Good News
Grandes lignes: Short Bible stories from Genesis through the ascension. How to become a follower of Jesus. 40 sections. It has a picture book to go along with the recording.
Numéro de texte: 395
Lieu: Gao
Thème: Sin and Satan (Temptation, Deliverance, Light/Darkness, Sin, disobedience, Satan (the devil)); Christ (Jesus, Our Substitute, Resurrection of Jesus, Son of God, Saviour of Sinful Men, Birth of Christ, Ascension, Sacrifice / Atonement, Death of Christ, Life of Christ); Eternal life (Salvation, Eternal / everlasting life, Broad & Narrow Ways); Character of God (Love of God, Holy Spirit, Grace and Mercy, Nature, character of God, Word of God (the Bible), Power of God / Jesus); Living as a Christian (Fruit of the Spirit, Prayer, petition, New Nature, Worship, Witnessing, Church, Christianity, Second Birth, Obedience, No other gods, idols, Peace with God, Leaving old way, begin new way, Forgiveness, Faith, trust, believe in Jesus, Peace (between men), Children of God, Family, relationships, Spiritual Life, Christian values); Life event (Death); Bible timeline (Creation, Law of God, End Time, Second Coming, Gospel, Good News, People of God); Problems (Materialism, Evil Spirits, demons, Fear, Problems, troubles, worries)
Audience: General
Objectif: Evangelism
Features: Monolog; Bible Stories; Extensive Scripture
Statut: Approved
Les scripts sont des directives de base pour la traduction et l'enregistrement dans d'autres langues. Ils doivent être adaptés si nécessaire afin de les rendre compréhensibles et pertinents pour chaque culture et langue différente. Certains termes et concepts utilisés peuvent nécessiter plus d'explications ou même être remplacés ou complètement omis.
Corps du texte
Totogale Kaheni (1): Fufunugna Nakahra
Ka fufunu gna nakahrae, God taigna lana teke auwe, ni romo tu'u eu lana teoki hna na te kofiza hia te hia. God gne kahe mae tufuni keli ni funei fotira goifata fateo re. Te kofiza goe ka totogale ululahu ae, God teke fufunuza maramagna gne nime lepozana magne nabae me fabaeza. Magne te fufunuza glaba mala funei za Bonigno.
Totogale Paluni (2): U goegoze gna God
U buka ka totogale igne te kiloza Buka Blahi. Ka buka igne lana te au goegoze gna God ni te lepo hari gita tati gna God ni nakahra gnae teuwe. God gne nahmara nanoni fateo re. Tati teke fa sopa au gita hui ka God, ni Buka Blahi igne lana teke ata fapulo gita ka God e. Tuturi fateo ire tutuani funu mei ka Buka Blahi teuigne.
Totogale Toluni (3): Vuavuha
God teke vuavuha ra goifata fateo re ka Goegoze gna. Goifata fateo te vuavuha Magne re ne fua keli. Magne ne vuavuhaza glose ni gukhu fateo are, kholo ni khou bio fateo are, ni me vuavuha ra na magne goifata fateo te mala kahra ka glama dire, sasa mala kahra ka kholo, memeha mala flalo ka mana ni bosu ba keha goifata te au ka glose. God ne fakofu ni fua hneahnega ra goifata fateo teke vuavuha taigna re.
Totogale Fatini (4): Adam ni Eve
Ke legudi ire God ne vuavuha za kahe nanoni ma'ane ni ga'ase te kiloza Adam ni Eve. Magne ne gulao noilagi mala koukofu ra goifata fateo teke vuavuha taigna re. Magne tufuni keli harira repa ni repa vevese balugna magne eu audi teke au ka sinabo Eden. God sakre harira repa mala namu ka gano fateo gna sinabo Eden ni sisi gna lana kahe gazu te kahra ka sinabo gne teke loloti harira re. Ka totogale pile meri goe kofira repa te huhuguza God te namu sisi teke loloti harira re. Repa la paluha hui, gna repa la huhugu ni chogara nodi fafaudu re ka God. Ka totogale pile matu, goe kofiza God te dia tagna ra ni brue fa jiflara repa ka sinabo Eden. Funu ka naga'e teugne te hage, nanoni fateore e gloku bio mala hiana au gano teuwe, deira fogra koba, kata tono, dufu gleleme, pa'apara teu are.
Totogale Glimani (5): Cain ni Abel
Adam ni Eve teure ne au palu tudi ma'ane nahna dire Cain ni Abel. Kahe naga'e Cain ne gogotu za Abel ne falemeza. God ne diatagna za Cain ne fa pa'aparaza, gna paluhagna re jateula teke eiza God harira Adam ni Eve tekeura. Tati graurabudi lanau Adam ni Eve teure me tati nanoni nakibo lanauwa. U paluha gne te fa sopa au gita tati ka God. Me tati gizada te pa'apara eigna paluhada re.
Totogale Namnoni (6): Vaka
Chuku, chuku finoga tela liu arira ni graurabu gna mae Adam tela fua vuraga. Nanoni teure lanau tela bio hage ka nakibo ni huhuguza teu God e. Paluha dire la fua hnihnigrana hui mala teke kelie, me God ne gaogato ne fa meiza kahe gnugru bio teke fapluluza nautoglu gne. Ni mae Noah lana te nahmaza ni leguza teula noa fagriure te lepo hariza magne teke e'ei kahe vaka bio. Ka vaka teugne God te fa kahrira Noah ni tugna re, ketogna ni ketodi tugnare tekeuwe. Noah gne tuturira koba noa fagriu God te kelire ka mavitu fateo re ka glamadi naga'e finoga gua teke funu loku gna magne vaka bio gne. Teuwe nanoni fateo re teo meke rodi fatutuaniza ni leguza eu noa fagriu magne (Noah) re. Hatimare teo meke nagura te hoi nakahra malani kahra nodi ka meigna gnugru bio gne teuwe.
Totogale Fituni (7): Gnugru Bio
Leguza noa fagriu God ie, Noah ne ata hage ka vakae sopa gna goifata te kahra te tautagu ka glose ba flalo ka mana. Noah ni khetognae, tolu tudi ma'ane re ni khetodire teure kafe sage ame bobotona God natana gna vakae harira re'e tabutua. Ame fa soruza na God nauha bi'oe me fodu khou gna ke pari glose me hage me fruni nautoglu gne. Nanoni teke huhugura la teo huila hna na te gatoza te mala fakahrira taidire. Nanoni fateo te au ke kosi gna vakae ne kafe leme fahui. Noah ne kahra, gna magne ne farogo, fatutuani ni legura neu noa fagiru God ie.
Totogale Fehuni (8): Abraham, Serah ni Isaac
Finoga, finoga tela liu ari ni graurabu gna mae Noah tela vuragaza vike fateo gne. Abraham lanau kahe mae te nahmaza ni leguza teu God. God ne na'a lepo ka Abraham te graurabu gna magne re kaina bruara ni nheta. Abraham ni Serah teure neke teo tudi ni repa fatutuaniza me au noa na'alepo God ie. Ka totogale igne tati te kofiza repa tela au kahe tudi meuba repa me nanoni naufa'a lui, nahnagnae Isaac. Abraham ni Isaac teure graurabu gna lana Jisas Kraes, mae teke meite fakahriza nautoglu gne.
Totogale Hniani (9): Moses ni Noa Vetula God
Graurabu gna Abraham te kiloza Israel gne ne bruara dulune rogoraga. Moses lanau kahe mae ka graurabu gna Abraham te fatutuani ni leguza teu noa fagriu God re. Kahe naga'e God ne lepoza Moses tei ka gukhu Saenae ne gulao tagna noa lepo khuru te mala fagriu ra nanoni re. Ka totogale igne te fatakleza Moses soru meigna ka gukhu Saenae balugna lepo khuru noa God te iini soru ka tina. God naguza nanoni fateore te leguza noa lepo khurure.
Totogale Salagi (10): Salei Lepo Khuru
Ire keha lepo khuru God teke gulao ka Moses re. Lepo khuru ire te fagriu gita tati mala nahma ni leguza eula tati kahe God te tutuani. Funu klia lahu ka totogale pile meri te kofiza tati mala tovi fa'afara ka mumuzu, dole ba khau gua are. Tati mala fa'afaraza lana kahe God tutuani. Ka keha totogale ae, tati kofiza kahe tabutua balu madi, dodi ni tudire eute kahe fa'afara faudu ka God. Nanoni fateore jame gato laoza kahe naga'e ka glama gna wiki te mala fa'afara nodi ka God. Keha totogale ae, goro suare legu kuru ni gato bohera eu dodi madire. Ka totogale parilahu ka pile meri, God te lepoza, tovi faleme nanoni. Kehae, tovi toilagi pedo. Totogale legu lahu, tovi chiko, ba mamagna ra nodi goifata keha nanoni re. God lepo hari gita tati mala legu fakeli ra noa lepo khuru re.
Totogale Salei Kaheni (11): Pa’apara Eigna Nakibo
Tifae mae hei te uthu ka puhi huhugu ra noa khuru God re, magne na fa'afara kahe lamb ka God. U lamb teugne te mala leme hariza magne. Lamb teugne falalase gna tugna God, I Lord Jisas Kraes. Jisas kaina mei ni fa'afaraza taigna ka God maladi nanoni fateo ka nautoglu gne. Magne lana "Thua God te mala ata koko nakibo gna nautoglu gne". Jisas taigna teke fa'afaraza gna nakiboda tati ka gazu fafata e. Fatutuani ka Jisas Kraes ni ruaruta nakibo mire. Figri famanaza nakibo malani God nate kokoni gita kobae.
Totogale Salei Paluni (12): Mae Fakahra Na’alepo
Gignoa igne tati na rogiza neuna kahra gna Jisas Kraes teuwe. Kahe fata tifa e God ne na'alepo te magne kaina fameiza mae Fakahrada. Ka totogale pile meri goe kofiza kahe Angel te funu klia temei ka ga'ase hnagevalu Mary. Mary gne nanoni kupi ni mala toilagi ka Joseph ameuza. Mae Angel ne lepo hariza, "noa Taruna Blahi God kaina mei ka goe mala lepo hari go te goe kaina briguza kahe sua, malani nahna gnae Jisas Tugna God". Te kofiza goe ka totogale pile hneta, Angel ne takle hariza lanau Joseph ka mifi. Mae Angel ne lepo euani, "Joseph, tovi hmau ta ataza Mary mala ketomu. Gne'e la brigu hui ka noilagi gna Taruna te Blahi noa God. U nahnagna sua gne kaina Jisas euza, gaogato gnae Fakahra. Magne kaina te fakahrira noa nanoni God ka nakibo dire. Joseph ne fa uveza God, ni magne teo meke turu balugna Mary au gile kahra suae.
Totogale Salei Toluni (13): Kahra gna Jisas
Joseph ni Mary teure ne tei lanau ka nakrapu bio Bethlehem. Dufu lao repa ka nau bio Bethlehem gne suga fateore la fodu hui ka nanoni teke kulu ulure. Repa ne hiro suga ne tei au ka suga mala nana'a gedi gano sip sip re. Ka boni gnae kahe Angel ne takle ka keha mae koukofu sip te doadofra ra totogei sip re ka gerigna nau bio Bethlehem. Angel gne ne lepo harira, "Jisas, la kahra Bethlehem". Totogei Angel re bane takle ne koze kilo uluza God. Mae koukofu sip re ne tei Bethlehem mala kofi nodi za mae Fakahrae.
Totogale Salei Fatuni (14): Jisas Jateula Kahe Mae Velepuhi
Totogale ka pile meri tati kofiza Jisas tela dufiza salei palu finoga funu kahra gna. Magne tuturiza God ka mae velepuhi ni funei uludi teu Israel re mae funei ulu teure ne farogo ni guaguhna neu ka magne. Ni hatimare ne fua vere nodi ka glalase bio God te gulao tagnae. Totogale ka pile matu te fatakleza Jisas tela mae bio hui ni fagriu ra mavitu re gna God. Keha nanoni te fatutuani ra noa fagriu re ne leguza magne. Ni nanoni te teo meke fatutuani re ne kekepileza magne. God naguza te fatutuani za ni leguza eu tati Jisas.
Totogale Salei Glimani (15): Kofu Boboi Teke Eiza Jisas
Ka totogale ire te fatakleza noilagi bio Jisas teke eira keha kofu boboi re. Ka pile meri, Jisas ne haboza mae te kahra doa, teke kokofu. Totogale hoteni te fatakleza Jisas teke fakahra fapuloza sua tekela leme hui ni dogna magna te kofu laoza te aue. Legu lahu gnae, tati kofiza Jisas te zaoza'o ke klia kho'u. Magne legu teira mae noa khuru teke kulu sage te tei ka botie. Lord Jisas gne eira kofu boboi chuku ire mala kofu laseza tati te magne tufuni tugna God. Jisas tanomanaza te magne tufuni tugna God. Jisas tanomanaza te togo gita lanau tati, ka noilagi gna noa Taruna te Blahi.
Totogale Salei Namnoni (16): Jisas ne Pa’apara
Gloku chuku te keli teke eira Jisas re ne keli tadi mavitu re ne legu laoza. Jisas nahma fakeli ra hei te hei te fogra ni fagriu harira nakahra gna God re. Magne mei mala fakahri ra hei teke iho hui ni nanoni nakhibo teure. Meuba nauwa mae te gnognoro re dia hariza aula Jisas kate lepoza magne te hatimare mae kakoa teuwe. Mae funeidi nanoni teu ire ne gogotuza Jisas. Hatimare teo meke fatutuani za te Jisas gne Tugna God. Hatimare sakiza Jisas, lepo muamugna za magne ni aniza eu magne. Hatimare ne fa toti lao pipiri phau kaukaru ka paugnae, michuza ni fa maema'e nodiza, ni Jisas teo meke habo fapulo tadi. Gna magne laseza igne au nate dieza te au mae te gnognoro re aniza ni falemeza teuwe. Jisas mei mala lemejateu fa'afara ka God te mala ata hageza gleme pa'apara di nakhibo di nanoni fateo re.
Totogale Salei Fituni (17): Tupijuru gna Jisas
Mae Solodia re ne tupijuru za Jisas ka gazu fafatae. Me dokha na glose me fa jokra hage me faseseiza na aume leme magne. Palu mae te lase faleme nanoni re ne fa seseira lanau ka palu pile gna magne re. Ae au puhi teke eira te mei hatimare ka mae te faleme nanonire tifae. Ni Jisas gne neke teo meke eiza ki hna na te dia. Magne sakreza taigna mala leme hnoira nakibodi nanoni re ni tati taida na me au jame re mala leme eigna nakibo dare. Eu teuwe, Jisas gne na teke ata hagera gleme teke malada tati tekeure. Jame ruaruta ra tati nakibo dare ni tufuni figri famanara meuwe, God kaina ata kokora nakiboda tatire. Fatutuani lana ka Lord Jisas Kraes te mala atiza na kahrae.
Totogale Salei Fehuni (18): Kegra Fapulo
Mae noa naoka Jisas re jau ne falemeza huila magne taidi, euni teugne teo kohlo lana. Kelegu leme gna Jisas ka gazu fafatae, mae keragna magne re ne ata za tonogna e ne nai laoza ka glumae. Me pilina tina bioe me boboto. Liu hui palu naga'e ni ka fatolugna naga'e Jisas neke kahra fapulo ka gleme. Keha ga'ase ne boiboni tei sigoza glumae, eu teuwe tina bio teke bobotoza glumae la pili kokoza hui ni tonogna Jisas la teo za hui ka glumae. Phalu Angel teke kofira retolu re ne lepo harira te Jisas kela kegra fapulo hui, "Magne teoza hui ani". Ka teke kegra fapulo gna ka gleme, Jisas fatutuaniza te magne tufuni God. Jisas kahra au lana gignoa igne. Magne tufuni ke nheta gnani Satan ni u gleme.
Totogale Salei Hniani (19): Thomas ne Fatutuani
Kelegu kegra fapulo gna Jisas ka gleme, mae noa khuru magne te chukure neke kofiza, vevese ni namu eu balugna. Kahe mae lana ka hatimare teke teo meke fatutuaniza te Jisas kela kegra fapulo teuwe. Mae Thomas ne lepo euani, "Jame la kofira rei nafrenadi nila ka kamegna ni habo kamegu, rei teo meke fatutuani". Kofu laoza tati ka totogale ae, Jisas te fatakle nafrena gnare ka Thomas. Thomas ne fatutuani nime turunu nu soru ke ulugna Jisas ne lepo euani "Nogu Lord ni nogu God". Jisas ne lepo euani, "Keli nodi hei te teome kofi gau rei ni fatutuani".
Totogale Varadaki (20): Hagegna Klia
Palututu nagae kelegu kegra fapulogna Jisas ne takle ka nanoni te chuku re. Nanoni re ne kofiza te Jisas kela kahra fapulo. Te dufu mei ka nagae igne Jisas teke pulo ka Magna klia. Magne la loku fahuira gloku mala mei eira magne tekeure. Jisas neke lepora mae noa khuru re mala tuturi harira sopa gna nanoni hia te hia u grorogo te keli gne. Mae khuru re ne kofu leuleguza Jisas funu gae kokoza magne nautoglu gne te hage dufu klia. Palu Angel re ne takle ni lepo harira mae khuru re te kahe naga'e Jisas kaina ke soru mei funu klia jateula teke hage gnae euwa. Ame dufu meina naga'e teugne Jisas au lana au klia. Magne kaikaliti hnimoto maladi nanoni fateo te fatutuani ni leguza teu magne re. Goe ba, gignaro agno? Goe na fatutuani ni leguza eu nau Jisas? Goe na kaikaliti mala fadeidei ka magne?
Totogale Varadaki Kaheni (21): Gazu Fafata Te Teo Heina Tagna
Ne fahneuwa ame leme na Jisas ka Gazu Fafatae? Jisas ne leme ka Gazu Fafatae mala fakahri ra nanoni te au pa'apara ka nakibo. Jisas taigna teoki nakibo gna, ni magne mala ata kokora nakibo te fasopa au gita tati ka God. U gazu fafata gne mala gato fapuloza tati te Jisas gne teoki nakibo gna, tonagna, mae blahi ni ga'e ni Lamb noa God. Magne teke fa'afaraza gnada tati. Te fatutuaniza tati Jisas ni figri famanaza ka nakibo dare. Jisas lana teke ata fapulo gita tati te tugna God re. Totogale ire au na te togo gita tati te mala laseza gaogato gnae ame fatutuani na.
Totogale Varadaki Paluni (22): U Palu Nagliu
Jisas fagriu gita tati gnadi palu nagliu. Nanoni fateo re leguza nagliu te behra te batu fateira ka gleme. Tati fateo teke kahra ka nakibo nakasa Adam. Jisas te lepozae tati jame ruma hage ka nagliu te gobro ni kolho teu te dufu ka God klia. Jame kahe mae ka nakahra teugne te fatutuani ka Jisas te legu laozae, magne kaina ata u nakahra te fei au. Magne ne jifla ka nagliu te behra nike leguza nagliu te gobroe me kohlo me dufu klia. Teo kahe faefate gna nakibo ka mae te leguza nagliu te gobro teugne.
Jame gaogato goe me leguza Jisas meuwe, goe tanomana te vevese ka God. Jateula igne, "God rei lepo fajifla ka goe te rei nanoni nakibo. Rei fatutuaniza Jisas te leme ka gazu fafatae gnadi nakhibogu rei. Ata koko ni fagaga'e gau ni ati gau mala kahe mae tumu ka tabutua. Rei nagu gau te au balumu klia, lepo fakeligo God".
Totogale Varadaki Toluni (23): Tara tugna God
Ka totogale igne, goe kofiza Jisas te sakre meira ka taigna nanoni fateo ka vike, moumolu ba goegoze te hui re. Hatimare fatutuaniza hula magneni la kafe tugna huila God. Hatimare la leguza huila nagliu te gobro te kohlo te dufu ka God. U tara tugna God re jateula kahe tabutua te au faudu huila ka Lord Jisas.
Totogale Varadaki Fatuni (24): Kahra Fapulo
Kahe fata ka bonigno, kahe mae velepuhi gna kiloau, nahnagnae Nicodimas, ne mei ka Jisas mala guhna noaza gna God gne. Jisas ne lepo eu ani ka magne, ihei ka nanoni fate'o te naguza te mala kahe tabutua ka God teuwe te naguza nakahra valu. Mala jateula teke kahra fapulo. Tati teoki noda noilagi te mala hohoi gita taida. U noa Taruna Blahi God lana te tufa hari gita u nakahra te valu ni kate fatutuani ni leguza teula tati Jisas. Tati mala ke nanoni valu, noa nanoni God re.
Totogale Varadaki Glimani (25): Mei gna Taruna Blahi
Ire u noa mae khuru Jisas re. Ame ke hage na Jisas klia teuwe, magne neke na'alepo kaina fameiza noa Taruna te Blahi. Salei naga'e kelegu hage gna Jisas klia, mae khuru re neke gonei nodi taidi. Teo meke rauga ke legugna teke na'alepo Jisas, Taruna Blahi noa God ne soru mei ka hatimare ne fakakasa sopa gna goegoze hari ra malani tuturiza hatimare ka nanoni re u puhi te keli teke eira God re. U Taruna Blahi noa God ne ruma hage ka nanoni tutuani te fatutuani ni gulao tadi noilagi te mala nahmaza, leguza teu Jisas.
Totogale Varadaki Namnoni (26): Zaoza’o ka Nabae
Ame fatutuani na nanoni ka Jisas teuwe, magne neke jateula mae teke zaoza'o ka naromo nekeuwa. Magne tututei ni uthu ka nakibo, gna magne teoza nabae te mala batuza. Neke fatutuaniza neu tati Lord Jisas, tati ke jateula kahe mae teke zaoza'o ka nabrau te kohlo ka naga'e te bae nadafi e. Jisas teke lepozae, I rei nabae gna nautoglu gne. Mae i hei te legu gau rei e, magne kaina teo meke zaoza'o kate romo. God tufaza noa Taruna Blahi mala fagriu ra nanoni fateo te fatutuaniza nakahra gnare.
Totogale Varadaki Fituni (27): Kahe Mae Valu
Mae te fatutuani ka Jisas ie jateula kahe mae valu te leguza noa goegoze God. Magne te mala lepo fakeliza, gna God te ata koko nakibo gnare. Mae te fatutuani ka Jisas teo meke ome, mamagra ba chiko ba fa'afara ka mumuzu ba keha God ni. U Taruna Blahi e kaina tufaza mae hei te fatutuaniza noilagi te mala figri fa manara magne puhi gnognoro ni mala legura magne puhi te kelire.
Totogale Varadaki Fehuni (28): Tabutua Kiloau
Kofiza tabutua igne te leguza nakahra gna God ie. Ma'ane igne ne fua nahma za ketognae ni ga'ase gne fua nahma za ni broabronaza ketogna ma'ane ie. Ae au goegoze gna God te mala leguzae. Repa toilagi fari to'otogo, fahneahnegaza keha nanoni e eu koba ni fagriu ra tudire mala nahma za God ni leguza zu noa goegoze re. U tabutua kiloau e tarai ni loku faudu eu koba ka God.
Totogale Varadaki Hniani (29): Nahmara Nou Naoka re
Jisas fagriura mae noa khuru re mala nahma ra hei te hei meuba me mae nodi naoka re. Tati mala togora hei te susuanogo, meuba me maedi ka keha vike ni. Jisas neke tuturiza kahe mae teke tei ka kahe nau bio. Mae khana re ne lokiza ni aniza neu magne. Mae gna ka keha vike ni te ke mei kofu deiza magne te fodu dadara ni hunu teu tono gnae. Magne ne fakahriza, gna mae teugne ofoza huila hei nate togozae eu hui lana. Mae te fakahriza magne igne teo meke toreza fofoli e. Mae Jisas te lepozae tati eira lanau puhi te keli re jateu lanau igne eu ka nakahra dare.
Totogale Tolufuluni (30): Jisas Lana te Tufuni Noilagi
Mae ire fahage nitu ka mumuzu ni paupamu. Hatimare neke kulu fatutuani ka tu ire ame ruma hagena ka Kiloau. Ni mae Kiloau te fatutuani re mala ata koko goifata te chuku te noa Satan ba taruna te di'a e, ka mumuzu ni paupamu teure. Tati hei te fatutuani, mala teo meke legura noa gloku Satan re. Toreza lana God mala togo gita koba magne.
Totogale Tolufuluni Kaheni (31): Brue Fajifla Taruna te Blahi
Ka totogale igne, tati kofiza mae te sufaza taruna te di'a re, keliba ne soliza hatimare ka pruki ba cheni, ire teo meke maku za magne gna naitu di'a te deiza magne re fua hneta lui. Jisas ne kuri ra naitu te di'a re ne jifla kokoza magne ni naitu re ne jifla ne tei kokoza. Kelegu gna igne, magne neke gaota nime tei na me lepora keha keragnare puhi teke eiza Jisas ka magne re. Jisas au noa noilagi ke hnetagna ni naitu satan ni u naitu teure neke leguza Jisas.
Me fa fanei nei go la naitu tore ra keha mae te fatutuani are mala tarai balumu. Toreza Lord Jisas Kraes mae te tufuni au noilagi mala brue fa mana ra naitu ne. Me nahmiza ni leguza meu tati Jisas ie, magne kaina au baluda tati. Noa noilagi magne re kaina bari foti gita ni teoki hna na te mala fa didia ra nakahra dare.
Totogale Tolufuluni Paluni (32): Fa Nei Nei
Ka totogale igne tati kofiza kahe mae te fatutuani te fa heta mei auaue tagna mala tovi leguza magne Jisas. Satan gne naguza lui te gato ihoza tati God ni mala gatoza koba lana tati, nanugra ni pohe, viri, kou bia ba puhi te di'a are. Goifata teure te mala fa hneahnega gita tatire eu mae Satan ni teure muamugna la magne mala faiho gitana tati fa didi'a gita eu kohlo lana. Ni mae fatutuanie magne kaina magri fotira me au lana puhi fa au'au gne kate kofu laoza teu magne Jisas ni legu laoza teuwe.
Totogale Tolufuluni Toluni (33): Me Kibo Tati Meuwe
Jisas teke lepoza tuturi igne: "Kahe mae hnagevalu ne tei kokoza naugnae. Magne ne tei fatifa ni eira puhi te di'a te chuke are. Magne au ka ketodi keha mae are, koko fa hui noa nanugra teke tufa hariza magnae ka puhi te au mei nakibo tadi re. Ke legugna teke koko fa hui magne noa nanugra re, ne dufu mei u behu ni magne ne kuma ni rofo neuwa. Magne ne fua dia gnagnafa ka nakibo teke eira taigna re ni gaogato meke pulo ka magnae mala kokoni fapuloza. Mae magnae tufuni nahmaza fabi'o, neke ata fapuloza". U tuturi igne lepo harigita te mala ne uthu na tati ni tati ke tufuni dia gnagnafa gna nakibo da re ke, figri famana ra. Gna God gne tufuni nahma gita tati ni magne tanomana aute ata koko nakibo dare ni ke ata fapulo gita ka taigna.
Totogale Tolufuluni Fatini (34): Gleleme
I ma'ane ni ga'ase teu ire ne kofu dia gnagnafa di gna kahe mae keradi ne fogra fabioza. Hna te mala eizae noa nanoni God re me fograe? Hatimare tanomana te tarai ka God, ni fatutuaniza eu tewe magne kaina eiza hna te tufuni kelie. God tanomanaza te fakekeliza mae te fogra gne magne tanomanaza te fa huiza mae te fogra gne me naguza magne ie, ba togoza mala hiro deiza magne popoji tokagna mala te fa gaotaza fogra teugne. God nahma gita tati fateo ni sagelegura eu goifata fateo te mala dufira tugna re. God bari fotira nanoni te fatutuani ka satan, malani teo meke hmauza tati magne teuwe. Jisas au baluda koba mala gumei hari gita keli pari ie, kate au fadia di'a tati re.
Totogale Tolufuluni Glimani (35): Gleme
Tati fateo laseza te kahe naga'e tati kaina leme. Ni kaina fahneu eu tati? Ka gne Buka Blahi God te lepozae, mae fatutuani te leme ye, taruna gnae kaina au balugna Lord Jisas Kraes. Keragura, tovi kegra ulugo dia gnagnafae. Tati tovi hmauza gleme gna God nahma gita tati ni fakahri gita ka nakibo. Mae te teoki nodi fatutuani ka God re u gaogato faulu te keli ire e teo kelegu gleme. Hatimare kaina tei au ka hnimoto te au pa'apara. Ba, kelegu gleme mue goe kaina tei au ke hia?
Totogale Tolufuluni Namnoni (36): U Tonogna Kraes
Sopa gna hnimoto ka tonoda tati gne e au noa gloku te mala eiza ka tono e. U natata mala kokofu, u khuli mala rorogo, ni u nafloflo mala vevese ni namu teuwe. Hnimoto fateo ka tonoe mala loku faudu. Te frena ba fogra kahe hnimoto gna tonoe, u tono fateo e kaina dia gnagnafa gna. God te lepozae, mae fatutuanire sopagna hnimoto ka kahe tono te kiloza u kiloau. Jisas taigna te phau ka tono. God gulao harira hei te fatutuani sopa gna noa gloku, lepo naba jateula: mae te tuturi blahi, mae te fagriu koze, mae te fagriu ka school, mae te loku ka tobi ba gahu gano. Sopa gna noku ire mala loku faudu hariza Lord Jisas, mala togoza tono fateo e ke hneta. Mae fatutuani fateo re, te mala fari nahma, ni loku faudu, kaina euni au pa'apara tono gna Kraes.
Totogale Tolufuluni Fituni (37): Krapu Faudu Mala Tarai
Mae Kiloau fateo jame mala fadeidei (krapu) koba mala fa'afara ka God. Tati mala lasera goegoze gna God ka Buka Blahi ka koze ni Tarai. Tati jame gulao keha noda nahma ka gloku noa God re. God lepo gita hui lana te tati mala gato fapulo za gleme gna Lord Jisas. Ka igne, tati te kofira noa nanoni God te fatutuani re te tuatufa gano (bred) ni kho'u. U bred gne malagatoza tati tonogna Jisas te pipile (ka gazu fafata) mala da tati. U kho'u gne mala gatoza tati dadara gna magne teke toatofa mala fakahri gita tati ka nakibo.
Totogale Tolufuluni Fehuni (38): Jisas Kaina Ke Pulo Mei
Kahe naga'e Lord Jisas kaina ke pulo mei funu klia jateula teke lepoza hui taigna. Magne kaina ke pulo me mala atira mae fateo te fatutuani ka God tela leme hui re. Jisas kaina ke fakegra fapulo ra noa nanoni God tekela leme hui re. U beku dire kaina nagou. Noa nanoni God te kahra na te aure kaina tei baludi. Tati fateo kaina deiza Lord Jisas i klia ni au balugna magne tifa e tifa. Mae te teo meke fatutuani re kaina te au fapulo te mala deiza faefate noa God ie. Tati iho nodaza au kaina ke pulo mei gna Jisas ni tati jame kulu tarabana ni ofo na me'au. Goe la tarabana nou hui au mala fadei dei ka Lord Jisas meke pulo meila magne gignoa igne?
Totogale Tolufuluni Hniani (39): Ure Ganogna
Jateula gazu sisi ka totogale igne te ure gano gna, kahe mae fatutuani te ure sisi taruna. Jisas te lepozae, "Rei u gazue, goe u grata gnae. Te kotu goe ka rei ni rei ka goe teuwe goe kaina chuku sisimu". Taruna Blahi noa God kahra ni loku eu ke hnuada tati mala jifla mei u nahma, hneanega, parikeli, aufalegu, fafaudu, nakeli, nailifatutuani au famu'u, fakale gita taida eu ka nakahradare. Ne teo meke urena grata gna gazue ni grata teu ae kaina rave koko lana. Grata teu are kaina leme ni gahu ka kha'agi. Mae noa fatutuani Jisas re mala ure sisi chuku, igne au falalase gna God Mada Kliae.
Totogale Palututu (40): Mae Farogo
Jisas lepora mae farogo fateo re mala tei tuturiza ka nanoni re u grorogo te keli mala fakahri ra ka nakibo ni gleme teure. U totogale igne te fatakleza hei te fatutuani ni leguza Jisas me lepora keha nanoni re eigna magne teuwe. Noa Taruna Blahi God kaina te togo gita tati mala tuturiza kraes. Ka buka totogale igne goe tanomana te fagriu ra kehare ka hna tela rogira ni lasera teure.