Look, Listen & Live 7: JESUS - Lord & Saviour

Susunod, awad kamman dingngolyu ate ug-uggud mipanggop kan Jesus Cristo we anak Apodios? Sa annae Jesus, siya angitod kan ditaku’tte biyage ippun patinggana. Da adu we katataage kingwana, sanat amanoknokantaku we katuttuwaan anna. Andongolkayu’tte annae radio ya intollongyu andi ye iglatu nu guminga anna.

Umunae Iglatu - Sa niyanakan Jesus

John 1:1-14; Luke 2; Colossians 1:16

Inggaw pun osaalgaw ate ili’d Israel inninggaw uttinge niyanak yakon nisasabbali pagay atta udume utting te siya kad amod de patogna. Sa inana kad ippun pulus lalaki’k nangadalog kan siya ya sa ngadanna kad, ak Mary. Sa amana kad, ak Apodios! Gapu kan siya, nakwa da amin ate lubong. Siya bos nangitod ate ummunae tagu si naispirituwane biyag we nalpu kan Apodios. yakon nakaan sanae naispirituwane biyag atta amine tagu. Te siya minangnuda unudonda’k satan ya sa katoy nu sa unudonda’k Apodios. kingwan kad Apodios, imbuunna’k Jesus ak umoy nibuknag atte tagu taon ay sigude matattagu kan Apodios sakbaye mibuknag. Kad sa panggob ni nibuknagana’tte lubong, umonoy ipaigammu kan ditaku’k Apodios ya umoyna ipaila inontaku we ambalin ak abeng Apodios kasin.

Makagwa Iglatu - Nambalinon Jesus Danum Ak Bayas

John 2:1-11

Bummabalu kad ak Jesus, inimbitaran da dida’tta buunna ya ak inana atte kasar kad Cana. Sa ugalin da Ijudyu atte katti ye kasar, iggaigggada gaye angitautaug si bayas atta tagu we andatdatong, kainamada gay naamin ewan bayase itaugda. Gapu kad ta igammun Mary we anak Apodios ak Jesus, ummoyna imbaga kan siya kananae, “Naamin de bayas.” Kanan Jesus kan siya bubai adipun masapule ibagam kook te daampun dumatong anungpalak atte planon Apodios. pune sadi, kanan inan Jesus atta sammilu “koonyu da ngaimane ibagana kandikayu.” Pun usto bose inggaw danakkol we ammutu atte adani ye ippun inninggaw, kanan Jesus atta sammilu, “Punuwonyu da sanate ammutu’tte danum.” Naabus kade napnu da sadi ye ammutu’tte danum, binindisyunana wok kanana’tta sammilu, “Gumaudkayu’k sintasa ta inkayu iyoy si andi ye angimaneho atte among ummoyda kad nangiyoy.” Nataag pagay sadi ye angimaneho se among te nambalin ak bayas danum! Intaugda punatta tagu, kananda “Ngipayu gay asi anganunguson sanae ampiyapiyae bayas ya siya inunayu bogsal?” Pune sadi, sadi nangigammuwan da tagu we awad de kaboolan Jesus we nalpu kan Apodios wok namatida kan siya.

Mikaklu we Iglatu - Nakaug-uggud Ak Jesus Kan Nicodemus

John 3:1-36

Inggaw pun ak Nicodemus we osa’tta nalainge mistulu, dingngolna mipanggop atta kingwan Jesus we katataage banag. Kanana si somsomok na, nalpu annae Jesus kan Apodios. Pun sillabiyan kad, ummoy kan Jesus ta umoy makaim-imus atte mipanggop kan Apodios. Kanan Jesus kan siya, “Ibagak kan sika katuttuwaan, naippun paat angila si anturayan Apodios nu adi miyanak kasin atte danum kan Ispiritu Santo.” Nataag ak Nicodemus wok kananae nan-imus, “Ngai gay akay inon ni tagu we miyanak kasin nu nagangpute nalakay?” Te san an-aawatna kad, sa miyanakta kasin atte ina. Pun annaya insongbat Jesus kan siya, “Miyanak kad utting atte inana, sadi kanantaku we nainlubongane biyag. Pun kingwan kad Jesus si adimpun Nicodemus paat maawatan imbagana, kanana, “Mistuluka gay lawa, adikapos ay makaaw-awat.” Unipun kanan os Jesus kan siya, “Ibagak kan sika katuttuwaan, da annae ugudok, da innilak kan inigammok yakon ippun paat ossanggan kan dikayu’k anuttuwa’tta ibagak, adiyupun os sakon tuttuwaon si ibagak kan dikayu mipanggob atte banag si annae lubong.” Magulamos ay nu ugodok da banage mipanggob kan Apodios. Kad naippun os os-ossanggan ak tagu’k umoy ad langit nu adi nibuknag atte tagu we nalpu’d langit.” Pun sana angibag-ak kan sika we ngaimane amati kan anuttuwa kan Jesus, miyanak kasin ya nikamboloy a kan siya, yakon ngaimane adipun amati ken Jesus, umoy si katoy we ippun patinggana.

Mikapate Iglatu - Nanalluku Osae Pangat Atte Sinagung Jesus

John 4:46-54

Ngai kamman koonyu nu ansalom os ay sakit ni osa’tta abengnu? Annaya bos osan ug-uggude dongngontaku. Inggaw pun pagay osan pangat. Ansalom ay sakit ni abengna, nadanagan te kananapun nu matoy. Gapu kad ta dingngorna da pupan Jesus kingwae katataag, nansomsomok wok umoyna sington igaw Jesus. Takon ay nu adaddayuwan binulaatna. Indasana kad ak Jesus, nanalluku si sinagungna wok kanana, “Apo, umalika kappos ta inka agasan abengku ta adi patut matoy.” Kanan Jesus kan siya, “Adika bos ay madanagan, inkane sana wok odasam abengnu we natagu.” Ummoyon kad sadi ye pangat, sissiya gay si dalan wok miyabot da sammiluna. Kananda’tte sadi ye amuda, “Noam os ay si danagnu te awa nakaan sakit ni abengnu.” Inimus pun ni sadi ye pangat nu ngai oras we bummangonana, imbagada. Somsomkona pun, ustuustu we sa nangibag-an Jesus atte kananae inkan te matagu abengnu. Pune sadi, amod pagay layad ni ye pangat, wok losanda’tta pamilyana namati kan Jesus ya patiyonda bos we nalpu kan Apodios.

Umalimae Iglatu - Da Nasakite Tagu we Inggaw Si Adanin Nabaknonge Danum Ad

John 5:1-47

Nagangput kade inagasan Jesus sadi ye abeng ni pangat, ummoy ad Jerusalem ta umoy makapiesta. Nillumnok kad si lewangan ni City, nammataana da adu we nasakit we umoy anguuway atte anggiduwan si danum si sadi ye nababaknonge aammusan at Bethzatha. On te amatida siyae nu ngai umuna umoy an-amos nu anggidu danum, maagasan. Yakon inninggaw osae naparalize atte 38 we tawone pasig umamaamaye umoy an-amos yakon ippun inonae umoy te ippun umoy angoppat kan siya angiyoy si nabaknonge aammosan. Innilan kad Jesus, kanana kan siya, “Piom kammane makaan sakitnu?” yakon kanan ni sadi ye tagu we summongbat, “Piok pay okyan, yakon ippun siya angoppat kan sakon angiyoy si aammosan.” Pun kanan Jesus, “Alam ta oboknu ta ekan.” Pune sadi daguse natanakdog ye nasakit. Da tagu kade nangila kan siya, amod de sangada si inniladae dinokmaana da obokna wok ampiwot umoyon. Summanga bos da udume tagu kan Jesus te inagasana sadi ye tagu atte algawe miparit ankewaalda. Kanan Jesus we summongbat dida, “Ak Amak kad, pasig ankewakewaal, kad kama bos kan sakone ankewaalak takon ay algawe maiparit ankewaal te naatod kan sakon kalobbongan.” Nalakpus kad de pigan algaw, inaspul os Jesus sadi ye naagasan atte Templo wok kanana, “Andongolka, annat pun pagay nakaan sakitnu, agaynu we bumasul tea mo daldalluman makwa kan sika nu ipaopaoynu we bumasul.” Kesan pun sadi ye naagasane tagu, ummoyna’tta Ijudyu imbaga kane ak Jesus nangagas si sakitku. Pune sadi ammod dummallu sangan da papangat da Ijudyu kan Jesus, wok pionda gongaton. Yakon ak Jesus kad, piona paigammu kan dida we siya anak Apodios ya anna kalobbonganae angaan atta sakit atte algaw Apodios. yakon da Ijudyu kad adidapun pulus namati kan Jesus.

Mikanome Iglatu - Pinakanan Jesus Da Limallibu We Tagu

John 6:1-15,25-58

Naabus pun kinaan Jesus sakit ne naparalize, nambangkada dummulmang atte baybay ad Galilee ta umoyda okyan umillong umabos. Kainamana gay tinun-ud os da amoamode tagu dida, te innilada nangikaponandae kesan. Pipionda bos siyae andongol atta ugudna, osapay innilada da katataage kingwanae nangagas atta naskit, siya umoyda kan siyanangunudan. Ummillongda’tte tanap ni beleg ta isaladna okyane antuttudu’tta disipuluna, yakon nammotwa pun, nan-otapana da amode tagu we nangunud kan dida. Pune sadi kanana kan Philip, “Ngai nin ay agal-antaku’k ipakantaku’tta annae ummamdane tagu?” Kanan Philip we summongbat, “Takon nin ay nu awad dakol ak gatad di pilak ak intakuingina’k makan, pumotog atta sanae tagu” Nangwa kad ak Andrew we osa’tta disipulun Jesus, kanana, “Apo, annaya abenge nandaan ak limae tinapay ya sa duwae ugadiw. Yakon ampagatol pay atte bagang da sanae tagu.” Kanan Jesus kan dida, “Patukduwonyu dida taltalbubungon ak bagil limampulu sintalbubung si lullumun, pun impaidatong Jesus sadi ye dinaan ni abeng. Unipun innalana tinapay wok anggappiya kan Apodios kama bos si ugadiw, innalana wok nanggapiya. Nagangput kad, kanana’tta disipuluna, “Anna ekayu iwatwat atta tagu.” Pune sadi, nankakakan kad da sadi ye ummamdane tagu, sintataagda te kamak makane milusnu kan dida. Impadagup kad Jesus sinawalda nankakakan we naamin nassug, kon ay nasawalan ak duwae akkubaw nadagupana. Sa iyap kad da lalaki ye napakanan, limallibu adipun niyiyap da bubai kan da abeng, yakon lamog pos pay Jesus innamin dida pinakanan. Pune sadi kanan Jesus we nantuttudu’tta sadi ye tagu, “Adiyu abus ak gamgamgaman makane mabangngos nu adi siya okyan gamgamanyu makane angitod si biyag ak inggana.” Pune sadi iyyanungusna kanan, “Sakon tinapay ni biyag, ngaimane umali kan sakon, adipun agon maulat.

Mikapitu we Iglatu - Sa Nanaddalanan Jesus Si Labaw Ni Danum

John 6:15-21

Nagangput kade pinakanan Jesus da sadi ye amoamode tagu, pinaoyonna dida. Unipun pinaunana bos da disipuluna nan-osogon si baybay ta umoyda ambangka. Natenan ak Jesus si beleg ta angkararag kan Apodios. Anna kade sumagibotbot si nambangka da disipuluna wok napanos kad naakatanda si baybay, inniggana ummandane bidbid kan danakkole tupiyak. Pun losanda nakimtan wok ayuwanda’k Jesus kane “Awad okyan ak Jesus kan ditaku.” Baag ay nin anna kade makapis talun, intapda tagu we anattaddalan si labaw ni danum we kumatam kan dida. Amod pagay kimutdae nangila te kandapun nu lagayan. Yakon gumminga’k Jesus wok kanana.” Adikayu maimut te sakon anna.” Pune sadi, losansa gay lummayade ankayogoyoge namasakay kan Jesus si Bangka. Nallugan pugay ak Jesus, daguse niduumda’tte lugar we ayanda.

Mikawalu we Iglatu - Sa Nangagasan Jesus Si Nakulap

John 9:1-41

Sin-algawan ka dos, inninggaw tagu we niyanake kulap. Sa kananda bulun Jesus, siya gapun ni nakulapana dinusan Apodios. Yakon kanan Jesus kan dida, “Sa annae tagu, niyanake kulap te awad de ampatoge panggobna. Sa piok ugudon, nu makaan kulapna we mipagapu kan sakon, sana mipail-an ni kaboolake nalpu kan Apodios.” Pun nangalak Jesus atte gabu we tinamayna’tte tuppana wok impeklana’tte atan ni nakulap. Unipun kanana’tte nakulap, “Inka si awa nabaknonge danum ad Siloam ta inka andal-up. Nangaggulin kad sadi ye nakulap we nagangput nandal-up nakaan kulapna, kananda kan siyae nangimus, “Ngai nangaan si kulapnu?” kanan ni kulape summongbat, “Tuan te impeklana kad piyok si atak, ummoyna sakon nandal-upon si nabaknonge danum ad Siloam wok makaan kulapku yakon ippun igammuk nu ngai sadi ye tagu.” Inimus kad da Pharisee nu ngai ye algaw nangagasana kan siya, inbagana kane, “Sa algawe miparite ankewaal da Ijudyu.” Pune sadi, kananda Pharasee, “Dakampun paat ak nalpu kan Apodios sanae tagu we nangagas kan sika te nan-agas si ampatoge algaw kan ditaku we Ijudyu.” Kanan os da udum, “Ngai inonae koon ni kabasbassulane tagu kaknae katataag?” wok sadi gapun ni nankagwaanda. Takon ay nu katti nakwa, adipun pagay da Ijudyu namati kan Jesus, wok sadi nangugudan ni nakulap atte kananae, “Sakon, niyanakake nakulap, yakon losantaku nakulap atte naispirituwane banag te aditakupun ilan da ambalu we Apodios. Pune sadi kanan Jesus, “Sakon silaw atte lubong, ngaimane angunud kan sakon, adipun anaddalan si gikbot yakon awad kan sakon silaw ni biyag.

Mikasiyame Iglatu - Tinagun Jesus Ak Lazarus Atte Katoy

John 11:1-46

Takon ay nu amod da katataage kingwan Jesus we nangaan atta sakit da tagu, adimpun pagay da Pharasee ya da udume Ijudyu patiyon anak Apodios. Inninggaw da bulbulun Jesus we ay-ayatuna, da ngadanda kad, ak Lazarus ya da duwae sunudnae bubai da Mary kan Martha. Ummoy kad ak Jesus nantalin ad Jerusalem te tigangayda batubatuwon atte ilin da Lasaruz, niyaspul ose nasakit ak Lasaruz. Gapu ta ansalom ay sakitna, nadanagan da duwae sunudna wok nangibuunda’k ummoy angayag kan Jesus ad Jerusalem. Dummatong kad da sadi ye nibuun kan Jesus, imbagada sadi ye gattokda. Takon ay nu dingngol Jesus we nasakit ak Lasaruz we bulbulunna, intaltalyannae umoy angila kan siya. Nalakpus kad de pigan algaw, asinaot kanan atta disipuluna, “Intaku mipsuli’d Betfage te natoy ak Lasaruz. Yakon dakole anggappiyaak te nakwa kaknat ta matulungankayu we amati kan sakon.” Nangwa kad da disipuluna kananda kan siya, “Tigangay ka dos dika batubatuwon sidi, inka kamman os mipauli?” Kanan Jesus we summongbat, “Dakampun kamman ak nasawalan ak duwae oras algaw? Nu anddalan tagu’tte ampadda, adipun midungpol te anna silawna an siya, yakon sa anaddalan atte gikbot, aaddi ye midungpol te ippun silaw kan siya.” Asinaot ipagatup kanan, Intaku wot.” Dingngol kad ay Martha we annat ak Jesus ummoyna inabot atte dalan. Niduum kad kan Jesus kanana, “Apo, inninggawka kad okyan atte nasakitan ni sunudku adipun nin natoy. Yakon takon ay sinsadi, makwae itton Apodios kodawom.” Kanan Jesus, “Aaddi ye umuli sunudnu.” Kanan os Martha, “On igammuke umuli nu dumatong anungus ni algaw.” Kanan os Jesus, “Sakon umuliyan kan sakon biyag. Ngaimane amati kan sakon, matagu kasin kad ngaimane amati kan sakon, pulus ay nu agon matoy. Patiyom kamman da sanae imbagak?” “On Apo” Kanan Martha. Nagangput kade inugud Martha da anna, nipauli si boloysa wok umoyna inayagan ak Marya. Dingngol kad ay Marya we annat ak Jesus, ummoy os niyabot wok imbagana bos kan Jesus da imbagan Martha. Gapu kad ta amod de dagun Jesus si innilanae ummibil ak Marya, ansigasigab si pusona wok kanana, “Dinu nangilibonanyu kan siya?” “Inka kamman ilan Apo?” kanan da kan siya. Dummatongda kad si nilibonan Lasaruz, ummibil ak Jesus te amod de patog Lasaruz kan siya. Pune sadi, kanan da tagu “Ilanyu kad, amod pagay layadna kan Lasaruz te nakaibil.” Pune sadi daguse kanan Jesus, “Kaanonyu batu we onob ni libon.” Kanan Martha, “Apo te bummuyuk pay akay.” Yakon kanan Jesus, “Kaanonyu wot.” Nabukatan pugay libon, nantangad ak Jesus wok kanana wey nangkararag, “Anggapiyaak Ama ta dingngolnu sakon te iniiggammuk pagay we pasignu dongngon da ibagak, yakon imbagak anna gapu ta pioke paigammu’tta annae tagu we sakon imbuunu.” Nagangput kade imbagana da sana napapkaaw wok kanana, “Lumoswaka Lasaruz!” Baagen lummoswa’k Lasaruz we sissiyae mapuputtiputan. Unipun kanan Jesus, “Kaanonyu da patapatna ya pinalubusanyu.” Da tagu kade ummoy nalliwliwa kan da Martha kan Marya ya da udume nangila si katataage nakwa, namatida kan Jesus. Yakon da udum kad, impaspassilida bos ummoy atta Pharasee wok ummoyda imbaga kingwan Jesus. Pun sana amod dummalluwan ni apos da Pharasee ya da papangat da padi Kan Jesus.

Mikasimpulu we Iglatu - Natoy Ak Jesus Atte Cross

John 18:1 - 19:42

Nagangput kade pinanoknokan Jesus we siya anak Apodios nipagapu’tta katataage puna kingwa, adipun pagay da papangat da Ijudyu amati kan siya te maaposda. Singsingit da pagay inondae amabasul kan siya ta gongatonda. Kingwan kad Jesus atte anungus ni nankakananda’tta disipuluna, inyun-unana imbagae siya kad aaddi ye matoy. Imbagana bos kan dida kanane, “Awad de osa kan dikayu we angitiktik kan sakon.” Angginawada kade ankakakan, linnok satan ak Judas wok nampapaginnok ummoyon ak lasin. Lummawa kad ay, nanadakpus si igaw da papangat da Ijudyu ta umoyna itiktik ak Jesus. Nagangput kad ay da Jesus nankakakan, ummoyda’tta disipuluna’tte beleg ad Olivo ta umoy ankararag. Dummatongda kad sidi, kanana’tta disipuluna, “Inggaw ayuyan si anna ta iyyak si annate battawa angkararag.” Pune sadi, impuyut Judas da simbunggoye bulunna wok ummoyda si sadi ye beleg te iniiggammunae siya iiggawan Jesus. Pun andotok nanokmaanda an Jesus te sa sinyale imbagan Judas, ‘Nu ngai gay kisak, sanat ak Jesus.’ Dinokmaanda kad, inunada yan inniyoy kan Annas we kangatuwane padi. Asidaot kan Pilato iyoy, yakon ippun indasanak basulna. Gapu’tte sadi, impaoy os Pilato kan Ari Herod, yakon isuna bos we impaipaulin Ari Herod kan Pilato te siay pagay Gobernador we naittan ak kalabbongane angimbistigar. Nasang-an kad ak Pilato si ippun pagay indasanak basul Jesus, impulangna’tta suldadu ta umoyda ilansa’tte Cross. Kingwan Pilato katti te makimut atta tagu’k ibalsungda kan siya sangada ya pionda pagaye magongat ak Jesus. Illawan pugay da suldaduk Jesus si lasinna’d Jerusalem, impabukudda de cross kan siya wok itallayda’tte lugare ngannonda ‘Golgotha’ we sa piona kanan, “Lugare battukag.” Dummatongda pugay si sadi ye lugar, illansada’k Jesus. Pun inninggaw os da duwae criminal we nidogada illansa’tta crossda’tte madawinan kan madawigin Jesus. Pun sana natungpalan ni imbagabagana atta disipulunae kanane, “Masapule matoy ta masalakniban da amine tagu ya ibuunna Ispiritu Santo kan dida ta tulungan dida we umoy anakdol si mipanggob kan siya.” Kad sana bos angipanoknoke siya gattoke datum te siya nangikatoy atta basultaku.

Mikanasawaran kak Ossaane Iglatu - Da Mary Kan Jesus Si Libon

John 19:42 - 20:18

Natoy kad ak Jesus atte sadi ye ag-agaw, ummoy Joseph we Iarimathea impakada kan Pilato nu makwae umoyda opason ladag Jesus ta dida asi umoy angilibon, te sa mabigat kad algawe umillongan. Iyyunud kad ay Pilato, ummoyda impas ladag Jesus wok tuyakana’tte bangbanglu wok pinutiputanda’tte itake sinnon te siya ugalidae Ijudyu. Gapu atte inggaw baru we lobon si adani’tte sadi ye natoyana, siya ummoyda nangilibonan wok niligadda dakodakole batuk onobna. Wikwikis kade sissiyae anggikbot atte umunae algaw ni sindumingguwan, ummoy ak Mary Magdalena atte lobon, innilanapune naligad onob ni lobon, nansiim ad dalom wok ilanapun ladag Jesus, anottoddak aye nampauli wok umoyna imbokkang atta bulunnae inakawda ladag Jesus. Pune sadi sintotoddakda Peter kan John we ummoy si lobon, yakon abus ak indasanda patapat Jesus ad dalom si lobon wok namatida. Pune sadi, kesan da sadi ye disipuluna. Ak Mary kad si sanate timpu, tatakdog si ngabangab ni lobone umibiibil, intamaangna kad ad dalom si lobon, innilana da duwae Anghel we tutukdu’tte nibadongan ni ladag Jesus. Inggaw osa’tte uluwan, inggaw osa’tte uyadan. Umaw-awni kade sadi gumming tagu’tte odugan Mary ananapugay nu sa gardener we anana bubai nagi paa umibiibil, anan Mary we summongbat? Intallayda ak Apo, ippun igammok nu ngai nangiyuyan kan siya. Yakon nantawili kad ak Mary atte odogana innilana’k Jesus we tatatdog yakon adinapun immatunan. Pun asin os Jesus inimus kan siya wok kananad bubai ngai paa umibiibil ngai ay singsingtom kannan Mary kan Jesus te kanana punnu sa gardenero, apo nu sika nangitallay kan siya ibagam appus nu dinu nangiyuyam kan siya ta iya’k kayan. Mary kanan Jesus, pune sadi nansagong ak Mary kan Jesus wok kananae natataag, Raboni, sa pionae Rabonni kanan atte henebreo mistulo. Kanan Jesus kan siya ina’tta bulunnu ta ibagam kananae nataguwak uunte ka’k atoy adipun makwae orguna anak ne matattague Apodios.

Mikanasawaran kak Duwae Iglatu - Nampailak Jesus Atta Bulbulunna

John 20:30 - 21:19

Sakbay ni nipauliyan Jesus ad langit, kingwana yan os osae katataage banag. Sillabiyan kad si ummoyda bulbulunna nangugadiw, ippun paat innalada. Anna pune nawatwat inninggaw tagu we intapda’tte talantag. Pune sadi imbagana nu ngai kapon ni angidawatanda’tte tabukulda ta adu da makna. Pune sadi nangigammuwandae da sadi kade intapda, ak Jesus. Indawatda kad tuwa tabukulda’tte imbaganae angidawatanda. Ummandan pagay tuwa da nakna wok itakdangda’tte talantage kadakodagaye te ummamdan pagay kaadun ni naknae ugadiw. Inninggaw os insaganan Jesus we makane para kan dida. Nagangputda kade nankakakan, nakaug-uggud ak Jesus kan dida ak Peter kade ummawid si ummoyda nanokmaan kan Jesus, siya ummunae giningaan Jesus wok kanana, “Tuttuwa kamman pagaye ay-ayatom sakon?” Kanan Peter we summongbat, “On mistulu, iniiggamume ay-ayatok sika.” Kanan os Jesus an siya, “Nu kaknat, tangkonam da taguk ya tinuttuduwam dida’tte mipanggob kan sakon.” Sa panggob ni ni nangibag-an Jesus si kakna, pionae igammuwon da amine tagu kan dongngonda da katataage kingwakingwana ta amatidae siya pagay anak Apodios. kad siya pagay unudonda’k Jesus ya naittanda bos atte biyage ippun patinggana.

Iglatu Nasawaran kak Tulu - Sa Naduttuduwan Jesus Atta Duwae Bulbulunna

Luke 24:13-35

Sa sadi ye algawe nagangputan da nakwa kan Jesus kad Jerusalem, inninggaw da duwae bulbulunna si kalsae umoyonda’d Immaus. Siya ug-uggudondae anattaddalan mipanggob atta nakwae adi kan Jesus kad Jerusalem. Te sa somsomok kad da adu we Ijudyu, kanandapun nu siay koon Jesus umoyna dida salakniban atte kinakalkalweng da papangat da Iroma. Yakon gingngat pun da Romano’k Jesus atte cross, ippun agon da namnamada, kainamadae anattaddalan atte da sadi ye bulbulunna, natanokwal ak Jesus wok midal-ag kan dida. Sa somsomok da sadi ye duwa, kanandapun nu kaili wok ug-uggudonda kan siya da amine nakwa te adidapun immatunane siya’k Jesus. Kanan Jesus kan dida, “Ngai kad aigay da sanate naknakwae?” Kananda bose summongbat, “Da nakwa kan Jesus ad Nazareth, siya kad osa’tta propheta ad imbelang Apodios ya da amine tagu’k amod de kaboolana atte gunay kan an-uugudna.” Dingngol kad Jesus da imbagada, insaladnae natuttudu kan dida’tte Ugud Apodios. Kanana, “Ak Moises ya da udume propheta, inggilada mipanggob kan Jesus si osaalgaw. Inggilida bos we siya kad anrigat ya matoy, unipun inggilida bose mikaklun algaw kad ni milibonana umuli ya nanturay si anturayan Apodios. Sisinnoogon pagay da sadi ye duwa da ug-uggud Jesus wok ikagasmokdae katuttuwaan da sadi ye inug-uggudnae nigili. Niduumda kad si boloye ayanda, tinawidanda’k Jesus ta umiyan si igawda te annae lumabi. Pune sadi, nakadawos ak Jesus kan dida, anna kade anganda, innalan Jesus tinapay wok bindisyunana wok ambisakona itton kan dida. Pune sadi, sana nangigammuwandae ak Jesus ewan bulundae sadi. Yakon nataagda te ginangput pugay Jesus innatod tinapay kan dida, ippun agon ilanda kan siya. Pun kanandae nan-ug-uggud, “Siya ewan kattiyan ni giknata’tte dalane isunan bumalabala da pusuta’tte angipalawagana’tte ugud Apodios. sinsadi, andongoltaku bos atta intuttudun Jesus atta tagu si inggawana’d luta.

Iglatu Nasawaran kak Upat - Sa Natalake Abeng

Luke 15:11-19

Natuttuda kad ak Jesus atta adu we tagu, inug-uggudna annae pani. “Inninggaw tagu we duwa da abengnae lalake. Kanan ni udidi kan amana, “Gowaom ud ay da ipalaksunnu kan dikana ta alak kuwake billay.” Ginogwan pun ni ama, innitodna kuwan ni udidi. Kingwan kad ay ni sanae udidi, innaminna illaku da naatode kukuwana wok umoyon atte adayu we ili. Pune sadi ummoyna gay lawa ginasgastu pilakna’tta gaggatunge banag we isun da in-inum kan da bubai. Naamiamin kad nabusbus sadi ye pilakna, ippun agon malmun umoy maabulbulun kan siya. Niyaspulyaspul ose umminggi si sadi ye ili ye igawna wok ippun paat ittona’k kanona. Kingwana kad, ummoy nanggakagaye angngit ak lumabbuwana. Pun innalan ni osae tagu’k ampapakanona atta bolokna’tte away. Sin-algawan kad si giniknana pagay ummamdane ulatna, piona okyagay makakan atta bolok. Yakon ippun os ay malmun angitod kan siya, anutumuk pune anosomsomok, inkagasmokna da sammilun ni amana we pasig masmassug atta adu we makan. Kanana’tte somsomokna, “Angulinak ay kan amak ya ibagak kanane,” Ama nakabasulak kan sika, ya adiyapun agon mibelang ak abengnu, alam ay sakon ak psa’tta sammilum.

Iglatu Niasawara kak Lima - Sa Nangulinan Ni Natalake Abeng Atte Boloyda

Luke 15:20-32

Nappog kade nansomsomok sadi ye abeng, nalanibbat wok umoyon si ilida. Sissiya kad si adayu, intap ni amana, nanoddak si immatunanae sa abengna wok umoyna aboton. Kingwan kad ni sadi ye abeng atte ummadani sadi ye amana, nanalluku wok ampakpakaasi we kanana, “Ama nakabasulak kan sika, kama bos kan Apodios.” Yakon nangwa kad de amana, pinatakdogna wok kawolona kisakisan te amod pagay layadna. Pun pinkawana da sammiluna ta angidatongda’tta ambabalu we silup ta isilupda’tte abengna. Ummoyna bos impala katatabaan atta bakada ta amiyastada te natalak abengna wok annae naodasan, natoy yakon matattagu pos pagay. Pune sadi kanan Jesus atta tagu, “Nu katti kingwan ni osae ama’tte nambasule abengna, magulamos ay ak Apodios we amataku adi pasig allaylayad si angulintaku kan siya, pasigna uuwayon ambabauytaku ya nangulintaku kan siya.” Iyyanungusna bos kanan, “Sakon dalane umoy kan Apodios we Ama.

Iglatu Nasawaran kak Onom - Sa Binaknang Ni Tagu We Baknang

Luke 12:13-34

Pune sadi inug-uggud os Jesus sanae ug-uggud, “Inninggaw pun pagay baknange tagu we nan-apit ak amoamod, nambinsaw te potog dakodakole alangna’k angiggaana’tta apitna. Kingwana kad, nampakwa bos kasin ak amod sindumakol wok iponponna sa amine apitna. Unipun tummukdu wok kanana’tte somsomokna, “Kanemakay amod pagay apitu, ippun pagay aliliyok, makwa pagay abus angaanganak, uminuinumak ya nanragragsakak!” Yakon kanan Apodios, “Dong-og, unika ta ak labi wok matoyka, kad ngai angala’tta annae pinomponnu?” Kanan Jesus, “Sana anomsomkanyu we tagu, ta dakampun okyan ak siya’y ipapuutyu mipanggob atta usaronyu kan kanonyu. Nu adi siya okyan papuutonyu mipanggob atta mas-oman Apodios.” Kanana bos, “Susunudku, mat-op ak Apodios nu ibillaytaku da awad kan ditaku atta kakapus. Ak Apodios angitod atta amine kasapulantaku sinsadi ya ittona bos kan ditaku da binaknang ad langit.”

Iglatu Nasawaran kak Pitu - Sa Antapatapaya Ya Sa Baknang

Luke 16:19-31

Pune sadi inug-uggud os Jesus annae pani wok kanana, “Inninggaw pun os baknange Ijudyu, ambabalu kan ampapatog da ansisilupna. Pasig ose ampipiya da milusnu kan sitae makan. Inggaw os kapus we umoy iinggaw si lasin ni boloy si sanae baknang we takon ay okyan antapatapayak kanona nu adi bos akay nalnot long-agna si gagatol ya umoyda asu pupan deldelan gagatolna. Takon os ay inalgaw ya innilan ni baknang sanae tagu atte lasin ni boloyna, adinapun apy maag ittan atte makane sawalona. Sin-algawan kad, natoy sadi ye antapatapaya wok ummoy kalidodwana si ambalu we igaw ad langit. Pun ak Abraham ade dakdakolda Ijudyu, tinatangkonana sanae kapus. Pune sadi, panos kad esane algaw, nipasani bos natoy baknang, yakon ummoy kaliddodwana’tte ummamdanae rigate ippun patinggana te lawweng os ay ugalina. Nantangad kad sadi ye baknang, innilana da Abraham ya sa sadi ye antapatapaya we sillalaylayad. Kananae nampokaw, “Ama Abraham, ibuunnu ud ak ay ak Lasaruz ta umoyak tulungan. Yakon kanan Anraham kan siya, “Ippun paat inonae umali te annat digdig si nambootan taku we ippun paat makaoy. Pun ippun paat makaosog ak malpu sina ya umoy sinat, kama bose ippun pulus makatagada’tta malpu sinat ya ummuli sina.” Pun sa ibagak kan dikayu nu kapuskayu ya nu pionyu bose umoy ad langit nu matoykayu, amatikayu ompay kan Apo Jesus we sana ta masalaknibankayu.”

Iglatu Nasawaran kak Walu - Sa Bulbulun Atte Sawang

Luke 11:5-13

Pun pinagatupan os Jesus kanan, “Inninggaw tagu we ummoy nankugkug atte sawang atte bulbulunna si naganput aye gawan labi. Kanae nankugkug, “Bulbulun, bukatam ud yan sawang ta ittanak si isna te andi mangili ye nandawos ak kuwani. Pun niyaspul os aye naippun nabun-anan ak isnani.” Kanan di bulbulunna, “Ippay agon umoy bumangon si kaknae oras, annae naabuskani nasuyop atta abengku innumbog.” Yakon sa bulbulunna kade inninggaw ak lasin, adinapun imbain wok ikasinna bos ankugkug. “Ikaasim kappos, te mamak-ila gaye naulaulat sadi ye mangili, pun lawweng os ay nu adik pakanan. Kumadaguka kappos bulbulun.” Pune sadi bummangon pos pagay wok ummoyna innitdan kodawona. Nu katti kingwan da annae ambulbulun, magulaman ak Apodios, adina itton da kasapulantaku. Pun kanan Jesus kan dida, “Sa koontaku okyan, patilayune ikararagtaku we siya angitod atta amine kasapulantaku.

Iglatu Nasawaran kak Siyam - Da Duwae Lalaki Si Boloy Apodios

Luke 18:9-14

Inug-uggud os Jesus annae pani atta tagu we angipaskal atta inabayuda ya sinamsam-oy da da bulunda. Kanana, “Inggawda duwae tagu we ummoy si boloy Apodios ta umoyda angkararag. Pharasee osa, sa osa kad ambubugis ya nibelange kabasbassulan. Kingwan kad ni Pharisee, ummoy si adani’k akit ate sangu wo kananae nangitayag si imanae nangkararag, “Apodios anggappiyaak te adikpun isu da udume kamommod, lat-ayan, kan makadagdagas. Anggappiyaak os te adikpun isu annate andadagup ak bugis. Kad patilayun ose ittok kasimpulun tagwak ni labbuwak.” Kakna nankakararagna. Yakon sa andadagup si bugis, summikad atta battawa wok ayyunguyunge nangbkab si balukongna gapu’tte babawina. Kananae nangkararag, “Apodios kadaguwanak kappos te kabasbassulanake tagu.” Pune sadi kanan Jesus, “Ibagak kan dikayu katuttuwaan, ummoyon ambubugis we naun-unan katollongana kan Apodios, yakon adipun Pharasee te ngaimane angitalayag si long-agna, mipadola ya ngamane angidola si long-agna mitalayag.

Sa Mikaduwampulu We Iglatu - Sa Tagu We Nawwalagis Ak Bukol

Luke 8:4-13

Nantuttudu’k Jesus atta adu we tagu, wok kanana, “Inninggaw tagu we ummoy nawwalagis ak bukol, sa udume bukol, naottag atte dalan wok magusgusdan atta tagu we angoy ya tinuktukan os da sissiwit. Sa udume naottagda’tte batbatu wok tumubu, yakon natoy te poos lummamutanae luta, sa sa udum, naottag atte laslasi, tummubu yakon pinsol nil as ye nidisa tummubu. Da udum kad, naottagda’tte alluta, tummubuda, dummakolda wok namungada’k adu. Pune sadi, kanan Jesus atta tagu, “Andongolkayu we naingaan ya maawatanyu okyan.”

Iglatu Duwampulu ya Osa - Dumakol Da Bukol

Luke 8:9-18

Ummabus kad da Jesus atta disipuluna, inimus da kan siya nu ngai pion sadi ye pani ugudon. Kanan Jesus kan dida, “Sa sadi ye bukol, sadi ugud Apodios. Da naottag si dalan, dida da tagu we nandongol, yakon nasulisugda kan Satanas wok naliwatanda dingngolda. Da bukole naottag atte batbatu, mipanida si tagu we nandongol si ugud Apodios, kad allaylayaddae nangawat, yakon sin-akkitane abus anuttuwaanda ya dumatong kad da problema atte biyagda, naliwatanda dingngolda. Da naottag atte laslasi, mipanida’tte tagu we andongol si ugud Apodios, yakon gapu ta madanaganda’tta binaknanda ya siya tinungaguda da nainlubongane ragragsak, maliwatanda bos da dingngolda. Kad da bukole naottag si alluta, sanat da tagu we nangipapusu si ugud Apodios we dingngolda. Pun nambungada’k adu te ginogomgomanda da dingngolda. Pun sadi kanan Jesus, “Bulbulun, ngai inonyub bos we andongol kan angawat atte Ugud Apodios? Umadiyu kamman tuttuwaon ya natalakayu? Bakon nu amatikayu ya imbiyagyu ta mas-om ak Apodios?”

Iglatu Duwampulu ya Duwa - Sa Tulung Atte Nadangrane Tagu

Luke 10:25-37

Kanan os Jesus, “Ngai kamman angigammuwantaku we aaddi ye masalaknibantaku ya ummoytakuI biyag ak inggana? Sa ituttudun ni Ugud Apodios we nigili kanana, “Maspule ayatom ak Apodios no ay ayatom os da asintatagum. Yakon ngai kamman da tagu we ayatontaku okyan?” Unipun, inug-uggud Jesus mipanggob atte tagu we nambaat atte atekketekke ye kalsa. Anattaddalan kad baagen natanokwal da tulu we tulisane nangisanob kan siya. Inkettangda binugbug inggana’k nibadong. Innaminda bos innala da inggaw kan siya wok tinenandae aginkakatoyon. Lummaus kad sa duwae angapodiose tagu innilada sadi ye tagu we nadangran, yakon adidapun tinulungan. Unipun lummaus Samaritano we nangabayu. Innilana kad sanae binugbugda, amod pagay daguna kan siya. Tinulungana wok binadalna da sugatna asinaot insakay atte kabayuna. Iyoyna si osae boloy atte ili wok bilinona kananae, “Agasanyu ya ayyuwananyu ta asik bayadan gastuna nu angulinak. Pune sadi kanan Jesus, “Nu ay-ayatonyu’k Apodios, masapul we ayatonyu da asintataguyu dallu gay nu ankasapulda’k tulung.

Iglatu Duwampulu Ya Tulu - Sa Nampauliyan Ni Sinkuwa’tte Boloy

Luke 12:35-48

Pun pinagatupan Jesus we nangibaga, “Ikagasmokyu kamman we matagu kasin ak Jesus nu matoy? Adu we tagu da nangila si nanagad-ana’d langit. Pun kananae mipauli kasin. Kanana bose isutaku da sammilu we anguuwway sa mipauliyan ni amuda. Pun masapule madadakkagkayu atte ngaimane mapasamak we isun da sammilu we anguuwway si amuda we ummoy naakasar. Kad nu dumatong ya nankugkug, daguse umoyda bukatan lewangan. Atopay akay layad da kaknate sammilu we pasig nakasagana, we takon ay nu gawallabi dumakngan ni amuda bakon nu allabos. Isun ni akkawan, nu igammun okyan ni aman ni pamilya dumakngan bakon nu lumnukan ni akkawan si boloyda, adinapun pulus itluke makalnok. Kakna bos okyan kan dikayu, masapule nakasaganakayu kanayun te dumatong atte tagu si oras we aditakupun igammu. Pune sadi, kanan Peter kan Jesus, “Apo dikani kamman angibag-am baonnu asisagungam si annae pani bakon nu para’tta losan?” Kanan Jesus, “Ngai umpay mataleke sammilu, siya asin ni amuda angipabiyangan atte boloyna ya siya asi angitod si kanon da bulunnae sammilu nu dumatong inkakakan. Pun nagasat sanate sammilu nu odasan ni amudae kaknat koona.” On, ibagak kan dikayu, “Impagatup Jesus, “Isaad Apodios sanae sammilu’k angayyuwan atta kukuwana. Yakon nu kanan ni sanate sammilu, “Makanu ka gay ak dumakngan ni amuk.” Ya insaladnae anansansantuk atta doganae sammilu, lalaki man bakon nu bubai ya angan, uminun ya ambarbartek kokona. Sinkakanaana gay nadanatong amuna’tte oras we adinapun igammu.” Pun dusaon ni amuna sanate sammilu ya impala-amna da para’tta kaknate adipun mapagtalkan.”

Iglatu Duwampulu Ya Upat - Sa Tagu We Kummalab Atte Kayu

Luke 19:1-10

Ak Jesus kad lamogna salakniban da ngaiman. Andongolkayu si anna. “Inggaw pun ak Zaccheus we baknange ambubugis yakon an-akawana da asintataguna. Sin-algawan kad, dingngolnae awad da Jesus ya da bulunnae angoy si ilida. Gapu ta piona ilan ak Jesus, ummoy si kalsa yakon ippun ilana nu lumaus da Jesus te ansokba ya ippun os inonae sumulkisuk te ummamdane tagu. Kingwana kad ay, kummalab si kayu’tte adanin ni kalsa ta piga gay nu liana bukol ni Jesus. Nibatug pun da Jesus si kummalabanae kayu, nansadang yan ak Jesus wok nantangad kan Zaccheus we kakallab wok kanana, “Zaccheus, angganasome lumogsad si sanate kummalabam te masapule ak kuwayu iyyak andawosan.” Natataag pagay da tagu te sa somsomokda ngai pak Jesus umoy andawos si boloy ni kabasbassulan? Yakon ak Zaccheus, amod pagay layadnae nammangili kandida. Imbagana kan Jesus we ittona gogwan ni kinabaknangna’tta kapus ya nan-awidana da lawwenge kokokkona ya pinabaluna bos antataguna. “Pun kanan Jesus, “Sinsadi, masapul we masalakniban da annae pamilya. Te ak Jesus kad, siya panggobnae ummali umoyna sington kan salakniban da kabasbassulan.