unfoldingWord 20 - Khedai Dia Aru Wapas Ahija-a
Outline: 2 Kings 17; 24-25; 2 Chronicles 36; Ezra 1-10; Nehemiah 1-13
Script Number: 1220
Language: Nagamese
Audience: General
Purpose: Evangelism; Teaching
Features: Bible Stories; Paraphrase Scripture
Status: Approved
Scripts are basic guidelines for translation and recording into other languages. They should be adapted as necessary to make them understandable and relevant for each different culture and language. Some terms and concepts used may need more explanation or even be replaced or omitted completely.
Script Text
Israel aru Judah laga rajyo duita bi Isor logote bisi pap kurise. Taikhan Isor logote Sinai pahar te niom banaikena thaka bhangaidise. Aru Isor he bar-bar taikhan logote bhaubadikhan pathaise aru Isor logote wapas ahikena taike puja kuribole nimite matise, hoilebi taikhan itu kotha manianai.
Itu nimite Isor pora utu duita rajyoke taikhan laga dushman pora khotom kuribole dise. Itu homoete, Assyria bisi dangor aru takot thaka desh hoi jaise. Hoilebi taikhan dusra desh ke bisi digdar kuri thakise. Taikhan ahikena Israel laga rajyoke bhangaikena nuksan kuridise. Aru taikhan Israel laga manukhan ke moraidise aru samankhan sob loijaise aru ta-te jui-lagaidikena pora joliadise aru bisi nuksan kuridise.
Assyria manukhan pora Israel manu laga jiman sorkari-sahab, bisi dhuni thaka aru junkhan bhal mistiri, sona-chandi aru loha-kam kuri thakise, taikhan sobke dhurikena loijaise. Khali sob pora bisi gorib manukhan ke he Jerusalem te charidise.
Tetia Assyria laga manukhan pora bidesi manukhan ke loikena ahise aru taikhan laga city banabole dise. Taikhan Israel manukhan logote shadi kurise. Aru taikhan laga khandankhan Samaritan matise.
Judah laga rajyo te thakakhan dikhise kineka Isor pora Israel rajyo te thakakhan kun tailaga kotha biswas nakorikena aru kotha namanikena thakise utukhan ke tai kineka sajai dise. Hoilebi taikhan murti ke pujakhan kurithakise, aru Canaan manukhan laga isorkhan ke bi puja korithakise Isor pora taikhan ke hosiar kurilobi koikena tailaga bhaubadikhan ke pathaise, hoilebi taikhan kotha mananai.
Assyria pora Israel ke pora luksan kuridia ek sou sal pichete, Isor pora Nebuchadnezzar, jun he Babylon laga raja asile, tai ke Judah logote lorai kuribole pathaise. Babylon bisi takot thaka desh asile. Itu nimite Judah laga raja pora Babylon laga raja ke hodae sal bisi poisakhan dibole maniloise.
Hoilebi olop sal pichete Judah laga raja pora Babylon logote lorai korise. Itu nimite Babylon laga manukhan ta-te wapas ahise aru Judah logote lorai kurise. Taikhan Jerusalem ke dhuriloise, aru Mondir bhangaidise aru jiman Mondir laga dhon joma kurikena thakise utukhan sob loijaise.
Aru tai ineka kura nimite taike sajai dibole, Nebuchadnazzer laga sipoikhan jaikena Judah laga raja laga chokorakhan ke tailaga usorte moraidise aru raja laga suku-bia kuridise. Itu pichete taike koidi-ghor te rakhibole aru ta-te he moribole nimite Babylon te loi jaise.
Nebuchadnazzer aru tai laga sipoikhan pora gao-bhal thakamanukhan sob ke Babylon te loijaise, khali bisi gorinkhan ke he ta-te kheti kamkhan kuribole charidise. Itu homoe jetia Isor laga manukhan ke kosom-laga-desh pora khetaidise, ituke Khetai Dia ineka matise.
Isor pora tailaga manukhan ke taikhan pap kura nimite sajai dise aru khetai dise, hoilebi Isor taikhan ke aru tai kosom diakhan pahora nai. Tailaga manukhan uporte Isor sai thakise aru tai laga bhao-badikhan pathaikena taikhan logote kotha koi thakise. Aru tai kosom dise, sattar sal pichete, taikhan arubi wapas kosom-laga-desh te ahibo koise.
Sattar-sal par hoa pichete, Persia laga raja Cyrus pora Babylon desh logote lorai korikena jitise. Itu pichete Persia laga samrajya pora bisi sal raj kurise. Israel manukhan ke Jehudi ineka mati jaise. Itu manukhan Babylon te bisi sal pora thakikena ahise. Aru taikhan majote bisi bura hoija manu kunbakhan he Judah ke napahorikena thakise.
Persian manukhan bisi takot thakise hoilebi taekhan pora dhurikena aru loikena aha dusra manukhan ke bisi morom kurithakise. Cyrus jitia Persia laga raja hoise, tae ekta adesh dise aru koise Jew manukhan Judah te wapas jabole mon thakakhan jabole paribo koise. Aru taikhan ke Mondir banabole poisakhan bi dise. Itu nimite sattar sal pichete, Jew manu kunbakhan Jerusalem te ahise aru Judah punchise.
Taikhan jetia Jerusalem te wapas ahise, taikhan laga Mondir banaise aru pathor laga bera banaise. Persian manukhan tetia tok taikhan laga uporte raj kurithakise, hoilebi itia taikhan wapas desh te jaikena Mondir te pujakhan kuribo paise.