Wa Ita'ita, wa Ata'atahi, na wa Miya, Buka Fafaluwagana. Yaubada ena Tau Paisowa Gigigibwalidi

Liba Famahata

Yauwedo. Yaubada Esega Wananaha ami sibai?

Tatau haisa iti sa sibai, haba emi E dede.

Tautau au ita’itai buka yai, na au ata’atahi.

Yena fafa’ilala ami atahi mate tautau au bui.

Picture 1: Tautau Bwa’ibwa’ina. Gwama Hesa Mahidana

Genesis 25:21-34, 27:1-29

Dodoga luwaga tautau yai te, mate sa oi’oiliba.
Hesa hesana Isowa mate, in tau lafulafu ni’a.
Tasina Diyakobo mate, kalahe loloho ya lau bu’a. In moho, hige Isowa ana i felen.
Diyakobo ya liba lau Isowa lebena, iyebom,
“Hola em ginauli ai’egu u felegu.”
Ena fanuha bena adi boga edi ginauli bena tau tuwaha ya abidi. Isowa ena ginauli mate, hige i mode’edi.
Bogana afa’afana moho ya mode’en,
Yo fede, ana kalahe ya famaisa ee--,
Diyakobo aniyona mate ‘Tau Lau Bwalabwala,’ be Diyakobo ena laulau mate bena dodoga haisa haba ya bwalabwalaidi. Yo hinaga Diyakobo mate tamana ya bwalai.

Picture 2: Tautau fafaluwagana, Diyakobo ana Eno Suwai

Genesis 28:10-22

Isowa Diyakobo ya waiyo’oen, be ena fanuha bena ya wunui. Yo fede, Diyakobo ena nu’u ya lau afulen.
Tautau au ita! Diyakobo ya eno suwai.
Yaubada ya ita Galewa yai, yo Yaubada ena Anelu sa lidilidima tano’ubu. Yaubada ya liba lau Diyakobo lisina, iyen,
“Yau haba tanohi te, um yo am hiti mulita E felemiu. Dodoga mahudo’idi tano’ubu yai haba loholoho ai lisim sa abi. Em aba lau, tefa somo yai haba Yau ma’em.”
Yaubada ya sibai mate, Diyakobo tau lau bwalabwala. In moho, Diyakobo ya gadosisiyen, be ena fanuha bena nuwana ya liba fabigabiga. Debana yai Yaubada liba fasunuma loholohodi te ya felen.

Picture 3: Tautau Fafafaihonana, Diyakobo yo Labeni

Genesis 29:1 - 31:35

Diyakobo ena lau bwalabwala hola ya laulau’ui dodoga haisa lisidi yai. In moho, fuya haisadi in hinaga sa bwalai.
Diyakobo ya lau, be ena bada Labeni ena ya paisowa. Ena fanuha bena Labeni natuna hasahasalana haba ya fai, hesana Leisulu. Kawa nahina debana yai, Labeni ena, ya paipaisowa ee--, bolima faligigi luwaga. Yo fede, Labeni bwala hesa ya oiyen, bena natuna tau baguna haba ya fai bwa’iyen. Labeni wa Diyakobo ya fapaisowa bodai, bolima faligigi luwaga hinaga, Leisulu enehena. Diyakobo Labeni ya kawawananaha’en Labeni ena yosiyosi loholohodi ya abidi.
Fuya esega Yaubada ya liba lau Diyakobo lisina, iyen,
“U fuyo afatamam edi tanohi.”
[checking comment - use of {kawawananaha’en} is not the correct word here. Jacob did not “believe Laban,” but Jacob “tricked Laban.”]

Picture 4: Tautau Fafatina. Diyakobo ma’ena Yaubada sa Failobahi

Genesis 32:1-32

Diyakobo ena fanuha bena ya fuyo ena nu’u. In moho, Isowa ya wasabuwen. Salumadi haidadi sa bwalabwalaidi, fuya ou’ouli sa miyamiya wasawasabu hala’abi debana yai.
Ya fuyofuyo ena nu’u, na i’ipa esega, Taumoho hesa ya laoma Diyakobo lisina. Ma’ena sa fai’abi yee—, ya lahaiyedi.
Maihala bena haba ya kepama, Taumoho wa Diyakobo la’ona ya fatutuya’asi. Diyakobo ya nuwatuhu lobahi, mate dogana Yaubada lisina yai ya laoma.
Diyakobo hige gonowana i lulu fuyo, na ya liba moho, iyebom,
“Hige gonowana ya biya afulem, ana sigana wa fatabuwegu.”
Yo fede, Taumoho wa Diyakobo ya faliba, iyen,
“Ibege hesam ti atahi bodai ‘Diyakobo,’ na haba itiye, ‘Isalaela.’ ”
‘Isalaela’ aniyona mate, doga hesa la’ila’i ma’ena Yaubada sa fai’abi.
Yaubada bena Diyakobo ‘tau lau bwalabwala’ ya famamayo, be haba ya bui, be doga la’ila’i. ‘Isalaela’ ya fuyo afa’efana lisidi, ma nuwa loholohona.

Picture 5: Tautau Fafafaligigina. Diyosepa ana Eno Suwai

Genesis 37:1-11

Diyakobo logena hesana hesa Yaubada ya tole ‘Isalaela.’ Mate nanatuna tatau safuhudohudo’i luwaga. Natuna ya fanuha wananahai mate Diyosepa.
Diyakobo mate Diyosepa ana luhuluhu loholohona ya felen.
Diyosepa afatuwahana sa nuwa ela’ela’ela’en.
I’ipa esega Diyosepa ya eno suwai. Afahaidana ya falibadi, iyen,
“Agu eno suwai hola E dedei be au atahi. Bena haga mahudo’ida gabu yai witi te pilipilinidi. Emi pili mate, egu pili sa gana fafata’i’ili, na sa dulu lau lisina.”
Afatuwahana manadi sa bala. Eno suwai te aniyona bena sa dulu lau tasidi lisina?
Diyosepa sa waiyo’oen, be eda’eda sa yo’o, bena sidohana haba heyaya sa ginauli ai lebena.

Picture 6: Tautau Faligigi Esega, Diyosepa Sa Une’une’en

Genesis 37:12-36

Diyosepa afatuwahana mate edi suisui baiwadi sa fafa’anbanidi tefa hesa yai. Diyakobo natuna Diyosepa ya faliba, iyen,
“Haga u lau be afahaidam u kepaidi, yo suisui haba gonogonowadi?
Ma laolaomana na, haidana sa ita’ita lau, be sa ita. Yo fede, sa fanuwa libaliba bena sa wunui. Ana luhuluhu loholohona wa sa pwala fahi, na sa lofe ho’owa puluna pitapitalina ganahewana yai.
Hidadi hesa iyen,
“Yena te wunui haba somo loholoho ainiya te abi? Ta une’une’en.”
Hige walolona na tau une’une haisa sa tau bayawama. Yo fede, haidana sa une afulen, maisana siluba pi’adi oulina taumoho esega (20).
Muliyai Diyosepa ana luhuluhu nanigoti wasinana yai sa fahoihoiyen, na sa lawen tamadi lisina. Diyakobo ena nuwatuhu bena haga Diyosepa suisui lululudi sa nali, Halana ya tan elo’elolosi.

Picture 7: Tautau Faligigi Luwaga, Diyosepa yo Waihin Matamata Heyayana

Genesis 39:1-20

Tau une’une wa Diyosepa sa une afulen Idipi yai. Ya famala taumoho hesana Potipa ena fayofayo tau’abina.
Yaubada hige Diyosepa i nuwa afulen, be ginauli ya ginaulidi mate sa loholoho. Hige walolona na Potipa wa Diyosepa ya tole hitin, be ena ginauli mahudo’idi ya ita watanidi. Diyosepa mate hewalina ya loholoho wananaha. Be Potipa lahuna nuwana ya fabwala. Ena fanuha bena Diyosepa ya dudui, be ma’ena sa eno bili. Diyosepa ya sibai mate, ya heyaya. Yo fede, hige i fanuha. Luma yai ya gela, na Potipa lahuna ya abi lau, be ena leli ya pwala fahi. Ana leli wa ya lawen lahuna lebena, na ya saman, iyen,
“Diyosepa bena ya tohatohaigu.”
Be Potipa wa Diyosepa deli yai ya gudu buluhi.

Picture 8: Tautau Faligigi Faihona, Diyosepa Deli Yai

Genesis 39:20 - 40:23

Yaubada mate ma’ena Diyosepa deli yai. Hige walolona na Diyosepa sa tole hitin, pilisin edi ba’isa.
Kin ena paula tau abina edi la’ila’ina yo Kin ena fwalawa tau gabugabu mate, sa falau delidi hinaga. Maihona esega tataudi luwaga sa eno suwai.
Diyosepa ya falibadi, iyen,
“Yaubada gonowana eno suwai ya dede famahatadi. Ami eno suwaidi au falibagu.”
Yo fede, fayofayo tau abidi hesa iyen,
“Agu eno suwai yai, uma’uma hesa lagana faihona. Uludi E abidi, be Kin ana kaputi yai E folodi na Kin E felen.”
Diyosepa aniyona ya dedei, iyen,
“Lahai faihona haba Kin ya so’e fahim, be am paisowa wa abi fuyoi.”
Fwalawa tau gabugabu ana eno suwai hinaga ya dedei. Ana eno suwai aniyona mate lahai faihona ai mulidi haba sa wunui. Paula tau abina edi la’ila’ina wa sa so’e fahi, na fwalawa tau gabugabu mate, sa wunui gonogonowana doha Yaubada Diyosepa ya faliba.
Diyosepa bolima luwaga deli yai ya miya.

Picture 9: Tautau Faligigi Fati, Kin ana Eno Suwai

Genesis 41:1-45

Idipi edi Kin ya eno suwai. Bulumakau tubutubudi faligigi luwaga ya itadi ho’owa sadaina yai. Bulumakau faligigi luwaga golegoledi ho’owa ganahewana yai sa kalamahanoma, be tubutubudi faligigi luwaga wa sa anidi. Hige sai hesa gonowana bena Kin ana eno suwai ni, aniyona i faliba.
Habahim Kin ena paula tau abina edi ba’isa Diyosepa wasana ena ya liba. Yo fede, Kin wa Diyosepa deli yai ya lau falibaiyama, be Diyosepa wa Kin ana eno suwa aniyona ena ya dede, iyen,
“Yaubada somo haba ya ginauli mate, ya falibam. Ai Idipi haba mahula la’ila’i bolima faligigi luwaga. Ai mulina mate haba galamo wesawesa sa bolima faligigi luwaga hinaga.”
Kin ya ita mate Yaubada Yaluwana Diyosepa lebena yai, yo fede, ya tole hitin, be Idipi mahudo’ina ya ita watan.

Picture 10: Tautau Safuhudohuho’i Diyosepa Idipi yai ya Gawana

Genisis 41:47 - 42:28

Mahula la’ila’i bolima faligigi luwaga ganahewadi yai, Diyosepa kalahe, fwalawa tumadi la’ila’i ya abi nonohai, Kin enehena. Galamo wesawesasa bolima faligigigi luwaga ya hulu, mate kalahe ya une’une’edi dodoga lisidi yai.
Kanana mate galamo wesawesasa sa abi esegahi. Diyosepa afatuwahana safuhudohudo’i sa laowa Idipi be kalahe sa une’une. Hige ti sibai mate, Diyosepa in amainiya ya ita wata. In moho, in ya ita lobahidi. Ya falibadi, iyebom,
“Umi tau ita sipo.”
Yo fede, ya falau delidi, lahai faihona. Na habahim, ya falibadi, iyen,
“Au lau be tasimiu, ami nom tau fa’ala gumana, au leyama lisigu -- Haba E kawawananaha mate, umi dodoga dudulaidi.”
Hidadi esega ya abi didin deli yai, na haisa ya biya afuledi, be fwalawa tumadi sa lawedi afa’efadi lisidi.

Picture 11: Tautau Safuhudohudo’i Esega Diyosepa ya Liba Famahata Fafuyo Haidana Lisidi yai

Genesis 43:1 - 45:27

Diyosepa afahaidana mate, fuyo Idipi sa wasabu, na adi fwalawa kalahena mate hanahanau haba ya ofi.
Yo fede, adi tau mulita wananaha, Beniyameni sa aulen, na sa lau Diyosepa lisina. Diyosepa mate hige hola i falibadi mate, in sai. Fwalawa tumadi ya feledi, yo ginauli loholohodi ya simodi edi aba husahusa gogo ganahewadi yai. Sa lau muli yai, ena tau paisowa ya duidi, be sa we’a watanidi, na tiyen,
“Ba’isa ena ginauli ami angafuhidi.”
Afahaidana sa dulu Diyosepa nuwanuwana yai, be bena ya nuwatohatoha’edi, doha ana eno suwai, ena witi pilidi haidana edi pili sa dulu lau Diyosepa enehena yai.
Diyosepa nuwana ya heyaya, be hige gonowana i abi didin Beniyameni ya fagado bainewa’en, na ya tan. Ya falibadi, iyebom,
“Yau hidamiu ami une’une’egu.”
Afahaidana sa fiyo edi nu’u, be tamadi sa faliba. Tiyen,
“Diyosepa hige i pe’i. In Idipi edi Ba’isa!”

Picture 12: Tautau Safuhudohudo’i Luwaga Diyakobo yo Diyosepa Idipi yai

Genesis 45:28 - 50:26

Tautaula’i, Diyakobo, ana boga yo ena somosomo ou’ouli ya lawedi Idipi yai sa gogo. Nuwana mate ya amna wananaha pa’ana Diyosepa ya ita fuyoi! Nimana ya toledi Diyosepa nanatuna tatau hewadi yai, na ya fatububuwedi be haba sa famala iti sulu Isalaela ai ganahewana haba dodoga la’ila’idi.
Diyakobo ya tautaula’i, na habahim ya pe’i Idipi yai. Habahim Diyosepa afahaidana sa wasabu, pa’ana heyaheyaya sa ginauli Diyosepa lebena yai. In moho, Diyosepa ya falibadi, iyebom,
“Tabu au wasabu. Heyaya lisigu yai ami ginauli, na Yaubada ya bui be loholoho, be haba dodoga boludi ya saguhidi.”
Afahaidagu, galewa yai, Esega mate In ya La’i Wananaha, habahim, Diyosepa. Hesana mate Guyau Yesu Keliso. Dodoga heyaheyayadi sa wunui, in moho, Yaubada laulau heyaheyayana ni, ya abi bui, be eda loholoho.
Yesu ya obiyo fuyo pe’i yai. Aho ite, Yaubada gonowana eda heyaya ou’ouli ya nuwa afuledi, yo haidada somo lisida yai te ginauli faheyayadi mate, hinaga doha.
Pe’i hige anadan, ankamkamnana ganahewana yai gonowana in ya saguhida.

Introduction 2: Buka Fafaluwagana. Yaubada Ena Tatau Dudulaidi

Esodo 2:1-10

Taumoho hesa dudulaina hesana Mose, ena dodoga ya saguhidi Idipi nimadi yai. Ya foyahidi lawedi esega, dumaduma lisina. In gonowana dodoga boludi ya saguhidi Idipi nimadi yai, yo Satani.
Au ata’atahi, na tautau buka balebalelemna yai au ita’itai. Yena dagugu ami atahi mate, tautau au kalasi fuyo.

Picture 13: Tautau Safuhudohudo’i Faihona, Gwama Mose

Exodus 2:1-10

Mose mate in Isalaela. In Idipi yai ya tubu, bolima 300 mulidi yai, habahim, Diyosepa. Idipi edi Kin Isalaela ya fahisu faheyayadi. Ya duduidi, be sa paisowa doha fayofayo tau abidi, yo nesi ya falibadi be wawaya tatau sa tubu, mate sa wunuidi.
Fuyana Mose ya tubu mate tinana ya simo.
Noho yai ya husai, na ya simo hawahawa pwaludi yai, ho’owa sadaina yai. Lofuna, Meliyam, ya obi’obiyo sadai yai, na ya maimainenei. Kin natuna waihin ya laoma ho’owa, bena ya sigu. Mose ma nohonohona ya ita. Yo fede, ya abi, be bena ena wawaya ya ita watan. Mose ya la’ila’i Kin ena luma lai’la’i yai, be Idipi edi laulau ya anpateidi.

Picture 14: Tautau Safuhudohudo’i Fati, Mose yo Oyagi Ala’alana

Exodus 2:11 - 4:17

Lahai esega, Idipi dogana Isalaela fayofayona tau abina ya talatalai, na Mose ya ita. Ena fanuha bena ena dodoga wananahadi ya saguhidi, yo fede, Idipi dogana ya wunui. Amainiya mate, Mose ya gela, be Kin ya lau afulen. Bolima tatau luwaga sa pe’i, nu’u pitapitalina hesa hesana Sainai amainiya ya gogo.
Habahim fuya esega, ginauli hesa ya ita. Oyagi obi’obiyona yai, oyagi ya balebalelem, in moho, oyagina hige i ala golu. Yaubada ya libama Mose lisina, oyagi belebalelemna yai, iyen,
“Egu dodoga sidohana edi abi’abiyedi mate ha’a E ita. Yau E duim, wa lau Kin lisina be haba egu dodoga ena nu’u yai wa, au ledima.”

Picture 15: Tautau Safuhudohudo’i Faligigi, Mose ya Fuyo Kin Lisina

Exodus 3:11 - 10:29

Mose mate ya wasabu. In moho, Yaubada ya sunumaen, be ya fuyo Idipi. Hidana, Aloni ma’ena sa lau. Kin sa faliba, tiyen,
“Guyau, Isalaela edi Yaubada, iyen, ‘Ena dodoga bena wa biya afuledi?’”
In moho, Kin iyebom,
“Yaubada hige ya sibai, lisina yai Isalaela ibege ya biya afuledi ti lau.”
Habahim Yaubada ya liba lau Mose lisina, iyen,
“Aloni u faliba be ena tu’e i abi, na i lofe lidiyen Kin ai nuwanuwana, haba ya famala weso.”
Aloni doha ya ginauli, be Kin wa Yaubada ena gigibwali ya ita. In moho, hige dodoga i abi afuledi ti lau. Yo fede, Yaubada no’o abi’abidi boludi ya lau ginauli Idipi lebedi yai. Ho’owa ya buidi be sa famala wasina, be dodoga hige adi ho’owa. So’u boluna hinaga nu’u sa famohafu, nabugala, kupati, yo usa maihawadi doha ume’ehu ya ledima Idipi.
Suisui sa pe’i, yo Idipi sa wala asi’asiyebo’idi. In moho Kin hige gonowana Isalaela i biya afuledi.

Picture 16: Tautau Safuhudohudo’i Faligigi Esega, Antalasam Sipisipi

Exodus 12:1-36

Yaubada, Mose ya faliba bodai, iyebom,
“Isalaela u falibadi be femili hesa-hesa sipisipi esega-esega ti abi, be ti wunui. Haba wasinana sa abi, be edi ai eda’eda ai tape duhuduhudi, sa lau fawawaidi.
“Idipi nu’una haba E lau’ufi. Wawaya tatau tubu bwa’ibwa’idi haba E laufunuhidi. Yena wasina E ita, haba E bayawaimiu, be ibege ya wunuimiu.”
Yaubada somo ya libaen mate, ya falau watan. Idipi nanatudi tatau tau baguna mate sa pe’i. Isalaela nanatudi tatau tau baguna, hige la’i i pe’i. Habahim Kin wa, Mose ana liba ya fatamali, iyen,
“Au lau, ma’em dodoga mahudo’idi, egu nu’u au lau afulen. Au lau be emi Yaubada au fadebasae.”

Picture 17: Tautau Safuhudohudo’i Faligigi Luwaga, Gabogabo sa Gayo

Exodus 13:17 - 14:31

Mose Isalaela dodogadi ya auledi Idipi yai. Yaubada ya bwa’iyedi yada yo oyagi ala’alana luhadi yai. In moho, Idipi mate manadi sa bala, pa’ana edi fayofayo tau abina sa failaulauwidi. Kin yo ena hiyala tataudi Isalaela sa we’a dudulidi, bena sa fafuyodima. Isalaela sa abi mahano lau gabogabo la’ila’i yai, be hige gonowada ti dohe. Idipi mate mulidi yai. Isalaela hige edi aba gela hesa. Mose ya falibadi, iyebom,
“Tabu au wasabu! Yaubada somo haba ya ginauli be ya saguhimiu, mate haba ami ita.”
Habahim, Yaubada gabogabo ya fatede, be edi eda’eda ya ginauli. Isalaela sa gayo dohe, tanohi pitapitalina yai. Idipi sa anpate bena sa lau watanidi, in moho, gabogabo ya sae fuyoma, be ya fakoudi. Idipi mahudo’idi sa kapulolo na Isalaela sa mwahuli.

Picture 18: Tautau Safuhudohudo’i Faligigi Faihona, Kalahe yo Ho’owa Nu’u Pitapitalina yai

Exodus 16:1 - 17:7

Mose dodoga ya foyahidi, sa lau nu’u pitapitalina yai. Hige adi kalahe yo fede, Yaubada kalahe ya feledi. Hwalahwalala ou’ouli ginauli hudo’i pi’adi doha fwalawa sa taumahata tanohi yai. (Dodoga hesana sa tole ‘Mana’.) Hwalahwalaladi Yaubada atai’a kiki’ina baiwadi ya fatamalidi, be dodoga adi mwaiha sa anidi. Yena hige adi ho’owa Yaubada haba Mose ya faliba, iyen,
“Em tu’e u abi, be ume’ehu u oitagu haba ho’owa ya didima, be dodoga adi sa nom.”
Bolima tatau luwaga sa pe’i (40) ganahewadi yai, mate Yaubada Isalaela ya ita watanidi nu’u pitapitalina yai.

Picture 19: Tautau Safuhudohudo’i Faligigi Fati. Mose Yaubada ena Tu’a yai

Exodus 19:1 - 20:17, 24:12-18, 34:1-10

Isalaela dodogadi sa laoma Sainai tu’ana yai. Yaubada ya lidima ana nabu kayakaya namali yo palele, yada yo oyagi ala’alana. Libadi te Mose ya faliba, iyen:
“Yau Guyau em Yaubada. Tabu Yaubada hesa us abi. Tabu oitau hesa u dulu ai lisina, o u fadebasae. Tabu hesagu u kaiwegowegogo’en. Lahai fafaligigi luwagana bena ami nuwatuhui yau ami fa’atitiyen. Tinam yo Tamam bena wa fa’atitiyedi. Tabu u aiyunu. Tabu u luma gwa’u. Tabu u angafu. Tabu sai hesa u fagilu napai. Haidam edi ginauli tabu u fanuha simosimoidi.”
Mulina yai Yaubada habahim, laugagayodi te ya ulidi ume’ehu senadi yai, na Mose tu’a yai ya lidiyedi dodoga ou’ouli lisidi yai.

Picture 20: Tautau Taumoho Esega ya Pe’i, Weso Bwalabwala Duhu yai

Numbers 21:4-9; Deut. 18:18

Yaubada kalahe dodoga ya felefeledi mate, sa fatalapiliyen.
Yo fede, Yaubada ya panisidi, mate weso an’annalidi ya fatamalidima lisidi. Peidi weso sa nalidi be sa pe’i. Dodoga Mose sa an’etai, be edi ya lau’u’ula.
Habahim Yaubada Mose ya faliba, iyen,
“Weso u ginauli, be ai duhu u fakauti; sai weso ya nali mate, weso te i ita haba ya mwahuli.”
Yo fede, Mose weso ya ginauli be sai ya ita mate, ya mwahuli. Mose mate Yaubada ena tau paisowa loholoho, Isalaela enehedi. Bolima tatau luwaga ganahewadi yai, nu’u pitapitalina yai, dodoga ya foyafoyahidi.
Mose hola hige i pe’i, Yaubada Mose ya faliba, iyen,
“Isalaela ai ganahewadi haba pelowata hesa E fatamali, doha um. Haba somo mahudo’idi E libaedi, mate dodoga ya falibadi.”

Picture 21: Tautau Taumoho Esega ya Pe’i Esega, Yesu Dodoga ya Fakalahedi

Diyon 6:1-58

Bolima sa ouli, Isalaela dodogadi Peloweta hesa sa yo’oyo’oi doha Mose. Na habahim Yesu Keliso ya tubu Isalaela nu’una yai. Yaubada wasana dodoga ya fatalahadi, doha Mose. Dodoga sa lau nu’u pitapitalina yai, be alinana sa atahi. Sa guliyam, in moho, haba som sa an?
Gwama kiukiu mate, ana fwalawa faligigi yo hama luwaga. Yesu fwalawa yo hama ya abidi, na Yaubada ya lauto’iyen. Habahim, kalahena yai dodoga boludi ya fa’anidi. Oulidi mate doha 5,000 ya di’oi! Dodoga tiyen,
“Mo’isa mate in Peloweta!”
Yesu ya falibadi iyebom,
“Yau mwahuli fwalawana. Sai ya laoma lisigu mate, ibege i guliyam, yo sai hinaga ya kawawananaha’egu mate, ibege gadona i magu.”

Picture 22: Tautau Taumoho Esega ya pe’i Luwaga, Yesu Ma’ena Mose sa Libaliba

Luke 9:28-36

Mose yo Elaidiya tataudi luwaga, mate Yaubada ena wasa tau lawenina. Sa miya ee--, na sa pe’i, na mulina yai, habahim, bolima ya ouli, na habahim, Yesu ya laoma tano’ubu. In moho, lahai esega sa taumahata ma’edi Yesu tu’a hewana yai. Tataudi faihona nenedi sa namanamali.
Yesu ya sibai, mate ena pe’i ya hanahanau, be ena pe’i ma’ena Mose yo Elaidiya sa libalibaen. Yesu haidana faihona sa atahi na sa libaliba. Na habahim yada ya laoma, be ya fakou tawanidi. Yaubada alinana yada yai ya libama, iyen,
“Itete mate, Natu ese’esegagu, - au ata’atahi lau lisina.”
Alina wa ya libaliba ofi, mulina yai, haidana sa ita’ita laulau, mate Yesu ibona sa ita.

Picture 23: Tautau Taumoho Esega ya Pe’i Faihona. Yesu Eneheda ya Pe’i

Diyon 3:14-16

Isalaela dodogadi Yesu sa waiyo’oen, be sa wunui. Hiyala tataudi sa tutu fapatu kolosi yai. Dodoga luwaga sa wunui esegahidi. Luwagadi mate, iti tau angafu yo tau aiyunu, na Yesu mate, hige Yaubada ena laugagayo la’i i utusi.
In moho, umi be yau mate Yaubada ena laugagayo te utusidi. Yaubada ena panisi, pe’i hige anadan te faho’ina. In moho, Yaubada doga mahudo’ina ya fanuha. Hige i fanuha bena ita ta pe’i wananaha, be Natuna Yesu ya fatamaliyama, be eda panisi ya ginauli. Mose ena fuya yai, sipisipi an’antalasamdi wasinadi Isalaela femilidi ya saguhidi. Yesu Yaubada ena sipisipi, ya pe’i doha eda antalasam. Wasinana mate eda heyaya maisadi. Sai yena ya ita’ita lau Yesu lisina, mate haba ya mwahuli.
Doha Mose weso ya lau hitin, Doga Natuna, Yesu, bena lau hitinina, be haba salumadi sa kawawananahaen, mahudo’idi haba mwahuli hige anadan sa abi.

Picture 24: Tautau Taumoho Esega ya Pe’i Fati, Yesu Galewa yai

Acts 1:6-11

Yesu silanna mate, bo’usa yai sa tole. In moho, lahai faihona mulidi yai, Yesu ya mwahuli fuyo! Dodoga boludi maidadi sa libaliba. Lahai tatau luwaga sa pe’i, mulidi yai sa ita, ya hasai Galewa, gonogonowana doha tautau yai ami ita. Yesu, aho ite, ya mwahumwahuli. Mose mate, tanuwaga la’ila’i yo Yaubada ena wasa tau lawenina, in moho, Yesu mate Yaubada Natuna. In ya hasai wananaha, habahim, Mose. Isalaela Mose ya foyaidi, gabogabo ganahewana yai, be sa mwahuli. In moho, Yesu ya laoma be tau famuli watanina ya saguhidi. Lahai esega haba Yesu ya fiyoma, gonogonowana doha ya hasai Galewa.
Salumadi sa kawawananahaen haba ya auledi, be ma’edi ai Galewa sa miya.
Yauwedo, afahaidagu. Ha’a ami nonoha, haba ma’emiu Yesu ami lau? Bena haba do’ata i laoma!
“Guyau Yesu Keliso au kawawananahaen, haba ami mwahuli.”
##

\h Patrick Sadileutu, 6/2006.
\h Keyboarded by Mary Cooper, 2008-03-23 v1-2.
\h computer editing and re-formatting, Russ & Mary Cooper, 2008-11.
\h audio and written text checking completed √ 2008-11-22.