Buukhu 3 Woone, Wiiwe ni okhale

Masu oopacera

Mooni atthu ootheene. Nloko na Israyel naari ipottha elapo ya Egipitu, vano Muluku aahaavuluxa mwa amwiittanaaya. Awo yaavinya o Egipitu erowaka elapo ekina, yiitthaniwa oKana. Muluku aaroromeliha nloko na Israyel elapoeene yeele. Mwaha wa ebuukhu yanaararu ela, eniwooniherani Muluku waakhaviha wawe eenraawe mpaka waakha waya elapoeene yeele. Muniiwa hiiho, (signal) mukhunule mpantta mukina.

Ethoonyihero 1: Yooxuwa ongwana ni Amalekiita

Okhuma 17:8-13

Nloko na Israyel khanaarino elapowaayaxa. Yaamweetta paahi mutuphini. Mutokweenaaya aari Moises. Owo aamuthanla mmiravo iitthaniwa Yooxuwa weera akhale mutokweene a anakhottowaawe. Amalekiita yaawana ni Israyel, ni Moises aamweerela Yooxuwa: "waathanle asilopwana weera yawane ni Amalekiita. Miyo kinoorowa vasulu va mwaako mweereke muwanaka miyo kivekelaka ni ekopó ya Muluku mmatatani mwaka.

Moises aavekelaawe eemenxeene matata, atthwaawe, yaanaawina Amalekiita. Matata Moises yaanamulemela ni khaawera oviriha ehuhu yincipale avekelaka wa Muluku eemenxeene. Okhulumuwa wannamuhiiha ovekela, ni Amalekiita yaanawera owina. Aaroni ni Hur yaaneemexa matata a Moises mpaka ohiiyu, avarenleene ekopó ya Muluku. Hiiho, Muluku aamukhavihera Yooxuwa waawina Amalekiita.

Ethoonyihero 2: Anamalupattha yaahaaruuha sooca sooreera sa o Kana

Muluku aaroromeliha nloko na Israyel elapo ya o Kana. Atthu o Israyel yaattamenlaaya oKana, Moises ahaaruma anamalupatta orowa owehaweha elapo. Moises ahaaruma asitokweene mulokó ni eeli waapwexerera Yooxuwa ni Kaleb. Erowaká yaamanle mahiku miloko mixexe ni yaahokolowa enahima sootheene yoonnaaya. Awo yaaheera: Noophiya ni noovolowa elapo mwaanirumaanyu, yooreera ni yookhalano etthaacira. Noowiiha sooca soowima sa wuwu iya. Atthu awuwu atokotoko ni icidade ti soorika opwexa.

Kaleb ahaamaaliha asikhwawe ni aaheera: Nrowe nawaakhe elapo, niwooko nnimwaawera. Vano atthu yaaheera: Nihiwanane ekhotto, niwooko awo aalipaxa onipwaha hiyo. Ni yaannanyohola elapoweene yeeyo.

Ohiiyuweene yoowo, atthu yaahinla ni yaamwaapa asitokweene Moises ni Aaroni, ni Mulukutho. Muluku aahaanyoonyeriwa niwooko nohikhalano nroromelo. Ni aahaahokoloxera ottuli weera yeetteke mutuphini mpaka iyaakha miloko mixexe. Atthu ootheene o Israyel yahaamuroromenle Muluku, yaahookhwa mutuphini, niwooko nohikhalano nroromelo.

Ethoonyihero 3: Nloko na Israyel ninlapuwa mooloko

Yooxuwa 1:1-2

Akhwaakaru Moises, Muluku aamuthoonya Yooxuwa weera akhale mutokweene o Israyel. Amuthoonyakaru, aamweerela: Moises namutekwaaka ohookhwa. Weyo naatthu ootheene mwirehéreke weera mwalapuwe mooloko Yordanu. Mwavolowe elapo kinoovahaakani. Weyo okhale oolipa ni olipa murima. Weyo onookhala mutokweene aatthu ala, mpaka waakha elapo kaaroromeliinghaaka makholowaanyu.

Muluku aaroromeliha okhala ni Yooxuwa, ni aamuruma otthariha malamulo a Muluku.

Vano, weera yavolowe mulaponi, waannatthuneya omulapuwa mooloko waasarenye maahi. Vano Muluku aamuleela Yooxuwa yeeyo aatthunaawe apaké. Asaserdote yaakhalano etthu yiitthaniwa Arka. Mpuwa yaakhala malamulo a Muluku yaalempwale mmalukuni. Muluku aaweerela, "Muteexeke Arka mpaka ovolowa muYordanu." Inaawo saya sitavakaru maahi, Muluku aakawanya maahi eriyari, weera atthwaawe elapuwe vathi woohikhala maahi. Atthu yaalapuwaaya asaserdoti yeemenle eriyari mpaka olapuwa atthu ootheene. Muluku toororomeleya. Yooxuwa ni atthu ootheene yaamuttittimiha Muluku.

Ethoonyihero 4: Waakha wa o Yeriko

Yooxuwa 5:13 - 7:1

Atthu o Israyel yaahiitthuuwa oKana waattamela esidade yeeriwa o Yeriko. Wannatthuneya owoomola aKana mulaponi mwaya. AKana khawaawereya okhala vamoha naatthu o Israyel, niwooko yaamwaavaliha ni mikhalelo saya soonanara. Muluku aamweerela Yooxuwa: "Miyo koowinyerera esidade ela mmatatani mwawo. Mweetteke murukureraka esidade vanihikuni emaara emoha. Mweetteke hiiho mahiku mathanu nnamosa. Nihiku nanaathanu ni meeli asaserdoti ekhaleke ohoolo ni Arka ni mapalapatta. Mweera hiiho murukureere vathanu ni veeli. Mwarukureera vanaathanu ni veeli mwiipeke mapalapatta ni atthu ootheene ekhuweleke vancipale. Ewapo ya maluku enoomora ni yoole ori nakhotto onoovolowa ni aakhé esidade. Yooxuwa ni atthwaawe yaapanka sintoko Muluku aalamulenlaawe. Sootheene sakhumelenle hiiho ni esidade yaakuxiwa. Muluku aaweerela, "Ahikhale oneera akuxe etthu." Vano mulopwana mmoha eeriwa Aakan khaamwiiwelenle Muluku.

Ethoonyihero 5: Owiniwa woothananiha

Yooxuwa 7:1-12

Waattamela o Yeriko yaakhala esidade ekina yiitthaniwa Ayi. Yooxuwa ahaaruma anamalupattha eeli weera yawehawehe. Anamalupattha yaahokolowa ni yaaheera: khontthunneya orowawo anakhotto ootheene, niwooko atthu ariwo vakhaaneene. Vano Yooxuwa ahaaruma anakhotto vakhaaneene weera yaakhe o Ayi. Vano atthu o Ayi yaari oolipaxa ni yahaawina atthu o Israyel. Atthu o Israyel, akina yaahookhwa, akina yaatthawa. Yooxuwa ni asitokweene akina yaathanana, yaahuurama mpaka otava etthaya emvekelaka Muluku.

Muluku aamweerela Yooxuwa: Ovinye! Ompaka heeni owiithoniwawo. AIsrayel aattheka, aakuxa itthu sookhottihiwa. Ovinyero vaava khamunwera olipa ni amwiittanaanyu, mwahikumihe itthu iye soowiiyiwa. Omwaasaase ole oonanariha ni omwiive eriyari ya atthu. Mwaha ola onnanihusiha weera Muluku onnaathoriha ootheene ahimwiiwelela. Nahimwiiwelelaka Muluku, ninnanariha okumaahu ni okumi waakhwiihu.

Ethoonyihero 6: Othorihiwa wa Aakan

Yooxuwa 7:14-26

Yooxuwa ahaathukumanya atthu ootheene o Israyel vamoha ni Muluku. Muluku aamoonihera Yooxuwa weera aari Aakan aatthenke. Yooxuwa aamweerela Aakan, okileele etthu opankaawo, ohivithe. Aakan aahaakhula: Miyo koomutthekela Muluku. Koonnaaka itthu sookhottihiwa, yaakhalavo ekuwo yooreera. Kaakuxa ni itthu sikina sooreera. Kisunké vathi va mukotthaaka. Ahimakáru, yaarowa atthu akina ni yaaphwanya itthu iye.

Itthu sootheene aaraawenno Aakan saaphwatiwa sintoko Muluku aalamulenlaawe. Ovinyero vaavaale, saamala isara sa Muluku aaraawenno ni atthu o Israyel.

Muluku aamweerela Yooxuwa: Waakúxe anakhotowaawo, orowe o Ayi, niwooko kinoowinyerera mmatatani mwawo. Ohoove.

Israyel yaapanka sintoko Muluku aalamulenlaawe, ni yahaakha o Ayi.

Hiyotho ennanikhumelela hiiho. Khanimwera onwina Satana nreene ni yoottheka. Ontthuneya olapa wa Muluku weera nleveleliwe. Muluku onooniwiniha mwa ikuru soonanara.

Ethoonyihero 7: Nsuwa ni mweeri sinneemela

Yooxuwa 10:1-14

Ewinakaru, atthu o Kana yaapacera woova ewoovaka aIsrayel. Yaathukumana amwene athanu weera ewaneke ni aIsrayel. Muluku aamweerela Yooxuwa: Ohiwoove; Miyo koowinyerera mmatatani mwawo. Naari mmoha khaawo oneera aweré.

Yooxuwa aavinya ohiiyu ni anakhott'waawe weera yawane ekhotto. Yaahaaphwanya amwiittani yaahaatutuxa. Amwiittani yaatthawa ni woova otokotoko. Etthawaka hiihaale, Muluku aahaamorihela maralala ni ancipale yaahookhwa ni maralala. Ekhotto khiyaamanle mpaka nihiku nootheene. Yooxuwa aahoona weera olelo ninnawina mpaka wiila, tivawo aamvekela Muluku weera nsuwa ni mweeri seemele mpaka waawina amwiittani ootheene. Muluku aamvaha Yooxuwa yeeyo aamvenkaawe. Naaheemela nsuwa va muru mpaka ophiyera aIsrael waawiina amwiitanaaya.

Ethoonyihero 8: Yooxuwa onghusiha nloko

Yooxuwa 23:1 - 24:31

Ewiinakaru, Yooxuwa aakawanya elapo ipuumba muloko ni piili sa atthu o Israyel. Saamala iyaakha sincipale, ni Yooxuwa aahuuluvala. Ehuhueene yeele, Yooxuwa aawiitthana atthu o Israyel ootheene. Aaweerela: "Muupuweleke itthu sootheene Muluku oneerenlaawe, onivanghaawe elapo ela yooreera ni onikhavihenraawe waawina amwiittanaahu. Mukhale oolipa. Mutthariheke malamul'waawe ootheene. Nyuwo mwaamuttharihaka ni omvarela muteko Mulukuru paahi, Muluku onoowoomola amwiittani ahanle, ni nyuwo munoohala ni elapo yootheene yoKana. Nyuwo mwakhalano miluku sikina, ti yeenyu muneera moomoliwe mulaponi mu mooreera."

Mmuthanle oleelo, Muluku hoye hoye miluku, muntthunaanyu?

Yoole ori mutthu athanleke muneene yeeyo ontthunaawe, Muluku eekhaikhai hoye hoye miluku.

Ethoonyihero 9: Israyel aamuttiwala Muluku

Soovira iyaakha sincipale akhwakaru Yooxuwa. Anamwane anyowani khayonne sootikiniha sa Muluku. Awo yaalókotthiwa ni atthu ohikhala ni Muluku eekhaikhai weera elapeke miluku soowootha. Niwooko na yeeyo, Muluku aahiya waakhavihera. Yaawanaaya ekhotto, yaannawiniwa ni maloko amukhwipi. Muluku khaattiwanle a Israyel. Ehuhueene yeele Muluku aahaathanla mpuwa mwa nloko nawe atthu oororomeleya weera ekhale asitokweene anloko nawe. Mmoha ayaale aari muthiana nsinanawe Debora. Owo aaheerera waatthariha atthu mphironi ya Muluku. Nihiku nimoha aamwiitthana Barak, aari mutokweene aanakhotto o Israyel. Owo aaheera: Muluku ooniroromeliha owina. Waakuxe anakhotto 10 000 weera yawane ni Sisera ni anakhotto o Kana.

Vano Barak annoova. Owo aamweerela Debora: "Weyo waahirowaka ni miyo, nkinrowa." Aaheera: "Miyo kinoorowa, Muluku onoowinyerera amwiittani mmatatani mwa muthiana."

Ethoonyihero 10: Muluku ookhaviha owana ni Siisera

Anamathoriha 4:10-16

Debora ni Barak yahaalamulela anakhotto mpaka ophiya nipuro Muluku aaleenlaawe. Sisera aakhalano ikaaro sa yuuma saakakhiwa ni axinama. Saapakeliwa ekhotto. Nipuro yaaraaya aIsrayel etthaya yaamuttoora, ni ikaaro khasaawera ovira.

Anakhotto o Israyel yaarowaaya ohoolo, Muluku aarukureeriha miruku sa aKana. A Kana yaapacera otthawa. Wa okhavihera wa Muluku aIsrayel yaahaawina a Kana. AIsrayel yaawoomola ni yaawiiva ni ikatana. Sisera paahi aatthawa ni metto.

Ethoonyihero 11: Muthiana ommwiiva Sisera

Anamathoriha 4:17-23

Sisera aatthawa mpaka mmukotthani mwa muthiana eeriwa Yael. Yael khaahiyono muIsrayel. Jael Yael aamweerela Sisera: Mvoloweke, muhoove. Aavolowa ni aahiipitha mpuwa mwa mukottha. Aamvaha maahi aawura ni aamukhuneela ni manta, ni Sisera aapacera okona. Yael aakuxa musonka wa mwiri ni enyuttó. Aamwiitela, aamukhomela va muru mpaka ophuttula. Ehuhuweene yeele aavira Barak, amwaasaka Sisera. Yael aamwiitthana ni aamweerela: Murweke nno, kiwoonihereni yoowo mummwaasaanyu. Eera areene Sisera, akhomeliweene murwaawe vathi.

Ethoonyihero 12: AIsrayel yaahakalala

Anamathoriha 5:1-31

AIsrayel yaahakalala niwooko na waawina aKana. Debora ni Barak ni aIsrayel ootheene yaahiipa ni yaahiina yaattittimihaka Apwiya. Awo yaahakalala niwooko na okhalano mutokweene Debora. Owo aari ntoko amayáwe. Naari niwooko na asithiana eeli Muluku aavuluxenraawe aIsrayel. Asinthamwene, Muluku onaavarela muteko ale oolosowa weera yaawine oolipa.

Hiyo nookhalano mwiittanaahu oolipa, Satana. Weera awine Satana, Muluku omurumme Yeesu Kristu. Ookuxa othorihiwa wa soottheka sahu ni oohookhwa va muttandani. Atthu oonanara yaamwiiva Yeesu. Awo yuupuwela weera owo toolosowa. Muupuweleke aIsrayel waawina yenraaya amwiittani niwooko na ikuru sa Muluku. Yeesutho oongwina Satana, mwiittanaahu. Owo ohookhwa ni oovinya mookhwaani. Avinyakaru ohoonihera weera oowina ikuru sa soottheka, sa okhwa ni sa Satana. Hiiho, oonivuluxa mwa ikuru sa soottheka. Hiiho, niwooko na Yeesu, nnoowina ikuru sa soottheka ni sa Satana. Yeesu onnaavaha okumi woohimala ootheene yaale aninroromela.

Tivawo, nrowe nihakalaleke ni omulapa Muluku ekhaikhai.

Mpitikuxe ekasete weera mwiiwetho sikina.

Masu oopacera

Satana onneerera mahiku ootheene waawoka atthu ootheene. Vano Biblia onnanleela sa ekhaikhai. Iwani ni huserani nyaha sa mBibliani weera mukhale oowina ni Muluku.

Ethoonyihero 13: Gidioni ni ngelo a Muluku

Anamathoriha 6:11-21

Olamula wa Debora ni Barak, nloko na Muluku naakhala noororomeleya mpaka iyaakha sincipale. Ekhwaakaru asitokweene, yaahaahiya Apwiya enalapa miluku sikina. Tivawo, Muluku aahaahiya atthu oMidian yaalamula mpaka iyaakha ithanu ni piili. Atthu oMidian yanniiya ni yannaphwata imatta saya. Weera miluku sikina nsaakhavihenre, yaaninla emwiitthanaka Muluku eekhaikhai weera aakhavihere.

Nihiku nimoha mulopwana iitthaniwa Gidioni eepettha izo nipuro noowiipithiheya. Vaanaanoru aakhumelela ngelo a Muluku. Owo aaheera: Apwiya ari ni weyo, nakhotto oolipa! Orowe waavuluxe oIsrayel mmatatani mwa Midian.

Gidioni aahaakhula: "Apwiya, nkaavuluxe hayi, miyo kireene emusi yoolosowa, ni miyo nkikwanne etthu." Apwiya yaamweerela: "Miyo nkikhale ni weyo, ni weyo onimwaawina aMidian."

Gidioni aamvaha yooca ngelo. Ngelo aatava yooca ni ekop'waawe. Ehuhueene yeeyo, mooro waawela nluku yaaraayawo yooca, ni waahisa. Vahoolowaya, ngelo aalakaseiya. Gidioni aasuwela weera ti Apwiya yaalokolola ni yoowo.

Ethoonyihero 14: Gidioni omphwata miluku soopakiwa

Anamathoriha 6:25-32

Emusi ya Gidioni yaalapa miluku sooKana. Siitthaniwa Baal ni Axeera. Muluku aamweerela Gidioni: "Waphwate nipuro nooveleela atithawo apankaaya empakelaka Baal. Wuuhe nttoro ninlampwa Axeera. Weera hiiho opake wooveleela va Apwiya.

Gidioni annoova, aarowa ophwata ohiiyu ni atthu mulokó.

Atthu yaanyoonyiwa ni yaatthuna omwiiva. Apapawe yaaheera: Iya saareene miluku, muhiye siixaakhihe. Kheewo yaakhumelenle ni Gidioni. Gidioni aahaaleela atthu seyo iiwalaawe ni ngelo.

Asinthamwene, ori Muluku mmoha paahi, eekhaikhai.

Ethoonyihero 15: Gidioni onaathanla anakhottowawe

Anamathoriha 7:1-7

Amidian yaathukumana weera ewaneke ni Israyel. Gidioni aahaathukumanyatho anakhotto ootheene. Muluku aamweerela Gidioni: Wookhalano atthu ancipale. Waahokoloxe awo oowoova ni oowaatta soowuupuwela. Ancipale yaahokoleela owaani. Muluku aamweerelatho Gidioni: Nlelo atthu ahaatta... waakuxe waarowihe olusi weera wowoone mawurerwaaya. Anakhotto ancipale yaakokhora enawura ntoko mwalapwa. Ni akina yaawura ni matata, awo waattawaya waari macira mararu.

Muluku aaheera: Ni anakhotto ala, macira mararu, kinoovuluxa nloko naka mwa amwiittani.

Ethoonyihero 16: Owina wa Gidioni

Anamathoriha 7:16-25

Anakhotto a Midian yaathukumana vakhatoni ancipale ntoko nasope. Gidioni anakhottowawe yaari macira mararu, paahi. Ni Muluku aamuleela etthu aakelaawe weera. Gidioni ahaakawela mapalapatta ni mithuko munyaapuni. Yahaarukurera aMidian ohiyu. Gidioni aalamulelakaru, ootheene yaapwexa inyaapu, yiipa mapalapatta ni yannakhuwela: Apwiya, Gidioni!

A Midian saahaarukurera nyurú, yiivana yaaworu, akina etthawaka. Naari atthu a Muluku okhala vakhaani, hoye hoye olosowa, anoowina.

Ethoonyihero 17: Samisoni, nakhotto oolipa

Anamathoriha 13:1 - 14:19

Akhwaakaru Gidioni aIsrayel yaamuttiwala Muluku. Tivawo Muluku aahaahiya aFilisteu yaapakaka ipottha. Muluku aamuthanla okhala mutokweene ni aamvaha ikuru weera aavuluxe aIsrayel. Nsinanawe eeriwa Samisoni. Samisoni ayariwakaru, apapawe yaaheera: Ola ta Muluku. Awo yaaroromeliha weera kherwa emettha maihaawe, naari owura evinyu. Iyo soonihera weera ta Muluku, paahi. Munepa wa Muluku waamvaha ikuru sincipale Samisoni, weera awere waavuluxa aIsrayel. Samisoni aahunnuwa ni aamutthomera mwaamwali aFilisteu. Aarongwaawe aatthomenraawewo, aavariwa ni kharamu. Munepa wa Muluku waamvaha ikuru sincipale Samisoni, mpaka omwiiva kharamu ni matataawe.

Ethoonyihero 18: Samisoni ongwiiva aFilisteu ancipale

Anamathoriha 15

Ehuhu waahakalaliwaaya wa othela wawe, amwarawe yaamweetta onyala. Ni owo aanyoonyiwa aawiiva aFilisteu miloko miraru. Evirakaru ehuhu, Samisoni aahokoleela waamwarawe. Vano atatawe yaahaatheliha mulopwana mukina. Samisoni aanyonyiwaxa aahaavara akhwatte macira mararu anaatthukelela mithuko mmiilani sapattiha mithuko ni aahaahiya. Enavira mamattani, sinaza sooca sootheene. AFilisteu yaahaaruma anakhotto ancipale weera yamvare Samisoni. Niwooko na woova nloko na Samisoni naamwinyerera ootthukiweene wa aFilisteu. Niwooko na Munepa wa Muluku, Samisoni aawera opasa mikoyi aatthukiwaaweno. Aattotta nikhuva na mwaamunama, aawiivano anakhotto macira muloko nihiku nene nennle. Aari mwaakhelaru ikuru sa mweerutthuni wa Muluku, murimaawe khawaakhanle wa Muluku. Hiiho wamunanariha okumaawe.

Ethoonyihero 19: Owiiniwa wa Samusoni

Anamathoriha 16:4-22

Samisoni khanatoko omettha maihaawe. Maihaawe oorakama yoonihera weera ta Muluku onamvaha ikuru. Samisoni aamoona muthiana mukina aaFilisteu ni aamusivela. Nsinanawe eeriwa Delila. Asitokweene aaFilisteu yaamwinya musurukhu mwincipale weera awoonihere Samusoni singwelaayawo ikuru. Mahiku mancipale Delila annamukoha Samusoni ikuru saarweelaya wowi, ni owo annángwoka. Annaaxupa vancipale yaamukóhaka, ni Samusoni aamuleela ekhaikhai. Owo aaheera Muluku ohaaleela asitithaka weera miyo kikhale aMuluku paahi. Maihaaka yametthiwaru ikuru sinookimalela. Nihiku nimoha Samisoni akonaka, Delila aawiitthana anakhotto aaFilisteu. Yaammettha maihaawe ni Muluku aamuhiya Samisoni. Hiihaawo saammalela ikuru sawe. Afilisteu yaamutthuka Samisoni, emwottholaka maithowaawe, ni enamvariha muteko mukalipooso. Weiwo, yaapacera wunnuwa maihaawe.

Ethoonyihero 20: Samisoni ongwiiva aFilisteu ancipale

Anamathoriha 16:23-31

AFilisteu Yaahakalala vancipale Samisoni aaraawe mukalipooso. Hiiho yaahuupuwela waapeiya esadaka ya mulukwaaya Dagoni. Nihiku na sadaka yaamuruuha Samisoni weera emutheeliheke. Yaakhala atthu ancipale mpaani mwa mulukwaaya. Yannamutheeliha Samisoni emutheyaka. Samisoni aamvekela mutthu aamvarela weera aphiteere mavatta meeli yaalipiha nipatho na empa ya muluku Dagoni. Empeene yeele yaari ya maluku. Samisoni aamvekela Muluku eeraka: Apwiya, mukuupuwele ni mukivahe ikurutho vananovava paahi. Samisoni aakakha mavatta yaalipiha nipatho ni ikurusawe sootheene, ni empa yahaamorela ootheene. Samisoni aahookhwa vamoha ni aFilisteu ootheene. Samisoni okhwawawe aawiiva aFilisteu ancipale opwaha aaraawe mukumi. Hiiho Muluku aangwiniha Samisoni wa aFilisteu. Asinthamwene, ti ikuru sa Muluku paahi nneeraahu niwere ongwina Satana. Tivawo, ti wooreera okhala oororomeleya wa Muluku ni omuroromela yoowo.

Ethoonyihero 21: Yeesu onoomola minepa soonanara

Lukas 8:26-39

Sivirakaru iyaakha sincipale yaaraaya Gidioni ni Samisoni, Yeesu aakhalatho oIsrayel. Nihiku nimoha aamphwanya mulopwana mmoha aarino minepa soonanara sincipale. Mulopwaneene, amoonakaru Yeesu, aamukokhorela ni aamweerela: Ontthuna okipaka eheeni, weyo, mwaana a Muluku oopwahaxa? Minepa sene seiyo saasuwela weera Yeesu, mwaana a Muluku. Yeesu aalamulela minepa soonanara weera sikhumme mookumini mwa mulopwana. Minepa soonanara saavolowa mukuluweni saari vakhiviru. Ikuluwe saaxumpwa ni minepa soonanara ni saatthimaka siivonyeraka mphareya sinaamireya. Atthu yoonne annikhalela onamoona weera Yeesu ookhalano ikuru ompwaha Satana ni minepa soonanara. Mulopwana aarino eretta ya minepa aalama ni aatthuna omutthara Yeesu. Yeesu aamweerela, "oroweke owaani ni wakhaleleke onamoona seiyo Muluku owerenlaawo.

Masu a Muluku annileela weera Yeesu ohaakhela ikuru sootheene sa wirimu ni sa vathi. Owo ookhalano ikuru soowoomola minepa soonanara. Minepa soonanara sookhalano ikuru, ni sinnoomoliwa munsina na Yeesu ni ikuru sa Munepa Wootteela.

Ethoonyihero 22: Yeesu ongwoomola atthu oonanara

Lukas 19:45 - 20:2

Nihiku nimoha Yeesu aarowa mpaani wa Muluku o Yerusalemu. Atthu yaapanka moothumihamo mpaani wa Muluku niwooko noowaathumiha axinama amukuttho. Asitokweene adiini yannawina musurukhu yaawokaaya atthu. Yeesu aanyoonyiwa aawoomola ananakoso ni axinama, amwaramwaraka musurukhwaaya.

Ni aaweerela, "Moolempwa mmasuni a Muluku: Empaaka eniyiitthaniwe empa ya mavekelo - nyuwo mootatuxa empa ya anamwiiya". Yeesu okosoopa wawe wootteela, aathanya yoottheka. Asitokweene adiini khayaakhanle annene, vano Yeesu aasuwela mirima saya. Asitokweene adiini yannaasa ehuhu weera emwiive Yeesu.

Ethoonyihero 23: Yeesu ookhala mukumi akhwaakaru

Mat 28:16-20

Asitokweene adiini khiyaakhulela weera Yeesu mwaana a Muluku, ni khiyaatthuna owo okhala mweenaaya. Tivawo yaamoothera itthu sincipale ni yaamvara enamuroiha woothorihiwani. Yaamwiiva Yeesu, emukhomelaka vamuttaandani.

Nihiku nanaararu, aavinyerera mookhwaani, niwooko Muluku aamvaha ikuru weera awine okhwa. Atthu yaamutthara Yeesu, ni akina, yaamooniye yaakhalela onamoona weera owo mukumi. Mpuwa wa mahiku miloko mixexe, Yeesu aahiixoonihera wa yaawo yaamutthara, yannaca vamoha aahusihaka masu a Muluku.

Ahaakuvale, othaamiheriwa wiirimu emoonaka, aaweerela: "Koovahiwa olamula wootheene wiirimu ni vathi. Murowe, mwaatatuxe atthu ootheene oohuseraaka. Mwaarapiheke mu nsina naAtiithi, naMwaana, ni na Munepa Wootteela, mwaahusihaka sootheene koorummaakani. Miyo kiri ni nyuwo mahiku ootheene mpaka ommaleloni wa elapo."

Ethoonyihero 24: Nakhotto a Muluku

Ef 6:10-18

Nohiiwa aIsrayel wawinawaya amwiittanaaya ni ekhavihero ya Muluku. Hiyotho nookhalano mwiittanaahu oonanara, Satana. Masu a Muluku annileela weera hiyo khaningwera ongwina. Yeesu oongwina Satana. Owo ooniroromeliha weera hiyo nakhala ntoko oniroromelinghaawe, onoonikhavihera. Ti Yoowo onnivaha ikuru weera nimukhootteke Satana. Nniwere omukhootta niirehera ntoko nimoonnaahu nakhotto ola nnooniheriwaahu.

Emmwaakiha tiila: Yoopacera: Ohima ekhaikhai ni okhala nittharaka ekhaikhai. Ekhaikhai ennanikhaliha oolipa. Yanaaveeli: Osuwela weera Muluku oomaliha soottheka sahu, ti yoowaakiha murimaaka. Yanaararu: Omulaleya Yeesu mvuluxa, onkhala ntoko isapatu sinnikhapelela ngweettani mwahu. Yanaaxexe: Omuroromela Muluku ti yoowaakiha enkela ocipiha mavaka mootheene a mooro Satana onnivonyeraawe.

Yanaathanu: Osuwela weera Yeesu ookuxa othorihiwa wahu, noovuluxiwa, ecipewa enaakiha muupuwelowaahu.

Nakhottotho ookhalano kapwitthi. Kapwitth'eene yoowo, masu a Muluku. Ni yoowo nnoophwata wootha wa Satana.

Ekhottoweene yeeyo khaningwera opaka etthu ehikhanle mavekelo wa Muluku. Hiiho nnoongwina Satana ni soottheka.