Lais Alekot
![Lais Alekot](https://static.globalrecordings.net/300x200/gn-00.jpg)
ໂຄງຮ່າງ: Short Bible stories from Genesis through the ascension. How to become a follower of Jesus. 40 sections. It has a picture book to go along with the recording.
ໝາຍເລກສະຄຣິບ: 395
ພາສາ: Baikeno
ຫົວຂໍ້: Sin and Satan (Temptation, Deliverance, Light/Darkness, Sin, disobedience, Satan (the devil)); Christ (Jesus, Our Substitute, Resurrection of Jesus, Son of God, Saviour of Sinful Men, Birth of Christ, Ascension, Sacrifice / Atonement, Death of Christ, Life of Christ); Eternal life (Salvation, Eternal / everlasting life, Broad & Narrow Ways); Character of God (Love of God, Holy Spirit, Grace and Mercy, Nature, character of God, Word of God (the Bible), Power of God / Jesus); Living as a Christian (Fruit of the Spirit, Prayer, petition, New Nature, Worship, Witnessing, Church, Christianity, Second Birth, Obedience, No other gods, idols, Peace with God, Leaving old way, begin new way, Forgiveness, Faith, trust, believe in Jesus, Peace (between men), Children of God, Family, relationships, Spiritual Life, Christian values); Life event (Death); Bible timeline (Creation, Law of God, End Time, Second Coming, Gospel, Good News, People of God); Problems (Materialism, Evil Spirits, demons, Fear, Problems, troubles, worries)
ຜູ້ຊົມ: General
ແບບ: Monolog
ປະເພດ: Bible Stories & Teac
ຈຸດປະສົງ: Evangelism
ຄໍາພີໄບເບິນ: Extensive
ສະຖານະ: Publishable
ຂໍ້ຄວາມສະຄຣິບ
Introduction, Part A
![Introduction, Part A](https://static.globalrecordings.net/300x200/gn-00.jpg)
On mee! Ije lais fuafin nabei' onfani lais fuaf alekot he nfele neu ki. In jael Lais Alekot nfee le' neu ok-oke' ki. Mail foto mbi sulat in nanan fe'. Ma mitniin lek-leok olas au utoon ki Lais Alekot ii. Kalu mneen bijool in hanan (musika), ni' mfeije ma mail foot in. Kalu he mine'op neu foot es in a'naon, ma he mtoit atoni, he mimolok antoom neu foto in a'naon, nabei' mi'maet kaset ije fe, natuin hi 'loimin. Nalail ni' hi mfee lalan anfain. Olas ii, mail foto ahuunta fe'.
Foto 1: Lais un-unu
![Foto 1: Lais un-unu](https://static.globalrecordings.net/300x200/gn-01.jpg)
Un-unu [Kejadian] 1:1-5; Sit Pules [Mazmur] 90:2
Un-unu, sa'-saa' fe' kah anbool, Uisneno in moin nain kun. Nalail in nmoe' neno-tunan ma pah-pinan. Olas nane, pah-pinan in nesan fe' kah mamo'et. Olas Uisneno nmoe' nalail pah-pinan ii, In leul meu sine he npiin. Nalail In nmoe' manas, funan, ma fkunin ok-oke'. Uisneno nane, naleok. In nabei' naleko sa-saa' ok-oke'.
Foto 2: Uisneno In Lais Fuafin
![Foto 2: Uisneno In Lais Fuafin](https://static.globalrecordings.net/300x200/gn-02.jpg)
Yesaya 45:18-19; Ibrani 4:12; Sit Pules 19:7-10
Sulat nmui' foto le' ii, esle'' Sulat Knino'. Le' ii, esle'' Uisneno in Lais Fuaf, es natonan kit lasi nmatoom neu Uisneno in nekan ma In a'lomin. Uisneno nloim atoni ok-oke'. Lais fuaf ok-oke' le' au utonan neu ki le' nane, au ait ako Uisneno in Lais Fuafin.
Foto 3: Uisneno nmoe' neno-tunan ma pah-pinan, nok in nesan ok-oke'
![Foto 3: Uisneno nmoe' neno-tunan ma pah-pinan, nok in nesan ok-oke'](https://static.globalrecordings.net/300x200/gn-03.jpg)
Un-unu [Kejadian] 1:1-25
Uisneno nmoe' nani ok-oke'. Kalu In namolok nak, "Musti nmui' meu sine'!" Nalail, meu sine nabei' mbool nain, onle'' In namolok nane. In nmoe' neno-tunan. In nmoe' tasi. Ma In namolok nalail, pah meto mbool nain. Ma nalail msat, In nmoe' le' amointin. Amointin le' nane esle', ika le' anmonin mbi oel, kolo aplelet mbi neno in atnanan, ma kauna' huma'-huma'. Ma in namoolkah, In nekna namlile'. Saa le' es In anmoe' nalali, nane naleok!
Foto 4: Adam nok Eva sin molok
![Foto 4: Adam nok Eva sin molok](https://static.globalrecordings.net/300x200/gn-04.jpg)
Un-unu [Kejadian] 1:26-31, 2:7 - 3:24
Uisneno nmoe' atoni le' ahunut, ma nok bifeel ahunut. In nakanab atoni nane, kana Adam; ma bifeel nane, In kana Eva. Ma In msat anleul sin naleko lek-leok le' In anmoe' nani. Ma In nmoe' bales neu sin he sin antokon. Mbi nane msat, Uisneno ntook nabua nok sin, ma In namlile' he namolok nok sin. Ma sin ok-oke' mafomilin. Uisneno nafetin sin neuk hau fua mbi bale nane, mes In na'eka sin, he kaisa neuk hau uuf es in fuan. Ma haef es, Uisneno in musu es, pah-tuaf sin a'nakaf, neman mbulaol sin mbi bale nane. In naloep Adam nok Eva sin he sin kaisa namtaus Uisneno antein. Nalail sin neuk hau fua le' Usi antaal nani neu sin. Ma onane, sin nasanaben, fun sin ntanhai Uisneno in aplenat. Ma sin mbaetsok nok Uisneno be. Nalail Uisneno nliu napoin sin na'ko bael alekot nane. Mulai na'ko lasi nane, atoni ok-oke' msat nasanab natuin, ma ntanhai Uisneno in aplenat. Ma nalail sin mbaetsok nok Uisneno. Ma oke te, hit mansian tapein susal, tameen ma tmaet.
Foto 5: Kain nok Abel sin uaban
![Foto 5: Kain nok Abel sin uaban](https://static.globalrecordings.net/300x200/gn-05.jpg)
Un-unu 4:1-16; Roma 3:23
Adam nok Eva nahoin anah atoni nua. In tataf, kana Kain, ma in olif, kana Abel. Abel namlileb Uisneno in nekan, mes Kain kaha'. Es onane, in neek-meen neu in olif. Ma nalail mbi neno es, in nteop na'maet in olif Abel. Fun Kain nane'op amle'ut onane, Uisneno nakain ne. Uisneno namaun kalu atoni nmoe' sanab. Le' maneon, Uisneno nloim he mafomil nok kit, hit mansian. Mes fun natuin hit tasanab, muni ii, tbaetsok tok Uisneno be.
Foto 6: Noh nok in abero a'naek
![Foto 6: Noh nok in abero a'naek](https://static.globalrecordings.net/300x200/gn-06.jpg)
Un-unu 6:1-22; 2 Petrus 3:9
Adam nok Eva nahoin anah ma nasuuf nakau namfau. Mes sin ok-oke' nasanbin amsat, ma ntanhai Uisneno in aplenat. Ma sin mo'en amle'ut namfau, tala Uisneno nane'op he nale'un sin, ma oe' a'naek ansaen sin. Alahaa atoni mese es neen natuin Uisneno in a'lomin. Tuaf le' nane, kana Noh. Uisneno natoon neu Noh nak he nmoe' bero 'naek es, he in nabei' napeni' honis na'ko noel ahenut nane. Ma in natuin Uisneno in aplenat, ma olas nane in nmoe' bero nane' loob, tala toon poi toon. Olas in nmoe' bero nane, in natonan atoinin mnak, Uisneno he nfee kasat neu mansian, ma he nsonu' noe 'naek he nsaab sin. Mes sin ka nlois naan fa in molok nane. Sin ka nloim fa he nafetin sin ma'moe' kin.
Foto 7: Noe 'naek
![Foto 7: Noe 'naek](https://static.globalrecordings.net/300x200/gn-07.jpg)
Un-unu 7:1-24
Uisneno neem neik mu'it huma'-huma' neu Noh. Nalail Noh nataam mui'tin nane neu bero 'naek. Ma Noh nok in feel, in anah atoinin tuaf teun, ma nok sin feekin, ntaam neu nuk a'bero 'naek nane in nanan. Sin ok-oke' tuaf faun (8) sin nsaen nabuan nok mui'tin. Nalail Uisneno na'eek eno' nane. Pas nfiin neno hitu te, Uisneno nleul ulna nsaun na'ko neno-tunan, ma nfei oe maat'in he nafloot in nsaen na'ko naijana naan. Oela nsae piut-piut. Tala ntee neno bo'-haa', ma oela nsauk ma ntoeb naan pah-pinan ije ok-oke'. Atoni ok-oke' ka nsaen fa ntaam neu bero 'naek nane, ka nmui' fa fnekan antein. Sin ok-oke' leman ma namnekun. Mes Noh nok in feel ma in anhin napeni' honis, fun natuin sin palsain ma natuin Uisneno In aplenat.
Foto 8: Abraon, Sara, nok Isak sin nu'an
![Foto 8: Abraon, Sara, nok Isak sin nu'an](https://static.globalrecordings.net/300x200/gn-08.jpg)
Un-unu 9:18-19, 17:1-8, 21:1-7; Mateus 1:1-16
Noh in sufa neka' loob namfau nok, tala ntee suku namfau. Noh in suuf es, kana Abraon. In le' nane, neen ma natniin Uisneno. Mbi haef es, Uisneno manta'en nok Abraon, nak, in nok Sara sin sufa lof njael pah a'naek. Abraon nok in feel Sara namnais ne, ma sin nua sin ka nahonin fa anah, mes sin nua sin nhuuk ma'tani' Uisneno in ukan. Abraon napein anah na'ko bifeel bute. In anhes kana, Ismael. In le' nane njael eke neu pah Arabia sin. Ma olas Abraon nok Sara namnasin, sin napenin anah onle' Uisneno nta'en nain neu sin. Sin nakanab anah nane, Isak. Uisneno nta'en he npaek Isak nok in suuf in, he nfee tetus neu pah-pah mbi pah-pinan ii.
Foto 9: Moses, nok Uisneno sin Noina'
![Foto 9: Moses, nok Uisneno sin Noina'](https://static.globalrecordings.net/300x200/gn-09.jpg)
Mpoi na'ko Mesir [Keluaran] 19:1-25, 34:27-32
Isak in suf'in msat namfaunok tala njael pah a'naek. Pah nane, kane Isra'el. In suuf es, kana Moses. Moses nloim neen ma npalsai neu Uisneno. Mbi haef es, Uisneno no'en Moses he nsae neu nu'af es. Uisneno namolok neu Moses mbi nane. In natonan In Ukan neu Moses he in na'noina' in atoinin. Olas Moses nsaun neem na'ko nu'af nane, in na' neik faut matuis le' malula' Uisneno in Ukan. Uisneno nloim he atoni ok-oke' natuin In Ukan.
Foto 10: Ukan Bo’es
![Foto 10: Ukan Bo’es](https://static.globalrecordings.net/300x200/gn-10.jpg)
Mpoi na'ko Mesir 20:1-17
Lalan le' nfee nalail neu Moses nane, ok-oke' naleok. Sikau es natuin lalan nane kin, lof nataim tetus na'ko Uisneno. Uisneno in lalan nane kin, esle': hit musti tamnau, ma toe, ma tneen teu Uisneno mese' es anmaneo. Hit kaisa tmoe le'u he tfua neu sin. Hit kaisa tek ta'moe' Uisneno in kanan. Tmeup mbi neno nee' in nanan, mes mbi neno 'naek tasnaas ta'ko mepu ma tnao t'onen neu Uisneno. Anah musti namtaus ma nabees neu enaf-amaf. Kaisa mi'maet atoni. Kaisa moe' lisan. Kaisa mi'moe atoni. Kaisa mubaak. Kaisa sinmakan atoni bute in a'maus.
Foto 11: Tulu' noes sanat
![Foto 11: Tulu' noes sanat](https://static.globalrecordings.net/300x200/gn-11.jpg)
Nakaf akama in Ukan [Imamat] 4:27-35; Yohanis 1:29; Roma 3:23
Uisneno lais uuf, kalu atoni nasanab, in musti napein ha'muit. Ha'muit nane, else' anmaet. Mes olas Moses fee na'naak atoin Isra'el sin, atoni musti nlool bib domba es he na'tulu' neu Uisneno kalu in tanhai Uisneno in Ukan. Tulu' mafee nane, namnaub atoni nane nak, kalu tanhai Uisneno in Ukan nane namnees onle' nasanab neu Uisneno. Bib domba nane msat, es anfani takaf he nalekan tulu' es lof manenu neis antein. Uisneno nleek nalail he nsonu In Anah Yesus neem neu pah-pinan ii, he tulu' le' nane he nfani sekat neu hit sanat ma penu ok-oke'.
Foto 12: Uisneno nsonu neem atoni he na’soi hit sanat
![Foto 12: Uisneno nsonu neem atoni he na’soi hit sanat](https://static.globalrecordings.net/300x200/gn-12.jpg)
Lukas 1:26-38; Mateus 1:18-25
Ton natuun fauk nfiin, Uisneno nsonu ameput es na'ko neno-tunan, he neik hanaf neu li'an feto es, kana bi Maria. Yusuf nfuut nalail bi Maria. Ana lelu na'ko neno-tunan natoon bi Maria nak, "Ho mumlilab mulail Uisneno in nekan. Lof ho muhoin maan an atoni es. Ho musti mukaan be, neu Yesus." Mes bi Maria natael ee mnak, "Au le' ii, au 'fe' kah 'tuup ubua' ok atoni es! Onme heni au u'aup?" Ameput neno-tunan nane natael ee mnak, "On ii! Lof Uisneno in Smanan Knino' nsaun neem neu ko. Ma onane, Anah le' ho muhonis nane, mane'o-mane'o nameu, fun In le' nane, Uisneno in Anah." Uisneno in Ana lelu' nane msat, naliil on neu Yusuf in amneif. In natonan amnak, "Yusuf! Kaisa mumtau he msao bi Maria, mes anah le' mbi in tain nane, anah na'ko Uisneno in Smanan Knino'. Lof in nahoin naan an atoni mese'. Nakaan be neu Yesus." Kanaf Yesus le' nane, in a'naona nak, "na'soi' atoni". Nalail Yusuf ansao bi Maria, mes sin nua sin ntuup ka nabuan fa tala nahonis Anah nane.
Foto 13: Tonas neu Yesus in neon honis
![Foto 13: Tonas neu Yesus in neon honis](https://static.globalrecordings.net/300x200/gn-13.jpg)
Lukas 2:1-20
Olas nane, leul atoinin he naon nfanin neu sin kuan, he natuinan sensus. Yusuf nok bi Maria naon na'ko kuan Nasaret, naon neu kuan Betlehem. Betlehem nane, Yusuf in eke in kuan. Ntenuk nae, losmen ok-oke' naheun nok tuaf. Es on nane, sin natua nabaal kaha pa'an. Mbi nane, bi Maria nahonis li'ana me'e, kana Yesus. Mbi mabe nane msat, ameput na'ko neno-tunan naliil on neu atuku bibin sin fafauk, le' mbi mabe nane sin mbe'an he mpao-nuuk a'bibi mbi kot kotif. Ameput nane nak, "Au le' ii, oum he utoon lais alekot neu atoni ok-oke'. Mbi neno ii, bifeel mese nahonis Kristus! Kristus nane, Atoni le' Uisneno nleek nani na'ko unu'. In nsonu Ee neem he na'soi' atoni na'ko sin sanat ma penu!" In namolok nalali te, suknaskeek, Uisneno nsonu in ameput na'ko neno-tunan neem namfaunok nhaek nabua nok ne. Ma sin pules Uisneno nok sit. Ma atuku' bibin nane mantotin nak, "Hoi! Eim tnao teu Betlehem, he tnao tail tiit saa es mbool es nae!" Olas sin napeen niit Li'ana nane, sin namolok neu atoni ok-oke' saa le' es sin nenan lasi matoom neu Li'ana nane. Atoni ok-oke' namkakan nenan atoin atukus sin tonas.
Foto 14: Usif Yesus na’noina' atoinin
![Foto 14: Usif Yesus na’noina' atoinin](https://static.globalrecordings.net/300x200/gn-14.jpg)
Lukas 2:41-52; Markus 6:34
Yesus na'nae mbi Yusuf nok bi Maria sin a'nimkin. Olas In toon bo'es am nua, Yusuf nok bi Maria naon nok Ne neu kot Yerusalem. Mbi nae, In namolok nok kuulnin ma 'nakaf-'nakaf sin, matoom neu Uisneno in Aplenat. Mbi nane, In neen ma mantotin nok sin. Sin ok-oke' namkakan, fun natuin In nahiin lasi matoom neu Uisneno. Olas In toon bo'-teun, In nmulai nmeup ma na'noina' matoom neu lasi Uisneno. Atoni namfau npalsai saa' le' es In na'noina', ma sin natuin Ne. Mes atoni namfau msat ka npalsain fa, ma nalail sin ka namtau Se fa.
Foto 15: Usif Yesus nmoe' lasi mkakat huma'-huma'
![Foto 15: Usif Yesus nmoe' lasi mkakat huma'-huma'](https://static.globalrecordings.net/300x200/gn-15.jpg)
Markus 8:22-26, 5:35-43, 6:45-52
Uisneno nfee kuasat 'naek neu Yesus. In nmoe' mkakat huma'-huma'. In naleko atoni amenat namfau. In naleko atoin afolot he nailat niit. In namonib anfain atoin amates. In nakain nautus. In nao natuin oel atuun. Olas atoinin niit takaf-takaf ma mkakat le' In nmoe' nalali, atoni namfau npalsai nak Uisneno es ansoun Ee neem. Sin ok-oke' namkakan nok ok-oke' le' In anmoe' ma na'noina' nani. Ma Usif Yesus nmui' kuasat he nkuil kit amsat.
Foto 16: Usif Yesus nloi sutais
![Foto 16: Usif Yesus nloi sutais](https://static.globalrecordings.net/300x200/gn-16.jpg)
Mateus 27:11-31
Yesus nmoe' lasi alekot namfau, ma atoni namfau natuin Ne. In namnau atoni namfau ma na'noina' Uisneno in a'lomin. In nalekan Uisneno in manekan, ma In nalekan lalan he atoinin nabei' maleok in anfain nok Uisneno. Maski onane msat, mes akama 'nakfin neek-menan Yesus. Sin nekin namanun, ma sin ka npalsain fa nak Uisneno es ansonu Yesus. Sin ka nloim fa he manakun nak, sin le' nane ka nasanbin fa ma ntanhai Uisneno in Ukan. Akama 'nakfin namin lasi moel neu Yesus, nalail sin namin lasi huma'-huma' he nhuuk Yesus. Solaul sin nteop Yesus, ma sin na'sobe neik soeb kalila' neu Yesus In a'nakan. Sin na'aak Ne. Hi mihiin uab alelo, ka? Yesus nane, Uisneno in Anah. Ma In amsat nmui' kuasan he nale'un atoinin ok-oke'. Maski onane msat, In ka malawan fa. Fun In nahiin kalu ije ok-oke', Uisneno es anmoe' nani.
Foto 17: Sin nkuus na’maet Usif Yesus mbi hau nehe
![Foto 17: Sin nkuus na’maet Usif Yesus mbi hau nehe](https://static.globalrecordings.net/300x200/gn-17.jpg)
Markus 15:22-39; 1 Petrus 2:21-24
Solaul sin nkuus Usif Yesus neu hau nehe tuun. Oke te, In na'boin on tala nmaet. Ma sin na'maet atoin abakat sin nua nok Yesus. Olas nane, sin biasa nhuuk paksa atoin amaufinut on nane. Mes na'ko plenat nail nalail Yesus In santin be, mes sin ka napein fa Yesus in sanat nono mese' msat. In a'naon, Yesus nloi le' saa le' in ka nabei' nsutaije fa. Sutais nane, sumak hit es atloije. Mes Yesus es anseek nafani he noes atoni ok-oke sin sanat, lof Uisneno es annoes nain hit santin ok-oke'. Es on nane, au he utoon ki on ii: Hi mpalsai neu baha Usif Yesus Kristus he na'soi' ki.
Foto 18: Usif Yesus monin fain
![Foto 18: Usif Yesus monin fain](https://static.globalrecordings.net/300x200/gn-18.jpg)
Lukas 23:50 - 24:9
Yesus in musun, sin nakat sin nale'un Ne be. Mes nane kan matomaf! Olas Yesus nmaet nalail, Yesus in aok-biakin nataam In aon-nitun neu bol fatu. Sin ntoeb naleko bol fatu nane neik faut bena 'naek es. Mbi in sine, Yesus anmoni nfain na'ko In a'maten. Nmui' bifeel fafauk naon neu bol fatu nane, he naleko Yesus in aon nitun, natuin sin nonot. Ntee nae, suk-naskeek, sin niit fatu nane nahuilon kun. Ma Yesus in aon-nitun amsat ka tite fa mbi nane! Uisneno in ameput nua na'ko neno-tunan napoinok neu sin, nalail sin natonan sin mnak, "Yesus ka es fa ije! In monin fani ee!" Maneo'! Ma onane msat, In naak sin mnak, In mane'o-mane'o Uisneno. Yesus nmoin piut tala ntee olas ii. Lasi maten ka ntoom Ne fa. Pah-tuaf ka nteen Ne fa.
Foto 19: Tomas in nu'an
![Foto 19: Tomas in nu'an](https://static.globalrecordings.net/300x200/gn-19.jpg)
Yohanes 20:19-31
Olas Yesus nmonin fain, In napoinon neu in haefin. In namolok nok sin. In msat naah nabua nok sin. Pal-melu, In napoinon In human neu sin, In haef es ka mbi ne fa nok sin. In kana, Tomas. Olas in aok-biakin namolkin nak Yesus moni nfani ee, in ka npalsai fa. In na'uab nak, "Au iit eik au maatka fe', ma au laab in paap in fe', ni' au 'palsai." Neno klei es anfini te, Yesus napoinon antein neu sin. Mes Tomas amsat mbi nane, onle' hi miit mbi foto ii. Oke te, in leu-tuu' ma nak, "Au 'palsai mane'o-mane'o ije, au Usi'!" Olas in niit neik in matan, ni' Tomas in ka neek nua' fa be. Yesus natae nak, "Ho mpalsai, fun ho miit mulail meik ho matma kum. Ma naleko neisin ntein, atoni le' ka niit Kau, mes sin npalsain."
Foto 20: Usif Yesus ansae on neno-tunan
![Foto 20: Usif Yesus ansae on neno-tunan](https://static.globalrecordings.net/300x200/gn-20.jpg)
Mateus 28:18-20; Haefin sin Lasi 1:1-11; Yohanes 14:1-4
Olas Yesus moni nfain, In napoin In human neu atoni namfau. Sin nail Ee, sin nahiin nanin nak In anmoni nfani ee. Pas na'euk nok in neno bo'-haa, Yesus he nsae nfain on neno-tunan. In meup nalail in mepu ok-oke' be mbi pah-pinan. In leul atoni le' palsaije nak, "Hi musti mnao meu pah-pah he etu ma mitoon he sin onfani Au atoin sin. Mi'noina' sin lek-leok he sin ok-oke natuinan saa le' Au utoon ain neu ki." Ma onane te, Yesus nsae on neno-tunan mbi sin tnaankin. Olas In nakinbon neu nipu, ma nalail sin ka niit anteni fa be. Suk-naskeek ate, Uisneno in ameput neno-tunan sin nua nalile' sin humkin mbinuk nane. Sin natonan Yesus in haefin mnak, In nsae moe on mee, ma he nsanum msat, lof on nane. Olas ii, Yesus es neno-tunan. Mbi nae, In naleko bael alekot neu atoni ok-oke' le' palsai neu Ne. Au he 'toit on ii: Ho on mee? Mloim he mpalsai neu Yesus, ka ai kah? Mloim he mutuin Ne, ka ai kah? Kalu In nfain neem, ho neekma na'teeb he msenu, ka ai kah?
![](https://static.globalrecordings.net/300x200/gn-00.jpg)
On mee! Hit neen ta'ko kaset in banapan bian. Tail teu foto 21 mbi suulta fe'. Ma pasan luikmin he mneen lek-leok olas au utonan ki Lais Alekot ije. Kalu mneen sene nahan (musika), ni' mfeije mail amtein foto esan ntein. Kalu mine'op neu foto in uab, loim he mtoit tuaf es, he mimolok matoom neu foto nane, mimaet kaset ije, natuin hi loimin. Nalail ni' hit tanaoba' teni. Olas ii mail foto 21 fe'.
Foto 21: Hau neeh luman
![Foto 21: Hau neeh luman](https://static.globalrecordings.net/300x200/gn-21.jpg)
1 Petrus 3:18; Galatia 2:20
Ana saa' te Yesus nmaet mbi hau nehe? In ma'moe'na, on ii: Yesus nmaet he na'soi' atoni na'ko sanat nane in ukan. Mes alahaa Yesus kun in ka nmui' fa sanat. Mes In a'maten nane, In es anloi hit santin. Le' hit santin nane, es anmoe kit hit baetsook tok Uisneno. Yesus le' nane, Bib Ana mese le' ka nmui' fa sanat, le' anmaet he na'soi' naan kit na'ko hit sanat. Kalu hit palsai neu Yesus, ma tmanaok hit santin ok-oke', ma nalail tasaitan hit sanat ma penu, ni' Uisneno noes nain hit santin ok-oke'. Foto bian antein, natonan in maneon.
Foto 22: Lalan nua
![Foto 22: Lalan nua](https://static.globalrecordings.net/300x200/gn-22.jpg)
Mateus 7:13-14; Yohanes 3:16; 1 Yohanes 1:9
Yesus na'noina' moe on mee, tmoin piut tok Uisneno. Atoni ok-oke' mulai nmoin natuin lalan alekot. Mes lalan alekot nane, lalan le' naheun nok ale kanan ha'muit. Atoni ok-oke' nao natuin lalan nane, fun hit mansian le' ii tasanab, onle' Adam. Fun hit le' ii Adam in sufa' ma ka'uf! Mes lalan nono' nua nane, lalan ma'lelat. Lalan ma'lelat nane, nahaat atoni neu Uisneno mbi neno-tunan, he atoni nmoin piut nok Uisneno mbi nane. Usif Yesus na'noina' nak, naleko neis hit tnao tatuin laal ma'lelat nane. Mbi foto nane, hi miit hau nehe es ma'hake mbi lalan in ninen. Hau nehe nane, he tnao taam teu laal ma'lelat nane. Hit taam teu laal ma'lelat nane, kalu hit tmanaok hit santin ok-oke', ma tasaitan hit sanat nane kin, ma tpalsai tak Usif Yesus nmaet mbi hau nehe he na'soi' naan kit ta'ko hit sanat. Maski on nane, mes atoni namfau ka nloim fa nasaitan in santin. Sin nakat, laal ma'lelat nane tnao ka nalekof he tnao on neno-tunan. Mes sin nloim he nao natuin laal manuat nane heni' naleok. Mes laal manuat nane nekit tnao teu ai naraka. Ai naraka nane, bale ha'muit le' Uisneno nliu' atoni. Au he 'toit on ii: Laal nua in ikin, ho he mutuin meu le' mee? Kalu he mutuim lalan honis, naleko neis manaok ho sanat meu Uisneno. Kaisa mpao mtein. Esle' ii nai! Mutoon Ne mak, "Aam honi. Au uhiin ak Ama es anaeka neis. Au he manaok eu Ama, fun natuin au santin namfau. Au palsai ak Yesus nmaet mbi hau nehe he na'soi' au sanat. Au 'toit ok Ama he nabei' noes nain au santin ok-oke'. Mnoes mumeu kau au santin ok-oke'. Amsium kau nai onle' Ama Ho anha kum nai. Au he utuin lalan honis le' Usif Yesus le' nalekan nalail neu kau. Kalu au 'maet, au 'loim he 'moin piut ok Ama eu neno-tunan. Obrigado Ama. On naha nane."
Foto 23: Uisneno in anhin
![Foto 23: Uisneno in anhin](https://static.globalrecordings.net/300x200/gn-23.jpg)
Yohanes 6:37-40; Yohanes niit Pah-pinan Fe'u [Wahyu] 7:9
Mbi foto ii, hit tiit Yesus. In mbaiseun atoni na'ko suku-suku, ma pah mee-mee, nok uab huma'-huma'. Sin npalsain neu Ne be, ma In nataim sin he njael Uisneno in anhin. Sin natuin lalan ma'lelat he nsae on neno-tunan. Uisneno in anhin onle' fomili 'naek es. Nmui' amnasit, ma bian munif. Ma a'baut, ma a'naet. Bifeel, ma atoni. Po' muti, ma po' metan, ma po' molo. Ma a'maut, ma a'ma'mu'it. Usif Yesus nsium sin ok-oke', fun sin ok-oke' le' nane, Uisneno in anhin.
Foto 24: Mahonis amfain
![Foto 24: Mahonis amfain](https://static.globalrecordings.net/300x200/gn-24.jpg)
Yohanes 3:1-18; 1 Petrus 1:22-23
Olas Yesus fe' nmamoin mbi pah-pinan ii, nmui' kulu akama es, kana Nikodemus. Mbi maeb es, in nao naim Yesus he ntoit lasi nono' fafauk. Yesus antoit lasi noon es nmoe' in nekna heran. In natoon nak atoni sikau he njael Uisneno in famili, in musti mahonis ma'fani'. Hit taam tatuin hit eina-ama sin famili, olas sin nahonis kit. Mes hit nabei' taam tatuin Uisneno in famili, kalu hit nabei' nahonis anfain kit. Nahonis kit pal-melu nane, hit aok ta'un. Nahonis antein kit neu hae' nua' nane, nane esle' hit asmanak. Honis smanaf nane, Uisneno in Smanan Knino le' anfee le' neu kit hit amonik fe'u. Hit tataim honis fe'u nane, neno nane hit tatuin Uisneno. In le' nane es namonib fe'u kit neu hit mansian. Esle' Uisneno in atoinin.
Foto 25: Uisneno in Smanan Knino
![Foto 25: Uisneno in Smanan Knino](https://static.globalrecordings.net/300x200/gn-25.jpg)
Yohanes 14:15-18; Haefin sin Lasi 2:1-39
Olas Yesus nfain neem na'ko neno-tunan, In nta'en neu In haefin he nsonu Uisneno in Smanan Knino. Olas In nsae nalail on neno-tunan, mbi neno bo'es, In haefin nabua-book mbi bale es. Suk-naskeek, anmui' a'luuf onle' anin slutuf. Oke te, sin napeen niit onle' aija mpiin mbi sin fufkin mese-mese'. Ma sin ok-oke' napeinin kuasat na'ko Uisneno Smanan Knino, namnees onle' Yesus nahiin nani. Olas nane, atoni namfau na'ko pah-pah nabuabok anbi kot Yerusalem. Yesus in haefin napenin kuasat he namolkin neik es-es in molok. Yesus in haefin natoon sin atoinin lais alekot ok-oke', le' Uisneno nmoe' nalali. Ma mbi neno nane msat, toob nifun teun natuin nain Yesus. Muni ii, Uisneno in Smanan Knino natua es atoni ok-oke' le' natuin Yesus. Smanan Knino nane nfee nalail kuasat neu kit he tatuin Yesus in a'noina', ma etu tatoon neu atoni bian amsat neu Yesus.
Foto 26: Moin tbi meu sine
![Foto 26: Moin tbi meu sine](https://static.globalrecordings.net/300x200/gn-26.jpg)
Yohanes 3:19-21, 8:12; 2 Yohanes 1:5-7
Atoni le' fe' kah npalsai neu Yesus, onle' atoni mbi foto ije in naon tuus tatambonah. Nao ntuus tanbonah ma nluin, fun ka nmui' fa meu sine he ntaan ee lalan alekot neu ne. Kalu hit palsai neu Yesus, ma tapeisok teu Ne, hit onle' atoni nao mbi meu sine. Tail lalan alekot nane, naleok! Maski lalna ka naleok. Mes in ka nluin fa, fun natuin in nabei' niit fatu ma naijaan akloif mbi in matan, he in kaisa nastuun. Yesus natoon mnak, "Pah-pinan ije, in meu sinen, es le' Au. Kalu atoni natuin Kau, in ka nmoin fa mbi meis'okan." Yesus In Smanan Knino nalekan lalan manekan neu atoni ok-oke' le' npalsai neu Ne.
Foto 27: Hit nabei' ta’feu’ok
![Foto 27: Hit nabei' ta’feu’ok](https://static.globalrecordings.net/300x200/gn-27.jpg)
Galatia 5:16-26; Efesus 4:22-32; 2 Korintus 5:17
Atoni ok-oke' le' natuin Usif Yesus Kristus, nane atoni moin fe'u. In nloim he natuin Uisneno in Lais Fuaf. In nane'op nane naleok, fun natuin Uisneno noes nain in santin, ma nfee nalail ne monit fe'u. In ka nloim fa nmoe' lasi le' he natoo'ab Uisneno In nekan. Ma on nane msat, tuaf mee le' palsai neu Yesus ka nabei' fa he nmabaan, ka nabei' fa he nabaak, ka nabei' fa nmoe' lisan, ka nfuaf. Smanan Knino nane, nfee kit kuasat he tasaitan ne'op amle'ut, ma tmoe' haa lais alekot, tatuin Uisneno in a'lomin.
Foto 28: Fomili Kristaun sin a'monik
![Foto 28: Fomili Kristaun sin a'monik](https://static.globalrecordings.net/300x200/gn-28.jpg)
Efesus 5:21 - 6:1; 1 Petrus 3:1-9
Kalu ume 'nakaf mese' mane'o-mane'o natuin Yesus in lalan honis, sin moin nekaf mese. Monef namnau in feel. Feel nabees neu monef. Anah neen sin einaf-amaf. Nane es Uisneno in Lasi noina'. Monef nok feel musti mahelab nekaf es nok es. Sin na'noina' anhin he neek Uisneno ma natuin In a'noina'. Ume 'nakaf es le' ntoe neu Uisneno nane, onen nabua ma naon nabua, ma moin nok nekaf mese'.
Foto 29: Mumnau ho musu sin
![Foto 29: Mumnau ho musu sin](https://static.globalrecordings.net/300x200/gn-29.jpg)
Mateus 5:43-48; Lukas 10:25-37
Yesus na'noina' atoni le' natuin Ne, ma nmui' lasi manekat neu atoni ok-oke'. Hit amsat tmui' lasi manekat tok hit musun. Mbi haef es, Yesus namolok lasi matoom neu atoni es le' nao neu kot es. Nok askeken, abaktin neman ntepo ma nsiik naan in a'bael in. Atoni es na'ko suku bian, niit ee mbi lalna in ninen. Nalail in noes atoni nane in pap'in, he ntaap le' pap'in. Nalail in nasaeb atoin apapat nane neu in bikaes atuun. Oke te, in nasae neik atoin apapat nane neiki nao neu kot es. Nalail in nahaat te mbi losmen es. Nalail in baen losmen nane neik in loit akuun, he losmen tuaf nane naleko atoin apapat nane tala naleok. Na'noina' nak hit musti mamnaun es nok es le' nmouf susal, ma ka nabei' fa mabeit in na'ko suku mee, ai in akama saa'.
Foto 30: Yesus nmui' kuasat a'naek
![Foto 30: Yesus nmui' kuasat a'naek](https://static.globalrecordings.net/300x200/gn-30.jpg)
Haefin sin Lasi 19:18-20; Sit Pules 115:1-8; 2 Yohanes 3:8, 4:4
Atoni le' mbi foto le' ii, sin neik sin fuat akuun he nhoot na'ainab. Sin fuan neu pah-tuafin, mes neon fauk ii, sin natuin Yesus be. Atoni mee es natuin Yesus kais ntook nabua nok pah-tuafin, alaut, ai ahiin ba' mol'in. Hit kaisa tamtau tein pah-tuafin, ma kaisa nena tein sin. Uisneno es a'naek aneis na'ko sin, ma na'ko sin A'nakaf. Pah-tuaf sin A'nakaf le' nane, esle' Lusifer. Atoni le' he natuin Yesus musti nasaitan mafutus pah-pinan. Yesus nabei' ampao kit na'ko futus pah-pinan, kalu hit atoti teu Yesus.
Foto 31: Yesus nliu' napoin pah-tuaf amaun in
![Foto 31: Yesus nliu' napoin pah-tuaf amaun in](https://static.globalrecordings.net/300x200/gn-31.jpg)
Markus 5:1-20; Yakobus 4:7
Mbi haef es, atoni es napein pah-tuaf anhuku haef-haef. Ka nmui' fa atoni he nfutu ee neik tain besi, fun pah-tuafin nahelan neis. Mes Yesus nliu' napoin pah-tuafin na'ko atoni nane, nalail sin natuin in lelut. Nalail Yesus nafeit ne, ma pah-tuafin ka mbulalun ntein fa atoni nane be. Oke te, atoni nane nao natoon in familin ma in aok-biakin ok-oke, saa' le' Yesus nmoe' nalali neu ne. Yesus nliu' napoin pah-tuaf na'ko atoni namfau. Ma hit tahiin tak, pah-tuaf nok sin A'nakaf, musti neen natuin Yesus in lelut. Ho lof mjael atoni Kristen, mes nmui' pah-tuaf es anmbulaol ko. Mneen kalu mpalsai mulail neu Usif Yesus ho le' nane Uisneno ini be. Pah-tuaf ka mulalun ntein ko fa be. Mliu' pah-tuafin nane, ma mtoit Usif Yesus paek In kuasan he nliu na'aenab pah-tuafin nane kin. Mtoit atoin apalsaitin he onen ok-oke' nok ko. Kalu hit tmoe' tatuin Usif Yesus in aplenat, In kuasan mpao kit. Ma on nane msat, pah-tuaf in kuasan ka mbulaol kit fa.
Foto 32: Lais matoes es nekin sobal kit
![Foto 32: Lais matoes es nekin sobal kit](https://static.globalrecordings.net/300x200/gn-32.jpg)
Mateus 6:24; 2 Timotius 6:6-10; 2 Korintus 10:13-14
Pah-tuafin nok sin A'nakaf sobal Uisneno in anhin. Sin anloim he hit kaisa tneen ma kaisa tatuin Usif Yesus. Ma sin naloep atoin apalsaitin neik bael amasat huma'-huma', onle': maof tua, narkoba, loit maputu', nasiik atoko', lasi lahi, moe' lisan. Ma sin naloep kit he na'moe kit, he hit tane'op lasi huma'-huma' on nane es anmoe' kit tamlile'. Mes sin le' nane, atoin a'moet sin amaf! Sin he na'moe kit ma he tnao tasaitan Uisneno. Ma hit musti toit tok Uisneno, he hit nabei' lawan sin loep nane. Palsai neu Usif Yesus, ma tatuin Ne he.
Foto 33: Kalu hit tasanab
![Foto 33: Kalu hit tasanab](https://static.globalrecordings.net/300x200/gn-33.jpg)
Lukas 15:11-32; 1 Yohanes 1:7-9
Kalu atoin apalsait nasanab, in lalan alekot on mee? Mbi haef es, Yesus namolok on ii: li'an munif mese' nao nasaitan in amaf. In nao nakloo neu pah es, ma nmoe' lais amle'ut namfau. In nasanab ka haef mese' fa. In nmoe' lasi lahi, ma in na'leun nain in amaf in loitin. Neka' loob, pah nane ntoom amnahas a'naek anteen sin. Li'an munif nane in loitin nale'un nain sin ne, in namnaah ka npulaif fa be. Oke te, in nane'op nak in nasanab neu Uisneno ma neu in amaf. In nekna nsusal. Nalail in nao nfain neu in amaf. Maski nak li'an munif nane nasab namfau, mes in amaf namnau be. Oke te, in amaf nsenu nok neek amlilat. In amsat napnikan nain li'an munif nane in santin. Ma kalu hit tasanab, hit musti nekan susal fe', ma tmanaok hit santin. Ma nalail hit musti tasaitan sanat nane. Ma on nane msat, Uisneno noes nain hit santin, ma In amsat nsium kit, namnees onle' lelo' ama nseun in anah. Yesus olas nane na'uab nak, "Kalu atoni mese es neknan susal, manaok ma nasaitan in santin, ma nfain natuin Usi, ok-oke' le' mbi neno-tunan namlile'."
Foto 34: Kalu tapein menas
![Foto 34: Kalu tapein menas](https://static.globalrecordings.net/300x200/gn-34.jpg)
Filipi 4:6-7; Yakobus 5:13-16
Kalu Uisneno in atoinin namenan, hit musti tmoe' on mee? Palmelu, hit musti t'onen, ma tpalsai tak Uisneno nloim he nmoe' alekot neu kit. Uisneno nabei' naleko atoin amenat, kalu nane tatuin In a'lomin. Uisneno neek kit, ma In es leek saa' le' tapeini. Usi in Smanan Knino nokan kit mbi olas susal ma mbi olas tameen, ma he namnau kit ma naleko kit hit nekak.
Foto 35: Kalu tuaf anmaet
![Foto 35: Kalu tuaf anmaet](https://static.globalrecordings.net/300x200/gn-35.jpg)
1 Tesalonika 4:13-18; Ibrani 2:14-15; Yohanes niit Pahpinan Fe'u [Wahyu] 14:13
Mbi foto ii, hit tiit atoni nsuub sin atoni natuin sin nonot. Mbi neno es, hit amsat lof es-es atmaet. Mes kalu hit atmaet, hit he tjael saa'? Uisneno in Lais Fuaf, esle' Sulat Knino, nak, kalu atoni mese le' anpalsai neu Usif Yesus anmaet, in asmanan nsae nok Usif Yesus neu neno-tunan. Mbi foto ii, nmui' atoni apalsait mese' amates, maski in famili ma in aok-biakin nekin tu'an, mes sin nekin ka nsusal fa. Hit kaisa tamtau maten. Uisneno namnau kit, ma In amsat na'soi' nalail kit hit santini be, ma hit ka tapein fa In ukna be. Mes tuaf le' ka npalsai neu Yesus sin kaisa nafnekan nak sin lof monin piut nok Uisneno mbi neno-tunan. Kaisa mifnekan! Mbi Sulat Knino na'uab nak, atoni le' ka npalsai neu Usif Yesus lof nliu' napoin ne neu bael susal, neu ai naraka ai le' ka nmaet nitaf. Au he toit on ii: kalu ho maet, ho he mtaam meu mee? Mnao moin piut mok Uisneno? Ai, npolin nataam ko neu ai naraka?
Foto 36: Kristus in aon, on fani leta'
![Foto 36: Kristus in aon, on fani leta'](https://static.globalrecordings.net/300x200/gn-36.jpg)
1 Korintus 12:12-31; Efesus 4:11-16; 1 Petrus 4:10
Hit aoki in bian, es-es nok in a'naon. Maatka he nail, luika he neen, feefka nabei' he tamolok ma tiun oel, taah. Le' matak, lukek, fefak, nimak, haek nabua njail aof mese'. Kalu mbi haek napaap ai nameen, aok ok-oke' nameen nain me'u-me'u. Hit tak aof le' nane tak 'Kleij'. Usif Yesus njael onle' aof nane, in A'nakaf. Uisneno mbaet mepu ok-oke' neu atoin apalsait. Leta' onle' etu natoon neu tuaf bian lasi matoom neu Usi, le' nabei' ansii, le' nabei' npein atoni, le' nabei' nataim tamu, le' nabei' na'noina', le' nabei' nfee tulu'. Kalu tuaf es npalsai le' ka nmoe' natuin in mepu, kleija nane in aona napein susal oke'. Atoin apalsait-atoin apalsait musti meup nabua ok-oke' nok alekot, ma ntut-hae neu es am es, ma mubees meu Uisneno.
Foto 37: Tabua-book he toe neu Usi
![Foto 37: Tabua-book he toe neu Usi](https://static.globalrecordings.net/300x200/gn-37.jpg)
Ibrani 10:24-25; 2 Korintus 11:23-34; Kolose 3:15-17
Atoni le' npalsai neu Usif Yesus musti nabua-bok he ntoe neu Uisneno. Neis na'ko nane antein sin nabua-bok natuin sin a'loimkin. Kalu sin nabua-bok, sin nabei' na'noina' na'ko Uisneno in Lais Fuaf, sin onen nabuan, ma sin pules neu Uisneno. Naleko neisin antein kalu sin neik sin fua'-tulu' nfee le neu Uisneno he nasae' Uisneno In mepu mbi pah-pinan ii. Usif Yesus amsat na'noina' atoni le' natuin Ne, he namnau In a'maten. Mbi foto ii, hi nabei mail atoin apalsait ninun ma naah nabuan. Paon le' sin nahan le' nane, he namnaub sin lasi anmatoom neu Yesus in aon mbi olas In anmaet mbi hau nehe. Le' sin ninun nane, he nahineb sin lasi anmatoom neu In naa' le' nat'oop he na'soi' naan sin na'ko sin santin. Hit amsat musti tabua-bok, he teik tamnau Yesus in a'maten nok lalan on nane, tala ntee In anfain neem.
Foto 38: Usif Yesus he neem anfain
![Foto 38: Usif Yesus he neem anfain](https://static.globalrecordings.net/300x200/gn-38.jpg)
Yohanes 14:1-3; 1 Tesalonika 4:13 - 5:4
Mbi neno es, Usif Yesus neman fain na'ko neno-tunan nem neu pah-pinan, onle' In nta'en nani. In lof neem nok asekeken, olas atoni ka nahiin. Nalail, atoin amates sin nfenan na'ko opu he naon nsenu Ee. Ma atoin apalsait le' fe anmamoin nabua-bok amsat nok sin, he na'euk Yesus neu neno-tunan. Nalail, atoin le' anpalsai neu Ne, le' nane nmoin piut nok Ne mbi neno-tunan. Mes atoni le' mee ka palsai neu Yesus, in ka on fa nane. Usi nok atoin apalsaitin naon nasaitan sin on aha nane. Lof Uisneno nfee sin siksa neu sin, he sin nasuspok piut-piut. Hit ka tahiin fa in olas le' Usif Yesus leka le' anfain neem. Hit taloit nok piut, ma hit he tpao Be. Au he toit on ii: Kalu Usif Yesus anfain neem es le' neno ii, ho muloit-noom, ai fe' kah?
Foto 39: Moe' meu lais alekot
![Foto 39: Moe' meu lais alekot](https://static.globalrecordings.net/300x200/gn-39.jpg)
Mateus 7:15-20; Galatia 5:22-23; Yohanes 15:1-8
Hau uuf mbi foto ii, nafua namfau! Kalu hit tatuin Yesus, Uisneno in Smanan Knino mepu mbi kit, he hit tafua' huma'-huma'. Sulat Knino natoon nak, fuaf le' Smanan Knino nmo'e le' nane, esle': moin mamnaun es nok es, neek amlile', tane'op alekot, nmui' lais halan, tha'taen nekak, tmoe lais alekot, moin tmafee' nekaf, ai nekak. Mbi haef Yesus nak, "Au onle' hau uuf es. Hi onle' haub nane in toekin. Kalu hi mafuut mok Kau, ma hi msat mi sona' Kau he Au msat mafuut oki, lof hi msat mifua fuaf namfau." Mes hit tahiin tak toef le' meto' le' nane, lof ka nafuaf. Lel tuaf nane, lof oet nani, nalail anhout nani. Yesus nloim he tuaf le' natuin Ne ba, nafua musti he namfau. Kalu moe on nane, nane namtausan neu Uisneno ma tpein atoni bian amsat.
Foto 40: Tatonan atoni lasi matoom neu Usif Yesus
![Foto 40: Tatonan atoni lasi matoom neu Usif Yesus](https://static.globalrecordings.net/300x200/gn-40.jpg)
Mateus 28:18-20; Haefin sin Lasi 1:8
Usif Yesus na'noina' nak atoni le' natuin Ne, In musti nao natoon tuaf bian lasi matoom neu In. Natoon neu sikau es npalsai neu Yesus lof napein honis na'ko sin santin, na'ko Usi in ukan, ma na'ko a'maten. Kalu ho msat mpalsai neu Usif Yesus, ho msat musti mumnau atoni bian, he sin amsat nahinen Usif Yesus in Lalan Honis Alekot. Uisneno in Smanan Knino lof nahelan ko, ho nekam he ho nabei' mutoon atoni bian Lasi nmatoon neu Ne. Kalu mloim mpaek buuk foto ii, he mutonan neu atoinin. Ma on nane msat, nmui' atoni namfau nahinen lasi le' alekot matoom neu Uisneno ma In An Mone, Yesus Kristus, le' na'soi' naan kit.
On aha nane! Syaloom!