LLL5 Kutompibwa Pa Mwanda Wa Leza
Áttekintés: Elisha, Daniel, Jonah, Nehemiah, Esther. 24 sections. It has a picture book to go along with the recording.
Szkript száma: 422
Nyelv: Kiluba: Shaba
Téma: Sin and Satan (Deliverance, Sin, disobedience); Christ (Life of Christ, Authority); Character of God (Word of God (the Bible)); Living as a Christian (Worship, Obedience, No other gods, idols, Victory, Faith, trust, believe in Jesus); Bible timeline (Gospel, Good News, People of God); Problems (Problems, troubles, worries)
Közönség: General
Célja: Teaching
Features: Monolog; Bible Stories; Extensive Scripture
Állapot: Approved
A szkriptek alapvető irányelvek a más nyelvekre történő fordításhoz és rögzítéshez. Szükség szerint módosítani kell őket, hogy érthetőek és relevánsak legyenek az egyes kultúrák és nyelvek számára. Egyes használt kifejezések és fogalmak további magyarázatot igényelhetnek, vagy akár le is cserélhetők vagy teljesen kihagyhatók.
Szkript szövege
Kifwatulo 1: Nemane upempula njibo ya Edisha
Talaipo’bidi Edisha wai muntu mukatampe kadi mupolofeto wa Yehova Leza mu Isalela. Ebiya difuku dimo kwaile muntu umo kwadi wakutelwa dya bu Nemane. Aye uno’u wadi mudyavita wa bushidika bwa Bene Shidea, kadi bidi ino ntanda ya Shidea yadi lwana na Isalela. Kabidi Nemane wadi muntu mukankamane kadi mukomokomo, mwiko ke-muntu wadi ne makopo. Ponkapo waendele mu Isalela mwanda waivwene amba banena amba Edisha ukokeja kundapa makopo. Yo ! ke-muntu Edisha katambilepo nansha mu kadimbwa kandi kumutambula ehe. Ino Edisha watuma mwingidi kukalombola Nemane amba : enda, ukoye misusa isamba-ibidi mu munonga wa Yodano nabya ukapwibwa makopo obe. Na mutyima onka wadi umukubakuba, Nemane walondolola’mba : nadi nkulupile amba ukatamba kumona, ne kwabija Yehova Leza mone kupwibwa ku makopo ami’a. I enka nenki’u, Nemane waenda mufwitwe kutabuka.
Kifwatulo 2: Nemane watukila mu munonga
Ponkapo bengidi ba Nemane bamudingila aleke bulobo bwandi ne mitatulo yandi. Kadi ne kumuningila akokele ku byasonenye Edisha kulonga. Ebiya Nemane watukila monka mu munonga wa Yodano, ne koya misuse isamba-ibidi. (Tala kifwatulo) Nemane wasepelela, ponkapo ne makopo andi apwibwa. Edisha kadipo utyina muntu nansha umo mwanda wadi ukulupile mudi Leza Mukatakata Mwine. Ke-muntu wadi uyukile amba Leza wand ii Mwinebukomo bonsololo, kadi wadi uyukile’mba bantu bafwaninwe kukokela Yehova Leza amba amone kwibakwasha mu makambakano abo.
Kifwatulo 3: Edisha ne bushidika bwa Leza
Byobiya Leza wesamba kudi Edisha’mba Bene Shidea bakokeja kutamba divita Isalela kitatyi kyo kyonso’tu. Ponkapo Edisha nandi wadyumuna mulopwe wa Isalela, ne kumulombola’mba ino enka Bene Shidea kebakamunekenyapo ehe. Ebiya mulopwe wa Shidea walombola bashidika bandi amba: amba endai munkataninei Edisha konso kwadi, amba mumone nkukwatyila’ye. Bubaki ke lubanga futwi, Edisha ne mwingidi wandi batamba panja, kadi bamona Bene Shidea baya kobadi mwanda wa kukwata Edisha elwe mu kifungo. Ponkapo mwingidi wa Edisha wasama’mba: mufundiji, le tukalonga’ka? Ebiya Edisha walondolola’mba: kokikwatwapo moyo ehe, ke-bantu boba badi netu ibatabuke bungi bwa boba baya kwitukwata. Ponkapo mwingidi wa Edisha amba eleje meso wamone makalo ne makalo a mudilo ne tubalwe twa divita bibajokolokele, bano badi babulwi ba Yehova Leza, bawatumine mwanda wa kwibakinga.
Kifwatulo 4: Edisha ne bashidika bampofu
Ebiya Bene Shidea byo badi kebafwena kumukwata Edisha, ponkapo walombela kudi Yehova Leza amba: kupila’bidi bantu’ba amba bekale ke bampofu. Ponka na ponka, bashidika bonso baikele ke bampofu. Byobiya Edisha wafwena kobadi kaebanena’mba: nondei nkemulombole muntu omukimba’ye. Ponkapo Edisha webatwala bashidika bano bampofu ka dya ky Samadia;kibundi kikatampe kya Isalela. Kabidi kokwa nako Edisha waabija Yehova Leza amba: Mfumwetu putula meso a bano bantu’ba. Penepo abo bakumona meso betana kebadi mu kibundi kya balwana nabo. Ponkapo mulopwe wa Isalela wasakidile kwibepaya, inoko Edisha wamukankaja’mba: mwibapei’tu mema ne bidibwa kadi mwibalekei bajokele kwabo. Banwe balunda name, Leza wa Edisha i Mukatakatamwine ukidile balwana netu bonsololo. Ketwakisakidilai kwaluja kinongo ehe, ikitwendelemo enka kumukulupila Leza.
Kifwatulo 5: Samadia watekelwa kasala
Talaipo’bidi bashidika Bene Shidea bajoka monka kulwa Isalela. Kabidi bajokoloka kibundi kya Samadia mafuku mangi. Kabidi Bene Isalela bashilula kubulwa bidibwa. (Tala kifwatulo) Mulopwe wa Isalela wadi kaenangija pa lumbu lwa nsakwa ya kibundi. Ponkapo bana-bakaji babidi bafika kwadi kumumona. Kabidi kebamudidila’mba ebakwashe’po. Ke-bantu bakwetwe na nzala byamwiko o mwanda mwine badile babo bana bakwibutwila. Ino mulopwe kadipo na kyakulonga ehe. Kabidi mulopwe wadi na bulobo mwanda Leza kebapandijepo ku Bene Shidea bano’ba. Ponkapo wasumininwa kusaka kwipaya Edisha, mwingidi wa Leza. Ebiya Edisha watuma musapu kudi mulopwe wa’mba: talapo byanena Yehova Leza: kasha pa saa imo yonka, bukula ne bidibwa bikwabo bikapotolojibwa ku kibelo kya Samadia.
Kifwatulo 6: Bamakopo bana
Mu kyokya kitatyi’kya kwadi bantu bana badi bashikete ku kibelo kya Samadia. Abo bano badi ne makopo. Kabidi kebenena abo bene na bene amba: le mwanda’ka tushikete pano mwanda wa kufwa? Nanshi twendei tuketulei ku bashidika Bene Shidea. Ebiya abo pakushilula kwenda ponkapo Bene Shidea baivwana bishindo mikatakata pamo nay a babulwi. Kabidi Bene Shidea bakwatwa moyo byamwiko, bashilula kunyema pa kitulo kyabo bashiya bintu byonsololo byo badi nabyo? Kabidi bamakopo bano’ba pa kufika mu kitulo kya Bene Shidea, kebatenemopo muntu nansha umo ehe. Byobiya bamakopo bano’ba basela bidibwa ne kusela bintu bimobimo byobadi nabyo kyumwa. Kadi kebenena abo bene na bene amba: ketulongelepo biyampe ehe, dyalelo i difuku dya myanda miyampe, le mwanda’ka ketusapwidile bantu bakwabo? Bukidi bonka bajokela mu Samadia bakasapwila mulopwe mwanda uno’u. Ponkapo ne bantu bonso bayuka ne kwenda kukasela bidibwa, ponka bukidi bonka bidibwa bya yetwe mu kitulo kya Bene Shidea byapotolojibwa ne pa kibelo kya kibundi kya Samadia. Talaipo’bidi Yehova Leza wapandije Isalela kadi ne kupandija mwingidi wandi Edisha. Banwe balunda nami, Yehova Leza wamutumine Yesu amba etupandije ku lufu lwa nyeke ne nyeke-ke. Ino nayo i myanda miyampe, nanshi tufwaninwe kwiisapwila bantu bonsololo.
Kifwatulo 7: Yona unyema Leza
Kunyuma kwa lufu lwa Edisha kwaikele mupolofeto mukwabo mu Isalela, wakutelwa dya bu Yona. Kabidi Leza wanena Yona amba: enda ku kibundi kikatampe kya Nineva ukebasapwile. Mwanda ndyukile mubipile bantu ba kino kibundi. Ke-bantu nabo badi balwana na Isalela. Kabidi Yona kadipo usakile kwenda’ko ehe, o mwanda mwine wasakile kunyema. Ponkapo watana bwato bwadi bwenda kulampe. Penepo wafuta ne kwikila waikila kebenda. Bukidi bonka abo pa dijiba, kitenshi kyatetuka pa kalunga kamema. Bantuba mu bwato bakwatwa moyo byamwiko, kebanena’mba: twelei kyeleko mwanda wa tuyuke i ani walengeja kyamalwa kino’ki. Byobaelele kyeleko nakyo kyakwata Yona.
Kifwatulo 8: Yona ne nyema wa lui
Ba mu lwendo na Yona kebamwipangula’mba: le walongele ka? Nandi webalondolola’mba nadi nyema Leza. Kabidi nabo bamwipangula’mba le tulonge namani amba kalunga kamema mabimbi ako atalale? Yona webalondolola’mba: ngelei pa kalunga kamema, mwanda ndyukile amba nemulube o mwanda mwine kitenshi kibetutana. Kabidi abo nabo kebadipo basakile kumwipaya Yona ehe, kabidi kitenshi kyadi kyenda kitabuka ka kutabuka. Ponkapo nabo bamwela pa kalunga kamema. Kabidi Yona kafwilepo ehe. (Tala kifwatulo) Ponkapo nyema wa lui (mwita mukatakata) wamina Yona. Kadi waikala mumi munda mwa nyema wa lui’wa mafuku asatu. Ebiya nyema wa lui walasa Yona ku nkula ya kibundi kya Nineva.
Kifwatulo 9: Yona ku Nineva
Byobiya Yehova Leza wasamba kudi Yona amba: enda ku Nineva ukasapule mwanda onakulombwele. Ponkapo Yona wakokela Leza kadi waenda mu kibundi kya Nineva. Washilula kudyumuna bantu amba: mu mafuku makumi ana kibundi ka Nineva kikonakanibwa. Ponkapo mulopwe wa’kyo ne bantu bonsololo bamwisashila Leza kwibapandija. Kabidi bavundamina bubi bwabo, ponkapo Leza waleka konakanya kibundi kino’ki. Balunda nami, tudi pamo ponka bwa Yona kadi ne bwa Bene Nineva. Ke-twi-bantu twabudilwe kikokeji kudi Leza kadi twalonga bubi bwa miswelo ne miswelo. Nanshi tubikilwe kidye kya Leza. Inoko aye Leza witusenswe, o mwanda mwine watumine Yesu kufwa pa mwanda wa kwitupandija. Nandi walele mu kibundi mafuku asatu pamo ponka bwa Yona walele munda mwa nyema wa lui mafuku asatu. Ebiya kupwa Yesu wasangukile kutamba mu lufu. Dyalelo dino’di, upananga bumi bwa nyeke ku boba bonsololo bavundamina bubi kadi ne kuvundamukila kwadi kebamulonda.
Kifwatulo 10: Eseta ne mulopwe
Byobiya Eseta wadi nsongwakaji Muyudea wa mu Isalela. Kabidi Madoshe manseba wandi ye wadi umulelele mwanda bambutwile bandi badi kebafwe kala. Ba Eseta ne Madoshe bakwetwe bu misungi pamo na Bene Isalela na Bene Peleshia. Mulopwe wa Peleshia wadi mukomokomo, kadi bantu bonso badi bamutyina. Kabidi mukaji wandi muntwabene byakamusangejepo, ponkapo wasakidile kumupingakanya. E ko baletele bansongwakaji bapopoke ba mu bulopwe bwandi. Ponkapo Watonga Eseta ke mukaji wandi. Kabidi Eseta kalombwelepo nansha muntu umo amba aye i Muyudea ehe.
Kifwatulo 11: Madoshe upela kwivukwila
Uno Hamane wadi muntu wa buleme mu bulopwe bwa Peleshia. Kabidi bantu bonso badi bamwivukwila padi upita. Ino enka Madoshe wadi usaka enka kutota ne kwivukwila enka Leza umo enka Wabinebine ; ponkapo wapela kwivukwila Hamane. Ebiya Amane wafitwa ne kukalabala byamwiko, kadi wasumininwa kwaluja kinongo padi Madoshe. Difuku dimo walombola mulopwe amba : Bayudea kebalemekelepo bijila bya mulopwe. Leta’bidi lupusa amba bonakanibwe. Ponkapo kadi Hamane walambula ndalama kudi mulopwe amba kilombwa kyandi kilongelwe monka. Penepo Hamane wayukija bantu difuku dya kutukija Bayudea. Kabidi Hamane washimika ne pakutudikila Madoshe. Byobiya Madoshe walombola mwanda kudi Eseta amba amone kukalombola mulopwe ne kusengelela ba muzo wabo. Ponkapo Eseta walondolola’mba: enselele wenda kukamona mulopwe pampikwa kwityibwa nandi nabya ufwaninwe kufukijibwa ka ku lufu. Kabidi wanena Bayudea kumulombelela. Ponkapo webalaa’mba: nkamumona mulopwe, shi kufwa kadi nkafwe kekudipo mwanda.
Kifwatulo 12: Masobo a Eseta
Byobiya yehova Leza waivwane lulombelo lwa Bayudea. Ponkapo mulopwe watambula Eseta. Kemuntu wamwendele ku masobo makatampe kadi waendela’ko ne Hamane mwine. Monka mu masobo, mulopwe waipangula Eseta amba, le usaka bika? Ponkapo Eseta walondolola’mba: kilombwa kyami i kya’mba mpandijibwe pamo ne ba muzo wami mwine, ke pantu napotolojibwe mwanda wa kwipaibwa. Ponkapo mulopwe waipangula’mba: lelo i ani wasomonwa kulonga nankyo, a? kabidi Eseta nandi walondolola’mba: walwana netu i uno muntu mubi’u, ke Hamane kadi. Ponkapo mulopwe kalabala byamwiko pawaivwene mpango ya nshikani ya Hamane. Penepo mulopwe wasonanya amba Hamane atundyikwe pa mutyi padi ulongolwedile Madoshe ne Bayudea bonso kwipaibwa’pa, byobiya Bayudea bonso bapandijibwa pamo ne Madoshe. Banwe balunda nami, Eseta wepene pamo bwa mupidishitu shi kufwa afwile bamuzo wandi. Ebiya Yesu witusenswe bikatampe, kadi wafwile amba etupandije ku lufu lwa nyeke na nyeke-ke. Ba Danyele ne Nehemia bashikete mu ntanda ya balwana nabo, nansha nabya badi batota enka Yehova Leza umo eka Wabinebine kadi baikele ke myanga.
Kifwatulo 13: Danyele e balunda nandi
Kifwatulo kino’ki kilombola Danyele na balunda nandi basatu. Bonso bano badi Bayudea. Ke-bantu baselelwe bu misungi mu Babiloni na balwana nabo. Mulopwe wa Babiloni wasakidile amba bamwingidile. Po apo po bafndile ludimi lwa mu Babiloni. Kabidi Danyele ne balunda nandi bapelele kudya bidibwa bya mwenye bya mulopwe. Kino kyadi panja pa kishi kya buyudea. Ke-bantu bayukile kulemeka bijila bya Yehova Leza kadi ne kumukokela. Ponkapo balomba kudya enka bidibwa bya manyi ka ne kutoma onka mema. Kabidi kalama wadi wibalama wadi utyina’mba bakanyana kebabela, ino abo maitu abo ashingana kadi baikala na tunangu ne neni kutabuka basongwalume Bene Babiloni.
Kifwatulo 14: Danyele ne mulopwe wa Babiloni
Ebiya mulopwe wa Babiloni walota kilotwa. Kadi walomba bandi baneni kwikishitulula, ino kekwaikelepo nansha umo wakokeje kwikishintulula kilotwa’kya. Ponkapo mulopwe kasake kwibepaya bonso. Byobiya Danyele ne balunda nandi balombela Yehova Leza kadi Leza nandi webasokwela nshintulwilo ya kilotwa’kya kudi Danyele. Ponkapo Danyele wafika kumumona mulopwe ne kumulombola’mba: kudi Leza umo enka momwa mulu usokola bifibwe. Uno Leza Mukatakatamwine ye aye pano ulombola mulopwe byobya bisaka kufika kumeso. Mu kilotwa, mulopwe wamwene malopwe onsololo a panopantanda. Kadi wamwene bulopwe butabukile bukatampe bwaonakanya malopwe makwabo onsololo. I bulopwe bwa Leza ubikele nyeke ne nyekeke. Ponkapo mulopwe waloelelwa Danyele. Kadi ne baneni bandi bapanda ku kwipaibwa; i enka nenki Danyele watulwa ke mbikavu pa Babiloni.
Kifwatulo 15: Kyelekejo kya Leza
Ebiya mulopwe wa babiloni washimika nkishi mukatampe wa nsahabu. Ponkapo waita bamfumu ne bamudyavita bandi kubandila nkishi’wa. Kabidi mwingidi wa mulopwe wasonanya bantu amba: pomukevwana kimpungidi ne lushiba, nabya mukafukatyila ne kutota nkishi uno wa nsahabu. Kabidi ense kakamufukatyilapo ne kumutota nabya ukelwa mu nkelwa ya mudilo utema tee. Byobiya balunda na Danyele, Shadalake, Meshake kadi ne Abedenego bapele kutota nkishi’wa, mwanda abo badi batota enka Yehova Leza. Ponkapo bantu bamo baiya kumumona mulopwe ne kumulombola’mba: kudi Bayudea bakufutulula, ke-bantu kebafukatyilepo bilezaleza byobe nansha ne kutota nkishi uno wa nsahabu mwine mpikila.
Kifwatulo 16: Nkelwa ya mudilo
Ponkapo mulopwe watuma bantu kukasela ba Shadalake, Meshake ne Abedenego, kaebalombola’mba: shi kemutotapo nkishi uno wa nsahabu nabya mukelwa mu nkelwa ya mudilo utema. Le Leza ukokeja kwimupandija bine? Ponkapo nabo bamulondolola’mba: Uno Leza otwingidila uketupandija, nansha kadi shi ketupandijepo ino nketukafukatyilapo uno nkishi wa nsahabu ehe. Kabidi ba Shadalake, Meshake ne Abedenego baelwa monka mu nkelwa ya mudilo utema. Kupita kwa kitatyi, mulopwe wasama’mba: talaipo’bidi, namone muntu wabuna unanga umbukata mwabo kadi uno wabuna’u wifwene mwana Leza. Ebiya bano basatu pobatambile mu nkelwa ya mudilo’wa, kebadipo nansha batemene pamo, nansha kunukwa luvumba lwa mudilo ehe. Ponkapo mulopwe wanena’mba: Leza wa ba Shadalake, Meshake ne Abedenego watumenga mwikeulu wandi kadi wanyongolola bengidi bandi. Shi kepano ikutupu leza mukwabo ukokeja kulonga bidi namino’bi ehe.
Kifwatulo 17: Danyele ulombela Leza
Danyele wadi na lupusa lukatampe, ke lupusa lwa pa ntanda ya Babiloni kadi. Kabidi bamfumu bamo bamukwatyilwe mukao. Kekwadipo nansha kimo kya kumujingulula nakyo mwanda Danyele wadi ukokele mulopwe. O mwanda mwine balwana na Danyele bafikile kumumona mulopwe ne kumulombola’mba i biyampe utule kijila kya’mba: muntu ense utota muntu mukwabo nansha ke leza mukwabo pampikwa kukutota abewa, nabya abe mulopwe yewa muntu’wa elwe mu muta wa bantambo. Ebiya mulopwe nandi waitabija milangwe yabo, kabidi wasoneka kijila kino’ki. Ponkapo Danyele waivwana pangala pa kino kijila kipya’ki, ino aye waendelela kutota enka Yehova Leza nyeke ne nyeke. Kabidi balwana nandi pobamumwene ulombela, baenda kumumona mulopwe ne kumulombola’mba Danyele wafutulula kijila kyobe.
Kifwatulo 18: Danyele waelwa mu muta wa bantambo
Mulopwe kasakilepo amba Danyele afwe mu muta wa bantambo ehe, ino kadipo mwakushityila kijila kyajidikile mhm. I enka nenki Danyele waelwa mu muta wa bantambo. Ke lubanga bwee, mulopwe wapeja kukatala ku muta wa bantambo ne kwita’mba: Danyele, Danyele, le Leza obe wakupandija mu kyakanwa kya bantambo? Ebiya Danyele nandi walondolola’mba: Leza wami watumenga mwikeulu wandi ye wamumanga byakanwa bya bantambo. Ponkapo mulopwe wasangala. Ponkapo Danyele walupulwa panja pa muta wa bantambo. Ku kinenwa kya mulopwe, balwana bonso ba Danyele’ba baelwa mu muta wa bantambo kadi bukidi bonka basasamunwa tusesotuseso. A balunda nami, ketwazakalai bantu shi tukulupile Leza wa Danyele ne balunda nandi. Nansha bantu betwipayanga, twikalei na lukulupilo, mwanda Yesu watuminwe na Leza kwitupa bumi bwa nyeke nansha tubafu, tukasanguka kwikala bomi nyeke-ke.
Kifwatulo 19: Nehemia kumeso a mulopwe
Nehemia wadi muyudea witabije Leza. Aye waikele ku Babiloni kunyuma kwa kitatyi kya Danyele. Yelusalema kyo kibundi kya bakulutuba bandi, kyaikele kitutwe ke masala onka kadi ne Bayudea badi bashiketemo badi enka mu byamalwa. Kabidi Nehemia wadi kaseya wa mulopwe mukatampe. Ke difuku dimo, byadi utambika mulopwe vinyu, mulopwe wamwipangula’mba: le mwanda’ka kilungi kyobe i kikalale? Ponkapo Nehemia wamubangila pangala pa Yelusalema ne pa bekadi ba kibundi kino’ki, ke Bayudea kadi. Kabidi mulopwe wamunena’mba: le kika kyosaka? Wauba nya, Nehemia walombela Leza mundamunda, kupwa walondolola mulopwe amba: abe mulopwe, ntume mu kibundi kya ba tata amba mone kukekyubakulula. Ponkapo Leza walondolola ku lulombelo lwa Nehemia kadi mulopwe waitabija kilombwa kyandi.
Kifwatulo 20: Nehemia ujingulula kibundi kitutyike
Kabidi mulopwe wapele Nehemia byamingilo kadi ne bantu bakumukwasha. Bakuta lwendo bakafika ku Yelusalema. Ponkapo balwana na Bayudea pobaivwene lusango lwa Nehemia, bakwatwa na bukalabale byamwiko. Kebasakilepo nansha muntu umo wakwiya kukwasha bayudea ehe. Ino aye Nehemia kebakwetwepo moyo ehe. Kabidi Nehemia aye wadi usaka kujingulula Yelusalema, o mwanda mwine wajokolokele kujingulula lubumbu lwa nsakwa ya kibundi na kimbulu. Wafikile bufuku, mwanda kasakilepo nansha muntu umo ayuke kyasaka kulonga i kika ehe. Ke lubanga ponkapo Nehemia waityija Bayudea ne kwibalombola’mba: iyai tubakululei mpembwe (lubumbu) ya Yelusalema amba ketwakikalapo kusepibwa ehe, mwanda wa twipupulule buno bumvu’bu. Kadi webalombola amba Leza udi nabo, ketwakityinai balwana netu. I enka nenki Bayudea baitabija kwingila pamo na Nehemia.
Kifwatulo 21: Kubakwa kwa mpembwe (lubumbu)
(Tala kifwatulo) bayudea abashilula kwingila. Bamo bashilwile kusekwila kifuko, ebiya bakwabo nabo bashilula kushimika lubumbu ne kutula binjilo. Kabidi balwana na Bayudea batulumukile’kyo. Bakanine kwipaya bayudea kitatyi kyobadi bobaka, ino Nehemia walombela Leza monka. Wasakidile Leza kumuludika mwakulongela. Ponkapo watula batulala na byabulwi pa mpembwe mwanda wa kulama bakubaka. Ense wadi na kyabulwi kadi mwiteakanye kulwa. Kabidi balwana kebanekenyepo Nehemia, nansha kunekenya Bayudea bene mpikila. I enka neki ne byavuikile lubako mu mafuku makumi atano ne abidi kete.
Kifwatulo 22: Ezela utanga Mukanda Wabijila
Kupwa kwa kushimikulula kwa lubumbu, bayudea bajokela ku Yelusalema. Kabidi Ezela mupidishitu wa Leza, webatangila Mukanda Wabijila. Bamo bashilula kudila, mwanda bayukile’mba kebakokelepo Bijila bya Yehova Leza. O mwanda mwine Leza walekele balwana nabo kututa kibundi kyabo. Bayudea pano basakile kuvundamina bubi bwabo ne kushilula kulonda dishinda dya Yehova Leza. Kabidi Ezela wanena bantu amba, kemwakikalalai ehe, mwanda nsangaji ya Yehova bo bukomo bwenu. A balunda nami, le mudi mu nsangaji ya Yehova? Leza witupanga nsangaji ne bukomo bwa Mushipiditu. Potuyuka Leza, ne kukokela Mukanda Ukola. Ndekei bidi nemulombole nenu mwakuyukila uno Leza wa Nehemia.
Kifwatulo 23: Yesu kulu kwa musalabu
Kudi dishinda dimo dyonka dya kumuyuka Leza. Kabidi Leza watumine Mwana wandi kwitulombola dishinda. Yesu waikele panopantanda kepapite myaka mingi. Kadi walongele’po bintu bingi bya kukwasha bantu. Wetulombwele mwakusangeja Leza, ino ketwalondelepo dishinda dyandi ehe. Batwe bonsololo twapile mambo kudi Leza. Ebiya mpalo ya bubi buno’bu i lufu lwa nyeke-ke. Shi Leza wapandije Edisha ,e Danyele kadi ne bantu bakwabo, ino kapandijepo Yesu ku lufu ehe. Leza walekele bantu babi kumwipaya Yesu. Kabidi bamupopa ku musalabu wa mutyi. Yesu wasakile kwitupingakana pa lufu lwa pa bubi bwetu mwanda wetusenswe. Ne dyalelo Leza usaka kwitulekela bubi bwetu, nabya tukokeja kufika kwadi ponka pa lufu lwa Yesu.
Kifwatulo 24: Yesu ulombola dishinda dya bumi bwa nyeke-ke
Banwe balunda nami, kwikala mu buno bumi bidi pamo bwa kwenda mu dishinda dikatampe ditwala ku lufu. Batwe bonsololo ketwamusangejepo Leza ehe. Batwe bonso tudi mu dishinda dya Satana. Adyo dino ditwala kukonakanibwa kuinyuma kwa lufu. Ino Yesu wasusukile kadi wafwa mwanda wa etunyongolole ku luno lufu lwa nyeke’lu, kadi wasangukile pano i mumi. Shi kepano, ukokeja kwitulombola dishinda ditwala kwa Leza. Nanshi tufwaninwe kulonda dishinda dya Yesu panopano ponka. Adyo i dishinda dikomo kadi i dityetye. Padi kadi tukasusuka mu buno bumi, pamo bwa Danyele na balunda nandi. Ino dishinda dya Yesu ditwala momwa mulu. Ko kokwa kekudipo masusu ehe, i kifuko kya ndoe ne nsangaji bya nyeke ne nyeke-ke kadi ye ako kwikele Yehova Leza. Yesu unena’mba: Ami enka ne dishinda, ne bine kadi ne bumi, kekudipo wakufika kudi Tata poso ponka padi Amiwa. Nanshi lombela Yesu ponka pano, mwabije akulombole mwakumulondela mu dishinda ditwala kwa Leza.