Wa Ita'ita, wa Ata'atahi, na wa Miya, Buka Faligigi Luwagana. Yesu Mate Guyau
![Wa Ita'ita, wa Ata'atahi, na wa Miya, Buka Faligigi Luwagana. Yesu Mate Guyau](https://static.globalrecordings.net/300x200/lll7-00.jpg)
Ուրվագիծ: From Luke and John. 24 sections. It has a picture book to go along with the recording.
Սցենարի համարը: 424
Լեզու: Buhutu
Թեմա: Sin and Satan (Judgement, Sin, disobedience); Christ (Resurrection of Jesus, Son of God, Saviour of Sinful Men, Birth of Christ, Death of Christ, Life of Christ, Authority); Eternal life (Salvation, Eternal / everlasting life); Character of God (Grace and Mercy, Nature, character of God, Word of God (the Bible), Power of God / Jesus); Living as a Christian (Worship, Second Birth, Peace with God, Forgiveness, Faith, trust, believe in Jesus, Spiritual Life, Christian values); Life event (Death); Bible timeline (Gospel, Good News); Problems (Sickness, Problems, troubles, worries)
Հանդիսատես: General
Ոճ: Monolog
Ժանր: Bible Stories & Teac
Նպատակը: Teaching
Կարգավիճակ: Publishable
Սցենարի տեքստ
Side A, Liba Famahata
![Side A, Liba Famahata](https://static.globalrecordings.net/300x200/lll7-00.jpg)
BUHUTU
Look, Listen & Live 7
Wa Ita’ita, wa Ata’atahi, na wa Miya, Buka Faligigi Luwagana. Yesu Mate Guyau,
(Jesus The Lord)
Side A, Liba Famahata.
Afahaidagu, mo’isa Yesu mate Yaubada Natuna wananahana? (Logenana Yaubada ya duiyama?)
In haba mwahuli hige Anadan ya feleda?
No’o abi’abidi ya lau ginauli, haba ainiya ami siba mate, wananaha. Keseti yai au ata’atahi. Fafa’ilala ami atahi mate, tautau au bui.
Tautau Bwa’ibwa’ina, Yesu ya Tubu
![Tautau Bwa’ibwa’ina, Yesu ya Tubu](https://static.globalrecordings.net/300x200/lll7-01.jpg)
Diyon 1:1-14; Luka 2; Kolosi 1:16
Yesu mate Isalaela yai ya tubu yosiyosi ganadi yai. In hige wawaya gaibu.
Gwama hesa fafatabuma. Tinana mate waihin nuwanuwasupuna. (Hige taumoho wapina i eli’ona). Hesana mate Maliya. Tamana mate Yaubada Wananahana!
In ha’a ma’eda, na muliyai, habahim, ya tubu.
Fatufatubu yai ma’ena Yaubada, Yesu tano’ubu ya fatubu. Yawasi Yaubada lisina yai, doga bwa’ibwa’ina ya felen. In moho, dodoga boludi yawasi ni sa fa’asina, pa’ana Satani yo pe’i laulau’una sa lau watan, na hige Yaubada. Yesu ya laoma tano’ubu, doha wawaya, be Yaubada ya fataumahata lisida yai, yo sidohana bena te famala Yaubada nanatuna fuyo haba ya fa’itada.
Tautau Fafaluwagana, Yesu Ho’owa ya Bui be Waen
![Tautau Fafaluwagana, Yesu Ho’owa ya Bui be Waen](https://static.globalrecordings.net/300x200/lll7-02.jpg)
Diyon 2:1-11
Yesu ya la’i, be ya famala doga la’ila’i. Fuya ma’esega ya lau fafanahi mata’asina yai ma tinana yo haidana.
Maliya ya sibai mate, Yesu In Yaubada Natuna, be waen ya ofi, mate ya lau, ya faliba.
Na habahim paula tau abidi ya falibadi, iyen,
“Yesu somo ya falibamiu au lau watan.”
Ho’owa aba yahiyahi oulina faligigi esega amainiya. Yesu paula tau abidi ya falibadi, iye,
“Ho’owa au famohafudi.”
Yo fede, sa yahidi.
Na habahim iyen,
“Matabahim au lau fagoi be tefana au lawen mata’asina ba’isana lisina.”
Ho’owa wa ha’a ya bui, be ya famala waen loholohona!
Yesu haidana sa ita mate, Ena gigibwali Yaubada ya felen, be sa kawawananahaen.
Tautau Fafafaihonana, Yesu Nikodimo ya Faliba
![Tautau Fafafaihonana, Yesu Nikodimo ya Faliba](https://static.globalrecordings.net/300x200/lll7-03.jpg)
Diyon 3:1-36
Nikodimo mate tau lau fa’ata hesa la’ila’i.
Yesu no’o laulaudi ya lau ginauli mate, wasadi ya atahiyedi. Yo ya sibai mate Yesu nuwana Yaubada lisina ya i laoma. Yo fede, maihona esega ya lau Yesu lebena, be Yaubada wasana ya fati’oi. Yesu Nikodimo ya faliba, iyebom,
“E faliba dudulaim, ibege sai la’i gonowana Yaubada ena nu’u i ita, yena ya tubu fuyo,”
Nikodimo ya fati’o, iyen,
“Doga ya tautaula’i haba sidohana ena tubutubu fuyo?”
Yesu ya liba doha ite.
“Yena wawaya tinana ya yosi, mate in tau wananaha gaibu. Doga bena Yaubada Yaluwana yai sa yosi haba Yaubada Yaluwana ya abi.”
Yena sa kawawananaha, yo Yesu sa awa’abiyen, mate sa tubu fuyo, be yaluwa yai sa miya esega. Na yena hige Yesu ti kawawananaha’en, mate pe’i hige anadan haba sa faho’ina.
Tautau Fafatina, Tau Fafadudulai ya Tuli Bono Yesu Nuwanuwana yai
![Tautau Fafatina, Tau Fafadudulai ya Tuli Bono Yesu Nuwanuwana yai](https://static.globalrecordings.net/300x200/lll7-04.jpg)
Diyon 4:46-54
Ibe natum ya lepa haba somo wa ginauli? Doga te eda lofalofa yai ya laoma, Yesu ya lau yo’oi. In tau fafadudulai la’ila’i hesa, in moho, Yesu ya an’etai, iyen,
“Ba’isa, u laoma. Natugu ibe i pe’i.”
Yesu iyen,
“U fuyo. Natum haba ya mwahuli.”
Doga wa Yesu ya kawawananaha’en, be ya fuyo ena luma. In hola eda’eda yai, na ena tau paisowa ya lobahidi. Ena sa liba, mate natuna ha’a ya loholoho. Maihalana yai Yesu iyen,
“Natum haba ya mwahuli.”
Mate gwama wa, ya loholoho.
Taumohona ma’ana boga sa kawawananaha mate, Yesu Yaubada lebena yai ya laoma.
Tautau Fafafaligigina, Taumoho Asi’asiyebona Ho’owa Puluna yai
![Tautau Fafafaligigina, Taumoho Asi’asiyebona Ho’owa Puluna yai](https://static.globalrecordings.net/300x200/lll7-05.jpg)
Diyon 5:1-47
Yelusalem duhu la’ina yai, mate ho’owa puluna.
Dodoga sa kawawananaha mate, ho’owa puluna ni, gonowana tau asiyebo ya faloholohodi.
Taumoho hudo’i mate ya asiyebo bolima 38.
Mate ho’owa puluna sadaina yai Yesu ya ita, be iyen,
“Em fanuha bena wa loholoho?”
Taumoho wa iyen,
“Hige sai la’i i saguhigu, be i lawegu ai pulu ganahewana.”
Yo fede, Yesu iyen,
“U obiyo! Em leiyafa u abi, na u lau!”
Hige walolona yo fede, doga wa ya loholoho. Dodoga haisa Yesu sa manabala’en, pa’ana Yaubada ena anyawasi Tabuna Lahaina yai doga asi’asiyebona ya faloholoho.
Lahaina ni Yudeya sa anyawasi, na Yaubada sa fadebasae. Yesu bena ya fa’ita lobahidi, mate In Yaubada Natuna.
Ma’ena dudulai gonowana Yaubada ena ai lahai, doga ya faloholoho. In moho, hige ti fanuha bena ti kawawananaha’en.
Tautau Faligigi Esega, Yesu Dodoga 5,000 ya Fakalahedi
![Tautau Faligigi Esega, Yesu Dodoga 5,000 ya Fakalahedi](https://static.globalrecordings.net/300x200/lll7-06.jpg)
Diyon 6:1-15, 25-58
Dodoga boludi wasa sa atahi mate, Yesu gonowana tau asiyebo ya faloholohodi, yo fede, fuya esega ana baiwa sa tuhu, be sa lau nu’u hesa yai.
Maimailafina, Yesu ana hewahewali ya falibadi, iyen,
“Ai somo haba fwalawa dodoga adi te une?”
Hidana hesa iyen,
“Gwama hesa ana fwalawa faligigi yo hama luwaga. In moho, doga la’ina somo haba sa an?”
Yesu dodoga ya fata’aidi. Fwalawa yo hama ya abidi.
Yaubada ya lauto’iyen, na habahim, dodoga baiwadi amainiya ya fa’anidi, be—bogadi sa yahayaha.
Na Yesu dodoga ya falibadi iyen,
“Kalahe tabu au mode’en wananahai, mwahuli ota’ota fahina kalahena bena ami paisowai. Yau Mwahuli Fwalawana. Sai ya laoma lisigu, mate ibege i guliyam.”
Tautau Faligigi Luwaga, Yesu Gabogabo Hewana yai ya Laulau
![Tautau Faligigi Luwaga, Yesu Gabogabo Hewana yai ya Laulau](https://static.globalrecordings.net/300x200/lll7-07.jpg)
Diyon 6:15-21
Yesu dodoga ya fakalahe ma’uda’idi, na mulina yai afahaidana ya falibadi, be sa lau edi luma.
Ibona ya lau, be ya lau’u’ula. Afahaidana waga yai sa awa, be sa dohe gabogabo tefana.
Ya kamumu, na gabogabo ya bagodu. Muliyai, Yesu ya laoma lisidi gabogabo hewana yai.
Haidana sa wasabu. Edi nuwatuhu mate, Yesu bena haga ona’onaha. Yesu ya falibadi, iyen,
“Yau! Tabu au wasabu.”
Ya awa lau waga yai, yo fede, ya daumwali.
Haidana sa ita fufufui bodai, mate Yesu Yaubada ena Gigibwali lisina yai.
Tautau Faligigi Faihona, Yesu Taumoho Matatoutouna ya Faloholoho
![Tautau Faligigi Faihona, Yesu Taumoho Matatoutouna ya Faloholoho](https://static.globalrecordings.net/300x200/lll7-08.jpg)
Diyon 9:1-41
Taumoho hesa, boga yai ya be’uma ma matatoutouna.
Yesu afahaidana edi nuwatuhu mate, matatoutou bena haga kamkamna Yaubada ya tole.
Na Yesu ya falibadi, iyen,
“Doga matana ya tou, mate ma pa’ana, bena Yaubada ena gigibwali haba ya faloholoho, be sa ita.
Yesu ya kaniso tanohi yai, be mwano ya ginauli.
Mwanona ya abi, be taumoho matana yai ya fawawa.
Na habahim ya faliba, iyebom,
“U lau matam u bui!”
Taumoho wa ya lau, matana ya bui, ya fuyoma matana ya falaladi!
Afahaidagu, taumoho te matana sa tou.
Na ita haisa mate yaluwada sa tou; be ibege Yaubada ena laulau ta itadi. Yesu iyen,
“Yau tano’ubu malana. Sai ya lau watanigu, ibege ai kamumu i laulau, haba mwahuli malana ya abi.”
Tautau Faligigi Fati, Yesu Lasalusi ya Famwahuli
![Tautau Faligigi Fati, Yesu Lasalusi ya Famwahuli](https://static.globalrecordings.net/300x200/lll7-09.jpg)
Diyon 11:1-46
Yesu, Lasalusi yo afalofuna luwaga Maliya yo Mata ya gadosisiyedi. Lasalusi wa ya asiyebo. In moho, Yesu hige i heula be i ita. Lahai fisa sa ofi, Yesu afahaidana ya falibadi,
“Lasalusi mate ya pe’i. Agu ya mo’isa, hige yau amainiya; haba ainiya ami kawawananahaegu. Haga ta lau ta ita.”
Lasalusi mate, ha’a bo’usa yai ya eno, lahai fati, na habahim Yesu ya abi mahano. Afalofuna luwaga mate, sa tantan, pa’ana Yesu hige i laoma be i famwahuli. Na Yesu iyen,
“Lofumiu haba ya mwahuli.”
Dodoga ya falibadi, be bo’usa ana gudu sa so’e.
Na habahim, ya yoga lau lisina, iyen,
“Lasalusi, u kalamahanoma!”
Lasalusi ma fakofakouna, bo’usa yai ya kalamahanoma.
Yena sai Yesu ya kawawananahaen haba ya miya ee—, hige anadan, bwagana tauna ya pe’i. Ami kawawananaha ye?
Tautau Safuhudohudo’i, Yesu ya Pe’i Kolosi yai
![Tautau Safuhudohudo’i, Yesu ya Pe’i Kolosi yai](https://static.globalrecordings.net/300x200/lll7-10.jpg)
Diyon 18:1 - 19:30
Yesu no’o laulaudi ya lau ginauli, be ya fawananaha mate, In Yaubada Natuna. In moho, Yudeya Baba’isadi sa nuwa’ela’ela. Edi fanuha bena sa wunui. Yesu afahaidana ya falibadi, mate haba ya pe’i. Na aimuli haba Yaluwana Tabuna ya duiyama.
Eda’eda esega ni haba taumoho yo waihin ya ledima Yaubada lisina. Yudasi, Yesu tau famuli watanina hesa, ana ya liba talu. Yudeya lisidi yai moni ya abi, pa’ana Yesu somo yai ya libaen. Yo fede, sa laoma be sa tohai. Petelo yo haisa mate sa wasabu be sa gela. Baba’isa hige Yesu ena heyaya somo hesa ti lobahi, na Yudeya tiyen,
“Au tutu fapatu! Au tutu fapatu!”
Yo fede, dodoga Yaubada natuna dudulaina sa wunui. Tau angafu luwaga, maidana sa pe’i. Edi heyaya debadi yai sa ankamkamna, na Yesu mate, um be yau eda heyaya debadi yai ya pe’i.
Yesu mate Yaubada ena antalasam loholohona eda heyaya maisadi.
Tautau Safuhudohudo’i Esega, Maliya ya lau Yesu Bo’usa yai
![Tautau Safuhudohudo’i Esega, Maliya ya lau Yesu Bo’usa yai](https://static.globalrecordings.net/300x200/lll7-11.jpg)
Diyon 19:38 - 20:18
Yesu ya pe’i, be sa bo’usai. Ume’ehu la’ila’i sa fatapipili, be sa gudu. Lahai fafafaihonana yai Maliya Magadala ya lau bo’usa. Ume’ehu wa buibui fahina, in moho, Yesu silanina mate hige amainiya. Maliya ya tan. ya dulu bigabiga, be bo’usa ganahewana ya mainenei.
Ena aba eno yai mate, Anelu luwaga sa ta’ata’ai.
Yesu ya taumahata, be Maliya ya faliba, iyen,
“Sai wa yo’oyo’oi?”
Maliya ena nuwatuhu, bena haga tau lau gabu. Yo fede, Yesu silanna ya fati’oi.
Na Yesu iyen,
“Maliya.”
Ya ita’ita lau mate, Yesu ya ita! Ya faliba, iyen,
“U lau, be haidagu u falibadi mate, Yau E mwahuli fuyo.”
Pe’i ibege Yaubada Mwahumwahulina Natuna i abi didini!
Tautau Safuhudohudo’i Luwaga, Yesu ya Taumahata Haidana Lisidi yai
![Tautau Safuhudohudo’i Luwaga, Yesu ya Taumahata Haidana Lisidi yai](https://static.globalrecordings.net/300x200/lll7-12.jpg)
Diyon 20:30 - 21:19
Yesu hola hige i hasai Galewa, na no’o laulauna hesa hinaga ya ginauli. Maihona esega haidana sa lau sa hagida, be sa bo’au. Ya ifitatatali. Doga hesa ya taumahata gelegele yai. Iyen,
“Emi hagida ainiya mate, au pei haba hama boludi ami onadi.”
Habahim haidana sa sibai, itebom
“Yesu!”
Hama boludi sa ledima. Yesu adi kalahe ya abi nonohai. Sa kalahe ma’uda ma’edi sa gagali. Petelo ya gela fuyana Yesu sa tohai, na maihalana yai Yesu ya faliba, iyen,
“U lau watanigu.”
Yesu Petelo ya faliba, bena ena dodoga ya ita watanidi, yo Wasana bena ya falibadi.
Ya fanuha bena dodoga ena no’o abi’abidi sa atahiyedi, be haba sa kawawananaha mate, in Yaubada Natuna. Haba sa lau watan hinaga, be mwahuli hige anadan sa abi.
Book 7, Side B, LIBA FAMAHATA
![Book 7, Side B, LIBA FAMAHATA](https://static.globalrecordings.net/300x200/lll7-00.jpg)
Afahaidagu, wananaha mate, Yesu Tanuwaga La’ila’i (In tau saguhida).
Pe’i yai yo heyaya yai ya saguhida, be ya laweda mwahuli hige anadan yai.
Dede te au atahi, na tautau au ita. Yena fafa’ilala ami atahi mate, tautau au kalasi boda.
Tautau Safuhudohudo’i Faihona, Yesu Haidana Luwaga ya Fa’atadi
![Tautau Safuhudohudo’i Faihona, Yesu Haidana Luwaga ya Fa’atadi](https://static.globalrecordings.net/300x200/lll7-13.jpg)
Luka 24:13-25
Yudeya boludi edi sunuma bena Yesu haba ya saguhidi Loma tanutanuwagadi lebedi yai.
In moho, tanutanuwagadi Yesu sa wunui, be edi sunuma ya lau heyaya. Muliyai Yesu afahaidana luwaga eda’eda yai sa laulau edi luma. Yo fede Yesu ya taumahata felenidi.
Edi nuwatuhu bena haga doga hudo’i yo fede, ena sa dede. Habahim Yesu Yaubada ena liba ya tala’edai.
Beyabeyana tanutanuwaga yo Mose, Yesu wasana sa uli. Sa libaen hinaga mate, In haba ya ankamkamina, be ya pe’i. Yo hinaga, haba ya obiyo fuyo, be Yaubada ena ai nu’u ya Tanuwaga.
Yo fede, haidana sa sibai mate, Uli’uli Tabuna ni wananaha! Dogana mate fede, Yesu! Ya mwahuli fuyo!
Haga ita somo Yesu dodoga ya fatalahadi fuyana In tano’ubu yai ta atahiyedi.
Tautau Safuhudohudo’i Fati, Gwama Salai Ya Ita Watanidi
![Tautau Safuhudohudo’i Fati, Gwama Salai Ya Ita Watanidi](https://static.globalrecordings.net/300x200/lll7-14.jpg)
Luka 15:11-19
Taumoho nanatuna luwaga wasadi Yesu ya dedei.
Natuna tau mulita tamana ya faliba, iyen,
“Em ginauli ema u soi.”
Yo fede, tamadi ginauli wa ya daili nanatuna luwaga lebedi yai. Tau mulita ya aulaha ya lau nu’u hesa. Ena moni ya kaiwegowegogo’edi.
Na habahim guliyam la’ila’i nu’una ya faho’ina.
Gwama wa haba somo ya abi watan, yo fede, ya lau be taumoho hesa ena salai ya ita watandi, tautau yai te haba ami ita. Gwama wa ya guliyam be salai adi kalahe bena ana ya an. Yo fede, ya nuwanuwatuhu. Iyen,
“Tamagu ena tau paisowa mate sa kalakalahe.”
Nuwana yai, iyen,
“Haba E fuyo tamagu lisina, be yawa, ‘Tamagu E laupono lisim yai…. Tabu u kawanatu fuyo ai lisigu, yau haba E famala doha em tau paisowa hesa.”
Tautau Safuhudohudo’i Faligigi, Gwama Laulauwasina ya Fuyoma
![Tautau Safuhudohudo’i Faligigi, Gwama Laulauwasina ya Fuyoma](https://static.globalrecordings.net/300x200/lll7-15.jpg)
Luka 15:20-32
Gwama wa ya fuyoma tamana lisina, hola ma laolaomana, na tamana ya ita’ita lau, be ya ita. Tamana ya lau tafotafo, be ya failobahin. Gwama wa ya fagado bainewa na ya falafu. Ena paula tau abidi ya falibadi, leli loholohodi yo kalahe sa ledima. Na iyen,
“Haba te mata’asi. Natugu te yawabom ‘ya pe’i,’ fede ma mwahumwahulina. Ya asina, na aho te ya lau fuyofuyoma.”
Afahaidagu, Yesu ya fatalahada mate, Yaubada doha gwama tamana. Ita doha gwama ni ya laupono, be ya lau hudo’i. In moho, Yaubada ya fanuhada.
Ya bagibagi yee–-, te mahano fuyoma. In ya nuwatohatoha’eda. Yesu ya laoma, be heyaya yo pe’i yai ya suwafahida. In eda’edana ya fuyo Yaubada Tau Tamatama lisina.
Tautau Safuhudohudo’i Faligigi Esega, Taumoho Fafagogona ena Ginauli
![Tautau Safuhudohudo’i Faligigi Esega, Taumoho Fafagogona ena Ginauli](https://static.globalrecordings.net/300x200/lll7-16.jpg)
Luka 12:13-34
Dede te Yesu dodoga edi ya dede. Taumoho fafagogona ena uma’uma loloho. Sanala la’ila’idi ya ginaulidi, be amainiya ya pei gogonidi, na iyen,
“Bolima fofofo ibege somo ya yo’oi. U miya moho; u an, yo u nom; tabu somo u mode’en!”
Yaubada iyen,
“Ha’a u yauyaule! Maihona te haba wa pe’i. Em ginauli mahudo’idi te haba sai ya abidi?”
Yesu iyen,
“Somo haba ami an yo ami li’o, tabu au mode’edi. Yaubada moho bena ai nuwamiu.”
Afahaidagu, Yena tau gogo gesagesa te saguhidi mate, Yaubada nuwana ya loholoho.
Eda fanuha mahudo’idi haba Yaubada ya ginaulidi yo ai Galewa haba ya fagogoda hinaga.
Tautau Safuhudohudo’i Faligigi Luwaga, Tau An’an’eta yo Tau Fagogo Dogana
![Tautau Safuhudohudo’i Faligigi Luwaga, Tau An’an’eta yo Tau Fagogo Dogana](https://static.globalrecordings.net/300x200/lll7-17.jpg)
Luka 16:19-31
Yudeya dogana fafagogona in hige somo hesa i yo’oi, wasana Yesu ya dedei. Tau an’an’eta ena luma ganamulina yai hige i mode’en. Doga an’an’etana ya pe’i, ya lau Galewa.
Amainiya Abelaham, Yudeya adi ulutubu ya ita watan. Tau fagogo hinaga ya pe’i, ya lau aba kamkamna nu’una yai. Ya yoga lau Abelaham lisina bena tau an’eta ya duiyama be ya saguhi. Na Abelaham iyen,
“Ai yo um ati’atipuda yai mate, hinehineli la’ila’i ha’a te ginauli. Ai Galewa salumadi bena sa laowa lebem mate hige gonowana, or bena sai ainiya ya dohema Galewa mate, hinaga hige gonowana.”
Afahaidagu, ita bena Yaubada ena laulau te lau watan ma miyada yai. Bwagana te fagogo or te deha, yena bena pe’i mulina yai haba te lau Galewa. Lisina yai Guyau Yesu, aho ite, bena ami kawawananaha’en haba ami mwahuli.
Tautau Safuhudohudo’i Faligigi Faihona, Doga Eda’eda Yai
![Tautau Safuhudohudo’i Faligigi Faihona, Doga Eda’eda Yai](https://static.globalrecordings.net/300x200/lll7-18.jpg)
Luka 11:5-13
Fuya hudo’i taumoho hesa, maihona atipuna yai ya lau hidana lisina be iyen,
“Hidagu, E laoma fwalawa E an’eta ai lisim. Taumana hesa ya mahanoma egu luma na hige kalahe.” ?
Hidana mate ma nanatuna sa eno. Hige i fanuha bena i mwaito. Doga wa hige mo’ana i mwahu, an’eta ya heloloi, yo fede, hidana ya obiyo be ena fanuha ya felen.
Yesu ya libaen mate, tabu ta an’eta Yaubada ai lisina. In Tamada loholohona. Ya fanuha bena Yaluwana Tabuna ya feleda yo eda fanufanuha haba ya ginaulidi. Ita moho bena lau’u’ula yai te an’an’etai.
Tautau Safuhudohudo’i Faligigifati, Dodoga Luwaga Dubu yai
![Tautau Safuhudohudo’i Faligigifati, Dodoga Luwaga Dubu yai](https://static.globalrecordings.net/300x200/lll7-19.jpg)
Luka 18:9-14
Gonowana sai la’i ya lau’u’ula lau, Yaubada lisina haba ya atahi? Taumoho hesa tautau yai te mate doga laulau’u’ulana. Ena nuwa saesae.
Yaubada ya faliba, mate in ya loholoho habahim dodoga haisa. Ami nuwatuhui mate Yaubada haba nuwana ya amna, doga te lisina yai?
Doga hesa mate takesi tau tano. Dodoga edi moni ya bwala fahidi. Ya sibai mate Yaubada hige nuwana i loholoho. Tauna hige aludi, na ma taumayamayana ya dulu lidi. Ya lau’u’ula lau, Yaubada lisina, iyen,
“Yaubada u nuwatohatoha’egu. Yau tau heyaya!”
Yesu ya libaen mate, lau’u’ula te Yaubada ya atahi.
Ena heyaya ya nuwa afuledi.
Yaubada tau nuwa saesae ya waiyo’o’edi, na tau nuwa lidilidi mate, ya saguhidi.
Tautau Taumoho Esega ya Pe’i, Taumoho Esega ena Li’e ya Lau Falili
![Tautau Taumoho Esega ya Pe’i, Taumoho Esega ena Li’e ya Lau Falili](https://static.globalrecordings.net/300x200/lll7-20.jpg)
Luka 8:4-8
Yesu dodoga boludi ya fa’atadi, iyen,
“Taumoho hesa ya lau be ena tuma ya lau falili. Tuma haisa eda’eda sadaina yai sa in, be atai’a sa anidi. Haisa sa be’u lau, ume’umehu yai, be sa kalamo’a, li’edi sa hohoya pa’ana tanohi hige i potopoto.
Li’e haisa sa be’u lau, pole pwaludi yai, be sa yafaidi, be sa tubu heyaya. Haisa sa be’u lau, tanohi loholohona yai. Sa in be sa fuwa, an’anidi haisa 100 ya famuli. Yesu ya liba lau dodoga lisidi, iyen,
“Sai fafabeyana haba ya atahi be ya sibai.”
Mahudo’idi dede te sa atahi, in moho, hige ti nuwatuhu lobahi.
Na umi ami nuwatuhu lobahi?
Tautau Taumoho Esega ya Pe’i Esega, Li’e sa Kalamo’a
![Tautau Taumoho Esega ya Pe’i Esega, Li’e sa Kalamo’a](https://static.globalrecordings.net/300x200/lll7-21.jpg)
Luka 8:9-15
Yesu afahaidana sa fati’oi bena dede ni aniyona edi ya dede, yo fede, iyen,
“Li’e mate Yaubada ena Liba. Eda’eda sadaina yai sa falilidi mate, salumadi iti sa atahiyen, na Satani ya laoma be Libana ya abi fahi, be ibege ti kawawananaha’en be loholoho ti lobahi. Li’e haisa ume’ume’ehu yai mate, tau atahiyenna. Fuya tupotupo sa kawawananaha, na lau’ita fuyana yai sa failaulau. Li’e pole ganahewadi yai mate, mode hesa-hesa yo fagogo ya foyahidi, be nuwadi ya fui. Tanohi loholoho mate Liba ya atahiyen, be ya fuwa loholoho.”
Afahaidagu, Yaubada ena Liba haba sidohana emi ata’atahiyena yo emi fafapaisowana? Haba ami waiyo’o’en, na emi nuwatuhu ami lau watanidi?
Ye, haba ami kawawananaha’en yo ami miyamiya’en, be Yaubada haba ya ita faloholohomiu?
Tautau Taumoho Esega ya Pe’i Luwaga, Hidada Bena te Nanabuwen
![Tautau Taumoho Esega ya Pe’i Luwaga, Hidada Bena te Nanabuwen](https://static.globalrecordings.net/300x200/lll7-22.jpg)
Luka 10:25-37
Sidohana haba eda sibasiba mate, mwahuli hige anadan te abi? Uli’uli Tabuna ya fatalahadi, bena Yaubada te gadosisiyen yo dodoga hinaga.
In moho, dodoga salumadi haba te gadosisiyedi?
Taumoho hudo’i ya lau tauduma eda’eda yai.
Tau angafu sa tohai. Ena ginauli sa angafuhidi, na habahim, sa tala faheyaya. Tau lau’u’ula dodogadi luwaga edana sa lau watanyama.
Taumoho nu’anu’ana sa ita. In moho, hige ti saguhi. Muliyai laolaoma hesa eda’edana hinaga ya lau watanyama. Doga wa ya nuwatohatoha’en.
Ana omata ya sumadi. Ena donki yai ya fa’awa, na ya lawen, be sagu ya felen. Yesu ya libaen mate, yena Yaubada te fanuha, mate bena eda gadosisi te fataumahata sai somo ya fanuha ai lebena.
Tautau Taumoho Esega ya Pe’i Faihona, Luma Tanuwagana ya Mahano
![Tautau Taumoho Esega ya Pe’i Faihona, Luma Tanuwagana ya Mahano](https://static.globalrecordings.net/300x200/lll7-23.jpg)
Luka 12:35-48
Yesu bo’usa yai ya mwahuli fuyo ami nuwanuwatuhui?
Dodoga boludi sa ita, na habahim ya hasai Galewa.
Ya falibadi mate, haba ya fuyoma. Ya liba’en mate ita bena doha dodoga edi ba’isa ena fuyoma sa bagi watan. Ita Yesu ena fuyoma hige ta sibai.
Bena ena te paisowa, na te nononoha, haba ena mahanoma yai te failobahin. Be haba eda mata’asi ya ginauli. Kwade la’ila’i ana fuya.
Yesu ya liba’en hinaga mate, ena tau paisowa tau ita watanidi salumadi bena sa nonoha.
Yena ena luma sa ita watan komakomani’i, yo ena tau paisowa sa nanabuwedi haba maisa la’ila’i sa abi. Na yena tau paisowa sa antala’idi, yo sa nom yauyaule mate ankamkamna la’ila’i haba sa abi.
Tautau Taumoho Esega ya Pe’i Fati, Taumoho Hesa Oyagi Hewana Yai
![Tautau Taumoho Esega ya Pe’i Fati, Taumoho Hesa Oyagi Hewana Yai](https://static.globalrecordings.net/300x200/lll7-24.jpg)
Luka 19:1-10
Yesu gonowana doga ya saguhi. Dede te au atahi.
Sakiyesi mate takesi tautano fafagogona. Dodoga edi moni ya an’angafuhidi.
Ena fanuha bena Yesu ya ita, in moho, kwaluna ya tupo, yo dodoga sa ouli. Yo fede, Sakiyesi oyagi ya finahei, bena haba Yesu ya ita. Yesu ya taubayawa, ya ita’ita hasa, na iyen,
“Sakiyesi u leta be’uma. Do’ata haba em ai luma te miya.”
Dodoga sa tauhiti pa’ana in mate doga heyayana. In moho, Sakiyesi ya lau leta, be Yesu ya failobahin. Yesu ya faliba mate, ena laulau haba ya buidi. Be Yesu iyen,
“Aho itete, loholoho ya la’oma luma yai te.”
Yesu ya laoma be salumadi Yaubada sa fakau mate, ya yo’oidi, yo ya saguhidi.
##
\h End of Book 7.
\h Buka fafafaligigi luwagana.
\h Translated by Patrick Sadileutu, 1/1/06.
\h 2nd Check Done, 6/2/06.
\h keyboarded by Mary Cooper, 1/2008.
\h 2008-11 proofreading and final accuracy check √. Russ Cooper.