unfoldingWord 20 - Dumukake Youni Oweke Yeno
概要: 2 Kings 17; 24-25; 2 Chronicles 36; Ezra 1-10; Nehemiah 1-13
スクリプト番号: 1220
言語: Gadsup
観客: General
目的: Evangelism; Teaching
Features: Bible Stories; Paraphrase Scripture
状態: Approved
スクリプトは、他の言語への翻訳および録音の基本的なガイドラインです。スクリプトは、それぞれの異なる文化や言語で理解しやすく、関連性のあるものにするために、必要に応じて適応させる必要があります。使用される用語や概念の中には、さらに説明が必要な場合や、完全に置き換えたり省略したりする必要がある場合もあります。
スクリプトテキスト
Israiliuc namac Judac maku sanda Koctimi numo andaic muankeno. Yeni Kocti Sainac anukac yenamac andauram wayani ukareno. Kocti wenic profetinuc tiyinkani ore anasi wanta yakacdeni teni, yindurac waecde oweke Koctinkac manteko, yindurac waecdec manteko tire tiyimeni yifonkare iyen awakureno.
Kocti mini maku sanda okan yonewani yenyic namukouc yeman yirureni umacden andanda anan kayeno. Asiriac makuni, anon eran dukemi, mandaic ewayouni weni Israilic makuni mandeni anami kayeno. Asiriauci amucna Israilic iniya waintauc yenyic makusaci yirureni, umacden awokuc andandauc mareweni mini makuyuci ikan tareno.
Asiriauc umacden dafisiruc mandeke manakac deni, onda dukayon iniya waintau namac, indini awoku dukayou namaci yiwikeni Asiriac weno. Kamore Israiliuc ondawa andandauc iye dukayouni, iye waci yironi yeni yeweke Israilic makakac wano.
Asiriauci anamuruci yiwike mare Israiliuyic makakimi dani mikimi wano. Mini anamuru-uci yeweke anankakam makuyuc mandeni anufareni Israilic yere reyouni wamareno. Israiliuc mini anamuru-uc mandeni macyinkeyou yinawasinani Samariauken teno.
Juda makaka wakeyouni onami Kocti Israilic iniya wainta mandeken umantimi yinkemi, wenkimi iyen yindum munkeni iyen awakureni yicnaemi ameno. Afo yeni pani umac koctikac manteni, mandeke Kenaniuyic kocti maci deno. Kocti profetiuc tiyinkani maro yakac oni iyen indeno.
100 orande acnaimpaci Asiriauc Israiliuyic makuni anan karami, Kocti Babiloniuyic kimi Nebukanesam wami Judauc yirinowani tankemi. Babiloniuc eram makuyukami. Judauyic kimi Nebukanesanic yokam waintaic ukena umacden orandeka anom monic wen ayac irani eyon temi.
Kamore orande yankac onimi, Judauyic kimi yewekemi Babiloniuc namaci namuko eno. Afo Babiloniuc oweke yereni Judauc namaci yirueno. Yeni Jerusalemi makuni mandeni, Mam maci anan kareni, umaden awokuc andandauc mini makusin kenawa mam makin kenauc yomare weno.
Judauyic kimi yenamac yirueyon ayaci, Nebukanesanic aruim waintauc mini kin akafandauci wen okankaci yirumam pucdeni yen yifomi okami poteno. Mini acnaimpaci yeni mini kimi awikeni Babiloni dumintimi maroram pukinowani awike weno.
Nebukanesa wenic aruim waintauc namaci, umacden Judac makusinkena iniya waintauci yo yiwikeni Babilonic weni, onda iye dukayouni yere yinkeno, mikac weya anayokinkac yunanuc yokakowani. Mini yamuci Koctinic anasi wanta yirirar ureni yiwike woni Ukackam Maka yerere weno. Minin awicdeni teni, Damukake yonen teno.
Micnen Kocti wenic anasi wanta umantin yenyic numo andakac ena makufa maroremi. Weni iyen yemi ukac yinkenimi awinkemi. Kocti pani wenic anasi wantakac dafisemi, afo wenic profetiukaci wayani demi. Weni ukacdemi temi, 70 orande acnaempaci, yewekeci Ukackenim Makafac winakono.
70 orande acnaimpaci, Sairusic, Pesiauyic kim wemi, Babiloniuc yiruman dacdaremi, Babiloniukaci dafisemi. Make Israiliuc yiwicdeni Jiuken teno, yeni Babilonic iyakaci wano. Kamore Jiuc ayokuruci omare pani Judac makawani indewano.
Pesiauc eran dukeni anasi wanta inkem makusinkena oman yirure mandeke yeyaric ewayafo, awacwac andan uyinkeni ayoku dafisiriwac muyinkewano. Kipakac wami Sairusi ye Pesiauyic kinic emi, weni yemi yakac demi temi, iyec eni Jiu weci yewekec Juda wintekafono, pani Pesiac yerere yewekec Judac winakomino. Weni monikuc waci yimemi, oreya Mam macwac yeweke uwara kowani demi! Afo, 70 orandekac dumukakeyon acnaempaci kamore Jiuc oweke anom makufa Jerusalamici yeno Judaci.
Anasi wanta yeweke Jerusalemic oreni, yeni Mam mac yeweke uwandeni kukuyawaci mini makuni yeuke uwareno. Yemi pani enuni yenkac dafitano, yeni yewekeni oreni Ukackam Makakim weni Mam makimi mantewano.