unfoldingWord 41 - Jesupe Apã Wachu puãma manowe byche puare
Útlínur: Matthew 27:62-28:15; Mark 16:1-11; Luke 24:1-12; John 20:1-18
Handritsnúmer: 1241
Tungumál: Ache
Áhorfendur: General
Tegund: Bible Stories & Teac
Tilgangur: Evangelism; Teaching
Biblíutilvitnun: Paraphrase
Staða: Approved
Forskriftir eru grunnleiðbeiningar fyrir þýðingar og upptökur á önnur tungumál. Þau ættu að vera aðlöguð eftir þörfum til að gera þau skiljanleg og viðeigandi fyrir hverja menningu og tungumál. Sum hugtök og hugtök sem notuð eru gætu þurft frekari skýringar eða jafnvel skipt út eða sleppt alveg.
Handritstexti
Go tõallãngi wywy Jesupe djukabu wyra wachapyredji, go Judio ymachidjagi wywy, Jesudji kuallãngi, inama Pilatope: „Go kainangi Jesu inawe, manombu puãwerã brewipychã kreybu. Duwegi warõ ga reko go kuarewe wykopyre djãwẽ, go nonga nandje kua gatuwerã, dja kuere mudjãndygi narõllãwã dja echewe. Gobu inawerã mirõrã, gogi puãma manowegi wywy byche puare.“
Pilato inama: „Ra ga mondo tãrãllã tõallãngi, emi warõ gatu ga reko go kuarewe wykopyredji, go pendje kuaty nonga.“ Gobu gogi wywy mi wyche bykuapyre budjapyregi go ita kuarewe djãwã pechepyregidji. Gobu wedjama gope tõallãngi wywy, duwegi go echewe narõllãwã.
Go Jesu pechepyre krey krãpĩmbu, duwe kreybu go rõ bue djapollãndy krey. Judio wywy ollãwerã etakrã kuarewepe go kreybu. Go buare go bue djapollãndy krey krãpĩmbu, duwe koẽpadjebu tãrãllã kudjã inama, owã Jesu kuarewepe, bue teiwu gatu piywã Jesu echewedji.
Gobu ywy kuera chidja roma. Etakrã Apã Wachu buewegi mimbi gatu chono wera nonga wẽma bu ywadji. Gogi matãma go ita wachu go kuarewe pechewegi, emi wapyma go ita llabu. Go tõallãngi wywy kuarewedji warõwegi krymballã buchãndjiwa wama ywype kbe’e manowe nonga.
Go kudjã wywy kuarewepe wẽmbu, Apã Wachu buewegi inama gogi wywype: „Krymballãeme! Jesu ĩllãma kowepe. Gogi wẽma manowe byche puare, idja inawe nonga. Wechã kuarewe emi mai gami.“ Kudjã wywy maĩma kuarewe djãwãpe, emi wechãma Jesu eche endawe. Dja echewe ĩllãma gope!
Gobu go Apã Wachu buewegi inama kudjã wywype: „Amaty kua Jesu kuere mudjãndygi wywy endape, emi kiu mondo gogi wywype: Jesu wẽma o manowe byche puare. Gobu owerã pendje nondje Galilea rekuaty.“
Kudjã wywy krymballã buchã, ury gatuma emi. Gogi myrõma o, Jesu kuere mudjãndygi wywype kiuwã go djawu gatu.
Kudjã wywy obu, djawu gatu kiuwã Jesu kuere mudjãndygi wywype, Jesu wẽma bu idja chã ruwa. Gobu gogi wywy kmarãma idja chã ruwa. Jesu rõ inama: “Krymballãeme. Amaty kua emi kiu mondo cho kuere mudjãndygi wywype, owã Galilea rekuaty. Gope gogi wywy chope wechãwerã.”