4. Kenge, tegherere ndani pare mbapira 4 Hapika Nyambi

Outline: Ruth, Samuel, David, Elijah. 24 sections. It has a picture book to go along with the recording.

Script Number:421
भाषा:Thimbukushu
Theme:Multiple themes
Audience:General
Style:Monolog
Genre:Bible Story
Sophistication:Simple
Purpose:Evangelism; Teaching
Bible Quotation:Direct
Status:Approved

Scripts are basic guidelines for translation and recording into other languages. They should be adapted as necessary to make them understandable and relevant for each different culture and language. Some terms and concepts used may need more explanation or even be replaced or omitted completely.

Script Text

Mwingeneno

Diyuwa dyodiwa. Nyambi gha haka wahe no gha pakera thinga keheyu. Aye ne mudyo kudifumanekero dyetu ndani ruhakitho rwendi rwa tu henyitha mukumukarera nokukara ghutawedhi kukwendi. Tegherere ko yi ya hokokire myaka dhodhingi dhina kapita, thika di ha yi tjangire muMan̂ando gha Nyambi, mu Bayibiri. Kenge kuthiperende mumbapira dhothinadihenga, fikure thiperende thokurandako apa sho yuve. (Mughuma)

Thiperende 1 Diko edi dya tjirire kudiyerenge

Thiperende 1 Diko edi dya tjirire kudiyerenge

Ruti 1:1-5

Nyambi gha varekire hanu wahe, ene gho ha mwiman̂anyenine. Nyambi gha tororire diko dya Isragheri dimudimuke no kumukugha. Yoyishi gha wa hakire gha tendire ghundambo nawo mukuneghedha fumwa dhothin̂eke thendi mwawa Isragheri kukaye kokahe. Aye gha shimbire Isragheri mukuwatura padina dyendi thinda mukatji komako ghomahe. Ene munako dhodho, heman̂anyenine Nyambi. Ndani gho ha tangire kukarera yitjwandjo no ha Nyambi hombango yira mako ghamweya gha gha wa dhingumutwedhire. Nyambi gha retire yita no diyerenge kwawa Isragheri gha wa huthe kukwendi. Mumanako ghaya gho diyerenge, diko dimweya edi nakuyenda nikamuthimwetedhere, dya tokorire mukuyenda kuMoghabu ha kashana-shane yokudya.
Ha ka tungire muditunga diya dya wanu maghana, myaka dikumi (10). Katughuru gha kafererire momo. Nawanendi hohatutughuru hawadi na mukamadi hoku Moghabu. Hanendi ho hatutughuru, nagho hafire. Mbuyama pithendi nawa ngumwenyendi hawadi haka thigharire mu ditunga dya wanu maghana. (Mughuma)

Thiperende 2 Muthighu wawa Naghomi na Ruti ku Isragheri

Thiperende 2 Muthighu wawa Naghomi na Ruti ku Isragheri

Ruti 1:6-22

Nyina ghodiko diya ha mwithire eshi Naghomi. Ha ngumwenyendi ha shawadi ne haMoghabite, ndani mena ghawo ne ha Ruti na Orupa. Naghomi gha tokorire kuhuka kuditunga dyawo. Ha Ruti na Orupa nawo ha mukambamine muruyendo rwendi. Naghomi kokuninga ku kwagho eshi; “Pashanye sho mu yendere nange? Mbo na ka kara shime nohana hohakafumu awo mbo hana ka kara madhiko ghenu ndi? Muhuke Kudighumbo mwahanange, na kurupara keho; mbadi waku kara karo nokatughuru ghumweyame. Nyambi ne ghana nipa mughongo.” Po diyo Orupa gha ncumitire Naghomi no kuthighuka kwawakuru wendi kudighumbo. Ene Ruti gha kakaterire kwa Naghomi nokuninga eshi, “Wa nininga ni kuthiye. Oku shoyende name ko shoniyende, no ku mbo ka tunga name ko mbo ni katunga. Haguva ghoye ne mbo hana kara hange name, no Nyambi ghoye mbo ghana kara Nyambi wange.” Po digho Ruti gha yendire na Naghomi kuBetilehema muditunga dya Judeya. (Mughuma)

Thiperende 3 Ruti mudipya dyo mukesho

Thiperende 3 Ruti mudipya dyo mukesho

Ruti 2:1-23

Naghomi na Ruti ha karire ha hepwe thikuma. Ruti gha ghambire kwa Naghomi eshi, “Tango ni yende kudipya ni ka shekurure mavumbukiro agha gha thighara-thighara munyima dhakehe yuno shoni kawane ghundambo mumwendi.” Gha yendire kudipya omu ha karire harughani awa ha keshire. Thinda shadipya di gha karire katughuru oyu ha toyire eshi Boghasi. Ghepurire harughani wendi kuhatera ko yu mbuyama gho mutundakure. Yofotji gho papawo, “Gha ningire eshi aye ne mu kamadighana ghokuMoghabu oyu gha ka hukire na Naghomi.” Boghasi gha yuvire ghuwa edi gha parithire na ngumwenyendi. No gha monine eshi gha tanara muyirughana. Ha ningi kwendi kwa Ruti eshi, “Kare momuno nawa rughani wange hohakamadi. Kengerere kumutara ghodipya oku hana kukeshera hakafumu, nokuthe karo shime munyima dhawa shengeteya.” Gha tongwererire hatutughuru awa ha mu rughanenine eshi, mbadi ha kona kumuyipitha endi kumutenda yoyimango, ene ha kona kumuthiyera gha ghongwedhe ghuheke. Runguro ruya Ruti gha ka tongwerireko Naghomi kuhatera kughunongo wa Boghasi. Ko kuninga kwendi Naghomi eshi, “Nyambi gha mu kandadheke!” Ko kuwedhererako karo eshi, “Oya katughuru ne mukadiko dyetu.” (Mughuma)

Thiperende 4 Ruti na Boghasi pa thindanda

Thiperende 4 Ruti na Boghasi pa thindanda

Ruti 3:1-18

Diyuwa dimweya Naghomi ko kuninga kwa Ruti eshi, “Mwanange, kukona ni kushanene dighumbo, omu mbo haka kupakera thiwana thinga tho yinyanda yoye yoyiheya. Boghasi ne mwapetu. Ghoruno runguro ne n̂anyi gha pure mavumbukiro. Kuyoghe nokupombere munde, ndani ghoshupate yishupata yoyiwa. Ndani gho yende pathindanda. Apa sho gha rare, ka kengerere dyango oku sho gha kararere. Munyima ne gho yende no kafikure mapadhi ghendi ghokarare. Aye ghana kuku tongwera eshi ngo ngepi shokatende.” Ruti ghatendire thika edi ghamutongwerire Naghomi. Apa gha pindukire Boghasi gha monine Ruti kumapadhi ghendi, gha dimukire eshi ghana shana yiyeka, yoyishi dyo nga ha tendanga mu Isragheri mayuwa ghaya. Ngeshi katughuru ghana fu mu Isragheri, mu kadiko dyendi oyu gha muhata, gha kona kuyeka mudidhi yo. Po diyo eshi Boghasi gha ningire kwa Ruti eshi, “Wayapa. Na kukutendera thothihe ethi ghuna shana. Owe ne wafumana kwa keheyu ghomumbara.” (Mughuma)

Thiperende 5 Boghasi nawa mathimbi gha Betilehema

Thiperende 5 Boghasi nawa mathimbi gha Betilehema

Ruti 4:1-22

Boghasi ghethire hapiterithi dikumi (10) pofotji pathero dha Betilehema. Pa karire katughuru ghumweya yu gha shanine kuyeka Ruti pakutangerera. Ene waheya ha tawire eshi Boghasi gha yeke Ruti. Mukutanaritha makuyuvero ghaya, hakadiko ha tapire yishupata yendi yokumapadhi kwa Boghasi. Agha ne ghomayendithitho gha karire mu Isragheri. Po diyo Boghasi gha shimbire Ruti no gha karire mbuyama wendi. Ha wanine mwana katughuru gho dina Obeti.
Ndani hambuyama ha ningire kwa Naghomi eshi, “Tape makughero kwa Fumu Nyambi yu gha pira kukumwagherera eshi ghu pire kukara no mwikuroye ghomukafumu oyu mbo gha kukunga. Ngo mbo gha yuveke mu Isragheri nokutendurura ghuparo ghoye thipya nokukukunga kate kughukurukadhi ghoye. Kwangumwenyoye oyu gha kuhaka oyu gha kara thinga noye kupitakana matjaha kwoko nohawadi ne hamushamuruka.” Obeti munyima gha karire nyakudya David fumu shokuru wa Isragheri. (Mughuma)

Thiperende 6 Mariya na mu engeli waNyambi

Thiperende 6 Mariya na mu engeli waNyambi

Lukasi 1:26 – 38; 2:1-7

Myaka dhodhingi munyima dha Ruti, Nyambi gha tororire mbuyama ghumwe gha mu karere, dina dyendi ne yo Mariya. Mwanahoka wa Ruti. Mariya ne mbuyama oyu gha dhirire kukukundama rumweya namukafumu. Ghamu kuruperithire yiyeka katughuru ghodina Josefu. Ene kughutho ghokukuyeka, mu engeli wa Nyambi gha hokokire kwa Mariya. No gha ningire ku kwendi eshi,
“Wayapa, Mariya, ghuna wana thin̂eke kwaNyambi. Mbo ghuna kara mughuremu no mbo ghuna shamuruka mwana gho katughuru, no mbo ghuna muti dina Jesusi. Mbo ghana fumana no mbo hana mwitha eshi mwana Fumu Nyambi shokuru, ghufumu wendi mbadi mbo ghupwa.” Mariya ghepurire mu engeli eshi, “Ngepi edi ya kukona kuhokoka yi, ame mbadi na kara nokatughuru?” Mu engeli ghamu huthire eshi, “Mupepo ghokupongoka mbo ghu neya papoye, nongcamu dha shokuru mbo dhina kara papoye. Po diyo eshi mupongoki yu mbo reta ha kumutoye eshi, mwana Nyambi.” Mariya kokuninga eshi, “No mupika Nyambi me. Yi kare thika edi ghuna yi ghamba.” Mariya gharemine gho gha shamurukire mwana ghokatughuru. Gho gha mu tire eshi, Jesusi. Dyo ya hokokire eshi, Mariya gha kare nyina Jesusi, oyu gha tumine Nyambi. (Mughuma)

Thiperende 7 Hanna ghana kuraperera kwa Nyambi

Thiperende 7 Hanna ghana kuraperera kwa Nyambi

1 Samueli 1:1-20

Munyima dhoruvedhe rwa Ruti, mwa karire mbuyama ghumweya mu Isragheri, gho dina Hanna. Ghaye gha karire muna Elikana. Katughuru wendi gha mu hakire shemwa, ene Hanna mbadi gha karire no yi shamberera, yoyishi mbadi gha konine kumupa hana. Elikana gha karire no mukamadi ghumweya, Penina, oyu gha karire no hana. Oyu nga shamaghuranga Hanna no kumusherera yoyishi Nyambi gha mu kitekire mukupira kumupa hana. Kehe mwaka nga ha yendanga ku tembeli waNyambi ku Shiloh. Nga ha twaranga miyambo no yitapa kwa Nyambi. Hanna ghayendire mu tembeli, no gharapererire kwa Nyambi ghudira eshi, “Nyambi, wa kunivuruke kunipako mwana gho katughuru, gho na kumutape kukoye ghuparo wendi ghoghuheya.” Miromo dhendi dha yenda ghurire okuye ne kuna kughamba naNyambi, ene mbadi gha shwayithire diywi. Eli, oyu gha karire muPristeri shokuru, gha mu monine, gha ghayarire eshi ghana terera. Apa ghamushingire, gho gha muhuthire eshi, ‘‘Mbadikemo hekudyange. Amene no mbuyama nidi mundundumena dhodhikuru. Ghonina yandhurura mutjima wange kwa Fumu Nyambi.’’ Eli gha mu huthire eshi, “Yende muthiraro, Nyambi wa Isragheri gha kupe eyi ghuna mukumbera.” Fumu Nyambi gha yuvire ndapero dha Hanna, ene mukuyenda koruvedhe gha wanine mwana gho katughuru. Gha mutire eshi Samueli. (Mughuma)

Thiperende 8 Mwanuke Samuweli mutembeli waNyambi

Thiperende 8 Mwanuke Samuweli mutembeli waNyambi

1 Samueli 1:24-28; 1 Samueli 2:12-21; 1 Samueli 3:1-21

Oku shime Samueli mungaghu, Hanna gha mu kandadhekire kughutho waNyambi. Gha mu shimbire gha katunge na Eli mu tembeli dha Shiloh. Eli gha tongwerire Samueli eshi ngepi edi ghokukarera Nyambi. Eli gha karire nohana hawadi hoha tutughuru. Ha karire haPristeri ene ha karire harume hohayi. Po diyo Nyambi gha shaghekire kughamba nawanu kupitera mwawa Pristeri. Ghu thiku ghu Samueli gha rarire mu tembeli wa Nyambi. Kapupi kamanana Nyambi gha mwithire eshi, “Samueli! Samueli!” Samueli gha tjirere kwa Eli nokuninga eshi, “Yame no; ghuna kwitha.” Ene Eli gha ningire eshi, “Mbadi na kwitha; huke ghu karare.” Eyi ne ya hokokire yikandho yihatu. Podiyo Eli gha nongononine eshi, Nyambi ghana kumwitha Samueli. Gha tongwerire Samueli gha huthere Nyambi eshi, “Ghambe Fumu Nyambi, mupikoye kuna kutegherera.” Apa Fumu Nyambi ghethire thikandho tho ghune, Samueli gha huthire eshi: “Ghambe Fumu Nyambi mupikoye kuna kutegherera.” Nyambi gha tongwerire Samueli eshi kuna kutapa mahumbithero kudirapa dya Eli, pamurandu gho ghuyi wa hanendi. Po diyo Samueli gha yitongwerire Eli mathikuthiku Nyambi nga gha mbanga yikandho yoyingi na Samueli no gha karire muPristeri shokuru, muporofeta ndani mupitedrithi mu Isragheri. (Mughuma)

Thiperende 9 Samueli ghana kurapereritha haIsragheri

Thiperende 9 Samueli ghana kurapereritha haIsragheri

1 Samueli 7:2-14; Mashwaghero 20:2-5

Nyambi gha kumithiremo matoyedhero ghendi ghokuhatera hana Eli hohayi. Ha wa payire muyita ha Isragheri ha wawithire ha Filisteyine. Ha raghurire myaka makumi mawadi (20) haFilisteyine mu Isragheri. Ndani Samueli gha ningire kwawanu eshi, “Ngeshi komuna kuhuka kwa Nyambi nomitjima dhenu dhodhihe, mu yakunuke koha Nyambi hohawonawo no mu kutape kukwendi mumurughanene yodiye pithendi. Naye ghana kumushutura kwawa Filisteyine.” Ha Isragheri ha teghererire Samueli. Ha konganine padyango dyofotji. Samueli gha tapire muyambo kwaNyambi no gha rapererithire ha Isragheri. Ha Filisteyine ha konganine mukuhomokera ha Isragheri, ene Nyambi gha tumine mushoro ghoghukuru papawo. Ha Filisteyine hatjirire wahe noha Isragheri gha konine kuwitha haFilisteyine wahe. (Mughuma)

Thiperende 10 Samueli ghana kuwetha Saghulu no maghadhi

Thiperende 10 Samueli ghana kuwetha Saghulu no maghadhi

1 Samueli 8:1-10:1

Nyambi ne yofumu ghoshemwa wa Isragheri na Samueli gha piterithire hanu mwa Nyambi. Yoyishi marudhi ghamweya gha karire nomafumu ghawo ha Isragheli nawo ha shanine kukara nokatughuru gho kuwa piteritha, gha kare fumu wagho. Samueli mbadi gha shambererire pakuyuva yinu yi. Ene Nyambi kokuninga kukwendi eshi, “Tegherere koyoyihe eyi hana kughamba hanu kukoye, mbadi yowe hana nyatha ene yame fumu wagho hana nyatha, tegherere kukwawo gho wa pe fumu.’’ Pakarire mutjaha gho dina Saghulu. Ghomure no muwa nungu dhendi. Diyuwa dimweya Saghulu gha yendire gha kadhingure Samueli. Apa gha mumonine Samueli ghana kwiya, Nyambi kokuninga eshi, ‘‘Katughuru wapo ne yoyo.“Mboghana raghura haguva wange.” Po diyo Samuweli gha shimbire kawero ko maghadhi; ghaterire maghadhi pamutwi wa Saghulu. Ethi ne thidimukitho eshi gha pwire kutorora gha kare fumu. Myaka makumi mane Saghulu gha raghurire mu Isragheri. (Mughuma)

Thiperende 11 Nyambi ghana kushweneka Saghulu mughu fumu

Thiperende 11 Nyambi ghana kushweneka Saghulu mughu fumu

1 Samueli 15: 1-29

Muruvedhe roghufumu waSaghulu, haAmarekite ha yipithire Isragheri mumuhingo dhodhingi. Samueli gha ningire kwa fumu Saghulu eshi, “Tegherere kumbudhi dhaNyambi. Homokere ha Amarekite noyipithe thothiheya ethi ha kara natho. Mbadi mwa kona kuthighako hamweya. Mupaye tutughuru, hambuyama no hanuke ndani ngombe, ndjwi, ngameno no yidongi.’’ Nyambi gha ghamweghene Saghulu nawa mashurundate ghendi mukuwitha yita yawa Amarekite. Ene ha Isragheri ha nyathire Nyambi. Ha thiyireko yimuna yoyiwa yawa Amarekite mukuyambithako miyambo kwa Fumu Nyambi ndani mbadi ha payire fumu wa Amarekite thika edi gha rawerire Nyambi. Ndani Samueli gha ningire kwa Saghulu eshi, “Yoyishi ghuna nyatha man̂ando gha Fumu Nyambi naye ghana kunyatha eshi kadi ghofumu.” Samueli gho gha pirukire gha kayende. Saghulu gho gha ndhondherire mumuthithi wa Samueli, ko kudjadjukera munyara dhendi. Samueli gho gha ningire eshi, “Fumu Nyambi ne ghana tunditha ghufumu munyara dhoye no ghana ghu tapa kwa katughuru ghumweya, gho hasha kupitakana we.” Saghulu gha tapire muyambo kwa Fumu Nyambi, ene mbadi gha mu kutekerire. Samueli gha kutekerire nokurughanena Fumu Nyambi mayuwa ghoyipara yendi yoyiheya. (Mughuma)

Thiperende 12 Jesus mundhugho dha Nyambi

Thiperende 12 Jesus mundhugho dha Nyambi

Lukasi 2:41-50; 1:35

Myaka dhodhingi munyima dha Samueli, Nyambi gha tumine mwanendi Jesusi mukaye yira kambututu mu Isragheri. Gha pwire kushamuruka kwa Mariya. Apa gha karire no myaka dikumi no dhiwadi Maria na katughuru wendi Josefu ha yendire kuJerusalema. Jesusi naye gha yendire nawo. Mundhira dhawo dho kathighuka Jesusi gha wa yongarire, po diyo ha tangire kumushana. Munyima dho mayuwa mahatu haka muwanine mu tembeli waNyambi. Gha ghambaghurire nawa hongi hoha Juda kuhatera n̂ando dha Nyambi. Mariya gha ningire kukwendi eshi, “Mwanange, nye ghuna tu tendera kenge? Name nawiho ne tuna kushana noyitokota.” Ene Jesusi gha ningire eshi. “Pashanye muna ni shanena? Mbadi mwa dimuka eshi na kona kukara mundhugho dhatate ndi?” Apa gha karire Jesusi mungaghu yira Samueli, gha dimukire eshi ye ne kweyire mukunakarera Nyambi. Jesusi kweyire mukunapiteritha hanu mukuwahutha kwa Nyambi. Nyambi yo Fumu ghoshemwa no mupiterithi wawaheya.

Mwingeneno 2

Handwarume hamweya awa ha parire ne ha karire hapika Nyambi.
Mumakurando ne n̂anyi kakutongwere eshi ngepi edi ghawa tendire Nyambi ha kare ha pitererithi hashokuru, wawanu. Fikure kuthiperende thokurandako apa shoyuve. (Mughuma)

Thiperende 13 Davita mu dithi gho mudhughutjima

Thiperende 13 Davita mu dithi gho mudhughutjima

1 Samuweli 16: 1-13; 17:34, 35

Saghulu yo gha karire fumu ghokutanga waIsragheli, ene gha twarire kughutho kupira ghutawedhi kwa Nyambi. Nyambi gha thighire Saghulu no mbadi gha mughamwenine karo. Pa karire mungaghu ghodina Davita. Oyu gha karire mudithi gho ndjwi dhawihe. Davita gha kuruperire Nyambi no mbadi gha yapire ghukukutu. Diyuwa dimweya nyime gha kwatire ndjwi, aye gha paghire nyime no gha gha mwenine ndjwi. Kehepano nga tendanga yishika yoyiwa no kwimba membo ghokukugha Nyambi. Membo gha ne kughatoya eshi mapisalemi no kughawana mun̂ando dhaNyambi mu Bayibiri. Davita gha karire katughuru yu gha nyanyukerire Nyambi, po diyo Nyambi gha mu tororire mukukara fumu munyima dha Saghulu. Ene gha karire fumu kare munyima dhoyifa ya Saghulu. (Mughuma)

Thiperende 14 Davita noDikithi endi diguva dishokuru

Thiperende 14 Davita noDikithi endi diguva dishokuru

1 Samueli 17: 1-54; 2:30

Ya karire yita pakatji kawa Isragheri na wa Filisteyine. Pakatji kawa Filisteyine pa karire diguva dyo dina, Goriyati. Aye gha kughererire kwawa Isragheli eshi, “Mutorore katughuru, ngeshi aye kurwa no kunipagha, ngo mbo tuna kara, twa pikenu, ene ngeshi na kumupaghe, mbo muna kara mwapiketu.” Ha tutughuru muIsragheli, ha yapire thikuma Goriyati. Mbadiko gho kumurwitha. Mwanuke Davita ko kuninga eshi, “Nane mu Filisteyine munye yu gho kuyapitha nokushedha mashurundate gha Nyambi ghomuyumi?” Davita mbadi gha yapire Goriyati yoyishi gha dimukire eshi, Nyambi ghana kumughamwena kupagha dikithi di yoyishi yita yi ne yaNyambi. Davita gha kumberire kwa fumu Saghulu gha mu thiye gha yende gha karwe na Goriyati nafumu gha tawire. Davita gha yendire mu kakuwanekera na Goriyati, gha shimbire rava dhendi no gha kandjere diwe mumutwi ghodikithi di. Goriyati gha wire nokukugharumuna mumuve. Davita gha tjirere kukwendi gha shimbire thimende tha Goriyati no gha tetire ko mutwi wendi. Apa ha monine ha Filisteyine eshi, ndwarume wawo hana mu pagha, ha tjirire. Hakayita wa Isragheli ha wa kutha kuthire no ha wa withire. (Mughuma)

Thiperende 15 Saghulu ghakondjire kupagha Davita

Thiperende 15 Saghulu ghakondjire kupagha Davita

1 Samueli 18: 1-19:10

Pakutanga Saghulu gha tumerire Davita yoyishi gha komononine Isragheri. Haguva wa Isragheri ha hakire Davita. Davita gha karire mushurundate no mukamithi shokuru mu Isragheri. HaIsragheri ha shambererire kumukutha. Ene Saghulu gha karire nonya kwa Davita. Diyuwa dimweya oku shime ha mu shikera Davita pathishandji. Mupepo gho ghumango weyire mwa Saghulu, popo kokushimba dighonga gha di muvukumithire, ene dya mukuhire nokashisha mudikuma. Yingi yikandho nga shananga Saghulu gha paghe Davita, ene Nyambi nga mu kunganga pakutuma Jonathani ghomwana Saghulu, no haka Isragheri hamweya mukughamwena Davita kwa n̂ore dhendi. Davita gha tjirerire no ka kara kayenda na Saghulu. (Mughuma)

Thiperende 16 Davita ghana kughamwena moyo wa Saghulu

Thiperende 16 Davita ghana kughamwena moyo wa Saghulu

1 Samueli 26: 1-25; Hakaroma 12:19

Diyuwa dimweya Sughulu nomashurundate ghendi ha yendire ha ka kwate Davita mumamboreya. Ghuthiku ghumweya, oku Saghulu nawa mashurundate ghendi ha porokere muturo, Davita na muyendhendi Abishayi, ha nyomine nokwingena mukamba dha Saghulu. Abishayi gha shanine kupagha fumu ya, ene Davita gha mu shingire. Gha ningire eshi, “Nyambi ghana kutapa mahumbithero kwa keheyu ghoku yipitha fumu oyu ghatorora ye.” Davita gha shimbire dighonga no ndini ghomeyu gha yi tundithe kumutwi wa Saghulu. Apa ha shwayire mukamba, Davita gha kughererire ghapinduthe mashurundate gha Saghulu. Gha ningire kwa Abineri, katughuru yu gha karire nothitumbukera thokukunga fumu eshi, “Mbadi ghuna kungu hekudyoye. Kenge mumbadi dhoye.
Kupi gha di maghonga nomeyu gha fumu gha ghana kara pepi nomutwi wendi?”
Munyima dho yi Davita gha ningire kwa Saghulu eshi, “Thikadi na kutekera moyo ghoye dyarero, naNyambi mbo ghana ni kutekera no mbo ghana kungu moyo wange, no kunishutura kumaghukukutu ghange ghomahe.” Davita gha yendire ndhira dhendi, na Saghulu gha thighukire kudighumbo. (Mughuma)

Thiperende 17 Davita gha karire fumu

Thiperende 17 Davita gha karire fumu

1 Samueli 31:1-6; 2 Samueli 5:1-7:16

Ha Filisteyine haka hukire shime na ha rwithe Isragheri. Fumu Saghulu, namwanendi Jonatani, nohanendi hamweya hohatutughuru ha pwire kupagha muyita yiya. Ndani po diyo ha mu tungekire Davita gha kare fumu wa Isragheri. Ghatendire mbara dhendi mu thitata tha Jerusalema. Nyambi gha ningire kwa Davita eshi, “Na kushwayithire kuyipumbu no kuku kuthakutha ndjwi ghu kare muraghuri gho haguva wange ha Isragheri. Na kutura dina dyoye dikare dikuru thikumenena yira mena gha wa tutughuru hohakuru mukaye.” Apa ha yuvire ha Filisteyine eshi Davita ne fumu, wahe ha ku yongire ha mu rwithire. Ene Davita gha kuruperire Nyambi no gha tendire thika di gha mu rawerire Nyambi, gha wandaghurire ha Filisteyine, ene gha wa withire haFilisteyine wahe. (Mughuma)

Thiperende 18 Ha Davita na Basheba

Thiperende 18 Ha Davita na Basheba

2 Samueli 11:1-12:20; Mashwaghero 20:14

Diyuwa dimweya Davita gha yendaghurire pawiru dho mbara. Gha monine mukamadi ghomuwa oyu gha kuyoghire. Davita gha mu hakire. Dina dya mbuyama yune Basheba. Aye ne mundambo wa Uriya, oyu gha karire mushurundate wa wakayita wa Davita. Uriya gha yendire kayenda gha ka rwithe haka n̂ore wa Isragheri. Davita gha tumine munu gha kamwithe no gha karire nendi panyama. Ndani mukamadi yu ghoghahukire ku dighumbo. Apa gha yi nongononine yu mbuyama eshi, nga remi gho gha tumine mbudhi kwa Davita haka mutongwere. Davita gho gha tumine marawero kwa mukuru wawa kayita eshi gha kona kukondja eshi Uriya gha kona kufera muyita. Munyima Davita gho gha shimbire Basheba gha kare munu wendi. Ene yi ne mbadi ya shamberithire Nyambi. Podiyo mwanawo ghombedi ha Davita na Basheba gha fire. Davita gha rombire mathigherero kwa Nyambi kughuyi ghu gha tendire. Davita gha hengaghurire munu wendi Basheba gho gha rarire nendi. Munyima dhomo, gho gha shamurukire karo mwana ghomuka fumu gho ha mu tire eshi Salomoni. Nyambi gha hakire Salomoni. (Mughuma)

Thiperende 19 Tembeli wa Nyambi

Thiperende 19 Tembeli wa Nyambi

1 Yithimwetedha 22:1-19

Davita gha harurire kwa Nyambi, ene gha hakire Nyambi noghahimine kumukarera. Gha shanine kutenda tembeli dhodhikuru, mo kukona hanu waheya kumukughera Nyambi. Ene Nyambi gha ningire eshi, “Mbadi wa kona kutenda tembeli mudina dyange, yoyishi wa notora manyinga ghomengi pakaye kughutho wange. Ene mwanoye ghomukafumu, Salomoni oyu gha kukara katughuru gho thiraro no maturumuthero, yo mbo gha ni tendera ndhugho. Mbo na mu pa maturumuthero kwawan̂ore dhendi mitara dhodhihe. No mbo na turithapo thipuna thoghufumu wendi mu Isragheri kuroruheya.” Davita ne gha royithire yinu yoyingi yo tembeli wa Nyambi mu Jerusalema kughutho ghokufa ye, ene Salomoni yodiye gha dhitendire. Ha shimbire ghure gho myaka kwoko nodhiwadi ndani ha dhi manine. Dya karire dyango dyodiwa thikumenena. Ha Isragheri hakuyire Nyambi mu tembeli dhi muJerusalema myaka mathere, no mbadi ha vuramine eshi Davita ne fumu gho mukuru. (Mughuma)

Thiperende 20 Jesusi ghana kwiya mu Jerusalema

Thiperende 20 Jesusi ghana kwiya mu Jerusalema

Mateghusi 21:1-11

Myaka mayovi (1000) munyima dha Davita, Nyambi gha tumine Jesusi muno mu kaye ghakare kambututu. Nyina ne mbuyama yu ghapirire kukara panyama parumweya nakatughuru, ayene Mariya. Jesusi gha karire mukareri ghomukuru wa Nyambi. Gha tongwerire hanu ghushemwa ghokuhatera kwaNyambi. Gha tendire yitetukitho pangcamu dha Nyambi. Saghulu na Dafita natwe twaheya ne twa harura kwaNyambi. Ene Jesusi mbadi gha harurire. Diyuwa dimweya gha yendire muJerusalema pathidongi. Hanu ha shwaghire ghu kugherera ha kuwane na Jesusi, “Ghosana kwa mwana Davita!” Ghosana kuninga eshi ‘makughero kukoye.’ Hakughererire karo shime eshi, “Gha fumane oyu ghana kwiya mudina dya Nyambi!” Hanu ne hamonine eshi Jesusi ne gha pitakana Dafita. Ayene Fumu wawaFumu wahe. (Mughuma)

Thiperende 21 Makorova ghekutithire Eliya

Thiperende 21 Makorova ghekutithire Eliya

1 Hafumu 17:1-6

Munyima dha Davita na Salomoni kwa karire mafumu ghamweya agha gha raghurire Isragheri. Ghumweya ne katughuru ghodina Ahabu. Ahabu gha tendire yinu yoyingi yoyimango kughutho wa Nyambi. Gha karerire thitjwandjo Baghari no gha mu tenderire thinyaku. Gha yekire mbuyama ghomutundakure ghodina Jesabela ghomuyi. Gha payire hanu hohengi awa ha kuthire Nyambi, no gha thinenekire hanu ha kughe yitjwandjo yaBaghari, nyambi ghombango. Eliya ne muporofeta shokuru waNyambi mumanako gha ya. Gha yendire gha katongwere Ahabu eshi, “Fumu Nyambi, wa Isragheri, yu na karera nga ne muyumi, mbadi gha kukarako mvura endi mume myaka dhi dhidi paghutho, kutundithako man̂ando ghange.” Kundapero thendi, Nyambi gha tumine diyerenge muditunga dya Isragheri.
Ngambi kemo, Nyambi gha twarire kughutho no kukunga mupikendi Eliya. Gha tumine Eliya kudyango dya Keriti, ghomu nga ka nwanga meyu mu thiviya. Kehe runguro no mathiku – thiku makorova nga mu reteranga nyama no ghuroto gha dye. (Mughuma)

Thiperende 22 Eliya no mudiro wa Nyambi

Thiperende 22 Eliya no mudiro wa Nyambi

1 Hafumu 18:16-46

Mu mwaka ghoghuhatu ghodiyerenge Eliya gha tongwerire Ahabu eshi, ghethe hanu wahe homu Isragheri nawa porofeta hombango waya ha kuyire nyambi ghombango Baghari, kudirundu dya Karimeri. Gha ningire kukwagho eshi, “Ngeshi Fumu Nyambi ne Nyambi, mu mu kuthe no ngeshi Baghari ne nyambi, mu mu kuthe.” Mbadiko oyu gha huthire n̂umbu. Eliya gha rawerire eshi, “Mu karete mapuru mawadi. Po diyo eshi ha tororepo puru ghofotji haporofeta wa Baghari hatende muyambo. Ene mbadi ha tureko mudiro. Name n̂anyi nitende no puru ghumweya. Ene mbadi sho ni tureko mudiro. Ghomwithe dina dya nyambi wenu, ndani name n̂anyi nithe dina dya Fumu Nyambi.” Eliya gha ghambire eshi, “Nyambi ghokuhutha no mudiro, ayene yo Nyambi.” Hanu gha tawithireko Eliya. Diyuwa dyodihe hapristeri hethire nyambi wawo Baghari. Ha kinine kudhinguruka muyambo wawo no ha ku remadhekire hathinda nomamoko. Ene mbadi wa tumbukire mudiro. Eliya naye gha royithire muyambo wendi. Gha ningire hanu ha tere meyu ghomengi pamuyambo wendi nopayikunyi. Popo gha raperire kwaNyambi. Kapupi kamanana mudiro wa tundire kudiwiru nokuwera pamuyambo wa Eliya. Muyambo no meyu yoyiheya ya pire. No hanu wahe ha kugherire eshi. “Fumu Nyambi ne yo Nyambi!” Munyima dhoyinu yi Fumu Nyambi gha tumine mvura no diyerenge dya pwire. (Mughuma)

Thiperende 23 Eliya ghana kuyenda kudiwiru

Thiperende 23 Eliya ghana kuyenda kudiwiru

1 Hafumu 19:1-21; 2 Hafumu 2:1-14

Eliya gha payire hapristeri wa Baghari, yoyishi ha karire hayi. Ndani muna fumu Ahabu Jesabela gha thinenekire kupagha Eliya. Eliya gha yapire, no gha tjirere kudyango dyo kayenda mumamboreya. Podigho gha ka kuwanekerire naNyambi. Munyima dhokughamba nendi Nyambi mbadi gha yapire karo. Shime gha twara kughutho kutongwera hanu eshi ha kughe Nyambi ghofotji ghoghushemwa. Pakarire katughuru ghodina Elisha. Mumarawero gha Nyambi Elisha gha karire mughamweni wa Eliya. Diyuwa dimweya oku wo pakuyenda pofotji, ditemba dyomudiro dyeyire pakatji kawo Nyambi gha shimbire Eliya pa kakundu – kundu. Elisha mbadi ghamu monine karo Eliya. (Mughuma)

Thiperende 24 Eliya na Mosesi pofotji na Jesusi

Thiperende 24 Eliya na Mosesi pofotji na Jesusi

Lukasi 9:28-36

Myaka mathere kwoko nomawadi (700) munyima dha Eliya, apa gha karire Jesusi mukaye, gha shimbire hakathishongero wendi hahatu hayende kudirundu ha ka raperere. Ha Mosesi na Eliya, ha porofeta hawadi ha mu hokokerire. Haka thishongero wa ha hatu ha wa monine hana kurwedhima mughurwedhima. Nyambi gha ghambire mudiwiru eshi, “Oyu ne mwanange, oyu na tororire; mu mu tegherere.” Jesusi gheyire mukaye no ghana fire eshi mu yambo ghomaharwero ghetu no ghawanu wahe awa mba kara mumanako gho mahe. Yoyishi Nyambi gha shana kukomonona hanu waheya kupitera mwa mwanendi Jesusi Kristusi. Jesusi ne mushuturi yu gha vumburire Nyambi mwawafu. Ene Nyambi ne kutapa ngenyu moyo ghororuheya ko wa hoku tegherera n̂ando dhendi, no kumukurupera nokukumithamo yi gha hima.

­­­­­­­­­­­­­Ghuhura

Related information