Tara, Puratena & Hupa Embo 3 Ondaarero Ndja Yandjwa I Ndjambi

Omatjiukisiro

Mo minikwa panga randje. Mokasete nga mo kazuva omiano Ndjambi ma yamene otjiwana tjOvaisrael okutaara ovanavita nawo. Ami na ove matu yenene okurihongerako. Tara kotjiperendero tji matji kongorere membo ehoni tji wa zuu ombosiro ndji.

Otjiperendero 1: Josua Ma Ru Kuna Ovaamaleka

Exodus 17:8-13; Matteus 18:19

Otjiwana tjOvaisrael ka tja ri nehi rawo oveni. Iyave ryangaryanga mokuti onguza. Moses ongwa ri omunane wawo. Ndjambi wa toorora omurumendu omutanda wena Josua okurira omunane wotjimbumba tjovita. Ovaamalek va rwisa Ovaisrael; Moses opa tjera nai ku Josua: "Toorora ovarumendu tjiva, nu u karwe nOvaamalek. Muhuka me kakurama kombanda yotjivanda, nokati kaNdjambi meke randje." Ngunda Moses a yere okati kaNdjambi kombanda, Josua nOvaisrael va yenena okutaara Ovaamalek. Nungwari omawoko waMoses ya urwa na ha yenene okuyeyera komurungu. Ovaamalek va uta okutaara otjirwa. Ovarumendu vevari otji va tizira omawoko waMoses kombanda ngaa kongurova, nu Ndjambi wa vatera Josua okutaara Ovaamalek. Ovarumendu imba ovevari va tizira omawoko waMoses kombanda ngunda eye a yere okati kaNdjambi kombanda. Ndjambi u zeuparisa otjiwana tje, owo tji mave kumbu, kokutja ve taare omunavita nawo, Satan. Jesus, Omuna waNdjambi, wa kwizika ovemukongorere: "Aruhe vevari venu tji va zuvasana otjina ngamwa tji mave kumbire, indino Tate meyuru me ve tjitire, orondu vevari poo vetatu tji va worongana mena randje, Ami omunga mbi ri mokati kawo."

Otjiperendero 2: Ozohoze Novihape Vyakanaan

Numeri 13:1 - 14:38

Ndjambi wa kwizika ehi Kanaan okuriyandja kOvaisrael. Eyuva rimwe Ndjambi wa raera Moses ma hinde ovandu okukahora ehi ndo. Moses wa hinda ovanane 12, pu pari na Josua na Kaleb. Kombunda yomayuva 40 va kotoka nave raere Moses nai: "Ete twa kahora ehi ndi ku we tu hinda; nu, tjiri oro re ura nomaihi nouitji wokuti, novihape vyaro ovyo mbi. Nungwari ihi otjiwana tji tja tura mehi ndo otjinamasa, novihuro vyatjo ovinene tjinene, nu vi notumbo tu twa tongama." Kaleb wa mwinisa ovarumendu mbari amave hungire kuna Moses na tja: "Ngatu kaende tu kakambure ehi ndo ete tu nomasa nga yenena okurihuura." Nungwari ovarumendu va tja: "Ayee, indee, katu nomasa nga yenene okukeverwisa; ovandu mbo ve nomasa tjinene pu ete." Owo otji va handjaura ombuze ombi mokati kOvaisrael. Outuku mbwo ovandu va rira nove unaunine ovanaene vaNdjambi, Moses na Aron, nave unaunine Ndjambi wina. Ndjambi wa pindika mena rokutja owo kave vangere okukambura mu Ndjambi nEye we ve ryangisa rukwao ozombura omirongo vine mokuti onguza. Ovaisrael avehe mbe ha ri nongambururo mu Ndjambi va tira mokuti onguza.

Otjiperendero 3: Ovaisrael Mave Kondo Ondondu

Josua 1:1-2, 3:1-17

Moses tja za nokuta, Ndjambi wa urika Josua okurira omunane waIsrael. Ndjambi otja raera nai ku Josua: "Omukarere wandje Moses wa koka. Ove nOvaisrael nambano rirongereye mu konde ondondu Jordan nu mu yende kehi, ndi me ve pe ... Yandipara nu rira ependa! Orondu mo hongorere otjiwana hi kutja tji kakambure ehi ndi ndi mba kwizikira ooihe mukururume kutja me ve pe." Ndjambi wa kwizika okukara puna Josua no tje mu rakiza okukaranonduviro kEmbo Re. Ndjambi otja raera Josua mbi ma sokutjita. Ovapristeri vaIsrael va ri notjikesa tjapeke tjaa tji isanewa kutja otjipwikiro tjomerikutiropamwe. Mu tjo mwa ri ozoveta zaNdjambi nda tjangerwe kombanda yomawe omapapi. Ndjambi we ve rakiza okuhitisa otjipwikiro tjomerikutiropamwe mondondu Jordaan. Ondondu ya ri amai pupu, nungwari ozombaze zovapristeri tji za tuna momeva, omeva otji ya kurama. Ondondu ya kaha nai kurama munda umwe. Ovapristeri va kakurama mokati kondondu, ngunda otjiwana amatji kondo pehi ekukutu okuhita moKanaan. Ndjambi ma vanga okuhonga ami na ove, kutja Ndjambi tji me tu ningire okutjita otjina ngamwa, ete matu sokukara nonduviro na tu kara nondakameno mu Ye, kutja Eye me tu vatere tu tjite ihi tji ma vanga.

Otjiperendero 4: Omawiro Wekuma Rajeriko

Josua 5:13 - 7:1

Ovandu va Israel ve ya okutona ozondanda zawo mene yotjihuro Jeriko. Ndjambi otja raera Josua na tja: "Tara, Ami me yandja Jeriko nombara yatjo novarwe vatjo omapenda mouvara woye. Ove novarwe vovita kondorokeye otjihuro hi otjikando tjimwe eyuva arihe oure womayuva hamboumwe. Ovapristeri hambombari, auhe wawo nga toore ohiva ndja ungurwa ponya yondwezu yondu, nu ngave kayende komurungu wotjipwikiro tjomerikutiropamwe. Ene tji mwa zuu ovapristeri tji mave posisa ombosiro imwe onde yozohiva, indino otjiwana ngatji tjite ondavaerero onene, norumbo rwotjihuro otji maru wire pehi,nomurumendu auhe otji ma kayenda osemba okuhita motjihuro." Josua notjiwana va tjita otja Ndjambi tja heya. Omakuma waJeriko ya wa nu Ovaisrael va kambura otjihuro. Ndjambi wa raera Ovaisrael kutja ave ha toora ngamwa ovina ovihuurwa kuwo oveni. Nungwari omurumendu umwe wena Akan, ka ri nonduviro ku Ndjambi. Matu serekarere ovingi ohunga na ye.

Otjiperendero 5: Ovaisrael Mave Rambwa I Oai

Josua 7:1-12, 6:18-19, 24

Mene ya Jerigo pari otjihuro tjarwe otjinavita tjena Ai. Josua wa sere okukambura otjihuro hi wina, punao otja hinda ozohoze kotjihuro ho. Ozohoze za kotoka naze tja: "Kahepero ovarumendu avehe okuyenda ... orondu ovanavita na ete kavengi. " Josua otja hinda otjimbumba otjititi tjovarwe okukarwisa oAi. Nungwari ovarumendu va Ai va ri nomasa puwo nave taara ovarumendu vaIsrael. Tjiva vOvaisrael va zepewa ngunda imba ovarwe ava taura mokutira okuta. Josua novanene (ovanane) vaIsrael otji va kara noruhoze nave u ondurumika komurungu wotjipwikiro tjomerikutiropamwe tjaMuhona. Nungwari Ndjambi wa raera nai ku Josua: "Sekama wa wire tjike nai ondurumika? Ovaisrael va tura ondjo! Owo va teya omerikutiropamwe ngu va tjita na Ami, nu ngu mbe ve raera okutja ve ye takamise. Owo va toora ovihuurwa tjiva vyaimbi mbya zerikwa, ave vaka nave vi horeke movina vyawo oveni. Ovaisrael opu ve hi nokusora okupirukira ovanavita nawo. "Muhona komeho yanai wa raerere kOvaisrael kutja oviselveri novigoldo mbi va huura mave sokuvitwa mondjuwo Ye. Okuza mehungi ndi matu rihongo kutja Ndjambi u vera imba mbe hi na nduviro ku Ye. Tji tu hi nonduviro ku Ndjambi matu rinyono oveni na tu yeta ouzeu kovandu varwe wina.

Otjiperendero 6: Omberero Yaakan

Josua 7:14-26

Josua wa woronganisa ovandu vaIsrael komurungu waNdjambi. Ndjambi wa raisira Josua kutja Akan ongwa tjita ourunde komurungu waNdjambi. Josua otja raera Akan nai: "Nambano ndji raera ovina mbi wa tjita. O roro okundjihorekera." Akan wa tja: "Tjiri, mba tura ondjo komurungu waMuhona, Ndjambi waIsrael. Mokati kovina, mbi twa huura mba muna mo ombanda yokombanda ombwa yaBabilon, na wina osilveri, notjindimbu tjongoldo. ...notji mba toora ne ke vi sira mehi monganda yandje. Ovarumendu tjiva va kamuna ovina mbi mondanda ye nave vi yeta ku Josua. Akan nomuhoko we auhe otji va zepewa nave nyosiwa pamwe nowini wawo auhe, otja Ndjambi tja heya. Omazenge waNdjambi otji ya yaruka pehi, na raere Josua nai: "O tira nu o mumapara! Toora ovarwe voye vovita avehe, nu u yende koAi. Ami me ku pe outoni kombanda yombara yaAi, notjiwana notjihuro tje nehi re mavi rire evyoye." Ovaisrael otji va zuva ku Muhona nave taara oAi. Ndjambi u muna avihe mbi tu ungura. Katu nokuyenena okuhoreka ovitjitwa vyetu ovivi komurungu we. Nungwari tji tu nomuhihamwatima komaurunde wetu, natu rihepura komurungu waNdjambi (atu serekarere Ndjambi), me tu isire omaurunde wetu ne tu koho komaurunde wetu aehe.

Otjiperendero 7: Eyuva Nomueze Mavi Kurama

Josua 10:1-4

Ovaamori, mbe ha ri ovanahange, nu mba turire moKanaan va uta okutira Ovaisrael. Ozombara ndano ze ya pamwe okutjita ovita kuna Ovaisrael. Nungwari Ndjambi wa tja nai ku Josua: "O ve tire. Ami me ve yandja mouvara woye." Josua otja sekama okukarwa kuna omihoko mbyo, novyo otji vya taura navi tupuka mondiro kOvaisrael. Ndjambi wina wa rokisa ozombawe zombura ozonene, nozo ze ve zepa. Otjirwa tja kara ko oure weyuva arihe. Josua wa kumba nu Ndjambi wa kuramisa eyuva nomueze, ngandu ndi Ovaisrael tjiva havera ovanavita vawo. Kape na pu pa karere eyuva nda sana ngo rukwao. Ndjambi wa vatera Ovaisrael okutaara omihoko avihe omivi vyaKanaan. Nga ku ndino Ndjambi tjingee omunamasa okuvatera avehe mbe novita novina ovihakohoke.

Otjiperendero 8: Josua Ma Hongo Ovandu

Josua 23:1 - 24:31

Josua tja rira omukurundu, wa isana ovandu avehe vaIsrael. We ve zemburukisa ovina avihe ovinene Ndjambi mbya tjitira Ovaisrael, nomuano auhe aruhe eye mbuye ve rwirepo. Josua we ve raera nai: "Kareye nonduviro noutakame amamu tjiti avihe mbya tjangwa mEmbo romatwako waMoses (mbya yandwa i Ndjambi). Tji mamu kara nonduviro ku Ndjambi erike na mu mu karere, ma humburura na ramba omihoko avihe mbya sewa ko ne mu pe ehi ndi Kanaan. Tji mwa isa Ndjambi namu karere oomukuru wovisenginina, indino Eye me mu nyonene mehi ewa Eye nde mu pa. Ndinondi ene ritoororeye oveni kutja mamu karere une." Ndjambi wa yenenisa omakwizikiro we aehe nga tjitire ku Josua na kOvaisrael. We ve pa ehi rawo oveni na havere ovanavita nawo. Omunavita na ete oSatan. Nungwari ete tu nOmunane omunamasa ngwa taara Satan rukuru. Eye ongu ri Muhona Jesus Kristus, Omuna waNdjambi. Matu sokumukarera nokuzuva ku Ye. Avehe mbe mu karera nu mbe mu suvera, Ndjambi we ve kwizikira oruveze meyuru nga aruhe. Ndjambi u yenenisa omakwizikiro we. Kona kuvanga okutoorora ndino okukarera Muhona Jesus?

Otjiperendero 9: Debora Ma Hungirirepo Ndjambi

Ovapangure 4:1-9

Josua tja za nokuta, ovandu vaIsrael va humburuka kokure na Ndjambi. Owo va karera oomukuru wovisenginina wOvakanaan, novanavita nawo otji va kara nouvara kombanda yOvaisrael, nave utu okuveninikiza. Debora ongwa ri omunane wOvaisrael. Eye wa ri omukazendu onongo. Ovandu iyave ya ku ye okupura ondunge, neye e ve vatere okuzengurura ozondjemeno ndu va ri nazo kumwe. Eye iya kondjo okuvekotora ku Ndjambi waIsrael. Eyuva rimwe eye wa isanisa Barak, ngwa ri omunane wotjimbumba tjovita tjaIsrael. Wa tja nai ku ye: "Sekama nu u twaerere ovarumendu 10 000 kondundu Tabor. Sisera notjimbumba tjOvakanaan mave ya okurwa kuna ove. Nungwari Ndjambi me ku pe ondaarero. Barak wa tira. Eye wa tja nai ku Debora: "Ove tji mo i puna ami, ami me i, nungwari tji u hi nakuyenda puna ami, ami wina hi nokuyenda. Debora arire tja ziri, a tja: "Ami me i puna ove. Nungwari ohiviro youtoni movita mbi kai nokurira oyoye, Muhona tjinga ama yandja Sisera meke romukazendu." Panga randje, omundu auhe ma sokukarera Ndjambi omunamuinyo nu wouatjiri. U vatera imba avehe mbe nongambururo mu Ye nu mbe mu karera.

Otjiperendero 10: Ndjambi Ma Vatere Okutaara Sisera

Ovapangure 4:10-16

Debora na Barak va hongorera otjimbumba tjovita tjOvaisrael kondundu Tabor. Sisera nOvakanaan va ya ngo okukarwa kuna Ovaisrael. Sisera wa ri nomatemba 900 nga ungurwa povitenda. Owo ya ungurwa kokutja ye ungurisiwe movita. Nungwari omatemba nga ya ri omazeu komiheke vyondondu Ovaisrael pu vari. Ngunda Barak notjimbumba tjOvaisrael ama tji ryama komurungu okuyekurwa kuna Sisera, Ndjambi otja purukisa otjimbumba tjOvakanaan. Owo va uta okutupuka, novarwe vOvaisrael ve ve teza nave ve zepa nomangaruvyo. Omuano mbwi otjimbumba tjovita tjOvaisrael puna ombatero yaMuhona otji va yenena okutaara otjimbumba tjOvakanaan. Sisera erike ongwa hena indi tja heruka metemba na tupuka.

Otjiperendero 11: Jael Ma Zepa Sisera

Ovapangure 4:17-23

Sisera wa katara mondanda yomukazendu wena Jael. Jael ka ri Omuisrael. (Ovandu ve va ri omapanga wOvakanaan) Jael wa raera Sisera nai: "Hita, muhona wandje, sekira moyandje! O tira ko !" Neye wa hita mondanda ye na katara. We mu pa omaihi okunwa ne mu kutjire notjirare. Sisera wa rara. Jael wa toora okatenda nohamara, na i ku Sisera ngunda a rara, na tonene okatenda nga motjiuru tja Sisera nga tji ka kahita mehi munda mbwina. Kombunda yanao Barak wa kapita mbo ama paha Sisera. Jael we mu isana a tja: "Indjo, mbi kekuraisire omurumendu ngu mo paha." Sisera wa ri a rara mbo, a koka notjiuru tje a tja kakatere mehi.

Otjiperendero 12: Ovaisrael Mave Nyanda Omukandi

Ovapangure 5:1-31

Ya ri Ndjambi ongwa yandjere ouvara kOvaisrael okutaara Ovakanaan mbo. Debora na Barak va umbura eimburiro rokutanga Ndjambi novandu va yoroka pamwe nawo. Owo va ri nenyando okukara nomunane otja Debora. Eye wa ri otja ina kuwo. Owo va tanga Jael, mena rokutja ka tirire Sisera. Ndjambi wa ungurisa ovakazendu mba vevari okuyama Ovaisrael. Panga randje, Ndjambi u ungurisa imba mbe munika aayo ovingundi okutaara imba ovanamasa. Atuhe tu nomunavita omunamasa. Ena re oSatan. Okutaara Satan, Ndjambi we tu hindira Muhona Jesus Kristus okuta kotjikroise. Eye ngo o kamwina omberero yondjo yourunde wetu, wandje nowoye. Ovandu ovavi va zepa Jesus. Ve ripura kutja eye otjingundi. Mamu zemburuka Ovaisrael kutja aave taara ovanavita vawo momasa waNdjambi? Jesus wina wa taara omunavita wovandu avehe, Satan, Eye tja penduka movakoke, wa raisa kutja Eye u nouvara kombanda yourunde nondiro na Satan, opa za okutukutura kouvara wourunde. Ndinondi matu yenene okumuna ondaarero kourunde na kouvara waSatan okuza mu Jesus, mena rokutja Jesus u yandja omuinyo waaruhe ku avehe mbe nongamburiro mu Ye nu mbe nonduviro ku Ye. Ngatu imbure nu tu yoroke nu ngatu rikotamene ku Ndjambi erike wouatjiri.

Omatjiukisiro

Satan u wovisa ovandu. U kondjisa okuwovisa avehe mbe kongorera ondjira yaJesus. Nungwari Ndjambi u tu raisira kutja matu yenene vi okukara nouvara kombanda yaSatan. Puratena nu u rihonge okuza komahongwa okuza mOmbeipela. Tara kotjiperendero tji matji kongerere tji wa zu nokuzuva ombosiro ndji.

Otjiperendero 13: Gideon Nomuengeli Wandjambi

Ovapangure 6:1-24

Ovandu vaIsrael va kara nokuhinonduviro ku Ndjambi nave tjiti ovina ovivi. Mena ranao, Ndjambi ope ve yandjerere kokutja Ovamidian ve kare nouvara kombanda yawo. Ovamidian va nyona ovikunwa vyOvaisrael. Ovaisrael va ura ku Ndjambi kutja me ve vatere. Eyuva rimwe omurumendu wena Gideon wa ri ama tondo ovikokotwa motjitondero. Eye we vi horeka kOvamidian. Omuengeli waNdjambi we rimunikisa ku Gideon na tja: "Muhona u ri puna ove, mbande ombangane! Gideon wa zira na tja: "Muhona tje ri puna ete okutjavi ovina mbi avihe tji mavi tjitwa ku ete? Nungwari Muhona wa zeuparisa Gideon nai: "Nambano kawondje nomasa woye aehe ngu u nawo u kakuture Ovaisrael meke rOvamidian! KawAmi ngu me ku hindi are?" Gideon wa tjivirwe kutja eye omurumendu otjingundi nu ngu hi nombuniko yondengu. Nungwari Omuengeli waNdjambi we mu raera rukwao nai: "Ami me kara puna ove kutja u nyone Ovamidian aayo owo omurumendu umwe uriri." Gideon wa yavarera Omuengeli otjina okurya. Omuengeli wa tuna nokati ke kovikurya nu tjimanga vya uta okupya nOmuengeli wa zenga. Gideon otja tjiwa kutja ya ri Ndjambi ngwa hungire kuna ye. Ndjambi u kwizikira ovakarere ve kutja Eye aruhe ma kara puna wo. Eye u nomasa okutuvatera okutjita ombango Ye, andarire kutja matu rimunu moungundi.

Otjiperendero 14: Gideon Ma Nyono Oomukuru Wovisenginina

Ovapungure 6:25-32

Omuhoko waGideon iyave rikotamene koomikuru vyovisenginina. Oomikuru mbi vya ri Baal na Asera. Ndjambi wa tja nai ku Gideon: "...(twende) u teye otjipunguhiro tjaBaal tji tji ri otjaiho, nu u ke ongunde yomukuru wotjisenginina ndji ri mene yatjo. Tunga otjipunguhiro otjihirona tjaNdjambi Muhona woye." Gideon iya tira ovandu, nungwari wa ri nondira ku Ndjambi. Outuku mbo eye wa toora ovarumendu 10 puna ye nave ka nyona oomikuru vyovisengina. Ovandu va pindikire nave vanga okuzepa Gideon, nungwari ihe omwini ongwe mu vatera na tja: "Tjinangara Baal ongu ri mukuru nge rirwire omuini." Nungwari kapena tji tja tjitwa. Panga randje, Ndjambi omunene pumukuru wotjisenginina ngamwa tji tja ungurwa pomuti poo pomawe poo potjina tjarwe. Ngatu tire nu tu zuve ku Ndjambi erike nu wouatjiri.

Otjiperendero 15: Ovarumendu Vagideon Mave Nu Omeva

Ovapangure 7:1-7

Ovamidian va sekama okukarwa kuna Ovaisrael. Gideon wina wa zikamisa otjimbumba tjovita tjOvaisrael. Nungwari Ndjambi wa tja nai ku Gideon: "Ovarumendu vovita mbe ri pove ovengi tjinene. Ve pundisa koruharwi, nAmi me kevetoororera ove ngo." Gideon opa twarera ovarumendu ve koruharwi okukanwa omeva. Ovengi va wora ozongoro okunwa. Ovarumendu 300 omba nwa omeva nomake wawo amave tjaka otjozombwa. Ndjambi wa tja: "Ami me ku yama nombatero yovurumendu mba 300 mba tjaka omeva neraka."

Otjiperendero 16: Ovarumendu Vagideon Mave Kovere Ondanda Yovamidian

Ovapangure 7:16-25

Otjimbumba tjOvamidian tjovita tja ri otjinene nu iya tji munika tjimuna otjimbumba tjozombahu morutjandja. (Ovapangure 7:12) Notjimbumba otjinene tjozongamero otji va wondja nave tono ozondanda morutjandja. Gideon wa ri novarumendu 300, nungwari Ndjambi we mu raera mbi ma sokutjita. Gideon wa yandja ozohiva novitjuma mu mwa ri ozongangane. Owo va kovera ozondanda zOvamidian outuku. Motjimanga owo va tjita orurokoho orunene. Va posisa ozohiva nave nyanyaura ovitjuma nave ra vaere nai: "Ku Muhona na ku Gideon!" Ovamidian va tira tjinene nave utu okuzepasana. Owo va taura mondira kotjimbumba tjaGideon. Gideon wa hinda ombuze okuisanisa otjimbumba tjovarwe. Owo va teza Ovamidian nave zepa ovandu ovengi. Panga randje, matu yenene okurira ovingundi, nungwari tji matu kara nongamburiro mu Ndjambi na tu zuu ku Ye, Eye me tu vatere kutja tu taare omunavita na ete omunene Satan.

Otjiperendero 17: Simson Ma Zepa Ongeama

Ovapangure 13:1 - 14:19

Kombunda yondiro yaGideon Ovaisrael va humburuka kokure na Ndjambi. Ndjambi opa yandjera Ovafilisti ovindandi okuvevera. Ndjambi wa hinda omunane ne mu pe omasa okuyama Ovaisrael. Ena re wa ri Simson. Oruveze Ombepo Ondjapuke yaNdjambi tji ye ya kombanda yaSimson, eye otjaa kara nomasa. Simson wa suvera omuatje omusuko wOvafilisti; neye otja tja nai ku ihe: "Kendjiningirire arire omukazendu wandje." Simson tja ri mondjira okuyenda kondjuwo yomukazendu, otja wirwa i yongeama. Simson wa ri nomasa na zepa ongeama nomake we porwawo. Eye wa kupa ku nomukazendu wOvafilisti, neye ka karere omutakame ku Simson. Momazenge we Simson wa zepa Ovafilisti 300. Panga randje, omukarere waNdjambi ma sokukupasana nomundu ngwa kambura mu Ndjambi nu ngu nondero yokukaranonduviro ku Ndjambi nokutjita ombango Ye.

Otjiperendero 18: Simson Nozombandje Movikunino Vyovikokotwa

Ovapanejure 15:1-17

Kombunda yoruveze Simson wa yaruka kOvafitisti okukavarura omukazendu we, nungwari ihe wa ri e mu yandja komurumendu warwe. Simson wa tja: "Otjikando hi ami me rire omuhinandjo tji mba tjiti navi kOvafilisti." Eye wa kapata ozombandje 300 ne ze kutu mbari-mbari kumwe komitjira. Eye wa kuta ozongangane pokati komitjira vivari avihe. Eye otja kamburisa ozongangane nda na hingire inda ozombandje movikunino vyOvafilisti. Ovikokotwa vyawo vya nyonwa tjinene i yomuriro. Ovafilisti va tondere Simson nave i ku Juda okukemukambura. Ovaisrael moJuda ve mu pandeka nave mu yandja kOvafilisti. Ombepo yaNdjambi otji ye ya kuye rukwao na i mu zeuparisa. Ovipandeke vya wira pehi okuza komake we. Eye wa toora oruyeo rwokasino na tono narwo ovarumendu 1000 a zepa.

Otjiperendero 19: Ovafilisti Mave Hora Ozondjise Zasimson

Ovapangure 16:4-22

Simson ke na pa kondere ozondjise ze. Ozondjise ze ozonde za ri otjiraisiro tjokutja eye owaNdjambi, Eye ngwe mu pa omasa. Simson wa suvera omukazona warwe wOvafilisti. Ena re wa ri Delila. Eye aruhe wa kondjere okutjiwa otjiundjikwa kongotwe yomasa wa Simson. Komaandero eye wa tokumuraera: "Ngamba kaku na indu kwa tunine otjikonde kotjiuru tjandje, tjinga ambi ri omunasirei waNdjambi okuza kongwatero yandje. Tji mba kondwa ozondjise, indino omasa wandje maye piti." Ongurova imwe, Simson ngunda a rara, Delila wa isana Ovafilisti. Va hora ozondjise zaSimson. Ndjambi otja zapo pu Simson nomasa we ka yaripo rukwao. Ovafilisti va pandeka Simson; ave mu twiya omeho we nave mu ungurisa mondeko. Ozondjise ze za uta okuhapa rukwao.

Otjiperendero 20: Simson Ma Nyono Ovafilisti

Ovapangure 16:23-31

Ovafilisti va kara nenyando enene mena rokutja va patera Simson mondeko, nu ovananne vawo va etera omikiru wawo wovisenginina ombungu hiro. Owo va kapitisa Simson ngwa ri omupotu mondeko okuyekuveyorokisa. Mwa ri otjimbumba tjovandu ovengi mondembeli yamukuru wovisengina nu 3 000 va ri kombanda yomututu. Owo ve mu nyekerera. Simson wa ningira omukarere wOfalilisti okumuyamisa kozongunde zondembeli. Simson otja kumba ku Ndjambi na tja: "Muhona, Ndjambi, arikana rizemburuka na ami, nu ndji pa omasa rukwao otjikando hi uriri. Simson otja nana ozondjunde nomasa we aehe nu nomake we ayeevari nondembeli otji ya wira kombanda yovandu avehe. Simson nOvafilisti avehe va tira pamwe. Ndjambi wa yandja ondaarero kOvafilisti. Mondiro ye, eye wa zepa Ovafilisti ovengi komeho ya imba mba zepa ngunda ari nomwinyo. Panga randje, onomasa waNdjambi uriri otji matu yenene okutaara Satan. Matu yenene okupewa omasa nga tji twa rire ovakongorere vaNdjambi na tu mu karere.

Otjiperendero 21: Jesus Ma Pitisa Ozombepo Ozohakohoke

Lukas 8:26-39

Ozombura ozengi kombunda yo kuhupa kwaGideon na Simson, Jesus wa kara mehi raIsrael. Eyuva rimwe wa hakaena ku nomurumendu ngwa ri nozombepo ozohakohoke. Omurumendu wa wa kozongoro komurungu waJesus a tja: "Jesus Muna waNdjambi wokombandambanda, otjina tji u na tjo na ami otjikena? Ozombepo nda za tjivirwe kutja Jesus omuatje waNdjambi. Jesus wa rakiza ozombepo okupita momurumendu. Ozombepo za hita morupanda rwozombinda nda ri popezu mbo. Ozombinda za tupuka naze raukire morutjene naze kawira momuronga. Azehe za niniwa i yomeva. Ii, nga kozombepo ze nonduviro ku Ye. Embo raNdjambi ri tu raera kutja Jesus wa pewa omasa aehe meyuru na kombanda yehi. Eye u nouvara okupitisa ozombepo ozohakohoke. Ozombepo ozohakohoke ze nomasa omengi, nungwri maze yenene okupitisiwa mena raJesus nomasa wOmbepo Ondjapuke yaNdjambi. Ovandu va muna kutja Jesus u nomasa kombanda yozombepo ozohakohoke na kombanda yaSatan.

Otjiperendero 22: Jesus Ma Ramba Ovandu Ovavi

Lukas 19:45-48, 20:1-20

Eyuva rimwe Jesus wa hita mOndjiiwo yaNdjambi moJerusalem. Ovandu va tanaurira Ondjuwo yaNdjambi mondjuwo yomarandero. Owo iyave randisa ovinamuinyo vyokupunguhwa. Owo iyave munu ovimariva momuano woposyo. Jesus wa ramba ovarandise ovavi novipuka. Eye wa hungira ku novandu ohunga nEmbo raNdjambi na tja: "Kape tjangerwe nai are: Ondjuwo yandje ondjapuke mai isanewa kutja ondjuwo yongumbiro. Nungwari ene mwe i isa po ondimba yovapunde!" Eyuva arihe Jesus wa honga ovandu pOndjuwo yaNdjambi. Nungwari tjiva vovanane vOvajuda va tjinga okumuzepa. Eyuva rimwe va pura nai ku Jesus "Tu raera kutja ovina mbi u vi tjita mouvara watjike."

Otjiperendero 23: Jesus Omunamuinyo Kombunda Yondiro Ye

Matteus 28:16-20

Ovanane vOvajuda mba ri ovanavita vaJesus, va ungurisa ovandu varwe okuzepa Jesus. Jesus wa paperwa komuti wotjikroise. Imbo opa tira. Nungwari kombunda yomayuva yetatu Ndjambi we mu pendura mondiro. Ndjambi wa yandja ouvara ku Jesus okunata ondiro. Eye ke na ku koka rukwao. Ombendukiro Ye movakoke ya ri otjiraisiro tjokutja Eye Omuna waNdjambi. Jesus wa raera kovakongorere nai: "Ami mba pewa ouvara auhe meyuru na kombanda yehi. Otji mwa sokuyenda koviwana avihe ngamwa akuhe mu kaise po ovandu ovahongewa vandje amamu ve papitisa mena raTate nOmuna nOmbepo Ondjapuke. Nu ve hongeye okutakamisa ovina avihe mbi mbe mu raera. Nu, tareye, Ami mbi ri puna ene omayuva aehe nga komaandero wouye." Jesus wa taara ourunde nondiro. Avehe mbe kongorera Jesus, Ndjambi u ve pa Ombepo Ondjapuke, ndji ve vatera okusuvera Ndjambi nokukaranonduviro ku Ye. Jesus otji ma hupu mwete. Omuinyo Jesus mbwe yandja omuinyo omupe waNdjambi. Omuinyo mbwi u karerera nga aruhe, nandarire kutja otutu twetu twa koka. Ondji ri Ombuze Ombwa omundu auhe ndja sokuzuva.

Otjiperendero 24: Omurwe Wovita Wandjambi

Ovaefese 6:10-18

Jesus wa taara Satan nu we tu pa omasa okupirura Satan nozombepo ozohakohoke. Matu yenene okutjita nai apeerike tji twe rirongere kotjirwa, tjimuna omurwe wovita motjiperendero hi. Eye we rirongera okurwa. Rutenga matu sokuhungira ouatjiri natu hupu mouatjiri wEmbo raNdjambi. Matu sokuuzara otjekwamo na tu ryanga nawo apehe pu matu i. Matu sokusuvera ovandu avehe natu tjiti mbi ri ovisemba komurungu waNdjambi. Ovina oviwa mbi tu ripura, a tu vi hungire nokuvitjita, vi tu tjevera kovitjitwa ovivi nomambo omavi otjombanda yotjitenda yomorukoro. Matu sokurirongerera okukaserekarera Ombuze Ombwa yohange mu Jesus ku varwe. Pe ri tjimuna okuzara ozongaku zomurwe wovita. Matji tu vatere kutja tu zikame mokupirukira Satan kutja atu ha wire mozombate ze. Matu sokukambura kutja Jesus wa tira ete novandu avehe okutukutura kouvara waSatan nourunde. Ongamburiro ondji ri oruvao ndji tu tjizikiza ku Satan. Eye u vanga okutuwovisa kutja tu tjite ourunde. U vanga okutunyona. Embo raNdjambi ri tu honga kutja Jesus wa yama omukambure auhe komberero yourunde. Nu ovakambure va tuurunga ondiro okuyenda komuinyo waaruhe. Ondjiviro ndji i tjevera omukambure auhe kutja a ha kara nomaivaiviro momeripura we, otja ekori rotjitenda tji ri tjevera omurwe wovita kotjiuru tje. Embo raNdjambi ondi ri engaruvyo rOmbepo Ondjapuke yaNdjambi. Embo raNdjmbi ouatjiri. Omukambure auhe ma sokuungurisa Embo raNdjambi (Ombeipela) okuzemisa ovizeze vyaSatan. Mu imbi avihe matu sokukumba ku Ndjambi, atu puratene kondunge Ye natu tjiti ihi tji ma vanga. Otji matu sora okukara norupa mondaarero ye kuna Satan, nourunde, nondiro nga aruhe.