unfoldingWord 21 - TeꞌAlataꞌala Nojanjia TeMesias
Script Number: 1221
Language: Tajio
Audience: General
Genre: Bible Stories & Teac
Purpose: Evangelism; Teaching
Bible Quotation: Paraphrase
Status: Approved
Scripts are basic guidelines for translation and recording into other languages. They should be adapted as necessary to make them understandable and relevant for each different culture and language. Some terms and concepts used may need more explanation or even be replaced or omitted completely.
Script Text
Lamai tepamulaongnya, teꞌAlataꞌala norancanaa monuju teMesias, tepuang seende-endenya sanu jinanjia nuꞌAlataꞌala. Tejanji sanu pabibia sima teMesias sanu majaok vineena eisiꞌAdam ane eisiHawa. TeꞌAlataꞌala nojanjia tebija niHawa kana nopoguungaa sanu kana mopoꞌorua tevaꞌi nusaa. Tesaa sanu nongakal eisiHawa heꞌua tepuang nuseetan. Tejanji heꞌua obatuanya teMesias kana mondaagi tutuu tepuang nuseetan.
TeꞌAlataꞌala nojanjia eisiꞌAbraham jojoo tetoo eijuniaa kana nobarakai malabat siia. Eini kana majari watu teMesias majaok vavaliimai. Siia kana mombee tejalang ponyalamata eijojoo tesuku eijuniaa.
TeꞌAlataꞌala nojanjia eisiMusa, Siia kana nonuju sotoo tenabi ntaninya sima siMusa. Eini tejanji ntaninya sima teMesias sanu kana majaok.
TeꞌAlataꞌala nojanjia eisiDaud sotoo lamai tebija niDaud mboto kana momarenta eibabok tetoo-too nuꞌAlataꞌala seende-endenya. Tebatuanya teMesias heꞌua tebija niDaud mboto.
SiNabi Yeremia nonjarita tejanji nuAlataꞌala eitoo-too-Nya. TeAlataꞌala nojanjia Siia kana mogutu tepejanjiong sanu vuou, tapi jio sima tepejanjiong concoono teꞌIsrael eiBuut nuSinai. Eilalong tepejanjiong sanu vuou heꞌua, teꞌAlataꞌala kana monulisa teparenta-parenta-Nya eilalong nuambok nutoo-too, sanu momarcaya eiꞌAlataꞌala eiꞌalaenya mboto, siira kana majari tetoo-too-Nya, ane teꞌAlataꞌala kana mongampuni tedosa-dosa niira. TeMesias kana mompamula tepejanjiong sanu vuou.
Tenabi-nabi nuꞌAlataꞌala valii nonjarita teMesias sanu kana majaok heꞌua sotoo tenabi, teꞌimam ane tepuang. Sotoo tenabi heꞌua mopoꞌinepea tejarita nuꞌAlataꞌala lamai heꞌua monjaritaa tejarita nuꞌAlataꞌala eitoo-too. TeMesias sanu majaok heꞌua, tenabi sanu tututuu.
Teꞌimam-imam nuꞌIsrael nombee tepombee eiꞌAlataꞌala untuk tetoo-too sima tepombolos nuhukuman tedosa-dosa niira. Teꞌimam-imam valii nonggane eiꞌAlataꞌala untuk tetoo-too. TeMesias sanu majaok kana majari teꞌImam sanu Mooge. Siia jio odosa ane kana mombee teꞌalaenya sima tepombee sanu tututuu eiꞌAlataꞌala ane mombolos tedosa numanusia.
Sotoo tepuang heꞌua tetoo sanu momarenta tepomarenta ane mongadili tetoo-too. TeMesias sanu majaok kana majari tepuang sanu tutuu ane mongodung eitahta niDaud tesiopunya. Siia kana monguasai eijojoo tejuniaa seende-endenya, mongadili mombosi ane kalepu momile sanu tutuu.
Tenabi-nabi nuꞌAlataꞌala noramala mabari tegauk sima teMesias. SiNabi Maleakhi noramala sotoo tenabi sanu mombosi kana majaok jijiompo teMesias. SiNabi Yesaya noramala teMesias kana majaok ane nopoguungaa lamai sotoo terandaa. SiNabi Mikha noramala Siia kana nopoguungaa eiKota nuBetlehem.
SiNabi Yesaya noramala teMesias kana momoia eiGalilea, mopaꞌadandalan tetoo-too sanu moondong tutuu, mokarevaa tetoo-too sanu tinaani maala nopeꞌebebas, ane molapasa tetoo-too eilalong nupanjara. Siia valii noramala teMesias kana mepeꞌeondok jojoo nengangaya tepees, sima nobongol, nobuta, nobobo, atau noluntoy.
SiNabi Yesaya valii noramala teMesias kana nopobaluk ane noꞌengkelesi maampo jio osala. Tenabi-nabi ntaninya noramala tetoo-too sanu momate teMesias nongundi untuk maꞌaala tepakean-Nya ane Siia kana noꞌajaati sotoo tetagu-Nya. SiNabi Sakharia noramala tetagu heꞌua kana nobayari tolumpulumboꞌa teperak untuk monjaati teMesias.
Tenabi-nabi valii nonjaritaa sima iamaꞌo teMesias kana maate. SiNabi Yesaya noramala teMesias kana nopenyuui, nojajaati, notenggel ane nobouli. Lamai heꞌua Siia kana notavala, ane Siia kana maate masesa ane mepees tutuu, maampo Siia jio nonggauka tesala.
Tenabi-nabi nonjaritaa valii teMesias kana tututuu, jio umai odosa. Siia maate antau monarima tehukuman lamai tedosa-dosa nutoo-too ntaninya. Tehukuman heꞌua kana majari teꞌombombosi nuꞌAlataꞌala eimanusia. Karna heꞌua, teꞌAlataꞌala monyadiaa teMesias sima tepombee untuk tedosa numanusia.
Tenabi-nabi noramala teMesias kana maate ane teꞌAlataꞌala kana metuvua Siia lamai teꞌamateong. Karna teꞌamateong ane teꞌotutuvuonye nuMesias, teꞌAlataꞌala kana monouka terancana monyalamata tetoo-too odosa ane mompamula tepejanjiong sanu vuou.
TeꞌAlataꞌala nonujua einabi-nabi mabari tegauk sima teMesias, tapi teMesias jiompo majaok eiwatu tenabi-nabi heꞌua. Nelabi lamai apagatusntoung touk sanu iramala sanu ponouꞌong, eiwatunya sanu mapaas teꞌAlataꞌala nonuju teMesias majaok eijuniaa.