Livro 4

Livro 4 Nikukuru A Amwimeleli a Mulugu

Mavolowelo:
Eyaa- Akwaaga. Mulugu ononidhivela vano onowakameela ateene, mbwenye
onologolela nthebwa mwa ateene alene enamudhivela emwiwelelaga.
Nvuruwane thalako nda dhebaribari, nyo mwing’anaga modagarasiya nda dhili
munivuruni na njani.
Musugwe modagarasiya dhoharela mweewa yoruma ela.(*)

1 Yonihelo yowambeela

Ruti 1:1-50

Vano Mulugu akadda Ezarayeli yaali elabo eyene Mulugu yaroromelihiliye yaaka
dhijinji dha mundduli, oburamela dhapama dhatedhene Mulugu aroromelihiye.
Mulugu, omusakula Ezarayeli wi okale mulogo waye wofwanelela wi omunone.
Mbwenye olenddo mmohi yowoneyiha ovuruvuru vamentoni va Mulugu, yebedhaga
milugu dhebeweene dhosasanyiwa ni mada athu. Nuwi ndo Mulugu orumiha koddo ni
dala ni mukalelo wowi athu aaye esinyuwe muvuruvuruni mwiwa wi erugunuwe
emovege Mulugu baahi ebaribari, emudhi emohi, ya a mwana Ezarayeli yahubuwela
ohiya elabwiwa odhowa elabo emohene. Vano yahikalawo yaaka kumi ofiyedha
babinyaya okwa. Anapongwe abiili a amudhi ale, yahatela ahiyana a elabo ele ya
oMowabe, vano azombwe ale egatelileve yahikwa wahiya ahiyaniiwa ni omamukwele
yahabalilena ahima, vano mmewa okalaga ni mazaliye menddi elabo ele, yoweddela.
(*)

2 Yonihelo ya nabiili

Ruti 1:6-22

Ahiyana abiili enowelela Wizarayeli. Mmenya a emudhi ele ethaniwa Nawomi
nzaliye mukadda mowabe eriwa Ruti ni Orufa. Nawomi wiiwa wi ukala muzongwe
Wizarayeli Mulugu ureliha athu aye ni dhooja dha mmiddani, vano wubuwela owelela
elabo yakumiliye, vano mazaliye yahimuhara. Vano edhowaga mundila yahinasuse,
Nawomi ahirugunusaga mulomo awirelaga mazaliye wiira welagani mwakalege ni
amudhi enyu, vowi oliye aali mamukwele kanna yowaroromeliha osogolo
yamuhareligiwa, naari wasayelela alobwana elabo ele yafiya. Orufa ahiwela
odhowaga wa amudhi aaye ni mareliho anvahile Nawomi, mbwenye Ruti wiira: Miyo
kamugiwelihe, gihiyeni, onayiginyu miyo ginaya wewo, nlogo nenyu nikale nlogo
naaga, vano Mulugu enyu onakale Mulugu aaga. (*) yoruma.

3 Yonihelo ya nethaaru

Ruti 2:1-23

Ruti onaya omidda (Ruti 2:1-23)
Mudhidhi wa yaaka elene, athu ajinji yomaruwa odhowaga omidda vowi waali
mudhidhi woredda dhilo. Nawomi ni Ruti kayanna mudda, yaali aliba orabula. Ruti
ahiwoga ni anzaliye Nawomi wiira: Miyo ginaya omidda gaddoddelege dhinahiyisu
mundduli mwiwa dhahinapwathisu.- Ruti ahimaruwaga odhowaga omidda
wowaddamela vowaniwa wi orulege kogolo dhohalamo. Mudda ole waali wa
mulobwana mmohi orelesesa eriwa Bowazi, aali mmudhi owecemula a Nawomi,
mbwenye Ruti kanonile.
Ruti ahimuwogana sewundda ammiddanimwa wiira: Ginafuna giddoddelege
dhinahala mundduli mwa. Vano Bowazi ahifiyaga omidda waye wi oone dhooja
dhinareddiwa vano ahimoonaga mwihiyana ole omukoha sewundda aaye wiira:
Mwihiyana ole baani? Sewundda ahimwakula Bowazi wiira di Ruti, mwanowendda
ole nzali a Nawomi. Bowazi ahiiwa wi oliyeya dapama mwi emudhini onowedda
pama ni Nawomi, omoona wi onolaba ni kopolo wi ajege wula ajihaga anzaliyaye.
Vano oliye wiira: Ruti susedha wu oli anamaredda aaga wi aliwa yukamihedhege.-
Bowazi wawirela anamalaba aaye wi emuhiyedhege mangala a tirigu mundduli wi
ahigomege addoddelege. Ruti onowelela vade ni mapithika majinji Nawomi
onomutamala Mulugu vowi owakamihedha aliwa.(*) yoruma.

4 Yonihelo ya neenayi

Ruti 3:1-18

Nawomi onomusayelela Ruti mulobwana. (Ruti 3:1-18)
Wahikala yeddelo ya mwaana Ezarayeli yowi, mulobwana akwa, ohabawo
mulobwana mmohi a nihimo nimohive amutela mwihiyanaya. Nlabo nimohi Nawomi
ahiwogaga ni ruti wiira:- Miyo ginowusayelela mulobwana, wi we okalena nivade
naawonene. Bowazi di mmudhi ehu, mahiyu a peeno onadhowa omidda oli
anamalaba aye onamuthikithisu tirigu. Wisasanyedhe oware pama dhowara dhixa.
Oliye akonati, we odhowe nuwida wakale omeddoni waye oliye owoona ononona wi
onafuna oteliwe ni Bowazi, yeddelo ya siyeene.Bowazi varurumuwiliye,
ahimwaddela Ruti wiira: Miyo gowufuna wuutela weeya, mbwenye vihikala yohalela
eng’ onong’ onove. Mwana mmudhi awo, dafwanelele omutela Ruti, mbwenye oliye
wiira:- Kukukumuwe miyo ginowusayelela dhatedhene. (*)Yoruma.

5 Yonihelo ya neetanu

Ruti 4:1-22

Bowazi onowesesuliwa ni makolo.(Ruti 4:1-22)
Bowazi onowithana nikwedda na makolo a amudhi aye ni mwana mmudhi afwanelele
omutela Ruti woona nlamulo neewa ni mweddelo weewa. Aliwa orumedhela wi
Bowazi ohufwanelela omutela, wi emage nipangano, mulobwanaya omwinka Bowazi
Xineli dhaye . Ola waali mweddelo wo Wizarayeli, vano Bowazi aali otapuweene wi
amutele Ruti. Bowazi ni Ruti yahimbala mwaniwa mwana pongwe ndinanaye eriwa
Obedde. Ruti kaali mukadda Ezarayeli, mbwenye osakula waaye oliye okala mmohi
wa nlogo na Mulugu. Mwana Ruti, Obedde, osogolowa oliye okala baba a Jese, aali
baba a Ddaviddi, mwene mulubale akadda Ezarayeli.

6 Yonihelo ya neetanu nammohi

Lukazi 1:16-38

Mariya ni mungero a Mulugu. (Lukazi 1:16-38)
Milogo dhimohi dhijinji dha mundduli mwa Ruti, Mulugu umusakula mwana
mwihiyana mmohi wi amwimelelege. Ndina naye aali Mariya, aali namabaliwela a
Ruti. Mariya aali mwanaburu aroromelihane ni mwana pomgwe eriwa Zuuze.Aliwa
ehinatelane, mungero mmohi ahidha wa Mariya omwirela wi:
-Mariya kawoove. We ufwanyiwa mahala ni thagaraga vamentoni va Mulugu.-We
oneere ombala mwanapongwe ndina naye onethaniwege Yesu oliye onakale mwana
Mulugu amudhuludhulu.-
Mariya ahitikiniheyaga vajinjivene vewiligiye ndo, mbwenye mungero
ahimutapulelagamo wiira mwaana aawoya kanadhele wa mulobwana Zuuze mbwenye
ni mukalelo wononeya onarubalele ni kopolo dha muneba wa Mulugu. Mariya
omwakula wi vowi gili namemelela a Mulugu gineere weenya ofuna wa Mulugu .-
Ahimbala mwana pongwe eriwa ndina na Yesu, mwana Mulugu. (*) yoruma.

7 Yonihelo ya neetanu na biili

1 Samuel 1:1-20

Ana onomuloba Mulugu. (Samuel 1:1-20)
Elabo yo Wizarayeli yahikala mwihiyana ndina naye eriwa Ana, mamune
omudhivela, mbwenye oliye mwihiyana kaasa kove, mwaha wi kanna mwaana naari
owi mmohi. Yaaka dhatedhene oliye odhowesa Ogerezha nyuba yomulobamo
Mulugu o silo, yodhowanawo mvahi dha mahala ni mukutho, woona valamulela
nlamulo. Oliye vafiyiliye nyuba ya malobelo a Mulugu, alobelaga Wiira:- Nabwiya
mwagubuwela miyo mugivaha mwaana miyo gineere ompeleka wa nyo wi
owimelelegeni malabweene a egumi yaye.-
Mmalobeloni mwaye, akanyihaga milomove, keenyaga ovuweyiha malobelo aye.
Namukutho a nyuba ya Mulugu, Eli, vamwiwiligiye obuwelaga wi wiire olezela
(kacaso). Mbwenye Mulugu egi wiiwa malobelo a Ana, vano mudhidhi oviragave
oliye ahikanna mwaana, vowi ndina naye eriwa Samuweli. (*)yoruma

8 Yonihelo ya neetanu na thaaru

1 Samuel 1:24-12

Samuweli vade va Mulugu. (Samuel 1:24-12)
Samuweli agali nnyenyanene, amaye Ana, wiroromeliha vowakwanela wa Mulugu,
wi yakalege ni namukutho Eli nyuba ya Mulugu eli o Silo. Eli ahimusuuziha
Samuweli makalelo omwiwelela Mulugu. Namukutho Eli anna ahima abiili, naliwene
yaali anamukutho, mbwenye aliwaya yahivonyongola. Malamulo. Ni mwaha wa eyo,
Mulugu ahimaala owoga ni athu mwaha wa anamukutho ayene. Nlabo nimohi mahiyu
Samuweli agakonatile; moorurumusa Mulugu omwithana ndina naye. Samuweli
othamagela wakonatilege Eli wiira:- Gili va muhugithana? Mbwenye Eli omwakula
wiira:- Miyo kaguwithanile, kawege wakonanti!-
Eyo opadduwa dila thaaru. Vano Eli ononelamo wi oyo di Mulugu onamwithana
Samuweli; Nuwi ndo omwaddela wi:- Yowithana olenddo mmohi, wiire:- Wogani,
Nabwiya, mwiimeleli enyu onowiiwa.- Mulugu owelela owogaga ni Samuweli dila
dhijinjidhene vano oliye okala namukutho mulubale vano okala musogoleli
oEzarayeli. (*) yoruma.

9 Yonihelo ya neetanu neenayi

1 Samuel 7:2

Samuweli onowalobelela athu aye (1 Samuel 7:2)
Mulugu dothongi, bumwahaya wasinyuseliye a mwana namukutho Eli mwaha
wovurututa, vakwiliwa okoddoni vano Ezarayeli ogonjihiwa ni mulogo weriwa
Filisitewu. Va yaaka makumi menddi akadda Filisitewu wagonjiha akadda Ezarayeli.
Vano Samuweli owoga ni nlogo wiira:- Nyo mwiira muthathiledha okwibi milugu
dheenyu dhebeweene, vano mirima dhinyu murugunusa mmwimelelaga Nabwiya,
Oliye oneere uwobolani mmadani mwakadda Filisitewu.- Akadda Ezarayeli ni mwaha
wa goyi ni amwiddani eewa omwiwelela Samuweli. Aliwa odhowa mburo watonyile
Samuweli vano aliwa okuthavo mukutho ni ofiyihedhiwa wa Mulugu mwa akadda
Ezarayeli. Afilisitewu vanoniliwa masuziho ayene, yahitugumana wi ewanege ni
Ezarayeli, mbwenye Mulugu aharumihedha pevo elukulu ya mabwe, ayene yavadile
omavenyelovo, egonjihiwaga ni Ezarayeli. (*)yoruma.

10 Yonihelo ya neekumi

1 Samuel 8:1 - 10:1

Samuweli onomuthikithedha Sawuli okala mwene a Ezarayeli. (1 Samuel 8:1-10)
Mulugu aali mwene ebaribari akadda Ezarayeli, vano Samuweli daali musogoleli a
nlogo na nikukuru na Mulugu, mbwenye nlogona nafuna muthu mmohi akale mwene,
woona malogo mamohi. Samuweli, vewiliye yoloba ya nlogo ahitakaleliwa
vajinjivene, Mulugu ahiwoga ni oliye wiira:- Kayunyemulile we, mbwenye
eginyemulile miyo. Wawiiwe enawogigiwa vano wasayelele mwene.- Wahikala
muzombwe mmohi owoma kove okuma mmafuddini ohiyana ni alobwana amohi
oWizarayeli, ndina naye aali Sawuli. Nlabo nimohi Sawuli ahidhowaga omoona
Samuweli, vano namavuhulela numoona, Mulugu omwiirela wi: Oyo di mulobwana
onathongege nlogo naaga.- Samuweli ahithukulaga ejuguru yaye ya makura,
omiminela vamuru va Sawuli. Ela yaali etonyihedho yatoonya wi oliye usakuliwa wi
akale mwene. Sawuli uthonga Wizarayeli yaaka makumi manayi. (*) yoruma.

11 Yonihelo ya neekumi nammohi

1 Samuel 15:1-29

Omakuthulo wa omwene wa Sawuli. (1 Samuel 15:1-29)
Wahikala mulogo mmohi mudhidhi wa Sawuli wethaniwa Amalekita, ayene
yathabwile waherula akadda Ezarayeli, mulogo wa Mulugu. Vowi Samuweli aali
namavuhulela a Mulugu, ahifiyihedha wa mwene Sawuli muthenga wa Mulugu:-
nvuruwane muthenga ola wa Mulugu; mwaape akadda malekita ateene vano
mbwanyule dhedho dhili dheewa dhatedhene.- Mulugu omukamihedha Sawuli ni
anyakoddo aye wabwanyula ateene alene oviriganiha vano waali othongiwa wa athu
ale ni mabasa yeeriwana otakala, mbwenye Sawuli kamwiwelele Mulugu, vano
ahimwihiya mwene akadda Malekita ni anenyama yathabwile oruva ni wubuwelela wi
ala nakuthege mukutho wa Mulugu. Samuweli egagumanile ni Sawuli ahira:- Mwaha
we ovanyeliwe mulomo wa Nabwiya,! Oliye onowuvanya wi we ohukale mwene.-
Samuweli agamaruwile wi adhowege, Sawuli omwihidda yowara ya njani yanigiyena
mmwilini oyene yataleyege makukuru menddi. Vano Samuweli wiira:- Mulugu
ugawa omwene wa Ezarayeli vano ohunvaha mulobwana mmohi ofwanelela ohiya
we. Akwaaga Sawuli ukutha mukutho wa Mulugu, Mbwenye kamwiwelele.
Samuweli umwimelela Mulugu vano omwiwelela malabo mateene a egumi yaye.
Yofwanelela siivi? Osasanya mabasa a Gerezha naari omwimelela Mulugu? (*)
yoruma .

12 Yonihelo ya neekumi na biili

Lucas 2:41-50

Yesu vade va Mulugu. (Lucas 2:41-50)
Yaaka dhijinji dhigavirile malabo a Samuweli, Yesu agali mwaneene vababe, Mariya
ni Zuuze yahimuthukula omudhowana oZheruzalemi waaligi mukutho wi anone
nyuba ya Mulugu, (Mariya aali mayi a Yesu, mbwenye ababeya di Mulugu.)
Vaari va athu ateene ale, Yesu ahirimelaga vamentoni va apogo aye, vano Mariya ni
Zuuze yegi omusayela maburo mateene. Emusayelagave yanfwanyilege nyuba ya
Mulugu, athapanyaga ni anamasuziha ni anonesi a Juddewu ewogaga dha Mulugu.
Mariya owoga ni Yesu wiira:- Hiyo mento yahinifiila mwaha waawo nowusayela.-
Mbwenye Yesu ahakula wiira: Miyo gaali nyuba yababa.- Agali mwana
muzombwene woona Samuweli, oliye ahinona wi efwanele gimwimelelege Mulugu. Yesu odheele mwilaboni wi anithukule aniwelelihe wa Mulugu wi nikalena
omwandani ni oliye, vowi oliye di mwene a mamwene a elabo yateene.
Wula pumagomo wa nikukuru =A= rugunusani kukuru emohiya =B=.

Nikukuru =B=

Mavolowelo. Anamemelela a Mulugu.
Alobwana amohi apogo apogo yaaliwo wale anamemelela a Mulugu. Thalako ela
enanaddela yologoheya ya kopolo dhaye, wi Mulugu asasanyile addi dhego dhilubale
ni thalakodha. Thalako nda dhinafwanyeya nikukuru nogomihedha na nivuru nanjani.
Musugwege dhonihelo dha wula muvuruwanaga.Musugwe yonihelo yoharela nyo
mweewa yoruma (*)

13 Yonihelo ya neekumi na thaaru

1 Samuel 1:34 - 16:17

Ddaviddi mukukuli owopiha a mabila (Samuel 1:34-16:17)
Sawuli aali mwene owambeela a Wizarayeli, mbwenye kaamwiwelela Mulugu. Vano
Mulugu ahimwihiya Sawuli nuwindo kamukamihedhe vamohiya. Wahikala mukukuli
mmohi a muzombwe, ndina naye eeriwa Ddaviddi, ajihesa mabila ababe. Ni
nroromelo naye mwa Mulugu ebaribari, oliye koova yego. Nlabo nimohi ajihaga,
poddogoma ahihidda nibila naaye, mbwenye Ddaviddi omaga murima omuharana,
ompa ni fisigaaye. Oliye daali namaleba otikiniha a manivuru a Salumu mbibiliyani
mweehu, enanisuziha omutamaala ni omukokorela Mulugu. Ddaviddi aali muthu
amudhivela Mulugu ni dhatedhene dhasasanyiye. Vano Mulugu omusakula wi akale
mwene mburo wa Sawuli ; yoruma (*)

14 Yonihelo ya neekumi neenayi

1 Samuel 17:1-54

Ddaviddi ni mwithukula Goliya ( 1 Samuel 17:1-54)
Malabo alene wahikala koddo yowana aFilisitewu ni akadda Ezarayeli. Akadda
Filisitewu yahikanna munyakoddo owithukulela ndina naye eeriwa Goliya, apokihana
ni Ezarayeli ni mikalelo nda eraga: Musakuleni muthu mmohi…Oliye agigonjihave
koddo imala vano hiyo nnakale adhaari a Ezarayeli, mbwenye miyo gagonja, nyo
munakala adhaari aaga.- Anyakoddo a Ezarayeli yowovesesa valubale emovaga
Goliya, vano kayafuna owanana. Mbwenye muzombwe Ddaviddi agadhowile
wawoonawo omisasani dha koddo ahiwoga wiira: Baani oyoya onawopopiha
anyakoddo a Mulugu eegumi?- Ddaviddi kamoova mwithukula, vowi ahinona wi
Mulugu eere omukamihedha omugonjiha Goliya. Ddaviddi ahivahedha wa mwene
Sawuli wi ampe Goliya. Ddaviddi ahithamaga akilaga mukadoni mwaali mwihinje
waddoddamo mabwe matanu a fizigaye, nimohi thampwesiliyena Goliya vayuji
otongwela vati. Ddaviddi omuthamagela Goliya ni supaadda odhowa ommariha .
Nlabo nendde aEzarayeli yahagonjihaga akadda Filisitewu. (*) yoruma.

15 Yonihelo ya neekumi natanu

1 Samuel 18:1 - 23:29

Mwene Sawuli onosayela ompa Ddaviddi.(1 Samuel 18:1-23:29)
Vano Sawuli vamunoniliye Ddaviddi, ahitikiniheya ni omaga murima wa Ddaviddi,
voompa mwithukula Goliya, ni wavulusa akadda Ezarayeli.
Ddaviddi okala munyakoddo akopolo, otikiniwa ni athu ateene. Sawuli wambeela
vevale, vano okalelaga nrima bili; Iya Ddaviddi, oovaga wi athu enamusakule
Ddaviddi wi akale mwene. Ddaviddi nlabo nimohi amobaga kasasi amobelaga
mwene, muneba wotakala ovolowa mwa Sawuli, onyahuwa owali omukalelaga
Ddaviddi, wubuwela dhofuna ompa ni mwalago. Vano Sawuli ofunesesa ompa
Ddaviddi, dila dhijinji dhamuharahariye, mbwenye makalelo mateene oharahariwa
Ddaviddi Mulugu omukamihedha mwiimeleli aaye Ddaviddi. Jonata, mwana Sawuli
ahimukamihedha Ddaviddi othawiha egumi yaye. Yoruma(*)

16 Yonihelo ya neekumi natanu nammodha

1 Samuel 16:1-25

Ddaviddi onologolelave egumi ya Sawuli. (1 Samuel 16:1-25)
Sawuli ni anyakoddo aaye yomusayela Ddaviddi woona nipanga. Nlabo nimohi,
Sawuli ni anyakoddo aye egakonatile egonaga, Ddaviddi ni akwaaye yahivolowaga
mmusasani mwa mwene. Muthu mmohi afunaga ampe mwene, mudhidhi
wakweyiligiye agonaga ni anyakoddo aye. Mbwenye Ddaviddi ahimwihihaga eraga:-
Mulugu onomvedegula oyene onampe naari onerena yotakala amwirelaga osakuliwa.-
Ddaviddi othukula mwalago ni gabungu aligi omurudhuni wa mwene oliye
omburulawo ni mwalago. Vano egavenyilevo vamusasani vale, yahiiwa okuwa
wakuwelaga anyakoddo a mwene yiiraga: Nyo, munamwing’ anela mesili enyu,
kasugwani wuno! Mwalago wa mwene ola.- Vano omwiirela Sawuli:- Vowi miyo
gihilogolela egumi yawo Mulugu oneere ologolela egumi yaaga.-
Vano nda vapadduwiwa ayeyi, Sawuli oselela omuharahara Ddaviddi wi ampe.
Yoruma (*)

17 Yonihelo ya neekumi ni tanu nabiili

1 Samuel 31:1-7; 2 Samuel 5:1 - 7:16

Ddaviddi onothikithedhiwa omwene.(1 Samuel 31:I-7 5:1-7:16)
Akadda Filisitewu yahiwelela owana koddo ni akadda Ezarayeli. Mwene Sawuli ni
mwanaye Jonata yahikwa mwaha wa koddo eyene. Vano nlogo omukaliha Ddaviddi
mwene eewa muxa. Ddavidi omaga nluwa na omwene mudhi wa oZheruzalemi. Vano
Mulugu ahiwoga ni Ddavidi wiira: Miyo guhusakula wi othongege nlogo naaga,
dhereyave wula akukulaga mabila aye.- Miyo gineere wukaliha mwene mulubale,
vano omwene waawo onakale wa yaaka dhatedhene.- Mulugu ohakwaneliha
yaroromelihiye, vonvaha Ddaviddi oneeti wothonga milogo ni milogo dhamwapeele.
Yoruma.(*)

18 Yonihelo ya makumi menddi ni tanu nathaaru

1 Samuel 11:1 - 12:20

Ddaviddi ni Batezeba (1 Samuel. 11:1-12:20)
Nlabo nimohi Ddaviddi, eddaga mukodde mwaaye nyuba ya mudhulu, omoona
mwihiyana owoma ahabaga. Ddaviddi omukwelela murogo ni murima waye wateene.
Ndina na mwihiyanaya eriwa Batezeba, mwadha Uriya, namathonga anyakoddo a Ddaviddi. Vano Ddavidi ahirumiha muthenga amurumihedhaga pogo a nikuru na
anyakoddo aaye okokolani wi olenddo bu olenddo yadhowaga omawanelo
emusogolihege Uriya wi akwe. Nuwindo Ddaviddi omuthukula mwadha Uriya
omutela okala mwihiyana aye, dhendhe dhasasanyile Ddaviddi Mulugu
dhahimutakalela valubale, bumwahaya mwaana muraaji ambalile Ddaviddi
muyothegani ahikwa. Ddaviddi ahinonela ni obure wasasanyiliye vano omuloba
Mulugu wi amulevelele.yoruma (*).

19 Yonihelo ya neekumi natanu neenayi

1 Cron. 22:1-19

Nyuba emohi ya Mulugu. (1 cron. 22:1-19)
Mwigumini mwa emuthu yaaye, Ddaviddi ahimuthegela Mulugu, mbwenye oliye
omudhivela Mulugu teto ofuna omwimelela ni omaga nyuba yomwebedhamo
mononeya . Mbwenye Mulugu omwirela wi:- We kunamage nyuba yaaga mwaha wi
ohaapa athu ajinji. We oneere okanna mwaana amurenddele, oliyene dinamage nyuba
ni ndina naaga. Miyo gineere okalihawo omwene waaye yaaka dhatedhene.-
Osogolowa, Solomawu mwana Ddaviddi omaga nyuba yotikiniha yomwebedhamo
Mulugu, yaali nyuba ya mukalelo wa mudhidhi weewa. Nlogo na akadda Ezarayeli
yamwebedha Mulugu nyuba eyene ofiyedha yaaka dhijinji dhene, teto aliwa
kayamuddiwale mwene ewa mulubaleya Ddaviddi. Yoruma (*).

20 Yonihelo ya makumi meenddi

Mat. 21:1-11

Yesu onofiya oYeruzalemu (Mat. 21:I-11)
Yaaka cikwi dhavirile mundduli mwa Ddaviddi, Yesu ahibaliwa oBetelehemu, mwa
nfundde wa ebaribari wa Ddaviddi. Amaye yaali mwana namwali ahamunonile
mulobwana eriwa Mariya, mbwenye ababeya aali Mulugu odhulu.
Yesu aali mwiimeleli mulubale a Mulugu, mowi ndo ahikalawo wi amudhivelihege
Mulugu bahi, vano owasuziha athu ebaribari, teto owiriha matikiniho majinji. Sawuli
ni Ddaviddi yahithega, vowi hiyo ateene teto nihithega, mbwenye Yesu,
dinamoneyiha a nlogo vamentoni va Mulugu, keerilena yothega teto kanathegege.
Nlabo nimohi ahivolowa mu oYeruzalemu agagwelile buuru. Athu ateene
yahikuwaga ni odhiveliwa wulubale yiraga:-Hosana mwana Ddaviddi, Hosana enadha
ni ndina na Nabwiya, norihiwa nikale ndina neenyu.=
Nlogo na oYeruzalemu omunonesesa yesu, ni jiriri elubale omwihiya Ddaviddi, Oliye
di mwene a mamwene ateene elabo ya vati. Yoruma (*).

21 Yonihelo ya makumi meenddi ni emohi

1 Reis 17:1-6

Eliyazi namavuhulela a Mulugu.(1 Reis 17:1-6)
Voovira Ddaviddi ni Solomawu, amwene amohi yahithonga elabo yo Ezarayeli.
Muthu mmohi eriwa mulobwana Akabe. Ahimutela mwihiyanaye ovunyangedheya
eriwa Zhezabeli. Zhezabeli ahivuwiha nlamulo wi: Anamavuhulela ateene a Mulugu
epiwe. Vano oliye wawirela athu ateene a Mulugu wi yebedhege mulugu ebeweene
eeriwa Bahali. Eliyazi aali anamavuhulela mulubale a Mulugu mudhidhi olene,
Mulugu owoga ni Eliyazi: Omwaddela Akabi:Ni mwaha wa dhoothega dhawo
kunakale muzongwe naari ningame ofiyedha yaak thaaru dha osogolo ndo, elabo ya
Ezarayeli. Otaganyihedheya ni yuumi. Dala elubale yahiburamela elabo ele, mbwenye Mulugu ahimulogolela namavuhulela aye, amukalihaga waddamela ni padduwa ya
mwihinje. Bebehi ni ciguwo, Mulugu owaruma anakuugu ni, nyama ni mikaathe wi
Eliyazi atakunege. Yoruma.(*).

22 Yonihelo ya makumi meenddi na biili

1 Reis 18:16-46

Eliyazi ni munddo wa Mulugu. (Reis 18:16-46)
Omamalelo wa yaaka thaaru dha dala ni yuumi, Eliyazi ahimwiithana Akabi ni nlogo
nateene omwangoni wa Karmelo, Vano omwaddela wiira: Akala Mulugu di nabwiya
nimwimelele, akala Bahali di Mulugu nimwimelele, ki ogawaneya wehu onagomele
vaavi?. Eliyazi ahipokihaga ni anamavuhulela oratha a mulugu eriwa Bahale voloba
okita wa munddo odhulu ni opaha dha mukutho dhasasanyedhiwe mudhidhi olene wa
mapoka. Vowambeela yaali anamavuhulela a Bahali, mbwenye aliwa kayakuliwe.
Nuwi ndo vovira mudhidhi mujinji wowisasanyedha ni osayela makalelo mamohi,
Eliyazi namavuhulela a Mulugu odhulu dhulu wiira: Kasusedhani wuno oli miyo wi
moone, wi Mulugu, Nabwiya di Mulugu mmohi bahi.Eliyazi ahilobelaga malobelo
okwiivene, vano Mulugu oruma odhulu munddo, wapahilevo nyama ya mukutho
vamentoni va nlogo ni vamwiroma anamavuhulela a Bahali. Vano ni mukalelo olene
woneyilege wa nthithimiho, nlogo wahela mada anamavuhulela oratha waapa. Nlogo
naatenene negi okuwa.- Nabwiya di Mulugu, Nabwiya di Mulugu. Yoruma (*).

23 Yonihelo ya makumi meenddi nithaaru

1 Reis 19:1-2

Eliyazi onogwela odhulu ni karo ya munddo. (1 Reis 19:1-2)
Voovira yaaka dhijinjidhene mundduli mwa mapoka yereye mwango woKarmelo,
Mulugu ahiwoga ni Eliyazi wi amusakule ofwanela ohabawo. Eliyazi onona wi
malabo aaye ehimala. Nlabo nimohi oliye onfwanya muzombwe mmohi eriwa
Elizewu alimaga mmiddani; Vano Mulugu omwaddela wi muzombwe ole onakale
namavuhulela . Eliyazi omusuziha muzombwe ole makalelo omwimelela Mulugu ni
omwiwelela. Nlabo nimohi abileene yeddaga murampani, Ngolovaani a munddo
ahikitaga odhulu omukwekwerula namavuhulela Eliyazi mowaguvamwene vamentoni
va namasuuza aaye Elizewu. Elizewu owelela makalelo aaye omwiwelela Mulugu
woona namavuhulela. Yoruma (*).

24 Yonihelo ya makumi meendi neenayi

Mat. 9:28-36

Eliyazi ni mozezi enokumelela vaaligi Yesu. (Mat. 9:28-36)
Mudhidhi wa Yesu, vowaddamela yaaka mazana matanu na meenddi mundduli mwa
Eliyazi, alobelaga omwangoni okwibi wa Zheruzale, Eliyazi ahiwelelaga vati, vamohi
ni Mozezi, muholeli owambeela a nlogo na Mulugu. Muwari mwa mutugumano ole
wahorumeedheya, Mulugu ahiwoga ni ndhu novuwesesa wiira: Oyo di mwanaga
Yesu, munvuruwanege oliyene.-
Anamasuza a Yesu araaru dhatedhene yahonelaga okalawo. Akwaaga; alobwana
amohi apogo apogo a Wizarayeli yaaliwo wale yotonyihedha Yesu Kiristu. Yesu
ahidha mwiilaboni wi awoonihe athu makalelo omwimelela Mulugu, ni onikwela
mwaha wa dhothega dhehu, ni osisimuwa = ovenya mwaanookwa ni okalawo
malabweene mmurimani mwehu. Wi nikalena egumi yahoomala enofuneya
wiwelelaga nde dhiwogile Yesu.
Gorogoddogo.