Tara, Puratena & Hupa Embo 5 Okurwa Mena Randjambi

Tara, Puratena & Hupa Embo 5 Okurwa Mena Randjambi

Outline: Elisha, Daniel, Jonah, Nehemiah, Esther. 24 sections. It has a picture book to go along with the recording.

Script Number: 422

Language: Herero

Theme: Sin and Satan (Deliverance, Sin, disobedience); Christ (Life of Christ, Authority); Character of God (Word of God (the Bible)); Living as a Christian (Worship, Obedience, No other gods, idols, Victory, Faith, trust, believe in Jesus); Bible timeline (Gospel, Good News, People of God); Problems (Problems, troubles, worries)

Audience: General

Style: Monolog

Genre: Bible Stories & Teac

Purpose: Teaching

Bible Quotation: Extensive

Status: Publishable

Script Text

Omatjiukisiro

Omatjiukisiro

Kora panga randje. Embo ndi engirine roviperendero mari hungire ohunga novarumendu ovanaherero mOrukarorua mba ri nongamburiro mu Ndjambi, kokutja Ndjambi me ve vatere moruveze rwouzeu. Ngunda amo puratene kokassete, tara kotjiperendero atjihe tji matji kongorere, indu tji wa zu nokuzuva ombosiro.

Otjiperendero 1: Naaman Ma Ryangere Ondjuwo Yaelisa

Otjiperendero 1: Naaman Ma Ryangere Ondjuwo Yaelisa

2 Ozombara 5:1-12

Elisa wa ri omuhonge omunene nomuprofete motjiungura tjaNdjambi moIsrael. Eyuva rimwe omurumendu wena Naäman we ya kondjuwo yaElisa. Omurumendu ngwi wa ri omunane wotjira tjovita tjaAram. Ovaarama va ri ovanavita vOvaisrael. Naaman wa ri omurumendu ependa nomunamasa, nu wa verere ongana (omutjise womukova). Eye wa ya koIsrael, mena rokutja wa zuva kutja Elisa ma yenene okuverukisa ongana ye. Nungwari Elisa ke na pa pita okumuminika. Eye wa hinda omukarere we ku Naaman ne ke mu raera nai: "Kerikohe ovikando hambombari moJordaan (ondondu), nu mo veruka nokohoka." Naaman wa pindika na tja: "Ami mbe ripura kutja ma piti ku ami, a kumbu ku Muhona Ndjambi we, a takere eke re kombanda yopona pu pe nomutjise ne ndji verukisa." Naaman otja ya kondondu Jordaan.

Otjiperendero 2: Naaman Mondondu

Otjiperendero 2: Naaman Mondondu

2 Ozombara 5:13-19

Ovakarere vaNaaman ve riheka ku ye kutja ma tokupuratena ku Elisa nu ma ise omerihiviro nomazenge we. Owo ve mu ronga okutja ma zuve ke raa epupu raElisa. Naaman wa ya koJordaan ne kerikoha ovikando hambombari. Tara kotjperendero! Naaman wa ri nohange tjinene. Eye wa veruka nawa kongana ye. Elisa ke na mundu kuya tira, mena rokutja wa ri nondakameno mu Ndjambi. Eye iya tjiwa kutja Ndjambi we ma yenene okutjita otjina atjihe. Eye iya tjiwa kutja omundu auhe ma sokuzuva kEmbo raNdambi, Ombeipela. Matu sokuningira ku Ndjambi me tu vatere okutjita imbi mbi ri ovisemba, nokutja tu kare nondakameno mu Ye.

Otjiperendero 3: Elisa Nokatemba Komuriro

Otjiperendero 3: Elisa Nokatemba Komuriro

2 Ozombara 6:8-17

Moruveze ndo pa ri ovita pokati kOvaisrael nOvaarama. Ndjambi iya raera omukarere we Elisa Ovaarama tji mave vanga okuwira Ovaisrael, okutja Elisa otjiya rakiza ombara. Ombara yaAram ya raera ovarwe ve okukakambura Elisa na tja: "Kondononeye kona ke ri nami me kemukambura." Omuhuka omunene weyuva rimwe Elisa nomukarere we tji va pita pendje otjiva muna kutja Ovaarama va kovere otjihuro mu va ri. Omukarere wa ravaera ku Elisa na tja: "Owee ku ete, muhona! Matu tjiti vi? Elisa wa tja: "O tira! Tu novandu ovengi pu wo." Elisa otja ningira Ndjambi okupaturura omeho womukarere we. Omukarere wa tara na munu kutja ozondundu ongondoroko na Elisa ze ura noukambe nomatemba womuriro. Ndjambi we ye hinda okuvetjevera. Panga randje ovakarere vaNdjambi tji mave kara nonduviro komarakiza we, Ndjambi u nouvara okuvehongorera nokuvetjevera. Mena ranao kapena tjina poo omundu ngu ve sokutira.

Otjiperendero 4: Elisa Notjimbumba Otjipotu

Otjiperendero 4: Elisa Notjimbumba Otjipotu

2 Ozombara 6:17-23, Ovaheberi 10:30, Omiano 25:21

Ovaarama tji va ryama popezu okukambura Elisa, eye wa kumba ku Muhona: "Muhona potuparisa ovarumendu mba." Tjimanga kapena umwe wovarwe mba nguya yenene okumuna. Elisa wa ya ku wo na tja: "Ndji kongorereye nami me mu twara komurumendu ngu mamu paha." Elisa we ve twara koSamaria ava potupara. Elisa otja kumba rukwao ku Ndjambi: "Paturura omeho wawo Muhona, kutja ve mune." Tji va patururwa omeho, otjiva muna kutja ve ri moSamaria otjihuro tjovanavita nawo. Ombara yaSamaria ya vanga okuvezepa, nungwari Elisa we mu raera nai: "Ve peye otjina okurya nokunwa, nu eseye kutja ve yaruke kombara yaSirië." Ombara ya tjita otja Elisa pa heya. Panga randje, Ndjambi waElisa omunene pomunavita ngamwa. Ndjambi we tu raera membo re kutja atu ha kara nongore kovanavita na ete, mena rokutja Ndjambi wa tja: "Ami me sutisa nu me vere." Ndjambi wina wa tja: "Omunavita na ove tje nondjara, mu pa ovikurya, nu tje nonyota, mu pao omeva."

Otjiperendero 5: Omakoverero Wasamaria

Otjiperendero 5: Omakoverero Wasamaria

2 Ozombara 6:24 - 7:2

Otjimbumba tjOvaarama tja sekamena okukarwisa Ovaisrael. Owo va kovera oSamaria oruveze orure. Karure, Ovaisrael ka va ri novikurya okurya. Tara kotjiiperendero! Ombara yaIsrael wa ri ama wondjo kombanda yorumbo rwotjihuro. Ku ye kweya ovakazendu vevari. Owo ve riheka kombara. Owo va ri nondjara tjinene ngandu ndi tji va rya ovanatje vawo oveni. Ombara ka ya tjivirwe kutja ngai tjite vi. Eye wa pindika mena rokutja Ndjambi ke ve yamene kOvaarama. Eye wa tya okuzepa Elisa omukarere waNdjambi. Elisa otja raa ombuze ndji kombara: "Puratena ku ihi Muhona tji ma hungire. Mependukirwa reyuva ndo moruveze tjingerwo ndwi mo yenene okuranda ozokilogram ndatu zovikokotwa imbi oviwaviwa morupanda rwomarandero moSamaria.

Otjiperendero 6: Ovangana Vane

Otjiperendero 6: Ovangana Vane

2 Ozombaara 7:3-20

Pa ri ovarumendu vane mba haamene pomuvero waSamaria. Owo va ri nongana. "Owo va tyasana nave tja: "Matu undire tjike mba nga tji twa koka? Nambano ngatu yende kozondanda zOvasirie." Ngunda pe ri nao Ovasirie va zuva ombosiro onene. Ombosiro iya i pose tjimuna omeero yotjimbumba tjovita. Owo va tira tjinene nga tji va esa avihe mbi va ri na vyo nave tupuka. Ovavere vongana vane mba tji ve ya pondanda, ka pa ri novandu. Ovavere vongana va toora ovikurya novina vyarwe mbiya ve hepa. Owo va tyasana nave tja: "Atu tjiti nai! Tu nombuze ombwa, nu atu ha kara na yo oveni." Owo va hakahana okuyaruka koSamaria nave kaserekarera kovatjevere womuvero. Ovatjevere vomuvero va kaserekarera kondjuwo youhona. Ka rure ovandu va utu okurandisa ovikurya pomuvero waSamaria, otja Muhona tja heya momuprofete Elisa. Ndjambi wa yama otjiwana tje kovanavita natjo nu wina Ndjambi wa yama omukarerre we Elisa. Panga randje, Ndjambi wa hinda Jesus Kristus okutukutura komasa wouvi na ku Satan. Ndjambi ka vanga kutja ngamwa omundu ma yende koruveze rwomberero yaaruhe. Indji ondji ri Ombuze Ombwa okuza mEmbo raNdjambi nu ete matu sokukaraera omundu auhe.

Otjiperendero 7: Jona Ma Hene Okuzapo Pu Ndjambi

Otjiperendero 7: Jona Ma Hene Okuzapo Pu Ndjambi

Jona 1:1-17

Kombunda yondiro yaElisa pa kara nomuprofete moIsrael wena Jona. Ndjambi wa hungira ku Jona a tja: "Rirongera u yende kotjihuro otjinene Ninive nu u katjivise omawiro watjo; orondu Ami mba zuva ourunde wovature vatjo." Ovandu vaNinive va ri ovanavita wOvaisrael. Jona ka vangere okuyenda ku wo; opa za okukondjisa okuhena komurungu waNdajmbi. Eye wa muna oskepi ndja ri mondjira okuyenda kehi rokokure. Eye wa suta ovimariva vyouyenda, noskepi a rire tji ya nana. Ndjambi tjimanga wa hinda ombepo onamasa momuronga. Ovandu moskepi va tira tjinene. Owo va tjere: "Ngatu vetere pe horoke kutja ondjo i na une ngwe tu etere oumba mu tu ri mbwi." Owo va vetera nave munu kutja Jona ongu nondjo.

Otjiperendero 8: Jona Nohi Onene

Otjiperendero 8: Jona Nohi Onene

Jona 1:8 - 2:10

Ovaungure va raera Jona nai: "Ove wa tjita otjikena? Eye we ve raera kutja ma hene komurungu waNdjambi. Owo otji ve mu pura nai: "Ngatu ku tjite vi kutja okuvare ku porimane?" Jona wa zira a tja: "Ndji tooreye mu ndji yumbe mokuvare, nokuvare otji maku porimana. Ami me tjiwa kutja otjipukupuku hi tji tje ya kombanda yenu, tja pitire mu ami." Ovandu ka ve vangere okuzepa Jona, nungwari otjipukupuku tja ririrako otjinamasa, nowo otji ve mu yumba momuronga. Jona ka nininwe i yomeva. Tara kotjiperendero! Ohi onene ya nina Jona. Eye wa kara omayuva yetatu mezumo rohi e nomuinyo. Ohi otji ya katjekera Jona kombanda yehi ekukutu.

Otjiperendero 9: Jona Mu Ninive

Otjiperendero 9: Jona Mu Ninive

Jona 3:11-10

Muhona wa hungira ku Jona rukwao a tja: "Rirongerera u yende koNinive; ihi otjihuro otjinene, u kazuvarisire ovature vatjo indji ombuze ndji mbe ku raere." Jona wa kara nonduviro na i ku Ninive. Eye wa rakiza ovandu nomambo nga: "Inga pa sewa omayuva omirongo vine, nu Ninive otji matji yandekwa!" Ombara novandu avehe va kwa ku Ndjambi okutja me ve vatere. Va isa ovitjitwa vyawo ovivi nu Ndjambi opa tyera kutja ke na ku ve vera rukwao. Panga randje, ete na ove tu ri otja Jona novandu vaNinive. Ete atuhe ka tu karere nonduviro, nu twa tjita ovina ovivi. Twa pwira okuverwa. Nungwari Ndjambi we tu suvera. Eye wa hinda Jesus okuyekuturakiza nokutuyama kokutja tu zeko kovina ovivi. Jesus wa tira ourunde wetu. Eye wa kara meyendo omayuva yetatu, otja Jona wina tja kara omayuva yetatu moukoto wohi. Jesus wa penduka mondiro. Eye nambano ma yandja omuinyo waaruhe ku avehe mba isa ovitjitwa ovivi nourunde nave kongorere Ondjira yaJesus.

Otjiperendero 10: Ester Nombara

Otjiperendero 10: Ester Nombara

Ester 1:1 - 2:18

Ester wa ri omukazona wOvajuda okuza moIsrael. Ovanene ve va ta, mena ranao omuramwe Mordekai otje mu kurisa. Kombunda yovita Ester na Mordegai va kamburwa nave twarewa pamwe novandu varwe vaIsrael kehi rozonganda, Persie. Ombara yaPersie wa ri omurumendu omunauvara tjinene. Avehe ve mu tirire tjinene. Ombara oserekaze ye tji ya kara nokuhinanduviro kuye, eye otja tya okukupa omukazendu warwe moruveze rwe.

Eye otja woronganisa ovasukona ovawa okuza kotukondwa atuhe twomananeno we nave etwa konganda ye youhona. Mokati kaavehe wa toorora Ester okurira ombara oserekaze ye. Ester ke na mundu ngwa raerere kutja eye Omujuda.

Otjiperendero 11: Mordekai Ma Panda Okurikota

Otjiperendero 11: Mordekai Ma Panda Okurikota

Ester 3:1 - 4:17, 5:14; Johannes 3:16

Haman wa ri omurumendu omunandengu moPersie. Ovandu avehe va sere okuwora ozongoro nokuyarisa ondengero Haman tji ma kapita. Mordekai ka vangere okutjita nao. Mordekai we rikotamenene ku Ndjambi Umwe woUatjiri. Opa za okupanda okuriwora komurungu waHaman. Haman wa pindika. Eye wa tya okutoora ongore na Mordekai. Eyuva rimwe otja raera ombara nai: "Pe nomuhoko worive mbwa rimbara motukondo atuhe twehi roye... owo kau nonduviro komatwako wouhona." Eye iya hungire ohunga nOvajuda. Haman wina wa tja: "Zikamisa etwako rokutja owo u sokuta." Haman wa kwizika okuyandja ovimariva kombara, noyo otji ye mu yandjera otja pa ningire, nungwari ovimariva ka kamburire. Motukondwa atuhe twa Persie, mwa tyewa oveta okuzepa Ovajuda avehe meyuva kaani, nokutoora avihe mbi ve navyo. Haman wa zika omuti okurekera ko Mordekai. Mordekai wa raera Ester okukeriyarikana kombara mena rovandu votjiwana tje. Nungwari Ester wa tja nai ku ye: "... omurumendu poo omukazendu tja hiti morupanda rwomoukoto na kamuna ombara e ha isanenwe, eye ma sokuta." Ester wa ningira kutja Ovajuda avehe ve ritjayere kovikurya oure womayuva yetatu nokumukumbira ku Ndjambi. Eye novakarere ve va tya okutjita nao wina. Eye wina wa tja: "Kombunda yanao ami me i kombara, nangarire kutja me katuka etwako. Tji me tu mokutjita nao, hi te." Embo raNdjambi ri tu honga kutja Ovakriste matu sokuriyandjera omiinyo vyetu okutira omarumbi novangu vetu Ovakriste.

Otjiperendero 12: Omukandi Waester

Otjiperendero 12: Omukandi Waester

Esther 1 :1 - 2 :18

Ndjambi wa zuvira ozongumbiro zOvajuda. Ombara ya yandja ousemba ku Ester ma hungire kuna ye. Ester we mu nanga povikando vivari pekepeke komikandi nu Haman wina wa nangwa. Momikandi mbi ombara ya pura nai ku Ester: "Ndji raera otjina tji mo vanga, nami me ku pe." Ester wa zira nai: "Tji mape tjata komuhona ombara, okundjipa omeriyarikaneno wandje omerisusuparise, indino ondero yandje okwo ngwi kutja ami mbi hupe, novandu vandje wina ve hupe. Ami novandu vandje twa randisiwa kondiro." Ombara otji ya tja: "Owani ngu ma roro okutjita otjina tji tja sana ngo? Omurumendu ngwi u ri pi? Nu Ester a tja: "Omunavita na ete eye ngwi omurumendu omurunde ngwi Haman!" Ombara ya pindikire tji ya zuva ozondunge zovineya zaHaman, ne ke mu rekera komuti imbwi Haman mbwa zikira Mordekai. Omiinyo vyOvajuda avehe otji vya yamwa. Panga randje, Ester we riyandjera okuta kokutja ovandu ve ve yamwe kondiro. Nungwari ko tji ripura na Jesus. Eye we tu suverere tjinene nga tje tu tira kokutja me tu yame koruveze rwomberero yaaruhe, ete ku twa pwire okuyenda mena rourunde wetu.

Omatjiukisiro

Omatjiukisiro

Ovarumendu vevari Daniël na Nehemia va ninikiziwa okukatura mehi rovanavita nawo. Nowo tjingee iyave karere Ndjambi Umwe woUatjiri nave rire ovarumendu ovanene vaNdjambi. Tara kotjiperendero tji matji kongorere tji tji ri membo, tji wa zu nokuzuva ombosiro ndji.

OTJIPERENDERO 13: DANIëL NOMAPANGA WE

OTJIPERENDERO 13: DANIëL NOMAPANGA WE

Daniël 1:1-21

Otjiperendero hi matji raisire Daniël nomapanga we yetatu. Owo va ri Ovajuda. Owo va twarewa i yovanavita nawo koBabel. Ombara yaBabel iyai vanga kutja ve rire ovakarere ve. Mena ranao owo va sere okurihonga eraka novitjitwa vyombazu wOvababela. Nungwari Daniël nomapanga we va pandere okurya ovikurya vyondiru vyombara. Imbi iyavi pirukire ozongaro zOvajuda. Owo iyave tjiwa kutja mave sokutiza ozoveta zaMuhona nokumuyozika. Owo va ningirire okurya ovihape nokunwa omeva uriri. Omurumendu nguyeve tjevere, we rikendere tjinene kutja ngahino mave terambu nave vere. Nungwari Ndjambi omuini we ve tjeverere, nowo otji va ri ovaveruke novanazondunge okukapita ovarumendu avehe ovakarere vombara yaBabel.

OTJIPERENDERO 14: DANIëL NOMBARA YABABEL

OTJIPERENDERO 14: DANIëL NOMBARA YABABEL

Daniël 2:1-49

Ombara yaBabel ya rotere oruroto. Eye wa isanene ozonongo nozombetere kutja ve ye okumumangururira oruroto rwe, nungwari kapena umwe ngwa yenene okumumangururira oruroto. Ombara opu ya tyere okuvezepa avehe. Daniël nomapanga we va kumba ku Muhona, nu Muhona wa vandururira Daniël oruroto rwombara. Daniël wa ya kombara na tja: "... mu na Ndjambi meyuru ngu vandurura oviundikwa. Eye ma tjivisa ove, muhona ombara, imbi mbi mavi tjitwa moruveze ndu maru ya." Daniël wa raera ombara kutja eye moruroto wa munu omauhona aehe wouye, nokutja eye wina wa munu ouhona umwe mbwa nyono omauhona inga oyarwe. Imbwi omburi ouhona waNdjambi mbu mau karerere nga aruhe. Omambo waDaniël ya tuna ombara tjinene. Ozombuke nozonongo zombara za isiwa kutja ze hupa nu Daniël wa zikwa otja omunane kehi yombara yaBabel. Avihe mbi tjitwa mouye mbwi, vi ri kehi yomananeno waNdjambi ngwa hungirwa i Daniël. Opu tu ha sere okuyenda kozombuke nozondjai nungwari matu sokuyenda ku Ndjambi wetu omunene. Matu sokukara nongamburiro mu ye, opu matu sora okutjita ovina ovisemba.

Otjiperendero 15: Otjiserekarera Tjongoldo

Otjiperendero 15: Otjiserekarera Tjongoldo

Daniël 3:1-12

Ombara yaBabel ya ungurisire otjiserekarera tjomundu pongoldo. Eye wa isanene ovahongore ve avehe okuyekutara. Omuravaere otja tjivisa neraka enene na tja: "Ene tji mamu zuu ombosiro yozohiva, ene mamu ripete namu rikotamene kotjiserekarera tjomundu tji tja zikwa i ombara Nebukadneser. Omundu ngamwa ngu hi nokuwa ondurumika nokurikotamena ku tjo, ma yumbwa tjimanga mezuko romuriro." Omapanga waDaniël, oo Sadrag, Mesag na Abednego va panda okurikotamena kotjiserekarera hi. Owo iyave karere Ndjambi erike. Ovarumendu tjiva otji va ya kombara ave kahorora ave tja: "Pe nOvajuda tjiva mbu wa twa pokutjevera orukondo rwotjihuro, owo oo Sadrag, Mesag na Abednego mbe hi nonduviro komarakiza woye. Owo kave rikotamene koomukuru woye, nu kave u ondurumika kotjiserekarera tjongoldo tji wa zika.

Otjiperendero 16: Ezuko Romuriro

Otjiperendero 16: Ezuko Romuriro

Daniel 3:13-30

Ombara ya isanisa omapanga yaDaniël. Eye we ve rakiza kutja: "Tji mu hina okurikotamena kotjiserekarera, mamu yumbwa tjimanga mezuko romuriro. Mamu tjangovasi pe nomukuru ngamwa ngu ma sora okumuyama momake wandje are? " Ovarumendu va zira: "Ndjambi ngu tu karera tji ma vanga okutuyama mezuko romuriro na kouvara woye indino, mbara omuhona, Eye ma sora. Nungwari Eye nanda ha tjitire nao, omuhona ombara nga tjiwe kutja tjiri, ete kamaatu rikotamene koomukuru woye, nu kamaatu u ondurukika kotjiserekarera tjongoldo tji wa zika."

Mena ranao ooSadrag, Mesag na Abednego otji va yumbwa mezuko romuriro. Ombara otji ya ravaera ai tja: "Okutjavi tji me munu ovarumendu vane mbu mave ryanga momuriro, nu ingwi outjaine ma munika otja omukuru (omundu weyuru)" Ovarumendu vetatu tji va pita momuriro, ozondjise zawo kaze vaukire. Ombara ya tjere: "Nga hivirikwe Ndjambi wooSadrak na Mesak na Abednego! Eye wa hinda omuengeli we nu wa yama ovarumendu mba... Kape nomukuru warwe ngu yama otja ingwi." Panga randje, Ndjambi otjingeje ngwi wa rakiza omihoko avihe a tja: "Ko nokukara noomukuru varwe posi yandje. Ko nokuritjitira ko otjisererekarera otjihongwa tjotjiserekarera, nandarire osaneno yovina mbi ri kombanda meyuru poo mbi ri kehi kombanda yehi poo mbi ri momeva kehi yehi. Ko nokurikotamena ku vyo nokuvikarera..."

OTJIPERENDERO 17: DANIëL MA KUMBU KU NDJAMBI

OTJIPERENDERO 17: DANIëL MA KUMBU KU NDJAMBI

Daniël 6:1-13

Daniël wa honaparere tjinene mehi Babel. Pa ri ovanane varwe mba ri neruru na ye. Nungwari owo kava mwine mo ondjo mu ye, mena rokutja Daniël wa ri nonduviro kombara. Ovarumendu mba opu va ire kombara nave tja nai ku ye: "Tjita omarakiza wokutja oure womayuva omirongo vitatu ape ha yandjerwa omundu okuningira otjina komukuru auhe ngamwa poo komundu warwe posi yakove, ngu u ri omuhona ombara erike. Auhe ngu ma teya omarakiza nga nga yumbwe mondimba ndje ura nozongeyama."

Ombara otja twa po oveta ndji. Daniël wa zuva ohunga noveta ombe yombara, neye wa ryama komurungu okukumba ovikando vitatu meyuva ku Ndjambi.

Ovanavita naye tji ve mu munu ama kumbu va ya kombara ave katja nai: "Daniël ke nonduviro komarakiza ngu wa tjivisa."

OTJIPERENDERO 18: DANIëL MORUMBO RWOZONGEYAMA

OTJIPERENDERO 18: DANIëL MORUMBO RWOZONGEYAMA

Daniël 6:14-24

Ombara kai vangere kutja Daniël ma tire morumbo rwozongeama, nungwari eye kaa yenene okutanaura oveta. Daniël otja yumbwa morumbo rwozongeyama. Rukuru omuhuka omunene ombara otji ye ritupukira korumbo rwozongeyamana ai tja: "Daniël, mu karere waNdjambi omunamuinyo! Ndjambi ove nguyo karere aruhe nai noutakame we ku yama kozongeyama are?" Nu Daniël wa zira: "Ndjambi wa hindi omuengeli we kutja e ye okupata ovinyo vyozongeyama kokutja aze ha tjiti otjipo..." Ombara ya yoroka tjinene. Daniël wa pitisiwa morumbo rwozongeyama, nu otja kerakiza rombara ovanavita na ye otji va yumbwa morumbo rwozongeyama. Ozongeyama za hakahana aze ve nyondorora. Panga randje, atu roro okutira imbi ovandu mbi mave yenene okutjita kwete. Ngatu kare nongamburiro mu Ndjambi omunamuinyo ngwa vatera Daniël nomapanga we. Nandarire kutja ovandu ve tu zepa, tjingee tu nomaundjiro, mena rokutja Jesus wa hindwa i Ndjambi okuyandja omuinyo waaruhe ku imba mbe mu suvera nu mbe nonduviro ku Ye.

Otjiperendero 19: Nehemia Komurungu Wombara Onene

Otjiperendero 19: Nehemia Komurungu Wombara Onene

Nehemia 1:1 - 2:7

Kombunda yomahupiro waDaniël, Nehemia wina wa kara otja omuture moBabel. Nehemia eye wina wa ri Omujuda ngwa ri nongamburiro mu Ndjambi. Nehemia wa ri omukarere wombara onene. Eyuva rimwe ngunda eye ama yandja omavinu kombara, ombara ye mu pura na i tja: "Okutjavi tji wa yumana nai au ha verere?" Nehemia wa ri nomuhihamwatima mena rokutja Jerusalem, otjihuro tjooihe mukururume tja nyonwa nOvajuda mba tu rire mu tjo va ri mouzeu ounene. Nehemia otja serekarera ohunga notjihuro hi Jerusalem novandu vatjo imba Ovajuda. Ombara ai tja: "Otjikena tji mo vanga?" Nehemia wa kumba ongumumu ku Ndjambi na tja nai kombara: "Omuhona ombara tje nonyune naami, ... nge ndjese mbi yende ... kotjihuro kukwa pakwa ootate mukururume, kokutja mbi ke tji tungurure." Ndjambi wa zuvira Nehemia nombara ye mu yandjera. Ndjambi u honaparera ouye auhe nozombara zawo. Ovandu vaNdjambi tji va kumbu ku ye nave tjiti imbi mbi ri ovisemba momeho we, Ndjambi ndino ma yenenisa avihe mbi mave ningire, tji vi ri otja kombango ye.

Otjiperendero 20: Nehemia Ma Kondonona Otjihuro Tji Tja Nyonwa

Otjiperendero 20: Nehemia Ma Kondonona Otjihuro Tji Tja Nyonwa

Nehemia 2:8-20

Ombara ya yandja ovina vyokutunga ondjuwo novarumendu okukemuvatera. Nehemia novavatere ve ve kuka okuyenda koJerusalem. Ovanavita na Nehemia va zuva ohunga nondunge yaNehemia. Owo va pindika tjinene. Owo kave vangere kutja pe kare omundu ngamwa ngu ma vatere Ovajuda. Nehemia wa vanga okukakondonona oJerusalem, eye apa zire okukavira osemba ongondoroka notumbo iswi tu twa nyonwa. Eye wa kawondjo utuku kokutja ovandu ave he mu munu mbi ma ungura. Omuhuka omunene ependukirwa Nehemia otja isana Ovajuda avehe na tja nai: "Ngatu tungurure orumbo rwotjihuro, tu yandise ohoni yetu." Eye we ve raera kutja Ndjambi wa ri puna ye nokutja ombara yaBabel ye mu pe ousemba. Ovajuda otji va zira ave tja: "Ngatu ute okutungurura!"

Otjiperendero 21: Orumbo Maru Tungwa

Otjiperendero 21: Orumbo Maru Tungwa

Nehemia 3:1 - 6:19

Tara kotjiperendero. Ovajuda va utu okuungura. Tjiva va utu okutoora ovinyanyaukiro, ngunda varwe amave tungu orumbo nokuhitisa omivero. Ovanavita vOvajuda va pindikire tjinene. Owo iyave ve urumisa nokutja mave ve zepa ngunda amave ungura. Nehemia otja kumba rukwao ku Ndjambi. Eye iya vanga okutjiwa ku Ndjambi kutja nga tjite vi. Otja twa po ovarumendu kombanda yorumbo mbe ripangana nomanga nomauta okutjevera ovaungure. Auhe wa toora oviumbe nerirongere kotjirwa. Ovanavita na ye kave yenenene okuzepa Nehemia poo Ovajuda varwe. Oviungura vya kawondja komurungu, nu moure womayuva 52 orumbo rwa yenena okumanuka okutungururwa. Ete atuhe tu hepa ounongo okutjiwa mbi ri ovisemba. Ete katu nomasa okutjita imbi ovisemba. Ndjambi ongu na ounongo auhe nomasa. Otja Nehemia matu sokukumba ku Ndjambi, atu kambura mu ye natu kara nonduviro kEmbo re. Otji matu yenene okutjiwa kutja Ndjambi me tu rwire po.

Otjiperendero 22: Esra Ma Lese Oveta

Otjiperendero 22: Esra Ma Lese Oveta

Nehemia 8:1 - 13:31

Orumbo tji rwa za nokumanuka, Ovajuda va woronganena moJerusalem. Esra, omupristeri waNdjambi, we ve lesera oveta yaNdjambi ndji ri mEmbo raNdjambi indi Ombeipela. Ovandu tjiva va uta okurira. Owo iyave tjiwa kutja kave nonduviro koveta yaNdjambi. Ndjambi opa zire okuyandjera kutja ovanavita ve nyone otjihuro tjawo. Ovajuda va vangere okuritanaura kozondjira zawo ozombi ve kongorere ozondjira zaNdjambi. Nehemia wa raerere ovandu na tja: "Amu toruhoze, tji mamu karere Ndjambi nenyando, Eye me mu takamisa." U nenyando, panga randje? Ndjambi u tu pa enyando nomasa, ete tji matu mu tjiwa nokukara nonduviro kEmbo re Eyapuke (Ombeipela) matu yenene okumutjiwa. Eye ongu ri Ndjambi Umwe woUatjiri.

Otjiperendero 23: Jesus Kotjikroise

Otjiperendero 23: Jesus Kotjikroise

Johannes 19:17-30

Pe nomuano umwe okutjiwa Ndjambi (Omuute omunene). Ndjambi wa hinda Omuna we, Jesus, okuraisira ovandu avehe ondjira ndji. Jesus wa hupire ozombura ozongi nda kapita. Eye wa tjita ovina ovingi okuvatera ovandu. Eye we tu raisira kutja Ndjambi u vanga kutja ovandu ve hupe vi. Nungwari ete katu kongorerere otjihorera tje. Ete atuhe twa tjita ourunde.

Ndjambi u vera omurunde ngu tonda ondjra Ye, nu kombunda yondiro ovandu mbo u ve hinda kokure nomaturiro we koruveze ndu na omuriro waaruhe (otjomuriro).

Embo raNdjambi ri tu raera kutja Eye ovandu ovatenga we ve ungura poruuma. Ete tji twa tu otutu twetu tu rira oruuma rukwao. Nungwari indji ombepo yomundu, ndji kara mwete, mai yaruka ku Ndjambi, ngwe tu pere yo. Oku matu kaperwa omberero poo ondjambi. Puratena, Ndjambi wa yamene Elisa na Daniël momake wovandu mbuyave vanga okuvezepa. Nungwari Ndjambi wa yandjera Jesus ma zepewe i yovandu ovavi. Owo ve mu papera komuti wotjikroise. Jesus wa toora ondjo yomundu auhe kombanda ye mena rokutja wa suverere ovandu avehe. Ete tji matu rihepura omauvi wetu, Ndjambi me tu isire kutja ete tu sore okumutjiwa nokukongorera ondjira ye rukwao. Kovakongorere vaJesus mouatjiri, kanaa pe ka kara omberero kombunda yondiro. Owo mave suvere Ndjambi aruhe (meyuru) nave mu karere.

Otjiperendero 24: Jesus Ma Urike Ondjira Komuinyo Waaruhe

Otjiperendero 24: Jesus Ma Urike Ondjira Komuinyo Waaruhe

Mateus 7:13-14; Johannes 14:6

Panga randje, ovandu tji mave kawondja komurungu okukara nokuhinanduviro ku Ndjambi, okutja mave kawondja mondjira onene ombaranga, Satan me ri omuhona wouhakohoke auhe. Ondjira ndji i twara komberero yaaruhe. Omundu auhe ngu kwata kombanda yehi, u ri mondjira ndji. (Otji pe ri nai wina kwami na ove). Mena rokutja Embo raNdjambi mari tja: "Avehe va tura ondjo..." Mena rokutja ovandu avehe ovarunde, avehe va pwira omberero yaNdjambi. Nungwari Ndjambi wa hinda Omuna we Jesus Kristus okuvererwa moruveze rwetu. Ndjambi wa pendura Jesus mondiro nu nai U hupa okutuurikira ondjira ku Ndjambi. Jesus wa tja: "Owami Ondjira nOuatjiri nOmuinyo, kape na ngu me ya ku Tate e hina ku pitira mu Ami." Ovandu mbe kongorera Jesus, kamaave i koruveze rwomberero yaaruhe. Nungwari Satan na imba avehe mbe kayenda mondjira ye mave i ngo. Matu sokukongorera ondjira yaJesus. Oyo ondji ri ondjira indji ondeu nongwani. Nu mena rokutja mouye mwe ura nouhakohoke, ovandu kombanda yehi mave munu ouzeu. Nungwari Jesus aruhe u kara pu novandu mbe mu kongorera. Eye u ve pa omasa we. Kovakongorere vaJesus ku nomaundjiro,mena rokutja ondjira yaJesus i yenda keyuru. Meyuru kamu na ouzeu, nungwari mu na ondjoroka nohange ndji karerera, orondu avehe mbe yenda keyuru, mave karere Ndjambi nave mu suvere nu aruhe mave kara puna Ye. Tji mo vanga okuisa ondjira yaSatan nu tji mo zeri okukongorera Jesus mondjira ndji twara ku Ndjambi, mo yenene okukumba ongumbiro ndji:

Tate Weyuru, ami iye kongorere Satan, nehongorerwa i yozonduma zandje omuini, nomeripura wandje omavi noviungura vyandje ovivi. Ndji isira arikana. Owami omurunde. Muhona Jesus, okuhepa kutja wa ta kotjikroise notjindi ondjo yandje. Okuhepa kutja ombindu yoye mai ndji koho kourunde wandje. Muhona Jesus, ami ndino me ku kambura otja Omukuture noMuhona wandje. Okuhepa kutja Ove mOmbepo yoye Ondjapuke mo ndji pe omasa okurira omuatje woye nokutja mbi kare nonduviro kEmbo raNdjambi (Ombeipela). Me ningire mena raJesus. Amen

Related information

Free downloads - Here you can find all the main GRN message scripts in several languages, plus pictures and other related materials, available for download.

"Look, Listen and Live" audio-visual - A set of 8 programs of 24 pictures each for evangelism and Christian teaching. The series presents Old Testament characters, the life of Jesus, and the young church.

How to use GRN Audio visual resources - 1: Sharing the Gospel made easy - This article gives an introduction to some of the many different ways the GRN audio visual resources can be used in ministry.

How to use GRN Audio visual resources - 2: Going Deeper - This article gives further explanation of how people learn from the stories, and why the stories do not have a lot of commentary.

The GRN Audio Library - Evangelistic and basic Bible teaching material appropriate to the people's need and culture in a variety of styles and formats.

Copyright and Licensing - GRN shares it's audio, video and written scripts under Creative Commons

Creating DVDs using the GRN Slide show Videos - How to burn DVDs for specific people groups you are trying to reach

Choosing the right audio or video format - What audio and video file formats are available from GRN, and which one is best to use?