Tara, Puratena & Hupa Embo 6 Jesus, Omuhonge

Omatjiukisiro

Metaha panga randje. Indjo u hakaene ku nomuhonge omunene pu avehe. Ena re o Jesus Kristus. Toora embo indi emblou u tare kotjiperendero tji matji kongorere, indi tji wa zu nokuzuva ombosiro ndji.

Otjiperendero 1: Jesus Ma Hongo Ovandu

Mateus 5

Motjiperendero hi Jesus ma hongo ovandu ohunga na Ndjambi. Jesus wa hindwa i Ndjambi nu mena rokutja Eye ongu ri Omuna erike waNdjambi, Eye u tjiwa avihe vyaNdjambi. Mena rokutja ovandu ve ripura omeripura omavi nokutjita ovina ovivi, otji va humburuka kokure na Ndjambi. Ndjambi wa suvera ovandu. Jesus wa za ku Ndjambi okuhonga ovandu avehe kutja mave yenene vi okutjiwa Ndjambi. Puratena! Me ku raere Jesus mbya honga kovandu. Mavi ku vatere okutjiwa nawa Ndjambi wOuatjiri nomunamuinyo.

Otjiperendero 2: Ozondjuwo Mbari

Mateus 7:24-27

Jesus wa serekarera omasanekero wovarumendu vevari motjiperendero hi. Omurumendu umwe wa tunga ondjuwo ye kombanda yoruuwa. Oruuwa otjina otjizeu nu tjomasa. Omipupo tji vye ya, ondjuwo ndji ka i wire. Omurumendu warwe ondjuwo ye wa tunga meheke. Omipupo vye ya nondjuwo ye ya pupwa. Jesus wa tja omurumendu ngwi ngwa tunga ondjuwo ye kombanda yoruuwa, omunazondunge. Ete matu sokutunga omiinyo vyetu kombanda yomazikameno omanamasa. Jesus omwini Omazikameno wetu omanamasa. Ete matu sokukara monduviro ku imbi Eye mbi me tu hongo. Ete tji matu kara nonduviro kuye, Eye me tu vatere okutaara Satan na wina omeripura omavi novitjitwa ovivi momiinyo vyetu. Jesus ongu ma rire omasa wetu, neye me tu hongorere, andarire omauzeu womuinyo tji ye ya kombanda yetu.

Otjiperendero 3: Ondjerera Mai Sokumunika

Mateus 5:14-16

Tara ovandu motjiperendero ve novimunine (omakerse). Omundu u ungura tjike nemunine (erambe/ekerse) mondorera? Omurumendu umwe motjiperendero hi wa tizire emunine re kombanda yotjiuru tje, kutja riyerise avehe mondjuwo. Omurumendu ingwi owarwe eyova. Eye wa horeke emunine re kehi yotjiyaha. Jesus ondjerera youye nEye me tu urikire ondjira okuyenda ku Ndjambi. Ete tji matu kambura mu Ye, a tu zuu kEmbo re nokuhupa tjimuna tji mari tu raere, ovandu varwe mave yenene okumuna ondjerera yaJesus momiinyo vyetu. Jesus wa tja: "... ondjerera yenu ngai yere komurungu wovandu, kokutja owo ve mune ovina oviwa mbi mamu tjiti, nu ve hivirike Iho ngu ri meyuru.

Otjiperendero 4: Omuroma Ma Tono Omujuda

Mateus 5:38-42

Oruveze Jesus ndwa ri mehi rOvajuda, Ovaroma mba ri ovandu vehi rarwe, omba ri nomananeno mehi rOvajuda. Rumwe ovarwe wovita wOvaroma iyave tatumisa Ovajuda, otja tji mamu munu motjiperendero. Omurwe wovita wa kambura ondjasa yomurumendu. Omurumendu ma sokutjita vi? Jesus ovandu we ve raera nai: "Amu kara nongore nomundu ngwe mu tjiti navi. Omundu tje ku tono kotjitama tjokunene, tanaurira ihi tjokumuho ku ye wina. Nomundu tje ku twara kotjombanguriro okukambura ohema yoye, mu pa ongwava yoye wina." Atu kara nongore novandu varwe mbu mave tu tjiti navi, mena rokutja Ndjambi wa tja: "Ongore oyandje, owAmi ngu me sutisa." Ndjambi ma vere avehe mbe kayenda komurungu okutjita ouvi. Omberero ndji mai ya momuinyo mbwi poo kombunda yondiro. Nungwari Ndjambi u tu honga okusuta ouvi nouwa (kovanavita na ete) Ihi matji pwire Ndjambi.

Otjiperendero 5: Ongumbiro Ku Ndjambi

Mateus 6:5-15

Motjiperendero hi muna ovarumendu vevari mbu mave kumbu (hungire kuna Ndjambi). Omurumendu umwe wa kurama pendje momuvanda nu ma kumbu ongumbiro onde. Ma vanga kutja ovandu avehe ve mu mune nu ve mu tange. Ndjambi ka zuvire ozongumbiro ohamukwao na indo. Ete matu sokukara otja omurumendu ingwi owarwe motjiperendero hi. Eye ma hungire kuna Ndjambi e ri mondjuwo ye, pu pe hina umwe pendje na Ndjambi ngu me mu munu. Eye omurisusuparise nu ma kumbu nouatjiri. Ndjambi u zuva nu u zira ongumbiro otja indji. Jesus wa tja: "tji mo kumbu, kahite metuwo roye u pate omuvero nu u kumbe ku Iho ngu ha munika. Nu Iho ngu muna imbi mbi u tjita mohamunika, ongu me ku sutu ondjambi yoye." Jesus wina wa tja Ndjambi ma tjiwa mbi mbi matu hepa, ete ngunda atu hi ye mu pura. Katu hepa okuhungira otuwondja twomambo otja ovandu mbe ha tjiwa Ndjambi. Jesus wa tja: "Nopu mwa sokukumba nai: Tate yetu ngu u ri momayuru: Ena roye ngari yapurwe; ouhona woye ngau ye; ombango yoye ngai tjitwe na kombanda yehi otja meyuru. Omboroto yetu yeyuva arihe tu pao ndino. Nu tu isira ozondjo zetu, ete wina otja tji matu isire ovanandjo na ete Nu o tu hitisa momarorero, nungwari kutura ete kouvi.

Otjiperendero 6: Satan Ma Kunu Ondombora

Mateus 13:24-30, 36:36-43

Ovandu ovavi mave kunu ondombora mehi nda zire nokukunwa. Ovandu mbo ovanavita nomukune. (Ondombora ya sana kovikokotwa). Omukune ke na ku yenena okupora ondombora, mena rokutja momuano mbwi ma yenene okuhomonenena imbi ovikokotwa. Eye ma undju ngandu oruveze rwomakondero tji rwa yenene. A wongere ondombora pamwe e i nyosa. Kuzambo a wongere ovikokotwa pamwe. Panga randje, Ndjambi u ri otja omukune nu Satan eye omunavita. Satan mouye wa twa mo ovandu ovarunde poo ovavi mokati kovandu vaNdjambi. Oruveze tji rwa yenene, Jesus ma kotoka rukwao. Eye me ya okuhana ovandu ovavi kovandu mba ri rondakameno mu Ndjambi nu mbe nonduviro ku Ye. Jesus ma toora ovandu ve avehe kutja ve kakare puna Ye aruhe. Nu ovandu ovarunde mave yumbwa puna Satan motjomuriro. Ondwi ondu ri oruveze rwomberero nomaimbirahiro waaruhe.

Otjiperendero 7: Jesus Novanatje

Mateus 18:1-6, 19:13-15

Tara: Eyuva rimwe ovandu va eta ovanatje ku Jesus. Owo iyave vanga kutja Jesus me ve sere ondaya nokuvekumbira. Ovahongewa vaJesus va kondja okuvetjaera. Nu Jesus ka karere nohange nongaro yawo ndjo na tja: "U eseye ounatje u ye ku Ami nu amu u tjaere, Ouhona womayuru tjinga au ri owaimba mbe ri nao." Jesus wina wa raera kovahongewa ve nai: "... tji mu hi nokuvinguruka amu sana kounatje, kamaamu hiti mOuhona womayuru." Ovandu mbe ri ovanandengu mOuhona waNdjambi, owo mba overisusuparise otja ounatje. Panga randje, ovandu mbe ritongamisa nu mbe ripura kutja owo ovanahepero pu varwe, ka vakongorere vaJesus mouatjiri.

Otjiperendero 8: Omurise Nozondu

Mateus 18:12-14

Eyuva rimwe Jesus iya hongo ovahongewa ve a tja: "Omundu tje nozondu esere nu imwe yazo a i pandjara, eye kamaa isa inda 99 pehi na rondo mozondundu okukapaha indji oimwe ndja pandjara are? Nu tje i munu ma kara nenyando enene tjinene ku indji oimwe ndja munu kombanda ya inda 99 nde ha ri aza pandjara. Iho meyuru wina otje ha vanga kutja ovandu ve zepo pu ye nokukapandjara." Ndjambi wa ungura ovandu avehe kombanda yehi. Owo oviutwa vye. Omundu tji ma kongorere Satan, u ri otja ondu ndjo ndja pandjara. Jesus Omurise omuwa (omutjevere wozondu) mena rokutja Eye we era okupaha imba mba pandjara. Jesus ndino ma paha imba mba pandjara.

Otjiperendero 9: Omukarere Nguya Ha Isire

Mateus 18:21-35

Omukarere rive otjikando tjimwe wa ri nondjo onene yovimariva vyombara, nu mbiya ha yenene okusuta. Ombara otji ya yandja eraa kutja omukarere ngwi nomuhoko we ve randisiwe otjovakarere mbe ha pewa otjisuta. Omukarere ngwi we riheka kombara i mu pe oruveze kutja ma sute ovimariva vye. Ombara we mu tira ondjenda. Eye we mu zemisira ondjo indji aihe ne mwesa kutja ma yende. Kombunda yoruveze orusupi omukarere wa hakaena kuna omukarere omukwao ngwa ri nondjo ye yotjimariva otjititi. Eye wa uta okumusina ne mu ninikiza kutja ma yete ovimariva vye. Mene rokutja eye ka ri notjimariva okumusuta, eye we mu twa mondorongo ngandu ndi eye tja sutu ovimariva vye. Omukarere warwe wa karaera ombara imbi mbya tjitwa. Ombara ya pindikire tjinene nai tja nai komukarere omuvi ngwi! "Mukarere ove omurunde, ondjo yandje ndjina aihe ami mbe ku isire, tjinga awe riyarikana ku ami. Ove kotjo sokutjariparera omukwenu tjimuna ami tji mbe ku tjariparere are? Ombara ya pindikire tjinene, narire tji ye mu hindi kondeko okukatatumisiwa nga tja sutu ondjo aihe."

Panga randje, matu sokuisira omundu auhe ngwe tu tjiti navi. Ndjambi wina otji me tu isire kovina avihe ovivi mbi twa zunda. Nungwari ete matu sokuningira ondjesiro ku Ye nomuhihamwatima uatjiri.

Otjiperendero 10: Ovaungure Mave Sutwa

Mateus 20:1-16

Omukune wa ya okukapaha ovaungure vomotjikunino tje tjomivite. Eye wa zuvasana okuvesuta otjimariva tjimwe koviungura vyoure weyuva. Komaandero weyuva ovaungure ve ya okukambura ondjambi yawo. Omurumendu ngwa sutwa omutenga, wa ku twa omapeta. Eye wa ungura oviungura ovititi. Nungwari omukune wa ri omundu omuwa. Eye we mu suta ovimariva vyeyuva embomba. Omurumendu outjavari wa uta okuungura okuza pometaha. Eye we mu suta ovimariva vyeyuva embomba. Warwe wa ungura eyuva embomba. Avehe va sutwa ovimriva mbi ta pamwe. Omurumendu ngwa ungura eyuva embomba ka ri nohange. Eye iya vanga ovimariva ovingi. Nungwari omukune wa tjere: "Mukwetu ami hi nokukutjita ovineya. Katu zuvasanene kotjimariva tjimwe otjisilveri tjeyuva rimwe are? ... Nu hi nousemba okutjita punga ame vanga novimariva vyandje omuini are? Poo mo teruru tjinga ambi ri omuharupu?

Panga randje, Ndjambi u ri otja omukune. Ndjambi aruhe omusemba, nEye wina omuwa nu una ounyanutima. Eye u yandja otjiyandjewa tjimwe tjomuinyo waaruhe ku avehe mbe nonduviro ku Ye. Tu pewa otjari, ka tjisuta koviungura oviwa ovandu mbi ve ungura kombandehi.

Otjiperendero 11: Ovakazendu Vetano Pendje Yomuvero

Mateus 25:1-13

Jesus wa serekarera omasanekoero wovakazona omurongo. Owo iyave undju omuvareke kokutja omukandi u ute. Ovakazona vetano va ri nozondunge, nu imba ovarwe vetano mbu mamu munu mba vari omayova tjinene. Omuvareke tje ke ya mokati koutuku, ovasuko imba omurongo va ri ave rirongere okuhakaena kuna ye. Owo va tuna omarambe wawo nave hiti puna ye momukandi worukupo nomuvero au patwa. Nungwari ovasuko mba ovetano omayova ka vari nomaoli momarambe wawo, nowo iyave sokukaranda. Tji va kotoka, va ravaera: "Muhona, muhona tu paturura! Nungwari omuvareke wa zira: "Tjiri, me mu raere: Ami hi mu i!" Panga randje, Jesus nai u ri meyuru. Eye ongu ri omuvareke weyuru. Eyuva rimwe Eye me ya tjimanga (kombanda yehi). Katu nokutjiwa kutja orune. Ete ndino neyuva arihe matu sokurirongera okuhakaena kuna Ye. Mena rokutja Jesus me ya okutwara avehe mbe mu suvera nu mbe nonduviro ku Ye, puna Ye keyuru okukakara pamwe na Ye, nungwari ovandu ovengi mave isiwa kongotwe tjimuna ovasuko vetano imba omayova.

Otjiiperedero 12: Omuhona Novakarere Ve

Mateus 25:14-30

Omundu ma yenene vi okurirongerera omakotokero waJesus? Puratena. Omurumendu omunandengu ngu mamu munu motjiperendero hi wa kotoka konganda okuza kouyenda oure. Ngunda e hi ya ya, wa yandja tjiva vyouini we kovakarere ve, ve mu takamisire. Ku umwe wa yandja ovimariva ovisilveri 5. Omurumendu ngwi ovimariva mbi wa ungura navyo a etere po ovisilveri 5 vyarwe komuhona we. Warwe wa pewa ovilsilveri 2. Eye wa etera po ovisilveri 2 vyarwe komuhona we. Omuhona we tja kotoka we ve suta pupeta. Nungwari omukarere ingwi owarwe, ngwa perwe otjisilveri 1, we ke tji horeka. Eye ke na tja tjita okumwinapo ovingi. Omuhona wa pindikire mena rokutja omukarere ngwi wa ri notjirweyo. Eye we mu yeka otjimariva hi ne mu ramba monganda ye. Panga randje, Jesus ongu ri omuhona womukambure. Eye wa ya keyuru, nungwari ma kotoka kombandehi. Eye ma undjireko kutja ovakarere ve mave mu hupire nave raere ovandu ohunga naye. Eye wina wa yandja Ombepo ye ondjapuke kovandu kutja ve sore okumukarera. Okokuwa okuungurisa avihe mbi tu na vyo okumuyozika, nEye wa kwizika kutja ovandu mbe mu karera nongamburiro Eye me ve pe ondjambi.

Omatjiukisiro

Jesus wa honga ovandu ohunga naNdjambi, nungwari wina we ve raisira kutja wa pewa omasa omanene i Ndjambi. Tara kotjiperendero nu u tanaure ku ihi tji matji kongorere tji wa zu nokuzuva ombosiro ndji.

Otjiiperendero 13: Jesus Ma Papitisiwa

Markus 1:4-11

Motjiperendero hi matu munu mo Jesus ngunda e hiya uta okuhonga ovandu. Omurumendu ngu ri puna ye mondondu oJohannes (omupapitise). Johanes iya tjiwa kutja Jesus ma sokuhindwa i Ndjambi kombanda yehi. Johanes iya rakiza Ovajuda kutja ve ise ovina ovivi momiinyo vyawo nu ve kongorere Jesus. Ovandu mba kambura mombuze yaJohannes iyave papitisiwa momeva (mondondu Jordaan). Ombapitisimo yaJohanes ya ri otjiraisiro tjokutja ovandu mave vanga okuritanaura kozongaro zawo ozombi ve hupe otja Ndjambi tji ma vanga. Johanes otjikando tjimwe wa tja: "Ami mbi papitisa ene nomeva, nungwari eye me mu papitisa nOmbepo Ondjapuke." Jesus eyuva rimwe we ya ku Johanes. Jesus ke na pa tjitire ouvi, nungwari Eye wina wa vanga okupapitisiwa. Jesus tja za nokupita momeva, pa tjitwa otjina otjikumise. Omayuru ya paturuka nOmbepo Ondjapuke yaNdjambi ye ya kombanda yaJesus mosaneno yonguti. Eraka raNdjambi ra hungiria okuza meyuru ari tja: "Ove oove Omuna wandje omusuverwa. Ami mbi nonyune mOve."

Otjiperendero 14: Jesus Ma Isana Ovahongewa Ve (Ovavatere)

Markus 1:12-20

Jesus tja za nokupapitisiwa, Ndjambi otja yandjera Satan okumurora. Satan iya ungurisa Embo raNdjambi posyo okumurora. Nungwari Jesus wa taara Satan Eye tjinga a ungurisa Embo raNdjambi okuza momasa wOmbepo Ondjapuke. Tja za nokutaara Satan, Jesus wa kayenda komurungu okuungura oviungura Ndjambi mbye mu hindira. Ndjambi wa hinda (Omuna we) Jesus Kristus kouye okuzuvarisa Ombuze Ombwa yaNdjambi, okuhonga ovandu, okuverukisa ovandu nokunyona oviungura vyaSatan. Eyuva rimwe, ngunda Jesus ama kayenda mene yomuronga waGalilea, wa muna ovarumendu omwangu nerumbi (Simon na Andreas). Owo va ri omave yumbu ombate momeva, orondu owo va ri ovapate vozohi. Jesus wa tja nai kuwo: "Kongorereye Ami, nAmi me mu tjiti okurira ovapate vovandu." Owo va isa ozombate zawo nave kongorere Jesus. Jesus wina wa muna ovarumendu varwe omwangu nerumbi (Jakobus na Johanes) Owo iyave tunu ozombate zawo. Owo wina va hakahana okukongorera Jesus, Eye tje ve isana. Jesus wina wa toorora ovarumendu varwe 8. Ovarumendu mba 12 va rira ovahongewa (ovakongorere) ve okuyenda puna ye nokurihonga kuye. Ovarumendu 12 mba omba karira ovaapostele, ovahindwa vaJesus. Owo iyave zuvarisa Ombuze Ombwa yaJesus nave verukisa ovavere mena raJesus. Kombunda Jesus we ve pa omasa okuza mOmbepo Ondjapuke okupitisa ozombeppo ozohakohoke. Nu ngunda Jesus e hiya yaruka keyuru, wa yandja oviungura mbi kovahongewa ve a tja: "Twendeye mouye auhe, nu kazuvariseye Ombuze Ombwa kotjiutwa ngamwa atjihe, mu kaise po ovandu ovahongewa vandje amamu ve papitisa mena raTate nOmuna nOmbepo Ondjapuke. Nu ve hongeye okutakamisa avihe mbi mbe mu raera." Mape hee kutja omundu auhe (omurumendu, omukazendu, omuzandona nomusukona auhe) ndino nguma vanga okurira omuhongewa waJesus, ma sokuriyandjera okuzuva komaraa waMuhona Jesus nokuraera ovandu varwe Ombuze Ombwa yaJesus okuza momasa wOmbepo Ondjapuke. Jesus ngwa penduka otji ma kara puna wo nu Ndjambi me ve ungurisa.

Otjiperendero 15: Omunangana

Markus 1:40-45

Eyuva rimwe kwe ya omurumendu omunangana (omutjise womukova) ku Jesus. We ya ku Jesus e riheke a tja: "Tji wa vanga, Ove mo sora okundjiverukisa." Ovandu varwe iyave tira okuya popezu nomurumendu ngwi mena romutjise we, nungwari Jesus wa tondjenda na ye. Jesus we mu tuna a tja: "Ami me vanga. Veruka." Tjimanga omurumendu wa veruka ongana. Eye wa ri nenyando nga tja karaera ovandu avehe. Panga randje, ourunde u ri otja ongana. U humburura ovandu kuna Ndjambi na kuna ovandu varwe. Nungwari tji matu ya ku Jesus, Eye me tu verukisa kourunde wetu auhe.

Otjiperendero 16: Omurumendu Ma Hitire Momututu

Markus 2:1-12

Eyuva rimwe Jesus iya hongo ovandu mondjuwo, ohunga na Ndjambi. Oruveze ndo ovarumendu vane iyave vanga okuyeta omurumendu omuremane ku Jesus, nungwari mena rowingi wovandu, kave sorere okuhita. Owo va topora ondovi momututu wondjuwo nave herurire po omuremane. Jesus wa muna ongamburiro yawo mu ye. Wa tja nai komuremane ngwi: "Muatje wandje, ozondjo zoye ove we ze isirwa." Ovarumendu tjiva vokereka ve mu pindikira tjinene tji va zuva omambo nga. Owo va tja: "Ngu ma sora okuisira ozondjo owani posi yaNdjambi porwe? " Owo kaave kambura kutja Jesus wa hindwa i Ndjambi. Jesus a tja: "Ami me tja nai kove: Sekama, toora oruara rwoye nu u yende koyoye." Mokamanga omurumendu wa veruka. Momuano mbwi Jesus otja raisa kovandu kutja wa hindwa i Ndjambi. Jesus u nouvara okuisira ozondjo, wina otje nouvara okuverukisa ovavere. Ete atuhe tu vanga okuveruka tji twa vere, nungwari ounandengu tjinene okuningira Jesus okutuisira ozondjo nokutupa otjiyandjewa tjomuinyo waaruhe.

Otjiperendero 17: Jesus Ma Verukisa Eke Romurumendu

Markus 3:1-5

Imba matu munu Jesus mondjuwo (Markus 3:1-5) yaNdjambi, wina ndji isanewa otja ondembeli. Ovanene vokereka (Ovafarisei nOvasanduke) wina opu vari mbo. Ra ri eyuva rapeke motjiveke Ovajuda mu ve rikotamena ku Ndjambi. Owo iyave tja omundu auhe ke na kusokuungura mu ro. Pa ri nomurumendu ngwa remanene eke. Ovajuda va kondja okutara kutja ve mune kutja Jesus ma verukisa omundu meyuva ndi poo indee. Jesus wa ri na ko na tja novandu nu ngamba wina u na ko na tja nawo. Ovandu mbo wokereka mbo ka va ri nao. Owo iyave vanga kutja Jesus ma katuke oveta yawo kutja ve sore okumuzepa. Jesus wa pura ovanane mba nai: "Ku kwa yandjerwa okwo ngwi okutjita ouwa mEsabata poo okwo ngwi okutjita ouvi, okuyama omundu poo okumuyandeka?" Ovanane vOvajuda kave mu zirire, mena rokutja omitima vyawo vya kukutire. Jesus opa tjera nai komundu: "Wonyonona eke roye!" Eye wa wonyonona eke re, navehe va muna kutja eke re ra veruka nu ra kara nomasa. Panga randje, ngatu rikotamene ku Ndjambi nu tu zuve ku ye,nungwari wina ngatu kare na ko na tja novandu varwe; tji tu hina kutjita nao omerikotameneno wetu maye kara nokuhinamaheero.

Otjiperendero 18: Jesus Ma Porisa Otjivepo

Markus 4:35-41

Motjiperendero hi matu munu mo Jesus puna ovahongewa ve mokawato poo okayaha. Owo va ri mondjira okukonda eo poo (omuronga) omunene. Tjimanga okwo kwa hinga otjiivepo otjizeu. Ozongazona ze ri veta mokawato/okaaha nga nga tji make vanga okutumba. Jesus wa sekama na vere ozombepo nozongazona: "Porimaneye mu tje nduu nyee!" Tjimanga ozongazona za pora. Jesus wa tja nai kovahongewa ve: "Mamu mumaparere tjike? Inga kamuya ninga ongamburiro are?" Ovahongewa va kumwa ave tja: "Hapo omundu ngwi owani ngu zuvirwa i otjivepo nozongazona?" Panga randje, matu tjiwa kutja Jesus oNdjambi nokutja u nouvara kombanda yovandu avehe, kommmbanda yozombepo na kombanda yovina avihe Eye mbya uta. Opu matu zu okutakama mu ye kutja me tu tjevere nokutja me tu pe ohange moruveze rwouzeu.

Otjiperendero 19: Omukazendu Motjimbumba

Markus 5:25-34

Mamu munu omukazendu mokati kotjimbumba? Eye wa verere omutjise wombindu (oruandara) nu omutjise mbwi wa honapara tjinene. Eye wa zuvire kutja Jesus u yenena okuverukisa ovandu. Eye we ripura nai ku ye omuini: "Nangarire tji mba tuna kombanda ye uriri me veruka." Eye wa ryama popezu na Jesus ngunda a ri motjimbumba tjovandu na tunu kombanda Ye. Ombindu ye ya yanda a i ha ziza neye tjimanga wa uta okurimuna kutja wa verukisiwa komutjise we. Jesus wa tjiwa kutja mu ye mwa zu omasa nga piti. Jesus wa kakurama na pura kutja: "Owani ngwa tunu kombanda yandje." Pona mbo pa ri ovandu ovengi mba kondorokere Jesus, nungwari Jesus wa tjiwa kutja pe notjina tji tja tjitwa ku ye. Omukazendu wa ryama popezu a uruma tjinene, a woro ozongoro komurungu waJesus ne mu serekarere ehungi re arihe. Jesus wa tja: "Muatje wandje, ongamburiro yoye ye ku vatere! Twende mohange nu u verukisiwe komutjise woye. " Ovandu avehe mouye mbwi, Jesus u tjiwa auhe wawo nu wa suvera ovandu mba. Eye wina we ku suvera. Ope zokuvanga kutja ovandu avehe na ove wina, ve ye ku ye nu ve kambure mu Ye. Embo raNdjambi ri tu honga kutja Jesus ngamba ma yenene okuverukisa ovandu mbe nongamburiro mu Ye.

Otjiperendero 20: Jesus Nomukazona Ngwa Koka

Markus 5:22-24, 5:35-46

Jesus wa ri mondjira okuyenda konganda yomurumendu wena Jairus. Jairus wa ri omurumendu omunandengu mokereka yOvajuda. Omukazona we wa verere tjinene. Eye wa kaisana Jesus okuyekumuverukisa, nu ngunda Jesus e hi ya vaza ponganda ye, omukazona we otja ta. Nungwari Jesus wa raera Jairus nai! "O tira, pandera mba pngamburiro." Ponganda yaJairus ovandu va uta okurira tjinene nokuura, nungwari Jesus we ve ramba mondjuwo. Jesus wa hitisa Jairus nomukazendu we novahongewa ve vetatu mondjuwo mu mwa ri omukazona ngwi. Jesus wa kambura omukazona peke na tja: "Kakazona, Ami me ku raera kutja penduka!" Eye wa penduka tjimanga na utu okuryanga mondjuwo. Jesus we ve raera kutja ve mu yetere otjina tji ma ri. Ii, Jesus u nomasa nandarire kombanda yondiro. Ovandu mbe kambura mu Ye nu mbe mu kongorera, kave sokutira ondiro.

Otjiperendero 21: Jesus Nomukazendu Wehi Rarwe

Markus 7:24-30

Eyuva rimwe kwe ya omukazendu wehi rarwe ku Jesus. Okanatje ke okakazona ka hitwa i yozombepo ozohakohoke. Eye we riheka ku Jesus tjinene kutja ma kapitise ozombepo nda momuatje we. Jesus we mu raera kutja Eye we era okuvatera Ovajuda rutenga. Tja vatere omundu wehi rarwe rutenga pe ri tjimuna okuyandja ovikurya kozombwa ngunda ovanatje ave hi ya rya. Jesus wa tja: "Rutenga ngatu kutise ovantje, orondu kakokuwa okutoora ovikurya vyovanatje nokuviyumbira kozombwa." Omukazendu we mu zira kutja: "Muhona nangarire oumbona wina u rya ovikurya ovanatje mbi va wisire kehi yotjiriro!" Jesus otje mu raera kutja: "Mena romambo woye ngu wa hungire ngo, nambano yaruka koyoye; ove mo kavaza Satan a piti momuatje woye." Omukazendu wa yaruka konganda na vaza ombepo ohakohoke a ya piti momuatje we. Jesus wa suvera ovandu vomihoko avihe nomahi ayehe nu u vanga okuvevatera. Jesus u vanga kutja tu takame mu Ye tjimuna omukazendu wehi rarwe ngwi. Jesus u nomasa okutukutura komauvi nokutupora komasa waSatan.

Otjiperendero 22: Jesus Nomurumendu Omboro Nu Ngwa Seta Eraka

Markus 7:31-37

Ovandu va yeta omurumendu ku Jesus. Eye okuza kongwatero wa ri omboro nu kaa yenene okuhungira nawa. Owo va ningira Jesus okutwako eke re komurumendu ngwi. Jesus wa toora omurumendu ngwi okumupitisa motjimbumba. Jesus wa ninikizira ominwe vye momatwi womurumendu na tjekere omate keraka re. Jesus tjazambo wa tara keyuru a tja: "Paturuka!" Tjimanga omurumendu wa uta okuzuva nokuhungira nawa. Ovandu va himwa ave tja: "Eye wa sora ovina avihe. Wa yandja okuzuva kozomboro, nokuhungira ku imba mba seta omaraka." Panga randje, ounandengu kutja tu zuve nawa otjina hi okuza membo raMuhona, orondu Ndjambi u hungira okuza mEmbo re. Tjimuna Jesus tja verukisa omatwi womurumendu ngwi kokutja a zuve neraka re kutja a hungire ku novandu; otji ma yenene okutuvatera kutja tu vange okuzuva kEmbo raNdjambi, kokutja tu tjiwe ombango yaNdjambi nomiinyo vyetu. Imbi u tjita nOmbepo Ye Ondjapuke ndji ungura momitima vyovandu. Tjimuna omboro ndji tji ya zuva, ete otji matu sokukazuvisa varwe ohunga na Jesus.

Otjiperendero 23: Jesus Ma Munisa Omupotu

Markus 8:22-26

Eyuva rimwe ovandu va yeta omurumendu omupotu ku Jesus. Owo va ningira kutja Jesus a verukise omurumendu ngwi. Jesus wa kambura omurumendu ngwi kokuwoko ne mu pitisa motjihuro.
Jesus wa tjekera omate we komeho womupotu, a yambeke omake we komurumendu ngwi, ne mu pura kutja: "Mo munu otjina?"
Omurumendu wa zira kutja: "Me munu ovandu, nungwari owo mave munika otja omiti mbi mavi kawondja." Jesus wa twako rukwao omake we komeho womurumendu. Omeho we otjiyapaturuka nu aye veruka nawa. Eye wa yenena okumuna ovina avihe ongondoroka na ye. Panga randje, Satan kavanga okutja tu tjiwe Jesus nokutja tu zuve Embo re nawa. Tji matu takama mu Jesus, me tu raisire ouatjiri we nawa okuza momaunguriro wOmbepo Ondjapuke. Matu sokukumba eyuva arihe na tu ningire Jesus kutja me tu vatere okuzuva Embo re.

Otjiperendero 24: Jesus Ma Verukisa Omuzandu Ngu Nombepo Ohakohoke

Markus 9:14-29

Eyuva rimwe omurumendu wa eta omuatje we omuzandu kovahongewa vaJesus. Omurumendu we ve ningira kutja ve pitise ombepo ohakohoke ndji ri momuatje we, nungwari owo kaave sora okuipitisa. Kombunda otje mu yeta ku Jesus. Ombepo ohakohoke tji ya muna Jesus, ya vanda omuzandona ngwi pehi na utu okupita etutu kotjinyo. Ihe yomuatje ngwi ka ri nongamburiro kutja Jesus ma yenene okuvevatera na tja ku Jesus: "Arikana tji mo sora, tu tjariparera nu u tu vatere. " Jesus wa zira: "Ove mo tja: "Tji mo sora." Ku ingwi ngu nongamburiro avihe mavi sora okutjitwa." Ihe yomuzandu wa zira: "Me kambura, arikana vatera ingwi okuhinangamburiro kwandje." "Jesus tja munine kutja otjimbumba tjovandu matji wongara, arire tja vere indji ombepo ohakohoke na tja: "Mbepo omboro nu ngu wa seta eraka, Ami me ku rakiza kutja u pite momuzandu, nu o ha roro okuhita mu ye rukwao!" Ombepo ohakohoke ya ravaera na i piti momuzandu. Omuzandu wa sewa a rara nyee, nu ovandu ovengi va tjere: "Wa koka." Nu Jesus we mu kambura peke ne mu sekamisa neye arire tja kurama kamuseka. Kombunda, ovahongewa ve tji va sewa aveerike puna Jesus, ve mu pura: "Okutjavi ete tji tu ha sorere okupitisa ombepo ohakohoke? Jesus wa zira: "Kape notjina tjarwe tji tja yenena okupitisa ombepo ohakohoke posi yongamburiro porwayo." Oruveze orusupi kombunda yanai, ovanane wOvajuda (vokereka) otji ve mu zepa. Nu ihi tja tjitwa indu tji pa tjitwa otjihimise otjinene pu avihe, i Jesus. Eye wa penduka mondiro. Eye wa taara Satan nondiro nga aruhe. Jesus u nomasa kombanda yozombepo noomikuru vyouye mbwi. Jesus u nomasa povina avihe. Orondu Jesus Eye Umwe, Ndjambi wOuatjiri.