyo wetu kokuaye kuenda tu sapuli ondaka yaye oco oluali luosi lu kũlihe okuti Yesu eca omuenyo ko pui la Suku.