Wa Ita'ita, wa Ata'atahi, na wa Miya, Buka Fafafatina. Yaubada Ena Tau Paisowa
![Wa Ita'ita, wa Ata'atahi, na wa Miya, Buka Fafafatina. Yaubada Ena Tau Paisowa](https://static.globalrecordings.net/300x200/lll4-00.jpg)
રૂપરેખા: Ruth, Samuel, David, Elijah. 24 sections. It has a picture book to go along with the recording.
સ્ક્રિપ્ટ નંબર: 421
ભાષા: Buhutu
થીમ: Sin and Satan (Sin, disobedience); Christ (Birth of Christ); Eternal life (Salvation); Character of God (Nature, character of God, Word of God (the Bible), Power of God / Jesus); Living as a Christian (Obedience, Faith, trust, believe in Jesus, Children of God, Humility); Bible timeline (Prophecy, fulfillment of, Gospel, Good News, People of God)
પ્રેક્ષકો: General
શૈલી: Monolog
શૈલી: Bible Stories & Teac
હેતુ: Teaching
બાઇબલ અવતરણ: Extensive
સ્થિતિ: Publishable
સ્ક્રિપ્ટ ટેક્સ્ટ
LLL 4, Side A, Liba Famahata
![LLL 4, Side A, Liba Famahata](https://static.globalrecordings.net/300x200/lll4-00.jpg)
BUHUTU
Look, Listen & Live 4
Wa Ita’ita, wa Ata’atahi, na wa Miya,
Buka Fafafatina.
Yaubada Ena Tau Paisowa.
(Servants of God).
Yauwedo Afahaidagu. Yaubada ena gadosisi yo ena ita’ita wata salumadi sa awa’abiyen yo ena sa paisowa lisidi yai. Dede wananahana te au ata’atahi yo tautau buka yogeyogena yai au ita. Yena dagugu ami atahiyen, mate tautau au bui.
Picture 1: Tautau Bwa’ibwa’ina Guliyam La’ila’i be dodoga Sa Lau Mowabi
![Picture 1: Tautau Bwa’ibwa’ina Guliyam La’ila’i be dodoga Sa Lau Mowabi](https://static.globalrecordings.net/300x200/lll4-01.jpg)
Luta 1:1-5
Yaubada doga mahudo’ina ya ginauli. In moho, sa awayagalaen. Be Yaubada Isalaela ya fasinabodi, be haba sa sibai yo sa fadebasae.
In moho, fuya haisa Isalaela Yaubada sa waiyo’o’en hinaga, be oitau yo Yaubada bwalabwala sa fadebasaedi doha dodoga haisa.
Hiyala yo guliyam ya fatamaliyama Isalaela dodogadi lisidi, be bena sa fuyoma lisina.
Boga esega sa gela sa lau Mowabi nu’una, be kalahe sa yo’o. Bolima safuhudohudo’i nu’una yai sa miya. Tamadi amainiya ya pe’i. Nanatuna tatau luwaga Mowabi wawahinidi sa faidi.
Tataudi luwaga sa pe’i hinaga. Tinadi mate ma afalawana luwaga sa miya nu’u yai.
Picture 2: Tautau Fafaluwagana, Naomi Yo Luta Sa Fuyo Isalaela
![Picture 2: Tautau Fafaluwagana, Naomi Yo Luta Sa Fuyo Isalaela](https://static.globalrecordings.net/300x200/lll4-02.jpg)
Luta 1:6-22
Dodoga ni tinadi hesana Naomi. Afalawana luwaga mate Luta yo Opa. Naomi bena ya fuyo Isalaela Nu’una. Luta yo Opa sa lau watan. Be Naomi ya falibadi, iyen,
“Afalawagu au fuyo emi nu’u. Sidohana be ami lau watanigu? Hige gonowana ya fanatu boda, be nanatugu tatau haba au faidi. Yaubada ha’a ya ta’ai mulimuliyegu.”
Opa Naomi ya falafu na ya fuyo afa’efana edi nu’u. Na Luta Naomi ya toha didin, na iyen,
“Tabu u dui fafuyogu.
Wa lau somo haba te lau.
Em dodoga eda dodoga,
yo em Yaubada eda Yaubada.”
Yo fede, Luta ma’ena Naomi sa fuyo Betelehem Isalaela nu’una yai.
Picture 3: Tautau Fafafaihonana, Luta Gabu yai
![Picture 3: Tautau Fafafaihonana, Luta Gabu yai](https://static.globalrecordings.net/300x200/lll4-03.jpg)
Luta 2:1-23
Luta yo Naomi hige adi kalahe. Yo fede, Luta ya liba lau Naomi lisina yai, iyen,
“U nuwa’egu, be E lau bali sa lau afuledi gabu yai E tanoidi.”
Yo fede, ya lau be gabu hesa yai tau paisowa bali edi aba tanotano gogo yai. Gabu tanuwagana mate Bowasi. Ena tau paisowa ya fati’oidi, iyen,
“Ta’owawa waihinina egu gabu yai te, sai?”
Tiyen,
“Mowabi tine’e’una ma’ena Naomi sa laoma.”
Sidohana lawana ena abi’abi komakoma’ina mate, Bowasi wasana ha’a ya atahiyen.
Ya ita mate ya tau’ulu wananaha paisowa yai. Yo fede, Luta ya faliba, iyebom,
“Egu tau paisowa maidam aite’i yee – bali sa tano gogo fa’ofi.”
Ena tau paisowa ya gaimumuidi tabu somo ai lisina ti ginauli, na bali bena ana sa lau afuledi haba ya tano. Bowasi ena abi loholoho lisina yai mate, maimailafina Luta Naomi ena ya dede. Naomi iyen,
“Haba Yaubada ya fatabuwen! In efada hesa.”
Picture 4: Tautau Fafafatina, Luta yo Bowasi Aba Abi'abi Lisi Lumana yai
![Picture 4: Tautau Fafafatina, Luta yo Bowasi Aba Abi'abi Lisi Lumana yai](https://static.globalrecordings.net/300x200/lll4-04.jpg)
Luta 3:1-18
Ai Isalaela, yena taumoho ya pe’i, afa’efana haba edi hwabu sa fai. Fuya esega Naomi Luta ya faliba, iyebom,
“Yau haba lahum E yo’o, be haba um tau ita watanim. Bowasi mate efada hesa. Maimailafi haba bali ya abi lisi. U sigu be em leli loholohodi u li’odi, na u lau ena aba abi’abilisi yai.
“Ena aba eno bena wa sibai, na yena ya eno tau hwafuhwafu, ai ahena u guli lidi.”
Naomi alinana Luta ya lau watan. Bowasi ya eno lau fuyofuyoma Luta ya ita ahena yai.
Ya sibai mate ena fanuha bena ya fai.
Yo fede, ya liba lau lebena, iyen,
“Luta, somo wa an’etaidi, haba E ginaulidi, pa’ana dodoga sa sibai mate, um tine’eu loholohona.
Picture 5: Tautau Fafafaligigina, Bowasi Yo Betelehem Babadadi
![Picture 5: Tautau Fafafaligigina, Bowasi Yo Betelehem Babadadi](https://static.globalrecordings.net/300x200/lll4-05.jpg)
Luta 4:1-22
Bowasi babada safuhudohudo’i ya yogaidima Betelehem eda’edana hafohafona yai.
Ifadi hesa ena dudulai bena Luta ya fai bwa’iyen, mahudo’idi edi fanuha ibe Bowasi moho ya abi. Yali sa fawananaha mate, tau pe’i ana ahe sumasuma afa’efana Bowasi sa felen. Isalaela edi laulau doha. Yo fede, Bowasi Luta ya fai. Natudi taumoho hesana Obeda. Habahim, falena wawahin Naomi sa faliba tiyen,
“Yaubada te fadebasae! In waham ya felem be haba ya ita watanim. Lawam ya gadosisiyem. In ya loholoho wananaha lisim yai na, habahim, nanatum faligigi luwaga.”
Afahaidagu, Luta kwade la’ila’i ya faho’ina fuyana ena dodoga yo Yaubada edi ya paisowa.
Isalaela edi Ba’isa la’ila’i Dawida wahana Obeda.
Picture 6: Tautau Faligigi Esega, Maliya yo Yaubada ena Anelu
![Picture 6: Tautau Faligigi Esega, Maliya yo Yaubada ena Anelu](https://static.globalrecordings.net/300x200/lll4-06.jpg)
Luka 1:26-38
Hiti fisa Luta mulina yai, Yaubada waihin hesa ya fasinabo, be ena ya paisowa.
Hesana mate Maliya. In mate Luta laulauwewena. Maliya mate, waihin nuwanuwasupuna. In mate bena Diyosepa ya fai. In moho, hola hige ti miya luwaga, Yaubada ena Anelu ya fataumahata lau Maliya lisina. Ya faliba, iyen,
“Maliya tabu u wasabu. Yaubada ya ita faloholohom. Haba wa fanatu, be Natum hesana ‘Yesu.’ In haba Yaubada Hewawananaha Yai Natuna.”
Maliya Anelu alinana ya bui, iye,
“Yau Guyau ena tau paisowa. Somo wa libaen, haba ya tubu.”
Habahim Yaluwa Tabuna ya laoma Maliya lisina, be ena gigibwali yai ya boga, be Natuna taumoho ya yosi.
Be Maliya ya famala Yesu tinana, Yaubada Natuna!
Picture 7: Tautau Faligigi Luwaga, Hana ya Lau’u’ula Lau Yaubada Lisina
![Picture 7: Tautau Faligigi Luwaga, Hana ya Lau’u’ula Lau Yaubada Lisina](https://static.globalrecordings.net/300x200/lll4-07.jpg)
1 Samuwela 1:1-20
Luta ena fuya, na mulina yai, Isalaela nu’una yai amainiya waihin hesa hesana Hana. Lahuna ya fanuha wananahai. In moho, Hana nuwana ya heyaya pa’ana ya agali. Bolima lofalofa sa lau Yaubada ena dubu Sailo yai. Ainauya sa abidi be sa antalasam lau Yaubada lisina. Hana ya lau dubu be iyen,
“O Yaubada, yena wa nuwatuhuigu be natugu wa felegu, haba E fele fafuyom hinaga.”
Yaubada ya falifaliba mate, sopana moho sa mwahiu. In moho, hige alinana. Antalasam Ba’isana Eli ya ita. Ena nuwatuhu bena haga ya nom yauyaule.
In moho, Hana ena lau’u’ula Yaubada ya atahiyen, na habahim muliyai ya fanatu be natuna taumoho ya yosi.
Hesana ya tole Samuwela.
Picture 8: Tautau Faligigi Faihona, Gwama Samuwela Yaubada ena Dubu yai
![Picture 8: Tautau Faligigi Faihona, Gwama Samuwela Yaubada ena Dubu yai](https://static.globalrecordings.net/300x200/lll4-08.jpg)
1 Samuwela 1:24-28, 2:12-17, 3:1-21
Fuyana Samuwela ma kiukiuna, Hana Yaubada ya felen. Ya lawen, be ma’ena Eli sa miya Sailo yai: Yaubada sidohana fafadebasaena mate, Eli Samuwela ya fa’ata.
Eli nanatuna luwaga tatau. Iti mate tau antalasam, in moho, edi laulau sa heyaya.
Yo fede, Yaubada hige i libaliba fuyo, tau antalasam lisidi. I’ipa esega Samuwela ya laulau eno Yaubada ena Luma Tabuna yai. Ma’esega na hesana Yaubada ya atahi. Samuwela ya fabelele lau Eli lisina, be iyen,
“Yau ite. Um wa yogaigu.”
Na Eli iyen,
“Yau hige ya yogaim. U lau eno.”
Laulau te ya tubu ma faihona.
Yo fede, Eli ya nuwatuhu lobahi mate, nuwana Yaubada Samuwela i yogayogai.
Be Samuwela ya faliba, iye,
“Yaubada alinana u bui, uwen, ‘Guyau, em tau paisowa ya atahi.’”
Yaubada ya liba lau Samuwela lisina ma boludi, be ya famala peloweta hesa, yo Isalaela yai in tanuwaga.
Picture 9: Tautau Faligigi Fati, Samuwela Isalaela Edi ya Lau’u’ula
![Picture 9: Tautau Faligigi Fati, Samuwela Isalaela Edi ya Lau’u’ula](https://static.globalrecordings.net/300x200/lll4-09.jpg)
1 Samuwela 4:10-11, 7:2-14
Eli nanatuna sa nuwatuhu lau wata, be Yaubada ya panisidi. Hiyala yai sa talaidi, yo Palesitani Isalaela sa leihafihafitidi. Bolima tatau luwaga sa pe’i [20] Palesitani Isalaela sa tanuwagai. Habahim Samuwela dodoga ya falibadi, iyebom,
“Yena Yaubada ami famuli watan mate, emi yaubada bwalabwala ti otawa, na Yaubada Wananaha au abi, In haba ya saguhimiu ami waiyunu lisidi yai.”
Isalaela ena liba sa lau watan, be sa fa’oigogoma nu’u esega yai. Habahim Samuwela ya antalasam lau Yaubada lisina, na Isalaela edi ya lau’u’ula. Palesitani sa fa’oigogoma bena Isalaela sa hiyalai, in moho, Yaubada palepalele ya fatamaliyama hewadi yai.
Palesitani sa wasabu be sa dabalala, Yo fede, Isalaela habahim edi adidili sa abi fuyoi.
Picture 10: Tautau Safuhudohudo’i, Samuwela Saulo ya Fagabi Ma’i yai
![Picture 10: Tautau Safuhudohudo’i, Samuwela Saulo ya Fagabi Ma’i yai](https://static.globalrecordings.net/300x200/lll4-10.jpg)
1 Samuwela 8:1-9, 9:15 - 10:1
Yaubada mate Isalaela edi Ba’isa wananaha.
Ena dodoga mate Samuwela ya ita watanidi. In moho, dodoga sa fanuha bena doga hesa edi ba’isa, pa’ana sulu haisa iyabodi edi baba’isa. Samuwela ya atahiyen be nuwana hige i dudulai. Yo fede Yaubada ya libama, iyen,
“Um hige ti waiyo’o’em, Yau sa waiyo’o’egu. Alinadi u lau watanidi, be edi ba’isa u feledi.”
Taumoho hesa hewahewalina hesana Saulo. Kwaluna ya lofa yo ya taugigi. Fuya ma’esega Saulo ya lau Samuwela ya kepai. Ya ita’ita lau, be ya ita ya laolaoma, Yaubada Samuwela ya faliba, iyen,
“Dogana logena ne’i niya, egu dodoga haba ya ita watanidi.”
Yo fede Samuwela ma’i ya abi. Saulo boluboluna yai ya fagoi. Fafa’ilala te mate, in ya famala ba’isa. Bolima la’ina tatau luwaga sa pe’i (40) Saulo Isalaela ya ita watanidi.
Picture 11: Tautau Safuhudohudo’i Esega, Samuwela ana Leli Saulo ya Kampulitidi
![Picture 11: Tautau Safuhudohudo’i Esega, Samuwela ana Leli Saulo ya Kampulitidi](https://static.globalrecordings.net/300x200/lll4-11.jpg)
1 Samuwela 15:1-29
Amaleki mate dodoga heyaheyayadi yo Isalaela sa fawaiyunudi. Be Samuwela Ba’isa Saulo ya faliba, iyen,
“Yaubada alinana hola ya falibam. Amaleki dodogadi u antalaidi yo edi ginauli mahudo’idi u faheyayadi.”
Yaubada Saulo yo ena hiyala tataudi ya saguhidi be Amaleki sa leihafihafitidi. In moho, Yaubada sa mo’apeiyen. Amaleki edi suisui sa abidi, be Yaubada bena sa ainauyai, yo edi ba’isa hige ti lau funuhi.
Be Samuwela Saulo ya faliba, iye,
“Pa’ana Yaubada ena nuwatuhu hige au lau watan, lisina yai ya waiyo’o’em.”
Samuwela bena haba ya au’aulaha, na Saulo ya abi lau ena leli yai. Nimana yai ya pulitidi.
Yo fede, Samuwela iyen,
“Yaubada Isalaela nu’una ya daili luwagai, be doga hesa loholohona ya felen.”
Afahaidagu, Saulo ya antalasam lau Yaubada lisina. In moho, ya awayagalaen.
Samuwela ya awa'abi, yo Yaubada ya lau watan fuya ou’ouli.
Awa’abi Yaubada ya fanuha, na habahim, ainauya.
Picture 12: Tautau Safuhudohudo’i Luwaga, Yesu Yaubada ena Dubu Lumana yai
![Picture 12: Tautau Safuhudohudo’i Luwaga, Yesu Yaubada ena Dubu Lumana yai](https://static.globalrecordings.net/300x200/lll4-12.jpg)
Luka 2:41-50
Samuwela ya pe’i na ya laoma, Yesu mate Isalaela yai, In wawaya.
Tinana mate Maliya, Tamana mate Yaubada. Fuyana Yesu ena bolima safuhudohudo’i luwaga, in yo tinana Maliya yo tamana Diyosepa sa lau Yelusalem. Amainiya mate, Yesu sa fakaukau.
Maliya yo Yosefa sa lau yo’oi.
Lahai faihona mulidi yai Yesu sa lobahi, dubu yai. Yudeya tanutanuwagadi Yaubada wasana edi ya dedede.
Maliya ya liba lau lisina, iyen,
“Wa famodemai, E yo’oyo’oim.”
Na Yesu iyen,
“Yau bena Tamagu ena, ai luma.”
Fuyana Yesu ma wawayana doha Samuwela, ya sibai mate ya laoma bena Yaubada ena ya paisowa. Yesu ya laoma bena dodoga ya fafuyodima Yaubada lisina, pa’ana Yaubada mate Ba’isa wananahana yo dodoga mahudo’idi adi tanuwaga.
Book 4, Side B Liba Famahata
![Book 4, Side B Liba Famahata](https://static.globalrecordings.net/300x200/lll4-00.jpg)
Dodoga haisa fafahesadi sa miya lofalofa mate, iti Yaubada ena tau paisowa.
Dede te sidohana edi gigibwali edi abi’abina ya libaen, o sidohana Yaubada ya ita fala’idi.
Picture 13: Tautau Safuhudohudo’i Faihona, Dawida in Sipisipi Tau Ita Watanidi Loholoho
![Picture 13: Tautau Safuhudohudo’i Faihona, Dawida in Sipisipi Tau Ita Watanidi Loholoho](https://static.globalrecordings.net/300x200/lll4-13.jpg)
1 Samuwela 16:1-13, 17:34-35
Saulo mate in Isalaela edi ba’isa bwa’ibwa’ina. In moho, Yaubada ya mo’a peiyen. Yo fede, Yaubada Saulo ya lau afulen be hige i saguhi fuyoi.
Gwama hesa gubufwau hesana Dawida. Tamana ena sipisipi ya ita’ita watanidi. Yaubada mwahumwahulina ya sunumaen. Heyaheyaya hige i ate’ate’edi.
Fuya ma’esega laiyon sipisipi hesa ya nali. Dawida laiyon wa ya lau funuhi. Lili loholohodi ya lau uli yo fadebasae wanadi ya wanaidi Yaubada lisina.
Yaubada ya fanuha bena dodoga edi laulau doha Dawida mate, ya fanuhadi, Yo fede, Yaubada Dawida ya fasinabo be Saulo falaudamahina.
Picture 14: Tautau Safuhudohudo’i Fati, Dawida yo Doga Hesa Adi’adidilina
![Picture 14: Tautau Safuhudohudo’i Fati, Dawida yo Doga Hesa Adi’adidilina](https://static.globalrecordings.net/300x200/lll4-14.jpg)
1 Samuwela 17:1-54
Palesitani yo Isalaela sa hiyala Palesitani dogana hesa ya taugigi yo edi menamenana hesana Golaiyeti. Ya yoga lau Isalaela lisidi, iyen,
“Doga hesa au si’o’ina. Yena ya talaigu, haba ai emi fayofayo tau abina, na yena E talai umi haba ema fayofayo ami ginauli.”
Isalaela dodogadi mate, Golaiyeti sa wasabuwen. Hige gonowana sai la’i i fatupa. Dawida iyebom,
“Palesitani somo-somo be Yaubada hige i sibai? Tabu Yaubada Mwahumwahulina ena hiyala tataudi i fawasabudi!”
Dawida hige i wasabuwen. Yaubada haba ya saguhi, be asiyala ni ya talai. Yo fede, Dawida ena katupaipai ya abi, na ume’ehu ya tuhu mate Golaiyeti deba pogana yai ya oi. Golaiyeti ya guli lidi tanohi yai, na Dawida ya tulu lau, be Golaiyeti ena baineti ya abi na gadona ya ibo.
Yo fede, Isalaela edi tau hiyala Palesitani sa leihafihafitidi.
Picture 15: Tautau Safuhudohudo’i Faligigi, Saulo ya Anpate Bena Dawida ya Wunui
![Picture 15: Tautau Safuhudohudo’i Faligigi, Saulo ya Anpate Bena Dawida ya Wunui](https://static.globalrecordings.net/300x200/lll4-15.jpg)
1 Samuwela 18:6 - 23:29
Fatufatubu yai Saulo mate, Dawida ya fanuha pa’ana Isalaela ya saguhidi. Isalaela dodogadi Dawida sa fanuha. Ya famala solodiya yo tanuwaga hinaga. Saulo ya nuwa’ela’ela Dawida lisina yai.
Ena fanuha bena ya lau funuhi.
Fuya ma’esega Dawida ya wanawana Saulo enehena. Yaluwa heyaheyayana Saulo nuwana sa luhufi. Yo fede, ena kebolo ya abi be Dawida ana ya tuhu, ya lau palei be bilibili yai ya lau fa’alalolo.
Ma boludi Saulo ya anpate bena Dawida ya tohai. Saulo natuna yo Isalaela haisa Dawida sa saguhi, Yo fede, ya gela ya lau nu’u pitapitalina.
Picture 16: Tautau Safuhudohudo’i Faligigi Esega, Dawida Saulo ya Lau Nuwa Sahafui
![Picture 16: Tautau Safuhudohudo’i Faligigi Esega, Dawida Saulo ya Lau Nuwa Sahafui](https://static.globalrecordings.net/300x200/lll4-16.jpg)
1 Samuwela 26:1-25
Saulo ma’ena hiyala tataudi sa lau nu’u pitapitalina yai, Dawida sa lau yo’oi.
I’ipana, Saulo ma’ana hewali sa eno, Dawida yo hidana, Abisai, sa samonene lau, Saulo ena aba laulau eno.
Abisai ya fanuha bena ba’isa ya tala eno’enoi, na Dawida ya laulau biliyen, iyen,
“Sai yena Yaubada ena hineli dogana ya talai mate, Yaubada haba ya panisi.”
Yo fede, Saulo ana ho’owa yo ena alahiya kuluna sadaina yai Dawida ya abidi. Sa kalamahano, be sa lau tefa hesa yai, Dawida ya yoga. Yo fede, sa kokolakalaka, na iyen,
“Emi ba’isa hige au bobodiyem komani’i. Au ita’itama! Emi ba’isa ena alahiya ma!”
Dawida, Saulo ya faliba, iyebom,
“Aho ite, E lau nuwa sahafu lebem yai, Yaubada hinaga haba ya lau nuwa sahafu ai lisigu.”
Saulo ya mata’ila, be hige Dawida i kawatalaen bodai.
Picture 17: Tautau Safuhudohudo’i Faligigi Luwaga, Dawida sa Faba’isa
![Picture 17: Tautau Safuhudohudo’i Faligigi Luwaga, Dawida sa Faba’isa](https://static.globalrecordings.net/300x200/lll4-17.jpg)
1 Samuwela 31:1-7; 2 Samuwela 5:1-25, 8:1-15
Palesitani sa fuyoma be Isalaela sa duhu mahanoi bodai. Ba’isa Saulo ma’ena Yonatan sa pe’i hiyala ganahewana yai. Na habahim, dodoga Dawida sa tole Isalaela edi Ba’isa.
Ena luma la’ila’i Yelusalem duhu la’ina yai ya famwaito. Yaubada, Dawida ya faliba, iyen,
“Sipisipi aba ita’ita wata yai E yogaim, be E tolem Isalaela edi Ba’isa. Haba E tole hitinim doha tano’ubu dodogadi edi baba’isa.”
Yo fede, Yaubada Dawida ya tole hitin, yo gigibwali ya felen, be Isalaela adi waiyunu mahudo’ina ya leihafihafitidi.
Picture 18: Tautau Safuhudohudo’i Faligigi Faihona, Dawida Yo Betesiba
![Picture 18: Tautau Safuhudohudo’i Faligigi Faihona, Dawida Yo Betesiba](https://static.globalrecordings.net/300x200/lll4-18.jpg)
2 Samuwela 11:1 - 12:20
Lahai esega Dawida ena luma hewana yai ya laulautiga. Waihin hasahasalana ya sigusigu ya ita. Dawida ena gadosisi lisina yai. Waihinina hesana Betesiba. Waihinina ma, i nahinahi. Ena hiyala dogana hesana Uliya lahuna.
Uliya ha’a ya lau Isalaela adi waiyunu maidadi sa hiyala. Yo fede, Dawida liba ya fatamali ena hiyala tau laukulukuluwena lisina. Hiyala tau lau kulukuluwenna ya faliba, iyebom,
“Bena Uliya ai hiyala ya pe’i, haba hwabuhwabuna E fai.”
In moho, somo Dawida ya ginauli mate, Yaubada hige i fanuha. Lisina yai Dawida ma lahuna Betesiba natudi tau baguna taumoho ya pe’i.
Dawida somo ya ginauli mate Yaubada ya an’etai be ena heyaya ya nuwa afulen.
Picture 19: Tautau Safuhudohudo’i Faligigi Fati, Yaubada ena Luma Tabuna
![Picture 19: Tautau Safuhudohudo’i Faligigi Fati, Yaubada ena Luma Tabuna](https://static.globalrecordings.net/300x200/lll4-19.jpg)
2 Samuwela 7:1-29; 1 Chronicles 22:1-19
Dawida ya laupono Yaubada matana yai.
In moho, Yaubada in ya fanuha, yo bena ena ya paisowa. Ena fanuha bena ena fadebasae Yaubada lisina yai lumana ya fa’obiyo. Na Yaubada iyen,
“Um tabu egu luma u fa’obiyo, pa’ana dodoga boludi wa talaidi. Natum taumoho hesana haba Solomon, In haba egu luma tau fa’obiyona. Yau haba ena nu’u E fatubu.”
Yaubada ena luma ana wawali mahudo’ina Dawida ya nonohai na habahim ya pe’i, habahim Solomon lumana ya ginauli.
Yaubada ena luma mate loholoho wananaha. Bolima faligigi luwaga ya ginauliyen. Isalaela dodogadi Yaubada sa fadebasae lumana yai bolima 100 fisa, ya lau ee--, fuya lofalofa.
Edi ba’isa Dawida mate hige ti nuwa fuiyen.
Picture 20: Tautau Taumoho Esega ya Pe’i, Yesu ya Laoma Yelusalem
![Picture 20: Tautau Taumoho Esega ya Pe’i, Yesu ya Laoma Yelusalem](https://static.globalrecordings.net/300x200/lll4-20.jpg)
Mataiyo 21:1-11
Dawida mulina yai, bolima nuwana 1,000, habahim Yesu sa yosi. In mate Ba’isa Dawida laulauwewena. Tinana Maliya mate waihin nuwanuwasupuna. Tamana mate Yaubada Hewawananaha yai. Yesu mate Yaubada ena tau paisowa.
Yaubada wasana wananahana dodoga ya fatalahadi. No’o abi’abidi ya ginaulidi, Yaubada ena gigibwali yai. Saulo, Dawida yo boluda mate, te heyaya Yaubada lisina yai, na Yesu hige ena heyaheyaya. Lahai esega donki yai ya gelu ya lau Yelusalem. Dodoga sa yoga lau lisina, tiyen,
“Hosana, Ba’isa La’ila’i! Dawida Natuna! Loholoho ya fa’atiti mate, in sai ya laoma Yaubada hesana yai!”
Dodoga sa ita mate, Yesu ya hasai wananaha habahim Dawida.
In Ba’isa la’ila’i habahim tano’ubu baba’isadi.
Picture 21: Tautau Taumoho Esega ya Pe’i Esega, Atai’a Elaidiya sa Fakalahe
![Picture 21: Tautau Taumoho Esega ya Pe’i Esega, Atai’a Elaidiya sa Fakalahe](https://static.globalrecordings.net/300x200/lll4-21.jpg)
1 Kini 16:29 - 17:6
Dawida yo Solomon mulidi yai, baba’isa haisa Isalaela yai sa tanuwaga. Hudo’i mate taumoho hesana Aheba.
Lahuna Diyesibelo mate, waihin heyaheyayana. Yaubada tau famuli watanina boludi ya wunuidi, yo dodoga ya dudu lidi, be Ba’ali edi oitau sa fadebasaedi. Elaidiya mate Yaubada ena tau paisowa dudulaina.
Ya lau Aheba ya faliba, iyen,
“Isalaela edi Yaubada Mwahumwahulina Hesana yai, bolima faihona ibege i usa.”
Yo fede, Yaubada guliyam la’ila’i ya fatalu Isalaela nu’una yai. In moho, Yaubada ena tau paisowa Elaidiya ya ita watan.
Ya dui be ya lau nu’u hesana Seliti, ainiya haba ho’owa yomayomandi ana ya nom. Fuya ou’ou’uli atai’a kalahe sa ledima Elaidiya ana be ya anidi.
Picture 22: Tautau Taumoho Esega ya Pe’i Luwaga, Elaidiya yo Yaubada ena Oyagi Ala’alana
![Picture 22: Tautau Taumoho Esega ya Pe’i Luwaga, Elaidiya yo Yaubada ena Oyagi Ala’alana](https://static.globalrecordings.net/300x200/lll4-22.jpg)
1 Kini 18:16-39
Guliyam bolimana fafafaihonana yai, Aheba yo Kamela Tu’ana dodogadi adi liba Elaidiya ya fatamali. ya falibadi, iyebom,
“Yena Guyau mate Yaubada, au lau watan, na yena auwen Ba’ali Yaubada mate, beti au lau watan.”
Dodoga bulumakau sa lau funuhi, ya famala edi antalasam ya lau Ba’ali lisina. Na habahim Elaidiya Ba’ali ena tau antalasam ya falibadi, iyen,
“Emi Yaubada au an’etai, na yau haba Guyau Yaubada E an’etai. Tausomo oyagi ala’alana ya feleda mate, In Yaubada.”
Ba’ali ena tau antalasam mahudo’idi edi yaubada bwalabwala sa an’etai. Edi antalasam sa le’i panpanen yo taudi sa sesedi nigo yai.
In moho, hige oyagi i fatamaliyama.
Maimailafina, Elaidiya ena antalasam ya abi nonohai. Ho’owa yai ya kaisudi.
Habahim ya lau’u’ula lau Yaubada lisina.
Hige walolona, na oyagi ala’alana Galewa yai ya be’uma. Antalasam yo ho’owa sa ala. Dodoga mahudo’idi tiyen,
“Guyau – In Yaubada!”
Picture 23: Tautau Taumoho Esega ya Pe’i Faihona, Elaidiya ya Hasai Galewa
![Picture 23: Tautau Taumoho Esega ya Pe’i Faihona, Elaidiya ya Hasai Galewa](https://static.globalrecordings.net/300x200/lll4-23.jpg)
1 Kini 19:1-21; 2 Kini 2:1-14
Elaidiya Ba’ali ena tau antalasam ya lau funuhidi, pa’ana edi laulau sa heyaya. Yo fede, Diyesibelo Elaidiya ya fawasabu bena ya lau funuhi. Yo fede, ya gela, be ya lau nu’u pitapitalina yai. Amainiya Yaubada Elaidiya ya failobahi. Be Elaidiya hige i wasabu. Dodoga ya fatalaha bodaidi bena Yaubada Wananahana sa fadebasae.
Elaidiya Elisala ya abi be ya saguhi.
Fuya ma’esega sa laulau gogo, na hosi ma balebalelemna ya puisuli mahano nuwanuwadi yai. Hwayahwayau la’ila’i ganahewana yai Yaubada Elaidiya ya hasaen Galewa, Elisala matana yai ee—, ya fakaukau.
Picture 24: Tautau Taumoho Esega ya Pe’i Fati, Elaidiya Maidana Yesu yo Mose
![Picture 24: Tautau Taumoho Esega ya Pe’i Fati, Elaidiya Maidana Yesu yo Mose](https://static.globalrecordings.net/300x200/lll4-24.jpg)
Luka 9:28-36
Yesu ena fuya yai (bolima 700 mulidi yai), Elaidiya ya lidima tano’ubu. Fuya esega tu’a yai ya taumahata ma’ena Yesu.
Mose, in peloweta fafahesana ya miya bwa’I, habahim Elaidiya, ya taumahata ma’edi hinaga.
Tatau faihona mahudo’idi sa itadi mate, sa namanamali.
Na habahim, Yaubada Galewa yai ya libama. Iyen,
“Itete Natugu… au awa’abiyen.”
Afahaidagu, Yaubada yo Isalaela tanutanuwagadi lala’i sa foyahida Yesu lisina.
Yesu ya laoma mate dodoga boludi adi halulu. Ya pe’i be eda heyaya ya famaisadi, na ya obiyo fuyo, be yaluwada ya famwahulidi.
Au awa’abiyen, haba mwahuli hige anadan ami faho’ina.
##
\h 11/2007
\h Ita’ita, Ata’atahi na wa Miya.
\h Buka fafatina: Yaubada Ena Tau Paisowa.
\h End of Book 4: Servants Of God.
\h audio and written text checking completed √ 2008-11-22.