Leleskani, Vwiyani Ndipu Jani Ndi Umoyu Buku Lanambala 4: Wateweti Waku Chiuta

Outline: Ruth, Samuel, David, Elijah. 24 sections. It has a picture book to go along with the recording.

Script Number:421
भाषा:Tonga: Malawi
Theme:Multiple themes
Audience:General
Style:Monolog
Genre:Bible Story
Sophistication:General
Purpose:Teaching
Bible Quotation:Extensive
Status:Publishable

Script Text

Mazgu Ngakwamba

Malonji abwezi. Chiuta watanja ndi kusunga wosi wo watimutewete ndikumuvwiya iyu. vwiyani tepi iyi po muwona vakujambuwa va mu buku la ntcheti lo nda nambala 4.

Wonani Chakujambuwa Cha Nambala 1: Banja Lithawa Nja

Wonani Chakujambuwa Cha Nambala 1: Banja Lithawa Nja

Ruti 1:1-5

Chiuta wangulenga wanthu wosi kweni iwu wangumunangiya Iyu. Viyo Chiuta wangusankha mtundu wa Yisraeli kuti wamuziwi ndi kumusopa Iyu. Kweni nyengu yinyaki wana wayisraeli wangumunangiya Chiuta ndi wangusopa wangoza nge mitundu yinyaki.Chiuta wanguwatumiya nkhondu ndi nja kuti panyaki wangawere kwaku Iyu. Banja linyaki linguthawiya ku charu cha Moabu alinga kuti wakasaniyi chakurya viyo wanguja kweniko.Banja ili linguja ku Moabu kwa vyaka 10 (chumi) ndipu awuskewu wangufwiya kweniko.Wana wanthulumi wawi wanguto wanthikazi wamu Moabu ndipu wana wanthulumi yawa nawu wangufwa. Viyo Naomi yo wenga choko wanguja ndi akumwana waki wawi. Anganya kumbi imwi mungavwa uli asani mwenga choko cho? Chenga mu charu cha chilendu ndipu murumu ndi wana waki wangufwa. Imwi asani mwe wakhristu mwe nge mzimayi uyu Naomi.Pacharu panu tenge walendo wambura kujariska pakuti pacharu ndiku kwidu cha.Isi tilindizga muzi widu wo we kuchanya.Tingaluwanga cha kuti te pa charu kwa nyengu yimanavi waka kweni tamuja kuchanya kwamuyaya.

Wonani Chakujambuwa Chanambala 2: Naomi Ndi Ruti Wawere Ku Yisraeli

Wonani Chakujambuwa Chanambala 2: Naomi Ndi Ruti Wawere Ku Yisraeli

Ruti 1:6-22

Ruti ndi Olipa ndiwu wenga akumwana waku Naomi. Naomi wanguwanawana kuti wawere ku charu cha kwawu cha Yisraeli ndipu wati wasoka akumwana waki wangumurondo. Naomi wanguti kwaku iwu "weriyani kumuzi mwawana wangu chifukwa uli mutindirondo? Ini ndikabalangaso wana wanthulumi kuti wamutoni cha, Chiuta wandilanga ini." Olipa wangumukupatiya Naomi ndipu wanguweko kweni Ruti wangumukaniliya Naomi wakuti "mungandikanizganga cha ini kuluta namwi. Ko mukalutanga nani ndikengi kweniko, wanthu winu wakawanga wanthu wangu ndipuso Chiuta winu wakawanga Chiuta wangu." Viyo Ruti wanguluta pamoza ndi Naomi ku Betelehemu mu charu cha Yisraeli.

Wonani Chakujambuwa Cha Nambala 3: Ruti Kumunda

Wonani Chakujambuwa Cha Nambala 3: Ruti Kumunda

Ruti 2:1-23

Naomi ndi Ruti wenga wakavu ukongwa ndipu Ruti wanguti kwaku Naomi "ndizomerezgeni ndiluti kumunda nkhapenji chakurya mu vo wanthu wakolola tirigu wawu." Viyo Ruti wanguluta kumunda ko wanthu wakololanga tirigu waku Boazi mweni munda. Ndipu Boazi wati wawona Ruti wangufumba zaku Iyu ndipu wangukambirika kuti Ruti wenga mnthikazi waku Moabu yo wanguza ndi Naomi. Boazi wanguvwa za umampha wo Ruti wanguchitiya Naomi pakumurondo ndipu wanguwona kuti wenga wantchitu wamampha. Boazi wanguti kwaku Ruti " uje ndi wa ntchitu wangu kufikiya po wakamaliziyanga ntchitu yawu"Ndipu wanguwakambiya wantchitu wo kuti wangamuchitiyanga chiheni chechosi cha kweni wamusiriyi chakurya kuti wapingi. Ndi mazulu Ruti wangumukambiya Naomi za lisungu laku Boazi ndipu Naomi wanguti "Chiuta watumbiki Boazi ndi mubali widu mweneku."

Wonani Chakujambuwa Cha Nambala 4: Ruti Ndi Boazi

Wonani Chakujambuwa Cha Nambala 4: Ruti Ndi Boazi

Ruti 3:1-18

Po munthu wafwa mu Yisraeli dangu lenga lakuti muwoli waki watenere kutolana ndi m'bali waki nkhani. Zuwa linyaki Naomi wanguti kwaku Ruti "nditenere kukusaniliya munthulumi kuti uwi ndi nyumba yaku, Boazi ndi m'bali widu ndipu mazulu nganu wapunthengi tirigu. Viyo samba ndi uvwali vakuvwala vaku vakutowa ndipu uluti penipo Iyu wapunthiyengi tirigu yo ndipu ukawoni po wagonengi. Asani wagona iwi ukagoni ku malundi ghaki." Ruti wanguchita uli ndi mo wangukambilikiya ndipu Boazi wati wayuka wanguwona Ruti pafupi ndi malundi ghaki ndipu wanguziwa kuti wakhumbanga kuti wamuto. Viyo Boazi wanguti kwaku Iyu "Ruti ndikakuchitiyanga chosi cho ukhumba pakuti weyosi waziwa kuti we mnthikazi wamampha."

Wonani Chakujambuwa Cha Nambala 5: Boazi Ndi Wara Waku Betelehemu

Wonani Chakujambuwa Cha Nambala 5: Boazi Ndi Wara Waku Betelehemu

Ruti 4:1-22

Boazi wangudana wala tchumi ndikukumana nawu pa chipata cha Betelehemu. Wengapu m'bali munyaki yo wangwenere kuto Ruti kweni pa zuwalo wosi wanguzomerezgana kuti Boazi ndiyu wangwenere kumuto.Pakusimikizga ndi chakuwoniyapu, m'bali yo wanguto sapatu ndikupasa Boazi pakuti ndilu lenga dangu lawu. Viyo Boazi wanguto Ruti kuwa muwoli waki ndipu wangubala mwana ndipu wangumudana Obedi. Viyo Ruti wanguti kwaku Naomi "Chiuta watumbikiki pakuti wapaska iwi muzukuu munthulumi kuti umusungi ndipu mpongozi waku mnthikazi watukwanja iwi ndipu iyu ngwakuruska iwi kuwa ndi wana wankhondi ndi wawi." Abwezi, Ruti wangusaniya chimwemwi chikulu po wangutewete Chiuta ndi wanthu waki. Viyo Obedi ndiyu wenga mbuyaki waku Davidi fumu yikulu ya waYisraeli.

Wonani Chakujambuwa Cha Nambala 6: Maria Ndi Mngelu Waku Chiuta

Wonani Chakujambuwa Cha Nambala 6: Maria Ndi Mngelu Waku Chiuta

Luka 1:26-38, 2:1-7

Yati yakapu mitundu yinandi Chiuta wangusankha mnthikazi mnyaki kuti wamutewete Iyu. Zina la mnthikazi yo ndi Maria ndipu wenga wa mtundu waku Ruti. Maria wenga mwali yo wenga pa ubwezi ndi Yosefi. Kweni wechendatolani mngelu wanguwoneke Maria ndi wanguti "ungopanga cha Maria, wasaniya wezi kwaku Chiuta. Ukapapanga mwana munthulumi ndipu ukamudananga zina laki Yesu. Wakawanga mwana munthulumi waku Chiuta wamachanya." Ndipu Maria wanguti ku mngeluyo " ndini mteweti wa Ambuya kuwi uli ndimo mwakambiya." Viyo mzimu waku Chiuta unguza paku Maria ndi wanguwa ndi nthumbu ndi wangubala mwana munthulumi. Viyo Maria wenga anyina waku Yesu mwana waku Chiuta. Abwezi, wanthu wanandi wavwana cha kuti Yesu wanguwaku kuziya mu mwali yuwa Maria. Kweni ichi ntchinthu chakuti chingachitika cha pacharu panu kweni chinguchitika chifukwa chingutuwa kwaku Chiuta. Kumbukani kuti, ndi Chiuta, palivi chakutondeka.

Wonani Chakujambuwa Cha Nambala 7: Hana Wapemphera Kwaku Chiuta

Wonani Chakujambuwa Cha Nambala 7: Hana Wapemphera Kwaku Chiuta

1 Sam 1:1-20

Ghati ghakapu mazuwa ghaku Ruti, mucharu cha Yisraeli mwenga munthikazi zina laki Hana. Murumi waki wangumwanja ukongwa kweni Hana wenga wakukondwa cha pakuti wengavi mwana nanga njumoza. Chaka chechosi Hana walutanga munyumba yaku Chiuta ku Silo. Wapinganga vyakupereka ndi kotcha sembi kwaku Chiuta. Zuwa linyaki Hana wanguluta ku nyumba yaku Chiuta ndipu wanguti "oh Chiuta wangu, asani mungandikumbuka ndikundipaska mwana munthulumi ndizakumupereka kwinu umoyu waki wosi." Milomu yaku Hana yingwenda po walongoronga ndi Chiuta kweni kuti mazgu ngavwikanga cha. Eli wasembi mula wangumuwona Hana ndipu wangugomezga kuti Hana walowe. Chiuta wanguvwa pempheru laku Hana ndipu yati yakapu nyengu iyi, Hana wangubala mwana munthulumi ndi wangumudana zina laki Samueli. Abwezi, nanga uli Hana wengavi mwana, murumu waki wangumwanja mbwenu. Chiuta watitikambiya mu mazgu yaki kuti wanthurumi wayanjengi wawoli wawu.

Wonani Chakujambuwa Cha Nambala 8: Samueli Mu Nyumba Yaku Chiuta

Wonani Chakujambuwa Cha Nambala 8: Samueli Mu Nyumba Yaku Chiuta

1 Samueli 1:24-28, 2:12-17, 3:1-21

Po Samueli wenga mnyamata, Hana wangumupereka kwaku Chiuta ndipu wanguchimupereka kuti wakajengi ndi Eli ku Silo. Eli wangumusambiza Samueli kutewete Chiut.a Eli wenga ndi wana wanthulumi wawi ndipu wenga wasembiwo wanangiyanga Chiuta viyo Chiuta wangureka kurongoro ndi wanthu kupolote mu wasembi. Zuwa linyaki, po Samueli wenga mu tulu munyumba yaku Chiuta, kwamabuchibuchi Chiuta wangudana zina laki. Penipo Samueli wanguchimbiriya kwaku Eli wakuti "ndaza nde panu ndavwa kudana". Kweni Eli wanguti "ndakudana cha, luta ukagoni" Ivi vinguchitika katatu, ndipu penipo Eli wanguziwa kuti Chiuta ndiyu wadananga Samueli.viyo wangumukambiya kuti wakamuki mwaviyo " longoloni Ambuya mteweti winu watuvwa." Chiuta warongoronga ndi Samueli nyengu zinandi ndipu wanguwa mchimi ndi murongozgi mukuru mu Yisraeli.

Wonani Chakujambuwa Cha Nambala 9: Samueli Wapemphere Wayisraeli

Wonani Chakujambuwa Cha Nambala 9: Samueli Wapemphere Wayisraeli

1 Samueli 4:10-11, 7:2-14

Chiuta wangulanga wana waku Eli wo wangubayika ku nkhondu ndipu penipo wafilisiti wanguthereska waYisraeli. Viyo wafilisiti wangulamuliya wayisraeli vyaka vakujumpha tmachumi ghawi(20). Viyo Samueli wanguti ku wanthu wo "tuzganipu wachiuta wangoza ndipu mutewete Chiuta yija ndipu wakamutaskaninga ku wafilisiti." Wayisraeli wangumuvwiya Samueli ndipu wanguwungana pamoza ndipo Samueli wangupereka sembi kwaku Chiuta ndikuwapemphere wa Yisraeli. Wafilisiti wanguza kwazipumana ndi wayisraeli. Chiuta wangutuma bingu likulu pa wafilisiti ndipu wanguthawa ndi mantha viyo wayisraeli wanguthereska wafilisitiwo.

Wonani Chakujambuwa Cha Nambala 10: Samueli Wapatuwa Sauli Ndi Mafuta

Wonani Chakujambuwa Cha Nambala 10: Samueli Wapatuwa Sauli Ndi Mafuta

1 Sam 8:1- 9, 9:15 - 10:1

Chiuta wenga nadi fumu yawayisraeli ndipu Samueli wawarongozganga iwu m'malu mwaku Chiuta. Kweni wanthu wangukhumba kuti wawi ndi fumu pakuti wa mitundu yinyaki wenga ndi mafumu. Samueli wangukondwa cha ndi ichi ndipu Chiuta wanguti kwaku Samueli "wanthu yawa wakana iwi cha nge fumu kweni wakana Ini. Wavwiyi wanthu wo ndiwapasengi fumu." Kwenga mnyamata zina laki Sauli yo wenga mutali ndi wakutowa. Zuwa linyaki Sauli wanguluta kwachimuwona Samueli. Po Samueli wangumuwona wachiza, Chiuta wanguti kwaku Iyu "uyu ndiyu munthu yo wakeruzganga wanthu wangu." Viyo Samueli wanguto supa ya mafuta ndikudira mafuta pamutu waku Sauli. Ichi chenga chilongoleru kuti wasankhika kuwafumu yawayisraeli ndipu wanguwusa wayisraeli kwa vyaka matchumi ghanayi. Abwezi, ndi Chiuta pe yo wenga mulongozgi yo wayisraeli wakhumbikanga kuwa nayu panyengu yiya kweni iwu wangulimbikiya kuti munthu wawarongozi. Abwezi mungakananga cha kuti Chiuta walongozgi umoyu winu.

Wonani Chakujambuwa Cha Nambala 11: Sauli Wakeruwa Chilezi Cha Munjirira Waku Samueli

Wonani Chakujambuwa Cha Nambala 11: Sauli Wakeruwa Chilezi Cha Munjirira Waku Samueli

1 Samueli 15:1-29

Wameleki wenga wanthu waheni wo wanguwachitiya viheni wayisraeli. Viyo Samueli wanguti kwaku Sauli "vwiya mazgu ngakutuliya kwaku Chiuta, luta ukabayi wameleki wosi ndikunanga vinthu vawu vosi." Chiuta wangovya Sauli ndi wankhondu waki kuthereska wameleki. Kweni Sauli wanguvwiya Chiuta cha, wangusunga nyama zinyaki za wameleki kuti wakapeleki sembi kwaku Chiuta. Ndipuso wanguyibaya cha fumu ya wameleki. Viyo Samueli wanguti kwaku Sauli "pakuti wavwiya Chiuta cha, Chiuta wakukana kuti uwi fumu." Samueli wangusoka kuti wawere kwawu kweni Sauli wangukoreska munjirira waku Samueli ndipu ungukelukiya mu janja laki. Viyo Samueli wanguti " Chiuta wakeluwa ufumu kutuliya kwaku iwi ndipu wapaska munthu munyaki wakuruska iwi." Abwezi Sauli wangupereka sembi kwaku Chiuta kweni wangumuvwiya cha Iyu. Samueli wangumuvwiya ndi kumutewete Chiuta mazuwa ngosi nga umoyu waki. Kuvwiya kukondweska Chiuta kuruska mo sembi zingamukondwereske Iyu.

Wonani Chakujambuw Cha Nambala 12: Yesu Mnyumba Yaku Chiuta

Wonani Chakujambuw Cha Nambala 12: Yesu Mnyumba Yaku Chiuta

Luka 2:41-50

Vyaka vinandi vati vajumphapu kutuliya mu nyengu yaku Samueli, Yesu wenga mwana wabonda mu yisraeli ndipu anyina waki wenga Maria ndi Chiuta awiski. Po Yesu wenga ndi vyaka chumi ndi viwi, wanguluta ku Yerusalemu pamoza ndi Yosefi ndi Maria. Penipo Yesu wangusowa. Maria ndi Yosefi wangwesa kumupenjapenja ndipu ghati ghakapu mazuwa ghatatu wangumusaniya wemu kasopi waku Chiuta ndipu wakambiskananga ndi wasambizi wachiyuda vyaku Chiuta. Viyo Maria wanguti "tasuzgika kukupenjapenja iwi" ndipu Yesu wanguti " nditenere kuwa mu nyumba ya ada wangu." Po Yesu wenga mnyamata nge Samueli, wanguziwa kuti wanguza kwazitewete Chiuta. Yesu wanguza kwazilongozge wanthu kwaku Chiuta pakuti Chiuta ndi fumu yauneneska ndi mrongozgi wa weyosi.

Wonani Chakujambuwa Cha Nambala 13: Davidi Mliska Wakuchenje

Wonani Chakujambuwa Cha Nambala 13: Davidi Mliska Wakuchenje

1 Samueli 16:1-13, 17:34-35

Sauli wenga Fumu yakwamba yawa yisraeli kweni wanguvwiya Chiuta cha viyo Chiuta wangumuleka Sauli ndipu wangumovya cha. Kwenga mnyamata m'mana zina laki Davidi yo waliskanga mbereri za awiski. Iyu wavwananga mwaku Chiuta wamoyu ndipu wenga ndi mantha ndi chakofya cha. Zuwa linyaki nkhalamu yinguko mbereri yimoza. Davidi wangubaya nkhalamu yo ndi kutaska mbereriyo. Davidi wangumba sumu zamampha zakurumba Chiuta. Davidi wenga fumu ndimo Chiuta wakhumbiya kuti tosi tiwiyi. Viyo Chiuta wangusankha Davidi kuwa fumu m'malu mwaku Sauli. Abwezi, Chiuta wawona kawonekeru kakubwaru cha kweni wawona mkati mwa mtima.

Wonani Chakujambuwa Cha Nambala 14: Davidi Ndi Goliati

Wonani Chakujambuwa Cha Nambala 14: Davidi Ndi Goliati

1 Samueli 17:1-54

Penga nkhondu pakati pa wa filisiti ndi wayisraeli. Wafilisiti wenga ndi munthulumi wankhondu zina laki Goliati. Goliati wangudanirizga ku wayisraeli wakuti " sankhani munthu wakuti ndipumani nayu, asani wangandibaya ini, tikawanga akapoluwinu kweni asani ndamubaya mukawanga akapolu widu." Wayisraeli wanguchita mantha ndi Goliati. Pengavi yumoza yo wangukhumba kupumana nayu. Mnyamata Davidi wanguti " ndiyani mfilisiti uyu wambura kopa Chiuta?watenere cha kuwofyeza wankhondu waku Chiuta wamoyu." Davidi wangumopa cha Goliati ndipu Chiuta wangumovya kuti wamubayi goliati. Davidi wanguto legeni ndi mwa ndipu wanguponya mwa wo ndikulasa goliati. Goliati wanguwa pasi ndipu Davidi wangumuchimbiriya ndikuchidumuwa mutu waki ndi lipanga. Viyo wankhondu wayisraeli wanguthereska wafilisiti.

Wonani Chakujambuwa Cha Nambala 15: Sauli Watesa Kubaya Davidi

Wonani Chakujambuwa Cha Nambala 15: Sauli Watesa Kubaya Davidi

1 Samueli 18:6 - 23:29

Pakwamba Sauli wangukondwere ndi Davidi chifukwa wangutaska wayisraeli. Wayisraeli wangwanja Davidi ndipu wenga murongozgi ndi msilikali wanthazi viyo Sauli wangumuchitiya sanji ndipu wangukhumba kumubaya. Zuwa linyaki Davidi wamumbiyanga Sauli sumu ndi gitara laki, penipo mzimu uheni ungusere mwaku Sauli ndipu wanguponya mkondu kwaku Davidi kweni ungumumbwita ndikufikiya pachimati. Nyengu zinandi Sauli wangwesa kuti wabayi Davidi, kweni iyu, mwakovyeka ndi Jonatani ndi wayisraeli wanguthawiya ku bozwa kopa Sauli.

Wonani Chakujambuwa Cha Nambala 16: Davidi Wachitiya Lisungu Sauli

Wonani Chakujambuwa Cha Nambala 16: Davidi Wachitiya Lisungu Sauli

1 Samueli 26:1-25

Sauli ndiwankhondu waki wanguluta ku bozwa kuti wakamuko Davidi. Usiku po weyosi wenga mtulu, Davidi ndi m'bwezi waki Abishayi wanguluta kumalu ko Sauli wangugona mwakacheticheti. Abishayi wangukhumba kubaya Sauli kweni Davidi wangumukanizga wakuti "Chiuta wakalanganga weyosi wakubaya wakusankhika waki." Davidi wanguto mkondu ndi chakumwiya maji cho chenga pafupi ndi Sauli ndipu wati watuwa, wangudanirizga ndikuwayuska wanthu wo wakuti." mwatondeka kuvikiriya fumu yinu awonani mkondu waki uwu." Davidi wanguti kwaku Sauli " nge ndi mo ndatondeke kukubaya iwi, viyo ndimu Chiuta wangu nayu wasungiriya umoyu wangu." Vati vakapu ivi, Sauli wangureka kukhumba kubaya Davidi. Abwezi, Davidi wenga nawu mwawi wakuwezge chiheni kwaku Sauli kweni Chiuta watiti kuwezge nkhwaku Iyu Chiuta. Isi titenere kuwezge chechosi cha.

Wonani Chakujambuwa Cha Nambala 17: Davidi Wawikika Kuwa Fumu

Wonani Chakujambuwa Cha Nambala 17: Davidi Wawikika Kuwa Fumu

1 Samueli 31:1-6; 2 Samueli 5:1-25; 2 Samueli 8:1-15

Wafilisiti wanguzaso kwazichita nkhondu ndi wayisraeli ndipu Sauli ndi mwana waki Jonatani wangufwa ku nkhonduyo. Viyo wanthu wangusankha Davidi kuwa fumu yawu ndipu wangumanga nyumba yaki mu msumba wa Yerusalemu. Chiuta wanguti kwaku Davidi "ndingukutuzgaku kukuliska mbereri ndikukujalika fumu ya wanthu wangu wayisraeli. Ndikakupanganga iwi kuwa munthu wakuruska wanthu wosi wacharu chapasi." Viyo Chiuta wangujalikiska Davidi ndikumupaska nthazi zinandi kuruska warwani wosi wayisraeli.

Wonani Chakujambuwa Cha Nambala 18: Davidi Ndi Batisheba

Wonani Chakujambuwa Cha Nambala 18: Davidi Ndi Batisheba

2 Samueli 11:1 - 12:20

Zuwa linyaki Davidi wayendanga pachanya pa nyumba yaki ndipu wanguwona mthikazi wakutowa wachisamba ndipu Davidi wangumukhumbira mnthikaziyo. Zina la mnthikazi yo lenga Batiseba yo wenga muwoli waku Uriya yumoza wa wala wankhondu waku Davidi. Uliya wenga ku nkhondu viyo Davidi wangutuma mazu ku mula wankhondu kuti wawonesesi kuti Uliya wabayiki ku nkhondu ko. Viyo Davidi wangujitore Batiseba kuwa muwoli waki. Cho Davidi wanguchita chingumukondweska cha Chiuta viyo mwana wakwamba waku Davidi ndi Batiseba wangufwa. Davidi wangupempha Chiuta kuti wamugoweke pa chiheni cho wanguchita. Abwezi uheni kuti utimukondweska cha Chiuta mu nthowa yeyosi. Asani isi tananga titenere kung'anamuka pakulapa ndi kuwere kwaku Chiuta.

Wonani Chakujambuwa Cha Nambala 19: Nyumba Yaku Chiuta

Wonani Chakujambuwa Cha Nambala 19: Nyumba Yaku Chiuta

2 Samueli 7:1-29; 1 Mikoka 22:1-19

Davidi wangunanga pamasu paku Chiuta. Nanga uli wangunanga, kweni wangumwanja mbwenu Chiuta ndipu wangukhumba mbwenu kumutewete Chiuta. Davidi wangukhumba kumumangiya Chiuta nyumba yikuli yakusopiyamu kweni Chiuta wanguti "ukandimangiyanga nyumba cha chifukwa wabaya wanthu wanandi. Ukawanga ndi mwana munthulumi zina laki Solomoni ndiyu wazamukundimangiya nyumba ini. Ndikajarikanga ufumu waki ku nyengu zosi." Davidi wangunozgeke vinthu vinandi va nyumba yaku Chiuta wechendafwi kweni yo wangumanga ndi Solomoni ndipu wangumanga nyumba yakutowa ukongwa. Nyumba iyi yinguto vyaka vinkhondi ndi viwi pakuyimanga.Wa israeli wangusopa Chiuta mu nyumba yo ku Yerusalemu kwa vyaka vinandi ndipu kuti wanguluwa cha zaku Davidi fumu yawu yikulu.

Wonani Chakujambuwa Cha Nambala 20: Yesu Wasikiya Ku Yerusalemu

Wonani Chakujambuwa Cha Nambala 20: Yesu Wasikiya Ku Yerusalemu

Mateyu 21:1-11

Pati papita vyaka vikwi kutuliya pa nyengu yaku Davidi, Yesu wanguwaku ndipu wenga wakutuliya ku mtundu waku Davidi ndi anyina wenga mwali Maria ndi Chiuta awiski. Yesu wenga mteweti mukulu waku Chiuta ndipu wangusambizga wanthu uneneska waku Chiuta. Yesu wanguchita vakuziziswa mwanthazi yaku Chiuta Sauli, Davidi ndi isi tosi te wakwananga pamasu paku Chiuta kweni Yesu wangunanga kekosi cha. Zuwa linyaki Yesu wangukwera mbunda ndikusere mu Yerusalemu ndipu wanthu wangudanirizga wakuti " hosanna wakuzirwa mwana waku Davidi, ngwakutumbikika yo waziya mu zina laku Chiuta." Wanthu wanguchita ichi chifukwa wanguwona kuti Yesu wenga wakuzirwa kuphara Davidi. Iyu ndi fumu yamafumu pacharu chosi chapasi.

Wonani Chakujambuwa Cha Nambala 21: Viyuni Viliska Eliya

Wonani Chakujambuwa Cha Nambala 21: Viyuni Viliska Eliya

1 Wakaronga 16:29; Kufika 17:6

Kutuliya pa nyengu yaku Davidi ndi Solomoni, mafumu nganyaki nganguwusa Yisraeli ndipu yumoza wenga Ahabu yo wenga ndi mthikazi muheni zina laki Yezebeli. Yezebeli wangubaya wanthu wanandi wakurondo Chiuta ndipuso wanguchichizga wanthu wanandi kusopa wangoza wa baala. Eliya wenga mchimi mula waku Chiuta. Iyu wanguluta kwaku Ahabu ndikuti " mu zina laku Chiuta wamoyu wayisraeli, mu vyaka vitatu ivi vituza kukawanga vuwa cha." Viyo Chiuta wanguzisa chilala chikulu mucharu cha yisraeli. Chiuta wangusunga mteweti waki Eliya. Wangumutuma Eliya ku Keliti ko wangumwa maji kutuliya mu msinji ndipu zuwa ndi zuwa viyuni vamupasanga chakurya Eliya.

Wonani Chakujambuwa Cha Nambala 22: Eliya Ndi Motu Waku Chiuta

Wonani Chakujambuwa Cha Nambala 22: Eliya Ndi Motu Waku Chiuta

1 Wakalonga 18:16-39

Mu chaka chachitatu cha chilala, Eliya wangudana Ahabu ndi wanthu wosi ku phiri la Karimeli ndi wanguti kwaku wo "asani Yehova ndi Chiuta mumulondo kweni asani baala ndi Chiuta viyu napu mumurondo." Wanthu wangubaya ng'ombi ndikupereka sembi kwaku baala. Eliya wanguwakambiya waneneri waku baala wakuti "daniyani pa zina laku Chiuta winu ndipu ini nani ndidaniyengi pa zina laku Chiuta wangu. Yo wamukengi ndi motu ndiyu Chiuta." Waneneri waku baala wangudaniya paku chiuta wawu kwa zuwa losi, wanguma ndikuzunguliya sembi, ndikujicheka ndi vimayi kweni pengavi motu. Kumazulu Eliya wangunozga sembi yaki ndi wangudira maji pa guwa la sembi. Wangupemphera kwaku Chiuta ndipu sosonukweni motu unguwa kutuliya kuchanya ndikuwotcha sembi yo pamoza ndi maji. Wanthu wosi wangudanirizga wakuti " Yehova ndiyu Chiuta." Abwezi kumbi ndi Chiuta uli yo mutewete imwi? Kumbi mutewete Yehova pamwenga angoza apanu pasi? Chiuta, Yehova wakhumba isi timutewete iyu yija pe.

Wonani Chakujambuwa Cha Nambala 23: Eliya Wakwera Kuchanya

Wonani Chakujambuwa Cha Nambala 23: Eliya Wakwera Kuchanya

Wakaronga 19:1-21; 2 Wakaronga 2:1-14

Eliya wangubaya wasembi waku baala chifukwa wenga waheni ukongwa. Viyo Yezebeli wanguwofyeza kuti wabayengi Eliya. Eliya wanguchita mantha ndipu wanguthawiya ku bozwa. Chiuta wangukumana nayu kweniko, viyo Eliya wanguchita so mantha cha ndipu wangulutilizga kusambizga wanthu kusopa Chiuta yumoza muneneska. Eliya wangusankha Elisha kuti wamuwovyengi iyu. Zuwa linyaki wachiyenda pamoza, panguza galeta lamotu pakati pawu ndipu Chiuta wanguto Eliya ndikuluta nayu kuchanya pa galeta lamotulo. Viyo Elisha wangumuwona so cha Eliya.

Wonani Chakujambuwa Cha Nambala 24: Eliya, Mosesi Ndi Yesu

Wonani Chakujambuwa Cha Nambala 24: Eliya, Mosesi Ndi Yesu

Luka 9:28-36

Mu nyengu yaku Yesu, Eliya wanguza pa charu chapasi. Zuwa linyaki wanguwoneka pa phiri pamoza ndi Yesu mu unkhankhu wawu. Ndipu Mosesi mchimi mura yo wengaku Eliya wechendaweku nayu wanguwoneka pamoza nawu. Wasambiri watatu waku Yesu, Petro, Yakobi ndi Yohani wanguwawona mu unkhankhu waku Chiuta. Ndipu Chiuta mweneku wangurongoro wakuti " uyu ndiyu mwana wangu, muvwiyeni Iyu.' Abwezi Chiuta ndi wanthu waku Yisraeli watitirongozge kwaku Yesu. Yesu wanguza kwazitaska wanthu wosi, wangufwa nge sembi yidu, kulipa mauheni ngidu ngosi ndipuso wanguyuka so ku wakufwa kupereka umoyu wamuyaya. Abwezi kumbi imwi mwenawu umoyu wamuyaya? Asani muvwana mwaku Yesu ndi vo wakukuchitiyani, uli kuti musoki waka sonu mupempheri. Zomerezani kuti imwi mwe wakwanangiya Chiuta pakuti baibolu lititikambiya kuti tewakwananga. Mumupemphi Yesu Khristu kuti wakugowokiyeni vyakwananga vinu. Mumuwongi Yesu pavo wakukuchitiyani imwi. Mudaneni Iyu kuti waje mu umoyu winu nge Ambuya winu ndipu murondo nthowa zaki nyengu zosi.

Related information