unfoldingWord 30 - Jisus I Givim Kaikai Long 5000 Manmeri
Útlínur: Matthew 14:13-21; Mark 6:31-44; Luke 9:10-17; John 6:5-15
Handritsnúmer: 1230
Tungumál: Tok Pisin: PNG
Áhorfendur: General
Tegund: Bible Stories & Teac
Tilgangur: Evangelism; Teaching
Biblíutilvitnun: Paraphrase
Staða: Approved
Forskriftir eru grunnleiðbeiningar fyrir þýðingar og upptökur á önnur tungumál. Þau ættu að vera aðlöguð eftir þörfum til að gera þau skiljanleg og viðeigandi fyrir hverja menningu og tungumál. Sum hugtök og hugtök sem notuð eru gætu þurft frekari skýringar eða jafnvel skipt út eða sleppt alveg.
Handritstexti
Jisas i salim ol aposel bilong em i go autim tok na skulim ol manmeri long olgeta ples. Taim ol i kam bek long ples Jisas i stap long en, ol i tokim em long wanem samting ol i bin mekim. Na Jisas i tokim ol long i go wantaim em long hapsait bilong raunwara long ples i nogat nois, na malolo liklik taim. Olsem na ol i kalap long bot na i go long hapsait bilong raunwara.
Tasol planti manmeri i lukim Jisas wantaim ol disaipel bilong em i stap long bot. Ol dispela manmeri i ran arere long raunwara na i go long hapsait paslain long ol. Na taim Jisas na ol disaipel i go kamap, planti lain manmeri i stap pinis na wetim ol.
Namba bilong ol dispela man em 5,000. Ol i no kaunim meri na pikinini. Jisas i sori tumas long ol manmeri. Em i lukim ol dispela manmeri i olsem sipsip i nogat wasman. Olsem na em skulim ol na oraitim ol sik manmeri i stap wantaim ol.
Long apinun ol disaipel i tokim Jisas, “Em i apinun pinis na i nogat ol ples i stap klostu. Salim ol manmeri i go bai ol i ken painim sampela kaikai long kaikai.”
Tasol Jisas i tokim ol disaipel, “Yupela givim kaikai long ol long kaikai.” Na ol i bekim tok olsem, “Bai mipela i mekim olsem wanem? Mipela i gat 5-pela bret na 2-pela liklik pis tasol.”
Na Jisas i tokim ol disaipel bilong em long tokim ol manmeri long sindaun long gras inap olsem 50 man long wanwan grup.
Na Jisas i kisim 5-pela bret na 2-pela pis, na em i lukluk i go antap long heven na tok tenkyu long God.
Na em i brukim bret na pis i go liklik. Na em i givim long ol disaipel bilong em long givim ol manmeri. Ol disaipel i givim ol tasol em i no pinis! Olgeta manmeri i kaikai na pulap.
Ol i kaikai pinis na bihain ol disaipel i bungim ol hap kaikai na pulimapim long 12-pela basket. Olgeta dispela kaikai i kamap long 5-pela bret na 2-pela pis.