Kulola, Kupikana Ni Kola Umi: Buku 2
![Kulola, Kupikana Ni Kola Umi: Buku 2](https://static.globalrecordings.net/300x200/lll2-00.jpg)
Schema: Jacob, Joseph, Moses. 24 sections. It has a picture book to go along with the recording.
Numero di Sceneggiatura: 419
Lingua: Yao: Malawi
Tema: Sin and Satan (Deliverance, Judgement, Sin, disobedience); Christ (Jesus, Our Substitute, Sacrifice / Atonement); Eternal life (Salvation); Character of God (Nature, character of God, Word of God (the Bible)); Living as a Christian (Obedience, No other gods, idols, Forgiveness, Faith, trust, believe in Jesus); Bible timeline (Law of God, Gospel, Good News); Problems (Problems, troubles, worries)
Pubblico: General
Stile: Monolog
Genere: Bible Stories & Teac
Scopo: Teaching
Citazione Biblica: Paraphrase
Stato: Publishable
Testo della Sceneggiatura
Part A: Mundu Jwapajika Jwa Mlungu, Yakummanyisya
![Part A: Mundu Jwapajika Jwa Mlungu, Yakummanyisya](https://static.globalrecordings.net/300x200/lll2-00.jpg)
Ŵakunonyelwa acalongo acimjangu, Ana mkumanyililila ya Mlungu Msyesyene Jumpepe? Ngusaka namsalile ya ŵandu ŵane wuŵammanyililaga Mlungu. Alole yiwulili ya buku jaŵili pandaŵi jimkupikanila kaseti. Awunukule kusyeto cikalakalaco naga akupikana.
Citusitusi 1: Mundu Ni Mpwakwe
![Citusitusi 1: Mundu Ni Mpwakwe](https://static.globalrecordings.net/300x200/lll2-01.jpg)
Ndandililo 25:21-34, 27:1-29
Ŵandu ŵaŵili ŵali pacitusitusiŵa akupikangana kusumana. Jwakuŵilanjikwa Esawu jwaliji jwamani mnope. Yakobo jwatelece yakulya yambone. Esawu jamkwete sala mnope ni ŵam'ŵendile Yakobo yakulyayo. Yakobo ŵatite kwa Esawu: "Candanda musumisye upile wenu wandanda kupagwa". Esawu nganasamala upile wakwe. Jwalakwe jwaganisyaga yasala jamcitumbo mwakwe basi. Myoyo jwalakweju jwasumenye ulamusiwo ni yakulya.
Citusitusi 2: Sagamisi Sya Yakobo
![Citusitusi 2: Sagamisi Sya Yakobo](https://static.globalrecordings.net/300x200/lll2-02.jpg)
Ndandililo 28:10-22
Esawu ŵam'ŵenjile Yakobo ni ŵasakaga kum'wulaga, myoyo Yakobo ŵatisile, kutyoka kumangwakweko. Alole pa citusitusi: Yakobo ŵasagamile. Mwam'weni Mlungu kwinani ni malayika galimkutulucila pa cilambo. Mlungu ŵatite kwa Yakobo: „Tinampe mmwejo ni lukosyo lwenu cilambo cele cimgonileci. Yisukulu yenu tiyiciŵa yejinji mnope. Ŵandu wosope ŵapacilambo ni ŵapanyuma penu tacijaliŵa kupitila mwa mmwejo. Cimbe nomwe ni kumlolela kulikose kucimjawuleje nipo tinjim'wucisya soni mcilambo celeci. Ngasinamleka mpaka patinjitenda yinapangene ni mmwejo. Mlungu ŵamanyililaga kuti Yakobo ŵalemwisye, nambo Mlungu ŵasakaga kuti jwalakwe alece yeleyo. Myoyo Mlungu ŵapelece yilanga yakunonyelesya yeleyi.
Citusitusi 3: Yakobo Ni Labani
![Citusitusi 3: Yakobo Ni Labani](https://static.globalrecordings.net/300x200/lll2-03.jpg)
Ndandililo 29:1 - 31:55
Yakobo ŵapite kukutenda masengo kwa mjombagwe Labani. Jwasakaga kulombela mwanace jwa mjombagwe lina lyakwe Lakelo. Jwatesile masengo kwa yaka 7 mpela malipilo gawulombelawo. Papopo Labani ŵamlambwisye Yakobo yamti mpaka jwalombele mwanace jwakwitiwo, jwandanda. Labani ŵamsalile Yakobo kuti atende soni masengo kwa yaka 7 kuti ampate Lakelo. Yakobo ŵamdandawulisye Labani. Jwapatile yinyama yambone yosope kutyocela myilango ya Labani. Nipo Mlungu ŵamsalile kuti: "M'wujile kucilambo ca baba ŵenu ni acalongo acimjenu nipo Une cimbe nomwe."
Citusitusi 4: Yakobo Ŵasimene Ni Mlungu
![Citusitusi 4: Yakobo Ŵasimene Ni Mlungu](https://static.globalrecordings.net/300x200/lll2-04.jpg)
Ndandililo 32:1-32
Yakobo ŵasakaga kuwujila kumangwakwe nambo ŵamjogopaga Esawu ligongo jwalijose jwakusiŵalambusyaga acimijakwe akusatamaga ni woga, kogopa kum'wucisya. Lisiku line cilo alimkuwujila kumangwakwe jwasimene ni Mundu jwine jwakwe. Jwalakweju jwalimbene ni Yakobo cilo cosope. Pilyatandaga lyuŵa kopoka Mundujo jwasokonesye liwunjili lya Yakobo. Papopo Yakobo ŵamanyilile kuti Mundujo jwaliji Mlungu. Yakobo nganapitilisya kumenyana nambo jwatite: "Nganamleka kuti mjawuleje akaŵe munjaliŵasye une." Myoyo Mundu jula jwatite kwa Yakobo, "Lina lyenu ngaliŵa kose soni Yakobo, nambo Isilayeli." "Isilayeli" gopolela kuti "Akulimbana ni Mlungu" Mlungu ŵayice kukumtendekasya Yakobo "Jwawunamiju" wulesi, kuti alece. Isilayeli ŵawujile kwiŵasa lyakwe mumtendele. Jwalakweju jwaŵele sambano nangolo jwa lukosyo lwekulungwa lwa ŵandu ŵakumlambila Mlungu. Acimjangu, wosope tukusamenyanaga ni matala ga Mlungu naga tulimkwalambusya ŵane, nambo Mlungu atumisye Mundu jwampaka kutulekasya yeleyi. Jwalakwejo ni Ambuje Yesu.
Citusitusi 5: Sagamisi Sya Yusufu
![Citusitusi 5: Sagamisi Sya Yusufu](https://static.globalrecordings.net/300x200/lll2-05.jpg)
Ndandililo 37:1-11
Yakobo, jwele Mlungu ŵamtele kuti Isilayeli, jwakwete ŵanace likumi ni ŵaŵili (12). Paŵanace wosopewo juŵamnonyelaga mnope ni Yusufu. Yakobo ŵampele mkanjo wakusalala mnope. Acakulugwe ŵamtendele wiwu Yusufu ligongo lya mkanjowo. Lisiku line cilo Yusufu ŵasagamile. Pakwacele ŵasalile acakulugwe acitiji, "Apikane yisagamile. Twaliji mkutaŵa masace ga tiligu mumgunda, mwacisisimucila lisace lyangu lyajimi mwagoloka, pelepo masace ga ŵanganyamwe gasongene mwakulisyungulila lya une lila ni gajinamile pasi. Acakulugwewo yanyaleye mnope. Ana sagamisi syelesi syaliji mkugopolela kuti acakulugwewo tacimjinamila mpwawojo? Ŵam'ŵenjile Yusufu ni ŵamsosele lipesa lyakuti am'wulaje.
Citusitusi 6: Yusufu Ŵamsumisye
![Citusitusi 6: Yusufu Ŵamsumisye](https://static.globalrecordings.net/300x200/lll2-06.jpg)
Ndandililo 37:12-36
Acakulugwe Yusufu ŵaliji mkulisya yilango kumalo gakutalikangana ni kumusi. Yakobo ŵamsalile Yusufu kuti: "Mjawule mkalole acakulu ŵenu naga alicenene ni yilango ni m'wuje musalile." Acakulugwe paŵam'weni Yusufu alimkwika ŵaganisisye yakum'wulaga. Ŵam'wusile mkanjo wakusalala gala ni ŵam'ŵisile mcisima cacijumu. Nipo jumo jwa ŵanganyawo jwatite: Ana tupate cici naga tukum'wulaga mpwetuju? Kwende tugambe kumsumisya mpela kapolo. Mwandaŵi jijojo ŵamalonda ŵayice, nipo acakulugwe Yusufu ŵamsumisye ni makumi gaŵili ga silifa. Papopo ŵamisile mkanjo ga Yusufu gala miyasi ja mbusi ni ŵajajigalile kwa baba wawo. Yakobo ŵaganisisye kuti Yusufu cim'wuleje cinyama. Ŵamlilile mwawulanda wekulungwa.
Citusitusi 7: Yusufu Ni Jwamkongwe Jwa Ulemwa
![Citusitusi 7: Yusufu Ni Jwamkongwe Jwa Ulemwa](https://static.globalrecordings.net/300x200/lll2-07.jpg)
Ndandililo 39:1-20
Ŵamalonda ŵala ŵamsumisye Yusufu mcilambo ca Iguputo. Jwalakwe jwaŵele kapolo jwa mundu jwine lina lyakwe Potifala. Potifala ŵaliji jwamkulungwa jwakulamula kwa Mwenye jwa kuIguputo. Mlungu ŵaliji ni Yusufu nipo jwaliji ni umanyilisi myosope yiŵatendaga. Mwacitemape ŵam'ŵisile kuŵa jwakulamulila yindu yosope ya mnyumba ja Potifala. Yusufu jwaliji mnyamata jwakusalala. Nipo ŵamkwawo Potifala ŵamkumbilaga Yusufu kuti agone najo. Ŵalinjile kumnyenjelela kuti agone nawo Yusufu. Yusufu ŵamanyilile kuti kweleko kwaliji kulemwa, myoyo ŵamkanile jwamkongwejo. Jwatisile ni jwakopwece mnyumbamo nambo ŵamkwawo Potifala ŵam'wutile mkanjo wakwe. Ŵawujigalile mkanjowo kwa ŵamkwawo ni ŵamconjele Yusufu kuti jwaliji mkwakamulila. Myoyo Potifala ŵamwisile Yusufu muwukayidi.
Citusitusi 8: Yusufu Muwukayidi
![Citusitusi 8: Yusufu Muwukayidi](https://static.globalrecordings.net/300x200/lll2-08.jpg)
Ndandililo 39:20 - 40:23
Mlungu ŵaliji ciŵela ni Yusufu atamose muwukayidi. Mwacitemape Yusufu ŵam'ŵisile kuŵa jwamkulungwa jwa akayidi wosope. Jwamasengo jwa mwenyejo jwakupelecela cakumwa nombe ŵamtaŵile, nombe jwakuteleka yakulya ŵamtaŵile. Cilo cine wosope ŵana ŵaŵili ŵasagamile. Nambo ŵaganisyaga kuti pangali jwampaka alondesye ngopolelo sya sagamisi syawo. Yusufu jwasalile ŵanganyawo kuti: "Ana kugopolela ngaŵa kuli kwa Mlungu? Musalile une sagamisi syenusyo." Myoyo ŵamasengo ŵala ŵamsalile Yusufu: Musagamisi syangu sagamile pana citela cana nyambi sitatu. Najigele yisogosiyo ni kuyiminyila mumgawo wa mcimwene wula ni kumpa mcimwenejo." Yusufu ŵamsalile ngopolelo syakwe acitiji: „Pakumala kwa masiku gatatu mcimwenejo camgopole ni cim'wujile pa masengo genu." Jwakuteleka mikate jula jwamsalile Yusufu nombe sagamisi syakwe, nambo ngopolelo syakwe syaliji syakuti pakumala kwamasiku gatatu tawulajidwe. Jwamasengo jula ŵamgopwele nambo jwakuteleka jula ŵam'wuleje mpela mwele Mlungu ŵalosisye pakumsalila Yusufu, nambo Yusufu ŵatemi mu ukayidi kwayaka yiŵili.
Citusitusi 9: Sagamisi Sya Mcimwene
![Citusitusi 9: Sagamisi Sya Mcimwene](https://static.globalrecordings.net/300x200/lll2-09.jpg)
Ndandililo 41:1-40
Mcimwene jwa ku Iguputo jwasagamile. Ŵasiweni ng'ombe syakwimbala 7 mungulugulu mwa lusulo. Nipo ng'ombe syaganda 7 syakopwece mlusulomo ni kusimila ng'ombe syakwimbala sila. Pangali juŵakombwele kumsalila mcimwenejo ngopolelo syakwe. Kapitawo jwamkulungwa jwamsalile mcimwenejo ya Yusufu. Mcimwenejo ŵam'ŵilasisye Yusufu kuti amkoposye. Yusufu ŵamsalile ngopolelo syakwe sya sagamisisyo ni ŵatite: Mlungu amlocesye mmwejo yele yiciyicitendekwa msogolo muno. Ciyicipagwa yaka 7 yamasika amuno muIguputo. Panyuma pakwe tiyiciyika soni yaka 7 yasala jakogoya. Msose mundu jwa lunda ni mumpe ulamusi wakulolela cilambocino caIguputo. Mumpe jwele mundujo ŵandu ŵakumkamucisya kusonganya yakulya myaka yamasikayi ni kuyisunjila yaka yeleyi yasalayi. Mcimwenejo jwayiŵeni kuti Msimu wa Mlungu waliji mwa Yusufu, papopo ŵatesile Yusufu kuŵa jwakulamulila cilambo cosope caIguputo.
Citusitusi 10: Yusufu Ŵalamulile Mu Iguputo
![Citusitusi 10: Yusufu Ŵalamulile Mu Iguputo](https://static.globalrecordings.net/300x200/lll2-10.jpg)
Ndandililo 41:47 - 42:28
Myaka 7 yamasika yila, Yusufu ŵasunjile yakulya yejinji. Payayice yaka 7 yasala yila, ŵayisumisye yakulyayo kwa ŵandu ŵamu Iguputo. Nombe ku Kanani jayice sala. Myoyo acakulugwe Yusufu nombe ŵayice kukusuma yakulya ku Iguputo. Nganamanyililaga kuti mkulamulila jwakwe waliji Yusufu, nambo jwalakwe jwamanyilile ŵanganyawo. Jwaconjele kuti ŵaliji ŵakulocesya ni ŵaŵisile muwukayidi. Palipapite masiku gatatu ŵatite kwa ŵanganyawo: Une nguti simicisye kuti mkuŵeceta yisyene, mkamjigale mpwenu jwakumalisya ni myice najo akuno. Ŵamsunjile mcimwenegwe jumpepe mnyumba ja akayidi ni ŵalesile ŵanewo kuti akapelece yakulyayo kumaŵasa gawo.
Citusitusi 11: Yusufu Ŵalisasile Kwa Acakulugwe
![Citusitusi 11: Yusufu Ŵalisasile Kwa Acakulugwe](https://static.globalrecordings.net/300x200/lll2-11.jpg)
Ndandililo 43:1 - 45:27
Acakulugwe Yusufu ŵaliji mkogopa kuwujila ku Iguputo nambo mwacitemape yakulya yamalile ni ŵasosaga yine. Myoyo ŵamjigele mpwawo jwamnondi jula Benjamini ni ŵapite kwa Yusufu. Yusufu nganalisalape kuti jwaliji nduni. Ŵasumisye yakulya ni ŵamsalile jumo jwa ŵamasengo ŵakwe kuti awucisye mbiya syawo mmisaku jawo nipo asise cikapu cakwe ca silifa mumsaku wa mpwakwe jwamnondi jula. Ni ŵamtumile jwamasengo jula kuti ŵaconjele kuti amjiŵile jwalakwe. Acakulugwe ŵala ŵajinamile pasi pameso pa Yusufu kuti ampembece mwacanasa, mpela masace ga tiligu gala mu sagamisi sya Yusufu. Yusufu ŵalisile mwakuti nganapakombola soni kulisisa. Ŵasalile jemanjajo kuti: „Une mlongo mjenu, Yusufu, jwele jumŵamsumisye ŵanganyamwe." Ŵamjigele Benjamini nombe ni ŵalisile kwine alikumkumbatilana pampepe ni acakulugwe ŵala. Yusufu ŵapele ŵanganyawo mituka jekulungwa ni ja babagwe, ni ŵasalile kuti akawuje soni ku Iguputo nipo akajigale baba wawo pakwisapo. Acakulugwewo ŵapite kumusi ni ŵasalile baba ŵawo kuti: „Yusufu ali ciŵela umi. Akujilamulila Iguputo josope!"
Citusitusi 12: Yakobo Ni Yusufu Mu Iguputo
![Citusitusi 12: Yakobo Ni Yusufu Mu Iguputo](https://static.globalrecordings.net/300x200/lll2-12.jpg)
Ndandililo 45:28 - 50:26
Jwakulocesya Yakobo jujwaliji jwamkalambale jwajigele liŵasa lyawo lyosope ni yosope yiŵakwete ni ŵapite kukutama kuIguputo. Yakobo paŵam'weni mwanagwe Yusufu, ŵamkumbatile nipo wosope ŵalisile. Panyuma pakwe ŵasajice magasa ŵanace wa Yusufu ni ŵajaliwasisye anyamatawo nipo ŵaŵele ŵakulongolela wakogoya sikati ja mtundu wa Isilayeli. Yakobo ŵawilile ku Iguputo ali jwamkalambale mnope. Pelepo acakulugwe Yusufu ŵaliji mkogopa ligongo lya yakusakala yiŵamtendele Yusufu yila. Nambo Yusufu ŵalile kuti mkasimjogopa. Mwalangene kuti mumbwetece une nambo Mlungu ŵayigalawisye kuŵa yambone kuti ŵasunje ŵandu ŵajinji ni umi. Acimjangu, kwana Jumope kwiwunde jwali jwamkulungwa mnope kupunda Yusufu. Lina lyakwe ni Ambuje Yesu. Nombe nawo ŵasumisye ni silifa makumi gatatu, nipo ŵandu ŵa ulemwa ŵa m'wuleje, nambo Mlungu ŵayigalawisye yele yitendo yakusakalayo kuŵa yambone kwetuwe, ni wosope ŵakukulupilila mwa jwalakwe. Yesu ŵajimwice kuŵawe. Sambano naga tukwiticisya ulemwa wetukwa Mlungu, konjecesya yakusakala yitwaliji mkwatendela acimjetu, Mlungu cacitukululucila sambi syelesi. Ali ŵamacili mnope ŵampaka kutukulupusya wosope ŵamkukulupilila Jwalakwe, nipo ngasalaga kose myipotesi yaciwa cangamala kumoto.
Part B: Yakummanyisya
![Part B: Yakummanyisya](https://static.globalrecordings.net/300x200/lll2-00.jpg)
Ali uli wosope! Sambano citulijiganye ya Mose, jujwaliji jwakulimbangana mwa Ambuje nipo jujwakulupwisye ŵandu ŵa Mlungu kutyocela ku ukapolo mu Iguputo. Yeleyi yikutujiganya soni ya Mesiya jwakwete macili gakwakulupusya ŵandu. Wosope Ŵakumkulupilila Jwalakwe tacilongolelwa kwa Satana ni majini gakwe. Mlole pacitusitusico pamkupikanila kasetiji. Mkosece kulola citusitusi cakuyicisya naga mkupikana kusona kuti.
Citusitusi 13: Kamwanace Mose
![Citusitusi 13: Kamwanace Mose](https://static.globalrecordings.net/300x200/lll2-13.jpg)
Ekisodo 2:1-10
Yakobo jujwaliji soni Isilayeli, jwakwete cisukulu lina lyakwe Mose. Mose ŵapagwile mcilambo ca Iguputo palipapite yaka yejinji panyuma pa Yusufu. Pajele ndaŵiji Ayisilayeli ŵaliji ŵajinji mnope, myoyo mcimwene jwasambano jwa mcilambo ca Iguputo jwaliji mkwajogopa mwakuti jwatandite kwakalalicisya Ayisilayeli mnope. Jwaliji mkwakanganicisya kuti atende masengo mpela acikapolo nipo jwalamwile kuti ŵanace ŵamakandi wosope ŵacilume wa Ayisilayeli awulajidwe. Paŵapali Mose, mamagwe ŵamsisile. Ŵam'ŵisile mlukalala ni ŵamsisile mmatete mungulugulu lusulo. Mlumbugwe, Miliyamu, jwajimi pakuŵandicila kuti amloleje. Mwanace jwa mcimwene jula jwamkongwe jwayice kukoga kulusuloko. Ŵaluweni lukalala lula mujwaliji mwanace jula Mose. Mose Ŵatandite kulila. Mwanace jwa mcimwene jula yamtesisye canasa, myoyo jwaganisisye kuti amsunjeje kuti aŵe jwakwe. Mose ŵakulile kucimbundi kwa Mwenye jula. Mose ŵamjiganyisye ndamo ja ŵandu ŵa ku Iguputo ni jwaliji mundu jwakucimbicikwa mnope.
Citusitusi 14: Mose Pewukutu Lya Moto
![Citusitusi 14: Mose Pewukutu Lya Moto](https://static.globalrecordings.net/300x200/lll2-14.jpg)
Ekisodo 2:11 - 4:17
Lisiku line Mose ali akusile ŵam'weni mundu jwaciIguputo ali kumputa kapolo jwaciisilayeli. Mose ŵasakaga kuti ŵakamucisye ŵandu ŵakwe, myoyo ŵam'wuleje jwaciIguputo jula nambo panyuma pakwe Mose jwatisile kucimbundi kwa mwenye kula. Kwamasiku 40 Mose ŵatamaga mcipululu, malo gakuŵilangwa Sinayi. Kweleko ŵaciweni cindu cine cacilendo. Ŵaliweni liwukutu lili mkukolela moto, nambo nganilipya kose. Mlungu ŵaŵecete ni Mose kupitila mwiwukutulyo acitiji: „Nakuweni kulagasikwa kwa ŵandu ŵangu. Ngumtumisya mmwejo kwa mcimwene jwa cilambo ca Iguputo kuti mkalongole ŵandu ŵangu pakopoka mcilambo cakwe."
Citusitusi 15: Mose Ŵawujile Kwa Mcimwene Jula
![Citusitusi 15: Mose Ŵawujile Kwa Mcimwene Jula](https://static.globalrecordings.net/300x200/lll2-15.jpg)
Ekisodo 3:11 - 10:29
Mose ŵaliji mkogopa nambo ŵamkulupilile Mlungu ni ŵawujile ku Iguputo. Mlongo mjakwe Aloni, jwalongene nawo. Paŵayice ŵatite kwamcimwenejo: "Ambuje, Mlungu jwa Ayisilayeli, akuti, Mwalece ŵandu ŵangu ajawuleje" ligongo akusaka kuti amlambileje Jwalakwe mcipululu. Nambo mcimwenejo jwatite: "Ngangwamanyilila Ambujewo nipo nganaleka Ayisilayeli kuti ajawuleje." Pa ŵaŵecete yeleyi mcimwene jula jwapundile kwakalalisya mnope. Mlungu ŵatite kwa Mose"..... Ayiguputo camanyilile kuti Une ndili Ambuje, pa cindambasukule mkono ŵangu pakulimbana ni Iguputo ni kwakoposya Ayisilayeli. Mlungu ŵatite soni: "Naga Falawo amtende kuti mtende yakusimonjesya, ni mumsalile Aloni kuti mjigale ndodo jenu ni mjiponye pasi pameso pa Falawo nipo cijigalawuka kuŵa lijoka." Aloni ŵapikanile, nipo mcimwenejo ŵagaweni macili ga Mlungu nambo nganiŵaleka kuti ajawuleje. Myoyo Mlungu ŵatesile yakusimonjesya yejinji pakulimbana ni Ayiguputo. Ŵagagalawisye mesi gosope ga mcilambo ca Iguputo kuŵa miyasi myoyo Ayiguputo wosope ŵasosile ca mlusulo lwa Nayilo kuti apate mesi gakumwa. Ŵayice ni yula, membe, sombe ni matalila kwa Ayiguputo. Ŵamasenga nombe ŵalinjile kuyisyasya yine mwayakusimonjesyayo kupitila mkulambusya kwawo nambo Ambuje ŵatesile yakusimonjesya yine yejinji yakuti ŵamasengowo nganapakombola kuyitenda. Pakatema kakoko Mlungu ŵamtetele mcimwenejo watite: "Une ndili jwakulimbangana jwamacili kupunda Ayiguputo ŵamasenga. Nambope nganakunda kumpikanila Mlungu nipo nganiŵaleka Ayisilayeli kuti ajawuleje.
Citusitusi 16: Ngondolo Ji Wajipelece Mbopesi
![Citusitusi 16: Ngondolo Ji Wajipelece Mbopesi](https://static.globalrecordings.net/300x200/lll2-16.jpg)
Ekisodo 12:1-36
Mlungu ŵaŵecete soni ni Mose acitiji: "Mwasalile ŵandu wa Isilayeli ajigale ngondolo liŵasa lililyose ni ajiwulaje. Akwenela kujigala miyasi jine ni kujipakasya pacanya pa milango jawo. Tinjende mcilambo cosope ca Iguputo. Cimbulaje mwanacejwandanda kupagwa jwalijose. Naga tinajiwone miyasi pamilango jenu, tinjigamba kupita nipo nganinjonanga kose." Mlungu ŵatesile mpela muŵaŵecetele. Ŵanace wosope wandanda kupagwa wa aIguputo ŵawile. Nambo pangali mwanace jwalijose jwa Ayisilayeli jwakwitiwo jujwawile. Nipo mcimwene jula jwatumisye mtenga kwa Mose wakuti: "Mjawuleje! mmwejo ni Ayisilayeli, mwalece ŵandu ŵangu. Mjawule mkalambileje Ambuje mpela yatite pakum'ŵenda."
Citusitusi 17: Komboka Panyasa
![Citusitusi 17: Komboka Panyasa](https://static.globalrecordings.net/300x200/lll2-17.jpg)
Ekisodo 13:17 - 14:31
Jwakulochesya Mose ŵalongolele Ayisilayeli pakopoka mu Iguputo. Mlungu ŵajendaga panyuma pawo mpela liwunde kuti lyape m'bulili, nambo soni moto cilo kuti lyamulicileje ŵanganyawo. Nambo Ayiguputo yasakalisye mnope ligongo ŵajasile acikapolo ŵawo. Mcimwene jula pampepe ni ŵangondo ŵakwe wosope ŵakuyiye kuti ŵawusye ŵanganyawo. Ayisilayeli ŵayice panyasa jekulungwa jangaŵa mkombokanya. Ayiguputo ŵaliji panyuma pawo. Ayisilayeli ŵaliji ŵangalilipesa lyampaka kutilila. Mose ŵasalile kuti : „Mkasimjogopa! Ciyiwone yicajile Mlungu pakumkulupusya ŵanganyamwe." Mlungu ŵagagaŵenye mesi ni ŵawugwile litala sikati janyasa nipo Ayisilayeli ŵajombwece pasi palipapajumu. Ayiguputo ŵalinjile kwakuya ŵanganyawo, nambo mesi gawujile mugaŵelele ni kwawunicila. Ayiguputo ŵala ŵajigelwe ni mesi nipo Ayisilayeli ŵakulupwice.
Citusitusi 18: Mesi Ni Yakulya Mcipululu
![Citusitusi 18: Mesi Ni Yakulya Mcipululu](https://static.globalrecordings.net/300x200/lll2-18.jpg)
Ekisodo 16:1 - 17:7
Mose ŵalongolele ŵanduwo mcipululu. Nganakola yakulya yakwanila yakuti alye, ŵatandite kwanyinyitila Mose, Aloni ni Ambuje. Myoyo Mose ŵapopesile nipo ligulo lililyosye Mlungu ŵatumisyaga mikutula ja yijuni kuti ŵandu alyeje. Kundaŵi kulikose tucindu twine twamti mpela mkate twagwilaga pasi posope. Pagasoŵile mesi, Ayisilayeli ŵamkanganile soni Mose.
Mose ŵawusisye ŵanganyawo kuti: "Ligongo cici mkukangana ni une? Ligongo cici mkwaŵika Ambuje pamalinjiko! Mose ŵapopesile nipo Mlungu ŵamjanjile. „Mjigale ndodo jenu ni mpute ligangalyo nipo mesi cigakopoce kuti ŵanduwo amwe." Yaka 40 Mlungu ŵalijimkwalisya Ayisilayeli mcipululu.
Citusitusi 19: Mose Petumbi Lya Mlungu
![Citusitusi 19: Mose Petumbi Lya Mlungu](https://static.globalrecordings.net/300x200/lll2-19.jpg)
Ekisodo 19:1 - 20:17; Sabuli 19:11; Yahaya 14:15
Ayisilayeli ŵayice petumbi lya Sinayi. Mlungu ŵatulucile mwitumbimo mpela njasi ni kulindima, mawunde ni moto. Jwakulocesya Mose ŵakwesile mwitumbimo nipo Mlungu ŵaŵecete ni jwalakwe acitiji: "Une ndili Ambuje Mlungu jwenu. Mkasimkola milungu jine. Mkasimtindiŵalila cisanamu cilicose kapena kucilambila. Mkasimkolanga lina Lyangu mwangali mate. Mkumbucileje Lyuŵa lya Sabato ni mlisunjeje lyaliswela. Mwacimbicisye baba wenu ni mama wenu. Mkasim'bulaga. Mkasimtenda cikululu. Mkasimjiŵa. Mkasimulambucisya mjenu. Mkasimkumbilaga yicindu ya acimjenu." Panyuma pakwe, Mlungu ŵagalembile malamusi gelega palupale lweganga nipo Mose ŵatulwice nalyo lupalelo mwitumbi mula kwawula kwa ŵandu ŵala ni ŵawundile ŵanganyawo. Lelo tukugasimana malamusi ga Mlungu Mmaloŵe Gakwe, Bayibulo. Mlungu ŵatite, mkugasunga malamusi Gakwe mwana mbote jekulungwa.
Citusitusi 20: Lijoka Palusici
![Citusitusi 20: Lijoka Palusici](https://static.globalrecordings.net/300x200/lll2-20.jpg)
Ciwalanjilo 21:4-9; Kuwilisya malamusi 18:18
Ayisilayeli ŵakundile kuti cagasunje malamusi ga Mlungu, nambo nganagasunga. Ŵanduwo ŵatandite kumdandawulila Mlungu payakulya yele Mlungu yiŵapaga. Mlungu ŵapele ŵanganyawo cilango pakwatumicisya majoka gawukali. Ŵandu ŵajinji ŵawile ligongo lyakulumidwa ni majokago. Ŵamdandawulile Mose kuti akamucisye nipo Mose ŵapopelele ŵanganyawo. Mlungu ŵamsalile Mose kuti, "Mlinganye lijoka ni mliŵice palusici, jwalijose jwalumidwe, alilole ni cakole umi." Myoyo Mose ŵasepile lijokalyo kutyocela mcisyano ni alikolece palusici pala. Nipo jwalijose jujwalumidwe ni lijoka ni kulola piŵalikolecepo, ŵakolaga umi." Mose jwaliji jumo jwa acakulungwa ŵakulongolela nipo Jwakulocesya jwele Ayisilayeli jumkinakola citandilile. Kwayaka 40 Mose jwali jimkwalongolela ŵanduŵa mcipululu. Mkinaŵe kuwa Mose, Mlungu ŵatite kwa jwalakwe: „Une cinjitumisya Jwakulocesyayi jwine mpela mmwejo sikati ja Ayisilayeli. Jwalakwejo tacasalila ŵandu yosope yacinamlamulile Jwalakwe." (Kanyimbo)
Citusitusi 21: Yesu Ŵajikutisye Ŵandu
![Citusitusi 21: Yesu Ŵajikutisye Ŵandu](https://static.globalrecordings.net/300x200/lll2-21.jpg)
Yohane 6:1-58
Kwayaka yejinji ŵandu wa Isilayeli ŵaliji mkwembeceya Jwakulocesya jwine jwamti mpela Mose. Nipo mwakusimicisya Yesu, ŵapagwile mcilambo ca Isilayeli. Wajiganyaga ŵandu yakwambaga Mlungu mpela muŵatendelaga Mose. Lisiku line ŵandu ŵapite kumalo gacipululu kukupikanila majiganyo Wakwe. Ŵanduwo jakwete sala nambo nganakola cakulya cilicose. Kamnyamata kane kakwete mikate msano ni tusomba tuŵili. Yesu ŵajigele mikate jila ni somba sila ni ŵatogolele kwa Mlungu. Ŵandu wosope ŵalile kutyocela myakulya yakwe yeleyi. Acalumepe ŵapali ŵakwana 5000. Ŵanduwo ŵatite, "Kusyene aju munduju ni Jwakulocesyayi jutwaliji mkwembeceya kwika mcilambo!." Kundaŵi kwakwe Yesu ŵatite kwa ŵanganyawo, "Une ni mkate ja Umi. Jwalijose jwakwisa kwa Une, ngasijimkola sala ni jwalijose jwakukulupilila mwa Une ngasimkola njota." Kwende tuyice kwa Yesu ni tukulupilile mwa Jwalakwe.
Citusitusi 22: Yesu Ŵaŵecete Ni Mose
![Citusitusi 22: Yesu Ŵaŵecete Ni Mose](https://static.globalrecordings.net/300x200/lll2-22.jpg)
Mateyo 17:1-8; Luka 9:28-36
Mose ni Eliya wosopeŵa ŵaliji jwakulocesya ja Mlungu. Ŵapali kalakala mnope mkanayice Yesu pa cilambo pano. Lisiku line Yesu ŵajigele ŵakulijiganya ŵakwe ŵatatu kuja kwitumbi kukupopela. Paŵaliji mkupopela Yesu, ngope Jakwe jasandwice ni jaŵalaga mnope ni kuloleka kwakwe. Yakuwala Yakwe yaliji mkuŵala mnope. Mose ni Eliya ŵawonecele nombe mlumbili ni Yesu. Yesu ŵaliji mkumanyilila kuti asigele panandi kuwa nipo Mose ni Eliya ŵaŵecete ni Jwalakwe kwambaga yaciwa Cakwe cicaliji mkwika. Ŵakulijiganya wa Yesu ŵatatu ŵala ŵaliji mkupikana paŵaŵecetanaga. Papopo lyayice liwunde ni lyawunicile wosopewo. Liloŵe lya Mlungu lyapikanice kutyocela mwiwundemo licitiji: "Aju ni Mwanangu Jwangu Jwangumnonyela; ni Jwalakweju ngusangalala mnope. Mumpikanileje." Palyalesile kupikanika liloŵelyo, ŵakulijiganya ŵala ŵam'weni Yesu ŵaliji jikape.
Citusitusi 23: Yesu Ŵatuwilile Uwe
![Citusitusi 23: Yesu Ŵatuwilile Uwe](https://static.globalrecordings.net/300x200/lll2-23.jpg)
Yahaya 3:14-16
Ŵandu ŵamkanile Yesu ni ŵam'wuleje. Asilikali ŵamkomele pamsalaba ŵacitela. Ŵawuleje soni ŵandu ŵane pampepe ni Jwalakwe. Ŵele ŵanduwo ŵaliji ŵawiyi nambo soni ŵaciswamba. Nambo Yesu nganakasa atamose lilamusi limope lya Mlungu. Nambope, mmwejo ni une tukusakasaga malamusi ga Mlungu. Tukusajembeceyaga kupocela cilango ca konasika cakonasika kwangamala ni kutopoledwa pameso pa AMBUJE. Nambo Mlungu akwanonyelaga ŵandu wosope. Ngakusasosaga kuti uwe tusoŵeje pameso Pakwe ni kwawula kumalo gacilango ku moto. Myoyo Mlungu ŵamtumisye Yesu kuti ajigale cilango cetu. Mundaŵi ja Mose, miyasi ja Ngondolo ja cindimba ca Pasaka jaliji cimanyilo cakwacinjilicisya Ayisilayeli ku cilango ca Mlungu mcilambo ca Iguputo. Yesu, Ngondolo ja Mlungu, ŵawile mpela mbopesi ja m'we. Miyasi Jakwe jaliji malipilo ga ulemwa wetu. Mpela muŵalikolecele Mose lijoka lila....... myoyo Yesu ŵakolece pa Msalaba kuti jwalijose jwakukulupilila mwa Jwalakwe akole umi wangamala, mpela mtuka wakutyocela kwa Mlungu.
Citusitusi 24: Yesu Kwiwunde
![Citusitusi 24: Yesu Kwiwunde](https://static.globalrecordings.net/300x200/lll2-24.jpg)
Yohane 19:30; Masengo 1:6-11
Mtembo wa Yesu ŵatulwisye pa msalaba pala ni ŵawuŵisile mumbanga. Nambo palyuŵa lyacitatu Yesu ŵajimwice ku ŵawe. Ŵandu ŵajinji ŵaŵecete ni Jwalakwe kwa moŵa 40 paŵajimwicepo, ŵakuweni kunyakulwa Kwakwe kuja kwinani, mpela yimkuti pakuyiwona pa citusitusipa. Yesu ali ciŵela umi lelo jino. Jwakulocesya Mose ni wosope wuŵawile acikulupililaga mwa Mlungu nombe ali umi, ali kumbepo. Mose jwaliji jwakulongolela jwamkulungwa ni Jwakulocesyayi jwa Mlungu, nambo Yesu ali Mesiya jwa Mlungu. Ali jwakutalikangana mnope wukulungwa Wakwe ni Mose. Mose ŵalongolele Ayisilayeli pakomboka nyasa nipo ŵakulupwicice kwa Ayiguputo. Nambo Yesu ŵayice kukwakulupusya ŵandu wosope ŵakumkuya Jwalakwe. Lisiku line Yesu taciwuja soni, mpela muŵatendele pakuja kwinani. Tacajigala wosope ŵakukulupilila mwa Jwalakwe, kuti akaŵe nawo kumbepo. Ŵakunonyelwa acimjangu, ana akosece kuti akaŵe ni Yesu kumbepo. "Akulupilile mwa Ambuje Yesu nipo tacikulupuka."