Talenu, Ivwililenu Na Kuyoya 5 Mukanda Kweseka Cha Kalunga

Talenu, Ivwililenu Na Kuyoya 5 Mukanda Kweseka Cha Kalunga

रुपरेषा: Elisha, Daniel, Jonah, Nehemiah, Esther. 24 sections. It has a picture book to go along with the recording.

स्क्रिप्ट क्रमांक: 422

इंग्रजी: Luvale

थीम: Sin and Satan (Deliverance, Sin, disobedience); Christ (Life of Christ, Authority); Character of God (Word of God (the Bible)); Living as a Christian (Worship, Obedience, No other gods, idols, Victory, Faith, trust, believe in Jesus); Bible timeline (Gospel, Good News, People of God); Problems (Problems, troubles, worries)

प्रेक्षक: General

शैली: Monolog

शैली: Bible Stories & Teac

उद्देश: Teaching

बायबल अवतरण: Extensive

स्थिती: Translation

स्क्रिप्ट मजकूर

Kulumbununa

Kulumbununa

Tunamimeneka mwane. Mijimbu yili muulombo wamafwo amatamba mumukanda ou yinapu yakufuma mumukanda wa Kalunga. Yili nakutulweza malunga vavalemu vaze vatambwile kukafwa cha Kalunga halwola lwamaukalu. Alumuna jino muvwimbimbi unashishimo omu nawivwa yove echi chivumo. (Kwimba)

Muvwimbimbi watete (1) Namane mwaya kuzuvo ya Elisha

Muvwimbimbi watete (1) Namane mwaya kuzuvo ya Elisha

2 Vamyangana 5:1 - 12

Elisha apwile lunga umwe mukakunangula wamunene kapolofweto ka Kalunga muli vaIsalele. Atachikijile ngwenyi Kalunga nahase kuzata vyosena. Likumbi limwe Namane ejile kuzuvo ya Elisha. Namane apwile mukulwane wamaswalale java Sulya, vakiko vapwilenga vakakole java Isalele, mwomwo vakiko kava lifukwilenga kuli Kalunga umwe ou wamuchanoko, shina kumakombelo kaha. Namane lunga wangolo wa puho nawa nakuli mwangana wenyi, oloze mumujimba wenyi mwapwile musongo wambumba. Ikiye ayile ku Isalele mwomwo vamulwezele ngwavo Elisha nahase kukukahindula musongo wove. Chipwe tuhu ngocho Elisha kalovokele na kumutambwokesako, oloze atuminekaha vangamba jenyi vaka-mulweze Namane, “Akajimine mapapa katanu nakavali mukalwiji yotau kaha chikova chenyi nachitoma.” Jino Namane apihililile nakulyamba ngwenyi, “Ami ngwashinganye-kanga ngwami pamo mweza kuli ami nakusanyika lijina lyaKalunga kenyi. Mwahungisa livoko lyenyi hachikova chami nakunguka ou musongo.” Shikaho Namane afumineko nakulundundu. (Kwimba)

Muvwimbimbi wamuchivali (2) Namane mukalwiji

Muvwimbimbi wamuchivali (2) Namane mukalwiji

2 Vamyangana 5:13 - 19

Vangamba ja Namane vamulembelele alinge muze vamulwezele. Vamwambile ngwavo, “Ove tata, kachi nge ou kapolofweto akulwezanga chuma chachikalu, kaha kechi unachilingi. Mwomwo ikaze ove unazeneka kulinga omu nakulweze ngwenyi? Yako kasane nautoma.” Namane ayile nakusana mukalwiji yotau mapapa katanu nakavali. Tutalenu ou muvwimbimbi! Namane alinakuwahilila. Chikova chenyi chize chapwile namusongo vanachitomesa lyehi kuhichila mulufwelelo lwakulingamo. Ikiye ahilukile kuli Elisha ahanjikile ngwenyi, “Ngunatachikiza ngwami Kalunga kava Isalele kaha ikiye Kalunga wakaye kosena.” Ngocho Namane alishingile ngwenyi kangweshi kukalifukula cheka kumakombeloko chipwe kuwazachila, shina kaha kuli Kalunga ou apwa umwe kaha wamuchano. Kalunga nahase kulingisa ukalu wetu mangana atuswenyese kwakamwihi na ikiye, nakuzachisa nawa vakwetu. (Kwimba)

Muvwimbimbi wamuchitatu (3) Elisha namaswalale ja Kalunga

Muvwimbimbi wamuchitatu (3) Elisha namaswalale ja Kalunga

2 Vamyangana 6:8 - 17

Hamakumbi amavulu va Sulya valwilenga jita nava Isalele. Kalunga alwezele kapofweto kenyi Elisha, hatando yosena vapwilenga vana vaIsalele nakuvalukuka kuli va Sulya. Elisha ahuhu mwinenga mwangana wava Isalele kuchina navamufungulula kuli va Sulya. Jino mwangana wa Sulya atumine mwaswalale jenyi, “Vayenga vaka-sondwese Elisha navangamba jenyi oku vali, mangana vaka-mukwate.” Kaha vangamba jenyi hakulovoka chimene vamwene lizavu lyamikana yava Sulya vali nakwiza nakumukwata. Oloze ngamba yenyi umwe hakuvamona alilile, “Ove mwata, natulinga ngachilihi?” Elisha amukumbulwile ngwenyi, “Kanda namwivwa womako. Mwomwo kuli etu kuli vavavulu kuhambakana ava vali kuli vakiko.” Kaha Elisha alombele kuli Kalunga asokolole uze ngamba yenyi meso amone. Kaha Kalunga asokolwele meso auze ngamba. Kaha uze ngamba amwene matemba akakahya kana vajingilika. Lyapwile lizavu lyamaswalale jaKalunga atumine avakinge vakiko. (Kwimba)

Muvwimbimbi wamuchiwana (4) Elisha na maswalale vatupuputa

Muvwimbimbi wamuchiwana (4) Elisha na maswalale vatupuputa

2 Vamyangana 6:17 - 23

Omu va Sulya vapwile nakupandama kwakamwihi vamukwate Elisha, ikiye alombele kuli Kalunga, ngwenyi, “Vavete ava maswalale naupuputa!” Haze vene maswalale java Sulya meso avo elavile vapwile tupuputa. Elisha ahetele kuli vakiko nakwamba ngwenyi, “Ngukavangizenu ami nangumitwala kuli ou lunga muli nakutonda.” Elisha atwaminyine vaze maswalale vatupuputa kuya navo ku Samaliya, yikiko nganda yayinene yaSamaliya yava Isalele. Omu vahetele munganda Elisha alombele cheka kuli Kalunga mangana avatonese meso avo, “Ove mwata, achivatonese ava.” Kaha vaSulya valimwene jino vali munganda yavaka-kole javo! Mwangana wava Isalele avamwene kaha amulombele Elisha ngwenyi, “Ove tata, nguvajihe ava?” Elisha ngwenyi, “Chiku! Keshi ove unavakwate mukulwa choveko avamaswalale. Kaweshi kunalusesa lyakuvajihako. Oloze vahane kulya na vyakunwa vasuule vayenga kwavo.” Mwangana alingile muze vamulwezele kuli Elisha kapolofweto ka Kalunga ou ahambakana kutohwa ngolo javaka-kole jetu vosena. Etu katweshi kulinga sambanjingako nge tunafwelela muli ikiye. Kalunga mumukanda wenyi natukande kulinga sambanjinga vaka-kole jetu, ngwenyi, “Kutenda chinapu chami; ami yami nangukavahilwishilacho.” Kalunga nambe ngwenyi, “Kachi nge muka-kole ali nazala, mulise; ngemwevwa lipwila munwise.” (Kwimba)

Muvwimbimbi wamuchitanu (5) Samaliya mu ukalu

Muvwimbimbi wamuchitanu (5) Samaliya mu ukalu

2 Vamyangana 6:24 - 7:2

Maswalale java Sulya vajile cheka valwe jita nava Isalele. Vahakile nganda yaSamaliya muchingombela hashimbu yayisuku. VaIsalele muze munganda kavapwile navyakulyako. Tutalenu hali ou muvwimbimbi. Mwangana wavaIsalele ali nakutambuka helu lya zuvo yanganda. Mapwevo vavali vejile kuli ikiye. Nakulomba avakafweko mwangana, mwomwo vapwile nazala vapwilenga nakulya navana vavo. Mwangana ahonene mwakulingila, kaha apihililile mwomwo Kalunga kava puluwile kuli vaSulyako. Ajinyine kujiha Elisha, ngamba ya Kalunga. Ngocho Elisha amutuminyine mazu mwangana ngwenyi, “Ivwa awa akiko mazu a Kalunga ngwenyi, ‘Lwola nge luno, unga navyesekelo vyambale, navakavilanjisa hamene kuchikolo cha Samaliya.’” (Kwimba)

Muvwimbimbi wamuchitanu naumwe (6) Vaka-mbumba vawana

Muvwimbimbi wamuchitanu naumwe (6) Vaka-mbumba vawana

2 Vamyangana 7:3 - 20

Halwola luze malunga vatwamine kuchikolo changanda ya Samaliya. Vosena vakambumba vapwile na musongo. Valyambile umwe namukwavo, “Mwomwo ikaze tulinaku twaminanga lika hano tufwenga? Tukatukenu tuyenu kuli mwaswalale vaku Sulya.” Jino va Sulya vevwile lizavu lyamaswalale lilina kwiza muchilombo muli vakiko. Kaha vevwile woma vachinyine nakuseza vyosena. Omu vaze vakambumba omu vahetele muchilombo chava Sulya, kavawanyinemo mutu numba umweko! Vaze vaka mbumba vambachile kulya chosena chize vawanyine muchilombo hamwe navyeshovyo vazangile kumbata. Valyambile ngwavo, “Echi kacholokeleko. Lelo likumbi lyamujimbu wamwaza katweshi kulipangilachoko naumwe.” Kaha vahilukilile cheka ku Samaliya nakulwezako mwangana. Vatu vaputukile nakulanjisa kulya chize vawanyine muchilombo chava Sulya kuchikolo chaSamaliya, nge omu mwayile kuhanjika chaka kalunga muli kapolofweto Elisha. Nganomu alwilile Kalunga vaIsalele, mukiko mwalwilile ngamba yenyi Elisha nawa. (Kwimba)

Muvwimbimbi wamuchitanu nayivali (7) Yona mwamuchina Kalunga

Muvwimbimbi wamuchitanu nayivali (7) Yona mwamuchina Kalunga

Yona 1:1 - 7

Omu alingile Elisha hanafu lyehi, kapwile cheka kapolofweto mukwavo muli vaIsalele walijina lya Yona. Kalunga amulwezele Yona ngwenyi, “Yako kulimbo lyalinene lyanyineve ukambulule mazu halikiko mwomwo vilinga vyalyo vyaupapoki ngunavihungu.” Vaka-Nyineve valifukwilenga ku makombelo nakuzachila tulunga va kulyonga. Kechi ngocho kahako oloze vapwilenga vaka-kole ja vaIsalele. Yona akanyine kuyako achinyine kwenyi. Ashik umukile kukalwiji kuze awanyine wato waunene wapwile nakuya kulifuchi lize lya talashise. Afwetele ndando yakuya nawo. Kwasolokele nyamanganda ha Kalunga lwiji. Vatu vapwile muwato vevwile woma. Valyambile ngwavo, “Tutahisenu vitaho tutachikize mwenya ou akalu kana unatusolokela ngana.” Ngocho vatahile kaha chitaho chenyikile Yona. (Kwimba)

Muvwimbimbi wamuchitanu nayitatu (8) Yona na ishi wamunene

Muvwimbimbi wamuchitanu nayitatu (8) Yona na ishi wamunene

Yona 1:8 - 2:10

Vaka-kuvwuwa uze wato waunene vamwambile Yona, “Ngwavo ika unalingi?” Avalwezele ngwenyi, “Ngulinakuchina kumeso a Kalunga.” Kaha vamuhulishile ngwavo, “Jino tukulinge muka, mangana ou Kalunga lwiji aunde?” Ikiye avakumbulwile ngwenyi, “Ngumbilenu mukalunga lwiji, mwomwo ngunatachikiza ngwami yami ngunanehesa ou ukalu kana numba Kalunga lwiji anganjange namakimba amanene ngana hali etu.” Oloze vaze malunga kavamuzangile vamujihe Yonako. Omu uze nyamanganda atwalilileho na kunga njanga lika. Vamumbachile Yona nakumumbila mumeya. Chipwe tuhu vamumbilile mumeya Yona kafwileko. Tutalenu hamuvwimbimbi ou! Ishi wamunene ali nakumumina Yona. Yona atwamine mujimo lya ishi makumbi atatu wamutonyi. Alililenga kuli Kalunga amukafwe, kulila chenyi Kalunga achikumbulwile uze ishi amuminyine amusajilile Yona kutunda. (Kwimba)

Muvwimbimbi wamuchitanu nayiwana (9) Yona ku Nyineve

Muvwimbimbi wamuchitanu nayiwana (9) Yona ku Nyineve

Yona 3:1 - 10

Kalunga ahanjikile cheka kuli Yona ngwenyi, “Yako kuNyineve ukavambulile mazu nangukulweza.” Yona ononokele Kalunga akatukile na kuya kuNyineve. Ava huhumwine vatu ngwenyi, “Mumakumbi makumi awana Nyineve navalinongesa.” Omu vevwile mazu vatu na Mwangana wamunyineve valilile kumeso a Kalunga avalwile. Ngocho omu valumukile naku zeza vilinga vyavo vyaunyengwe Kalunga jino akanyine kuvanongesa. Kalunga wamwaza, wakeke, walikoji, wakushipwokena mukuzangamisa. Tuvosena tunapu nge Yona tunapu nawa nge vatu vaku Nyineve. Tunamulumbilisa Kalunga. Nakulinga vilinga vya kuhenga. Oloze Kalunga atuzanga. Amutumine Yesu atufwilile etu nakutulwila. Apwile muchimbumbe makumbi atatu, nganomu nawa apwile Yona mujimo lyaishi makumbi atatu. Yesu asangukile kuvafu. Jino ali nakutununga usoko wetu naKalunga, nakuhana mwono wa kuyoya chahaya myaka yosena kuli vosena vaze nava mwitavila ikiye, navatambula nawa ulwilo walikoji lyenyi. (Kwimba)

Muvwimbimbi wamulikumi (10) Eseta na mwangana

Muvwimbimbi wamulikumi (10) Eseta na mwangana

Eseta 1:1 - 2:18

Eseta apwile mwana pwevo wakaYuleya wakufuma mulifuchi lyava Isalele. Visemi jenyi vafwile, natwenyi Mototekai amumbachile kaha amulelelenga. Mototekai na Eseta vosena vavakwachile afunge hamwe nava Isalele, vavatwalile mulifuchi lya Peleja. Mwangana wa Peleja apwile wangolo. Vosena vamwivwilenga woma. Jino omu lisano amwivwishile kupihya, ashinganyekele amushishise. Ngocho asanyikile vana vamapwevo vamwaza vapwile mu nganda yenyi mangana vezenga ku nganda yenyi. Hali vaze vejile vosena, mwangana asakwileho Eseta kupwa lisano lyenyi wamuhya. Oloze Eseta kalwezeleko naumweko ikiye kaYuleya. (Kwimba)

Muvwimbimbi wamulikumi naumwe (11) Mototekai mwakana kufukama

Muvwimbimbi wamulikumi naumwe (11) Mototekai mwakana kufukama

Eseta 3:1 - 4:17

Hamane apwile mutu wamulemu mulifuchi lyaPeleja. Vatu vamulemeselenga na kumufukamina ikiye. Mototekai amwalishilenga Kalunga umwe kaha wamuchano Yehova. Mototekai akanyine kufukamina Hamane. Ngocho Hamane akwachile matoto. Hamane ashinganyekele mwakuzangamishila Mototekai. Likumbi limwe Hamane alwezele mwangana, ngwenyi, “Kuli lizavu limwe lyavatu vanalimwangila muli vatu vakwavo mumembo osena ali muno munganda yove. Vilinga vyavo vinalihandununa nevi vyavatu vakwavo, keshi vaka kwononoka kujishimbi jayove mwangana. Kacha wahileko ove mwangana kuli ava vatu kutwama lika hamwe muno muwangana wove. Lushimbi lupwengako lwakuvazangamisa.” Hamane ambachile mali nakumuhana mwangana, ikiye akawatambwileko oloze etavile kukulomba chenyi. Kaha lushimbi valutungile mwayile lifuchi lyaPeleja lyosena. Vakajihe vaYuleya vosena nakumbata luheto lwavo losena nge likumbi kana linaheta. Hamane asongele mutondo wausuku vaka sukikeko Mototekai. Oloze Mototekai ayile kuli Eseta akalweze mwangana akamulembelele hali vatu jenyi. Kaha Eseta amukumbulwile ngwenyi, “Naumwe pimbi nahase kuya kuli mwangana kuvanga vanamusanyika nge pimbi navamujiha.” Oloze alwezele vaYuleya vosena kuli twamina kulya na kulombela Eseta. Omu vakumishile jino ambile ngwenyi, “Nanguya kuli mwangana. Nge kufwa kaha ngukafwe.” (Kwimba)

Muvwimbimbi wamulikumi nayivali (12) Chilika chaEseta

Muvwimbimbi wamulikumi nayivali (12) Chilika chaEseta

Eseta 5:1 - 7:10

Kalunga akumbulwile vilombelo vya vaYuleya. Ngocho mwangana amutambwile Eseta. Amusanyikile mwangana kuchilika chize valongesele na Hamane nawa amusanyikile ezenga na mwangana. Hakuheta kuze ku chilika mwangana ahulishile, “Ove lisano Eseta, unazange ika?” Eseta amukumbulwile ngwenyi, “Ngunajinyi ove ungupululule ami navatu jami. Ami navatu jami vanatulanjisa lyehi yakutujiha.” Mwangana amuhulishile ngwenyi, “Iyaze nasake kulinga ngocho?” Eseta amulwezele ngwenyi, “You vene muka-kole wetu ou lunga wamupi Hamane!” Ngocho mwangana azalile na matoto hakwivwa mazu kana. Hamane vamusukikile haze vene hachitondo chize asakile kusukikaho Mototekai, kaha vaYuleya vosena jino vapululukile. Eseta alihanyine kufwila vatu jenyi avapululule. Nganomu Kalunga ahanyine kusokoka hali vatu jenyi vaYuleya ngocho nawa eji kutusokolanga nayetu muli ngamba yenyi wajila ou atumine, ikiye Yesu.

Muvwimbimbi wamulikumi nayitatu (13) Ndanyele na masepa jenyi

Muvwimbimbi wamulikumi nayitatu (13) Ndanyele na masepa jenyi

Ndanyele 1:1 - 20

Ou muvwimbimbi ulinakutumwenesa Ndanyele na masepa jenyi vatatu. Vapwile vaYuleya. Vavakwachile nakuvatwala kulifuchi lya Mbavilone kuli vaka-kole javo. Mwangana wamu Mbavilone azangilenga vamu zachilenga nakulinagula malimi na vilika vya muMbavilone. Ndanyele namasepa jenyi vakanyine kulipihisa kukulya chize vatumbikilenga kumesa yamwangana. Kavazangile kulinga nge omu va zangilenga vaMbambilone. Kavazangile kulya chosena valilenga vaMbambiloneko. Valombelenga valyenganga kaha mafwo aze vatumbikilenga, valyenga na meya nawa akunwa. Oloze lunga uze avalaminenga evwilenga woma ngwenyi navahokama. Oloze Kalunga avalaminenga vapwile vakulikangula kumijimba na kupwa vaka mangana kuhambakana vakweze va malunga vosena vatwaminenga muze mulifuchi. (Kwimba)

Muvwimbimbi wamulikumi nayiwana (14) Ndanyele na mwangana wa Mbambilone

Muvwimbimbi wamulikumi nayiwana (14) Ndanyele na mwangana wa Mbambilone

Ndanyele 2:1 - 49

Likumbi limwe mwangana waMbambilone alotele. Asanyikile vaka mangana vosena vezenga kuli ikiye kaha avalwezele chilota, avalwezele mangana vamulumbunwinecho. Oloze naumwe pimbi ahashile kuchilumbununa chize chilota chenyi, ngocho jino ahanyine luvila mangana vajihe vaka mangana vosena. Ndanyele na masepa jenyi nawa vavalwezele vavajihe. Oloze vamulwezele mwangana ahakemo lwola mangana vawane omu mwayile kulota kana. Ngocho vamulombele Kalunga mangana alumbunune chilota chize chamwangana muli Ndanyele. Kaha Ndanyele ayile kuli mwangana amulwezele ngwenyi, “Ove mwangana kakweshi lunga wamangana chipwe wakutaha mwalinga nganomu unambeko. Oloze kuli Kalunga kaha, ou atwama mwilu nahase kulumbununa evi vyosena. Kalunga ou wamunene nakulweze ove mwangana evi navikasoloka kulutwe.” Mukulota chenyi mwangana amwene mawangana osena a mukaye. Amwene wangana umwe waunene wenyekele mawangana osena. Auze wapwile wa Kalunga, wahaya myaka na myaka wakwilila. Ndanyele ajimbwile vyosena evi kuli mwangana. Hahaze vene mwangana alifukwile hamavu kumeso a Ndanyele, amulemesele ahanyine nawa lushimbi ngwenyi mawana vawahane kuli kalunga. Shikaho malunga vosena vaka-mangana vavapululwile. Ndanyele wamulingishile kupwa ngambela wamu Mbavilone yosena. (Kwimba)

Muvwimbimbi wamulikumi nayitanu (15) Likombelo lya ulu

Muvwimbimbi wamulikumi nayitanu (15) Likombelo lya ulu

Ndanyele 3:1 - 12

Mwangana waMbambilone ajikile likombelo lyalinene lyaulu. Asanyikile vakulwane java myata vezenga kukujika likombelo kana. Jino omu valingile vosena vana kunguluka lyehi, vangamba ja mwangana vatambakanyine nalizu lyakukanguka, “Omu namwivwa kuvuma chajineta na visaji enu muvosena mufukame nakulifukula kuli kombelo lyaulu. Kaha nachipwa kuli weshowo keshi kulifukulako navamumbila mulilungu lyakakahya.” VaShatalake, Meshake na Avetenengo masepa ja Ndanyele vakanyine kulifukula kulikombelo kana. Oloze vakiko valifukwilenga kuli Yehova Kalunga umwe kaha. Malunga vamwe vakatukile vayile kuli mwangana vamulwezele ngwavo, “VaYuleya vamwe ava ove mwangana wahaka vihela vyakutala lifuchi lyaMbambilone: Meshake, Shatalake na Avetenengo. Vakiko vanahono kwononoka kuli ove mwangana. Vanalikange kuzachila tutulunga chipwe kulifukula kulikombelo eli ove wajikanga.” (Kwimba)

Muvwimbimbi wamulikumi nayitanu naumwe (16) Lilungu lyakakahya

Muvwimbimbi wamulikumi nayitanu naumwe (16) Lilungu lyakakahya

Ndanyele 3:13 - 30

Mwangana atumine mazu kuli Shatalake, Meshake na Avetenengo. Akuvalweza ngwenyi, “Nge namukana kulifukula kuli kombelo lya ulu, navamimbila muli lungu lyakakahya. Kaha Kalunga muka mwahasa kumipulula enu?” Kaha vamukumbulwile ngwavo, “Kalunga ou twazachila ikiye mwatupulula, mwatupulula kufuma kungolo jove, ove mwangana. Chipwe mwahona, oloze etunyi tunakane kulifukula kuli kombelo lyove.” Mwangana hakwivwa mazu kana azalile na kulundundu, alwezele mangana vazumise lilungu mapapa katanu nakavali kuzomboka nganomu lyechi kwenyenga. Kaha alwezele maswalale jenyi mangana va Shatalake na Meshake hamwe na Avetenengo vavambile mukakahya. Kakahya kenyene chikuma milangi yakakahya kaze kavajihile maswalale, vaze vambilile malunga mulilungu, lyakakahya. Mwangana atambakanyine, “Kumana kakweshi malunga vatatuko vambilanga mukakahyako? Jino ngunamonomo malunga vawana vali nakutambuka nakujinguluka lijiko lyakakahya ou wamuchiwana kulifwana na Kalunga.” Atambakanyine vafume mukakahya. Omu vaze malunga vatatu vafumine muze muli lungu lyakakahya, kavavamweko, jikambu javo kajapapukileko, vyakuvwala vyavo ka vyawemeneko chipwe kunuka wishi! Jino mwangana ahanjikile ngwenyi, “Upahu naukelenga vipwenga kuli Kalunga kava Shatalake, Meshake, na Avetenengo, ou atumanga kangelo kenyi kupulula vangamba jenyi vamufwelelanga, vakananga kwononoka kumazu ami. Vakiko vetavile kufwa mwomwo vakanyine kulifukula kuli Kulunga kuli tulunga veka, shina kuli ou Kalunga kavo kaha. Jino ami nguli nakuhana lushimbi elu. Weshowo mukalifuchi chipwe muka muyachi, chipwe mukalilimi mwakahanjika mwamupi hali Kalunga kava Shatalake, Meshake na Avetenengo vaka musanyune nazuvo yenyi vaka yalumine kupwa kaumbu wamalolwa. Mwomwo kanda lyehi kupwenga Kalunga mukakupulula ngana.” (Kwimba)

Muvwimbimbi wamulikumi nayitanu nayivali (17) Ndanyele mwalomba kuli Kalunga

Muvwimbimbi wamulikumi nayitanu nayivali (17) Ndanyele mwalomba kuli Kalunga

Ndanyele 6:1 - 13

Ndanyele apwile nangolo muze mulifuchi. Oloze vamyata vamwe vamwivwilililenga chipululu. Oloze muli ikiye kava wanyinemo kupihyako, Ndanyele apwile muka-kufwelela wakushishika mukuzachila mwangana. Vaka-kole jenyi valifumbile nakuya kuli mwangana vamulwezele ngwavo, “Ove mwangana haka lushimbi ngwove mutu naumwe pimbi mwalifukula chipwe kulomba kuli Kalunga weka, chipwe kuli mutu mumakumbi makumi atatu, shina kuvanga kuli ove kaha, mwangana nge kate vakamumbile muwina wavandumba.” Mwangana achivwile ngwenyi chinawahe etavilile vishinganyeka vyavo. Ngocho lushimbi lwaluhya valutungile. Ndanyele evwile lushimbi lwaluhya luze atungile mwangana, oloze atwalililengaho nakulomba kuli Kalunga katatu halikumbi. Jino omu vaka-kole jenyi vamumwene ali nakulomba, valifungile vayile kuli mwangana, vamulwezele ngwavo, “Ndanyele na likange kuhona kwononoka kulushimbi elu watunganga ove mwangana.” (Kwimba)

Muvwimbimbi wamulikumi nayitanu nayitatu (18) Ndanyele muwina wavandumba

Muvwimbimbi wamulikumi nayitanu nayitatu (18) Ndanyele muwina wavandumba

Ndanyele 6:14 - 24

Kaha mwangana alinyengele chikuma omu achivwile, esekele makumbi osena kuwana mwakulingila mangana amupululule Ndanyele. Oloze kahashileko mwomwo halushimbi luze. Avalwezele kumumbila Ndanyele muwina wavandumba. Amu vendejekele Ndanyele ngwenyi, “Kalunga kove ou weji kuzachilanga mwakwoloka, akupululule yove.” Hahaze vene Ndanyele vamumbilile muvandumba. Ufuku uze mwangana kalile vyakulyako chipwe kuvasala tulo uze ufukuko. Omu kwachele chimenemene mwangana ayile kuze kuwina wavandumba atambakanyine, “Ove Ndanyele, Ndanyele ngamba ya Kalunga wakuyoya, ou Kalunga kove nakuyovola kufuma kulivandumba tahi?” Jino Ndanyele amukumbulwile ngwenyi, “Kalunga kami ikiye atumanga vangelo nakusoka kutunwa twavandumba. Kavangulemekeleko, mwomwo Kalunga kami natachikiza ngwenyi muli ami kamwapwile mulongako. Kangwalingile mulonga kulioveko ove mwangana!” Shikaho mwangana awahililile chikuma, avalwezele vamufumise Ndanyele muze muwina wavandumba. Jino Halushimbi lya mwangana, vaka-kole ja Ndanyele vosena vaze vamwimanyinenga nakole vavambilile muze mwapwile vandumba, kaha vavatanyine kuli vandumba vavalile. (Kwimba)

Muvwimbimbi wamulikumi nayitanu nayiwana (19) Nehemiya mwasoloka kuli mwangana

Muvwimbimbi wamulikumi nayitanu nayiwana (19) Nehemiya mwasoloka kuli mwangana

Nehemiya 1:1 - 2:7

Nehemiya apwile kaYuleya afwelelenga Kalunga. Atwaminenga mu Mbavilone hakukuma chalwola lwa Ndanyele. Yelusalema, nganda yava ka kuluka jenyi, vapwile vana yenyeka lyehi. Kaha vaYuleya vaze vatwaminenga muze vapwilenga nakumona ukalu nakuyanda nawa. Nehemiya apwile ngamba ya mwangana wamunene. Jino likumbi limwe omu apwile nakuhana vinyo kuli mwangana ahanjikile kuli ikiye ngwenyi, “Mwomwo ika kumeso ove kuli nakusoloka kupihilila?” Nehemiya amulwezele vya Yelusalema na vyavatu jenyi vaYuleya. Mwangana amwambile ngwenyi: “Nausaka yika?” Nehemiya aholelekulu oku ali nakulombo kuli Kalunga hakukumisa ahanjikile kuli mwangana ngwenyi, “Ove mwangana, kachi nge chinakuwahila yove, achingutume ku nganda yavatata ngu kayitungulule.” Kalunga akumbulwile kulomba cha Nehemiya kaha mwangana amusuwile nganomu amulombele mwangana. (Kwimba)

Muvwimbimbi makumi avali (20) Nehemiya mwatungulula nganda yakulyenyeka

Muvwimbimbi makumi avali (20) Nehemiya mwatungulula nganda yakulyenyeka

Nehemiya 2:7 - 20

Nehemiya vamuhanyine vyakutungisa namalunga vakakumukafwako. Vayile ku Yelusalema. Vaka-kole java Yuleya vevwile mujimbu wa Nehemiya. Vapihililile. Kavasakile kuvakafwa vaYuleyako. Nehemiya kavevwile womako. Ahehwile Yelusalema, ajingulukile nakutala jimbango ja Yelusalema ja kushiuka. Achilingile naufuku mangana kuchina nakupwa umwe mwatachikiza evi alingile ikiye. Omu kwachele nachimene Nehemiya asanyikile vaYuleya, avalwezele ngwenyi, “Tuyenu tutungululenu jimbango ja Yelusalema, kaha nachitu fumisa kusauka.” Avalwezele ngwenyi Kalunga ali na ikiye. Kavatela kwivwa womako. VaYuleya vamukumbulwile ngwavo, “Tuputukenu kutungulula vene holili.” (Kwimba)

Muvwimbimbi makumi avali naumwe (21) Kutunga jimbango

Muvwimbimbi makumi avali naumwe (21) Kutunga jimbango

Nehemiya 3:1 - 6:19

Talenu ou muvwimbimbi! Va Yuleya valinakuputuka kuzata. Vamwe valina kufumisa vyamajilo, vakwavo valina kutunga jimbango, veka vali nakuwahisa vikolo vya kwingilila. Vaka-kole ja va Yuleya vapihililile vaputukile kuvahulamisa nakuvatomba. Vava twamine punga yakuvalukuka chipwe kuvajiha shimbu navakapwa nakutanga hamilimo. Nehemiya alombele kuli kalunga cheka mwomwo atachikijile ngwenyi chinyingi na ngolo vyapwa vyakulikalunga. Asakile Kalunga amulweze nawa mwakulingila. Malunga vosena valipakachishilenga navitwa, vavahakilenga hajimbango hajimbango valame vaka kuzata. Muthu himuthu vosena apwilenga nachitwa chenyi wakulizanga mukulwa jita. Vaka-kole vahonene kujiha Nehemiya chipwe va Yuleya. Kuzata chatwalililengaho mumakumbi makumi atanu na avali (52) mbango yakumine kuyi tungulula. Kaha omu vachimwene vaka-kole javo navakamafuchi osena aze avajingulukile vali komokelele mwomwo ngwavo mulimo kana vanaukumisa na kukafwa cha Kalunga. (Kwimba)

Muvwimbimbi makumi avali nayivali (22) Ezela mwatanga jishimbi

Muvwimbimbi makumi avali nayivali (22) Ezela mwatanga jishimbi

Nehemiya 8:1 - 13:31

Omu valingile vanakumisa lyehi kutunga jimbango, va Yuleya valikungulwile hamwe mu Yelusalemu. Vatu vamuhulishile Ezela, kapilishitu ka Kalunga, avatangile mazu. Vamwe valilile mwomwo atachikijile ngwavo tuna likange kujishimbi ja Kalunga. Kalunga ahanyine ngolo vaka-kole javaYuleya ngolo vashiule nganda yaYelusalema. Vakiko valishikile kwalumuka kuvilinga vyashili vatambuke mujila ya kumukavangiza Kalunga cheka. Nehemiya avalwezele vatu ngwenyi, “Kanda namwivwa matotoko. Mwomwo kuwahilila cha Kalunga chikiko ngolo jenu.” Vatu vosena vamwalishile Kalunga valingile chilika chachinene. Vazangile nawa lizu lya Kalunga vavalumbunwinelyo. Shikaho etu nawa tunahase kuwahilila chipwe tunavulumuna. Kalunga alizanga lyehi kutu konekela etu. Nahase kwalumuna kuyanda nashili jetu kupwa kuwahilila. Mwatuhana jingolo etu jakukavangiza jilila jenyi nakumuhana kavumbi. (Kwimba)

Muvwimbimbi makumi avali nayitatu (23) Yesu hakulusu

Muvwimbimbi makumi avali nayitatu (23) Yesu hakulusu

Yowano 19:17 - 30; Wava-kaloma 5:8

Shimbu Yesu apwile hano hamavu ahichile muvyeseko vyavivulu chikuma, nge omu nawa vangamba jakalunga vakwavo nawa vali muno mumukanda. Satana amwesekele Yesu mangana alifukule kuli ikiye keshi kuli kalungako, oloze Yesu akanyinenga kuvyeseko vya Satana. Vatwamina java Yuleya vamulukukilenga nakumufumbukila Yesu muku hanjenjeka chavo, hamwe vamushinjilenga namazu amwe akumuleleveka mwakuhingama. Vamusezele kuli vaku-mukavangiza jenyi. Vamukashile, vamuhendele nakumuveta vamu vangijikilile kumeso a vaka-kusopesa. Ku songo, vamujihile ha kulusu. Kalunga apulululwile va Elija na Ndanyele hamwe navakwavo nawa ha jilwola jajivulu, oloze Yesu kamupulwilwileko kufuma kukufwa. Amwechele Yesu apulasane tuhu mumaukalu osena mangana ha jisonyi na jishili jetu a kafwileho, nge ngamba ya Kalunga wakuyanda. Mwomwo nganomu ononokele palanga nakukufwa Kalunga kamusele tuhuko muze muchimbumbe. Amusangwilemo halikumbi lya muchitatu, amuhanyine ulemu waunene. Mwahichile makumbi makumi awana (40) kufuma hakusanguka chenyi, vamutwalile mwilu atwama kuli voko lya chilyo lwa Kalunga. Kuvanga kaha muli Yesu mukiko jishili jetu nahasa kujikonekela najisonyi jetu kutu fumisajo. Numba usoko wetu nakalunga utungu luke cheka. Nakuyoya chiyoyelo jino chakulemesa Kalunga. Nakuhasa kutwama nenyi haya myaka na myaka muze muupahu, nge tunafu lyehi mumijimba yetu. (Kwimba)

Muvwimbimbi makumi avali nayiwana (24) Yesu mwavenyikila jila yakuya kukuyoya cha haya myaka

Muvwimbimbi makumi avali nayiwana (24) Yesu mwavenyikila jila yakuya kukuyoya cha haya myaka

Mateu 7:13; Yowano 14:6

Muvwimbimbi ou ulina kutwinyikila etu kuyoya chinapu chakutambuka mujila yayinene yakutwala ku kufwa. Vosena vanahono kumwivwisa Kalunga kuwaha. Yesu ayanjile nakutukafwa mangana atulwile kukutuzangamisa. Asangukile wamutonyi cheka. Atulweza jila ya Kalunga. Twatela kukavangiza jino jila ya Yesu. Ya yikalu kaha nawa yayindende yakulipalakanya. Hamwe na hamwe natuyanda mukuyoya vene ngana. Nganomu chapwile kuli Ndanyele na masepa jenyi. Oloze jila ya Yesu yakututwala mwilu. Muze kamweshi kuyandako. Chikiko chihela chakuwahilinga lika myaka na myaka mukuunda. Mukiko atwama Kalunga. Yesu ngwenyi, “Ami yami jila, yami muchano, yami kuyoya. Mutu naumwe pimbi mweza kuli tata shina kuvanga hali ami.” Lomba vene oho lili. Mulombe Yesu akulweze jila ya ise.

संबंधित माहिती

Free downloads - Here you can find all the main GRN message scripts in several languages, plus pictures and other related materials, available for download.

"Look, Listen and Live" audio-visual - A set of 8 programs of 24 pictures each for evangelism and Christian teaching. The series presents Old Testament characters, the life of Jesus, and the young church.

How to use GRN Audio visual resources - 1: Sharing the Gospel made easy - This article gives an introduction to some of the many different ways the GRN audio visual resources can be used in ministry.

How to use GRN Audio visual resources - 2: Going Deeper - This article gives further explanation of how people learn from the stories, and why the stories do not have a lot of commentary.

The GRN Audio Library - Evangelistic and basic Bible teaching material appropriate to the people's need and culture in a variety of styles and formats.

Copyright and Licensing - GRN shares it's audio, video and written scripts under Creative Commons

Creating DVDs using the GRN Slide show Videos - How to burn DVDs for specific people groups you are trying to reach

Choosing the right audio or video format - What audio and video file formats are available from GRN, and which one is best to use?