Buukhu 4 Woone, Wiiwe ni okhale
![Buukhu 4 Woone, Wiiwe ni okhale](https://static.globalrecordings.net/300x200/lll4-00.jpg)
Ուրվագիծ: Ruth, Samuel, David, Elijah. 24 sections. It has a picture book to go along with the recording.
Սցենարի համարը: 421
Լեզու: Xirima
Թեմա: Sin and Satan (Sin, disobedience); Christ (Birth of Christ); Eternal life (Salvation); Character of God (Nature, character of God, Word of God (the Bible), Power of God / Jesus); Living as a Christian (Obedience, Faith, trust, believe in Jesus, Children of God, Humility); Bible timeline (Prophecy, fulfillment of, Gospel, Good News, People of God)
Հանդիսատես: General
Ոճ: Monolog
Ժանր: Bible Stories & Teac
Նպատակը: Teaching
Աստվածաշնչի մեջբերում: Extensive
Կարգավիճակ: Publishable
Սցենարի տեքստ
Masu oopacera
![Masu oopacera](https://static.globalrecordings.net/300x200/lll4-00.jpg)
Moni asinthamweene. Muluku onnaasivela ni onnaakhapelela atthu ootheene. Otepa ale ammwiiwelela ni amvara miteko sawe.
Mwiiwelele itthu seerenye khalayi, ntoko silempwaaya mmasuni a Muluku. Mwehe ithoonyihero silempwe mubuukhuni ancano. Mwiiwá oruma, mweheke ethoonyihero ekina yohoolo.
Ethoonyihero 1: Emusi entthawa etala
![Ethoonyihero 1: Emusi entthawa etala](https://static.globalrecordings.net/300x200/lll4-01.jpg)
Rute 1:1-5
Muluku ohaapaka atthu ootheene, ni awo khiyaamutthara Muluku.
Muluku aathanla nloko na Israyel weera emusuwele ni emulapeke. Ni mahiku makina aIsrayeltho khiyaamwiiwelela Muluku yannalapa miluku sikina ntoko yeeraayano maloko amukhwipi. Vano Muluku aanarumiha ikhotto ni itala weera atthu erukunxe mirima saya ehokoleele wa Muluku. Emusi emoha ya nloko na Israyel yaavenya elapwaaya erowaka elapo ekina. Yaakhala weiwo iyaakha muloko, mpaka apapaya ookhwa. Anamwane eeli a emuseene yeele yaathela weiwo asithiana anlokonenne neeriwa Amohabi. Ni asilopwana ale yaahookhwatho. Amayaya yaahanle meekhaaya ni axaara anamwanaaya.
Ethoonyihero 2: Asithiana eeli anghokoleela waIsrayel
![Ethoonyihero 2: Asithiana eeli anghokoleela waIsrayel](https://static.globalrecordings.net/300x200/lll4-02.jpg)
Amaye a emuseene yeele yiitthaniwa Nahomi, ni axaara aanamwanaaya yiitthaniwa Rute ni Orfa. Nahomi aahiiwa weera ennarupa epula yincipale oIsrayel, ni weera Muluku aareeliha nloko ni sooca sincipale. Owo aahuupuwela ohokoleela orowa elap'waawe. Rute ni Orfa yaamutthara. Mphironi, Nahomi aahokolowa ni aaweerela Rute ni Orfa: Muhokolowe murooke elap'waanyu, miyo naamukhweeli, nkoona etthu yoowovahani. Naari nkingwera owaaserani asinyinyu. Orfa aahokoleela elap'waawe ni aamureeliha a Nahomi.
Vano Rute aaheera: Muhikihokoloxe, munrowaanyuwo kinrowa weiwo, nlokonanyu nnikhale nlokonaka, ni Muluk'waanyu anaakhale Muluk'waaka. Hiiho Rute aarowa ni Nahomi mpaka oBetlehemu, elapo oIsrayel.
Ethoonyihero 3: Rute onrowa omatta
![Ethoonyihero 3: Rute onrowa omatta](https://static.globalrecordings.net/300x200/lll4-03.jpg)
Rute 2:1-23
Yaari ehuhu yoohepha, Rute ni Nahomi khiyaarino ematta, yaari oohaawa. Ni Rute aaheera: Kinrowa omatta kattotteke sooca singhiiwa ni alipa oohepha. Rute aarowa ematta yaakhuvenle weera attotteke. Muneene ematt'eene yeele nsinanawe eeriwa Bowasi. Owo ahaakoha anamitekwaawe sa muthiana ole aattotta mmatta mwawe. Akina yaaháakhula: Ti o Mohabi. Orwiye o Mohabi ni Nahomi. Bowasi aahiiwa weera Rute aaweettiha nnene apwiyamwaanaawe. Aahoonatho weera onnavara muteeko nnene. Tivawo aamweerela Rute: Owaattameleke anamitekwaaka, niwooko awo animookhapelela. Bowasi aaweerelatho anamitek'wawe, "muhimpake etthu yoonanara ni muhiyeke sooca weera attotteke."
Ohiyuweene yoole, Rute aamuleela Nahomi itthu Bowasi aamweerenlaawe. Nahomi aaheera: Muluku amureelihe. Owo mmusaahu oohaasaasiwa.
Ethoonyihero 4: Nahomi onoomwaasa mulopwana oomuthela Rute
![Ethoonyihero 4: Nahomi onoomwaasa mulopwana oomuthela Rute](https://static.globalrecordings.net/300x200/lll4-04.jpg)
Rute 3:1-18
Yaakhala etthu yaakhoveleliwe oIsrayel weera, mulopwana akhwa ahiyanre, mmusaawe amwaasá mulopwana oomuthela muthiana. Nihiku nimoha, Nahomi aamweerela Rute: Miyo kinoomwaasaasa mulopwana weera amuthele weera weyo okhaleno nivaatenawe. Bowasi mmusaahu omwaasaasa. Ohiyu woolelo owo anaakhale ni anamitekwaawe aneeraaya yeepettheke sooca. Wiirehere owareleke. Owo aakonaka, wiixaatalele omettoniwawe ni owo onoosuwela weera muntthuna othelana. Eyo etthu ekhoveleliwe. Ni Rute aapaka hiiho.
Bowasi aavinyaawe, aamphwanya Rute waamettowawe, ni aasuwela weera ontthuna othelana. Ni owo aaheera: ohoove, kinoowaasera sootheene.
Ethoonyihero 5: Bowasi omvaanela ni asitokweene
![Ethoonyihero 5: Bowasi omvaanela ni asitokweene](https://static.globalrecordings.net/300x200/lll4-05.jpg)
Aakhala mmusi mukina aarino owera woomuthela Rute. Tivawo Bowasi aamwiitthana mulopwana ola ni asitokweene. Ootheene yaaheera Rute athelaneke ni Bowasi. Wiiwanana waya, mmusi aarula esapatuwawe amwinya Bowasi. Eyo yaari etthu yaakhoveleliwe. Ni Bowasi aakhalano owera woomuthela Rute. Bowasi ni Rute yaamuyara mwaana nsinanawe eeriwa Obede.
Rute khaahiyono oIsrayel, othanla wawe muneene, aathatuwa mmoha anloko na Muluku. Obede, aari mwaana a Rute, ni owo aamuyara Yessi, yaari apapawe Davide, mwene mutokotoko oIsrayel.
Ethoonyihero 6: Maria ni ngelo a Muluku
![Ethoonyihero 6: Maria ni ngelo a Muluku](https://static.globalrecordings.net/300x200/lll4-06.jpg)
Luk 1:16-38
Ovinyera ehuhu ya Rute, saavira iyaakha sincipale, ni Muluku aamuthanla muthiana weera amvarele mutek'waawe. Nsinanawe eeriwa Maria, aari nloko na Rute. Maria aari mwaamwali aathomeriwe ni Yosefe. Ehaakuvale othelana, ngelo aamukhumelela. Owo aamweerela: Ohoove Maria. Weyo woophwanya mahala vamayithoni va Muluku. Onoomuyara mwaana, nsinanawe anaakhale Yeesu. Anaakhale mwaana a Muluku oopwaha sootheene. Maria aatúthuwa iiwakaru hiiho, niwooko khanakone ni mulopwana. Ngelo aamuleela weera mwaaneene kharwa wa Yosefe, Munepa Wootteela oneera opake sootikiniha. Maria aaheera, "Miyo namuteko aApwiya. Seereiye ntoko Apwiya yahimmaaya." Maria aamuyara mwaana ni aamvaha nsina na Yeesu. Okhala weera Maria aamwiiwelela Muluku, aamuyara Mvuluxa.
Ethoonyihero 7: Aana onimvekela Muluku
![Ethoonyihero 7: Aana onimvekela Muluku](https://static.globalrecordings.net/300x200/lll4-07.jpg)
1 Samuel 1:1-20
Evirakaru ehuhu ya Rute, aakhala muthiana eeriwa Aana. Aakhalawo Israyel. Owo annamuromela Muluku ni annamwiiwelela. Aiyawe yannamusivela. Vano Aana khaahakalala niwooko khaayara. Iyaakha sootheene aarowa mpaani wa Muluku yaari oXilo. Awo yaakuxa sooveleela ni mikuttho sa Muluku. Aana aavolowa mpaani mwa Muluku ni aamvekela Muluku eeraka: Muluk'waaka, Apwiya mwakuupuwela, mukivahe mwaana, kinoowinyererani weera oorumelekeni okumaawe wootheene. Eyano yaanatanyeya ni khayiwanyeya mas'weene. Musaserdoti uupuwela weera owo oohapaliwa. Vano Muluku aahiiwa mavekelo a Aana. Evirakaru ehuhu vakhaaneene, aamuyara mwaana mulopwana, amvaha nsina na Samuel.
Ethoonyihero 8: Samuel mpaani mwa Muluku
![Ethoonyihero 8: Samuel mpaani mwa Muluku](https://static.globalrecordings.net/300x200/lll4-08.jpg)
Samuel ayariwakaru, amayawe yaamwinyerera Muluku. Awo yaamwinyerera muSaserdoti nsinanawe Eeli weera akhaleke mpaani ya Muluku oXilo. Eeli aamuhusiha Samuel omurumela Muluku.
Eeli aakhalano anamwane eeli yaari Asaserdoti ni yaari oonanara mirima. Tivawo Muluku aahiya olokololano ni yaawo.
Ohiyu, Samuel aahixaatalela mpaani mwa Muluku. Aahiiwa iitthaniwaka, Samuel, Samuel. Samuel aatthimakela wa Eeli, ni aaheera: Kiri va, nyuwo mookiitthana?
Eeli aaheera: nkiwiitthanne, wakoneke. Yaheereya hiiho vararu. Wanaararu, Eeli aahoona weera aari Muluku aamwiitthana. Eeli aamweerela Samuel weera ti Apwiya, waakhula weereke "muhimeke Apwiya, namutekwaanyu onniiwa." Muluku aalokolola imaara sincipale ni Samuel, ni Samuel aathatuwa musaserdoti mutokotoko, mprofeeti mutokotoko, ni muhooli mutokotoko a Israyel.
Muluku onnawiitthana atthu nlelo weera evare muteko wa Muluku ntoko Samuel.
Ethoonyihero 9: Samuel onaavekelela a Israyel
![Ethoonyihero 9: Samuel onaavekelela a Israyel](https://static.globalrecordings.net/300x200/lll4-09.jpg)
1 Sam 7:2-14; Okhuma 20:2,5
Muluku toororomeleya, tivawo ahaathoriha anamwane a Eeli yaari oonanara mirima. Yaahookhwa okhottoni. Ekhottoweene yeele aIsrayel yaawiniwa ni nloko neeriwa aFilisteu. AIsrayel yaawiniwa mpaka iyaakha miloko miili. Samuel aaheerela nloko na Israyel: Nyuwo moomolá miluku sowootha ni yoocambuliwa ya muluku Axtarte, ni mirima sanyu mukelihe wa Apwiya weera mwaatthare, Awo animoovuluxani wa aFilisteu. Niwooko na ohooxiwa wa amwiittanaaya, aIsrayel yaamwiiwelela Samuel. Nloko noIsrayel naathukumana vanipuroni Samuel aaleenlaawe. Vaavaawo, Samuel aaveleela mukuttho ni ahaavekelela aIsrayel wa Muluku. AFilisteu yiiwakaru seyo, yaathukumana weera yaawaneke ni aIsrayel. AIsrayel, yoovaka, yaamvekela Samuel weera aavekelele Apwiya. Muluku ahaarumihela itari sitokotoko aFilisteu, ni yaahoovaxa. AFilisteu yaapacera otthawa, ni AIsrayel yaawina. Muluku nlelo ookhalano mas'weene yaawo ni maloko ootheene: "Ahikhaleno miluku sikina okihiya Miyo."
Ethoonyihero 10: Samuel omutthikitthela makhura Saul weera akhale mwene
![Ethoonyihero 10: Samuel omutthikitthela makhura Saul weera akhale mwene](https://static.globalrecordings.net/300x200/lll4-10.jpg)
1 Sam 8:1 - 10:1
Muluku aari muneene mwene oIsrayel, ni Samuel ottuliwawe aalamulela nloko. Okhala weera maloko makina yaakhalano mamwene, Israyelitho yaamutthuna mutthu mmoha weera akhale mwenaaya. Samuel iiwakaru, khahakalanle. Muluku aamweerela Samuel: wiiweke sootheene nloko nihimmaaya. Khenookhootta weyo, enkikhootta Miyo kiri mwene.
Aakhala mulopwana nsinanawe eeriwa Saul, aari ooreera ni oorakama. Nihiku nimoha, Saul aarowa omuxekura Samuel. Aakhuvelaawe, Muluku aamwerela Samuel: Ti yoowo anaakhale mwene a nlokonaka. Samuel aakuxa makhura, aamutthikitthela vamuru va Saul. Eyo yaari eneneero yoonihera othanliwa okhala mwene. Saul aalamula mpaka iyaakha miloko mixexe.
Ethoonyihero 11: Saul onaahula ikuwo sa Samuel
![Ethoonyihero 11: Saul onaahula ikuwo sa Samuel](https://static.globalrecordings.net/300x200/lll4-11.jpg)
1 Sam 15:1-29
Amalekiita naari nloko noonanara mirima yaapakenle aIsrayel itthu soonanara. Samuel aamweerela mwene Saul: Wiiweke masu a Muluku. Wawiive Amalekiita ni waphwate itthu sootheene araayano. Ohiwuurele. Muluku aamukhavihera Saul ni anakhott'waawe owoomola Amalekiita. Saul khaamwiiwelenle Muluku. Yaawuurela axinama ooreerela aAmalekiita, weera yaaveleele mukuttho wa Muluku, ni khayaamwiivale mwene aAmalekiita. Vano Samuel aamweerela Saul: Niwooko weyo woovaanya masu a Muluku, Muluku ohoovaanya okhala mwene. Samuel aarukunuwa weera akhumeke, ni Saul aavara malayaawe. Yaahaahuwa mmatatani mwawe. Samuel aaheera: Muluku ohaahula nloko na oIsrayel, ni oomwinyerera mwene mukina ooreera woopwaha weyo.
Asinthamwene, Saul ooveleela mukuttho wa Muluku, ni khamwiiwelenle. Samuel aamurumeela Muluku ni aamwiiwelela okumaawe wootheene. Ereenre tiivi: ovara miteko sadiini, hoye-hoye omwiiwelela Muluku? Muluku eenre: Onimwaavaha nttittimiho yaale animuttittimiha.
Ethoonyihero 12: Yeesu mpaani ya Muluku
![Ethoonyihero 12: Yeesu mpaani ya Muluku](https://static.globalrecordings.net/300x200/lll4-12.jpg)
Luk 2:41-50, 1:35
Sivirakaru iyaakha sincipale ovinyero ehuhu ya Samuel, aayariwa mwaana oIsrayel, nsinanawe Yeesu. Amayawe yaari Maria, apapawe yaari Muluku. Yeesu aaraaweno iyaakha muloko ni piili, Maria ni anyawe Yosefe yaarowa o Yerusaleemu, ni yaamukuxa ni Yeesu. Ehokolowaka, Yeesu aahala ottuli, tivawo, yaanamwaasaasa. Evirakaru mahiku mararu emwaasaka, yaamphwanya mpaani mwa Muluku, alokololaka sa Muluku ni asitokweene adiini. Maria aaheera: "Mwanaka, munipanke heeni? Hiyo naawaasaasani." Yeesu aahaakhula: "mwaakaasera heeni? Khamwaasuwenle weera miyo kinookhala mpaani ya Atiithaka?" Yeesu aaraawe mmiravo ntoko Samuel, aasuwela weera khaarweela omwiiwelela Muluku. Yeesu orwiiye mulaponi weera anaataanihe ni Muluku, niwooko Muluku mwene eekhaikhai ni Owo ta elapo yootheene.
Ethoonyihero 13: Davide, mukukhula oolipa murima
![Ethoonyihero 13: Davide, mukukhula oolipa murima](https://static.globalrecordings.net/300x200/lll4-13.jpg)
1 Sam 16:1-13, 17:34-35
Saul aari mwene oopacera oIsrayel, ni khaamwiiwelela Muluku. Muluku aamuhiya Saul khaamukhavihera. Aakhala mmiravo eeriwa Davide. Mutek'waawe waari okukhula ikhondolo. Owo aamuroromela Muluku mukumi, ni khoova etthu yoowoopiha. Nihiku nimoha, kharamu aavara ekhondolo. Davide aamwiiva ni aavuluxa ekhondolo.
Ni owo anniipatho icipo sooreera ni anniipa mattittimiho a Muluku. Icipo sene sineeriwa Masalimu silempwale mmasuni a Muluku, Biblia.
Davide aathatuwa mutthu aamusiveliha Muluku mwa itthu sootheene aavaraawe. Muluku aamuthanla weera akhale mwene nipuro na Saul.
Ethoonyihero 14: Davide ni Goliyati
![Ethoonyihero 14: Davide ni Goliyati](https://static.globalrecordings.net/300x200/lll4-14.jpg)
1 Sam 17:1-54
Ehuhueene yeele yaakhala ekhotto ya Israyel ni aFilisteu. AFilisteu yaakhalano nakhotto mutokotoko oorakama eeriwa Goliyati. Owo aaweerela aIsrayel: Mmuthanle mulopwana mmoha awaneke ni miyo. Akiwina, hiyo ipotthasanyu, miyo kangwina, nyuwo ipotthasahu. Atthu oIsrayel yaammoova Goliyati, khaawo aatthuna ohóolela. Vano mmiravo Davide, aaxekura waamakiwe, aaheera: MFilisteu heeni yoowo ongwoopopiha anakhotto a Muluku mukumi? Davide khaamoova Goliyati, aasuwela weera Muluku onoomukhavihera ongwina. Ekhotto yaari ya Muluku. Davide aahiiveleela ohoolo wa Goliyati. Davide aakuxa ekhwambala, aavonya nluku noopacera, aammana Goliyati vayuuci ni aamukuha. Davide aamuttimakela Goliyati, ni ekatanaawe aamuthikila muru. Nihiku nenne nenle aIsrayel yaawoomola aFilisteu.
Ethoonyihero 15: Mwene Saul oneerera omwiiva Davide
![Ethoonyihero 15: Mwene Saul oneerera omwiiva Davide](https://static.globalrecordings.net/300x200/lll4-15.jpg)
1 Sam 18:1 - 23:29
Woopaceroni, Saul aamuhakalaleela Davide niwooko aahaavuluxa aIsrayel. Davide aathatuwa nakhotto oororomeleya ni mutokweene oIsrayel. Nloko nootheene nannatthuna mweettelowaawe. Ovinyero vaavaale, Saul annamukhalela nrima oovaka weera anaakhale mwene. Nihiku nimoha Davide aamwiipela Saul tthakare, ni Saul aamvonya Davide nivaka. Aatthuna omwiiva niwooko waamvolowa munepa woonanara. Nivaka khanaamuhomme Davide, nahomme exirí. Ovinyero vaavale Saul anneerera imaara sincipale omwiiva Davide. Wannatthuneya Davide otthawa. Ni Muluku aamukhapelela.
Ethoonyihero 16: Davide oohiyerera okumi waSaul
![Ethoonyihero 16: Davide oohiyerera okumi waSaul](https://static.globalrecordings.net/300x200/lll4-16.jpg)
1 Sam 26:1-25
Saul ni anakhottowawe yannamwaasa Davide mutuphini. Ohiyu mmoha, Saul ni anakhottowawe ekonaka, aaphiya Davide ni nthamwenaawe Abixai enavolowa mmukotthani mwa Saul. Abixai aatthuna omwiiva mwene Saul akonaka, ni Davide aamukhoottihera. Davide aaheera: Muluku onimwaathoriha yaale anaapanka yoonanara mwene omuthanlilaawe. Davide aakuxa nivaka na Saul ni maahi yaari wamuru wa Saul. Evinyakaru vamikotthani, Davide aakhuwela: Nyuwo munaakhapelela amwenaanyu, mooneke nivaka nna na amwenaanyu. Ni aamweerela Saul keenre: koohiya okumaawe, Muluku onoohiyereratho okumaaka. Davide aapwaha ni Saul aahokoleela owanyawe. Asinthamwene, muhiixoniheré olipa ni ale anoopakani yoonanara, Muluku muneene oneera aathorihe.
Ethoonyihero 17: Davide oovariwa omwene
![Ethoonyihero 17: Davide oovariwa omwene](https://static.globalrecordings.net/300x200/lll4-17.jpg)
1 Sam 31:1-7, 5:1 - 7:16
AFilisteu yaawana ekhotto wanaaveeli ni aIsrayel. Saul ni mwanawe Yonatan ni anamwanawe akina yaahookhwa okhottoni. Vaavaale nloko naamvara Davide omwene oIsrayel. Davide aapaka empaawe oYerusalemu.
Muluku aamweerela Davide: "Miyo kaahoothanla weera olamuleke nlokonaka ocihaka ikhondolo sawo. Miyo kinoowunnuwiha ntoko asitokweene eelapo ni ehicaawo yoolamula khemmalaru. Muluku aamunnuwiha Davide ni aamvaha ikuru soowaawina amwiittanaawe.
Ethoonyihero 18: Davide ni Batseba
![Ethoonyihero 18: Davide ni Batseba](https://static.globalrecordings.net/300x200/lll4-18.jpg)
2 Samuel 11:1 - 12:20
Nihiku nimoha Davide aari vapatthoni va empaawe. Aamoona muthiana ooreera arapaka. Davide aamutthuna. Muthianeene yoowo nsinanawe eeriwa Batseba, amwaara Urias, nakhotto. Davide aamurumihela mitthenga mutokweene aanakhotto yaari okhottoni weera amukuhe Urias nipuro eeraawe akhwe. Davide aamuthela Batseba. Itthu sene seiya Davide aapankaawe, saamunanara Muluku, tivawo mwaana oopacera a ottheka wa Davide, aahookhwa. Davide aahoona weera koopaka etthu yoonanara tivawo aamvekela Muluku weera amulevelele. Masu a Muluku yeenre: "Muhiraruwe."
Ethoonyihero 19: Empa ya Muluku
![Ethoonyihero 19: Empa ya Muluku](https://static.globalrecordings.net/300x200/lll4-19.jpg)
1 Mwaha 22:1-19
Davide aamutthekela Muluku, ni nlelo aamwiiwelela Muluku. Aatthuna opaka empa etokotoko ya Muluku weera atthu ootheene emulapeke mwemmo Muluku. Vano Muluku aaheera: Weyo ohipake empaaka niwooko woowiiva atthu ancipale. Weyo onoomuyara mwaana anaakhale amurettele ni wiitthuuwa. Nsinanawe aneeriwe Salomooni. Ti yoowo anaapake empa mu nsinanaka. Ehicaawe yoolamula khémmala oIsrayel. Davide aarehera itthu sincipale sa empeene yeeyo, ni aapanke aari Salomooni. Empa ya Muluku yaari yooreera. Saamanle iyaakha ithanu ni piili epakiwaka. Nloko na Israyel naamulapa Muluku iyaakha sincipale empeene yeele yo Yerusaleemu.
Ethoonyihero 20: Yeesu omphiya oYerusalemu
![Ethoonyihero 20: Yeesu omphiya oYerusalemu](https://static.globalrecordings.net/300x200/lll4-20.jpg)
Mateus 21:1-11
Sevinreene iyaakha sincipale ovinyero mwene Davide, aayariwa Yeesu oBeteleheemu. Aari emusi ya Davide yoohaasaasiwa. Amayawe yaari mwaamwali yeeriwa Maria. Khaarino apapawe mutthu, aayariwe ni sootikiniha sa Muluku. Yeesu aari namuteko mutokweene a Muluku ni aakhalenle omusiveliha Muluku paahi. Owo annaahusiha atthu ekhaikhai ni aapaka sootikiniha sincipale. Saul ni Davide yaattheka antoko atthu ootheene, vano Yeesu Khanattheke.
Nihiku nimoha, aarowa oYerusalemu va Buuruni. Atthu ootheene yamuthikilela ekhuwelaka ni ohakalala otokotoko yeeraka: Hosana mwaana a Davide, Hosana onrwa mu nsina na Apwiya, nootteelihiwa nikhale nsinanawe. Atthu o Yerusalemu yaasuwela weera Yeesu mutokweene ompwaha Davide, mwene a mamwene.
Ethoonyihero 21: Eliya, mprofeeti a Muluku
![Ethoonyihero 21: Eliya, mprofeeti a Muluku](https://static.globalrecordings.net/300x200/lll4-21.jpg)
Avirakaru Davide ni Salomoni, yaanalámula mamwene makina oIsrayel. Mukina iitthaniwa Ahabi. Owo aamuthénle muthiana oonanara murima, nsinanawe eeriwa Yesebeli. Yesebeli ahaaruma atthu weera ewiive maprofeeti a Muluku ootheene. Owo annanyeserera nloko na Muluku omulapa muluku owootha nsinanawe eeriwa Baal. Eliya aarí mprofeeti mutokweene a Muluku ehuhuweene yeeyo. Muluku aamweerela Eliya: "Orowe, wamuleele Ahabi weera niwooko na soottheka sawe sinoovira iyaakha tthaaru ehirumpe epula naari nikame. Kaahéerarú erupéke." Yaaphiya etalá etokotoko elap'weene yeele, ni Muluku aamukhapelela mprofeetaawe. Muluku aamuruma okhala mutuphini waari mooloko mukhaaneene, ni mahiku ootheene, ohinaxe ni oxekuwa, Muluku annaaruma apalame ni enamá ni epawu omvaha.
Ethoonyihero 22: Eliya ni mooro wa Muluku
![Ethoonyihero 22: Eliya ni mooro wa Muluku](https://static.globalrecordings.net/300x200/lll4-22.jpg)
Ommaleloni wa iyaakha tthaaru satalá, Eliya aamweerela Ahabi: "waarúhe aatthu ootheene vamoha ni maprofeeti a Baal vamwaako Karamelu. Eliya aaheerela nloko: "Apwiya yaareene Muluku, mwaatthareke yaawo. Vano Baal aareene muluku, muntthareke yoowo. Vano atthu khiyaakhúnle etthú. Eliya aaheera: "Murowe mwaase imombe piili silopwana. Maprofeeti a Baal ethanleke emoha weera evahé mukuttho. Etthu yaakhoveleliwe yaarí ohisa enama yootheene. Eliya aaheera: "Nyuwo muhipattihe mooro. Miyotho kinookuxa ekina kirehere, ni nkiniiseela mooro.
Nyuwo mmwiitthaneke mulukwaanyu, ni miyo kinoomwiitthana Mulukwaaka. Muluku oneerá aakhule ni mooro, Muluku eekhaikhai ti yoowo. Atthu yahaakhulela. Maprofeeti a Baal yaamwiitthana mulukwaaya nihiku nootheene. Awo yaahiina erukureraka nipuro namukuttho ni yaahiithikilasa emuromolaka Mulukwaaya. Kawaavarenle mooro.
Oxekuwa, Eliya aarehera mukutthuwawe. Aahaaruma atthu weera yiittele maahi vanipuroni vawe va mukuttho ni enaanihe ikhuuni. Ovinyero vaavaale aamvekela Muluku, mowaakuveya waamora mooro wiirimu. Waahisa emombé, ikhuuni, ni maaheene ni sootheene saari vaavaale. Ni atthu ootheene yaakhuwela: "Apwiya, ti Muluku!"
Ethoonyihero 23: Eliya onrowa wiirimu
![Ethoonyihero 23: Eliya onrowa wiirimu](https://static.globalrecordings.net/300x200/lll4-23.jpg)
Saavira iyaakha sincipale ovinyero onyoonyihana vamwaako Karamelu, ni Muluku aamweerela Eliya omuthanle mutthu oneera avareke muteko mu nipuro nawe. Eliya aanoona weera mutek'waawe onnamala. Nihiku nimoha Eliya aamphwanya mmiravo mmoha alimaká mmatta. Muluku aamweerela mmiravo ole anaakhale mprofeeti nipuro nawe. Eliya aamukuxa mmira'weene yoole. Nsinanawe eeriwa Elisa. Eliya aamuhusiha ovara muteko wa Muluku ni omwiiwelela Muluku. Nihiku nimoha yeettaka mphironi, yaakhumelela etthu yaakhala ntoko ekaaro ya mooro yaarwa wiirimu. Yaamukuxa Eliya erowaka wiirimu vamayithoni wa oohuseraawe Elisa. Elisa annamwiiwelela Muluku arowaka ohoolo.
Ethoonyihero 24: Eliya ni Moises aamukhumelela Yeesu
![Ethoonyihero 24: Eliya ni Moises aamukhumelela Yeesu](https://static.globalrecordings.net/300x200/lll4-24.jpg)
Sivirakaru iyaakha macira mathanu ni meeli, evinyero Eliya, Yeesu ahaakuxa oohuseraawe araru erowaka omwaako weera yávekele. Yeesu avekelaka, Moises ni Eliya yaakhumelela. Oohusera ale araru yaawoona yaaraka nttittimiho na Muluku. Ehuhuweene yeele Muluku aalokolola wiirimu. Aaheera: "Owo mwanaka kinimusivelaaka. Mmwiiweleleke." Asinthamwene, Muluku ni maprofeetwaawe anoonihera Yeesu. Weera mutthu akhaleno murettele ni Muluku, ontthuneya wiiwa masu a Yeesu. Owo aarweela onivuluxa mwa soottheka. Owo ephiro yoorowano wa Muluku. Muluku muneene eenré: "Owo mwanaka. Mmwiiweleleke."