LLL 7 Ni Hesus ti Dios ken Mangisalakan
![LLL 7 Ni Hesus ti Dios ken Mangisalakan](https://static.globalrecordings.net/300x200/lll7-00.jpg)
Áttekintés: From Luke and John. 24 sections. It has a picture book to go along with the recording. This Simple script is meant for unwritten languages where the translation must be oral.
Szkript száma: 424
Nyelv: Ilokano
Téma: Sin and Satan (Judgement, Sin, disobedience); Christ (Resurrection of Jesus, Son of God, Saviour of Sinful Men, Birth of Christ, Death of Christ, Life of Christ, Authority); Eternal life (Salvation, Eternal / everlasting life); Character of God (Grace and Mercy, Nature, character of God, Word of God (the Bible), Power of God / Jesus); Living as a Christian (Worship, Second Birth, Peace with God, Forgiveness, Faith, trust, believe in Jesus, Spiritual Life, Christian values); Life event (Death); Bible timeline (Gospel, Good News); Problems (Sickness, Problems, troubles, worries)
Közönség: General
Stílus: Monolog
Műfaj: Bible Stories & Teac
Célja: Teaching
Biblia Idézet: Paraphrase
Állapot: Unclassified
Szkript szövege
Pangrugian
![Pangrugian](https://static.globalrecordings.net/300x200/lll7-00.jpg)
Iti kadi maaw-awagan nga Hesus ket imbaon ti Dios ken addaan kabaelan a mangted biag nga agnanayon kadagiti tattao? Ti pannakaipasngay ni Hesus, dagiti aramidna a datdatlag, ti biagna, iti panagungarna manipud ken patay ken dagiti sasaona ket pammaneknek nga imbaon isuna iti Dios. Kitaen ti ladawan a maris rosas a libro ket iyakar iti sumaruno a panid nu mangngeg iti kastoy nga uni.
Umuna a Ladawan: Ti Pannakaipasngay ni Hesus
![Umuna a Ladawan: Ti Pannakaipasngay ni Hesus](https://static.globalrecordings.net/300x200/lll7-01.jpg)
Juan 1:1-14; Lufas 2:1-11
Kitaen ti ladawan. Makitatayo ti kaipaspasngay a maladaga, ti ina ken ama ti maladaga, adda met idiay dagiti tallo a lallaki a papastor ti karnero. Kitkitaenda ti maladaga. Iti naganna ket Hesus. Nakaparintumeng ti maysa a lalaki iti sangoanan ni Hesus. Apay nga inaramidna daytoy? Gapu ta ni Hesus iti kapatgan a maladaga a lalaki a naipasngay iti daytoy a lubong. Sakbay a naipasngay ni Hesus, kaduanan iti Dios iti maysa a lugar a maawagan langit. Pinarsua ti Dios dagiti amin a banag. Ti Dios ket Espiritu, ngem inpakitana ti bagina babaen ken Hesus, nga inpasngay iti maysa a birhen a babai. Inaramid daytoy babaen ti Espiritu ti Dios nga isu met iti agnanaed ken Apo Hesus. Kayat na a sawen a ni Hesus ket Dios. Naggapu ni Hesus sadi langit tapno waya-wayaannatayo kadagiti amin a basoltayo ken tapno ipakitana no kasano tayo nga agbalin nga anak ti Dios (Tukar)
Maikadua a Ladawan. Pinagbalin ni Hesus nga Arak ti Danum
![Maikadua a Ladawan. Pinagbalin ni Hesus nga Arak ti Danum](https://static.globalrecordings.net/300x200/lll7-02.jpg)
Juan 2:1-11
Idi addaanen ni Hesus iti husto nga edad, napan isuna iti maysa a budaan, kaduana dagiti adipenna ken ti inana a ni Maria. Ammo ni Maria a nagtaud ni Hesus iti Dios. Isu nga idin a naibusan iti arak, inbagana ken Hesus daytoy. Kinuna ni Maria kadagiti adipen, “Aramidenyo ti amin nga ibagana kadakayo.” Adda iti innem a dadakkel a pagkargaan iti danum (burnay) nga asideg kadakuada. Kinuna ni Hesus kadagiti adipen, “Punnoenyo dagiti burnay iti danum.” Tinungpal da ti bilin ni Hesus. Kalpasanna, kinuna ni Hesus, “Tumakokayo ket ipanyo iti agaywan iti padaya.” Nagbalin a kaiimasan nga arak ti danum! Gapu iti daytoy, iti umuna a gundaway, nakita dagiti adipen ni Hesus nga addaan isuna iti pannakabalin a naggapu iti Dios, ket nagtalekda kenkuana. (Tukar)
Maikatlo a Ladawan. Nakisarita ni Hesus ken ni Nicodemo
![Maikatlo a Ladawan. Nakisarita ni Hesus ken ni Nicodemo](https://static.globalrecordings.net/300x200/lll7-03.jpg)
Juan 3:1-36
Maysa a rabii, immasideg ken ni Hesus ti maysa a lalaki a managan Nicodemo tapno agdamag kadagiti datdatlag nga ar-aramiden ni Hesus ken iti maipanggep iti Dios. Ni Nicodemo ket maysa a napateg a pangulo ken manursuro idiay Israel. Nadamag na nga agar-aramid ni Hesus kadagiti datdatlag. Ammona a ni Hesus ket nagtaud iti Dios. Kinuna ni Hesus kenkuana, “Ibagak kenka ti pudno, awan iti makakita iti Pagarian ti Dios malaksid no maiyanak manen.” Sinaludsod ni Nicodemo, “Kasano a mayanak manen ti tao a nataenganen?” Insungbat ni Hesus, “Ti tao, ipasngayna ti tao; ket ti Espiritu, ipasngayna ti espiritu. Dika masdaaw no kunak kenka, ‘Masapul a mayanakkayo manen.’ Agpuyupoy ti angin iti sadinoman a kaykayatna. Mangngegmo ti awerna, ngem dimo ammo ti paggapuan wenno pagturonganna. Kasta met ti mapasamak iti tunggal maysa a mayanak iti Espiritu.” Kayat a sawen ni Hesus a saan nga umdas a maiyanak iti kadawyan a wagas. Ti maysa a tao ket nasken a maiyanak manen babaen iti Nasantoan nga Espiritu ti Dios. Ipakpakita ti Santo Espiritu kadagiti tattao dagiti basbasolda ken tulonganna ida a mangtallikud kadagiti dakes a wagas iti panagbiag ken kadagiti kinaulbod ni Satanas. Maamoan iti amin a ni Hesus ket mangisalakan kadagiti mamati kenkuana. Agrugida nga agbiag a makaay-ayo iti Dios. Agbalinda a baro a parsua ket maibilangda iti baro a pamilia, ti pamilia ti Dios. Dagiti mamati iti Dios ket agbiag nga agnanayun, gapu ta ti Espiritu ti Dios ket agtalinaed kadakuada. Ngem dagiti saan nga agtalek iti Dios ket madusa. Iti uray kaanoman, saanto a makastrek iti langit. (Tukar)
Maikapat a Ladawan. Ti Maysa nga Opisyal a Nagparintumeng iti Sangoanan ni Hesus
![Maikapat a Ladawan. Ti Maysa nga Opisyal a Nagparintumeng iti Sangoanan ni Hesus](https://static.globalrecordings.net/300x200/lll7-04.jpg)
Juan 4:46-54
Ania iti aramidem no ti anakmo ket addaan nakaro a sakit? Ti lalaki iti ladawan ket nagdaliasat manipud iti adayo a lugar tapno saraken na ni Hesus. Maysa isuna a kapatgan nga opisyal iti siudadda. Dandanin matay iti anakna, isu a nagpakpakaasi ken ni Hesus ket kinunana, “Apo, pangngaasim ta umayka amangan no matay ti anakko.” Insungbat ni Hesus, “Inkan. Agbiag ti anakmo!” Namati ti opisyal ken ni Hesus ket nagawid. Naimbagan ti anakna iti dayta met laeng nga oras ti panangibaga ni Hesus kenkuana: “Agbiag ti anakmo.” (Tukar)
Maikalima a Ladawan. Ti Lalaki nga Addaan Nakaro a Sakit iti Pagdidigosan
![Maikalima a Ladawan. Ti Lalaki nga Addaan Nakaro a Sakit iti Pagdidigosan](https://static.globalrecordings.net/300x200/lll7-05.jpg)
Juan 5:1-47
Iti siudad ti Jerusalem ket adda pagdidigosan. Ur-urayen dagiti tattao iti panaggaraw iti danum, ta pasaray bumaba ti maysa nga anghel ti Apo iti pagdidigosan ket kiburenna ti danum. Mamatida a ti umuna a tumapog kalpasan ti pannakakiborna ket maagasan iti aniaman a sagsagabaenna. Adda maysa a lalaki nga agsagsagaba ti sakit iti tallo pulo ket walo a tawen. Nakita ni Hesus ti lalaki iti igid ti pagdidigosan ket kinunana, “Kayatmo iti umimbag?” Insungbat ti lalaki, “Apo, awan ti mangitapog kaniak iti pagdidigosan apaman a makibor ti danum.” Kinuna ni Hesus, “Bumangonka! Bagkatem ta iddam ket magnakan.” Naimbagan a dagus ti lalaki. Adda dagiti sumagmamano a tattao idiay a nakapungtot ken Hesus gapu iti panangagasna iti Aldaw ti Panaginana, iti Nasantoan nga aldaw iti Dios. Daytoy ti aldaw a panaginana dagiti Judio manipud iti inaldaw-aldaw a panagtrabaho, tapno agdaydayawda iti Dios. Ti inaramid ni Hesus a nagpalaing ket mangipakpakita nga addaan isuna iti karbengan ken pannakabalin nga agtaud iti Dios a mangagas iti aniaman nga aldaw, uray iti Aldaw ti Panaginana. Idi makita dagiti pangulo dagiti Judio a bagbagkatenna ti pagiddaanna, kinunada kenkuana, “Maiparit nga awitem ti iddam iti Aldaw a Panaginana.” Idi naamoan dagiti pangulo a ni Hesus ti nangpaimbag iti lalaki, inrugida nga idadanes ni Hesus. (Tukar)
Maika-innem a Ladawan. Pinakan ni Hesus ti nasurok Lima Ribu a Tattao
![Maika-innem a Ladawan. Pinakan ni Hesus ti nasurok Lima Ribu a Tattao](https://static.globalrecordings.net/300x200/lll7-06.jpg)
Juan 6:1-15, 25-28, 35; Mateo 14:13-20; Marcos 6:30-44
Nadamag dagiti adu a tattao a ni Hesus ket pinaimbagna dagiti addaan iti sakit, ket iti maysa nga aldaw, adu a tattao ti simmurut kenkuana iti adayu a lugar. Saan a nabayag, dinamag ni Hesus kadagiti adipenna, “Panggatangantayo ngata iti makaanay a kanen dagitoy a tattao?” Insungbat ti maysa kadagiti adipenna, “Adda maysa nga ubing a lalaki ditoy a nagbalon iti lima a tinapay ken dua nga ikan, ngem ania laeng kuma dagitoy iti kastoy a kaadu ti tao?” Pinagtugaw ni Hesus dagiti tattao, innalana ti tinapay ken ikan ket nagyaman iti Dios. Kalpasanna, imbunongna dagiti tinapay ken ikan kadagiti tattao, ket nanganda agingga a napnekda. Imdas kadakuada amin ti taraon. Iti sumaruno nga aldaw, intuloy dagiti tattao iti simmurot ken Hesus. Ket kinuna ni Hesus kadakuada, “Ibagak kadakayo iti pudno: Sapsapulendak gapu ta nangankay iti tinapay ket nabsog kayo, saan a gapu ta nakitayo dagiti nakaskasdaaw nga aramidko. Dikay agbannog gapu iti taraon a madadael. Agbannogkayo ketdi gapu iti taraon nga agpaut iti biag nga agnanayon, nga isu daytoy ti taraon nga ited kadakayo ti Anak ti Tao. Ken inannamongan ti Dios Ama.” Ti ibagbaga ni Hesus ket ti bagina. Kinuna pay ni Hesus, “Siak ti tinapay ti biag. Ti umay kaniak, dinto mabisinanin, ken ti mamati kaniak, dinto mawawen.” (Tukar)
Maikapito a Ladawan. Nagna ni Hesus iti Rabaw ti Danum
![Maikapito a Ladawan. Nagna ni Hesus iti Rabaw ti Danum](https://static.globalrecordings.net/300x200/lll7-07.jpg)
Juan 6:16-22; Mateo 14:22-32
Kalpasan a pinakan ni Hesus dagiti tattao, pinagawidna ida. Pinaunana dagiti adalanna iti maysa a bangka ket bimmallasiwda. Kalpasanna, napan ni Hesus nga is-isuna iti maysa a bantay tapno agkararag iti Dios. Sumipngeten ngem adda pay laeng ni Hesus idiay bantay. Iti dayta met la nga oras, nakaadayon ti bangka iti igid ti dan-aw ket mayyallo-allon agsipud ta subsubaen ti angin. Iti parbangon, nagna ni Hesus iti rabaw ti danum. Nagbuteng dagiti adalan idi makitada ni Hesus a magmagna iti rabaw ti danum. Kinunada, “Al-alia!” inyikkisda gapu iti butengda. Ngem kinuna ni Hesus kadakuada, “Dikay agbuteng! Siak ni Hesus, dikay agdanag.” Limmugan ni Hesus iti bangka ket nagtalnan ti angin. Ket iti daytoy a wagas, naipakita kadagiti adalan a ti pannakabalin ti Dios ket adda ken Hesus. (Tukar)
Maikawalo a Ladawan. Paimbagen ni Hesus ti Maysa a Bulsek
![Maikawalo a Ladawan. Paimbagen ni Hesus ti Maysa a Bulsek](https://static.globalrecordings.net/300x200/lll7-08.jpg)
Juan 9:1-41; 1 Juan 1:7
Adda maysa a lalaki a bulsek manipud nayanak. Sinaludsod kenkuana dagiti adalanna, “Maestro, siasino ti akinbasol iti pannakayanak a bulsek daytoy a tao? Basolna kadi wenno basol dagiti nagannak kenkuana?” Insungbat ni Hesus, “Awan ti pakainaegan ti kinabulsek daytoy a tao iti basolna wenno iti basol dagiti nagannak kenkuana. Bulsek daytoy tapno Makita kenkuana ti pannakabalin ti Dios.” Kalpasanna, timmupra iti daga ni Hesus, inggamayna ti tuprana iti tapok ket inyaprosna iti mata ti bulsek. Ket kinuna ni Hesus kenkuana, “Inka agdiram-os idiay pagdidigusan ti Siloe.” (“Naibaon ti kayat a saoen ti Siloe”) Napan ngarud ti bulsek ket nagdiram-os. Idi agsubbli, makakitan. Adu kadatayo iti bulsek iti pangawat iti wagas ti Dios. Ngem kinuna ni Hesus, “Siak ti silaw ti sangalubongan. Ti siasinoman a sumurot kaniak saanto pulos a magna iti kasipngetan, ngem maaddaan ti silaw ti biag.” (Tukar)
Maikasiam a Ladawan. Inawagan ni Hesus ni Lazaro Manipud ken Patay
![Maikasiam a Ladawan. Inawagan ni Hesus ni Lazaro Manipud ken Patay](https://static.globalrecordings.net/300x200/lll7-09.jpg)
Juan 11:1-46
Adda maysa a lalaki managan Lazaro nga addaan iti nakaro a sakit. Ni Lazaro ken dagiti dua a kakabsatna a babbai a ni Maria ken Marta ket patpatgen a gagayyem ni Hesus. Nangibaon ni Maria ken Marta iti mensahe ken Hesus, “Apo, masakit ti patpatgem a gayyem.” Idi mangngeg ni Hesus daytoy, kinunana, “Saan nga ipatay ni Lazaro ti sakitna. Maaramid daytoy tapno maidaydayaw ti Dios, ket isunto met ti pakaidayawan ti Anak ti Dios.” Ay-ayaten ni Hesus dagiti agkakabsat a Marta, Maria ken Lazaro, ngem saan a napan a dagus ni Hesus ken ni Lazaro. Kalpasan ti dua nga aldaw, kinuna ni Hesus kadagiti adalanna, “Natayen ni Lazaro. Ngem gapu kadakayo, maragsakanak ta awanak iti Ayanna, tapno mamatikayo. Ala, intayon iti Ayanna.” Idi sumangpet ni Hesus, nadamagna nga uppat nga aldawen a naitanem ni Lazaro. Nalidayan dagiti kakabsat ni Lazaro gapu ta saan a dagus a napan ni Hesus tapno agasanna. Ngem kinuna ni Hesus ken ni Marta, “Mapagungarto ti kabsatmo.” Nagkararag ni Hesus iti Dios. Imbilin ni Hesus a luktanda ti tanem. Ket impukkaw ni Hesus, “Lazaro, rummuarka!” Rimmuar ni Lazaro a naputipotan iti lupot. Adu dagiti tattao a nakakita ket nagtalekda ken Hesus. Kinuna ni Hesus, “Siak ti panagungar ken ti biag. Ti siasinoman a mamati kaniak, uray no matay, agbiagto pay. Ket ti siasinoman nga agbiag ken mamati kaniak, pulos a dinto matay. Patiem daytoy?” (Tukar)
Maikasangapulo a Ladawan. Natay ni Hesus idiay Krus
![Maikasangapulo a Ladawan. Natay ni Hesus idiay Krus](https://static.globalrecordings.net/300x200/lll7-10.jpg)
Juan 18:1 - 19:41
Impaneknek ni Hesus babaen kadagiti datdatlag nga aramidna, nga isuna iti maymaysa nga Anak ti Dios. Isu a dagiti pangulo dagiti Judio ket umapal kenkuana ket kayatda a papatayen ni Hesus. Kinuna ni Hesus kadagiti adalanna a masapul a matay gapu kadagiti basbasol dagiti tattao. Daytoy laeng iti wagas tapno maisubli dagiti lallaki, babbai ken dagiti agtutubo iti Dios. Ni Judas, maysa kadagiti adipen ni Hesus, ti nangliput kenkuana kadagiti Judio kasukat iti pirak. Napan dagiti Judio ket tiniliwda ni Hesus. Ni Pedro ken dagiti dadduma pay nga adipen ket naglibasda gapu iti butengda. Impan dagiti pangulo dagiti Judio ni Hesus iti pangukoman, ngem saanda a napaneknekan nga adda nakabasolan ni Hesus. Ket impukkawda, “Ilansam iti krus! Ilansam iti krus!” Saan a nagbayag, impanda manen ni Hesus iti sangaoanan dagiti tattao. Ngem impukkawda, “Ilansam iti krus! Ilansam iti krus!” Kalpasanna, innala da ket pinapatayda ti Anak ti Dios, kadua na dagiti dua a kriminal. Nadusa dagiti dua gapu iti basolda ngem ni Hesus nga awan iti aniaman a nakabasolanna ket natay kas maysa a daton a maipaay kadagiti amin a basol dagiti tattao, agraman basol mo ken basol ko. Ni Hesus laeng iti maymaysa a daton a maikari iti sangoanan ti Dios maipaay kadagiti amin a basol. (Tukar)
Maikasangapulo ket Maysa a Ladawan. Ni Maria ken ni Hesus iti Tanem
![Maikasangapulo ket Maysa a Ladawan. Ni Maria ken ni Hesus iti Tanem](https://static.globalrecordings.net/300x200/lll7-11.jpg)
Juan 19:39 - 20:18
Idi natay ni Hesus, ni Jose a maysa kadagiti adipenna ket dimmawat iti pammalubos a mangala ti bangkay ni Hesus. Intedda kenkuana ti bangkay ket intanemna ti bagi ni Hesus iti maysa a baro a tanem. Maysa a dakkel a bato iti ruangan ti tanem. Iti maikatlo nga aldaw, ni Maria Magdalena ket napan iti tanem ni Hesus. Ti babai a winayaan ni Hesus manipud iti pannakabaludna iti dakes nga espiritu. Nakitana a naikkat ti bato a serra ti ruangan ti tanem, ket awanen idiay ti bagi ni Hesus. Adda dua nga Anghel ti nakatugaw iti disso a nakaikabilan idi ti bangkay ni Hesus. Sinaludsod ti Anghel ni Maria, “Apay nga agsangsangitka?” Insungbat ni Maria, “Impanawda ti Apok, ket diak ammo ti nangikabilanda kenkuana!” Timmaliaw ni Maria ket nakitana ni Hesus nga agtaktakder sadiay, ngem dina nailasin. Sinaludsod ni Hesus ken Maria, “Babai, apay nga agsangsangitka? Siasino ti sapsapulem?” Impagarup ni Maria nga isu ti hardinero, ket kinunana kenkuana, “Apo, no sika ti nangipanaw kenkuana, ibagam man ti nangikabilam ta innak alaen.” Kinuna ni Hesus kenkuana, “Maria!” Nabigbig ni Maria a ni Hesus ti kasarsaritana. Sibibiag ni Hesus! Kinuna ni Hesus ken Maria, “Inka ibaga kadagiti kakabsatko nga agsubliakto iti Amak nga Amayo met, ti Diosko a Diosyo met.” (Tukar)
Maikasangapulo ket Dua a Ladawan. Agparang ni Hesus kadagiti Adalanna
![Maikasangapulo ket Dua a Ladawan. Agparang ni Hesus kadagiti Adalanna](https://static.globalrecordings.net/300x200/lll7-12.jpg)
Juan 21:1-19
Sakbay a nagsubli ni Hesus sadi langit, nagaramid pay isuna iti maysa a datdatlag. Maysa a rabii, dagiti adalanna ket agkalkalap, ngem awan uray maysa a naalada. Iti sumaruno nga aldaw, maysa a lalaki ti nagparang kadakuada iti igid ti dan-aw. Kinuna kadakuada ti lalaki nga iwayatda ti iketda iti makannawan ti bangka tapno adda maalada. Inwayatda ngarud ti iket, ket nakakalapda iti adu nga ikan. Naamiris dagiti adipen a ni Hesus ti kasarsaritada. Impanda dagiti nakalapda iti igid ti dan-aw. Ket nangisagana ni Hesus ti taraonda. Kalpasan a nanganda, kinasarita ni Hesus dagiti adalanna, maysa kadakuada ni Pedro. Ni Pedro ket maysa kadagiti timmaray nga adipen iti rabii a tiniliwda ni Hesus ken kalpasanna inlibakna ni Hesus. Kinuna ni Hesus ken Pedro “Surotennak.” Ket kinunana pay ken Pedro nga aywananna dagiti karnero ni Hesus, aywananna ken idalanna ida a mangiwaragawag ti Naimbag a Damag maipanggep ken Hesus, iti ipapatayna maipaay kadagiti basbasol ti amin a tattao ken iti panagballigi ni Hesus ken Satanas idi a nagungar manipud ken patay. Kayat ti Dios a mangngeg dagiti amin a tattao iti maipanggep ken Hesus ken dagiti datdatlag nga aramidna tapno agtalekda kenkuana nga Anak ti Dios. Sumurot tayo kenkuana tapno maisalakan ken maaddaantayo iti biag nga agnanayon. (Tukar)
Pangrugian iti Sumaruno nga Istorya
![Pangrugian iti Sumaruno nga Istorya](https://static.globalrecordings.net/300x200/lll7-00.jpg)
Ni Hesus ti agmaymaysa a naindakklan a mangisalakan. Insalakannatayo manipud iti basol ken kinadakes. Intedna ti biag nga agnanayon. Denggen dagiti dadduma pay a sursuro maipanggep ken Hesus. Kitaen ti sumaruno a ladawan nu mangngeg ti kastoy nga uni. (Tukar)
Maikasangapulo ket Tallo a Ladawan. Ni Hesus lawlawagan na dagiti Dua nga Adalan
![Maikasangapulo ket Tallo a Ladawan. Ni Hesus lawlawagan na dagiti Dua nga Adalan](https://static.globalrecordings.net/300x200/lll7-13.jpg)
Lucas 24:13-35
Adu dagiti Judio iti mangnamnama nga isalakan ida ni Hesus manipud iti panangituray dagiti mangidadaulo ti Roma. Ngem saan nga isu ti gapu iti iyaay ni Hesus iti rabaw ti daga. Saan a mabayag, dinawat dagiti Judio kadagiti pangulo ti Romano a patayenda ni Hesus. Pinataydangarud babaen iti panangilansada iti krus. Idi a nagungar, dua kadagiti adipenna iti magmagna a paawid iti pagtaenganda, idi kellaat a nagparang ni Hesus ngem saan da a nailasin ket sinaludsod na kadakuada “Ania ti pagsarsaritaanyo bayat ti pannagnayo?” Kinunada, “Sikan sa laeng ti sangaili iti Jerusalem a di makaammo kadagiti napaspasamak sadiay kadagiti napalabas nga aldaw!” ket imbagada kenkuana iti napasamak ken Hesus, no kasanona nga impakita a maysa isuna a propeta a nagtaud iti Dios babaen kadagiti mannakabalin a datdatlag nga inaramidna, ken no kasano tiniliw isuna dagiti papangulo ket intedda nga inlansa iti krus. Inlawlawag ni Hesus kadakuada no ania iti kinuna ni Moises ken dagiti amin a propeta ti Dios maipanggep kenkuana manipud iti Nasantoan a Surat adun a tawen ti napalabas. Kinuna dagiti propeta a maparigatto ket matay. Kinunada pay nga agungarto manipud ken patay tapno agtugaw iti makannawan ti Dios iti agnanayon idiay pagarianna. Iti dayta met la a rabii, nagtugaw ni Hesus tapno mangan kaduana dagiti dua nga adalanna. Nangala ni Hesus iti tinapay ket pinisipisina sana inted kadakuada. Naluktan ti panagkitada ket nailasindan nga isu ni Hesus, ngem nagpukaw ni Hesus iti imatangda. Nagrubbuatda a dagus ket nagsublida idiay Jerusalem tapno ipadamagda kadagiti dadduma nga adalan a nakitada ni Hesus ken nagungar. Denggen tayo no ania iti isursuro kadatayo ni Hesus manipud kadagiti Nasantoan a Sursurat. (Tukar)
Maikasangapulo ket Uppat a Ladawan. Ti anak nga lalaki iti pagtaraknan kadagiti baboy
![Maikasangapulo ket Uppat a Ladawan. Ti anak nga lalaki iti pagtaraknan kadagiti baboy](https://static.globalrecordings.net/300x200/lll7-14.jpg)
Lucas 15:11-20
Sakbay a natay ni Hesus, nangibingay iti maysa nga istorya maipanggep iti maysa nga ama nga addaan dua nga anak a lalaki. Kinuna ti inaudi nga anak iti amana “Ama, itedmon ti tawidko.” Biningay ngarud ti ama ti sanikuana kadagiti dua nga annakna. Napan ti adayo a daga ti inaudi nga anak ket sadiay binusbosna amin a kuartana iti nabarayuboy a panagbiag. Idi nagastonan amin a kuartana, dimteng ti nakaro a bisin iti dayta a daga ket pulos nga awan nabatin kenkuana. Iti kasta, napan nagtrabaho iti maysa kadagiti umili sadiay a nangibaon kenkuana iti away tapno agtaraken kadagiti baboy. Gapu iti nakaro a bisinna, kayat na payen a kanen ti kanen dagiti baboy. Idi makapanunot met laeng, kinunana, “Agsobsobraan iti kanen dagiti amin a mangmangged idiay balay ni amak, ket addaak ditoy a matmatay iti bisin! Pumanawak ketdi ket agsubliak ken ni amak. Ama, kunakto, nagbasolak iti Dios, kasta met kenka. Diak maikarin a maawagan nga anakmo. Ibilangnak kadi a kas maysa kadagiti tangtangdanam.” Pimmanaw ngarud sadiay ket nagrubbuat nga agsubli ken amana. (Tukar)
Maikasangapulo ket Lima a Ladawan. Ti Panagawid ti Napukaw nga Anak
![Maikasangapulo ket Lima a Ladawan. Ti Panagawid ti Napukaw nga Anak](https://static.globalrecordings.net/300x200/lll7-15.jpg)
Lucas 15:20-32
Adayo pay laeng iti balayda idi makita ni amana. Timmaray ti amana a nangsabat kenkuana ket inapungolna sana inagkan. Inayaban ti amana dagiti katulongna ket kinunana, “Alaenyo ti kasayaatan a bado ket ikawesyo kenkuana. Singsingan ken sapatosanyo. Inkay alaen ti napalukmeg a baka ket partienyo. Agrambaktayo! Ta natay daytoy nga anakko, ngem nagungar. Napukaw ngem nasapulan met laeng.” Ket nangrugin ti ramrambak. Kinuna ni Hesus kadatayo a ti Dios ket kas iti ama. Amin a tao ket kas iti anak a nagbasol ken nagbiag iti saan a nasayaat. Ngem ay-ayatennatayo ti Dios. Kayatna nga agsubli tayo kenkuana. Kayatna tayo a pakawanen ken ikkaten (alaen) amin a basol tapno agbiagtayo manen a nabileg. Ngarud intedna ni Hesus tapno saraken ken isalakanna dagiti amin a naisina iti Dios. Amin nga agbibiag a naisina iti Dios ket mapukpukaw. Ni Hesus laeng ti dalan tapno amin a mapukpukaw ket makasubli iti Dios ken maikari iti pamilia ti Dios. (Tukar)
Maikasangapulo ket Innem a Ladawan. Ti sanikua ti maysa a baknang a lalaki
![Maikasangapulo ket Innem a Ladawan. Ti sanikua ti maysa a baknang a lalaki](https://static.globalrecordings.net/300x200/lll7-16.jpg)
Lucas 12:13-21
Nangted manen iti maysa nga istorya ni Hesus maipanggep iti maysa a nabaknang a lalaki a nagapit iti nawadwad. Kinuna ti lalaki iti bagina, “Ania ngata ti aramidek? Awan umanay a pagipempenak iti apitko.” Kinunana pay, “A, ammokon! Daytoy ti aramidek: Rakrakekto dagiti sarusarko, ket mangbangonakto iti dakdakkel a pagipempenan iti apitko ken dadduma a sanikuak. Ket kunakto iti bagik: ‘Naggasatkan, bagi, ta adda amin a masapulmo iti adu a tawen. Aginanaka, manganka, uminumka, ket agragsakka,’ Ngem kinuna ti Dios kenkuana: Maag! Ita met la a rabii, matayka. Ket amin dagitoy nga urnongmo, siasinonto ti agtagikua?” Kinuna ni Hesus, “Kastanto ti pagbanagan dagiti agurnong iti adu a sanikua nga agpaay kadakuada, ngem napanglawda iti imatang ti Dios. Kitaenyo ket agannadkay iti amin a kita ti kinaagum. Ta ti pudno a biag ti tao saan a maibatay iti sanikua, uray no kasano ti kinabaknangna.”
Maikasangapulo ket Pito a Ladawan. Ti Napanglaw ken ti Nabaknang
![Maikasangapulo ket Pito a Ladawan. Ti Napanglaw ken ti Nabaknang](https://static.globalrecordings.net/300x200/lll7-17.jpg)
Lucas 16:19-31
Pagpanpannakkel dagiti Pariseo dagiti bagida kas maysa kadagiti nainget a sumursurot kadagiti bilin ni Moses ken dagiti propeta. Ngem linaksidda ni Hesus. Ket nangted ni Hesus iti maysa a pangngarig maipanggep iti maysa a nabaknang a lalaki nga addaan kenkuana iti amin a banag a kayatna. Agkawes kadagiti agkakangina a pagan-anay ken mangan kadagiti agkakaimas a makan iti inaldaw-aldaw. Iti ruangan ti balayna ket adda maysa a nakaidda a napanglaw a managan Lazaro. Maayatan isuna a mangan kadagiti maregreg iti lamisaan iti baknang. Nalapunos iti gaddil ti bagina a pasaray mapan dildilan dagiti aso. Natay ti napanglaw ket impan dagiti angheles iti ayan ni Abraham. Natay met ti baknang ket impanda idiay Hades ket idiay a nagsagaba iti napalalo. Timmangad ket nakitana ni Abraham nga adda iti adayo agraman ni Lazaro ti abayna. Kinunana ken Abraham a no mabalin papanenna ti napanglaw ket ikkanna ti danum. Ngem kinuna ni Abraham, “Anakko, laglagipem a kabayatan ti panagbiagmo, naited kenka ti amin nga agkakaimbag a banag idinto a naglak-am ni Lazaro iti rigat. Itan, adda ditoy a maliwliwa ket addaka dita a matutuok. Saan la a dayta! Adda dakkel a yuyeng iti nagbaetantayo tapno saan a makaballasiw dagiti mayat nga umay dita manipud ditoy wenno dagiti aggapu dita nga umay ditoy.” Kinuna ti baknang, “Dawatek ngarud kenka ama Abraham nga ibaonmo ni Lazaro iti balay ni amak tapno bagbagaanna dagiti lima a kakabsatko a lallaki sadiay, amangan no umayda met ditoy yan ti tuok.” Ngem kinuna ni Abraham, “Adda ni Moises ken dagiti propeta a mamagbaga kadakuada. Masapul a dumngeg dagiti kakabsatmo iti saoda.” Insungbat ti nabaknang, “saan nga umanay dayta ama Abraham. Ngem no agungar ti maysa kadagiti natay ket mapan kadakuada, agbabawidanto kadagiti basbasolda.” Ngem kinuna ni Abraham, “No dida denggen ni Moises ken dagiti propeta, didanto metla mamati, uray pay no adda agungar kadagiti natay.” Panagammo dagiti Pariseo a maidaydayawda ti Dios ken ti Nasantoan a Surat. Ngem saanda a mamati ken Hesus uray pay iti panagungarna manipud ken patay. Nabaknang ka man wenno napanglaw nasken nga ayatem ken idayawmo ti Dios. Agtalek ka iti Dios tapno maisalakanka ket saan a maipan iti awan inggana a panagsagaba. Ket maawatmo ti biag nga agnanayon manipud iti Dios. (Tukar)
Maikasangapulo ket Walo a Ladawan. Ti Gayyem idiay Ruangan
![Maikasangapulo ket Walo a Ladawan. Ti Gayyem idiay Ruangan](https://static.globalrecordings.net/300x200/lll7-18.jpg)
Lucas 11:5-13
Napan ti maysa a lalaki iti gayyemna ket kinuana, “Gayyem, pabulodannak man iti tallo a tinapay. Dimmagas ngamin ti maysa a gayyemko iti panagbiahena ket awan a pulos ti ipakanko kenkuana.” Insungbat ti gayyemna, “Dinak ringringgoren! Nairikepen ti ridaw ket nakaidda kamin kadagiti annakko. Diak mabalinen ti bumangon a mangted kenka iti uray ania.” Madi na kayat iti bumangon. Ngem ti lalaki ket adda paylaeng iti ruangan ket saan a nagbain, intuloyna ti nagdawat. Isu a bimmangon ti gayyemna ket intedna ti masapulna. Kinuna ni Hesus, “Agdawatkayo ket maikkankayto. Agsapulkayo ket makasarakkayto. Agtugtogkayo ket mailukatto kadakayo ti ruangan. Ta ti amin nga agdawat, maikkan. Ti agsapul, makabirok. Ti agtugtog, mailukatto kenkuana ti ruangan.” Kayat ti Dios nga agbalin a nasayaat nga Ama kadatayo amin. Kayatna nga ited kadatayo ti Nasantoan nga Espiritu ket ikkanna dagiti agkasapulan. Ti nasken laeng nga aramidentayo ket agtultuloy nga umawag kenkuana babaen iti panagkararag. (Tukar)
Maikasangapulo ket Siam a Ladawan. Dagiti Dua a Lallaki iti Templo ti Dios
![Maikasangapulo ket Siam a Ladawan. Dagiti Dua a Lallaki iti Templo ti Dios](https://static.globalrecordings.net/300x200/lll7-19.jpg)
Lucas 18:9-14
Makitatayo iti ladawan nga adda iti dua a lallaki nga agkarkararag iti templo ti Dios. Ti maysa kadakuada ket relihiyoso ken nangato iti panangkitana ti bagina. Agkarkararag laeng a maipaay iti bagina ket kinunana, “Agyamanak kenka, O Dios, ta saanak a kas kadagiti dadduma a naagum, naulbod wenno makikamkamalala. Agyamanak met ta saanak a kas iti daytoy agsingsingir iti buis. Maminduaak nga agayunar tunggal lawas, ket itedko ti apagkapullo ti amin a masapulak.” Saan a nay-ayo ti Dios iti kararag daytoy a tao. Ti maysa met a lalaki ket saan a pudno kadagiti singsingirenna iti buis. Taktakawenna ti kuarta dagiti tattao ket ammona a saan a maay-ayo kenkuana ti Dios. Isu a dimmawat ti pakawan kadagiti amin nga inaramidna, dinandanogna ketdi ti barukongna, dina pay itangad dagiti matana sadi langit gapu iti napalalo a bainna. Nagkararag isuna iti Dios ket kinunana, “O, Dios, kaasiannak kadi a managbasol!” kinuna ni Hesus, “Ibagak kadakayo, nagawid ti agsingsingir iti buis a napalinteg iti sangoanan ti Dios. Ngem ti Pariseo, saan a napalinteg. Ta ti mangitantan-ok iti bagina, maipababanto. Ngem ti mangipababa iti bagina, maitan-okto.” (Tukar)
Maikaduapulo a Ladawan. Ti Agmulmula a Nagipurruak kadagiti Bukel
![Maikaduapulo a Ladawan. Ti Agmulmula a Nagipurruak kadagiti Bukel](https://static.globalrecordings.net/300x200/lll7-20.jpg)
Lucas 8:4-9
Maysa nga aldaw, nangisuro ni Hesus kadagiti tattao ket kinunana, “Adda maysa a tao a napan nagpurruak kadagiti bukel. Idi agpurpurruak, nagdisso ti sumagmamano a bukel iti igid ti dalan ket tinuktok dagiti tumatayab. Adda met sumagmamano a bukel a nagdisso iti kabatuan. Idi agtuboda, nalaylayda ta saan a nadam-eg ti daga a nagdissoanda. Nagdisso ti sumagmamano a bukel kadagiti kasisiitan ket nagtubo ngem lineppes da ida. Adda met dagiti bukel a nagdisso iti nadam-eg a daga, nagtubo ken nagbungada iti sagsasangagasut. “Dumngeg ngarud ti siasinoman nga addaan pannakaawat,” inggibus ni Hesus. (Tukar)
Maikaduapulo ket Maysa a Ladawan. Ti Panagrusing dagiti Bukel
![Maikaduapulo ket Maysa a Ladawan. Ti Panagrusing dagiti Bukel](https://static.globalrecordings.net/300x200/lll7-21.jpg)
Lucas 8:9-15
Inlawlawag ni Hesus ti pangngarig maipanggep iti nangipurruak kadagiti bukel. “Ti bukel isu ti sao ti Dios. Dagiti nagdisso iti igid ti dalan, iladawanda dagiti tattao a dumngeg. Ngem umay ti Diablo ket ikkatenna ti mensahe iti pusoda tapno dida mamati ken maisalakan. Dagiti nagdisso iti kabatuan, iladawanda dagiti tattao a dumngeg iti mensahe ken awatenda a siraragsak. Ngem saan nga umuneg ti mensahe kadakuada. Mamatida iti apagbiit, ngem suminada no dumteng ti tiempo a pannakasuot. Dagiti nagdisso iti ayan dagiti siitan a mula, kayariganda dagiti tattao a dumngeg; ngem dagiti pakaringgoran ken kinabaknang ken ragragsak ditoy a biag, leppesenda ida ket saan a matangkenan dagiti bungada. Dagiti nagdisso iti nadam-eg a daga, iladawanda dagiti tattao a dumngeg iti mensahe, salimetmetanda iti naimbag ken natulnog a puso, ket agtalinaedda agingga iti agbungada.” Kasano a mangngeg ken maawat ti Naimbag a Damag maipanggep ken Hesus? No sika ket mamati, agtalinaed ka kadi iti pammatim uray dumteng ti sulisog, rigat ken dagiti adu pay a banag a pakakomikoman iti biag tapno padasenna a takawen ti Sao iti pusom? No nangngeg mo ti Sao ti Dios ket sika ket mamati ken saan nga agpaabak kadagiti aniaman a sulisog, maiyarigka iti maysa a nadamg-eg a daga nga agbunga iti nawadwad. (Tukar)
Maikaduapulo ket Dua a Ladawan. Ti Panangtulong iti Maysa a Nasugsugat a Lalaki
![Maikaduapulo ket Dua a Ladawan. Ti Panangtulong iti Maysa a Nasugsugat a Lalaki](https://static.globalrecordings.net/300x200/lll7-22.jpg)
Lucas 10:25-37
Ti Sao ti Dios, ti Biblia, mangisursuro kadatayo nga ayatentayo ti Dios ken dagiti sabsabali. Ngem siasino kadi dagiti tattao a nasken nga ayatentayo? Nagistorya ni Hesus maipanggep iti maysa a lalaki a naggapu idiay Jerusalem sumalsalog mapan idiay Jerico, sinaneb dagiti tulisan, innalada amin nga adda kenkuana agraman badona, kinabkabilda sada pinanawan a dandanin matay. Saan a nabayag, adda met sumalsalog a dua a relihiyoso a tattao, maysa a padi ken maysa a Levita, nakitada ti tao a nasugsugat ngem linisianda laeng daytoy ket saanda a tinulungan. Adda met maysa a Samaritano nga agbibiahe ket limmabas sadiay. Idi makitana ti lalaki, naasian kenkuana. Inasitganna ket sinapsapoanna dagiti sugatna iti lana ken arak sana binedbedan ida. Insakayna iti bukodna nga animal ket impanna iti maysa a pagdagdagusan a nangtaripatoanna kenkuana. Kinuna ni Hesus, no pudno nga ay-ayatentayo ti Dios, nasken nga ipakitatayo ti panagayattayo babaen iti panagtulong kadagiti siasinoman nga agkasapulan. (Tukar)
Maikaduapulo ket Tallo a Ladawan. Ti Panagsubli ti Akinkukua iti Balay
![Maikaduapulo ket Tallo a Ladawan. Ti Panagsubli ti Akinkukua iti Balay](https://static.globalrecordings.net/300x200/lll7-23.jpg)
Lucas 12:35-48
Malagipyo kadi pay ti pannakatay ni Hesus a nagungar manipud ken patay? Nakitana dagiti adipenna sakbay a nagsubli sadi langit. Kinuna ni Hesus kadakuada nga agsubli isuna. Ket kinunana pay nga amin a mamati kenkuana ket agbalin a kas iti adipen a mangpaspasungad iti amona a napan nakiboda. Kinuna ni Hesus, “Nagasat dayta nga adipen no masangpetan ti amona a nakasagana.” Gapu ta saantayo nga ammo no kaano iti panagsubli ni Hesus, nasken nga aramidentayo no ania dagiti pagayatanna ken nakasaganatayo nga awaten ken sabten Isuna iti aniaman nga oras ti panagsublina. Daytoy iti panawen nga maaddaan iti napalalo a ragragsak ken panagramrambak. Kadagiti awan pammatina ken Hesus, daytoy met ti panawen ti lidliday. Kinuna ni Hesus kadagiti adipenna a nasken a nakasaganada a kankanayun iti panagsublina. No idalanda a nasayaat ti umilina ken aywananda dagiti adipenna, makaawatda iti gun-guna. Ngem no dangranna dagiti adipenna ken saan a nasayaat iti panangidalanna, makaawat isuna iti napalalo a pannakadusa. (Tukar)
Maikaduapulo ket Uppat a Ladawan. Ti Lalaki iti Kayo
![Maikaduapulo ket Uppat a Ladawan. Ti Lalaki iti Kayo](https://static.globalrecordings.net/300x200/lll7-24.jpg)
Lucas 19:1-10
Isalakan ni Hesus dagiti uray siasinoman manipud iti basol. Denggentayo a nalaing ti istorya: ni Zakeo ket maysa a nabaknang a panguloen dagiti agsingsingir iti buis. Saan a napudno ken taktakawenna ti kuarta dagiti tattao. Nadamagna a ni Hesus ket lumabas iti ilida ket kayatna a makita Isuna, ngem ni Zakeo ket bassit a tao ket napalikmutan ni Hesus iti adu a tattao. Iti kasta, nagtaray ket immuli iti maysa a kayo. Timmangad ni Hesus idi mabatoganna ni Zakeo ket kinunana, “Zakeo, darasem ti umulog ta umayak idiay balaymo ita nga aldaw.” Nakigtot dagiti tattao nga adda sadiay gapu ta ni Zakeo ket saan a nasayaat a tao. Dinagdagus ni Zakeo ti immulog ket siraragsak a nangawat ken Hesus. Kinuna ni Zakeo ken Hesus a likudanna dagiti aniaman a dakes nga aramidna ket agbalbaliw isuna. Kinunana, “Denggem, Apo! Itedko kadagiti napanglaw ti kagudua ti sanikuak. No adda sinaurko, isublik kenkuana iti mamimpat a kaadu ti innalak!” Ket kinuna ni Hesus, “Ita nga aldaw, dimteng ti pannakaisalakan iti daytoy a balay.” Ni Zakeo ket maibilangen iti pamilia ti Dios. Immay ni Hesus tapno mangbirok ken mangisalakan iti napukaw. (Tukar)