LLL 3 Panagballigi babaen ti bileg ni Apo DIOS

Pangrugian

Naimbag a bigat. Mangngeg tayo iti daytoy nga istorya nu sinno ti simmukat ken Moises kas maysa a pangulo ti Israel. Maamoan tayo nu kasano nga indauloan ti Dios manipud let-ang agturong ti daga ti Canaan nga maawagan itan nga Israel. Adu a tribu ti agnanaed iti Canaan, adda ditoy dagiti Cananeo, Heteo, Medianita ken kasta met kadagiti Filesteo. Mangngeg tayo nu kasano a tinulungan ti Dios dagiti Israelita tapno abakenda dagiti kabusorda. Kitaen ti ladawan a maris maradaga a libro ket iyakar ti panid nu mangngeg daytoy a tukar. (Tukar)

Umuna a ladawan: Nakilaban ni Josue kadagiti Amalekita

Exodo 17:8-13

Awanan ti bukod a daga dagiti Israelita. Nagdaliasat da iti let-ang kalpasan a tarabayen ida ti Dios iti panagruarda iti Egipto. Inkari ti Dios nga ited na ti Canaan idi panawen a ni Moises ti pangulo ti Israel. Pinili na ti maysa a baro nga agnagan Josue tapno agbalin a mangidaulo kadagiti armada. Maysa nga aldaw, dimteng dagiti Amalekita ket ginubatda ti Israel, ket kinuna ni Moises ken Josue, “Pumilika kadagiti lallaki a kaduam a mapan manggubat kadagiti Amalekita inton bigat. Agtakderakto iti tapaw ti turod a nakaiggem iti sarukod nga inted ti Dios.” No nakangato dagiti takiag ni Moises nga iggem na ti sarrukod ti Dios, mangab-abak dagiti Israelita. Ngem idin a nabannog ni Moises ket saannan a maingato ti takiag na, dagiti Amalekita ti mangab-abak. Isu a tinulungan dagiti dua a lallaki ni Moises a mangingato ti takiagna inggana ti tingnga ti rabii ket tinulungan ti Dios ni Josue a mangabak kadagiti Amalekita. (Tukar)

Maikadua a ladawan: Dagiti Espiya ken ti prutas manipud Canaan

Numero 13:1, 14:35

Idi dagiti Israelita ket makadanun iti asideg ti ungto ti Canaan, nangibaon ni Moises ti sangapulo ket dua a pangulo, agraman ni Josue ken Caleb tapno kitaen da ti daga ti Canaan. Kalpasan ti uppat a pulo nga aldaw, nagawidda ket inpakaammoda ti nakitada. “Sinukimatmi ti daga, ket nasarakanmi a nabaknang ken nadam-eg. Adtoy ti sumagmamano kadagiti bunga. Ngem napipigsa dagiti tattao nga agnanaed sadiay. Dadakkel dagiti siudadda ket nalagda ti sarikedkedda.” Pinagulimek ni Caleb dagiti tattao ti sangoanan ni Moises ket kinunana, “Masapul a dumaruptayon, ket tagikuaentayo ti daga. Kabaelantayo a sakupen ta napigpigsatayo.” Ngem kinuna dagiti lallaki a kinadua ni Caleb, “Saan! Ditay kabaelan ti dumarup. Nabilbileg ngem datayo dagiti tattao sadiay. Babassit a dudon ti kayariganmi kadakuada, ket nalabit a kasta met ti panangkitada kadakami.”

Nagbuteng dagiti Israelita a sumrek ti Canaan. Iti dayta a rabii nagsangsangit dagiti tattao gapu iti ladingitda. Nagsaoda iti maibusur kada Moises ken Aaron kasta met iti Dios. Kellaat a nagparang kadakuada ti mannakabalin a presensya ti Apo. Kinuna ti Apo ken Moises, “Kasano pay kabayag ti panangumsi kaniak dagitoy a tattao? Kasano pay kabayag ti dida panagtalek kaniak idinto a nagipakitaak kadakuada kadagiti adu a milagro?” Kayat ti Dios a mangyeg iti angol ket dadaelenna ida ngem nakisarita ni Moises maipaay kadagiti tattao ket pinakawan ti Dios ida. Ngem kinuna ti Dios, “Isapatak iti naganko ken iti dayagko a mangpunno iti lubong, nga awan kadagitoy a tattao ti makastrek iti dayta a daga.” Ket nagsubli da iti let-ang ket didiay a nilikmotda iti unos ti uppat apulo a tawen. Amin nga Israelita a saan a nagtalek iti Dios ket natayda idiay let-ang.

Maikatlo a ladawan: Bimmallasiw iti karayan dagiti tattao ti Israel

Josue 1:1-9, 3:1-17

Idi a natay ni Moises, nakisao ti Dios ken Josue nga agbalin a pangulo ti Israel. Kinuna ti Dios ken Josue, “Natayen ni Moises nga adipenko. Sika ken dagiti amin nga Israelita, agsaganakayon a bumallasiw iti Karayan Jordan ket inkay iti daga nga itedko kadakayo. Kas imbagak ken ni Moises, intedkon kadakayo ti amin a daga a mabaddekanyonto.” Inbaga ti Dios nu ania dagiti nasken nga maaramid. Dagiti papadi ti Israel ket addaan naisangsangayan a kahon a maaw-awagan “Lakasa ti Tulag”, aglaon daytoy ti nalapad a bato a nakaikitikitan dagiti bilin ti Dios. Kinuna ti Dios kadakuada a bagkaten da ti “Lakasa ti Tulag” ket agturong da iti karayan ti Jordan. Agluplupyas ti danum ti karayan ngem idin a tumapog dagiti papadi, nagsardeng ti panagayus ti danum ket nagabbat. Nakatakder dagiti papadi iti tengnga ti karayan a sibabagkat ti Lakasa ti Tulag kas bumalballasiw dagiti Israelita iti namaga a daga. (Tukar)

Maikapat a ladawan: Ti Pannakaribba ti Bakud ti Jerico

Josue 6:1-27

Dagiti tattao ti Israel ket nagkampo da idiay Canaan nga asideg ti siudad ti Jerico. Kinuna ti Dios ken Josue, iyawatko kenka ti Jerico ken ti ari na, agraman dagiti natutured a soldadona. Agmartsakayo, sika ken dagiti soldadom, ket lawlawenyo ti siudad, maminsan iti tunggal aldaw. Aramidenyo daytoy iti innem nga aldaw. Masapul nga adda ti Lakasa ti Tulag iti sango dagiti pito a papadi a saggaysa ti iggemda a trumpeta. Iti maikapito nga aldaw, mamimpitonto a likosenyo ti siudad idinto a puypuyoten dagiti papadi ti trumpetada. Kalpasanna, puyotenda ti trumpetada iti napaut. Apaman a mangngeg dagiti tattao, aggigiddandanto nga agriaw ket marbanto ti bakud ti siudad. Sumrekto a dagus ti entero nga armada iti siudad.” Inaramid da Josue ken dagiti tattao ti inbilin ti Dios. Narba dagiti bakud ti Jerico ket sinakup ti Israel ti siudad. Kinuna ti Dios iti Israel a saan da a mangala ti maipaay iti bukodda iti aniaman a daton iti Dios. Ngem dagiti alikamen a naaramid iti balitok, bronse wenno landok ket nasken nga ikabil iti pagidulinan ti gameng ni Yahweh. (Tukar)

Maikalima a ladawan: Ti Panagtaray ti Israel manipud iti Ai

Josue 7:1-12

Maysa ti Ai a kabusor a siudad nga asideg ti Jerico. Nasken a maabak daytoy ni Josue, ket nangibaon ni Josue iti sumagmamano a lallaki tapno siimenda ti siudad. Nagsubli da ket inpadamagda, “Saan a masapul a rumaut ti amin a tattao. Dua wenno talloribu laeng ti ibaonmo a mangraut iti Ai, ta bassit a siudad.” Nangibaon ngarud ni Josue iti bassit nga armada iti lallaki tapno makigubat ti Ai. Ngem naabak dagiti armada ti Israel. Dadduma kadagiti Israelita ket natay ket dagiti dadduma nagtataray tapno maisalakanda ti biag da. Iti napalalo a panagladingit, nagpakleb ni Josue ken dagiti pangulo iti sangoanan ti Dios. Kinunada iti Dios nga apay a pinalubusan na daytoy a mapasamak. Ket kinuna ti Dios kadakuada, “Nagbasol ngamin ti Israel! Sinalungasingna ti katulaganmi ta nagala kadagiti naikari a madadael. Tinakawna daytoy, inyulbodna, ket intiponna kadagiti kukuana. Daytoy ti gapuna a di kabaelan dagiti Israelita a sarangten dagiti kabusorda. Intarayanda ida agsipud ta nairantada metten a madadael. Diakon kumuyog kadakayo malaksid no dadaelenyo dagiti innalayo a nairanta a madadael.” (Tukar)

Maika innem a ladawan: Ti Pannakaukom ni Acan

Josue 7:14 - 8:29

Pinaguummong ni Josue dagiti Israelita iti sangoanan ti Dios. Kinuna ti Dios ken Josue a ti maysa a tao a managan Acan ti nagbasol iti Dios. Kinuna ni Josue ken ni Acan, “Anakko, ibagam ti pudno iti sango ni Yahweh a Dios ti Israel. Ipudnom kaniak ti inaramidmo. Dika aglibak kaniak.” Simmungbat ni Acan, “Wen, pudno a nagbasolak iti Apo a Dios ti Israel. Daytoy ti inaramidko: Adda dagiti inagumak kadagiti nasamsam tayo; mairaman kadagitoy ti napintas a kagay, pirak ken barreta ti balitok. Masarakanyo dagitoy a naikali iti uneg ti toldak, agraman ti pirak iti unegna.” Nangibaon ngarud ni Josue iti sumagmamano a lallaki. Nagtatarayda a napan iti tolda, ket nasarakanda a pudno a naikali dagitoy, agraman ti pirak iti unegna. Kalpasanna, pinatay da ni Acan ken ti pamilyana, a kas ti imbilin ti Dios. Ket nagbaaw ti pungtot ti Dios ket kinunana ken Josue, “Alaem ti entero a buyotmo ket rautenyo ti Ai. Dika agbuteng wenno maupay. Yawatko kadagiti im-imam ti ari ken dagiti tattaona, ti siudad ken ti daga.” Nagtulnog ti Israel ket napagballigianda ti Ai. (Tukar)

Maika pito a ladawan: Ti Panagsardeng ti init ken bulan

Josue 10:1-14

Dagiti managdakdakes a tattao ti Canaan ket nangrugi a nagbuteng ti Israel. Lim a kadagiti tribu ket nagtitipon tapno gubaten da ida. Ngem kinuna ti Dios ken Josue, “Saanka nga agbuteng kadakuada, ta intedko kenkan ti balligi. Awanto ti uray maysa kadakuada a makabael a sumaranget kenka.” Ni Josue ken ti armadana ket napanda iti kabusor a tribu tapno makigubat, ket dagiti kabusor a tribu nagtataray da a timmalaw gapu iti butengda. Pinagtudo ti Dios ti yelo kadagiti kabusor ket adu kadakuada ti natay. Nagtultuloy ti labanda iti dayta nga aldaw. Ket kinuna ni Josue, “Init, dika agkutkuti iti ngatoen ti Gabaon; Bulan, agsardengka iti ngatoen ti tanap ti Aijalon.” Pinagsardeng ti Dios ti init ken bulan iti dayta nga aldaw angingga a nalpas nga inabak ti Israel dagiti amin a kabusorna. Iti kaanuman saan a napasamak ken saanton a mapasamak a sungbatan ti Dios dagiti kararag dagiti tattao a kas iti daytoy. (Tukar)

Maika walo a ladawan: Dagiti Alagaden ni Josue kadagiti Tattao

Josue 23:1 - 24:29

Iti nabayag a panawen, inikkan ti Dios ti panaginana ti Israel manipud kadagiti kabusorda iti aglawlawda. Lakayen ni Josue, isu nga inpaayab na dagiti tattao ti Israel. Inpalagip na kadakuada dagiti agkakaimbag nga inaramid ti Dios ken nu kasanu a tinulunganna ida kadagiti amin a pakigubatanda. Kinunana pay kadakuada, “Agtalinaedkayo ketdi a napudno iti Apo a kas iti inar-aramidyo agpapan ita. Iti imatangyo, pinaksiat ti Apo ti dadakkel ken nabibileg a pagilian, ket awan pay ti makabael a mangparmek kadakayo. Mabalin a pagtarayen ti uray maysa kadakayo ti sangaribu a tattao, gapu ta ti Apo a Diosyo ti makirupak iti biangyo a kas inkarina. Isut' gapuna nga ikagumaanyo nga ayaten ti Apo a Diosyo. No sumiasikayo, ket tumiponkayo kadagiti tattao nga adda pay la a nabati iti sidongyo, ken makiasawakayo kadakuada, namnamaenyo a dinton paksiaten ti Apo a Diosyo dagitoy a pagilian. Napeggaddanto a kas iti silo wenno palab-og a pakatinnaganyo, ken saplit kadagiti bukotyo wenno siit kadagiti matayo agingga a mapukawkay iti daytoy nasayaat a daga nga inted kadakayo ti Apo a Diosyo. Ikeddengyo nu siasino ti pagserbianyo. Natalged dagiti tattao a nagkari nga agdayaw ken agserbida ken Apo a Dios. Kalpasan dagitoy a pasamak, natay ni Josue. (Tukar)

Maika siyam a ladawan: Nagsao ni Debora maipaay iti Dios

Uk-Ukom 4:1-9

Idi a matay ni Josue, tinnalikudan dagiti tattao ti Israel ti Dios. Nagdaydayaw da kadagiti didiosen dagiti Cananeo. Ket inikkan ti Dios ti pannakabalin dagiti Cananeo a maibusor ti Israel ket pinarigatda ida. Immasug dagiti Israelita iti Dios ket dimmawatda iti tulong. Iti dayta a panawen, ti pangulo ti Israel ket ni Debora. Immasideg kenkuana dagiti tattao tapno dumawat da iti pammagbaga, ket timmulong tapno maiyurnos dagiti saan a pagkikinnaawatan. Pinadas na nga isubli dagiti Israelita iti Dios. Maysa nga aldaw, inayabanna ni Barac, ti pangulo ti armada ti Israel. Kinunana kenkuana, “Mangayabka iti sangapulo a ribo (10,000) a lallaki kadagiti tribu ti Neftali ken Zabulon ket ipanguloam ida a mapan idiay Bantay Tabor. Ibaonkonto idiay Karayan Kison ni Sisera a pangulo ti armada ni Jabin tapno makiranget kenka. Addanto luglugan a pakigubat ken soldadona, ngem agballigikanto a mangparmek kenkuana.’” Nagbuteng ni Barac ket kinunana ken Debora, “Mapanak no kuyogennak, ngem no saan, diak mapan.” Simmungbat ni Debora, “Ala, wen, kuyogenka, ngem saanto a sika ti mapadayawan no agballigika ta yawatto ti Apo ni Sisera iti maysa a babai.” (Tukar)

Maika sangapulo a ladawan: Timmulong ti Dios a mangparmek keni Sisera

Uk-Ukom 4:10-17, 5:19-21

Ni Debora, Barac, ken dagiti Israelita ket nagturong iti Bantay Tabor. Napan met ni Sisera ken dagiti armadana tapno makigubat kadakuada. Addaan siyam a gasut (900) a landok a lugan a pakigubat. Dagiti Israelita ket addaan laeng iggemda a kampilan. Dimteng dagiti Cananeo iti karayan nga asideg ti Bantay Tabor. Kinamat dagiti Israelita dagiti Cananeo. Dagiti lugan a panggubat ti Cananeo ket naiyanud iti napigsa nga ayus ti Karayan Kison. Tinulungan ti Dios dagiti Israelita tapno maparmek dagiti armada ni Sisera. Ni laeng Sisera ti nakalasat. (Tukar)

Maika sangapulo ket maysa a ladawan: Pinatay ni Jael ni Sisera

Uk-Ukom 4:17-23

Nakalasat ni Sisera ket nagkamang iti tolda ni Jael nga asawa ni Heber. Idi a makita ni Jael nga umas-asideg ni Sisera, kinunana, “Sumrekka apo, sumrekka iti toldak. Dika agbuteng.” Ni Jael ket saan nga Israelita, isu a simrek ni Sisera tapno aglemmeng iti toldana. Inikkan ni Jael ti gatas nga inumenna. Gapu ti nalaos a bannugna, nakaturog ni Sisera. Nangala ni Jael iti martilyo ken maysa a pasok ti tolda. Nagin-inayad nga immasideg kenkuana sana pinatay babaen iti panangpalokna iti ulona agingga a nagsalput iti daga. Idi mapan agsapul ni Barac iti ayan ti tolda, sinabat ni Jael ket kinunana, “Sumrekka ta ipakitak ti lalaki a sapsapulem.” Simmurot kenkuana iti uneg ket nakitana a natayen ni Sisera. Napalukan ti ulo na. (Tukar)

Maika sangapulo ket dua a ladawan: Nagrambak ti Israel

Uk-Ukom 5:1-31

Ti Dios ti nangted ti Israel ti pannakabalin a mangparmek kadagiti Cananeo. Nagkanta ti kanta a pagdaydayaw ni Debora ken Barac kas panagyaman da iti Dios. Naragsakan met dagiti tattao. Maragsakanda nga addaanda ti pangulo a kas ken Debora. Maiyasping isuna ti maysa nga ina. Dinayawda met ni Jael, gapu ta saan a nagbuteng ken Sisera. Inusar ti Dios dagitoy a dua a babbai tapno maisalakan ti Israel. Masansan nga us-usaren ti Dios dagiti nakakapuy tapno mapagballigianda dagiti napipigsa. (Tukar)

Maika sangapulo ket tallo a ladawan: Ni Gideon ken ti Anghel ti Dios

Uk-Ukom 6:1-24

Naaddaan kappia iti Israel iti uneg ti uppat a pulo a tawen. Ngem nagbasol manen dagiti Israelita iti sangoanan ti Dios. Dinaydayawda dagiti didiosen ti Cananeo. Ket binaybay-anna nga iturayan ida dagiti Midianita ti uneg ti pito a tawen. Dinadael dagiti Midianita dagiti mulmula dagiti Israelita. Immasugda ti Dios tapno isalakanna ida. Maysa nga aldaw, maysa a lalaki a managan Gideon nga agir-irik ti trigo. Ilemlemmengna ti panagirikna tapno saan a makita dagiti Midianita. Kellaat a nagparang ti anghel ti Dios kenkuana. Kinunana, “Agrubbuatka ket aramatem ti amin a pigsam a mangisalakan kadagiti Israelita iti pannakabalin dagiti Midianita. Siak a mismo ti mangibaon kenka.” Simmungbat ni Gideon, “Ngem, Apo kasano a maisalakanko ti Israel? Ti partidok ti kabassitan iti tribu ti Manases, ket siak ti kanumoan a kameng ti familiak.” Simmungbat ni Yahweh kenkuana, “Kabaelam nga isalakan ti Israel ta tulonganka. Laklakaemto a parmeken dagiti Midianita ta kasdanto la maymaysa a tao.” Nangipaay ni Gideon ti daton a makan iti anghel. Inawat ti anghel ti makan babaen ti sarrukud nga iggemna. Rimmuar ti apuy iti bato ket pinuuranna ti daton. Ket nagpukaw ti anghel. Napaneknekan ni Gideon a ti Dios ti nakisarita kenkuana. (Tukar)

Maika sangapulo ket uppat a ladawan: Dinadael ni Gideon dagiti didiosen

Uk-Ukom 6:25-32

Ti pamilia ni Gideon ket agdaydayaw met ken Baal ken Asera, dagiti didiosen ti Canaan. Kinuna ti Dios kenni Gideon, “Rebbaem ti altar ni Baal nga inaramid ni amam ket pukanem ti simbolo ni diosa nga Asera iti abayna. Mangbangonka iti nalagda nga altar iti Apo a Diosmo iti rabaw ti bunton.” Nagbuteng ni Gideon kadagiti tattao ngem kayatna nga agtulnog iti Dios, isu nga iti dayta a rabii, nangala ni Gideon ti sangapulo nga adipenna ket dinadaelda dagiti didiosen. Iti agsapa, nakita dagiti tattao ti inaramid ni Gideon, nagpungtot da ket kayat da a patayen ni Gideon ngem inkalintegan isuna ti ama na ket kinunana, “Isakityo aya ni Baal? Wenno ikalinteganyo? Saan a mabigatan ti siasinoman a mangisakit kenkuana. No Dios ni Baal, bay-anyo nga ikalinteganna ti bagina, yantangay ta altarna ti narakrak.” Ti Dios ket naindaklan kadagiti aniaman a didiosen a naaramid ti kayu, bato wenno aniaman pay a banag. Maikari ti Dios iti pammadayaw ken kinapudno tayo. (Tukar)

Maika sangapulo ket lima a ladawan: Ti Panaginom iti danum dagiti armada ni Gideon

Uk-Ukom 7:1-7

Naguummong dagiti Midianita tapno gubatenda ti Israel. Indauluan ti Espiritu ti Dios ni Gideon, isuna ken ti armada ti Israel ket naguummongda. Ngem kinuna ti Dios ken Gideon, “Adu unay dagiti tattaom. Bassit laeng ti masapulko a pangparmek kadagiti Midianita. Ipagarupdanto pay ketdi a nangabakda gapu iti pigsada, ket didanto bigbigen a timmulongak kadakuada. Ipakaammom kadakuada a no adda mabuteng, pumanaw iti Bantay Gilboa ket agawid.” Adu kadagiti kakadua ni Gideon ti nagawid. Kinuna manen ti Dios ken Gideon, “Aduda pay laeng. Isalogmo ida iti danum ket piliekto ti kayatko. No kunak a kumuyog daytoy a tao kenka, alaem. Ket no kunak a saanmo nga alaen, saanmunto nga alaen.” Impan ngarud ni Gideon ida iti danum tapnu uminumda. Adu kadagiti lallaki ti nagparintumeng ken imminom ti danum a kas aso nga agab-ab. Tallo gasut a lallaki laeng ti imminom ti danum babaen kadagiti imada. Kalpasanna kinuna ti Dios, “Dagitoy tallo gasut a lallaki ti aramatek a mangispal kadakayo, ket parmekemto dagiti Midianita. Pagawidemon dagiti dadduma.” (Tukar)

Maika sangapulo ket innem a ladawan: Pinalawlawan ti Armada ni Gideon ti Kampo dagiti Midianita

Uk-Ukom 7:12-25

Nagkampo dagiti armada ti Midianita iti tanap. Adu dagiti adadipenda kasta met dagiti kamelioda a saan a mabilang. Adu ti armada da a kasla dudun a saan a mabilang. Ni Gideon ket addaan laeng tallo gasut nga armada, ngem kinuna ti Dios kenkuana nu ania dagiti aramidenna. Inikkanna ti tunggal maysa ti tangguyob ken karamba nga adda pagsilawan iti uneg na. Tengnga ti rabii idi pinalikmutanda ti kampo ti Midianita. Kalpasanna, naggigiddan da a nagaramid ti napigsa nga ariwawa. Nagtangguyobda sada binurak dagiti karamba nga iggemda sada impukkaw, “Kampilan para iti Apo ken ni Gideon!” Nakigtut ken nariribukan dagiti Midianita ket ginubatda ti maysa ken maysa. Nagtataray dagiti dadduma manipud iti armada da Gideon. Nangted ni Gideon ti bilin kadagiti dadduma pay nga armada ti Israel ket kinamatda dagiti Midianita ket pinatay da ti kaaduan kadagitoy. (Tukar)

Maika sangapulo ket pito a ladawan: Pinatay ni Samson ti lion

Uk-Ukom 13:1 - 14:19

Idi a natay ni Gideon, tinallikudan manen dagiti Israelita ti Dios. Impalubos ti Dios nga iturayan ida dagiti Filisteo iti uppat a pulo a tawen. Kalpasanna, nangibaon ti Dios iti maysa pay a pangulo ket inikkan na ti kabaelan nga isalakan ti Israel. Ti nagan na ket Samson. Idi dimteng ti Espiritu ti Apo/Yahweh ken ni Samson, nagbalin isuna a napigsa. Saan a pinapukisan ni Samson ti buokna. Ti atiddog a buokna ket pakakitaan nga isuna ket para iti Dios. Daytoy ti palimed ti kinapigsa na. Nakursunadaan ni Samson ti maysa a babai a Filisteo, ket kinunana kadagiti nagannakna, “Adda nasirpatko a Filistia idiay Timna a magustoak unay. Kayatko nga asawaen, isu nga inkay koma kasao.” Kinuna ti nagannak na kenkuana, “Apay a mangasawaka iti puli dagiti saan a kugit a Filisteo? Awan aya ti kayat mo kadagiti kabagiantayo wenno maysa kadagiti kadaraantayo?” Ngem saan a nagbaliw ti kayat ni Samson, saan nga ammo dagiti nagannak ni Samson a daytoy ti plano ti Dios, nga maaddaan ti riribuk kadagiti Filisteo.

Idi a magmagna ni Samson a mapan iti pagtaengan ti babai, maysa a lion ti nangsaranget kenkuana. Napigsa ni Samson ket pinatay na ti lion babaen laeng ti imana. Kalpasan ti sumagmamano nga aldaw, nagsubli ni Samson idiay ket nagna iti dalan a nakatayan ti lion. Nakita na ti adu nga uyukan ken diro ti bangkay ti lion. Idin a mapan iti pamilya ti asawaenna, kinaritna dagiti Filisteo ti maysa a burburtiya. Kinunana, “Iti mangmangan, rimmuar ti makan; iti napigsa, rimmuar ti nasam-it.” Kinunana pay, “No mapugtoanyo ti kaipapananna sakbay a malpas ti padaya, ikkankayo iti tallo pulo a kawes a linen ken tallo pulo a pagan-anay a pagsukatan. Ngem no diyo mapugtoan ti kaipapananna sakbay a malpas ti boda, dakayo ti mangted iti tallo pulo a kawes a linen ken tallo pulo a pagan-anay a pagsukatan.” Kalpasan ti sumagmamano nga aldaw, di da payla napugtoan ti kayat a sawen ti burburtia ket kinunada iti asawa ni Samson, “Sikapam ni asawam tapno ibagana kenka ti kaipapanan ti burburtiana. No madika, puorandaka ken ti balay ni amam. Inawisdakami kadi tapno pagpanglawendakami?” Iti kasta napan kenkuana ti asawa na nga agsangsangit ket nagpakpakaasi nga ibagana ti sungbat ti burburtia. Inbaga ni Samson ti sungbat. Naammuan dagiti Filisteo ti sungbat ti burburtia ket kinunada ken Samson, “Ania pay ti nasamsam-it ngem ti diro? Ania pay ti napigpigsa ngem ti lion?” Bimmaba ti Espiritu ni Yahweh ken ni Samson ket pimmigsa. Simmalog a napan idiay Askelon. Sadiay, tallo pulo a lallaki ti pinapatayna; innalana dagiti pagan-anayda sana inted kadagiti nangipatarus iti burburtiana. Gapu iti pungtotna iti inaramid ni asawana, nagawid iti balay ni amana. (Tukar)

Maika sangapulo ket walo a ladawan: Pinuoran ni Samson dagiti mula ti Filisteo

Uk-Ukom 15:1-17

Iti saan a nabayag, nagsubbli ni Samson kadagiti Filisteo tapno alaenna ti asawana, ngem inpaasawa ti ama na ti sabali a lalaki. Kinuna ni Samson, “Ita, saankon a basol no ania ti aramidek kadagiti Filisteo.” Pimmanaw ni Samson ket nagtiliw iti tallo gasut a musang. Sinagduduana a rineppet dagiti ipusda sa nangikabil iti aluten iti nagrinneppet nga ipus. Pinasgedanna dagiti aluten sana binulosan dagiti musang iti katrigoan dagiti Filisteo. Napuoran amin a naani a trigo agraman dagiti saan pay a naani iti talon. Nauram pay dagiti kaoliboan. Kinagura dagiti Filisteo ni Samson. Pinadas da a patayen, ngem nangala ni Samson ti pangal ti asno ket pinatay na ti sangaribo a Filisteo. (Tukar)

Maika sangapulo ket siyam a ladawan: Pinukisan dagiti Filisteo ti Buok ni Samson

Uk-Ukom 16:4-22

Nagkursunada manen ni Samson iti maysa pay a babai a Filisteo. Daytoy ket managan Delila. Napan dagiti pangulo ti Filisteo iti babai ket pinanggepda nga ikkan ti pirak tapno ammuenna nu ania iti mangpappapigsa ken ni Samson. Dinamag ngarud ni Delila ni Samson, “Pangngaasim ta ibagam kaniak no apay a nakapigpigsaka. No adda mangreppet kenka tapno awan ti maaramidmo, kasano ti pamay-am?” Simmungbat ni Samson, “No reppetendak iti pito a di pay nagango a lubid ti bai ti pana, kumapuyak a kas iti gagangay a tao,” Inaramid ngarud ni Delila daytoy ket adda met sumagmamano a Filisteo a nakalimmeng iti sabali a kwarto. Kalpasanna, nagpukkaw ni Delila, “Samson, umayen dagiti Filisteo!” Ngem pinugsat ni Samson ti lubid a kasla nangpugsat iti panait ket saan da a natiliw ni Samson. Dua a daras pay a napasamak daytoy. Umuna kinuna ni Samson a masapul a reppeten da iti di pay nagango a lubid, ngem pinugsat na idi immay dagiti Filisteo. Kinunana pay, no sallapiden da iti pito a punggos ti buokna ket pairutan babaen iti pasok, kumapuy a kas iti gagangay a tao, ngem alistona a ginuyod ti buokna iti pasok. Nagsangit ket nagpakpakaasi ni Delila ken ni Samson nga ipudno na nu paggapuwan ti pigsana. Ket inpudno ni Samson kenkuana, “Saanak a pulos a napukisan. Naidatonak iti Dios a kas Nazireo manipud pannakayanakko. No mapukisanak, mapukaw ti pigsak ket agbalinak a kas iti gagangay a tao.” Maysa a rabii a matmaturog ni Samson, inayaban ni Delila dagiti Filisteo, pinukisanda ti buokna. Nagpukkaw ni Delila, “Samson! Adtoyen dagiti Filisteo!” Nakariing ni Samson ngem saan nan a maibales ti bukodna. Pinanawanen ti Dios ni Samson ken kasta met iti pigsa na. Inbalud isuna dagiti Filisteo ken sinuatda dagiti mata na. Inpanda iti pagbaludan ket inaramid da a para giling iti trigo. Ngem in-inut nga nagtubo manen dagiti buokna. (Tukar)

Maika duapulo a ladawan: Ti Panangpatay ni Samson kadagiti Filisteo

Uk-Ukom 16:23-31

Naguummong dagiti ari a Filisteo tapno agrambakda ken mangidatagda iti daton ken ni Dagon a diosda. Daytoy ti kantada, “Impalubos ti diostayo a maparmek ni Samson a kabusortayo.” Nagramrambakda ket nangidatun da kadagiti didiosenda. Inruarda iti pagbaludan, pinilitda a rayray-awenna ida sada pinagtakder iti baet ti dua nga adigi. Kinuna ni Samson iti maysa kadagiti adipen ti Filisteo a kayatna nga agsanggir kadagiti adigi a nakaisaadan ti pasdek. Napno ti pasdek iti adu a tao. Adda met sadiay dagiti lima nga ari dagiti Filisteo. Agarup tallo ribu dagiti lallaki ken babbai iti tuktok ti pasdek a mangbuybuya iti panangrabrabakda ken ni Samson. Nagkararag ni Samson: “Apo Dios, laglagipennak kadi. O Dios, ikkannak pay maminsan iti pigsak.” Tinengngel ni Samson dagiti dua nga adigi a nagsaadan ti pasdek. Nagsaggaysaan dagiti imana dagiti adigi ket induronna iti amin a pigsana. Narba ti pasdek ket natupakan dagiti lima a pangulo ken amin nga adda sadiay. Ad-adu ti napatayna iti daytoy a gundaway ngem dagiti pinapatayna iti napalabas. Iti dayta met la a gundaway, pinagballigi ti Dios ni Samson kadagiti Filisteo. (Tukar)

Maika duapulo ket maysa a ladawan: Pinapanaw ni Hesus dagiti Dakes nga Espiritu

Marcos 5:1-20; Mateo 8:28-34

Limmabas ti nabayag a panawen kalpasan ni Gideon ken ni Samson, nagnaed ni Hesus idiay Israel. Maysa nga aldaw, nasabatna ti maysa a lalaki a linuganan ti dakes nga espiritu. Daytoy a lalaki ket agnaed kadagiti tantanem. Agik-ikkis ket dundunurenna ti bagina iti bato. Nagtaray ket nagparintumeng iti sangoanan ni Hesus sana inyikkis, “Hesus, Anak ti Dios a Kangatoan. Apay a singaennak? Iti nagan ti Dios, dinak kadi parigaten.” Ammo ti espiritu a ni Hesus ket Anak ti Dios. Nagpakpakaasi dagiti dakes nga espiritu a palubusanna ida a sumrek kadagiti baboy. Pinalubusan ida ni Hesus, pinanawan dagiti dakes nga espiritu dayta a lalaki ket simrekda kadagiti baboy nga adda iti asideg. Nagdadarison da iti arban—agduaribuda amin a baboy—iti teppang sada timpuak iti dan-aw, ket nalmesda amin. Nakita dagiti tattao a ni Hesus ket addaan pannakabalin ken ni Satanas ken kadagiti dakes nga espiritu. Wen, uray dagiti espiritu ket am-ammo da nu siasino ni Hesus ken nasken nga agtulnogda Kenkuana. Isursuro kadatayo ti Sao ti Dios a naawat ni Hesus dagiti isu amin a pannakabalin iti langit ken ti daga. Dagiti dakes nga espiritu ket addaan pannakabalin ngem mabalinda a mapaksiat babaen iti Nagan ni Hesus, ken babaen iti pannakabalin ti Santo Espiritu. (Tukar)

Maika duapulo ket dua a ladawan: Pinapanaw ni Hesus dagiti Agtagtagilako iti Templo ti Dios

Lucas 19:45-48; Juan 2:12-21

Maysa nga aldaw, nagturong ni Hesus iti templo ti Dios idiay Jerusalem. Adda idiay dagiti agtagtagilako kadagiti an-animal a maidaton. Ngem agganganansiada babaen iti panagsuitik. Nagpungtot ni Hesus. Kinunana kadakuada, “Nailanad iti Nasantoan a Surat a kuna ti Dios, ‘Managanto ti balayko iti balay a pagkararagan.’ Ngem pinagbalinyo metten a rukib dagiti mannanakaw!” Pinaruar ni Hesus dagiti agtagtagilako kasta met dagiti an-animal. Ni Hesus ti Naindaklan nga Anak ti Dios. Addaan karbengan a mangpapanaw kadagiti agtagtagilako iti balay ni Amana. Ngem sumagmamano kadagiti Judio ket nagpungtot ket kinunada, “Ania ti maiparangmo a milagro kadakami a mangipakita iti kalintegam a mangaramid iti daytoy?” Simmungbat ni Hesus, “Rebbaenyo daytoy a Templo ket iti uneg ti tallo nga aldaw, bangonekto met laeng,” Saan a maawatan dagiti Judio ti kayat a sawen ti inbaga ni Hesus. (Tukar)

Maika duapulo ket tallo a ladawan: Ti Panagungar ni Hesus manipud ken Patay

Mateo 27:33 - 28:20

Nagserbi ni Hesus iti tallo a tawen. Ngem dinusa ken pinatay isuna dagiti Judio. Inlansada ni Hesus iti krus inggana a natay. Ngem iti maikatlo nga aldaw, nagungar. Daytoy ti kinuna ni Hesus idi nanursuro kadagiti tattao, “Rebbaenyo daytoy a Templo ket iti uneg ti tallo nga aldaw, bangonekto met laeng,” Ti bagina iti ibagbagana kadaytoy. Kalpasan daytoy, nabigbig dagiti tattao a ni Hesus ti Pudno nga Anak ti Dios. Immasideg ni Hesus ket kinunana kadagiti adipenna, “Naited kaniak ti amin a pannakabalin idiay langit ken ditoy daga. Inkay ngarud kadagiti amin a tattao iti amin a lugar, ket pagbalinenyo ida nga adalak: bautisaranyo ida iti nagan ti Ama, ti Anak ken ti Espiritu Santo, ken isuroyo ida nga agtungpal kadagiti amin nga imbilinko kadakayo. Laglagipenyo nga addaakto nga agnanayon kadakayo agingga iti panungpalan ti lubong.” Addaan kabaelan ni Hesus a manglaban ken ni satanas, basol ken ti patay. Mangted ni Hesus ti baro a biag kadagiti amin a sumurot kenkuana. Ket kayat na nga iwaragawag tayo daytoy a mensahe iti amin a tattao. (Tukar)

Maika duapulo ket uppat a ladawan: Ti Soldado para iti Dios

Efeso 6:10-18

Kadagiti istorya a nangngeganyo, nakitayo a kanayun a padasen ni Satanas a parmeken dagiti adipen ti Dios ken dadaelen dagiti planona. Uray kadagitoy a panawen, kastoy latta iti mapaspasamak. Ni Satanas a managdakdakes, agtultuloy a parparmekenna dagiti annak tix` Dios. Ngem inted ti Dios ni Apo Hesus tapno isalakan natayo iti dakes. Idi nagungar ni Hesus manipud ken patay, pinarmekna na ti pannakabalin ni Satanas. Inikkan ni Hesus dagiti adipenna ti naispirituan nga armas tapno malabanan ken mapagballigian ti pannakabalin ti kinadakes. Nasken a kanayun a nakasagana tayo, kas iti maysa a soldado a kanayon a nakasagana iti gubat.

Umuna, isuut tayo ti helmet ti pannakaisalakan. Kayat na a sawen nga iti panunot ken ti karirikna tayo ket nasalakniban ken ammo tayo nga isalakan natayo ti Dios manipud ti pagarian ken pannakabalin ni Satanas. Padasen ni Satanas nga ikkannatayo iti panagduadua kadagiti panpanunot tayo ngem mabalin tayo nga agtalged iti pannakaisalakan nga adda kadatayo ni Kristo. Ikawes tayo ti kabal ti kinalinteg, iti aglaplapusanan a kinaimbag ni Hesus. Ni Satanas, a maaw-awagan Diablo, ket padasennatayo a dadaelen, a saan tayo a maikari iti Dios. Kadagiti bukod tayo, pudno, a saan tayo a maikari iti Dios ngem nu agmatalek ken natalgedtayo ken ni Hesus nga anak natayo ti Dios, saan na a kitaen dagiti nagbasolantayo wenno nagkurangan. Inkaro aminen dagitoy ni Hesus, ti kinalinteg laeng iti makitana kadatayo. Saan tayo a maisalakan babaen iti naimbag nga aramid wenno naaramid tayo, ngem gapu iti kinaimbag iti Dios a naisalakan tayo. Aramatentayo ti barikes ti kinapudno. Nasken a maamuan tayo ti ibagbaga ti Dios kadatayo iti Biblia tapno saan tayo a maallilaw kadagiti madi a pannursuro. Padasennatayo a sulisogen ni Satanas tapno agbasoltayo. Maamuan tayo dagiti kinaulbodna babaen ti panangammotayo ti kinapudno maipanggep iti Dios. Alaentayo ti kalasag ti pammati tapno maisalakantayo dagiti bagi tayo manipud kadagiti panangdarup ken kinaulbod ti kabusor. Saan tayo a maawatan nu maminsan dagiti dakes a pasamak wenno dagiti pagayatan ti Dios iti biagtayo. Kadagitoy a panawen, nasken nga agtalektayo iti Dios ken agbiag babaen iti pammati, saan a kadagiti banbanag a makitkita laeng. Isuot tayo ti sapatos ket ipakaammo tayo ti Naimbag a Damag ti talna kadagiti amin a lugar a papanantayo. Kamaudiananna, alaentayo ti Espiritu a pannakakampilantayo, iti Sao ti Dios. Babaen iti kararag ken ti Espiritu ti Dios, mabalintayo nga aramaten ti kinapudno manipud kadagiti sasao ti Dios tapno maabak dagiti amin a pannakabalin ti kinadakes ken ti kinasipnget iti daytoy a lubong. Babaen kadagitoy a naispirituan nga armas, dagiti sumursurot ken Hesus ket karamanen iti balligi ken dayag iti Dios.