انظر، انتبه وعش 1
![انظر، انتبه وعش 1](https://static.globalrecordings.net/300x200/lll1-00.jpg)
Ուրվագիծ: Adam, Noah, Job, Abraham. 24 sections. It has a picture book to go along with the recording.
Սցենարի համարը: 418
Լեզու: Arabic, Sudanese: Khartoum
Թեմա: Sin and Satan (Judgement, Sin, disobedience, Satan (the devil)); Christ (Sacrifice / Atonement); Eternal life (Salvation); Character of God (Grace and Mercy, Nature, character of God, Word of God (the Bible)); Living as a Christian (Worship, Obedience, Faith, trust, believe in Jesus); Bible timeline (Creation, Prophecy, fulfillment of, Gospel, Good News); Problems (Problems, troubles, worries)
Հանդիսատես: General
Ոճ: Dialog
Ժանր: Bible Stories & Teac
Նպատակը: Teaching
Աստվածաշնչի մեջբերում: Extensive
Կարգավիճակ: Publishable
Սցենարի տեքստ
الكتاب الاول – البداية مع الله تعالى
![الكتاب الاول – البداية مع الله تعالى](https://static.globalrecordings.net/300x200/lll1-01.jpg)
تكوين 1:1 - 2 :14
مقدمة
2- عزيزي المستمع.. عزيزتي المستمعة.. هل معك الكتاب الملون؟
1- آي والكتاب ده فيهو شنو؟
2- الكتاب ده فيهو قصص من كتاب الله تعالي – الكتاب المقدس. شوف الصور واسمع الكلام/الشريط ده.
لمن تسمع صوت الموسيقى ممكن تقلب الصفحة. يالا خلونا نبدا.
2- انت شايف الصوره رقم (1)؟
1- أي انا شايف الزول ده – ده منو؟
2- الزول ده اسمه آدم – وهو اول راجل عاش على الارض.
1 – وهل هو كان من البدايه؟
2 – في البدايه خالص ما كان في حاجه على الارض. كان الله تعالى هو الموجود بس.
1 – الله؟
2 – نعم هو الإله الواحد الحقيقي – هو الروح الكبير. الله تعالى هو طبعاً قادر على كل شي. الله تعالى خلق الإنسان اللي انت شايفو في الصوره – الله خلق النور على الارض الضلمه وبعدها خلق السما وفصل البحر عن الارض اليابسه وقوّم الزرع. الله تعالى كمان خلق الشمش والقمر والنجوم.
1 – تمام. أها وبعدين؟
2 – بعد كده خلق كل المخلوقات الحيه على الارض وخلق الله تعالى الإنسان في الآخر. الله خلقه من تراب الارض، ونفخ في روحه وبقى الإنسان على صورة الله. وكان نيات ورغبات الإنسان وأفكاره متفقه مع الله.
1 – لكن هل ده كلو اللي الله خلقه؟
2 – لا.. الله خلق كمان المخلوقات الروحية زي الملايكه.
1 – الملايكه؟! وهل بتقدر توصفها لي؟
2 – الملايكه هي ارواح صالحه بتعيش مع الله في السما.
1 – يعني بتقصد انو الملايكه هي أرواح صالحه. مش كده؟.
2 – آي كانو كده. ولكن من مده بعيده واحد فيهم اسمه إبليس او الشيطان قام إتمرد على الله تعالى اللي خلقه. وإتكبر عليهو. فرماهو الله في الارض و ساق وراوه عدد كبير من الملايكه. الله تعالى بسميها الليله الارواح الشريره، وبقو أعداء الله تعالى، وكمان بيعتبرو من الد أعداء الإنسان يعني أعداءنا كمان. وزي ما الله تعالى بيحب كل البشر في كل مكان . فإبليس او الشيطان وملايكتو بيكروهم وعايزين يبعدهوم عن الله.
موسيقى
الصوره التانيه: (2) إحتياجات الإنسان
![الصوره التانيه: (2) إحتياجات الإنسان](https://static.globalrecordings.net/300x200/lll1-02.jpg)
تكوين 2: 15- 25
1 – انت كلمتنا عن خليقة الله تعالى لآدم. لكن من وين كان آدم بيلقى إحتياجاته؟
2 – الله ختى آدم في جنينه جميله سماها الجنه. وطلب منه ان يخلي بالو من الجنينه يعني يشتغل فيا وكان هناك اشجار من كل الانواع.. ومن ضمنهم شجرة الحياه. وبالطريقه دي كان لآدم كل انواع وأصناف المأكولات.
1 – وطيب الطيور والحيوانات كانت بتعيش وين؟
2 – كانت بتعيش جنب آدم وسماها بالاسماء اللي معروفه بيها. وكان موجود من كل صنف منها الضكر والانتايه. ولكن مافي ولا واحدة من الحيوانات سببت لآدم خوف او اذى.
1 – وهل كان آدم مبسوط بحياته دي؟
2 – الحقيقه ما كان في هناك اي زميل او مساعد لآدم. عشان كده الله تعالى خلق ليه زوجة زي ما انت شايف في الصوره والله خلقها بالطريقهدي. الله تعالى خلى آدم ينوم نوم تقيل. وقام طلع ضلعه من جنبه. وخلق له زوجه وجابه ليهو. وآدم سمها حوا. وكان آدم وحوا عريانيين ولكن ما كانو بيخجلو. وكان بيتكلمو مع الله زي الاصحاب. وما كان في هناك حزن او موت او شر في الجنه الجميله ديكا. عشان كده كان آدم مبسوط بحياتو دي.
موسيقى
الصوره التالته: (3) بداية الخطيه (تكوين
![الصوره التالته: (3) بداية الخطيه (تكوين](https://static.globalrecordings.net/300x200/lll1-03.jpg)
تكوين 3: 1 - 8
1 – هل كانت هناك وصايا ادها الله للإنسان؟
2 –آي. الله قال لآدم وحوا بأنهم يأكلو من كل ثمار شجر الجنه. الا من شجره واحده. و هي شجرة معرفة الخير والشر. ويوم يأكلو منها حايموتو.
1 – وهل سمع آدم وحوا كلام الرب الإله؟
2 – في يوم من الايام جا الشيطان لحوا في صورة ثعبان وغشها وأغواها عشان تاكل (لتأكل) من الشجره المحرمه. وقال ليها:
الشيطان: هل صحيح الله قال ما تاكلو من كل شجر الجنه!
حواء: من ثمر شجر الجنة ناكل. ولكن ثمر الشجره اللي في وسط الجنه الله قال ما ناكل منا ولا نلمسها عشان ما نموت.
1 – وهل سمعت حوا لكلام الشيطان؟
2 – المرا شافت انو الشجره لذيذه للأكل وانها بهجه للعيون ومثيره للنظر. فشالت من ثمرها و أكلت وأدت راجلها كمان. فأكل معها. وبعدها عرفوا إنهم أخطأوا وخالفو كلام الله تعالى. فبقوا خجلانيين عشان كانو عريانيين، وحاولو يدسو من الله.
1 – وهل قدروا؟
2 – لا. فقدرة الله تعالى عظيمه، وهو برضو (أنه)لطيف. لكن اذا خالفنا وصيتو ما بيقدر يقول لينا "معليش مش مهم" الله تعالى ما بغير كلمتو، وإذا إتمردنا عليه فهو حيعاقبنا. ولكن لما نحب ونطيع كلمتو هو حيساعدنا!
موسيقى
الصوره الرابعه: (4) نتايج الخطيه
![الصوره الرابعه: (4) نتايج الخطيه](https://static.globalrecordings.net/300x200/lll1-04.jpg)
تكوين 3: 14 - 24
1 – وهل الله عاقب آدم وحوا بعد ما أخطأوا؟
2 – الله تعالى طردهم من الجنه. وما قدرو يأكلو من شجرة الحياه. وقال الله لحوا:
صوت الله: أنا حأكتر أتعاب حملك. بالوجع حتلدي اولاد.
2 – وقال لآدم:
صوت الله: عشان سمعت لكلام مرتك وأكلت من الشجره اللي أنا وصيتك بانو ما تأكل منا بسببك الآرض ملعونه وبالتعب حتاكل منا كل عمرك. بعرق جبينك حتعيش.
1 – وعمل شنو للدبيب؟
2 – الله تعالى لعنا وقال ليها:
صوت الله: عشان عملت ده انتي ملعونه من جميع البهايم ومن كل حيوانات البريه المتوحشه. على بطنك حتزحفي، وحتاكلي التراب.
2 – وادى آدم المرا بإسم حوا ومعناها. (ام كل حي). وجابت ليهو اولاد، وهم أجداد كل الناس.
1 – وهل كان الأولاد (أولاد)صالحين؟
2 – من الوكت داك ورث كل الناس الطبيعه الشريره (البطاله) وإبتعدوا عن الله تعالى. وكلنا أصبحنا بنخالف الله، وده طبعاً خطيه، وتمن الخطيه هو الموت.
1 – يعني مصيرنا هو الموت والهلاك؟
2 – لا. في هناك طريقه وامل. الله وعد انو في يوم من الأيام حيرسل نسل المرا وهيهزم الشيطان اللي ضلل الناس في الخطيه. والموعود ده هو سيدنا عيسى ابن مريم (يسوع المسيح)، وأي زول بيومن بيهو حينال باسمو غفران لخطاياه وحينجو من غضب الله الجاي.
موسيقى
الصوره الخامسه: (5) نوح رجل صالح
![الصوره الخامسه: (5) نوح رجل صالح](https://static.globalrecordings.net/300x200/lll1-05.jpg)
تكوين 6: 1 - 22
1 – شنو الحيوانات الكتيره دي الشايفنا في الصوره؟
2 – طبعاً عيال آدم كتروا وانتشروا في الارض، ومشوا في طريق الشيطان، وعملو الشر.
1 – يعني حسب كلامك الله عاقبوم؟.
2 – (آي) نعم. الله تعالى تأسف وحزن انو خلق الإنسان. إلا انو كان في راجل واحد صالح اسمه نوح حاول يرضي الله. ويوم من الايام الله كلم نوح وقال ليهو:
صوت الله: انا قررت امسح كل الجنس البشري. لأنو الارض اتملت من اعمالهم الشريره. اسمع يا نوح قوم ابني ليك سفينه عشان حارسل طوفان على الارض اللي راح يمسح كل مخلوق حي. ولكن حأعمل اتفايقتي معاك. وبعدين قم ادخل السفينه ومعاك مرتك واولادك التلاته ونسوانم، وشيل معك جوا السفينه من كل جنس ضكر وانتايه – من كل حيوان وطير عشان/علشان يكونو على قيد الحياه. وده اللي انت شايفو في الصوره.
1 – لكن كيف نوح قدر يبني السفينه بالطريقه دي/ده؟
2 – طبعاً .. الله ( الرب) شرح لنوح مواصفات السفينه ومقاساتا.
1 – وهل عمل كده بالتمام؟
2 – آي. نوح عمل زي ما امره الرب (الله) تماماً زي ما انت شايف في الصوره دي.
موسيقى
الصوره الساته: (6) حدوث الطوفان
![الصوره الساته: (6) حدوث الطوفان](https://static.globalrecordings.net/300x200/lll1-06.jpg)
تكوين 7: 1 - 24
1 – وهل حصل الطوفان؟
2 – الله دايماً بيتمم مواعيدو وبوفي بوعودو. يعني بيعمل زي ما بيقول. دخل نوح واسرتو والمخلوقات الآخرى جوا السفينه وقفل الله الباب عليم. وبعد سبعة ايام بدا المطر ينزل واستمر لمدة اربعين يوم واربعين ليله، واتفجرت عيون المويه من تحت الارض وغطت كل الارض، وكان شي رهيب.
1 – وهل قدر زول ينجو؟
2 – لا. طبعاً كل الناس غرقت وماتت، وكل حيوان وكل طير في الارض. ما عدا الناس اللي دخلت السفينه.
1 – يعني ممكن نقول ان طبيعة الناس اتغيرت بعد هلاك كل الاشرار؟
2 – لا. للأسف ما اتغيروا. فطبيعتم برضه شريره، وماشين ورا الشيطان وابوا يلتفتوا وادوا ضهروم الى الله تعالى. وهو بيقول لينا في – الكتاب المقدس – انو في يوم من الايام حيجي عشان يدين شر الناس و يرمي الاشرار في نار جهنم.
1 – يعني كده ما في طريقه للخلاص؟
2 – لا. الله تعالى عندو طريقه للخلاص من الدينونه لكل الناس اللي حيومنو بيوه ويطيعوه بواسطة الرب يسوع المسيح اللي شال خطيانا في جسمو على الصليب.
موسيقى
الصوره السابعه: (7) قوس القزح (الوان الطيف) – وعد الله
![الصوره السابعه: (7) قوس القزح (الوان الطيف) – وعد الله](https://static.globalrecordings.net/300x200/lll1-07.jpg)
تكوين 8: 13 - 22
1 – هل بتعرف المده اللي قعداه نوح واسرتو جوه السفينه؟
2 – نوح قعد مع اسرتو وكل المخلوقات اللي كانت معوه جوه السفينه لمدة اكتر من سنه، يعنى (12) اتناشر شهر تقريبا. وبعد ما الارض نشفت مرقو كلهم من السفينه.
1 – وعملوا شنو بعد ما مرقو من السفينه؟
2 – بدا نوح يبني مذبح للرب (الله) زي ما شايف هنا. وقدّم بعض الحيوانات ضبايح ومحرقات لله تعالى على المذبح. والله كان مبسوط بالعمل ده.
1 – وهل دي كانت بدايه علاقه جديده بين الله تعالى والإنسان؟
2 – آي. وضع الله قوس الوان الطيف ( قوس قزح) في السما زي علامه إتفاق بين الخالق والمخلوق وقال:
صوت الله: انا راح اعمل إتفاقيتي معاكم وما حيكون تاني طوفان عشان يخرب الارض. ودي علامة الإتفاقيه اللي انا عامله بيني وبينكم لى اجيال واجيال. وختيت قوسي في السحاب، و تكون علامه إتفاقيه بيني وبين الارض. ويكون لما انشر السحاب على الارض وتظهر القوس في السحاب انا حاذكر إتفاقيتي الي بيني وبينكم.
2 – ولما تشوف قوس الوان الطيف (قوس قزح)، اتذكر وعد الله تعالى. واتذكر كمان انو الله حيدين العالم مره تانيه. ولكن في المره الجاية حيحرق العالم بنار والناس اللى آمنو بيهو ما حيخافو، لأنو ما حيكون عندهم عقاب (دينونه). امشى ورا يسوع المسيح المخلص وانت راح تخلص وتنجو من عذاب نار الجهنم.
موسيقى
الصوره التامنه: (8) اولاد نوح
![الصوره التامنه: (8) اولاد نوح](https://static.globalrecordings.net/300x200/lll1-08.jpg)
تكوين 11: 1 - 9
1 – هل كلمنا الكتاب المقدس عن اسماء اولاد نوح التلاته؟
2 –آي. اسموم سام وحام ويافث، وهم أجداد كل الناس. والله قاليهم ان يتكاترو ويعيشوا في الارض.
1 – وهل كانت ليهم لغات بتفاهموا بيها؟
2 – كان الناس بتتكلم لغه واحده، ولكن ما كانوا دايرين يتفرقوا في الارض، وعصوا الله تعالى، وقرروا ان يبنوا ليهم مدينة ليها برج بيصل للسما. والله طبعاً شاف المدينة والبرج. وكمان شاف عصيان الناس وتكبرهم.
1 – وعمل شنو؟ هل جاب ليهم طوفان مرة تانيه وغرقهم وموتهم؟
2 – لا. الله وعد بانو ما حيغرق وحيهلك الارض مرة تانية بالطوفان لاكنو قال؟ هسع الشعب ده بقوا واحد، و عندهم لسان واحد، وياهوا هم ابتدوا بالشغل. وهاسع ما في شي ما بيقدروا يعملوه اذا نوا او ارادوا! تعال ننزل ونلخبط لسانهم عشان ما يقدروا يسمعوا بعضهم البعض عشان ما يقدروا يتفاهموا مع بعض.
2 – وزي ما انت شايف في الصوره انو الناس ما قدروا يفهموا بعضهم البعض. وبالطريقه دي اتوقفوا عن عمل بنا المدينة واتشتتوا واتفرقوا على وش كل الارض.
1 – هل ده معناه ان عصيان الناس هو الكان السبب ورا وجود اللغات الكتيره؟
2 – آي. لأنو عدم الطاعه خطيه بتفصل الناس بعضهم من بعض، كمان العصيان وعدم الإيمان او التصديق بيفصلوا الناس عن الله تعالى.
موسيقى
الصوره التاسعه: (9) أيوب الصديق
![الصوره التاسعه: (9) أيوب الصديق](https://static.globalrecordings.net/300x200/lll1-09.jpg)
أيوب 1:1 -12
1 – في الصوره دي انا شايف زول واقف قدام مذبح. ده منو يا ترى؟
2 – الزول ده اسمو أيوب وبيلقبوه بأيوب الصديق، او أيوب الصبور. وهو بقدم قربان لله تعالى. كان أيوب الصديق بيعبد الله. الإله الحقيقي، وما كان بيمشي ورا طريق الشيطان زي باقي الناس.
1 – وهو ليه بقدم ضبيحه؟
2 – أيوب كان عندو سبعه اولاد وتلاته بنات، وكانو بيتلمو كل يوم في بيت واحد منهم وكان أيوب بيقدم ضبايح على قدر عدد اولادو. يعني نيابة عنهم، وبيدعو لله تعالى ان يغفر ذنوبم على احتمال انوهم امكن يكونو عملو او ارتكبو ليهم خطيه ضد لله سبحانه وتعالى. عشان كده كان الله مبسوط من أيوب، وبقاهو غنيان خالص. فايوب كان عندو قطعان من الغنم، والجمال والبقر والحمير. وكان عندو خدامين كتار.
1 – يبقى ما دام كان أيوب رجل صالح اكيد الحاله دي استمرت معاه. مش كده.؟
2 – لا. في يو م من الأيام حصل حاجة في السما. قال الشيطان كلام كدب عن أيوب قدام الله تعالى.
1 – والشيطان كدب وقال شنو؟
2 – الشيطان قال: ان أيوب ده بيعبد الله عشان هو عشمان في البركه بتاعت الله وعشان يبقيوه غنيان كمان. وايوب ده اكيد ما بيعبد ربنا كده ببلاش، وقال كمان اذا الله راد وشال منو كل ممتلكاتو اكيد حيلعن ربنا عشان كان عندو مصلحه.
1 – وهل صدق الله كلام الكدب بتع الشيطان؟
2 – لا. فالله تعالى هو بيعلم بكل شي، وعرف انو أيوب ده راجل بار وصالح، وداير يرضيوه باي طريقه، عشان كده ادى إذن للشيطان عشان يجربو وياخد منو كل شي، (بس ما ياخد منو حياتو).
موسيقى
الصوره العاشره: (10) وكت الضيق الشديد
![الصوره العاشره: (10) وكت الضيق الشديد](https://static.globalrecordings.net/300x200/lll1-10.jpg)
ايوب 1: 13 - 22
1 – في الصوره دي انا شايف ايوب راقد على الارض. هو عيان ولا شنو؟
2 – آي الصوره دي يتورينا انو اليوم ده كان يوم حزن شديد لايوب. خدامينو جابو ليهو اخبار مزعجه ومؤلمه خالص. فالخدام الاول جا وقال ليهو: ان الاعداء قتلوا الخدامين وسرقو تيرانو وحميرو، وقبل ما يكمل كلامو .. ظهر الخدام التاني وقال: ليهو، ان الصاقعه ضربت الغنم والرعاه وماتو كلوم، واثناء الكلام ظهر الخدام التالت وقال ليهو: ان المجرمين والحرامية هجمو عليهم وسرقو جمالو، وبعد كده جاء الخدام الاخير نمره اربعه باخبار سيئه وشينه وقال:
صوت الخدام: اولادك وبناتك كانو بياكلو وبيشربو في بيت اخوهم الكبير، و فجاءة قام هبوب شديد جاي من الخلا.. وضرب اركان البيت الاربعه فوقع عليهم، وماتو كلوم وانا فضلت براي عايش عشان اكلمك.
1 – عشان كده ايوب وقع على الارض.
2 – ايوب حلق شعر راسو ووقع على الارض وكان حزين وقال:
صوت ايوب: عريان مرقت من بطن امي وعريان ارجع لهناك. الرب ادى والرب شال خلي اسمو يكون مبارك.
2 – ورغم كل المصايب اللي حصلت ليهو، ايوب ما اخطا او قال كلام شين ضد الله تعالى.
موسيقى
الصوره رقم: (11) أيوب يتعذب
![الصوره رقم: (11) أيوب يتعذب](https://static.globalrecordings.net/300x200/lll1-11.jpg)
أيوب 2: 1 - 34
1 – وهل الحاله دي استمرت مع ايوب كده؟
2 – الشيطان شاف ان ايوب لسع بيكرم الله تعالى، فقال الشيطان لله:
صوت الشيطان: "جلد بجلد فالانسان يبذل كل ما يملك فداء نفسه"، ولكن بس اذا مديت يدك وهبشت عضامو ولحمو فاكيد هيجدف عليك في وشك، ويلعنك.
1 – و هل الله سمح للشيطان بالكلام ده؟
2 – نعم/آي سمح الله للشيطان بان يجرب ايوب مرة تانيه، فضربو الشيطان بمرض جلدي خطير، وايوب بدا يحك جلدو بقطعه من الفخار.
1 – وزوجة ايوب قالت:
صوت الزوجه: ياخي ما تلعن الله و مت!
2 – فقال ليها ايوب:
صوت ايوب: انتي بتتكلمي زي واحده من الجاهلات اللي ما فاهمات. هل نقبل الخير من الله ولما يجي الشر نابواه؟
1 – وهل كان ايوب عندو اصحاب يواسوه ويعزوه؟
2 – جا لزيارتو تلاته من اصحابو. وإتكلمو معوه لايام، ولكن كلامهم زاد من حزن ايوب شويه، وحاولو بان يعرفو سبب البلاوي والمصايب اللي حصلت عليهو، وافتكرو ان ايوب ده اكيد بيكون عمل لهو حاجه كعبه او عمل شر، عشان كده الله تعالى عاقبو. ولكن ايوب كان عارف بينه وبين نفسو انو ما عمل شر ولا حاجة كعبه. وبعد ده الله إتكلم مع اصحاب ايوب، ووراهم انو هو وحدو اللي عالم وعارف بكل شي. وهم ما بيفهمو طرق الله العجيبه. فالله تعالى في محبتو لينا بيختار الخطه والطريقه الصالحه لينا. فهو خير العارفين.
موسيقى
الصوره رقم: (12) أيوب يرجع لحالتو الاولى
![الصوره رقم: (12) أيوب يرجع لحالتو الاولى](https://static.globalrecordings.net/300x200/lll1-12.jpg)
ايوب 2:1-17
1 – آها.. دي صورة مائده رجل غني. هو منو؟
2 – ده أيوب .. أيوب الصبور. طبعا هو لقى العافيه ورجع لحياة الغنى بتاعو مرة تانيه. وانا حاقصليك الحكايه دي تمت كيف؟ لامن اتقابل ايوب مع الله تعالى – اتاكد ليهو كيف انو الله ده هو عظيم. فخجل من نفسو.. عشان كان اشتكى على الله تعالى. وبعدين قام وصلى من اجل اصحابو – عشان هم ما كانو فاهمين الحقيقه عن الله تعالى.
1 – وهل رجع الله لايوب غناهو مرة تانيه.؟
2 – آي. وزيادة كمان. الله اداهو ضعف من كل ما كان يملك. واداهو كمان سبعه اولاد تانيين وتلاته بنات حلوات. و جا ليهو اصحابو وقرايبو عشان يفرحو معاهو. وجابو معاهم هدايا لايوب.
1 – وهل ايوب عاش عمر طويل بعد ده؟
2 – آي ايوب عاش ميه و اربعين 140 سنة وشاف اولاد اولاده لغاية الجيل الرابع. وبعد كده مات وهو شيخ شبعان من ايام عمرو.
1 – وهل الله قصد انو يعلمنا درس من الحكايه اللي حصلت لايوب؟
2 – بدون شك. فالله سبحانه وتعالى دايرنا يكون عندنا صبر واحتمال لما تجينا التجارب. عشان هو عارف ليه نحنا بنتجرب في الحياه دي؟ وهو وحدهو تعالى اللي بتحكم في كل الامور والمصاير. فقط علينا ان نتذكر انو الله ده بيحبنا وداير الخير للناس البيكرموه.
ترنيمة/موسيقى
الصوره رقم (13) – ابراهيم رجل الايمان – (ابراهيم يطيع الله)
![الصوره رقم (13) – ابراهيم رجل الايمان – (ابراهيم يطيع الله)](https://static.globalrecordings.net/300x200/lll1-13.jpg)
تك 12: 1 -13 :4
1 – هل دي صوره أسره بترحل لمكان تاني؟
2 – أي. الأسره دي ماشه في رحله طويله. طبعاً هم خلو بلدهم و اهلهم.
و القصه بتقول كده: قال الرب لراجل اسمو ابراهيم:
صوت الله: قوم امشي من ارضك و من أهلك و من بيت ابوك للارض اللي حاوريك ليها.
2 – ابراهيم، مشى معوه زوجتو وولد اخوه لوط كمان، وشالو معهم كل ممتلكاتهم
ولما وصلو لارض اسمها كنعان الله تعالى ظهر لابراهيم وقال ليهو:
صوت الله: انا حاديك الارض دي لنسلك.
2 – وبنى هناك ابراهيم مذبح للرب. وكان بيدعو باسم الرب.
1 – ويا ترى الحياه كانت سهله في المكان ديه؟
2 – طبعاً في البدايه الحياة كانت صعبه. وبعدين حصل مجاعه.
وكان لازم يقوم ابراهيم مع اسرتو عشان يمشو لمكان تاني عشان يلقو اكل.
1 – وهل قعد ابراهيم هناك؟
2 – لا هو رجع مرة تانيه لارض كنعان. عشان هو آمن بوعود الرب.
وكمان الله تعالى وعدنا بحياه جديده، وحنكون معوه في المكان اللي هو بيحكم او بيملك فيهو.
ولكن لازم نسمع كلامو عشان نقدر نحصل على وعودوه.
موسيقى
الصوره رقم (14) اختيار لوط
![الصوره رقم (14) اختيار لوط](https://static.globalrecordings.net/300x200/lll1-14.jpg)
تك 13:5 - 18
1 – طيب لوط ود اخو ابراهيم كان وضعه شنو؟
2 – طبعاً ابراهيم ولوط كانو غنيانين جداً. وكان عندهم عدد كبير من الغنم، وبالطريقه دي ما لقو اكل كفاية للمواشي في محل واحد.
1 – وعملو شنو؟
2 – رعاة غنم ابراهيم ورعاة غنم لوط اتشاكلو مع بعض، فقال ابراهيم للوط ود اخوه:
صوت ابراهيم: نحنا ما عايزين نتخاصم ولا عايزين يكون هناك خصام بين رعاتي ورعاتك عشان نحنا اخوان. مش الارض دي كلها قدامك. امشي مني، واختار ليك المكان البريحك.
2 – وزي ما انت شايف في الصوره. لوط قام اختار لنفسه الوادي الخصيب والجميل في نهر الاردن. كان هناك في مدن جاهزه للسكن. وقام لوط ومشى وسكن في الوادي اللي جنب مدينة سدوم وطبعاً ناسها كانو اشرار خالص.
1 – وطيب ابراهيم مشى وين؟
2 – ابراهيم قعد في ارض كنعان والله تعالى اتكلم معوه وقال ليهو:
صوت الله: ارفع عينك وشوف من المكان اللي انت واقف فيهو – شمال وجنوب وشرق وغرب. عشان كل الارض اللي انت شايفها دي حاديها لك ولنسلك.
2 – وزي ما اهل الدنيا بيختارو الحاجات السمحه اللي عايزنها لحياتهم، نحن برضو علينا ان نؤمن ان الرب بيهتم بنا وبيختار لينا الأفضل.
موسيقى
الصوره رقم (15) ابراهيم ينقذ لوط
![الصوره رقم (15) ابراهيم ينقذ لوط](https://static.globalrecordings.net/300x200/lll1-15.jpg)
تك 14:1 - 24
1 – انا شايف في الصوره دي شويه اسلحه. وهل كانت في حروب ومعارك في الايام ديك؟
2 – آي. من الوقت اللي اتوجد فيهو الانسان على الارض دي. وفي الوادي اللي عاش فيهو لوط .. حصل حرب بين ملك سدوم وخمسه ملوك تانيين. وفي الحرب دي سدوم انهزمت. وشالو لوط واسرتو كاسرى مع شعب سدوم.
1 – وهل ابراهيم عمل حاجه عشان ينقذ ولد اخوه؟
2 – ابراهيم مشى ومعوه 318 (تلتوميه وتمنتاشر) راجل من عبيدو عشان ينقذو لوط. آي قدرو يهزمو العدو وانقذو لوط مع كل الشعب والممتلكات.
1 – وهل الملك ده اللي واقف في الصوره هو ملك سدوم؟
2 – لا. لما رجع ابراهيم وعبيدو اتقابلو مع الملك اللي انت شايفو في الصورة. واسمو ملكي صادق. وكان ملك على مدينه اسمها السلام، وكان بيعبد الإله الواحد الحقيقي، وحقيقه هو أرضى الله تعالى في كل حاجه. ولما عرف بالمعروف اللي عملو الله لابراهيم، جا ليهو وجاب معاوه اكل وشراب لابراهيم. وزي ما انت شايف انو ابراهيم ركع امام ملكي صادق وبعد كده قدم هدايا.
1 – وملك سدوم عمل شنو لابراهيم بعد ما انقذوه هو وناسو وأملاكو؟
2 – مرق ملك سدوم وكان داير يكافئ ابراهيم على العمل اللي عملو، ولكن ابراهيم ابى يشيل منو اي حاجة. عشان الملك وشعبو كانو اشرار خالص. وده بيعلمنا انو ما لازم نمشي في سكه الناس الاشرار. لان طريق الشر بيوديهم في السكه اللي نهايتها الموت.
1 – طيب حصل شنو لملكي صادق؟
2 – ملكي صادق ده بيرمز الى الرب يسوع المسيح، وزي ما اكرم ابراهيم ملكي صادق، كمان يجب علينا ان نكرم الرب يسوع ونتبع طرقو اللي بتقود لى السلام وتتفق مع الله.
موسيق
الصوره رقم (16) وعد الله لابراهيم
![الصوره رقم (16) وعد الله لابراهيم](https://static.globalrecordings.net/300x200/lll1-16.jpg)
تك 15:1 -12
1 – ابراهيم ما خاف من الاعداء بعد كده مش؟
2 – بعد ما قام ابراهيم بانقاذ لوط والشعب، رجع لوط مرة تانيه لمدينة سدوم، وطبعاً احتمال ابراهيم بيكون كان خايف شويه، لكن الله تعالى اتكلم معوه وقال ليهو:
صوت الله: ما تخاف يا ابراهيم انا ترس ليك. عشان الاجره بتاعتك كتيره جداً.
2 – ولكن في الوقت ده.. ابراهيم كان مكتئب ومدبرس عشان ماكان عندو اولاد. عشان كده الله طلعو لبره وقال ليهو:
صوت الله: شوف السماء وحاول تعد النجوم اذا قدرت. بالطريقة ديه حيكون نسلك.
1 – وهل صدق ابراهيم وعد الله ليهو؟
2 – آي. ابراهيم صدق كلام الله ووعودوه ليهو رغم انو هو ومرتو كانو عجايز. لكن الله كان مبسوط من ابراهيم واكد ليهو وعدوه مرة تانيه .. بانو حيديهم ارض كنعان ولنسلو من بعده. طبعاً الله دايرنا نصدقوه ونسمع كلامو في الكتاب المقدس.
ونحنا طبعاً بنرضي الله اذا صدقنا كلامو ووعودوه زي ما عمل ابراهيم.
موسيق
الصوره رقم (17) ولادة اسمعيل
![الصوره رقم (17) ولادة اسمعيل](https://static.globalrecordings.net/300x200/lll1-17.jpg)
تك 16: 1 -16
1 – انا شايف في الصوره ده ولد. هل الله نفذ وعدوه؟
2 – آي. ولكن ده ما الولد اللي ربنا وعد بيهو ابراهيم
1 – لكن يبقى الجنه ده ولد منو؟
2 – هو ود ابراهيم.. اصبر لي شويه.. انا حا احكي ليكم قصه.
ابراهيم عاش في كنعان عشره 10 سنين. ولكن للاسف زوجتو ساره ما جابت ليهو اولاد . وسارة كانت عندها خدامه اسمها هاجر، وقامت ادت هاجر لراجلها ابراهيم عشان يجيب منها ولد. وبعد كده تقوم تشيلو ويكون ولدها ويورث ابراهيم، وفعلاً هاجر حملت من ابراهيم.
1 – وسارة طبعاً تكون فرحت.
2 – لا بالعكس. لما حملت هاجر احتقرت مولاتا شديد. فساره طبعاً كانت غيرانه منها وعاملتها بقساوه لدرجة انو هاجر جرت منها لمكان بعيد ولكن ملاك الله اتقابل مع هاجر وقال ليها:
انها حتلدي ولدها وهاتسميهو اسمعيل ومعناو .. "الله يسمع" وحيكون عندو نسل كتير وحيكونو ضد الناس وفعلاً اصبح اسمعيل ابو امة العرب.
1 – طيب ليه ساره عملت الكلام ده اذا ما كانت دي ارادة الله؟
2 – مرات كتيره بنحاول نعمل حاجات كتيره بطريقتنا الخاصه، عشان كده بنعمل مضايقات وبنسبب حزن لناس كتيره، عشان كده لازم نثق ونصدق الله ونصبر ليهو (شويه) عشان هو بيقدر يتمم خطته لنا وبطريقتو هو.
موسيقى
الصورة رقم (18) تجديد وعد الله
![الصورة رقم (18) تجديد وعد الله](https://static.globalrecordings.net/300x200/lll1-18.jpg)
تك 18:1 - 15
1 – انا ما فاهم حاجه من الصوره ديه؟
2 – طيب ممكن اشرحها ليك. في يوم من الايام ابراهيم عمرو كان تسعه وتسعين سنه. زاروه تلاته من الضيوف في خيمتو!
1 – وديل منو؟
2 – ديل كانو رسل من عند الله. طلب ابراهيم من ساره زوجتو انو تجهز الاكل للضيوف وعمل ليهم وليمه. وبعد الاكل الضيوف سألو ابراهيم:
صوت الضيف: وينو ساره مرتك؟
صوت ابراهيم: ابراهيم رد وقاليهم: هاديك في الخيمه.
2 – وواحد من الضيوف قال لابراهيم:
صوت الرب: انا هارجع ليك في زمن الحياه يعني "بعد سنه" وحيكون لساره مرتك ولد.
2 – وكانت ساره واقفه في باب الخيمه و بتسمع الكلام ده. فضحكت لان عمرها كان 90 تسعين سنه، وما صدقت الكلام ده. وبعدها الرب كلم ابراهيم وقال ليهو:
صوت الرب: ليه ساره ضحكت هل في حاجه الله ما بيقدر عليها، في الوكت ده حارجع ليك بعد سنه وحيكون لساره ولد.
2– آي. طبعاً مافي حاجه صعبه على ربنا. زي ما قلت ليك.. دايماً بيوفي بوعوده.
موسيقى
الصورة رقم (19) ابراهيم يحامي عن سدوم
![الصورة رقم (19) ابراهيم يحامي عن سدوم](https://static.globalrecordings.net/300x200/lll1-19.jpg)
تك 18:19 -29
1 – انا شايف هنا ابراهيم زي كأنه بيتضرع (بيصلي) للرب بطلب معين. مش كده؟
2 – ده تمام. الله تعالى قال لابراهيم بأنو حيحرق سدوم وحيحرق عمورة – عشان الناس اللي فيها اشرار. ولما اتذكر ابراهيم لوط قال للرب:
صوت ابراهيم: طبعاً ما ممكن تعمل الكلام ده. انك تقوم تموت البري مع المجرم. فيكون البري زي المجرم. هل الله البيحكم كل الارض ما عادل؟
2 – وبدا ابراهيم يدافع ويتشفع لي الله تعالى عشان ينقذ سدوم. زي ما انت شايف في الصوره.
1 – وهل الرب سمع لابراهيم؟
2 – قال ليهو تعالى – انو ما حيحرق سدوم وعموره اذا لقى فيها 20 عشرين او 10 عشره ابرياء. ولكن مع الاسف ما لقى العدد ده. ولما جا الرسل لسدوم شافو الشر العظيم في الشعب. واجبرو لوط واسرتو عشان يهربو ويجرو من المدينه. وبعد ده الرب رسل نار من السما وحرقت سدوم وعموره وكل الاشرار اللي في الوادي.
وما نجا او مرق غير لوط وبناتو الاتنين. ولكن مرتو اتاخرت شويه وقنبت تعاين وراها.. فاتقلبت لعمود ملح. واتدمرت.
موسيقى
الصوره رقم (20) الله يمتحن ابراهيم
![الصوره رقم (20) الله يمتحن ابراهيم](https://static.globalrecordings.net/300x200/lll1-20.jpg)
تك 21: 1 -22:19
1 – ابراهيم ارتكب جريمه؟
2 – لا. زي ما انت عارف انو ساره كانت في عمر التسعينات .. لما ولدت اسحق زي ما وعد الله تعالى، واسحق معناوه "هو ضحك" ولما بقى اسحق شاب صغير – امتحن الرب ابراهيم وقال ليهو:
صوت الله: يا ابراهيم شيل ولدك الوحيد اللي انت بتريدو وامشي لارض المرّيا وقدمو هناك قربان على واحد من الجبال اللي انا هاوريك.
1 – وهل اطاع ابراهيم الله في الطلب الغريب ده؟
2 – نعم ابراهيم سمع واطاع. عشان هو آمن لدرجة انو حتى لو قدّم ابنو اسحق قربان - فالله تعالى حيقومو مرة تانيه. ابراهيم جهز ولدو اسحق كقربان لله تعالى، ورقدو على المذبح زي ما شايف في الصوره.
1 – وهل قدر الله يعمل الكلام ديه؟
2 – لما قرب ابراهيم يده من السكين وكان عايز يذبح اسحق. نادوه ملاك الرب من السما وقال ليهو:
صوت الله: لا. ما تمد يدك على الولد الصغير، وما تعمل ليهو اي حاجه. عشان انت هسع اكدت لي بانك تقي وخائف الله. انت ما مسكت ولدك الوحيد عني.
2 – وقام ابراهيم فشاف كبش ماسك بقرونو في الشجره. فشالو وقدمو قربان لله بدل من ولدو اسحق. وعشان ابراهيم سمع واطاع الله، الله قال ليهو:
صوت الله: اباركك بركه، وحاكتر نسلك وحاخليهم كتار زي نجوم السما وحيكونو زي رمل البحر اللي على الشاطي وبواسطة نسلك كل امم الارض حتتبارك.
موسيقى
الصوره رقم (21) زوجة اسحق
![الصوره رقم (21) زوجة اسحق](https://static.globalrecordings.net/300x200/lll1-21.jpg)
تك 24: 1-25: 11
2 – هل انت شايف الصوره رقم(21) واحد وعشرين؟
1 – آي. هل ممكن تشرحها لي؟
2 – ابراهيم كبر وشاخ و زوجتو ساره ماتت، وكان داير يزوج لولدو اسحق. عشان كده نادى خدامه العازر الدمشقي وقال ليهو:
صوت ابراهيم: خت يدك تحت فخدي واوعدني انك ما حتشيل لولدي زوجه من بنات الكنعانيين اللي انا ساكن معهم. لكن تمشي لارضي وأهلي وتشيل لولدي اسحق زوجه.
1 – وعمل كده ليه؟
2 – عشان ابراهيم ما كان داير اسحق يخلي ارض الموعد اللي وعدو بيها الله تعالى، او يشيل ليهو زوجه من بنات الكنعانيين الاشرار. سمع خدام ابراهيم الكلام وسافر لمدينة ناحور. وهناك طلب من الله القدير ان يرشدو للفتاه المناسبه لاسحق.
1 – وهل هداه الله تعالى في المشروع ده؟
2 – آي. واسما رفقه وكانت جميله جداً.
1 – وكيف نتاكد انها الفتاه المناسبه؟
2 – طبعاً هو صلى للرب وقال:
صوت لعازر: يا الله إله سيدي ابراهيم. انا هأقيف قدام عين المويه . والبت اللي اقوليها دلي برمتك عشان اشرب، وتقول لي اشرب وانا حازقي جمالك كمان، هي اللي انت عزلتها لعبدك اسحاق.
2 – والله استجاب وسمع لصلواتو. وبالطريقه ديه رفقه عملت ليهو زي ما كان متوقع وزي ما طلب من الرب تماماً. وحاجة تانية عرف انو هي بنت اخو ابراهيم وركع لله تعالى اللي استجاب لدعوتو وصلواتو وارشدو لاخو سيدو. بعدكده رفقه بقت عروسة لاسحاق. ومات ابراهيم وكان عمرو ميه وخمسه و سبعين 175 سنه. وكان في كل المده ديه بيثق وبصدق مواعيد الرب، عشان كده الله باركو وبارك كمان نسلو.
موسيقى
الصوره رقم (22) وعد الله
![الصوره رقم (22) وعد الله](https://static.globalrecordings.net/300x200/lll1-22.jpg)
غلا 4:4، 5 ومتى 1: 8- 25
2 – عزيزي خلي بالك شديد. في الصوره ديه كل مواعيد الله السابقه حتكتمل وحاتتحقق.
1 – آي انا سامع الكلام اللي عايز تقولو.
2 – ان كلمة الله هي حقيقه. طبعاً الله تعالى وعد آدم بعد سقوطه. انو يوم من الايام حيرسل تيراب المرا اللي ها يهزم الشيطان. وبيّن لنوح انو حيدين ويهلك اللي ماشين ورا الشيطان والماشين في سكتو. وكمان وضح لايوب انه هو الله اللي بتحكم في كل شئ في العالم. وآخر حاجه اعلن لابراهيم ان وعدوه ثابته وحقيقية.
1 – الكلام ده حقيقه. ولكن شنو علاقة الولد ده بالكلام اللي انت بتقولو؟
2 – الولد ده اللي انت شايفو في الصوره، هو اللي تمت واتحققت فيهو كل وعود الله تعالى. وظهر فيه الحق. ففي الوكت المناسب رسل الله تعالى يسوع للأرض. هو الإله الواحد. جاء عشان يوفي كل وعود الله. انو اتولد كطفل صغير لفتاة عذراء اسما مريم. من تيراب اسحق ورفقة، بدون اب بشري، ولكن ابوه هو الله الإله الواحد الحق الحقيقي. والولد ده اسمو عمانويل اللي معناه "الله معنا" وكمان يسوع ومعناه "المخلص" يسوع جاء عشان يسحق الشيطان ويخلص الناس من خطاياهوم.
موسيقى
الصوره رقم (23) لقد مات يسوع من اجلنا
![الصوره رقم (23) لقد مات يسوع من اجلنا](https://static.globalrecordings.net/300x200/lll1-23.jpg)
غلاطية 3: 13 ، 14
1 – وهل يسوع ده هو المعلق على الصليب في الصوره ديه؟
2 – آي. بعدما بقى شاب، كان بيحوم و بيعلم الناس طرق الله، وعمل معجزات كتيره عشان يوري الناس ان الكلام ده بقدرة الله تعالى. لكن الناس الاشرار رفضو ان يؤمنو او يصدقوه. واتكتل بعد ما صلبوه بالمسامير على الصليب. وبعد موته طعنه عسكري بالحربة في جنبتو عشان يتاكد انو مات. واذا كان الخروف مات بدل عن اسحق، لكن مافي خروف بديل ليسوع.
الله ادى ابنه الوحيد عشان يكون هو الذبيحه والقربان عن خطايانا. فخطية آدم فصلت كل الناس عن الله تعالى، ونحنا في خطايانا لسع برضو منفصلين عن الله تعالى. بس يسوع المسيح هو الوسيط الوحيد اللي بيربط الله تعالى بالجنس البشري. يسوع هو السكه الوحيده للرجوع لله، ويسوع ده دفع عقاب خطايانا عشان يرجع علاقتنا الي اتقطعت مع الله تعالى. اتذكر وعد الله لابراهيم.
صوت الله: بواسطة تيرابك(نسلك) كل امم الأرض حيتباركو.
2 – ونحنا بنشيل البركة ديه من الله تعالى اذا آمنا وصدقنا الرب يسوع انو هو مات من اجلنا على الصليب.
موسيقى
الصوره رقم (24) الخلاص بالإيمان
![الصوره رقم (24) الخلاص بالإيمان](https://static.globalrecordings.net/300x200/lll1-24.jpg)
يوحنا 20: 25 - 29
1 – انت مش قلت انو يسوع ده مات على الصليب؟ ولكن انا في الصوره ديه شايفو حي.
2 – طبعاً يسوع بعد ما مات دفنوه في القبر، ولكن في اليوم التالت قام من بين الاموات واصبح حي. فالموت ما قدر على ابن الله. وبعد ما قام من الموت ظهر لاصحابوه والتلاميذ اللي كانو مستغربين لما شافوه. ولكن واحد من التلاميذ واسمو توما ما كان قاعد مع التلاميذ التانين لما ظهر ليهم يسوع القام من بين الاموات. ولما سمع منم عن قيامة الرب من الاموات قال ليهم:
صوت توما: اذا ما شفت يدينو وعلامة المسامير واخت اصبعي في علامة المسامير وفي جنبتو ما حاصدق.
2 – وبعد اسبوع ظهر لهم يسوع تاني وكان معاهوم توما(الشكاك). في المره ديه زي ما شايف في الصوره، وقال ليهو:
صوت الرب: الرب قاليهو: جيب اصبعك لهنا وشوف يديني وجيب يدك وختها في جنبتي وما تكون ما مؤمن.
2 – وآمن توما وقال:
صوت توما: ربي وإلهي!
صوت الرب: انت عشان شوفتني يا توما صدقت. يا بخت الناس اللي آمنو وصدقوا وما شافو.
2 – آي. عشان كده لازم نؤمن، وما يكون فينا اي شك زي توما. ونكون زي ابراهيم اللي آمن بالله تعالى وبقى مقبول عند الله.
وبكده يكون اولاد ابراهيم الحقيقيين هم الناس اللي بيؤمنوا بالله. وده هو الإيمان بيسوع المسيح المخلص – البدي الحياة الأبديه.
موسيقى او ترنيمة